17. Svaapnavrundavanakhyana

Composer : Shri Vadirajaru

| ಅಥ ಸಪ್ತದಶಾಧ್ಯಾಯ: |

೧. ಶೇಷ, ಭೂಪ, ಶ್ರೀಪತಿ ಪ್ರಕರಣಮ್ | ಶ್ಲೋಕಾ: [೧-೧೮]

ಹರಿಃ ಓಂ |

ಅಯಂ ವಿಪ್ರಃ ಸುಪ್ರಶಸ್ತಂ ಮಮ ಪಾದಾಬ್ಜಮುತ್ತಮಂ |
ಪಶ್ಯತಿ ಸ್ವಪ್ನಕಾಲೇ ತು ನಿತ್ಯಂ ನಿರ್ಮಲಚೇತನಃ |೧|

ಸ ತೇನ ಲಬ್ದಾತಿಶಯಃ ಶೇಷಶಾಯಿಪ್ರಿಯೇ ಮಯಿ |
ಮನ ಅವೇಶ್ಯ ಕಾಶ್ಯಾಂ ಚ ಮೃತಸ್ತತ್ಪುಣ್ಯಮಾಪ್ನುಯಾತ್ |೨|

ತಸ್ಮಾದ್ ವಿಪ್ರಃ ಪ್ರಶಸ್ತೋಽಯಂ ಪ್ರಮೃಷ್ಟಜ್ಞಾನವಾನ್ ಮಮ |
ಪ್ರಕೃತ್ಯಾ ಯತ್ ಪ್ರದಾತವ್ಯಂ ತದಸ್ಮೈ ಸಂಪ್ರದೀಯತಾಂ |೩|

ಮಯೋಕ್ತಶ್ಲೋಕಾರ್ಥಮಪಿ ನ ಜಾನಾತಿ ಹ್ಯಯಂ ದ್ವಿಜಃ |
ಅರ್ಥಂ ಬುಧ್ವಾತು ವಾಕ್ಯಂ ತು ಕರೋತೀಹ ಕವೀಶ್ವರಃ |೪|

ತಸ್ಯಾದ್ ವಿಪ್ರಕೃತಿರ್ನೈವ ಮತ್ಕೃತಿ: ಸರ್ವಥಾ ಸುತ |
ಸತ್ಕೃತಿಶ್ಚಾಸ್ಯಕರ್ತವ್ಯಾ ತ್ವತ್ಕೃತಿಶ್ಚಾಗ್ರಪಂಕ್ತಿಕಾ |೫|

ಮಮಾಶ್ರಿತ್ಯ ಮಯಾ ದತ್ತಮಾಚಾರ್ಯತ್ವಂ ಸಮಾಪ್ಯ ಚ |
ಮಮ ವೃಂದಾವನಸ್ಯೈವ ನಾಮ್ನಾ ಸಮನುವರ್ತಿತಂ |೬|

ಭೋಜನಾಯಾನ್ನಮೇವಾತ್ರ ನಾಸ್ತೀತಿ ಜನತಾ ಮನಾಕ್ |
ಮನುತೇ ಕಿನ್ತ್ವನ್ನಹೀನೇನಾಽಚಾರ್ಯತ್ವೇನ ನಂದ ಚ |೭|

ನಾಗಖ್ಯಪಂಡಿತಸ್ಯಾಪಿ ಸ್ವಪ್ನೇ ಚೋಕ್ತಂ ಮಯಾ ಸುತ |
ತೇನಾಪಿ ನ ಕೃತಂ ಕಿಞ್ಚಿನ್ಮೃಷಾವಾಕ್ಯಪರೋ ಭವತ್ |೮|

ತಸ್ಮಾತ್ ತ್ವಂ ಚಾನ್ನಮಾತ್ರಸ್ಯ ಯತ್ನಂ ಕುರು ಸುಮಾನವ |
ನೋ ಚೇತ್ ಸ ಮಾಧವೀಂ ವೃತ್ತಿಂ ಕರಿಷ್ಯತ್ಯೇವ ನಾನ್ಯಥಾ |೯|

ಅಹಂ ವಿಪ್ರಸ್ಯ ಸೌಚಿತ್ಯಂ ಕರಿಷ್ಯಾಮೀತಿ ಮನ್ಮತಂ |
ಸೌಚಿತ್ಯ ಕುರು ಕಲ್ಯಾಣ ಗುರೋರ್ವಾಕ್ಯಸ್ಯ ಗೌರವಾತ್ |೧೦|

