21. Svaapnavrundavanakhyana

Composer : Shri Vadirajaru

| ಅಥ ಏಕವಿಂಶತಿತಮೋಧ್ಯಾಯ: |

೧. ವಿಪ್ರಶ್ರೋತೃಕ ಪ್ರಕರಣಮ್ | ಶ್ಲೋಕಾ: [೧-೫]

ಹರಿ: ಓಂ |

ತವ ಕಾಯಗತಂ ವಾಯುಮಾಯುಷೋ ವೃದ್ಧಿಮಿಚ್ಛತಃ |
ಸ್ಥಾಪಯಾಮಿ ಯತೋಽಪಾಯಂ ಶ್ರೇಯೋ ಮತ್ಕೃತಮೇವ ತೇ |೧|

ತವ ಪತ್ನ್ಯಾಶ್ಚಹೇ ವಿಪ್ರ ಯತ್ನೇನೈತತ್ ಕೃತಂ ತ್ವಯಾ |
ಸ್ವಪ್ನಂ ದೃಷ್ಟ್ವಾ ಚ ತ್ವಾಮೂಚೇಪುಣ್ಯಮಾಪ್ನೋಷಿ ತೇನ ಚ |೨|

ಅತಸ್ತ್ವಂ ಧರ್ಮಪತ್ನೀಂ ಚ ನೈವ ಸಂತಾಪಯ ಪ್ರಿಯ |
ಅನುವರ್ತ್ನೀಂ ಸದಾ ವಿಪ್ರ ಕುದಾರತ್ವಂ ನ ಹೀದೃಶಂ |೩|

ಯಾದೃಶಂ ಪರಲೋಕಸ್ಯ ಶ್ರೀಧರಸ್ಯ ವಿದೂರತಾಂ |
ಕರೋತಿ ಪುರುಷಸ್ಯೇಹ ತಾದೃಶಂ ನಾಸ್ತಿ ತ್ವತ್ತ್ಸ್ರಿಯಾಂ |೪|

ಕಿಂ ವಾಽಶಕ್ತತ್ವತೋ ವಿಪ್ರ ತ್ವತ್ಸೇವಾಂ ನ ಕರೋತಿ ಚ |
ಸೂತಕೇ ವಾಯುನಾ ಗ್ರಸ್ತಾ ಹರತ್ಯಹರಹಃ ಸ ತಾಂ |
ತಸ್ಯಾಃ ಪ್ರಾಣಭಯಂ ನಾಸ್ತಿ ಸ್ವಮಾಣವಕಪುಣ್ಯತಃ |೫|

೨. ಶೇಷ ಪ್ರಕರಣಮ್ | ಶ್ಲೋಕಾ: [೬]

ಬ್ರಾಹ್ಮಣ ತ್ವಂ ತಥಾ ಕಾಣ ನಿಷ್ಠುರಂ ನ ಭಣಾನಿಶಂ |
ತಸ್ಮಾದ್ಭಯಂ ತ್ಯಜಸ್ವೇಹ ಕಲಹಂ ತು ಕಲಿಪ್ರಿಯಂ |೬|

೩. ಬಹುಭಕ್ತ ಶ್ರೋತೃಕ ಪ್ರಕರಣಮ್ | ಶ್ಲೋಕಾ: [೭-೧೧]

ಹೇ ವಿದ್ವಾಂಸ, ಇಹ ಧ್ವಾಂತವಂತಂ ಪಶ್ಯಧ್ವಮಂಜಸಾ |
ಕದಧ್ವಾನಂ ಸ್ವವಧ್ವಾ ಚ ಮಣಿಮದ್ವದನೋದಿತಂ |೭|

ವದತೇಽಯಂ ದ್ವಿಜೋ ಮಧ್ವಾಚಾರ್ಯಾಧ್ವಾನಂ ವಿಹಾಯ ಚ |
ಅವಿದ್ವಾನ್ ಸಾಧ್ವಸಂ ಯಾತಿ ತದ್ವತ್ ಕಮಲನಾಭಕಃ |೮|

ಮದಂತರ್ಯಾಮಿಣಂ ಬ್ರಹ್ಮಾಣಂ ಸ ವಾಯುಂ ವಿಹಾಯ ಚ |
ಬ್ರಾಹ್ಮಣೋಽಯಂ ಮಣಿಮತೋ ಮತಮಾಶ್ರಿತ್ಯ ವರ್ತತೇ |೯|

ಹಯಗ್ರೀವಾಜ್ಞಯಾ ವಾತವಿರಿಂಚೌ ಸ್ವೇ ಚ ವೈಭವಂ |
ವಿನಾ ವಾಣೀಪತಿತ್ವಂ ಮೇ ದತ್ತವಂತೌ ಚ ಕಿಂ ವದೇ |೧೦|

ಯತ್ರ ಪ್ರತೀತಾರ್ಥಬಾಧಸ್ತತ್ರಾಂತರ್ಯಾಮಿಸಂಗ್ರಹಃ |
ಕರ್ತವ್ಯ ಇತಿ ಪೂರ್ವೋಕ್ತಮನುಸಂದಧ್ವಮಂಜಸಾ |೧೧|

೪. ಶೇಷಶ್ರೋತೃಕ ಪ್ರಕರಣಮ್ | ಶ್ಲೋಕಾ: [೧೨-೧೮]

ತಸ್ಮಾನ್ಮಯೋಕ್ತಂ ಸಕಲಂ ಲೌಕಿಕಂ ವಾಽಪ್ಯಲೌಕಿಕಂ |
ಸತ್ಯಂ ಸತ್ಯವತಾಂ ನಾಥ ಸುತ ತತ್ವಮತೇ ಕೃತಿನ್ |೧೨|

