22. Svaapnavrundavanakhyana

Composer : Shri Vadirajaru

| ಅಥ ದ್ವಾವಿಂಶಾಧ್ಯಾಯ: |

೧. ಶ್ರೀಪತಿ ಪ್ರಕರಣಮ್ | ಶ್ಲೋಕಾ: ೧

ಹರಿ: ಓಂ |

ಶ್ರೀಪತೇ ಗೃಹಕೃತ್ಯಂ ತೇ ಬಹ್ವಸ್ತಿ ಹಿತ್ವಾ ಚ ತತ್ |
ನಂದನಾಗ್ರೇ ವದಸ್ವ ತ್ವಂ ಚರಮಾಂ ವಾ ಕೃತಿಂ ಪ್ರಿಯ |೧|

೨. ಶೇಷದ್ರಿಪಂಡಿತ ಪ್ರಕರನಮ್ | ಶ್ಲೋಕಾ: ೨

ತದ್ವೇಂಕಟಗಿರೇರ್ನಾಮಧರ ಪೂರ್ವಂ ತ್ವಯಾರ್ಜಿತಂ |
ಕರ್ಮ ವೃಂದಾವನಾಶ್ವತ್ಥ ಸೇವಾಪರಶುನಾ ಹನ |೨|

೩. ವಾಸುದೇವಮುನಿ ಪ್ರಕರಣಮ್ | ಶ್ಲೋಕಾ: [೩-೫]

ವಾಸುದೇವಮುನೇ ಭಾನೋರ್ಯಥಾ ತಾಮಸನಾಶನಂ |
ತಥೈನಸೋ ವಿನಾಶೋಽಭೂತ್ ಮಾಧವನ್ನಾಸ್ಯ ಭೋಜನಾತ್ |೩|

ಪೂರ್ವಂ ಕೃಷ್ಣಾಕರಸ್ಪೃಷ್ಟಮನ್ನಂ ಕಾಮ್ಯವನೇ ಮುನೇ |
ಭುಕ್ತ್ವಾ ಚ ಮುನಯಃ ಸನ್ನಪಾಪಾಸ್ತ್ವಂ ಮಾಧವಾನ್ನತಃ |೪|

ಭುವಿಪೂಜಾಧಿಕಾರೋಽಭೂತ್ ತವ ಜಾತೈನಸಃ ಕ್ಷಯೇ |
ಭವಜಾರ್ತಿಶ್ಚ ತೇ ನ ಸ್ಯಾತ್ ದಿವಿ ವಾ ವಾಙ್ ನ ಮೇ ಮೃಷಾ |೫|

೪. ವೇದವೇದ್ಯ ಶ್ರೋತೃಕ ಪ್ರಕರಣಮ್ | ಶ್ಲೋಕಾ: [೬-೧೧]

ಅಮುಚನ್ನಮುಚಿಸ್ತಿಮಿರಂ ಸಮರೇತ್ಯಾದಿ ಪದ್ಯತಃ |
ಪೂರ್ವಪದ್ಯಾರ್ಥಾನುಕೂಲ್ಯಾದರ್ಥಂ ತ್ವಂ ಚೋಕ್ತವಾನಸಿ |೬|

ಮತ್ತಾತ್ಪರ್ಯಂ ತ್ವಮೇವೇಹ ಜಾನಾಸಿ ಶ್ರೀನಾಥನಾಮಯುಕ್ |
ಕೋ ನಾಮ ತವ ಸಾದೃಶ್ಯಂ ಸಮರ್ಥಃ ಪ್ರಾಪ್ತುಮಂಜಸಾ |೭|

ಉಪಕ್ರಮಾದಿಲಿಙ್ಗೈಶ್ಚ ಮತ್ತಾತ್ಪರ್ಯವಿನಿರ್ಣಯಂ |
ಕರೋಷಿ ಪೂರ್ಣಸಾದೃಶ್ಯಂ ಗತೋಽಸಿ ಮಮ ಸರ್ವಥಾ |೮|

ಉಪಕ್ರಮೋಪಸಂಹಾರಾವಭ್ಯಾಸೋಽಪೂರ್ವತಾ ಫಲಂ |
ಅರ್ಥವಾದೋಪಪತ್ತೀ ಚ ಲಿಙ್ಗಂ ತಾತ್ಪರ್ಯನಿರ್ಣಯೇ |೯|

ಇತಿ ಷಡ್ವಿಧತಾತ್ಪರ್ಯ ಲಿಙ್ಗಾನ್ನಿರ್ಣೀಯ ಏವ ಚ |
ಕರ್ಣಶ್ರಾವ್ಯಾರ್ಥಸಾರಂ ತ್ವಂ ವ್ಯಾಕರೋಷಿ ಕುಮಾರಕ |೧೦|

ತಸ್ಮಾನ್ಮೇ ಪಟ್ಟಭದ್ರೇಹ ಸಂತು ಭದ್ರಾಣಿ ಸರ್ವದಾ |
ಅಭದ್ರಾಣಿ ಪ್ರಣಶ್ಯಂತು ಕ್ಷುದ್ರಾಸ್ತೇ ವೈರಿಣಸ್ತಥಾ |೧೧|