ಹೇ ನಂದನ ತ್ವಂ ಮಮ ನಂದನೇ ವನೇ ವೃಂದಾವನೇ ಕಂದಪಲಾಶಮಂದಿರೇ |
ಸುನಂದನಂದಾದಿಭಿರಿಂದಿರಾಪತಿಃ ಸ್ವಾನಂದದೋ ಯದ್ವದಿಹಾಭವ ಪ್ರಿಯಃ |೧೧|

ತವೇಹ ಕೋ ವಾ ಗಣಯೇದ್ ಗುಣೌಘಾನ್ ವಿನಾ ತು ಮಾಂ ನಾಸ್ತಿ ಸುನಾಮಧೇಯ |
ಯಥಾ ಸುರೇಂದ್ರಸ್ಯ ಕರೀಂದ್ರಗಸ್ಯ ಗರ್ವೋಽಪಿ ಸರ್ವಾಪಹರಃ ಸುತೇಹ |೧೨|

ಔದಾರ್ಯ ಶಸ್ತ್ರೇಣ ವಿದಾರ್ಯ ವಿಪ್ರದಾರಿದ್ರ್ಯವೃಕ್ಷಂ ಕರದೈರಿಹ ತ್ವಂ |
ಧರಾಸುರಾಧ್ಯೈಃ ಪರಮಾದರೇಣ ತ್ವಾರಾಧಿತ: ಸನ್ ಧರಣೀಂ ವೃಣೀಷ್ವ |೧೩|

ಪಿತಾ ಪುತ್ರಸ್ತುತಿಂ ಕುರ್ಯಾತ್ ಭರ್ತಾ ಭಾರ್ಯಾಸ್ತುತಿಂ ಗುರುಃ |
ಶಿಷ್ಯಸ್ಯ ಸಂಸ್ತುತಿಂ ಕುರ್ಯಾತ್ ಸ್ವಾಮೀ ಭೃತ್ಯಸ್ತುತಿಂ ತಥಾ |೧೪|

ತದಂತರ್ಯಾಮಿಣಂ ಶ್ರೀಮನ್ನಾದಾಯ ಪರಮಾರ್ಥತಃ |
ಕುರ್ಯಾತ್ ಸ್ತುತಿಂ ದೋಷಾಯ ನ ತು ದೇಹಾಭಿಮಾನಿನಃ |೧೫|

ತಸ್ಮಾನ್ನಂದನ ತೇ ಚಾಂತರ್ಯಾಮಿಣಃ ಕಂದಿನಾ ಮಯಾ |
ಕ್ರಿಯತೇ ಗುಣವೃಂದೇನ ಮಮ ವೃಂದಾವನೇ ಯಥಾ |೧೬|

ಮಯಿ ಜೀವತಿ ಯಚ್ಚೋಕ್ತಂ ಮಮ ವೃಂದಾವನಂ ಸುತ |
ಭವಿಷ್ಯತಿ ಪ್ರಸಿದ್ಧಂ ತದನುಸಂಧತ್ಸ್ವ ಬುದ್ಧಿಮನ್ |೧೭|

ತತ್ಪ್ರಸಿದ್ಧ್ಯರ್ಥಮೇವಾತ್ರ ತನ್ನಾಮಪಿ ದ್ವಿಜಸ್ಯ ತು |
ಮಯಾ ದತ್ತಂ ತ್ವಯಾ ತಸ್ಮಾನ್ನಿಗ್ರಾಹ್ಯಾ ನ ವದಂತಿ ಯೇ |೧೮|

೨. ವಿಪ್ರ ಪ್ರಕರಣಮ್ | ಶ್ಲೋಕಾ: [೧೯-೨೧]

ಹೇ ವಿಪ್ರಾದ್ಯಾಶನಂ ನಾಸ್ತಿ ಪುತ್ರಮಿತ್ರಕಲತ್ರಕೈಃ |
ಕಥಂ ಕರೋಷಿ ಚಾನ್ನಾರ್ಥಂ ಕುರು ವೃತ್ತಿಂ ಚ ಮಾಧವೀಂ |೧೯|