ಅಯಂ ಕಮಲನಾಭಶ್ಚ ಮಯಃ ಸಕಲ ರೂಪಕಃ |
ಸ್ಮಯಕಶ್ಮಲಮಾವಿಷ್ಟೋ ವಿಸ್ಮಯಂ ನ ಕುರು ಪ್ರಿಯ |೧೩|

ಕಲಿಃ ಕಮಲನಾಭಾಖ್ಯಃ ಪುನರ್ಭೂವಲಯೇಽಭವತ್ |
ಮಿಲಿತಃ ಸ್ವಸ್ತ್ರಿಯಾಲಕ್ಷ್ಮ್ಯಾ ಯಾ ನಿರ್ಮಾಲ್ಯಂ ನ ಮೇಽಗ್ರಹೀತ್ |೧೪|

ಕಲಿ: ಮಯಶ್ಚ ಮಣಿಮಾನ್ ಮಿಳಿತ್ವಾ ತ್ರಯ ಏವ ತೇ |
ಕಲಹಂ ಕರ್ತುಮುದ್ಯುಕ್ತಾಃ ಕುಲಾಯ ಸದನಾಭಿಗಾಃ |೧೫|

ತನ್ನಿಂದಾವಚನಂ ಶ್ರುತ್ವಾ ಸುನಂದನ ಪುರೋ ಮಮ |
ನನ್ವಂಧೇ ಪಾತಯಾಮ್ಯುಗ್ರೇ ಧುನ್ವಂಸ್ತಂ ಯಮಕಿಂಕರೈಃ |೧೬|

ತಸ್ಮಾಚ್ಛಿಖೋಪವೀತಾರ್ಹೋ ನೈವ ಸೋಽಪ್ಯತಿಗರ್ಹಿತಃ |
ಬಹಿಷ್ಕುರುತ ತಂ ವಿಪ್ರಮಸಹಿಷ್ಣುಂ ಮಮೋಚ್ಛ್ರಯಂ |೧೭|

ಹರೌ ರುಷ್ಟೇ ಗುರುಸ್ತ್ರಾತಾ ಗುರೌ ರುಷ್ಟೇ ನ ಕಶ್ಚನ |
ಯಥಾ ಸ್ತ್ರಿಯಃ ಪತೌರುಷ್ಟೇ ನ ಭ್ರಾತಾ ಪಿತರಾವಪಿ |೧೮|

೫. ಹಯಗ್ರೀವ ಮುನಿ ಪ್ರಕರಣಮ್ | ಶ್ಲೋಕಾ: [೧೯-೩೨]

ಹಯಗ್ರೀವ ನಿರೂಪಂ ತಂ ಶಿರಸಾ ವಹ ಶೀಘ್ರತಃ |
ಯದ್ ವಾ ವಿಧಿ ನಿಷೇಧಾಭ್ಯಾಂ ಉತ್ಥಿತಂ ತದ್ಧಿತಂ ತವ |೧೯|

ವಾದಿರಾಜಾಖ್ಯಭಟ್ಟೋಽಯಂ ಸುತೋ ಮೇ ಪಟ್ಟವರ್ಧನ |
ಸ್ವಪ್ನೇ ಪಟುತರೋ ವಿಪ್ರಃ ಶ್ರೀಪತಿಃ ಕೃತಿಪಾಠಕಃ |೨೦|

ವ್ಯಾಸರಾಜಸ್ತದನುಜೋ ಜಾಮಾತಾ ತಸ್ಯ ಗೋಪಜಃ |
ತದಗ್ರಜಃ ಪ್ರಜಾಕಾರ್ಯೇ ರಂಜನಾಜ್ಜನಯನ್ ಧನಂ |೨೧|

ವಾಸುದೇವಮುನಿಃ ಶಾಂತಃ ಶ್ರಾಂತಶ್ಚ ಮಮ ಪೂಜಯಾ |
ಕಾಂತಂ ಮಾಂ ತಾತಮಾಯಾತಿ ತತ್ರ ವೈವಸತೀ ಭವೇತ್ |೨೨|

ಉಪೇಂದ್ರಃ ಸೂರಣಶ್ಚಾಪಿ ಕೃಷ್ಣಃ ಕಾನಕ ಏವ ಚ |
ಹಿರಣ್ಯಭಟ್ಟಸ್ತತ್ರೋಕ್ತ ಕರ್ಮಣಿ ಪ್ರಥಿತಃ ಸುತಃ |೨೩|

ವಾಣಿವಾಳೋಪಪದವೇಂಕಟಾದ್ರಿಸ್ತಥೈವ ಚ |
ಏತೇ ಚಾನ್ಯೇ ಚ ಬಹವೋ ಬಹುಮಾನಪುರ: ಸರಾಃ |೨೪|

ಕುಹಕಾದ್ರಹಿತಾಃ ಸರ್ವೇ ಸರ್ವೇಶ್ವರಮತಾನುಗಾಃ |೨೫|

ವಿಶ್ವಾಸಿನೋ ಹ್ಯವಿಶ್ವಾಸಂ ನ ಕುರ್ವಂತೀಹ ಸರ್ವಥಾ |
ಸುಶ್ವಾಸಪ್ರೇರಕೋ ಹ್ಯೇಷಾಂ ವಾಸುದೇವೋಽಭಿಜಾಯತೇ |೨೬|

ಕಲಿಃ ಕಮಲನಾಭಶ್ಚ ದಾಂಬಲಃ ಪಿತ್ತಮೌಲಿಕಃ |
ಲಕ್ಷ್ಮೀನಾರಾಯಣೋ ಡೋಲಾಯಿತ ಚಿತ್ತಸ್ತು ತಮ್ಮಣ್ಣಃ |೨೭|

ಏತೇ ಚ ಪ್ರಾಯಶೋ ಹ್ಯತ್ರ ಪುತ್ರಾವಿಶ್ವಾಸಿನಃ ಸದಾ |
ಮಿತ್ರಜಾ ಭೃತ್ಯಬಾಧ್ಯಾಶ್ಚಮುತ್ರ ಸತ್ಯಂ ಮಯೋದಿತಂ |೨೮|