೫. ಶ್ರೀಪತಿ ಪ್ರಕರಣಮ್ | ಶ್ಲೋಕಾ: [೧೨-೧೬]

ಹೇ ನಂದನ ದ್ವಿಜೋಽಯಂ ತೇ ನಂದನಸ್ಪಂದನಂ ವಿನಾ |
ವೃಂದಾವನೇ ಚ ಮಂದಾನಾಂ ನಂದಯಿಷ್ಯತಿ ನಂದನೈಃ |೧೨|

ತಸ್ಯ ಕಿಂಚಿತ್ ಸಹಾಯಂ ತ್ವಂ ಕುರು ಚಾನ್ನಾರ್ಥಮರ್ಥತಃ |
ನಾನ್ನಮಂತ್ರಂ ಕುರು ವ್ಯರ್ಥಂ ಸಾರ್ಥಕಂ ಕುರು ಶೀಘ್ರತಃ |೧೩|

ತ್ವಂ ವದಸ್ವೇತಿ ವಾ ಮಾ ವಾಽಹಂ ದದಾಮ್ಯನ್ಯಪೂರುಷೈಃ |
ಮಂದಸ್ಮಿತ ಕುರುಷ್ವೇಹ ವೃಂದಾವನಪತೇರ್ವಚಃ |೧೪|

ದರಿದ್ರೈರಪಿ ದಾಸ್ಯಾಮಿ ಧನಾಢ್ಯೈಃ ಕಿಂ ವದೇ ತವ |
ದಾಸ್ಯಾಮೀತಿ ಸುದಾಮಾಗ್ರ್ಯ ಮದ್ದಾಸಾಯ ಮಹಾಮತೇ |೧೫|

ತ್ವಮಪೀಹ ಧನಾಢ್ಯೋಽಸಿ ದೃಢಬುದ್ಧಿಂ ಸದಾ ಕುರು |
ಮೃಡೋಽಪಿ ತೇ ಮನಸ್ತತ್ವಂ ಪ್ರೇರಯಿಷ್ಯತಿ ಗಾಢಶಃ |೧೬|

೬. ವಿಪ್ರ ಪ್ರಕರಣಮ್ | ಶ್ಲೋಕಾ: [೧೭-೨೧]

ಹೇ ವಿಪ್ರ ಮತ್ಪ್ರಸಾದೇನ ತ್ವತ್ಪಿತೃಣಾಂ ತ್ರಿವಿಷ್ಟಪಂ |
ತ್ರಿಮಾರ್ಗಗಾವಗಾಹೋಽತಿಪವಿತ್ರಾಙ್ಗಯುಜಾಮಭೂತ್ |೧೭|

ತಥಾ ಹಿ ಲೋಕೇ ಮರ್ತ್ಯಾನಾಂ ಕುಲೇ ಜಾತಸ್ಯ ಕಸ್ಯಚಿತ್ |
ತತ್ವಸಂಪ್ರಶ್ನಕಸ್ಯರ್ಷೇಃ ಪ್ರಸಾದೇ ಸತಿ ತತ್ಕುಲಂ |೧೮|

ಸರ್ವಂ ತ್ರಿವಿಷ್ಟಪಂ ಚಾಽಪ ನಷ್ಟಪಾಪಂ ತ್ರಿಸಪ್ತಕೇ |
ಧಿಕ್ಕೃತ್ಯ ನಾರಕಂ ಕಷ್ಟಂ ಶಿಷ್ಟಾನುಗ್ರಹತಃ ಕೃತಿನ್ |೧೯|

ತದ್ವನ್ಮಹಾನುಭಾವಸ್ಯ ಮಮಾನುಗ್ರಹತಸ್ತ್ವಯಿ |
ವಿದ್ವಂಸ್ತ್ವತ್ಕುಲಜಾತಾ ಯೇ ಯೋಗ್ಯಾ ಯಾಂತಿ ತ್ರಿವಿಷ್ಟಪಂ |೨೦|

ಅಲಂ ಮಧುಕರಾನ್ನಂ ತೇ ಛಲಂ ಮಾ ಕುರು ದಾರವತ್ |
ಕುಲಂ ಕೃತಂ ಪವಿತ್ರಂ ತೇ ತಿಲಮಾತ್ರಂ ನ ದುಷ್ಕೃತಂ |೨೧|

೭. ಹಯಗ್ರೀವ ಕರ್ಮಂದಿ ಪ್ರಕರಣಮ್ | ಶ್ಲೋಕಾ: [೨೨-೨೪]

