Ganga stotram – Vadirajaru

From Teertha Prabandha

ತ್ವಂ ದೀನೇಷು ದಯಾವತೀತಿ ವಿದಿತಂ ಯದ್ಬ್ರಹ್ಮಹಸ್ತಾಶ್ರಯಂ
ಪ್ರಾಪ್ತಾಥಾಚ್ಯುತಪಾದಸಂಗಮಹಿತಾ ಪಶ್ಚಾಚ್ಚ ನಾಕಂ ಗತಾ |
ಸೌವರ್ಣಾಚಲಶೃಂಗಮೇತ್ಯ ಮುದಿತಾ ಶಂಭೋಃ ಶಿರಃ ಸಂಗತಾಽ
ಪ್ಯಾಸ್ಮಾಕಕ್ಷಿತಿಮಂಡಲೇ ತ್ರಿಪಥಗೇ ತುಷ್ಟಾಸ್ಯಭೀಷ್ಟಪ್ರದಾ | ೧ |

ಆದೌ ಪಾದತಲೋರ್ಧ್ವಭಾಗಮಹಸಾ ಯಾ ರಕ್ತನೀಲಾ
ಹರೇಃ
ಸ್ವರ್ಗಸ್ತ್ರೀಕುಚಕುಂಕುಮಾಂಕನಯನೋಪಾಂತಶ್ರಿಯಾಭ್ಯಂತರೇ |
ಅಂತೇ ಶಂಭುಕಪರ್ದಪನ್ನಗಗಲಶ್ರೇಣಿಜ್ವಲಜ್ಯೋತಿಷಾ
ಜನ್ಮಾರಭ್ಯ ಸರಸ್ವತೀನತನಯಾಸಂಗೇವ ಗಂಗಾಸ್ತಿ ಸಾ | ೨ |

ಅಜ್ಞಾನಾದ್ಯದಿ ಸಜ್ಜನೇಷು ರಚಿತದ್ರೋಹಾನ್ಮಯಿ ಸ್ವರ್ಧುನಿ
ಸ್ವಸ್ಫೂರ್ತ್ಯಾ ಸುಜನೇಷು ದೂಷಣಗಣಾರೋಪಾದವಜ್ಞಾ ತವ |
ತರ್ಹಿ ತ್ವಾಂ ಸಗರಾತ್ಮಜಾಸ್ಥಿನಿಕರಾಃ ಜಾನಂತಿ ಕಿಂ ತೈಃ ಪ್ರಭೋಃ
ದ್ರೋಹಃ ಕಿಂ ನ ಕೃತಂ ಕಿಮಂಬ ನ ಹರಾವರೋಪಿತಾ ಚೋರತಾ | ೩ |

ಆರಭ್ಯಾಬ್ಜಲೋಕಮಾಕ್ಷಿತಿತಲಾದಾಯಾತಯಾ ಕಿಂ ತ್ವಯಾ
ಮಚ್ಚಿತ್ತಂ ಬಹುದೂರಮಿತ್ಯಬಲಯಾ ತ್ಯಕ್ತಂ ಭಿಯಾ ಜಾಹ್ನವಿ |
ಅಕ್ಷಯ್ಯಾ ಚಲತುಂಗಶೃಂಗನಿಕರಾನ್ನಿರ್ಭಿದ್ಯ ಯಾಂತೀ ಮಮ
ಸ್ವಲ್ಪಂ ಕಿಂ ಬಹುಮನ್ಯಸೇಽಶುಭಕುಲಂ ಗಂಗೇಽಂತರಂಗೇ ಚಲಮ್ | ೪ |

ಅಸ್ಥಿಸ್ಪರ್ಶನಮಾತ್ರತಃ ಕಿಮು ತವ ಶ್ರೇಯಃಪ್ರದತ್ವಂ ಗತಂ
ವಿಸ್ತೀರ್ಣಾ ನ ಕಿಮಚ್ಯುತಸ್ಯ ನಗರೀ ಮನ್ಮಾತ್ರದೇಶೋಜ್ಝಿತಾ |
ತದ್ವರ್ತ್ಮಾಪಿ ಸಕಂಟಕಂ ಕಿಮು ಸತಾಂ ಸಂತಾನಜೋಽಹಂ ನ ಕಿಂ
ಕಸ್ಮಾದಂಬ ನ ಮೇ ಪ್ರದಾಸ್ಯಸಿ ಪದಂ ಗಂಗೇಽಖಿಲಾರ್ಥಪ್ರದಮ್ | ೫ |

ಹೇ ಗಂಗೇ ತವ ಕೋಮಲಾಂಫ್ರಿನಲಿನಂ ರಂಭೋರು ನೀವೀಲಸತ್
ಕಾಂಚೀದಾಮತನೂದರಂ ಘನಕುಚಾವ್ಯಾಕೀರ್ಣಹಾರಂ ವಪುಃ |
ಸನ್ಮುದ್ರಾಂಗದಕಂಕಣಾವೃತಕರಂ ಸ್ಮೇರಂ ಸ್ಫುರತ್ಕುಂಡಲಂ
ಸಾರಂಗಾಕ್ಷಿ ಜಲಾನ್ಯದಿಂದುರುಚಿ ಯೇ ಜಾನಂತಿ ತೇಽನ್ಯೇ ಜಲಾತ್ | ೬ |

