19. Svaapnavrundavanakhyana

Composer : Shri Vadirajaru

| ಅಥ ಏಕೋನವಿಂಶಾಧ್ಯಾಯ: |

೧. ವಿಪ್ರ ಪ್ರಕರಣಮ್ | ಶ್ಲೋಕಾ: [೧-೩]

ಹರಿಃ ಓಂ |

ಹೇ ಬ್ರಾಹ್ಮಣ ತ್ವಂ ಶ್ರುಣು ಮೇ ಸುವಾಣೀಂ ಕಾರ್ಪಣ್ಯಭಾವಂ ನ ಭಣಾದ್ಯ ಧೀಮನ್ |
ಗುಣೈರ್ವಿಹೀನಸ್ಯ ಗಣಾದ್ಧಿಚಾನ್ನಂ ಗೃಹಾಣ ಸುಬ್ರಾಹ್ಮಣ ಸದ್ಗೃಹಸ್ಥೈಃ |೧|

ಭೋಜ್ಯವಿತ್ತಂ ಪ್ರದತ್ವಾ ತು ಋಣಾನ್ಮುಕ್ತಃ ಶನೈಃ ಶನೈಃ |
ಭೋಜನಾರ್ಥಂ ಮಧುಕರವೃತ್ತಿಂ ಕುರು ಯಥಾ ಪುರಾ|೨|

ಇತಿ ಪೂರ್ವಂ ಮಯಾಪ್ರೋಕ್ತಂ ಅನುಸಂಧತ್ಸ್ವ ಬುದ್ಧಿಮನ್ |
ವೃಂದಾವನೇ ಚ ಮತ್ಸೇವಾಂ ಮಾ ತ್ಯಜ ತ್ವಂ ದ್ವಿಜೋತ್ತಮ |೩|

೨. ಅಪ್ಪಣ್ಣ ಕೃಷ್ಣಭಟ್ಟ ಪ್ರಕರಣಮ್ | ಶ್ಲೋಕಾ: [೪-೧೪]

ಲಜ್ಜಾವಿಹೀನ ಕುಬ್ಜಾಯಾಃ ಪತೇರ್ನಾಮ್ನಃ ಪ್ರಭಂಜನ |
ತ್ವಜ್ಜಾತಿಧರ್ಮಮನೃತಂ ಮಾ ತ್ಯಜಾದ್ಯಾಪಿ ದುರ್ಜನ |೪|

ವೃಂದಾವನಾಚಾರ್ಯನಾಮ್ನಾ ತ್ವಂ ನಿಂದಾವಚನಾದಿನಾ |
ತಥಾ ಲಕ್ಷ್ಮೀಪತಿರ್ನಾಪಿ ಕವಿತಾಂ ವೇತ್ತಿ ಸರ್ವಥಾ |
ಸವಿತಾ ವೇತ್ತಿ ತತ್ ಸರ್ವಂ ಕರ್ಮಸಾಕ್ಷೀ ತವಾಪ್ಯಹೋ |೫|

ಮಮ ಮಾತುಃ ಕೃತೇ ಶ್ರಾದ್ಧೇ ಭೋಕ್ತಾ ತ್ವಂ ಗರ್ಭಿಣೀಪತಿಃ |
ವೈಪರಿತ್ಯೇನೋಭಯತಃ ಶ್ರೀವತ್ಸಂ ಧೃತವಾನಸಿ |೬|

ಅನ್ಯಕ್ಷೇತ್ರೇ ಕೃತಂ ಪಾಪಂ ಪುಣ್ಯಕ್ಷೇತ್ರೇ ವಿನಶ್ಯತಿ |
ಪುಣ್ಯಕ್ಷೇತ್ರೇ ಕೃತಂ ಪಾಪಂ ಕೃಷ್ಣಕ್ಷೇತ್ರೇ ವಿನಶ್ಯತಿ |೭|

ಕೃಷ್ಣಕ್ಷೇತ್ರೇ ಕೃತಂ ಪಾಪಂ ವಜ್ರಲೇಪೋ ಭವಿಷ್ಯತಿ |
ತಾದೃಶೇ ಕೃಷ್ಣಗೇಹೇ ತ್ವಂ ಮೃಷಾ ವಚನಮಬ್ರವೀಃ |೮|

ಇತ್ಯಾದ್ಯಾಃ ಬಹವೋ ದೋಷಾಸ್ತ್ವಯಿ ಸಂತಿ ಕೃತಾಂತಕ |
ಅತ ಏವ ಹಿ ಸಂತಾನರಹಿತೋಽಸಿ ಕುಲಾಂತಕ |೯|

ಕಾಕೋದರೇತ್ಯಾದಿಶ್ಲೋಕತ್ರಯೇಣೋಕ್ತಾನ್ ಸುದುರ್ಗುಣಾನ್ |
ಗುಣಾಧಮ ಶ್ರುಣುಷ್ವಾದ್ಯ ತೂಷ್ಣೀಂ ತಿಷ್ಠ ಮಮಾಗ್ರತಃ |೧೦|

ಇದಮಪ್ಯಮುತಶ್ಚೋಕ್ತಂ ಕುಮತಿರ್ನ ತು ತೇಽಪ್ಯಹೋ |
ಸುಮತಿಃ ಸ್ವಮತೇ ನಾಸ್ತಿ ಸುಮತಂ ಮಮ ಜಾನತೇ |೧೧|

ತಾಸಾಂ ಸ್ತ್ರೀಣಾಂ ಯಥಾ ಯೋಗ್ಯಂ ಫಲಂ ಭವತಿ ಬ್ರಾಹ್ಮಣ |
ರಥರೋಧನ ಕರ್ತ್ರೀಣಾಂ ಪೂರ್ವಕರ್ಮಾನುರೋಧನಾತ್ |೧೨|