ಭಾಷಯಾ ಭೀಷಯಸ್ಯೇವ ದೋಷರೂಪಿಣ ಏವ ತಾನ್ |
ಕಾಷಾಯ ದಂಡವೇಷಾಯ ಚಾಸ್ತು ಸ್ವಸ್ತ್ಯವಿಷಹ್ಯ ತೇ |೨೨|

ದುರ್ವಾದೀಭ ಮಹಾಸಿಂಹ ತವ ಯುಕ್ತ್ಯಾಖ್ಯಸನ್ನಖೈಃ |
ತದ್ದುರ್ಮತಮಹಾಕುಂಭದಲನಂ ಕುರು ಶೀಘ್ರತಃ |೨೩|

ವೇದವೇದ್ಯದ್ಯುಮಣಿನಾ ಮಣಿಮನ್ಮತದುಸ್ತಮಃ |
ನಿರಸ್ತಂ ತೂದಿತೇನೇಹ ಮತ್ಪಟ್ಟೋದಯಪರ್ವತಾತ್ |೨೪|

೮. ವೇದವೇದ್ಯ ಪ್ರಕರಣಮ್ | ಶ್ಲೋಕಾ: [೨೫-೨೬]

ಹೇ ವೇದವೇದ್ಯ ದುಸ್ತರ್ಕತಮಸೋಽರ್ಕಪ್ರಭಾಯಿತ |
ಸತ್ತರ್ಕಕುಮುದಾನಾಂ ಚ ಕೌಮುದೀಶ ನ ತೇ ಸಮಃ |೨೫|

ಪುರುಷೋಽಸ್ತೀಹ ಲೋಕೇ ಚ ಪರುಷೋಕ್ತಿಂ ವದೇದ್ ಯದಿ |
ಸರ್ಷಪಾತ್ ಸಮ್ಮಿತಾಂ ವಾಽಪಿ ಕರ್ಷಣಂ ಯಾಸ್ಯತೇ ಯಮಾತ್ |೨೬|

೯. ವಾದಿರಾಜಭಟ್ಟ ಪ್ರಕರಣಮ್ | ಶ್ಲೋಕಾ: ೨೭

ವಾದಿರಾಜಗುರುನಾಮಧರಾಹೋ ಮತ್ಕೃತಿಃ ಪರಮತಂ ನಿರಾಕರೋತ್ |
ತ್ವಂ ಕುರುಷ್ವ ರತಿಮತ್ರ ವೇದರಾಟ್ ಪ್ರೀಯತೇ ಪರಮಪೂರುಷ ಏವ |೨೭|

೧೦. ಲಕ್ಷ್ಮೀಪತಿ ಶ್ರೋತೃಕ ಪ್ರಕರಣಮ್ | ಶ್ಲೋಕಾ: [೨೮-೩೯]

ಹೇ ಶಿಷ್ಟ ಕಾರ್ಯತ್ರಯಮಾಸ ನಷ್ಟಂ ನಿವಿಷ್ಟಮೇಘೈರಿವ ಭೂತಲೇಷ್ಟಂ |
ಸ್ಪಷ್ಟಂ ಮುನೀನಾಂ ಪರಿಹಾಸಗೋಷ್ಠ್ಯಾಂ ತಿಷ್ಠತ್ಯಜಸ್ರಂ ಸುತ ತದ್ಯಥೇಷ್ಟಂ |೨೮|

ತ್ವತ್ಸಹಸ್ರಸಮಾ ಯಾವತ್ ತಾವನ್ಮಮ ತು ಹಾಸ್ಯತಾ |
ನ ಸ್ಯಾತ್ ಸ್ವಸ್ಯಾಯುಷ್ಯವೃದ್ಧಿಮಪೇಕ್ಷ್ಯಾಹಂ ಸದಾ ವಸೇ |೨೯|

ತಸ್ಮಾತ್ ಕಾರ್ಯತ್ರಯಂ ಕೃತ್ವಾ ಕೃತಕೃತ್ಯೋ ಭವ ಪ್ರಿಯ |
ತ್ರಿಭಿಃ ಪುತ್ರಸ್ಯ ಪುತ್ರತ್ವಂ ಸ್ಮೃತ್ಯುಕ್ತಂ ಸಾರ್ಥಕಂ ಕುರು |೩೦|

ಏತಾವಾನೇವ ಸತ್ಪುತ್ರಃ ಪೋತಾವಶ್ಯಮಿದಂ ಕುರು |
ಮಾತಾಪಿತ್ರೋಶ್ಚ ಶುಶ್ರೂಷಾಂ ಶ್ರೋತಾ ಶ್ರುತ್ವಾ ದಿವಂ ಗತಃ |೩೧|

ಕರ್ತಾ ಯತೀತ ಕಿಮುತ ಭರ್ತಾರಂ ಚ ಸತೀ ಯಥಾ |
ಸ್ಮೃತ್ವಾ ಯಾತಿ ಪರಂ ಲೋಕಂ ಕೃತ್ವಾ ಸೇವಾಂ ಕುರು ಪ್ರಿಯ |೩೨|

ತಸ್ಮಾನ್ಮತ್ಸೇವಯಾ ಜೀವ ಸುತ ತ್ವಂ ಶರದಾಂ ಶತಂ |
ಕರದಾನಾದಪಿ ಪ್ರೀತಿರ್ಮಮ ನೈತಾದೃಶೀ ಭವೇತ್ |೩೩|