ಹರಿಶ್ಚ ದಾಂಬಲಃ ಪುತ್ರ ವ್ಯಾಲೋಳಿತಮನಾಽಪ್ಯಹೋ |
ಕುಲಾಲಚಕ್ರವಚ್ಚಾತ್ರ ಭ್ರಮತೇ ಕಲ್ಯಬುದ್ಧಿಮಾನ್ |೨೯|

ಅಪ್ಪಣ್ಣಃ ಕೃಷ್ಣಭಟ್ಟೋಽಯಮಿದಾನೀಂ ಪಾಪಮತ್ಯಜತ್ |
ಕೋಪಂ ಚ ಮಮ ಹೇ ಪುತ್ರ ಶಾಪಂ ತ್ಯಾಜಿತ ವನಾಹೋ |೩೦|

ಶ್ರೀನಿವಾಸಾಚಾರ್ಯನಾಮಾ ಮಾನವಾನಾಂ ಭಯಾನಕಃ |
ಮಮ ಮಾನಸ ಸಂಪ್ರೀತಿಂ ತನೋತೀಹ ನ ಸಂಶಯಃ|೩೧|

ವಿಟ್ಠಲಾದ್ಯಾಸ್ಮದೀಯಾ[ಽ]ಸ್ಮನ್ಮಠಸನ್ಯಾಸಿನಶ್ಚ ಯೇ |
ವಟಬೀಜವದೇವಾಸ್ಮದ್ದುಟಜಾನಂದವರ್ಧಕಾಃ |೩೨|

೬. ವಿಪ್ರ ಪ್ರಕರಣಮ್ | ಶ್ಲೋಕಾ: [೩೩-೩೭]

ಹೇ ವಿಪ್ರ ತವ ಜಾಮಾತಾ ರಾಮಚಂದ್ರೋಽಪಿ ಬುದ್ಧಿಮಾನ್ |
ವಿಶ್ವಾಸಂ ಕುರುತೇ ಚಾತ್ರ ಸೋಽಪಿ ವಿಶ್ವಾಸಿಷೂತ್ತಮಃ |೩೩|

ಏವಂ ಚ ತ್ರಿವಿಧಾ ವಿಪ್ರಾಃ ಪ್ರೋಕ್ತಾಃ ಪುತ್ರ ಮಯಾ ತವ |
ಶ್ರುತ್ವಾ ಕೃತಾರ್ಥತಾಂ ಯಾಸಿ ಕಿಂ ಭೂಯಃ ಶ್ರೋತುಮಿಚ್ಛಸಿ |೩೪|

ನಿತ್ಯಂ ನಿರ್ಜಲನಿರ್ಘಾತೈಃ ದುರ್ಜನಾ ಭರ್ಜಿತಾಸ್ತ್ವಹೋ |
ಖರ್ಜೂರವಚ್ಚಾರ್ಜುನಸ್ಯ ಬಾಣ ನಿರ್ಘಾತಮರ್ದಿತಾಃ |೩೫|

ಯಥಾ ತಥೈವ ಸುತ್ರಾಮ್ಣಾ ವೃತ್ರವೃತ್ರಾಸುರಾರ್ಥಿನಾ |
ಅಂಧೇಷು ಮಾರ್ತಾಂಡಿಕೃತಶಿಲಾಭಾರೈಃ ಕುಲಾನ್ವಿತಾಃ |೩೬|

ಬಾಧ್ಯಂತೇ ಶ್ರಾದ್ಧ ದೇವೇನ ಶ್ರದ್ಧಾರಹಿತಬುದ್ಧಯಃ |
ವೃದ್ಧ ತ್ವಮದ್ಧಾ ಕೃದ್ಧೇಷು ಹ್ಯಪಿ ತೇಷು ವದಸ್ವ ತಾನ್ |೩೭|

೭. ಬಹುಭಕ್ತ ಶ್ರೋತೃಕ ಪ್ರಕರಣಮ್ | ಶ್ಲೋಕಾ: [೩೮-೪೦]

ತಸ್ಮಾದ್ ವಿಶ್ವಾಸವಂತಶ್ಚ ಭವಿಷ್ಯಥ ಕೃತೌ ಮಮ |
ವಿಶ್ವಸ್ತಾಃ ಪ್ರೇತ್ಯ ಮರ್ತ್ಯಾ ಯೇ ಹ್ಯಮರ್ತ್ಯತ್ವಂ ವ್ರಜಂತಿ ತೇ |೩೮|

ಅಹಂ ಮಧ್ಯಂದಿನಗತಸೂರ್ಯವತ್ ಸುಪ್ರಭಾನ್ವಿತಃ |
ಮದ್ವೃಂದಾವನಮಧ್ಯಸ್ಥೋ ವಾಸುದೇವ ಮುನೇಃ ಪ್ರಿಯಾತ್ |೩೯|

ಪೂಜಕಸ್ಯ ತಪೋಯೋಗಾತ್ ಬಿಂಬೇಶ ಭವ ದರ್ಶನಾತ್ |
ಮಹೋಪಚಾರೋಪಹಾರೈರ್ಹರಿಃ ಸುಸ್ಥಿರ ಏವ ಚ |೪೦|

೮. ವೇದನಿಧಿ ಪ್ರಕರಣಮ್ | ಶ್ಲೋಕಾ: [೪೧-೫೦]

ಇತಿ ಶ್ರೀತ್ಯಾದಿಕಂ ಚೋಕ್ತ್ವಾ ಸಮಾಪಯ ನ ಮೇ ಕೃತಿಂ |
ಮತ್ಸುತಸ್ಯ ಚ ಭಾಗೋಽಯಂ ಸಮಾಪ್ತಿಃ ಶ್ರೀರಮಾತ್ಮಿಕಾ |೪೧|