ಪ್ರತ್ಯೇಕ ಫಲದಾತೃತ್ವೇ ತತ್ತತ್ಕರ್ಮಾಖ್ಯಶೈವಲೈಃ |
ಸ್ತ್ರೀನೀರಾಣಿ ಪರಿಚ್ಛಿನ್ನಾ ನೀತಿ ತದ್ಧಾನಿ ನೈವ ಹಿ |೧೩|

ಅತಃ ಸಾಮಾನ್ಯತೋ ಯೋಗ್ಯಂ ಫಲಂ ಭವತಿ ನಾನ್ಯಥಾ |
ಕಾ ಮಾನ್ಯತಾ ವಿನಾ ಪುತ್ರಂ ಸ್ತ್ರೀಣಾಂ ಶ್ರೀಮಾನ್ ಯಥಾ ಶ್ರಿಯಾ |೧೪|

೩. ಲಕ್ಷ್ಮೀಪತಿ ಪ್ರಕರಣಮ್ | ಶ್ಲೋಕಾ: [೧೫-೨೨]

ಮಮೈವಂ ದೈವಕಗ್ರಂಥಂ ಹೃದಯಗ್ರಂಥಿಸಂಯುತಾಃ |
ಯೇ ನ ಗೃಹ್ಣಂತಿ ತಾನ್ ಸರ್ವಾನ್ ಗೃಹ್ಣಂತಿ ಯಮಕಿಂಕರಾಃ |೧೫|

ಮಮ ಆಖ್ಯಾನ ಪ್ರವಕ್ತಾರಂ ಯಮಾಜ್ಞಯಾ ಗತಾ ಭಟಾಃ |
ತೇ ಮಯಾ ವಾರಿತಾ: ಸರ್ವೇ ಕೋ ವಾ ಮತ್ಸದೃಶೋ ಯತಿಃ |೧೬|

ಹೇ ವೃಂದಾವನಗಸ್ವಾಮಿನ್ ಮಮಾಽನಂದಂ ಕುರು ಪ್ರಭೋ |
ಅನ್ನಂ ದದಸ್ವ ವಿಪ್ರಸ್ಯ ಮನ್ನಂದನಮುಖೇನ ಚ |೧೭|

ನೋ ಚೇತ್ ತವ ಕರಂ ವಿಪ್ರೇ ವಿತರಾಽರ್ಯ ಹರೇ ಗುರೌ |
ಶರಣಾಗತಸಂಸರಣಂ ಮರಣಾರ್ತಿಂ ಹರ ಪ್ರಿಯ |೧೮|

ಏಕ ವಾಕ್ಯಪ್ರಿತಿಷ್ಠಾಪನಾಚಾರ್ಯಾದ್ಯ ತ್ವಯೋದಿತಂ |
ಗಾಂ ದಾಪಯಾಮೀತಿ ಭೂಪಾತ್ ಸಮಂ ಕುರು ಯಥೇಷ್ಟತಃ |೧೯|

ತ್ರಿವಾಚಾಽಪಿ ಮಯಾ ಪ್ರೋಕ್ತಂ ತವ ಬುದ್ಧಿರ್ಯಥಾ ತಥಾ |
ಕುರು ವಿಪ್ರಸ್ಯ ವಚನಂ ನ ಮೃಷೇತಿ ವಿಚಿಂತಯ |೨೦|

ಅನೃತಂ ತು ಪ್ರವಕ್ತಾರೋ ವೈರಾಗ್ಯರಹಿತಾಶ್ಚ ಯೇ |
ಚರಣಂ ತಚ್ಛರಸಿ ತೇ ಕುರು ತಾಮರಸೋಪಮಂ |೨೧|

ಶ್ರೇಯಾಂಸಿ ತವ ದಾಸ್ಯಾಮಿ ಹಯಾಸ್ಯಾರಾಧನಂ ಕುರು |
ಆಶಾಂ ತೇ ಯಾಂತಿ ಪಾಪಾನಿ ಸ್ವಾಶಾಂ ತ್ವಕ್ತ್ಯಾ ತ್ವಯಿ ಪ್ರಿಯ |೨೨|

೪. ಶ್ರೀಪತಿ ಪ್ರಕರಣಮ್ | ಶ್ಲೋಕಾ: [೨೩-೨೫]

ಸಮಾಗತೋಽಸಿ ಶ್ರೀಪತೇ ತ್ವಮಾಗತಃ ಸರೋವರಂ |
ಸುಮಾನಸಂ ಯತೀಶ್ವರಂ ಪ್ರಮಾಂ ವದಾಽಶು ಮತ್ಕೃತೇಃ |೨೩|

ಹಯಾಸ್ಯ ನಾಮಧೇಯಿನೋ ಮಯಾಽಸ್ಯ ಚೋದಿತೋ ಮನುಃ |
ಕುಹಾಸ್ಯವರ್ಜಿತೋ ಮುನಿಃ ಸುಹಾಸಮಿಶ್ರಿತಾನನಃ |೨೪|

ಮಾನಸಂ ರಾಜಹಂಸೀವ ಮತ್ಸರೋವರಮಾಗತಂ |
ಮತ್ಕಥಾಕ್ಷೀರಪಾನಂ ತು ಮಾಮಕಂ ತಂ ಪ್ರಕಾರಯ |೨೫|

೫. ಹಯಗ್ರೀವ ಕರ್ಮಂದಿಪ್ರಕರಣಮ್ | ಶ್ಲೋಕಾ: [೨೬-೨೯]

ಹೇ ಹಯಗ್ರೀವ ಕರ್ಮಂದಿನ್ ಮಂದರಾದ್ರಿ ನಿಭಂ ಮಮ |
ವೃಂದಾವನಂ ಪಶ್ಯ ಸಾಂದ್ರಾನಂದಯುಕ್ತೋ ಭವಾಶು ಚ |೨೬|

