ಸ್ವಾಮಿಪುಷ್ಕರಿಣೀತಟೇ ಕೃತಮಂದಿರಂ ಸುಖಮಂದಿರಮ್ |
ಇಂದಿರಾಕರಪಲ್ಲವಾಂಚಿತಚಾರುಪಾದಸರೋರುಹಮ್ ||
ಭೂಸುರೇಪ್ಸಿತಪೂರಣೇ ಸುರಭೂರುಹಾಯಿತವಿಗ್ರಹಮ್ |
ಪುಂಡರೀಕದಲೇಕ್ಷಣಂ ಪ್ರಣತೋಽಸ್ಮಿ ವೇಂಕಟನಾಯಕಮ್ || ೧ ||
ಪಂಕಜಾಸನಶಂಕರಾದಿಹೃದಂಬುಜಾಕ್ಷಿವಿಕಾಸನಾತ್ |
ಬಾಲಭಾನುಕರೈರ್ನಿವಾರಿತಹೃತ್ತಮೋವಿನಿಕೃಂತನಾತ್ ||
ಸೂರ್ಯಕೋಟಿಸಹಸ್ರತೋಽಪ್ಯತಿದೀಪ್ತಿಮತ್ತಲಪಲ್ಲವಮ್ |
ಪುಂಡರೀಕದಲೇಕ್ಷಣಂ ಪ್ರಣತೋಽಸ್ಮಿ ವೇಂಕಟನಾಯಕಮ್ || ೨ ||
ಭಾನುಚಂದ್ರಮಸೋರ್ನಿಗೂಹಕರಾಹುಮಂಡಲಭೀಷಣಾತ್ |
ಭಾನುಚಂದ್ರಸಹಸ್ರತೋಽಪ್ಯತಿಕಾಂತಿಮನ್ನಖಪಂಕ್ತಿಕಮ್ ||
ಅಂಗುಲೀದಲರಂಜಿತಾಮಲಪಾದಪದ್ಮವಿರಾಜಿತಮ್ |
ಪುಂಡರೀಕದಲೇಕ್ಷಣಂ ಪ್ರಣತೋಽಸ್ಮಿ ವೇಂಕಟನಾಯಕಮ್ || ೩ ||
ವೃತ್ತವರ್ತುಲಶೀಲಸತ್ತಮವರ್ಣಿತೈರ್ಗುಣಗೋಗಣೈಃ |
ಪೂರ್ಣವರ್ತುಲಮನ್ಮಥೇಷುಧಿಯುಗ್ಮತುಲ್ಯಸುಜಂಘಕಮ್ ||
ರತ್ನದರ್ಪಣಸನ್ನಿಭಾಜಿತಜಾನುಮಂಡಲಭೂಷಿತಮ್ |
ಪುಂಡರೀಕದಲೇಕ್ಷಣಂ ಪ್ರಣತೋಽಸ್ಮಿ ವೇಂಕಟನಾಯಕಮ್ || ೪ ||
ಭಾಗ್ಯದೇವಿಸುನೂಪುರಾಯುತಕರಿಕರೋರುಯುಗೋಜ್ಜ್ವಲಮ್ |
ಸ್ವರ್ಣವಸ್ತುನಿತಂಬಸಂಸ್ಥಿತಪದ್ಮಜಾಂಡಕಟಾಹಕಮ್ ||
ರತ್ನಭಾಸುರಶಸ್ತಹಾಟಕಮೇಖಲಾಪರಿಮಂಡಿತಮ್ |
ಪುಂಡರೀಕದಲೇಕ್ಷಣಂ ಪ್ರಣತೋಽಸ್ಮಿ ವೇಂಕಟನಾಯಕಮ್ || ೫ ||
ನಿಮ್ನನಾಭಿಸರೋಜಸಂಸ್ಥಿತಕಾಲಿರಾಜನತಂ ಸದಾ |
ಸೋದರಸ್ಥಿತಲೋಕಭೇದವಿದೀಪಕೈರ್ವಲಿಭಿರ್ಯುತಮ್ ||
ಶ್ರೀಕರಾಬಸದೋಪಗೂಹನದೀಪ್ತಿಮತ್ತನುಮಧ್ಯಮಮ್ |
ಪುಂಡರೀಕದಲೇಕ್ಷಣಂ ಪ್ರಣತೋಽಸ್ಮಿ ವೇಂಕಟನಾಯಕಮ್ || ೬ ||
ಸ್ವಾವಲೋಕನತೋಽಭಿತೋಽಪ್ಯತಿಸಂಪದಾಮಪಿ ವೃಷ್ಟಯೇ |
ಉನ್ನತಸ್ಥಲಕಾಂಕ್ಷಯೈವ ಯದುನ್ನತೋರಸಿ ರಂಜತೇ ||
ಶ್ರೀಃ ಸದಾ ತಮಸಂತಸದ್ಗುಣಭೂಷಣಂ ಗತದೂಷಣಮ್ |
ಪುಂಡರೀಕದಲೇಕ್ಷಣಂ ಪ್ರಣತೋಽಸ್ಮಿ ವೇಂಕಟನಾಯಕಮ್ || ೭ ||