ಅಧ್ಯಾಯಕರಣಾರ್ಥಂ ಚ ಶರಣಾಗತವತ್ಸಲ |
ದ್ವರಧ್ಯಾಯಃ ಪ್ರಣೀತೋ ಮೇ ವಾಣೀಂ ಶ್ರುಣು ಸುನಂದನ |೪೨|

ಹೇ ವಿಪ್ರ ಮಮ ಪುತ್ರಸ್ಯ ಪಿಬ ಪಾದೋದಕಂ ಸದಾ |
ಕ್ಷಿಪ್ರಂ ನಾಶಾಯತೇ ತೇನ ಶೀತೋಷ್ಣಜ್ವರಪೀಡನಂ|೪೩|

ಬ್ರಾಹ್ಮಣೇ ಸ್ವಪ್ನಮದ್ರಾಕ್ಷೀತ್ ಕರ್ಣೇ ಯಕ್ಷೀ ಚ ಕಶ್ಚನ |
ಲಕ್ಷ್ಮೀಪತಿಗೃಹೇ ಪಕ್ಷೀಕೃತಪ್ರೋಽತಿ ಪುಣ್ಯಭಾಕ್ |೪೪|

ಅನ್ಯಥಾ ಗುರುರಾಜಸ್ಯ ಕಥಂ ಸ್ವಾಪ್ನಾಧಿಕಾರಿತಾ |
ತಸ್ಮಾದ್ಗುರುಃ ಶರೀರೇಽಸ್ಯ ವರ್ತತೇಽಮರ್ತ್ಯವಿಗ್ರಹಃ |೪೫|

ಇತ್ಯವಾದೀನ್ಮದಾಂಧಾನಾಮಂಧತ್ವಂ ತ್ಯಾಜಯನ್ಬುಧ |
ತಸ್ಮಾದಪ್ಯಧಮಾಬುದ್ಧಿ ಸಂಧಾನರಹಿತಾ ದ್ವಿಜಾಃ |೪೬|

ಹೇ ಶವ ತ್ವಮವಿಶ್ವಾಸಂ ಕುತೋಽಸ್ಮಾಸು ಗತೋಽಸ್ಯಹೋ |
ಕೇಶವಸ್ತವ ವಿಶ್ವಾಸರಹಿತಸ್ಯ ಸುಶಾಸಕಃ |೪೭|

ಶವೇತಿ ವಕ್ಷ್ಯಾಮಿ ಕುತಃ ಪ್ರವಕ್ಷೇ ತತ್ರ ಕಾರಣಂ |
ಶವೇತಿ ಸುಖಮುದ್ಧಿಶ್ಯಾಪ್ಯಾಶ್ವಸೀಃ ಮಮ ಶಾಸನಂ |೪೮|

ಅಥವಾ ಕುಣುಪಾರ್ಥೋ ವಾ ಪ್ರಣಿಪಾತಪ್ರಿಯಂ ಚ ಮಾಂ |
ಶರಣಂ ವ್ರಜ ತೇ ಕ್ಷೇಮಂ ಕೃಣುಯಾ ಮಮ ವಿಪ್ರವತ್ |೪೯|

ಮಯಾ ನಂದನಮುದ್ದಿಶ್ಯ ನಾನಾವಿಧತಯೋದಿತಂ |
ತ್ವಯಾ ಪ್ರಸನ್ನೀಕ್ರಿಯತೆ ನೈವ ಸೋಽಪ್ಯನ್ನಯಾಚನಮ್ |೫೦|

೯. ವಿಪ್ರ ಪ್ರಕರಣಮ್ | ಅನ್ನಯಾಚನಮಿತ್ಯಾರಭ್ಯ ಶ್ಲೋಕಾ: ೫೧

ಕುರು ವೃಂದಾವನೇ ಸಂಪ್ರತ್ಯೇವ ತೇ ಚಾನ್ನದೇ ಶುಭೇ |
ಮನ್ನಂದನಮುಖೇನೈವ ತದನ್ನಂ ತೇ ಪ್ರದಾಸ್ಯತಿ |೫೧|

೧೦. ವೇದನಿಧಿ ಪ್ರಕರಣಮ್ | ಶ್ಲೋಕಾ: [೫೨-೫೫]

ಮಮ ಭೋಜನ ಸಂತೋಷಂ ಸುಜನಾಂಬುಜಭಾಸ್ಕರಂ |
ಕುಜನಾಂಬುಜಸಙ್ಕೋಚದ್ವಿಜರಾಜಂ ಮಮಾತ್ಮಜಂ |೫೨|

ಮದಜಾಡ್ಯರುಜಾ ಹೀನಂ ದ್ವಿಜರಾಧ್ಯಂ ಭಜಾದ್ಯ ತಂ |
ವದಂತಂ ದ್ವಿಜ ತೇ ಕಲ್ಪಭುಜಂ ಮಜ್ಜನತಾಂ ಪ್ರತಿ |೫೩|

ಮಮ ಭೋಜನ ಸಂತೋಷಂ ಯೇ ವದಂತಿ ದ್ವಿಜೋದಿತಂ |
ತೇಷಾಮನ್ನಾನಿ ಸಂಪೂರ್ಣಾನೀತಿ ಸತ್ಯಾ ಫಲಶ್ರುತಿಃ |೫೪|

ಇತಿ ಮಂತ್ರಸ್ತ್ವಯಾ ತತ್ರ ಜಪ್ತವ್ಯಃ ಸತತಂ ತ್ವಿಹ |
ಕುತ್ರ ಯಾಸ್ಯತಿ ತೇ ಪುತ್ರಕಲತ್ರೈ: ಸಹಸಾ ಸಹ |೫೫|

೧೧. ವಿಪ್ರಶ್ರೋತೃಕ ಪ್ರಕರಣಮ್ | ಶ್ಲೋಕಾ: [೫೬-೬೧]