ಮತ್ಸರೋವರಮಾಯಾಸಿ ರಾಜಹಂಸೀವ ಮಾನಸಂ |
ಮತ್ಕಥಾಕ್ಷೀರ ಪಾನಂ ತ್ವಂ ಸ್ನಾನಂ ಕೃತ್ವಾ ಕುರು ಪ್ರಿಯ |೨೭|

ಹಂಸೋ ಯಥಾ ಕ್ಷೀರಪಾನಂ ಕುರುತೇ ನೀರಕಂ ವಿನಾ |
ತದ್ವದಂಹೋ ನಾಮ ನೀರರಹಿತಂ ಮತ್ಕಥಾಮೃತಂ |೨೮|

ಪಿಬ ಪಾಪಹರಂ ಕೋಪರಹಿತಶ್ಚೇತ್ ಸುಪಾವನಂ |
ತಪಸಾ ಪಾಪಪೂಗಂ ತ್ವಮಪಾಕುರು ಪುರೋ ಮಮ |೨೯|

೬. ಶೇಷ ಪ್ರಕರಣಮ್ | ಶ್ಲೋಕಾ: [೩೦-೩೫]

ನಂದನಾಯಂ ಮಂದಬುದ್ಧಿಃ ಕಂದಾಶನಕೃತಿಂ ಪರಾಂ |
ವೃಂದಾವನೇ ಸಾಂದ್ರ ಭಕ್ತ್ಯಾ ಹ್ಯಧರಸ್ಯಂದನಾದಿನಾ |೩೦|

ದಿನೇ ದಿನೇ ವದತ್ಯೇವಂ ಕದನೇನ ವಿನಾ ಜನೈಃ |
ಮದನೇನಾಭಿಹೀನೋಽಯಂ ಸದನಂ ತಸ್ಯ ದಾಪಯ |೩೧|

ತ್ವತ್ಕರೇ ಚಾರ್ಪಿತೋಽಯಂ ತು ಮತ್ಕರಂ ತ್ವಸ್ಯ ದಾಪಯ |
ಸತ್ಕಾರಂ ಕುರು ವಿಪ್ರೇ ಚ ಮತ್ಕೃತಿಂ ಪ್ರಾಪಕೇಽತ್ರ ಚ |೩೨|

ಕೃಷ್ಣಾಚಾರ್ಯಸುತಶ್ಚಾಯಂ ನಿಷ್ಣಾತೋ ಹರಿಪಾದಯೋಃ |
ಪುಷ್ಣಾತಿ ವೇದಶಾಸ್ತ್ರಾಣಿ ತೃಷ್ಣಾಽಥಾಪಿ ಗತಾ ನ ಹಿ |೩೩|

ಸೋಽತ್ಯಂತಂ ತೃಷ್ಣಯಾ ಯುಕ್ತಃ ಕೃಷ್ಣಸಙ್ಕಲ್ಪತ: ಸುತ |
ವೈಷ್ಣವಬ್ರಾಹ್ಮಣಾಂಶ್ಚೋಷ್ಣಕರವತ್ ಪರಿತಾಪಿತಾನ್ |೩೪|

ಕುರುತೇ ನಿಷ್ಠುರ ವಚಃ ಕಿರಣೈಃ ಸ್ಮರಣಂ ವಿನಾ |
ಬ್ರಹ್ಮಧಿಕ್ಕರಣಂ ಚಾಸ್ಯ ಮರಣಾರ್ತಿಸಮಂ ಭವೇತ್ |೩೫|

೭. ಸೀತಾಪತಿ ಪ್ರಕರಣಮ್ | ಶ್ಲೋಕಾ: [೩೬-೪೨]

ಅಯಂ ಗ್ರಾಮೋ ಬಹುಲಬ್ರಾಹ್ಮಣೇಭ್ಯೋ ನಾಮ್ನಾ ಸಂಪೇಸರುರಿತ್ಥಂ ಪ್ರದತ್ತಃ |
ರಾಜ್ಞಾ ದತ್ತಃ ಶೇಷಹಸ್ತೇ ಸ ಶೇಷಸ್ತದಾಜ್ಞಯಾ ದತ್ತವಾನ್ ವಿಪ್ರಹಸ್ತೇ |೩೬|

ಯಸ್ಮಿನ್ ದತ್ತಂ ದಾನಮಾನಂತ್ಯಮೇವ ದದಾತಿ ಪುಣ್ಯಸ್ಯ ಚ ಕಿಂಚನಾಪಿ |
ತಸ್ಮಿನ್ ದಿನೇ ಶ್ರವಣದ್ವಾದಶೀತಿ ಸ ಶಾಸನಸ್ಥಂ ಪ್ರದದೌ ದ್ವಿಜೇಭ್ಯಃ |೩೭|

ವಾಮನೇನೇಕ್ಷಿತಂ ಗ್ರಾಮಂ ಶಾಸನಸ್ಥಂ ಮುನೀಶ್ವರ |
ನ ಪ್ರಯಚ್ಛಂತಿ ವಿಪ್ರೇಭ್ಯೋ ರಾಜಾನಃ ಕೇ ವದಸ್ವ ತಾನ್ |೩೮|

ಹಾ ಹಾ ಕೋಽಪೀಹ ರಾಜಾನಂ ತ್ಯಜ ಗ್ರಾಮಂ ದ್ವಿಜಾತಿನಾಂ |
ಇತಿ ಪುಣ್ಯೋಕ್ತಿಮುಕ್ತ್ವಾ ತು ಬ್ರಾಹ್ಮಣಾರ್ಥಂ ನ ಜೀವತಿ |೪೦|