ಶ್ರೀನಾರಾಯಣರಾಮಗೋಪತಿಹೃಷೀಕೇಶಾದಿರೂಪೋಽಕ್ಷಮ
ಸ್ತ್ವಾಂ ಹಾತುಂ ಹರಿಸೂಕರಾಕೃತಿರಥ ಶ್ರೀದೇವಹೂತ್ಯಾತ್ಮಜಃ |
ವೇಣೀಮಾಧವಬಿಂದುಮಾಧವತನುಸ್ತೀರೇ ವ್ಯಧತ್ತ ಸ್ಥಿತಿಂ
ಗಂಗೇ ಕಿಂ ಬಹುನಾಧುನಾಪಿ ವಸತಿ ತ್ವದ್ಭರ್ತೃಗೇಹೇ ಹ್ಯಸೌ | ೭ |

ಗಂಗೇ ತ್ವಂ ಶುಭಸಂಚಯಸ್ಯ ಜಯದಾ ದೋಷಾತ್ಮನಾಂ ನ ತ್ವಿತಿ
ಜ್ಞಾತಂ ಯತ್ ಕ್ರತುಕೋಟ್ಯಲಭ್ಯಸುಕೃತಸ್ಯಾಭ್ಯುನ್ನತಿಂ ಯಚ್ಛಸಿ |
ದುಷ್ಕರ್ಮಾಣ್ಯಮಿತಾನಿ ದೂರಯಸಿ ಯತ್ ತ್ವದ್ಗೇಯತೋಯೇಕ್ಷಯಾ
ಪಾನೇನಾಪ್ಯವಗಾಹನೇನ ಮನಸಾ ಧ್ಯಾನೇನ ಗಾನೇನ ವಾ | ೮ |

| ಶ್ರೀವಾದಿರಾಜಪೂಜ್ಯಚರಣವಿರಚಿತಂ ತೀರ್ಥ
ಪ್ರಬಂಧಸ್ಥ ಗಂಗಾ ಸ್ತೊತ್ರಂ ಸಂಪೂರ್ಣಂ ಶ್ರೀಕೃಷ್ಣಾರ್ಪಣಮಸ್ತು |

---

tvaM dInEShu dayAvatIti viditaM yadbrahmahastASrayaM
prAptAthAcyutapAdasaMgamahitA paScAcca nAkaM gatA |
sauvarNAcalaSRuMgamEtya muditA SaMBOH SiraH saMgatA&
pyAsmAkakShitimaMDalE tripathagE tuShTAsyaBIShTapradA | 1 |

Adau pAdatalOrdhvaBAgamahasA yA raktanIlA
harEH
svargastrIkucakuMkumAMkanayanOpAMtaSriyAByaMtarE |
aMtE SaMBukapardapannagagalaSrENijvalajyOtiShA
janmAraBya sarasvatInatanayAsaMgEva gaMgAsti sA | 2 |

aj~jAnAdyadi sajjanEShu racitadrOhAnmayi svardhuni
svasPUrtyA sujanEShu dUShaNagaNArOpAdavaj~jA tava |
tarhi tvAM sagarAtmajAsthinikarAH jAnaMti kiM taiH praBOH
drOhaH kiM na kRutaM kimaMba na harAvarOpitA cOratA | 3 |

AraByAbjalOkamAkShititalAdAyAtayA kiM tvayA
maccittaM bahudUramityabalayA tyaktaM BiyA jAhnavi |
akShayyA calatuMgaSRuMganikarAnnirBidya yAMtI mama
svalpaM kiM bahumanyasE&SuBakulaM gaMgE&MtaraMgE calam | 4 |

asthisparSanamAtrataH kimu tava SrEyaHpradatvaM gataM
vistIrNA na kimacyutasya nagarI manmAtradESOjjhitA |
tadvartmApi sakaMTakaM kimu satAM saMtAnajO&haM na kiM
kasmAdaMba na mE pradAsyasi padaM gaMgE&KilArthapradam | 5 |

hE gaMgE tava kOmalAMPrinalinaM raMBOru nIvIlasat
kAMcIdAmatanUdaraM GanakucAvyAkIrNahAraM vapuH |
sanmudrAMgadakaMkaNAvRutakaraM smEraM sphuratkuMDalaM
sAraMgAkShi jalAnyadiMduruci yE jAnaMti tE&nyE jalAt | 6 |

SrInArAyaNarAmagOpatihRuShIkESAdirUpO&kShama
stvAM hAtuM harisUkarAkRutiratha SrIdEvahUtyAtmajaH |
vENImAdhavabiMdumAdhavatanustIrE vyadhatta sthitiM
gaMgE kiM bahunAdhunApi vasati tvadBartRugEhE hyasau | 7 |

gaMgE tvaM SuBasaMcayasya jayadA dOShAtmanAM na tviti
j~jAtaM yat kratukOTyalaByasukRutasyAByunnatiM yacCasi |
duShkarmANyamitAni dUrayasi yat tvadgEyatOyEkShayA
pAnEnApyavagAhanEna manasA dhyAnEna gAnEna vA | 8 |

| SrIvAdirAjapUjyacaraNaviracitaM tIrtha
prabaMdhastha gaMgA stotraM saMpUrNaM SrIkRuShNArpaNamastu |