ಇಹೇತಿ ಚೋಚ್ಯತೇ ಮಯಾ ಪ್ರಿಯೇತಿ ಚೋಚ್ಯತೇ ತ್ವಯಾ |
ಮಯಾ ತ್ವಯಾಽಪ್ಯಹೋ ವಿಧಿರ್ಮಹೋದಧೌ ವಿಧಿಷ್ಯತೇ |೫೬|

ಸ ಯಥಾ ವದತಿ ಹ್ಯಾವಾಂ ಮಾ ವಾಕ್ ತೇ ಚಾನ್ಯಥಾ ಭವೇತ್ |
ನಿರ್ಣಯಂ ಚ ಪ್ರಪಶ್ಯಾವಸ್ತ್ವರ್ಣವೇ ಮಣಿರಾಜ ತೇ |೫೭|

ಇತಿ ಹಾಸ್ಯಾಸ್ಪದಾ ತೇ ಚ ಶೇಮುಷೀ ಶಾಸಕೋಽಸ್ಮ್ಯಹಂ |
ಮಾಸಿ ಮಾಸಿ ಶುಭಾವಾಸಿಭಾಸಮಾನಃ ಶಶೀ ಯಥಾ |೫೮|

ಪರಸೌಖ್ಯಂ ತ್ವನ್ಮುಖೇನ ನರಸೌಖ್ಯಂ ಯಥಾ ಚ ಮೇ |
ಸುರಸೌಖ್ಯಂ ಚ ಮೇ ಸೂರ್ಯಕರವಚ್ಚ ಪ್ರಕಾಶಯ |೫೯|

ಮಮ ಸದ್ಭಕ್ತಿಸಂಭೂತಿಂ ಯೇ ವದಂತಿ ಬುಧೋದಿತಾಂ |
ತೇಷಾಂ ಸತ್ಸಂಪದಃ ಸ್ಯುಸ್ತಾಃ ಮೂರ್ತಿಮತ್ಯೋಽತ್ರ ಯಾಃ ಸುತ |೬೦|

ಇತ್ಯೇಕಂ ಶ್ಲೋಕ ಮುಖ್ಯಂ ಮೇ ತ್ಯಕ್ತವಾನಸಿ ವಿಪ್ರಕ |
ಆಕರಸ್ಥಂ ಲೇಖನಂ ಚ ಕಾರಯ ಪ್ರಾಙ್ಮಯೇರಿತಂ |೬೧|

೧೨. ವೇದನಿಧಿ ಪ್ರಕರಣಮ್ | ಶ್ಲೋಕಾ: [೬೨-೬೬]

ಹೇ ಬ್ರಾಹ್ಮಣಾನ್ನಮಂತ್ರಂ ತ್ವಂ ಜಪನ್ ಸಂಪಶ್ಯ ಮಾಂ ಮುನಿಂ |
ಶತಾನಂದಮುನೇಸ್ತಾತೋ ಬ್ರಾಹ್ಮಣಾನ್ನಂ ಯಥಾಽಽತನೋತ್ |೬೨|

ತಥಾ ತನೋಷಿ ತ್ವಮಪಿ ವೃಂದಾವನಪತಿಂ ಜಪ |
ಮಂತ್ರೇಣಾನೇನ ವಿಪ್ರೇಂದ್ರ ಶೀಘ್ರಂ ತೇಽನ್ನಂ ದದಾಮ್ಯಹಂ |೬೩|

ಪೂರ್ವಂ ತ್ವಮನ್ನದಾನಂ ಚ ನಾಕರಃ ಪರಮೇ ದ್ವಿಜೇ |
ನಾದತ್ತಮುಪತಿಷ್ಠೇಚ್ಚ ಬ್ರಹ್ಮಾದ್ಯಾಸ್ತ್ರಿದಶಾ ಅಪಿ |೬೪|

ಅತಸ್ತ್ವಂ ಕಾರ್ಪಣ್ಯಭಾವಂ ತ್ಯಜ ಬ್ರಾಹ್ಮಣತರ್ಪಣಂ |
ಕುರು ಕೃಷ್ಣಾರ್ಪಣಂ ತಚ್ಚ ದರ್ಪಣೇ ಸ್ವಮುಖಂ ಯಥಾ |೬೫|

ಪಶ್ಯಸಿ ತ್ವಂ ಜನ್ಮಜನ್ಮನ್ಯೇವಂ ಸತ್ಫಲಸಂಚಯಂ |
ಮನ್ಮ ಮನ್ಮ ವಯಂ ಸರ್ವೇಽಪ್ಯೇವಮೇವ ನ ಸಂಶಯಃ |೬೬|

೧೩. ಬಹುಭಕ್ತ ಶ್ರೋತೃಕ ಪ್ರಕರಣಮ್ | ಶ್ಲೋಕಾ: [೬೭-೭೨]

ಮುನಿಂ ಮನ್ನಂದನಂ ಪುಣ್ಯಾತ್ಮಾನಂ ಪಶ್ಯಂತು ಸಜ್ಜನಾಃ |
ಸ್ನಾನೇ ಚ ಪ್ರಣವಧ್ಯಾನೇ ವ್ಯಾಖ್ಯಾನೇ ದೇವತಾರ್ಚನೇ |೬೭|

ಪುನರ್ಮಾಧ್ಯಾಹ್ನಿಕೇ ಸ್ನಾನೇ ಭೋಜನೇ ಬ್ರಾಹ್ಮಣೈ: ಸಹ |
ನಿತ್ಯಂ ಸ ವರ್ತತೇ ವಿದ್ವಾನ್ ವೇದಶಾಸ್ತ್ರವಿನೋದತಃ |೬೮|

ಪ್ರೀಣಯನ್ ಪರಮಾನಂದಂ ಸದದನ್ಮಮ ನಾಕಿನಃ |
ನೋ ವೃಥಾ ಕ್ಷಣಮಪ್ಯಸ್ಯ ಗತಂ ತೋಕಸ್ಯ ಸಾತ್ವಿಕಾಃ |
ಪಶ್ಯಂತು ತಪಸೋಽಸ್ಮಾಕಂ ಸಾಫಲ್ಯಂ ಚ ಕಲೌಯುಗೇ |೬೯|