ಯೇ ಜೀವಂತೀತಿ ವಿಪ್ರಾರ್ಥಂ ತೇ ಜೀವಂತ್ಯೇವ ನೇತರೇ |
ಸ್ವಾರ್ಥಂ ಜೀವಂತಿ ಕಾಂತಾರೇ ಕಿರಾತಾಃ ಕಿಂ ನ ನಿರ್ದಯಾಃ |೪೧|

ತಸ್ಮಾದ್ ವದೇತಿ ರಾಜಾನಂ ದ್ವಿಜಗ್ರಾಮಂ ತು ಸಜ್ಜನ |
ತ್ಯಜ ಜೀವಸಮಾಜೇ ತ್ವಂ ಭಜ ತತ್ಪುಣ್ಯಸಂಚಯಂ |೪೨|

ವಾಙ್ಗ್ಮಾತ್ರೇಣ ಚ ತತ್ಪುಣ್ಯರಾಶಿಂ ಪಶ್ಯ ಗುಣಾರ್ಣವ |
ತ್ವಂ ಮೇರುಣಾ ಸಮಂ ಪುಣ್ಯಮಾದತ್ಸ್ವ ಕೃಣುಷ್ವ ತತ್ |೪೩|

೮. ಶ್ರೀಪತಿ ಪ್ರಕರಣಮ್ | ಶ್ಲೋಕಾ: [೪೩-೫೦]

ಶ್ರೀಪತೇ: ಶ್ರೀನಿವಾಸೋಽಯಂ ವೃಥಾ ಗಾಳೀಂ ಪ್ರದತ್ತವಾನ್ |
ತಾಂ ಶ್ರುತ್ವಾ ಯತಯೋಽಪೀಹ ಮೂಕೀಭೂತಾ ಅಹೋ ವಿಧೇ |೪೩|

ಕಾಳೀಯಃ ಸ್ವ ವಿಷಜ್ವಾಲಾಜ್ವಲಿತಂ ಯಮುನಾ ಜಲಂ |
ಚಕಾರ ನಿರ್ಮಲಂ ಕಾಲೇ ಗೋಪಾಲೇನೈವ ಚಾಲಿತಃ |೪೪|

ತದ್ವದ್ ಗೋಪಾಲಕೃಷ್ಣೇನ ಮದ್ವೃಂದಾವನಗೇನ ಚ |
ಸದ್ವಂದನಾದಿಭಿಃ ಶೂನ್ಯಂ ವದನಂ ಭುವಿ ನಿಂದಿತಂ |೪೫|

ತಸ್ಮಿನ್ ಬ್ರಹ್ಮನ್ ಬ್ರಹ್ಮನಿಂದಾ ದೋಷೇಣ ಬ್ರಹ್ಮರಾಕ್ಷಸಃ |
ಬಹ್ವೀಸ್ಸಮಾ ಮಹಾವಹ್ನಿಸಂತಪ್ತ ಇವ ತಪ್ಯತೇ |೪೬|

ಬಹ್ವೀ: ಸಮಾ ಇತಿ ಶ್ರುತ್ವಾ (ಶೃತ್ಯಾ) ಚಾಂಹೋ ನಾಶಂ ಕರಿಷ್ಯತು |
ಅಸಹ್ಯಮಪಿ ಯಚ್ಚ್ರೀನಿವಾಸೋ ಗಹ್ವರಮಧ್ಯಗಃ |೪೭|

ತತ್ಕೃತಬ್ರಹ್ಮನಿಂದಾ ಯಾ ಮದ್ವೃಂದಾವನಸನ್ನಿಧೌ |
ಕಂದಾಶನೇಂದ್ರಮನಸೋ ದಂದಶೂಕಂ ಪ್ರಧಾರಿಣಃ |೪೮|

ಅರ್ಪಿತಂ ಶಲ್ಯಮಾಸೀತ್ ಸಂತರ್ಪಿತಂ ರಕ್ತಪಾನತಃ |
ನ್ಯಕ್ಕೃತಾ ಸಾ ಚ ವಿದ್ವದ್ಭಿಃ ಧಿಕ್ಕೃತ: ಸೋಽಪಿ ನಿಂದಕಃ |೪೯|

ಬ್ರಹ್ಮಹಿಂಸಾಸಮಂ ಪಾಪಂ ಬ್ರಹ್ಮಧಿಕ್ಕರಣೇ ಋಣಿನ್ |
ಮರಣಾರ್ತಿಸಮಂ ನೃಣಾಂ ಕರಣಂ ತಸ್ಯ ಮಾ ತವ |೫೦|

೯. ಚಿಂತಾಮಣಿಪುತ್ರ ಲಕ್ಷ್ಮೀನಾರಾಯಣ ಪ್ರಕರಣಮ್ | ಶ್ಲೋಕಾ: ೫೧

ಕೃತಿಶ್ಚ ಬ್ರಾಹ್ಮಣಸ್ಯೇಯಮಿತಿ ಚಿಂತಾಮಣೇ: ಸುತ |
ಪ್ರಮಾಣಂ ಕುರು ಮದ್ವೃಂದಾವನಾಗ್ರೇ ತ್ವಂ ಪ್ರಣಶ್ಯಸೇ |
ಸಪ್ತಮೇಽಹ್ನಿ ನ ಸಂದೇಹೋ ನೈವಾಬದ್ಧಂ ವದಾಬುಧ |೫೧|

೧೦. ಶೇಷ ಪ್ರಕರಣಮ್ | ಶ್ಲೋಕಾ: [೫೨-೫೫]

ಯದ್ ವಾ ಕರಿಷ್ಯತೇ ವಿಪ್ರಸ್ತ್ವಂ ಪಶ್ಯಾದ್ಯೈವ ತಜ್ಜಯಂ |
ತಸ್ಮಾತ್ ಕೃತ್ವಾ ಪಣಂ ಚೋಭೌ ಪ್ರಮಾಣಂ ಕುರುತಂ ದ್ವಿಜೇ |೫೨|