ತಸ್ಮಾತ್ ತ್ವಂ ಸರ್ವಕಾರ್ಯಂ ಚ ಹಿತ್ವಾ ಕಾರ್ಯತ್ರಯಂ ಕುರು |
ಆರ್ಯತ್ವಂ ಮಯಿ ಚೇದಸ್ತಿ ತರ್ಹಿ ಕಾರ್ಯಮಿದಂ ತ್ರಯಂ |೩೪|

ಇಯಂ ಮಮ ಕೃತಿಶ್ಚೇತಿ ನ ವಿಪ್ರಕೃತಿರಿತ್ಯಥ |
ವಿಶ್ವಾಸಸ್ತವ ಚೇದಸ್ತಿ ತರ್ಹೀದಂ ಕುರು ಶೀಘ್ರತಃ |೩೫|

ಸುತ ಸಂಪೂರ್ಣಕಾಮಸ್ಯ ಹಯಗ್ರೀವಾಜ್ಞಯಾ ಮಮ |
ಕಾಮಃ ಕುತ್ರಾಪಿ ನಾಸ್ತ್ಯೇವ ಪೂರ್ಣಕಾಮಸ್ಯ ಕಾ ಸ್ಪೃಹಾ |
ಅಥಾಪಿ ವಕ್ಷ್ಯೇ ತೇ ಕಾಮಂ ಮಮ ಕಾಮ್ಯಮಿದಂ ತ್ರಯಂ |೩೬|

ಅಧ್ಯಾಯಾತ್ಮಕ ಸತ್ಪದ್ಯಾನ್ಯಸ್ಮಿನ್ನಸ್ಮತ್ಕೃತಿಃ ಪರಾ |
ಅನ್ನಮಂತ್ರೇಷ್ವ ವೈಯರ್ಥ್ಯಮೇತತ್ ಕಾರ್ಯತ್ರಯಂ ಮಮ |೩೭|

ಏತತ್ ತ್ರಯಂ ಯದಿ ಕೃತಂ ತ್ವಯಾ ಪುತ್ರೇಹ ಕುತ್ರಚಿತ್ |
ಮಮ ಮಿತ್ರ ಸ್ತ್ವಮೇವೇಹ ಸುತ್ರಾಮ್ಣಶ್ಚಿತ್ರ ವಿಕ್ರಮಃ |೩೮|

ಯಥಾ ತಥಾ ಸುತ ತ್ವಂ ಮೇ ವೃಥಾ ಮಾ ಕುರು ಮತ್ಸ್ಪೃಹಾಂ |
ವೃಥಾ ನ ಮೇ ಕೃತಾರ್ಥಸ್ಯಾಪ್ಯಥಾಪಿ ತ್ವದ್ಧಿತಾಯ ಚ |೩೯|

೧೧. ಹಯಗ್ರೀವ ಕರ್ಮಂದಿ ಪ್ರಕರಣಮ್ | ಶ್ಲೋಕಾ: [೪೦-೭೧]

ಹೇ ನಂದನ ಕಾಮಧೇನುವದೇವ ತ್ವಂ ಧನೈರಪಿ |
ವೃಂದಾವನಪತಿಧ್ಯಾನಾದ್ ಧನ್ಯಂ ಬ್ರಾಹ್ಮಣಮಾವಹ |೪೦|

ಏವಂ ಧೃತಾಯಾಂ ಧೃವಮಾತ್ಮನಃ ಕೃತಿಂ ಸಂಧ್ಯಾಯ ಸ್ವಾಧ್ಯಾಯತಿಥೀಸ್ತ್ವಮುಂಚನ್ |
ಅಧ್ಯಾಯಕೃತ್ಯಂ ಕುರ್ವನ್ನಧ್ಯಾಯಕೇಷು ಭೃತ್ಯೈರ್ಯುಕ್ತಂ ಕುರು ಕೃಷ್ಣಾರ್ಪಣಂ ತತ್ |೪೧|

ಲೋಕೇಽಪ್ಯವೈದಿಕಸಭೇ ಯಾಸ್ಯತ್ಯಾಭರಣಂ ಧನಂ |
ತತ್ಸರ್ವಮಪ್ಯಹಂ ವಕ್ಷ್ಯೇಽಪ್ಯಯಮೇವ ಮಮೋದ್ಯಮಃ |೪೨|

ಭ್ರಾಂತ ಮಾ ಪೃಚ್ಛ ಮಾಂ ಮಾಯಾಮಯಂ ಜಗದಿದಂ ತ್ವಸತ್ |
ಇತಿ ಮಾಯಾವಾದಿನಾಂ ತು ಮತಮಪ್ಯನಿಶಂ ಮೃಷಾ |೪೩|