ಇಂದಿರಾಪರಿವಾರಿತಾಂ ಸಮಭೀಷುಭಿಃ ಶುಭಲಕ್ಷಣಮ್ |
ಹಾರಕೌಸ್ತುಭರತ್ನರಾಜಸುವರ್ಣರತ್ನಸರೈಸ್ತದಾ ||
ಽಮ್ಲಾನಯಾ ವನಮಾಲಯಾ ಪರಿಭೂಷಿತಾಯತವಕ್ಷಸಮ್ |
ಪುಂಡರೀಕದಲೇಕ್ಷಣಂ ಪ್ರಣತೋಽಸ್ಮಿ ವೇಂಕಟನಾಯಕಮ್ || ೮ ||
ಭಾನುಚಂದ್ರಮಸೋರ್ನಿಗೂಹಕರಾಹುಮಂಡಲಭೀಷಣಾತ್ |
ಭಾನುಚಂದ್ರಸಹಸ್ರತೋಽಪ್ಯತಿಭಾಸುರಾರಿಧರಾನ್ವಿತಮ್ ||
ಕಟಿತಟಾರ್ಪಿತವಾಮಬಾಹುಮಭೀತಿದಂ ಜಗತೀಹಿತಮ್ |
ಪುಂಡರೀಕದಲೇಕ್ಷಣಂ ಪ್ರಣತೋಽಸ್ಮಿ ವೇಂಕಟನಾಯಕಮ್ || ೯ ||
ಅಂಗುಲೀಯಕಕಂಕಣಾಂಗದಪೂರಭಾಸುರಭೂಷಣೈಃ |
ಇಂದಿರಾಹೃದಯಂಗಮಾತಿವಿಲಾಸಪೂರ್ವಕಚೇಷ್ಟಯಾ ||
ಽಲಂಕೃತಾಮಲದೀರ್ಘಪೀವರವೃತ್ತಬಾಹುಚತುಷ್ಟಯಮ್ |
ಪುಂಡರೀಕದಲೇಕ್ಷಣಂ ಪ್ರಣತೋಽಸ್ಮಿ ವೇಂಕಟನಾಯಕಮ್ || ೧೦ ||
ಕಂಬುಕಂಧರನಿಃಸೃತಾಮಿತವೇದಸಂತತಿಘರ್ಷಣಾ- |
ದ್ರಕ್ತಿಮಾಧರಕಾಂತಿರಂಜಿತಕುಂದದಂತಸುಭಾಷಿತಮ್ ||
ಕುಂಡಲದ್ವಯಮಂಡಿತಾಮಲಗಂಡಸಂಪುಟಮಂಡಿತಮ್ |
ಪುಂಡರೀಕದಲೇಕ್ಷಣಂ ಪ್ರಣತೋಽಸ್ಮಿ ವೇಂಕಟನಾಯಕಮ್ || ೧೧ ||
ಭಾನುಚಂದ್ರಮಸೋರ್ನಿಗೂಹಕರಾಹುಮಂಡಲಭೀಷಣಾ- |
ದ್ಭಾನುಚಂದ್ರಸಹಸ್ರತೋಽಪ್ಯತಿಶೋಭಿತಂ ಮುಖಪಂಕಜಮ್ ||
ಪದ್ಮಪತ್ರವಿಶಾಲನೇತ್ರಸುದೃಷ್ಟಿಕೈರವಬೋಧನಾತ್ |
ಪುಂಡರೀಕದಲೇಕ್ಷಣಂ ಪ್ರಣತೋಽಸ್ಮಿ ವೇಂಕಟನಾಯಕಮ್ || ೧೨ ||
ಇಂದ್ರಚಾಪಸಮಾನಭ್ರೂಯುಗಸುಂದರೋನ್ನತನಾಸಿಕಮ್ |
ಕೇಸರೇಣ ವಿನಿರ್ಮಿತಾಮಲಪುಂಡ್ರಫಾಲನಿಶಾಕರಮ್ ||
ಸೂರ್ಯಕೋಟಿಸದೃಕ್ಕಿರೀಟವಿಘಟ್ಟಿ ತೋನ್ನತಮಸ್ತಕಮ್ |
ಪುಂಡರೀಕದಲೇಕ್ಷಣಂ ಪ್ರಣತೋಽಸ್ಮಿ ವೇಂಕಟನಾಯಕಮ್ || ೧೩ ||
ಮಧ್ವಪೂಜಿತವಿಟ್ಠಲಸ್ಯ ಕೃಪಾವಶಾದ್ರಚಿತಾಮಿಮಾಮ್ |
ವಿಶ್ವಪತ್ಯಭಿಧಾಯುಜಾ ಪರಿಶುದ್ಧಮಾನಸಸಂಯುಜಾ ||
ಯಃ ಸ್ತುವೀತ ನರೋಽಮುನಾ ಹರಿಪಾದಪದ್ಮಯುಗೇ ಸದಾ |
ನಿಶ್ಚಲಾಂ ಸ್ಮೃತಿಮಾಪ್ನುಯಾನ್ನಿರನಿಷ್ಟದಾಂ ನಿಖಿಲೇಷ್ಟದಾಮ್ || ೧೪ ||