ಚಿಂತಾಮಣಿಸುತಶ್ಚಾಯಂ ಬ್ರಾಹ್ಮಣೋಽಯಂ ಮಮಾಶ್ರಿತಃ |
ಜಯಾಯ ಅಪಜಯಾಯಾಪಿ ಪಾಪ ಬುದ್ಧಿಂ ತ್ಯಜ ದ್ವಿಜ |೫೩|

ಮಮ ಕೋಪೋ ಭವೇತ್ ತಾಪೋ ಭವಿತಾ ತೇ ಸುಪಾಪಿನಃ |೫೪|

ಕರೋಮ್ಯಹಂ ಪ್ರಮಾಣಂ ಚೇತ್ಯುಕ್ತಿಮಾತ್ರೇಣ ಕಾಣ ಭೋ |
ಪ್ರಮಾಣಕರಣೇ ನೃಣಾಂ ಯತ್ ಪಾಪಂ ತದ್ ಭವೇತ್ ತವ |೫೫|

೧೧. ಲಕ್ಷ್ಮೀನಾರಾಯಣ ಪ್ರಕರಣಮ್ | ಶ್ಲೋಕಾ: [೫೬-೫೯]

ಚಿಂತಾಮಣಿ ಸುತಾಸಹ್ಯ ಲಕ್ಷ್ಮೀನಾರಾಯಣಾಹ್ವಯ |
ಬ್ರಾಹ್ಮಣಸ್ಯ ಕೃತಿಶ್ಚೇಯಮಿತಿ ತೇ ನಂದನಂ ಸ್ಪೃಶ |೫೬|

ಅಲೌಕಿಕಂ ಮಯಾ ಪ್ರೋಕ್ತಂ ಲೌಕಿಕಂ ವಿಪ್ರ ವಾಕ್ಕೃತಂ |
ಇತಿ ಸಂಸ್ಪೃಶ ಮತ್ಪಾದಂ ದಹ್ಯಸೇ ಮಮ ತೇಜಸಾ |೫೭|

ಲಕ್ಷ್ಮೀನಾರಾಯಣಃ ಶ್ರೀಮಾನ್ ಬ್ರಾಹ್ಮಣೋ ವಾ ಕರಿಷ್ಯತಿ |
ಗ್ರಹಾಣ ವೃಂದಾವನಾಗ್ರೇ ಪ್ರಮಾಣಂ ಪ್ರಾಣಘಾತಕ |೫೮|
ಯದ್ ವಾ ಮದ್ವೃಂದಾವನಾಗ್ರೇ ಕುರು ಸದ್ವಂದನಾಯುತಂ |
ಸಕೃದ್ ವಾ ತದ್ವಚಃ ಪ್ರಾಯಶ್ಚಿತ್ತಂ ಕರ್ತುಂ ದ್ವಿಜಾಧಮ |೫೯|

೧೨. ಶೇಷಶ್ರೋತೃಕ ಪ್ರಕರಣಮ್ | ಶ್ಲೋಕಾ: [೬೦-೭೫]

ನಮಸ್ಕಾರಃ ಪ್ರತೀಕಾರಃ ಸಂರಂಭೇಽಮ್ಬರಚಾರಿಣಾಂ |
ಸ್ವಕುಮಾರಾಪರಾಧೋ ಹಿ ಪಿತ್ರಾಽನು ಸ್ಮರ್ಯತೇ ನು ಕಿಂ |೬೦|

ಅಲಮಲಂ ಸುಕೃತವಾಕ್ ಕಲೌ ಯುಗೇ ಕಲಿಮಲೇನ ಕಲುಷೇ ಯಮಾಲಯೇ |
ಹಲಹಲೇನ ಮಿಲಿತೇ ಚ ಪಾಲಯಾಮ್ಯತುಲದೋಷ ಫಲದೇ ಮಲೀಮಸಾಂ |೬೧|

ಮಲೀಮಸಾಮಾಗಸಾನಿ ಸುಧಾಸಾಗರಶಾಯಿನಃ |
ಸುಧಾಯನಸಹಾಯೇನ ದೇಹಾಗಾರನಿವಾಸಿನಃ |೬೨|

ನ ಪ್ರಿಯೋ ಯದ್ವದೇತಾನಿ ಚಾಪ್ರಿಯಾಣ್ಯೇವ ಸರ್ವದಾ |
ತದ್ವದೇವಾಪ್ರಿಯಂ ಮತ್ವಾ ಮಾ ಕುರುತ್ವಂ ಸುತೋತ್ತಮ |೬೩|

ಮಮಾಽಗಸಂ ಪ್ರಥಾ ಚಾತ್ರ ಮದುಕ್ತಿರ್ನೈವ ತೇ ಭವೇತ್ |
ಕೃತೋತ್ತರಹಠೇ ಯದ್ವಚ್ಛಠಾನಾಮೇವ ತತ್ ಪ್ರಿಯಂ |೬೪|

ಮನ್ಮಠಸ್ಯಾಭಿಮಾನಂ ತು ನಾಸ್ತಿ ತತ್ಕಠಿಣಾತ್ಮನಾಂ |೬೫|

ಮಲೀಮಸಾಮಸಾಧೂಕ್ತಿಃ ಸುಧಾಸಾಗರಶಾಯಿನಃ |
ಸದಾಽಪ್ರಿಯಾ ಬುಧಾಗ್ರ್ಯಸ್ಯ ಮಮಾಪೀಹ ಬಲೀಯಸಃ |೬೬|

ಇತಿ ಮತ್ವಾ ಸತಾಂ ವೃತ್ತಿಮಙ್ಗೀಕುರು ಸುಮಙ್ಗಲ |
ರಙ್ಗನಾಥಸ್ಯಾಂತರಙ್ಗಮಿದಂ ತವ ನಿರೂಪ್ಯತೇ |೬೭|

ಮಲೀಮಸಾಂ ತು ದಾನಾನಿ ಬುಧಾಂತರ್ಯಾಮಿಣಃ ಪ್ರಭೋಃ |
ನಾರಾಯಣಸ್ಯ ಸರ್ವತ್ರ ಚಾಪ್ರಿಯಾಣ್ಯೇವ ಸರ್ವದಾ |೬೮|