ಲಾಭಾಲೌಭೌ ಹರ್ಯಧೀನೌ ಲೋಭಾಲೋಭೌ ಚ ದೇಹಿನಾಂ |
ಸುಖ ದುಃಖೇ ಖಗಪತೇರಧೀನೌ ಸ್ವಾಸದೇಹಿನಃ |೪೪|

ಮಾನ ಮಾನೌ ಜನಾನಾಂ ಚ ಮೋಹಾಮೋಹೌ ಮಹಾತ್ಮನಃ |
ಜಯಾ ಜಯೌ ಶ್ರೀಯಃಕಾಂತನ್ಮಾಯಾಮಯೇ ಮಹಾಮತೇ |೪೫|

ಇತ್ಯಾದಿ ದ್ವಂದ್ವಜಾತಾನಿ ಮಧ್ವಸಿದ್ಧಾಂತವೇದಿನಃ |
ತಸ್ಮಾನ್ಮಾ ಪೃಚ್ಛ ಮಾಂ ಮಾತಾಪಿತರೌ ಕೇ ತು ಮಾನವ |೪೬|

ಪೃಚ್ಛ ಸಚ್ಛಾಸ್ತ್ರ ತತ್ವಾನಿ ಮಯೋಕ್ತಾನಿ ನ ವೈ ಮೃಷಾ |
ತ್ವಯಾ ಪೃಷ್ಟೇನ ವಕ್ಷ್ಯಾಮಿ ಹೃಷ್ಟೋಽಹಂ ಸತತಂ ಪ್ರಿಯ |೪೭|

ಸ್ಪಷ್ಟಂ ತೇ ಸ್ವೇಚ್ಛಯಾ ವಕ್ಷ್ಯೇ ಕಷ್ಟಂ ತೇಽದ್ಯ ಕಿಮಾಗತಂ |
ಲೋಕವಾರ್ತಾಂ ನ ಮಾಂ ಪೃಚ್ಛ ತೋಕ ಬುದ್ಧಿಮಿಮಾಂ ತ್ಯಜ |
ಕಾಕವಲ್ಲಘುತಾಂ ಯಾಸಿ ನಾಕೇಶಸುತವತ್ ಪ್ರಿಯ |೪೮|

ಅತಸ್ತ್ವಪ ಉಪಸ್ಪೃಶ್ಯ ಕುಪಥಸ್ಥಿತಪಾಪಿನಾಂ |
ಪ್ರಸಙ್ಗಾತ್ ಸುಪ್ರಸಙ್ಗಾಂಸ್ತು ಪ್ರವಕ್ಷ್ಯೇ ವಿಪ್ರವರ್ಯ ತೇ |೪೯|

ವಿಪ್ರಾಂತಃ ಸ್ಥಿತ ಸಂತಾಪಸ್ತತ್ರ ನ ಪ್ರಜ್ವರಾರ್ತಿತಃ |
ಮತ್ಪ್ರತಾಪಾಚ್ಚ ತೇ ತೇಜೋರೂಪಸ್ಯ ತ್ವಯಿ ಕಾಶನಾತ್ |೫೦|

ಇತಃ ಪರಂ ತು ಕಿಂ ವಕ್ಷ್ಯೇ ವಕ್ಷ್ಯೇ ಪರಮಪೂರುಷಂ |
ಶಕ್ಷ್ಯೇ ಚ ವೈಷ್ಣವದ್ರೋಹಂ ನ ಶಕ್ಷ್ಯೇ ವಾಽನ್ಯತಃ ಕೃತಂ |೫೧|

ಹರಿರ್ವೇತ್ತಿ ಗುರುರ್ವೇತ್ತಿ ಹರೋ ವೇತ್ತಿ ಗಿರೇಃ ಸುತಾ |
ಧರಾ ವೇತ್ಯಮರಾಃ ಸರ್ವೇ ನರೋ ವೇತ್ತಿ ನ ವಾಽಧುನಾ |೫೨|

ಮನುಷ್ಯಃ ಪುಷ್ಯ ನಕ್ಷತ್ರೇ ಜಾತಃ ಕಶ್ಚನ ತುಷ್ಯತಿ |
ಇಷುಯೋಗೇ ಪ್ರೇಷ್ಯಭಾವಂ ಸ ಕರಿಷ್ಯತಿ ಮೇ ಸದಾ |೫೩|

ಹರಿ: ಸರ್ವೋತ್ತಮೋ ನಿತ್ಯಂ ಗುರುದ್ವಾರಾ ಪ್ರಸಾದ ಕೃತ್ |
ಶಿರಸಾ ಧಾರ್ಯತೇಽಸ್ಯಾಽಜ್ಞಾ ವಿರಿಂಚಹರಪೂರ್ವಕೈಃ |೫೪|

ಕರೋತಿ ಸೃಷ್ಟಿಂ ಖಲು ಲೀಲೆಯೈವ ಹರತ್ಯಜಸ್ರಂ ಸಲಿಲೇ ಸ ಶೇತೇ |
ಧರತ್ಯಮೋಘಂ ಖಲು ಪಾಲಯತ್ ತತ್ ಸರತ್ಯಜಸ್ರಂ ಖಲು ಭಕ್ತಪಾಲಃ |೫೫|