ತಸ್ಮಾದಯಂ ಚ ತೋಕೋಽಪಿ ಲೋಕೋಪಕರಕರ್ಮವಾನ್ |
ಶೋಕೋಽಪ್ಯಮುತ್ರ ನಾಸ್ತ್ಯೇವ ಕೋಪೋಽಪಿ ಸಮವರ್ತಿನಃ |೭೦|

ಗುಣಾನ್ ದ್ವಿಗುಣಿತಾನ್ ಅಸ್ಮಿನ್ ಪಶ್ಯಂತು ಗುಣಿನಃ ಸದಾ |
ಗುಣಿನಶ್ಚ ಪ್ರಮೋದಂತೇ ಗುಣಿಷ್ವಿಹ ನ ನಿರ್ಗುಣಾಃ |೭೧|

ತಸ್ಮಾನ್ಮಮ ಸಮೋ ಮನ್ನಂದನ ಏವ ದಿನೇ ದಿನೇ |
ಕರ್ಮಂದಿನಾಂ ಸದಾಽಽನಂದಂ ತನೋತು ತನುಭೃತ್ ಸ್ವಯಂ |೭೨|

೧೪. ವಾದಿರಾಜಭಟ್ಟ ಪ್ರಕರಣಮ್ | ಶ್ಲೋಕಾ: [೭೩-೭೬]

ಹೇ ವಾದಿರಾಜಭಟ್ಟಾರ್ಯನಾಮಧಾರ ಉದಾರ ತೇ |
ಸಾರ್ಥಕಂ ಕುರುಷೇ ಜನ್ಮ ಪಾರ್ಥವನ್ನಾತ್ರ ಸಂಶಯಃ |೭೩|

ವೃಂದಾವನಾಚಾರ್ಯನಾಮ್ನಃ ಪುತ್ರಮಿತ್ರಕಲತ್ರಕೈಃ |
ಸಹ ತಸ್ಯ ಗೃಹಂ ದತ್ವಾ ಬೃಹತ್ಕೀರ್ತಿಮುಪಾದದೀಃ |೭೪|

ಪ್ರತಾಪಂ ತಸ್ಯ ದತ್ವಾ ಚಾಮಿತ್ರತಾಪಂ ಕರೋಷ್ಯಹೋ |
ಪತ್ರತಾಪಾಖ್ಯ ರುದ್ರೋಽಪಿ ಸ್ವಪ್ರತಾಪಂ ಜಹಾವಿಹ |೭೫|

ಲಕ್ಷ್ಮೀಪತಿಪ್ರತಾಪಾರ್ಥಂ ದತ್ವಾ ಪ್ರಾರಬ್ಧಮಪ್ಯಹೋ |
ಸ್ವೇನ ಸಾರ್ಧಂ ಚ ತದ್ಭುಕ್ತ್ವಾ ಪರಾರ್ಧಂ ಲೋಕಮೇಷ್ಯತಿ |೭೬|

೧೪. ವಿಪ್ರ ಪ್ರಕರಣಮ್ | ಶ್ಲೋಕಾ: [೭೭-೮೫]

ನಿಷ್ಕದ್ವಯಂ ಸ ದತ್ವಾ ತು ಶುಷ್ಕಂ ತತ್ಪಾಪಸಂಚಯಂ |
ಕಿಷ್ಕಿಂಧೇಶ್ವರವಚ್ಚಕ್ರೇ ಪುಲ್ಕಸಾಂ ಜನ್ಮಯಾಪಕಂ |೭೭|

ಸೋಽಪಿ ದಾಸೋ ಮಮ ವ್ಯಾಸಃ ಸ್ನೇಹಪಾಶಾನ್ವಿತಸ್ತ್ವಯಿ |
ಹಸ್ತೇ ಚ ಶ್ರೀಪತೇ ನಿಷ್ಕದ್ವಯಂ ಪ್ರಾಪಯದಾಶು ತೇ |೭೮|

ತೇನ ತೇ ತಾತ ಏವಾಸೌ ಮಾತಾ ತೇ ತತ್ಸತೀ ದ್ವಿಜೇ |
ತಸ್ಯಾನುಜಃ ಪಿತೃವ್ಯಸ್ತೇ ಗುರುರ್ಮತ್ಸುತ ಏವ ಚ |೭೯|

ಇತ್ಥಂ ಸದಾನುಸಂಧಾನಬಂಧನಾನ್ವಿತ ಏವ ಸನ್ |
ಧನ್ವಂತರಿಂ ಸದಾ ಧ್ಯಾಯನ್ ಕಿಂ ಧನೈರ್ಬಂಧನಪ್ರದೈಃ |೮೦|

ವರ್ತಸ್ವ ಸಮುಪಾಸ್ವೇಹ ಕಾರ್ತಸ್ವರವಿಭೂಷಿತಂ |
ಪಾರ್ಥಃ ಸ್ವರಮಣಂ ಕೃಷ್ಣಂ ಯಥಾ ಪಾರ್ಥ್ಯಸ್ವ ಮಾಮಪಿ |೮೧|

ನಂದನಂ ಯತಿಸಂದೋಹೇನಾನ್ವಿತಂ ತನ್ಮತೇ ಸ್ಥಿತಂ |
ಸನ್ಮತಿಂ ಜನ್ಮತಃ ಕಾಂತಂ ಶಾಂತಂ ತಂ ಸಮುಪಾಸ್ವ ಹ |೮೨|

ಇಹಾಮುತ್ರಾರ್ಥದಂ ಶಾಸ್ತ್ರಾರ್ಥಜ್ಞಂ ತತ್ವಾರ್ಥಕೋವಿದಂ |
ಸುತ್ರಾಮಗುರುವತ್ ಪ್ರಾಜ್ಞಂ ಪ್ರಾರ್ಥಯ ಶ್ರೀಪತೇಃ ಪ್ರಿಯಂ |೮೩|