ಬ್ರಾಹ್ಮಣಸ್ಯ ಕೃತಿಶ್ಚೇಯಂ ನೈವ ನೈವ ಮಯೋಚ್ಯತೇ |
ದೈವದೈವಂ ಹಯಗ್ರೀವೋ ವೇತ್ತಿ ಸರ್ವ ಹೃದಂತರಂ |೬೯|

ಯೇ ತ್ವವಿಶ್ವಾಸಿನ: ಸರ್ವೇ ಮಲೀಮಸ ಇತಿ ಸ್ಮ ತೇ |
ತಸ್ಮಾದ್ ಭೂತಾ ಭವಿಷ್ಯಂತಿ ಭಸ್ಮೀಭೂತಾ ಭವಿಷ್ಯತೇ |೭೦|

ಯಮೇನೈವ ಮಮಾಽಜ್ಞಯಾ ಮುಚ್ಯಂತೇ ನರಕಾಗ್ನಿಭಿಃ |
ಮುಚ್ಯಂತೇ ನರಕಾನೈವ ಪಚ್ಯಂತೇ ನರಕಾಗ್ನಿನಾ |೭೧|

ಉಚ್ಯಂತೇ ಮುನಿಭಿರ್ಬೋಧ್ಯಾಸ್ತೇ ಚ್ಯವಂತೇ ಹ್ಯಧೋಮುಖಾಃ |
ಸೂಚ್ಯಂತೇ ನಖನೇತ್ರಾಶ್ಚ ಶೋಚ್ಯಂತೇ ಯಮಕಿಂಕರೈಃ
ಸಿಚ್ಯಂತೇ ತಪ್ತಸೀಸಾದ್ಭಿ: ಸ್ವಚ್ಛಂ ತೇಷಾಂ ಸುಖಂ ನ ಹಿ |೭೨|

ಇತ್ಯವಿಶ್ವಾಸಿನ: ಸರ್ವೇ ನಿರ್ವಾಣಾಃ ಸರ್ವಮೇವ ಚ |
ಪರ್ವಣ್ಯಪಾರ್ವಣಾಃ ಪ್ರೇತ್ಯ ವರ್ಷಾಣಾಂ ಕರ್ಷಣಾನ್ವಿತಾಃ |೭೩|

ಏವಂ ಕಲಙ್ಕಿನ: ಸರ್ವೇ ಹ್ಯಲಂ ಕೀನಾಶಲೋಕಿತಾಂ |
ಯಾಂತಿ ಕಾಂತಿವಿಹೀನಾಸ್ತೇ ಪಾಪಿನಃ ಶಾಪಿನೋ ಮಮ |೭೪|

ನಿಷ್ಖಲಂಕಾಶ್ಚ ಸರ್ವೇಽಪಿ ನಿಷ್ಕಲಂಕಾದರಾ ಹರೌ |
ನಿಖಿಲಾನ್ ಕಾಮಿತಾನ್ ಯಾಂತಿ ನಿಖಿಲಾಗಮನಿರ್ಣಯೈಃ |೭೫|

೧೩. ಚಿಂತಾಮಣಿ ಸುತ ಲಕ್ಷ್ಮೀನಾರಾಯಣ ಪ್ರಕರಣಮ್ | ಶ್ಲೋಕಾ: [೭೬-೮೩]

ಕುರ್ಯಾಂ ಪ್ರಮಾಣಿಮಿತ್ಯುಕ್ತ್ಯಾ ಲಕ್ಷ್ಮೀನಾರಾಯಣಾತ್ರ ತೇ |
ಮನ್ಮನೋ ಬಾಣವಿದ್ಧಂ ಯತ್ ಯಥಾ ಸ್ಯಾತ್ ತದ್ಗುಣಾಧಮ |೭೬|

ಕುರ್ಯಾಂ ಪ್ರಮಾಣಮಿತ್ಯುಕ್ತ್ಯಾ ಲಕ್ಷ್ಮೀನಾರಾಯಣಾತ್ರ ತೇ |
ವರ್ಣಾನಾಂ ಬ್ರಾಹ್ಮಣಾದೀನಾಂ ಸಾಂಶಾಯಿಕಮತಿರ್ಭವೇತ್ |೭೭|

ಏವಂ ಚ ಮಮ ಮಾಹಾತ್ಮ್ಯ ವಿಷಯೇ ಸಂಶಯೇ ಸತಿ |
ನಿ:ಸಂಶಯಃ ಕೋಽಪಿ ಮದ್ವೃಂದಾವನಂ ತು ನ ಪಶ್ಯತಿ |೭೮|

ತದ್ದೋಷೋಽಪಿ ತವೈವ ಸ್ಯಾಚ್ಛೇಷಶಾಯಿ ಪದೇ ಶಪೇ |
ಮಾಷಮಾತ್ರಂ ಚ ಮದ್ದ್ರೋಹೋ ಮಹಾದೋಷಾಯ ಕಲ್ಪತೇ |೭೯|

ತಸ್ಮದೇತಾದೃಶೀ ಬುಧ್ಧಿರ್ನ ಸ್ಯಾತ್ ತೇ ಸರ್ವಥಾ ದ್ವಿಜ |೮೦|

ಕ್ಷುದ್ರಾ ಮದ್ದ್ರೋಹಮಾಪನ್ನಾ ಭಜ ಮಾಂ ಭುಜಗೇಶ್ವರಂ |೮೧|

ಲಕ್ಷ್ಮೀನಾರಾಯಣ ಇತಿ ನರಾಣಾಂ ಯೋ ಗುಣಾಧಮಃ |
ಮದ್ದ್ರೋಹೇಣ ಬ್ರಾಹ್ಮಣೋಽಪಿ ವಿಷಣ್ಣ ಹೃದಯೋ ಹ್ಯಭೂತ್ |೮೨|