ಬ್ರಹ್ಮನ್ ಬ್ರಹ್ಮಣಿ ಸಂತಿಷ್ಠನ್ ಸೃಷ್ಟಿಂ ಚಾಸ್ಯ ಕರೋತ್ಯಹೋ |
ದಧ್ರೇ ಸ ರುದ್ರದೇಹಸ್ಥಃ ಕೋಪಂ ತಾಪಹರಾಯ ಚ |೫೬|

ಜಡಾಜ್ಜಡಮಿದಂ ಚಕ್ರೇ ದೃಢಾದ್ದೃಢಮಸೌ ಹರಿಃ |
ನಿಬಿಡಾನ್ನಿಬಿಡಂ ಭಸ್ಮ ವಡಬಾದ್ ವಡಬಾಗ್ನಿನಾ |೫೭|

ವಿಷ್ಣುರ್ಜಿಷ್ಣುಃ ಸ್ವಯಂ ಚಾಸ್ಯ ಕರೋತಿ ಜಗತಾಂ ಸ್ಥಿತಿಂ |
ಪುಷ್ಣೋಂಽತಸ್ಥಃ ಸ್ವಯಂ ಕೃಷ್ಣಃ ಸ್ವತೇಜೋಽಭಿ: ಪ್ರಕಾಶಕಃ|೫೮|

ಏವಂ ಮೋಕ್ಷಂ ಸ್ವಪಕ್ಷಸ್ಯ ಮುಮುಕ್ಷೋಃ ಕುಕ್ಷಿಗಸ್ಯ ಚ |
ಸ ಪಕ್ಷಿವಾಹನಃ ಕರ್ತುಂ ದಕ್ಷಃ ತ್ರ್ಯಕ್ಷೋಽಪಿ ನ ಕ್ಷಮಃ |೫೯|

ತತ್ಪಾದಂ ಕ್ಷಾಲಯಿತ್ವಾಽಽದೌ ಸ್ವಪದಂ ಪ್ರಾಪ್ತವಾನ್ ವಿಧಿಃ |
ತತ್ತೀರ್ಥಂ ಶಿರಸಾ ಧೃತ್ವಾ ಶೂಲೀ ಕೈಲಾಸಮಾಪ ಚ |೬೦|

ಶೇಷಸ್ತಚ್ಛಯನಂ ಭೂತ್ವಾ ಹ್ಯಶೇಷಾಂ ವಹತೇ ಭುವಂ |
ಸ್ವಶೇಷಪದವೀಂ ಯಾತಿ ಸ ರೋಷಂ ಚ ಜಹಾವಿಹ |೬೧|

ವಾಹನೋ ವೈನತೇಯೋಽಭೂತ್ ತೇನ ಪುಣ್ಯೇನ ಮಾನವ |
ದಾನವಾಂತಕನೇತ್ರಾಗ್ರೇ ಸರ್ವತ್ರ ವಸತೇಽನಿಶಂ |೬೨|

ಕೃಷ್ಣಃ ಕಂಠಮಣಿಂ ಕೃತ್ವಾ ಬ್ರಹ್ಮಾಣಂ ಚ ಗುಣಾರ್ಣವಃ |
ತತ್ಪದಂ ಪಾರಮೇಷ್ಠ್ಯಂ ಚ ಪ್ರದದೌ ಪ್ರಭುರವ್ಯಯಃ |೬೩|

ಏವಂ ದೇವಾಧಿದೇವಶ್ಚ ದೇವಾನಾಂ ಸ್ವಸ್ಯ ಸೇವಯಾ|
ದದಾತಿ ಪದವೀಂ ಯೋಗ್ಯಾಂ ಮಾಧವಃ ಸದಯಾನಿಧಿಃ |೬೪|

ಮಮಾಪಿ ಪಾದಸೇವಯಾ ದದಾತಿ ಯೋಗ್ಯವೈಭವಂ |
ರಮಾಪತಿಃ ಶ್ರಿಯಾನ್ವಿತೋ ದಯಾನ್ವಿತಃ ಪದೇ ಪದೇ |೬೫|

ಕ್ರಿಯಾಪದಪ್ರಯೋಗೇಽಪಿ ನ ಧಾತೂನಾಂ ವಿರೋಧಿತಾ |
ದೈವೇ ಚ ಛಾಂದಸೇ ವಾಕ್ಯೇ ನ ದೋಷಾಯೇತಿ ಸನ್ಮತಂ |೬೬|

ತನ್ಮತಂ ಮನ್ಮತಂ ಚೈಕಂ ವಿಚಿನ್ಮ ತವ ಸನ್ಮತಿಂ |
ಚಿನ್ಮಾತ್ರಂ ತನ್ಮತೇ ಬ್ರಹ್ಮಾಸ್ಮನ್ಮತೇ ತದನಂತಕಂ |೬೭|