ಔದಾರ್ಯಮಾಧುರ್ಯವಾಕ್ಯಯುಕ್ತಂ ಧೈರ್ಯಾನ್ವಿತಂ ಪರೈಃ |
ವಿವಾದೇ ಕ್ರಿಯಮಾಣೇಽಪಿ ಗಾಂಭಿರ್ಯೇಣಾಽರ್ಯಭಾವಿನಂ |೮೪|

ಚಾತುರ್ಯತಃ ಪರಾಕ್ರಾಂತಂ ಮಾತುರ್ಯಸ್ಯಾಸ್ತಪೋದಯಂ |
ಪ್ರಾತರ್ಯುಗಂ ತತ್ವದಯೋಃ ಪ್ರಾರ್ಥಯಸ್ತ್ವಂ ಸದಾ ದ್ವಿಜ |೮೫|

೧೬. ವೇದವೇದ್ಯ ಶ್ರೋತೃಕ ಪ್ರಕರಣಮ್ | ಶ್ಲೋಕಾ: [೮೬-೯೧]

ಅಪಾಂ ಫೇನೇನ ನಮುಚೇಃ ಶಿರೋ ದುಶ್ಚ್ಯವನೋಹರತ್ |
ಯಥಾ ತಪಃಪ್ರಭಾವೇನ ಹನ್ಮ್ಯಹಂ ಪರವಾದಿನಃ |೮೬|

ತಸ್ಮಾದ್ ದುರ್ವಾದಿಭಿರ್ಭಿತಿರ್ನಾಸ್ತಿ ನಾಸ್ತಿ ಸುಭಾಸು ತೇ |
ತಜ್ಜಿಹ್ವಾ ಸಾಂತರೈರ್ಬದ್ಧಾ ಭವಿಷ್ಯತಿ ನ ಸಂಶಯಃ |೮೭|

ಅತಸ್ತ್ವಂ ನಂದನ ಮಮ ನಂದದಾಽನಂದಸನ್ಮುನೇಃ |
ಮತಂ ಮನಸಿ ಸಂಧಾಯ ತಾಮಸಾನ್ ಜಹಿ ವಾದಿನಃ |೮೮|

ಧನೂರತ್ನಂ ಮನಸ್ತೇ ವೈ ಹ್ಯಾನಂದಮುನಿಸನ್ಮತಂ |
ನಾನಾಯುಧನಿದಾನಂ ತೇ ರಥಿನಃ ಪೃಥುವಾದಿನಃ |೮೯|

ಪಕ್ಷಪಾತರಥಂ ಮೇ ತ್ವಂ ಕ್ಷಿಪ್ರಮಾರೋಹ ಕಾಙ್ಕ್ಷಿತಂ |
ಲಕ್ಷ್ಯಂ ಲಕ್ಷಣಸಂಪನ್ನಂ ದುಷ್ಟಪಕ್ಷಾಭಿದಂ ಬುಧ |೯೦|

ವಿದ್ಧಂ ಕುರು ಪ್ರಬುದ್ಧೇಶ ವೃದ್ಧವಾಕ್ಯಂ ನ ಧಿಕ್ಕುರು |
ಬದ್ಧಂ ಕುರು ಮನಸ್ತೇ ಮತ್ಪದಪದ್ಮೇ ಧೃತಿಂ ಕುರು |೯೧|

೧೭. ಬಹುಭಕ್ತ ಶ್ರೋತೃಕ ಪ್ರಕರಣಮ್ | ಶ್ಲೋಕಾ: [೯೨-೯೬]

ತಿಮಿರಂ ಸಮರೇ ರಮ್ಯಂ ನಿಮಿರೇವ ಕುಮಾರಕಂ |
ಅಮರಂ ತ್ವಮರಾರಾಧ್ಯಂ ಸೋಮರಾಟ್ ಪರಮೋಽರಮತ್ |೯೨|

ಅಮುಚನ್ನಮುಚಿಃ ಕಾಂಚೀಂ ತ್ವಂಚನ್ ಕಿಂಚನ ಸಿಂಚನೈಃ |
ಲಾಂಛನಾಂಚನಸಂಛನ್ನಂ ನಾರಾಚಾನ್ನ ಶಚೀಪತಿಂ |೯೩|

ಏತದ್ದ್ವಿಪದ್ಯಭಾವಂ ಮೇ ನಂದನಾನ್ಮಂದಬುದ್ದಯಃ |
ನಿಭೋಧಂತು ನ ಧುನ್ವಂತು ನಿಧಾನಂ ಭವತಾಂ ಮುನಿಃ |೯೪|

ಜ್ಞಾನಸಾಗರಮಗ್ನೋಽಸೌ ಸಂಸಾರಾಗ್ನಿಪ್ರದೀಪಿತಾನ್ |
ತತ್ಪೂರೈಭಗ್ನಸಂತಾಪಾನದ್ಭಿರಗ್ನಿಮಿವಾಕರೋತ್ |೯೫|

ತಸ್ಮಾತ್ ಜ್ಞಾನನಿಧಿಂ ಪ್ರಾಪ್ಯ ಸುಖಿನಃ ಸಂತು ಸಜ್ಜನಾಃ |
ವಿಜ್ಞಾನಕೋಶಾದಜ್ಞಾನಂ ನಿರಾಕುರ್ವಂತು ಸರ್ವಥಾ |೯೬|

೧೮. ವೇದವೇದ್ಯ ಪ್ರಕರಣಮ್ | ಶ್ಲೋಕಾ: [೯೭-೧೦೯]

ಶ್ಲೋಕದ್ವಯಸ್ಯ ಶಕ್ಯಾರ್ಥಂ ತೋಕ ತ್ವಂ ಚೋಕ್ತವಾನಸಿ |
ಲೋಕೇ ಯಥಾ ಶಕ್ರ ಗುರುಃ ತ್ವಂ ಕವಿರ್ವಾಕ್ಪತಿಸ್ತ್ವಹಂ |೯೭|