ಲಕ್ಷ್ಮೀಪತಿಂ ಸಮುದ್ದಿಶ್ಯ ಲಕ್ಷ್ಮೀಪತಿಗೃಹೇ ಹ್ಯಸೌ |
ಲಕ್ಷ್ಮೀನಾರಾಯಣಾಹ್ವೋಽಪಿ ಹ್ಯಲಕ್ಷ್ಮೀಕಂ ವಚೋಽಬ್ರವೀತ್ |
ಮಹಾಜನೇ ಭೋಜನೇಚ್ಛನ್ ಲಕ್ಷ್ಮೀಕರಮಹೋತ್ಸವೇ |೮೩|

೧೪. ಲಕ್ಷ್ಮೀಪತಿ ಪ್ರಕರಣಮ್ | ಶ್ಲೋಕಾ: [೮೪-೧೦೭]

ಹೇ ಮಂಜುಕಂಜಪತ್ರಾಕ್ಷ ತ್ವಂ ವಾ ಶಿಕ್ಷ ದ್ವಿಜಾಧಮಂ |
ಪಾಪಿನಾಂ ತು ಗತಿಂ ಚಾಸ್ಯ ದತ್ವಾ ವೈ ಮಧುಸೂದನಃ |೮೪|

ವಿಶ್ವಾಸಿನಿ ಹ್ಯವಿಶ್ವಾಸಂ ಜನಯಿಷ್ಯತಿ ನಂದನೇ |
ಹೇ ಪುತ್ರ ಕ್ಷಿಪಣಾಸಕ್ತೋ ಲಕ್ಷ್ಮೀನಾರಾಯಣೋ ಮಮ |೮೫|

ಕೃತೇಸ್ತಚ್ಛಿಕ್ಷಣಂ ಚಾತ್ರ ತ್ವಂ ವಾ ಕುರು ವಿಚಕ್ಷಣಃ |
ಮಯಾ ತಪೋ ಹಾನಿಭಿಯಾ ಶಾಪಃ ತಸ್ಯ ನ ದೀಯತೇ |೮೬|

ತ್ವಯಾ ತಚ್ಛಿಕ್ಷಣಂ ಕಾರ್ಯಂ ಕ್ವ ಯಾಸ್ಯೇ ತದ್ಭಯಾದಹಂ |
ಹಿತ್ವಾ ವೃಂದಾವನಂ ಚಾತ್ರಾಲಂಕೃತಂ ಮಮ ನಂದನ |೮೭|

ಕಂದಾಶನೈಃ ಕೃತಾನಂದೈಃ ಮುಕುಂದೇನಾಪಿ ತದ್ ವದ |೮೮|

ಯಾವದ್ ವೃಂದಾವನಂ ಚಾತ್ರ ಮೇದಿನ್ಯಾಂ ಮಮ ನಂದನ |
ತಾವನ್ಮತ್ಸನ್ನಿಧಾನಂ ಸ್ಯಾದ್ ಧರಣ್ಯಾಂ ಧರಣೀಸುರ |೮೯|

ತಸ್ಮಾದ್ ವೈ ದುರ್ಜನೈರುಕ್ತನಿಂದಾಂ ಕಂದಾಶನೋಽಪ್ಯಹಂ |
ನ ಕ್ಷಮೇ ನಂದನಾಽನಂದನ್ಯಾಸಿನಾಂ ಮಮ ನಾನ್ಯಥಾ |೯೦|

ಅಹಂ ದ್ಯುಮಣಿವದ್ ಭಾನುಮಂತಂ ಸದ್ಗುಣಸಂತತಂ |
ಬ್ರಹ್ಮಾತ್ಮಕೌಸ್ತುಭಮಣಿಮಂತಂ ನೌಮ್ಯಗುಣಾಂತಕಂ |೯೧|

ಪ್ರಮಾಣಂ ಕರವಾಣೀತಿ ದುಃಖಾರ್ಣಹರಂ ಹರಿಂ |
ಮಹಾಮಣಿಧರಂ ನೌಮಿ ಲಕ್ಷ್ಮೀನಾರಾಯಣಂ ಪ್ರಭುಂ |೯೨|

ತಾಲೋಲ್ಲಲ್ಲೇತಿ ಚಾಶ್ಲೀಲಭಾಷಾಮಾಲಾಂ ಚಕಾರ ಸಃ |
ಕೋಲಾಹಲಸಮೂಹೈಶ್ಚ ಮಮ ಹೃಚ್ಛಲ್ಯಮಾಲಿಕಾಂ |೯೩|

ಚಕಾರ ಕಾರಣಾಭಾವೇಽಪ್ಯಾಕಾರೇಣ ವೃಕೋದರಃ |
ಬುದ್ಧ್ಯಾದರ್ವೀಕರಶ್ಚಾಯಂ ವಾದೇ ಕಾಕೋದರಾಧಿಪಃ |
ಕ್ಷಮತೇಽಥಾಪಿ ಮೇ ಸ್ವಾಮೀ ಕ್ಷಮಯಾ ಸೋಽರ್ಣವೋ ಹರಿಃ |೯೪|

ಕ್ಷಮಾಂ ಪದ್ಭ್ಯಾಂ ಚಕಾರೇಹ ಕ್ಷಮಯಾ ಕಿಂ ನ ಸಾಧ್ಯತೇ |
ಕ್ಷಮಯಾ ಭೀಮಸೇನೋಽಪಿ ಕಾಮ್ಯಕಂ ವನಮಾವಿಶತ್ |೯೫|