ಮತದ್ವಯೇ ಕಥಂ ಭಾತಿ ತವ ತತ್ವಂ ಸುತಾಹಿತಂ |
ಹಿತಂವಾ ವದ ತತ್ವೇನ ಹೃದಿ ಗೂಹೀತಮೇವ ತೇ |೬೮|

ಬ್ರೂಮೋ ವಯಂ ತು ಭದ್ರಂ ತೇ ಶ್ರುಣು ಪುತ್ರಾನ್ಯ ದುರ್ಮತಂ |
ವ್ಯರ್ಥಂ ಗತಂ ಬೃಹದ್ಬೀಜಬಲೀವರ್ದವದೇವ ತತ್ |೬೯|

ಅತೋಮಯಾ ಕೃತೋ ಯೋಗೋ ರೂಢಿರ್ವಾ ರೂಢಿಮತ್ಪದೇ |
ವಿದ್ವದ್ ರೂಢ್ಯಾತ್ಮಕೇ ಯದ್ವತ್ ಸಮಹಾರೂಢಮಾರ್ಯಜ |೭೦|

ತಸ್ಮಾತ್ ಕವೇಃ ಪ್ರಯೋಗೇ ಮೇ ತ್ವತ್ಪ್ರಯೋಗ ಇತಿ ಪ್ರಿಯ |
ಮಾ ಪ್ರತೀಕ್ಷಾಂ ಪ್ರಭುತ್ವೇನ ಪ್ರಕುರು ಪ್ರಾರ್ಥಯೇ ಹರಿಂ |೭೧|

೧೧. ವಿಪ್ರ ಪ್ರಕರಣಮ್ | ಶ್ಲೋಕಾ: [೭೨-೭೩]

’ಬ್ರೂಮೋ ವಯಂ ತು ಭದ್ರಂ ತೇ ಶ್ರುಣು ಪುತ್ರಾನ್ಯ ದುರ್ಮತಂ |
ವ್ಯರ್ಥಂ ಗತಂ ಬೃಹದ್ ಬೀಜಬಲೀವರ್ದವದೇವ ತತ್ |೭೨|

ಇತ್ಯೇಕಂ ಶ್ಲೋಕ ಮುಖ್ಯಂ ಮೇ ತ್ಯಕ್ತವಾನಸಿ ವಿಪ್ರಕ |
ಆಕರಸ್ಥಂ ಲೇಖನಂ ಚ ಕಾರಯ ಪ್ರಾಙ್ ಮಯೇರಿತಂ |೭೩|

೧೩. ಲಕ್ಷ್ಮೀಪತಿ ಪ್ರಕರಣಮ್ | ಶ್ಲೋಕಾ: [೭೪-೮೭]

ವಾಣಿವಾಲೀಯರಾಮಶ್ಚ ಮಮ ಲೀಲಾಸ್ಪದೇ ದ್ವಿಜೇ |
ಕಾಲಾಕಾಲಾಽಗತಾಂ ಜ್ಞಾತ್ವಾ ಗಾಳೀಂ ತಾಂ ದಾಂಬಳಾಧಮಾತ್ |೭೪|

ನಿವಾರಯಾಮಾಸ ತದಾ ಪ್ರತಿಗಾಳೀಪ್ರದಾನತಃ |
ಸ ವರಂ ವರಯಾಮಾಸ ಮತ್ಪ್ರಸಾದೇನ ಪಾಲಿತಂ |೭೫|

ದ್ವಿಜಗಾಳೀತ್ಯಾಜನೇನ ಭಜತೋ ಭುಜಗೇಶ್ವರಂ |
ಸುಜನಸ್ಯಾಽತ್ಮಜಸ್ಯೇಹ ಸೌಜನ್ಯಂ ಜನಯತ್ಯಹೋ |೭೬|

ವಾದಿರಾಜಾಖ್ಯಭಟ್ಟಾದ್ಯಾ ಮತ್ಕೃತೇರ್ಲೇಖನಾದಪಿ |
ಮನ್ನಂದನಾಗ್ರೇ ವಕ್ತೃತ್ವಾದಚ್ಯುತಸ್ಯಾರ್ಕಮಂಡಲೇ |೭೭|

ಧ್ಯಾನಾದ್ ಯತ್ ಪುಣ್ಯಮಾಪ್ನೋಷಿ ತದ್ ದ್ವಯಂ ನ ತ್ಯಜ ದ್ವಿಜ |
ಪಶ್ಯಾಮಿ ತ್ವಯಿ ವಿಶ್ವಾಸ ಸಂಸ್ಥಿತಿಂ ಚ ಸುತೇ ಯಥಾ |೭೮|

ಅನ್ಯಥಾ ತ್ವಂ ಗೃಹಂ ಚಾಪಿ ಕಥಂ ವಿಪ್ರಸ್ಯ ದತ್ತವಾನ್ |
ತ್ವತ್ಪ್ರೀತ್ಯಾಽಪಿ ಪ್ರತಾಪಂ ಚ ತಸ್ಮಾನ್ಮತ್ಪ್ರೀತಿಮಾನ್ ಭವ |೭೯|

