Composer : Shri Vadirajaru
ಮೌಕ್ತಿಕಾಂಕುರಕಲ್ಪದಂಷ್ಟ್ರಮುಖಾಂಬುಜಂ ಪ್ರಲಯಾಂಬುಜಂ |
ಚಕ್ರಶಂಖವರಾಭಯಾದಿಲಸತ್ಕರಂ ಸುಯಶಸ್ಕರಮ್ |
ರತ್ನರಾಜಿವಿರಾಜಿವೃತ್ತಶಿರೋಧರಂ ಧರಣೀಧರಮ್ |
ಪೋತ್ರಿರೂಪಿಣಮಚ್ಯುತಂ ಪ್ರಣತೋಽಸ್ಮಿ ತಂ ಸುಖದಸ್ಮಿತಮ್ |೧|
ಅಂಕಹೀನನಿಶೇಷಬಿಂಬಸಮಾನನಂ ನಿಜಮಾನನಮ್ |
ಶಂಖಮಾಲ್ಯಸುಬೋಧಪುಸ್ತಕಧಾರಿಣಂ ಮಧುವೈರಿಣಮ್ |
ಕುಂಕುಮಾಂಕಿತಚಂದನೋಜ್ವ ಲಕಂಧರಂ ಶ್ರುತಿಮಂದಿರಮ್ |
ಕಿಂಕರೀಕೃತವಿಶ್ವಮಶ್ವಮುಖಂ ಭಜೇ ಸುಖದಂ ಭಜೇ |೨|
ನೀಲಶೈಲವಿಶಾಲವಪ್ರಲಸದ್ಭುಜಾಂತರಸದ್ಭುಜ |
ಬಾಲ್ಯಮಾನುಷಸಕ್ತ ಭೂಲಲನಾಶ್ರಮಘ್ನ ಜಿತಶ್ರಮ |
ಮಾಲತೀಮಣಿಮಂಜುಮಾಲ್ಯಸರೋಜನೇತ್ರಗುರೋಽಜನೇ |
ಕೋಲರೂಪ ಭವಂತಮೀಶ ನತೋಸ್ಮಿ ತಂ ಸುಖದಸ್ಮಿತಮ್ |೩|
ಹಾರಶೋಭಿವಿಶಾಲವಕ್ಷಸಮೀಶ್ವರಂ ಶ್ರಮಘಸ್ಮರಮ್ |
ವಾರಿಜಾತಸುಜಾತಪತ್ರವಿಲೋಚನಂ ಘೃತಸೇಚನಮ್ |
ಶಾರದಾಂಬುದಸನ್ನಿಭಂ ಸಕಲೋನ್ನತಂ ಸುಜನೈರ್ನುತಮ್ |
ಪಾರವರ್ಜಿತಶೌರ್ಯಮಶ್ವಮುಖಂ ಭಜೇ ಸುಖದಂ ಭಜೇ |೪|
ಜಾತರೂಪಮಯಾಗ್ರ್ಯಮಧ್ಯವಿಭೂಷಣಂ ಭವಭೀಷಣಮ್ |
ಪೀತವಸ್ತ್ರವಿಷಕ್ತಸದ್ರಶನೋರ್ಜಿತಂ ಮಲವರ್ಜಿತಮ್ |
ಆತತಾಯಿಸುರಾರಿಸಂಚಯಭಂಗದಂ ಕನಕಾಂಗದಮ್ |
ಖ್ಯಾತಸೂಕರರೂಪಿಣಂ ಪ್ರಣತೋಽಸ್ಮಿ ತಂ ಸುಖದಸ್ಮಿತಮ್ |೫|
ಪದ್ಮರಾಗವಿರಾಜಿಕಿಂಕಿಣಿಮೇಖಲಾಂಚಿತಮೇಖಲಮ್ |
ಸಾಧ್ಯಬುದ್ಧಿಕರಂ ವರೋದರಬಂಧನಂ ಸ್ಮರತಾಂ ಧನಮ್ |
ತ್ವಾದ್ಯ ಚಿಂತಯ ಉದ್ಯದರ್ಕಸಮಾಂಬರಂ ಗತಡಂಬರಮ್ |
ತದ್ವರಾಯ ಭವಂತಮಶ್ವಮುಖಂ ಭಜೇ ಸುಖದಂ ಭಜೇ |೬|
ಮೃದ್ವಿಭೇಂದ್ರಕರೋಪಮಾಂಕಗವಲ್ಲಭಂ ಸುರವಲ್ಲಭಮ್ |
ಸ್ನಿಗ್ಧಜಾನುಯುಗಂ ಮನೋರಮಜಂಘಮುದ್ಧತಜಂಗಮಮ್ |
ಪದ್ಮಶೋಭಿಪದಾಧರೀಕೃತನಾಗಮಾನ್ಯಘನಾಗಮಮ್ |
ವೇದ್ಯಮದ್ಭುತಸೂಕರಂ ಪ್ರಣತೋಽಸ್ಮಿ ತಂ ಸುಖದಸ್ಮಿತಮ್ |೭|
ವರ್ತುಲೋರುಯುಗಂ ಮನೋರಮವೃತ್ತಜಾನುಮವೃತ್ತಜಾ
ಸ್ತುತ್ಯಕೋಮಲಪುಷ್ಪಜಂಘಮಹೀನತಲ್ಪಮಹೀನತಮ್ |
ರಕ್ತಶಾರದಚಾರುಪದ್ಮಲಸತ್ಪದಂ ನಿಗಮಾಸ್ಪದಮ್ |
ದೈತ್ಯವಾರ್ಧಿಮಹೋರ್ವಮಶ್ವಮುಖಂ ಭಜೇ ಸುಖದಂ ಭಜೇ |೮|
ವಾದಿರಾಜಯತೀರಿತಾ ಹಯವಕ್ತ್ರಭೂಧರವಕ್ರಭೂ-|
ರ್ವೇದವಾಗಿವ ಪಾವನೀ ಪರಮಸ್ತುತಿರ್ಗುಣವಿಸ್ತೃತಿಃ |
ಸಾದರಂ ಪಠತಾಂ ಸತಾಂ ಹರಿಪಾದಪೇಶಲಪಾದಪೇ |
ಸಾಧುಭಕ್ತಿಲತಾಂ ಸ್ಥಿರೀಕುರುತೇತರಾಂ ಕೃತಕೇತರಾಮ್ |೯|