ಕ್ಷಮಾಯಾ ಸೋಮಕಸುತಾ ಕ್ಷಮಯಾ ಯಮಪುತ್ರಕಃ |
ಕ್ಷಮಯಾ ಮಘವತ್ಸೂನುಃ ಕ್ಷಮಯಾ ಯಮಜಾವುಭೌ |೯೬|

ರಾಮೋ ರಾಜೀವನೇತ್ರೋ ರಾವಣಾಂತಕರೋ ಹರಿಃ |
ರಾಜ್ಞೋ ರಾಜ್ಞಾಂ ಪುರಸ್ಕೃತ್ಯ ರಾಜ್ಞಾಂ ವನಮಥಾಽವಿಶತ್ |೯೭|

ಕ್ಷಮಯಾ ಕ್ಷೇಮಕೋ ರಾಜಾ ಕ್ಷಮಯಾಃ ಪಾಲನೇ ಕ್ಷಮಃ |
ಬಭೂವ ನಾಕ್ಷಮಃ ಕೋಽಪಿ ಕ್ಷಮಾಯಾಃ ಪಾಲನೇ ಕ್ಷಮಃ |೯೮|

ಏವಂ ಕ್ಷಮಾಸಮಾಯುಕ್ತಾ ಮುನಯೋ ಮನವೋಽಪಿ ಯೇ |
ಮನನೇ ಚ ಸಮರ್ಥಾಸ್ತೇ ಮಾಧವಸ್ಯ ಮಹಾತ್ಮನಃ |೯೯|

ತದ್ವತ್ ಕ್ಷಮಾಪರಶ್ಚಾಹಂ ರಮಾಪತ್ಯಾಶ್ರಯೋಽಪಿ ಸನ್ |
ಕುಮಾರ ತ್ವಮಿಪಿ ಹ್ಯತ್ರ ಕ್ಷಮಾವಾನ್ ಭವ ಸರ್ವಥಾ |೧೦೦|

ತಾದೃಶಕ್ಷಮಯಾ ಹೀನಃ ಶ್ರೀನಿವಾಸಾಭಿಧೋಽಪಿ ಸನ್ |
ಮಾನಂ ನ ಯಾತಿ ತೇನಾಸೌ ಮಾನವೈಃ ಕಾಮಿತಂ ತ್ವಿಹ |೧೦೧|

ಅಧುನಾ ವಿಧಿನಾ ಸೃಷ್ಟ ಮಧುನಾ ದುಷ್ಟಬುದ್ಧಿನಾ |
ಅಧನಾ ನಿಧನಾಚ್ಛಿಷ್ಟ ಸ್ಪಷ್ಟಧಾ ಮಧುಸೂದನ |೧೦೨|

ಧಾವಂತೇ ತದ್ವದೇವಾಯಂ ದ್ವಿಜವರ್ಯೋ ದ್ವಿಜಾಧಮಃ |
ಸದೃಶೈರ್ದಿತಿಜೇಂದ್ರಸ್ಯ ಬಾಧ್ಯತೇ ಬಾಧ್ಯಬುದ್ಧಿಮಾನ್ |೧೦೩|

ಓಂ ಏತತ್ಸರ್ವಂ ಸ್ವಾಪ್ನಪದ್ಯೇನ ಗರ್ವಂ ಹಿತ್ವಾ ಸರ್ವೇ ವಿಪ್ರವರ್ಯಾಸ್ಯಜೇನ |
ಶೃತ್ವಾ ಚೋರ್ವ್ಯಾಂ ಶರ್ವ ಗುರ್ವಾದಿ ದೇವಾನ್
ದೃಷ್ಟ್ವೋರ್ವಶಿಂ ಯಾಂತು ಮಾಂ ಮಾನವೇಂದ್ರಾಃ |೧೦೪|

ಇದಂ ವೃಂದಾವನಾಖ್ಯಾನಂ ಯೇ ಪಠಂತಿ ಮನೀಷಿಣಃ |
ಮುಕುಂದಾವನಮೇವಾಸ್ತು ತೇಷಾಂ ಕಂದಾಶನಾಜ್ಞಯಾ |೧೦೫|

ಇದಮರ್ಪಿತಮೇವಾಸ್ತು ಹಯಶೀರ್ಷಸ್ಯ ಪಾರ್ಷದಾತ್ |
ಸಮಂ ಸಹಸ್ರಶೀರ್ಷಸ್ಯ ಸೂಕ್ತಸ್ಯ ಪುರುಷಾತ್ ಕೃತಮ್ |೧೦೬|

ಯಚ್ಛ್ರುಣ್ವತಾಂ ಭಕ್ತಿರುದಾರಸದ್ಗುಣೇ ಹರೌ ಹರೇರ್ಲೋಕಗತೇ ತಥಾ ಮಯಿ |
ಭವತ್ಯಹೋ ಸರ್ವಶುಭಾಪ್ತಿಸನ್ಮತೀರ್ ದದಾತ್ಯಜಸ್ರಂ ಸುತ
ಸತ್ಯಮೇವ ತತ್ ಓಂ |೧೦೭|

| ಇತಿ ಶ್ರೀಸ್ವಾಪ್ನವೃಂದಾವನಾಖ್ಯಾನೇ ಅಲೌಕಿಕ ವಿಭಾಗೇ
ನಿದರ್ಶನಪರ್ವಣಿ ಏಕೋನವಿಂಶಾಧ್ಯಾಯ: ಸಮಾಪ್ತ: |

|| ಶ್ರೀ ಅಶ್ವಿನೀಹಯಗ್ರೀವಾತ್ಮಕ ಕೃಷ್ಣಾರ್ಪಣಮಸ್ತು ||

20. Svaapnavrundavanakhyana