ಅಹಮಧ್ಯಾಯ ಪರ್ಯಂತಂ ಮಧ್ಯಂದಿನರವೇರಹಃ |
ಗೃಧ್ರವಚ್ಚಾಗ್ರತಸ್ತಪ್ಯೇ ದುಗ್ಧವಾರಿಧಿಗಂ ಸ್ಮರನ್ |೮೦|

ಉಪಲಕ್ಷಣಮೇತಚ್ಯಾಪ್ಯುಪಲಕ್ಷಿತ ಮೇವ ಚ |
ಅನೇನ ಚೋಪಲಕ್ಷ್ಯಸ್ವ ಹ್ಯುಪಲಸ್ಥಲಗಾಂ ಕೃತಿಂ |೮೧|

ಯಥಾ ದಧಿ ಚ ಕಾಕೇಭ್ಯೋ ರಕ್ಷ್ಯತಾಮಿತಿ ವಾಕ್ಯತಃ |
ದಧ್ಯುಪಘಾತಕಾ ಗ್ರಾಹ್ಯಾ ಹ್ಯಾಖುಭುಗಾದಯಸ್ತಥಾ |೮೨|

ತಸ್ಮಾನ್ಮತ್ತಪಸಾ ವಾಽಪಿ ಸ್ವಸ್ಯ ವಿಶ್ವಾಸತೋಽಪಿ ವಾ |
ಭವಿಷ್ಯತಿ ಸುಷೇಣಾಗ್ರ್ಯ ಮತ್ಕಾರ್ಯಂ ಶೇಷಿತಂ ತ್ರಯಂ |೮೩|

ಏತತ್ಸರ್ವಂ ಸ್ವಾಪ್ನಪದ್ಯೇನ ಗರ್ವಂ ಹಿತ್ವಾ ಸರ್ವೇ ವಿಪ್ರವರ್ಯಾಸ್ಯಜೇನ |
ಶ್ರುತ್ವಾ ಚೋರ್ವ್ಯಾಂ ಶರ್ವಗುರ್ವಾದಿದೇವಾನ್
ದೃಷ್ಟ್ವೋರ್ವಶೀಂ ಯಾಂತು ಮಾಂ ಮಾನವೇಂದ್ರಾಃ |೮೪|

ಇದಂ ವೃಂದಾವನಾಖ್ಯಾನಂ ಯೇ ಪಠಂತಿ ಮನೀಷಿಣಃ |
ಮುಕುಂದಾವನಮೇವಾಸ್ತು ತೇಷಾಂ ಕಂದಾಶನಾಜ್ಞಯಾ |೮೫|

ಇದಮರ್ಪಿತಮೇವಾಸ್ತು ಹಯಶೀರ್ಷಸ್ಯ ಪಾರ್ಷದಾತ್ |
ಸಮಂ ಸಹಸ್ರಶೀರ್ಷಸ್ಯ ಸೂಕ್ತಸ್ಯ ಪುರುಷಾತ್ಕೃತಂ |೮೬|

ಯಚ್ಛ್ರುಣ್ವತಾಂ ಭಕ್ತಿರುದಾರಸದ್ಗುಣೇ ಹರೌ
ಹರೇರ್ಲೋಕಗತೇ ತಥಾ ಮಯಿ |
ಭವತ್ಯಹೋ ಸರ್ವಶುಭಾಪ್ತಿ ಸನ್ಮತೀರ್ದದಾತ್ಯಜಸ್ರಂ
ಸುತ ಸತ್ಯ ಮೇವ ತತ್ |೮೭|

ಓಂ ಇತಿ ಶ್ರೀಮತ್ಕವಿಕುಲತಿಲಕ ವಾಗೀಶತೀರ್ಥಕರಕಮಲ ಸಂಜಾತ
ಶ್ರೀಮದ್ವಾದಿರಾಜಪೂಜ್ಯಚರಣೋದಿತ ಬ್ರಾಹ್ಮಣ
ಸ್ವಾಪ್ನವೃಂದಾವನಾಖ್ಯಾನೇ ಅಲೌಕಿಕ ವಿಭಾಗೇ ನಿದರ್ಶನಪರ್ವಣಿ
ದ್ವಿತೀಯಪ್ರಾಣಾವಧೌ [ಚರಮಪ್ರಾಣಾವಧೌ]
ಪಂಚಮಾಧ್ಯಾಯಾತ್ಮಕ ದ್ವಾವಿಂಶತಿತಮಾಧ್ಯಾಯಃ ಸಂಪೂರ್ಣ:

| ಓಂ ಶ್ರೀ ಶ್ರೀ ಹಯವದನಾಯ ನಮ: | ಸಮಾಪ್ತೋಽಯಂ ಗ್ರಂಥ: |

|| ಶ್ರೀ ಅಶ್ವಿನೀಹಯಗ್ರೀವಾತ್ಮಕ ಕೃಷ್ಣಾರ್ಪಣಮಸ್ತು ||
ಓಮ್ ತತ್ಸತ್ | ಪ್ರೀತೋಽಸ್ತು ಕೃಷ್ಣ: ಪ್ರಭು: |