ಕಿಂ ತೇ ದಾಸ್ಯಾಮಿ ಮದ್ದಾಸ್ಯಂ ಪೂರ್ವಮೇವ ತ್ವಮಾದಧೀಃ |೯೮|

ತಸ್ಮಾನ್ಮತ್ಸಾಮ್ಯಮೇವೇಹ ಚಾಽದತ್ಸ್ವ ಸುತ ಸಾತ್ವಿಕ |
ಮತ್ಸಾಮ್ಯೇ ಚ ತ್ವಯಾ ಪ್ರಾಪ್ತೇ ತ್ವತ್ಸಮೋ ನಾಸ್ತಿ ಸತ್ಸು ಚ |೯೯|

ತತ್ಸತಾಂ ಸಂಮತಂ ಸತ್ಯಂ ಕುತ್ಸಿತಾನಾಮಸಮ್ಮತಂ |
ಜಗತ್ಸತ್ವಂ ಯಥಾ ತತ್ವವಾದಿನಾಂ ನ ಮೃಷಾತ್ಮನಾಂ |೧೦೦|

’ಅಸತ್ಯಮಪ್ರತಿಷ್ಠಂ ತೇ ಜಗದಾಹುರನೀಶ್ವರಂ |
ಅಪರಸ್ಪರ ಸಂಭೂತಂ ಕಿಮನ್ಯತ್ ಕಾಮಹೈತುಕಂ |೧೦೧|

ಏತಾಂ ದೃಷ್ಟಿಮವಷ್ಟಭ್ಯ ನಷ್ಟಾತ್ಮಾನೋಽಲ್ಪಬುದ್ಧಯಃ |
ಪ್ರಭವಂತ್ಯುಗ್ರಕರ್ಮಾಣಃ ಕ್ಷಯಾಯ ಜಗತೋಽಹಿತಾಃ |೧೦೧|

ಇತಿ ಗೀತೋದಿತೈಃ ಶ್ಲೋಕೈಃ ತೋಕವಾಕ್ಕಾಯಕರ್ಮಭಿಃ |
ಲೋಕನಾಶಕರೂಪಾಣಾಂ ವರಾಕತ್ವಂ ನಿರೂಪ್ಯತೇ |೧೦೨|

ತದ್ವತ್ ತವೋಚ್ಛ್ರಯಂ ದೃಷ್ಟ್ವಾ ಹ್ಯಸೂಯಂತೇಽನಸೂಯಯಾ |
ಸಹ ಸರ್ವೇ ಮಹದ್ ಯಾಂತಿ ಹ್ಯಭದ್ರಂ ರೌದ್ರ ಮೇವ ತೇ |೧೦೪|

ತಸ್ಮಾತ್ತ್ವಂ ಮತ್ಸಮೋ ನಿತ್ಯಂ ಕುತ್ಸಿತಾನಾಂ ಭಯಾನಕಃ |
ವತ್ಸ ತ್ವಂ ಸತ್ಸು ಸಂಪೂಜ್ಯಃ ಶಶ್ವದತ್ರ ಪರತ್ರ ಚ |೧೦೫|

ಓಂ ಏತತ್ಸರ್ವಂ ಸ್ವಾಪ್ನಪದ್ಯೇನ ಗರ್ವಂ ಹಿತ್ವಾ ಸರ್ವೇ ವಿಪ್ರವರ್ಯಾಸ್ಯಜೇನ |
ಶೃತ್ವಾ ಚೋರ್ವ್ಯಾಂ ಶರ್ವ ಗುರ್ವಾದಿ ದೇವಾನ್
ದೃಷ್ಟ್ವೋರ್ವಶಿಂ ಯಾಂತು ಮಾಂ ಮಾನವೇಂದ್ರಾಃ |೧೦೬|

ಇದಂ ವೃಂದಾವನಾಖ್ಯಾನಂ ಯೇ ಪಠಂತಿ ಮನೀಷಿಣಃ |
ಮುಕುಂದಾವನಮೇವಾಸ್ತು ತೇಷಾಂ ಕಂದಾಶನಾಜ್ಞಯಾ |೧೦೭|

ಇದಮರ್ಪಿತಮೇವಾಸ್ತು ಹಯಶೀರ್ಷಸ್ಯ ಪಾರ್ಷದಾತ್ |
ಸಮಂ ಸಹಸ್ರಶೀರ್ಷಸ್ಯ ಸೂಕ್ತಸ್ಯ ಪುರುಷಾತ್ ಕೃತಮ್ |೧೦೮|

ಯಚ್ಛ್ರುಣ್ವತಾಂ ಭಕ್ತಿರುದಾರಸದ್ಗುಣೇ ಹರೌ ಹರೇರ್ಲೋಕಗತೇ ತಥಾ ಮಯಿ |
ಭವತ್ಯಹೋ ಸರ್ವಶುಭಾಪ್ತಿಸನ್ಮತೀರ್ ದದಾತ್ಯಜಸ್ರಂ ಸುತ
ಸತ್ಯಮೇವ ತತ್ ಓಂ |೧೦೯|

| ಇತಿ ಶ್ರೀಸ್ವಾಪ್ನವೃಂದಾವನಾಖ್ಯಾನೇ ಅಲೌಕಿಕ ವಿಭಾಗೇ
ನಿದರ್ಶನಪರ್ವಣಿ ಏಕವಿಂಶಾಧ್ಯಾಯ: ಸಮಾಪ್ತ: |

|| ಶ್ರೀ ಅಶ್ವಿನೀಹಯಗ್ರೀವಾತ್ಮಕ ಕೃಷ್ಣಾರ್ಪಣಮಸ್ತು ||

22. Svaapnavrundavanakhyana