ಪ್ರತಾಪತ್ರಯಮಧ್ಯೇ ತು ಹ್ಯೇಕಂ ವಾಽಪ್ಯಸ್ಮದೀಯಕಾಃ |
ನ ಪ್ರಯಚ್ಛಂತಿ ಸಚ್ಛಾಸ್ತ್ರವಕ್ತ್ರೇ ತವ ನ ಸಂಶಯಃ |೨೦|

ಅಗಂತಾ ಗಂತುಕಾಮಸ್ತ್ವಂ ಘೋಷಪರ್ಯಂತಮೇವ ಚ |
ಅಶಕ್ತ: ಸನ್ ಕಥಂ ಪುತ್ರ ಪೋಷಣಂ ತು ಭವೇದಿಹ |
ತವಾನ್ನಸಿದ್ಧಿಪರ್ಯಂತಂ ನ ವಕ್ಷ್ಯೇ ಮಾನವೋತ್ತಮ |೨೧|

೩. ಶ್ರೀಪತಿ ಪ್ರಕರಣಮ್ | ಶ್ಲೋಕಾ: [೨೨-೨೫]

ಮಾನಂ ತತ್ಯಾಜ ಮಾಧವ್ಯ ಮಾನೋ ಹಿ ಮಹತಾಂ ಧನಂ |೨೨|

ಮಯೋದಿತಂ ವಚಃ ಸತ್ಯಂ ತಸ್ಯ ಗೇಹೇ ಚ ಪಶ್ಯ ವೈ |
ಶ್ರೀಪತೇ ಶ್ರೀಮತೋ ವಾಕ್ಯಂ ಶ್ರುಣು ಮೇ ಗುಣಭೂಷಣ |೨೩|

ವಿಪ್ರ ಹಸ್ತೇ ಪ್ರತಾಪೋಽಪಿ ನಾಸ್ತಿ ತದ್ಗೇಹಗಾ ಅಪಿ |
ತಂಡುಲಾಶ್ಚ ನ ಸಂತೀತಿ ವಾಸುದೇವಮುನಿಂ ವದ |೨೪|

ಶ್ರೀಪತೇ ಶ್ರೀನಿವಾಸಸ್ತೇ ಪ್ರಸನ್ನೋಽಸ್ತು ಪ್ರಭುಃ ಪ್ರಿಯಃ |
ಬ್ರಾಹ್ಮಣಸ್ಯಾನ್ನಯತ್ನಂ ತ್ವಂ ಪ್ರಾಪ್ತವಾನ್ವೈ ಮಮಾನ್ನದಃ |೨೫|

೪. ವಿಪ್ರ ಪ್ರಕರಣಮ್ | ಶ್ಲೋಕಾ: [೨೬-೩೭]

ವಿಪ್ರ ತ್ವಂ ಮಾಸಪರ್ಯಂತಂ ವಾಸುದೇವಾಭಿಧಂ ಮುನಿಂ |
ಸ್ಮರನ್ ಭುಂಕ್ಷ್ವ ಕರಂ ತಸ್ಮೈ ದಾತುಂ ತವ ನ ವಿದ್ಯತೇ |೨೬|

ಮಮ ನಂದನ ಧರ್ಮೇಣ ಚಾನ್ನಂ ತ್ವಂ ಪ್ರಾಪ್ತವಾನಸಿ |
ಪುಣ್ಯಂ ಭವೇತ್ ತಸ್ಯ ಪುತ್ರಕಲತ್ರೈಃ ಸಹ ಭೋಜನಾತ್ |೨೭|

ತಸ್ಯಾಽಗಮನ ಪರ್ಯಂತಂ ತಾತಹೀನಸುತೋಪಮಃ |
ಬ್ರಾಹ್ಮಣೋಽಸಿ ಸದಾಽಗಣ್ಯಗುಣಂ ಮಾಂ ಸ್ಮರ ರಕ್ಷಕಂ |೨೮|

ತವೋದರೇ ವೇದನಾದಿವ್ಯಾಧಿರ್ನಿ:ಸಾರಿತೋ ಮಯಾ |
ತತ್ಪುತ್ರೀಂ ಪ್ರತಿ ತತ್ರಾಪಿ ಮರ್ದಿತಶ್ಚಿತ್ರಮೇವ ತತ್ |೨೯|

ತಸ್ಮಾತ್ ಸದಾಽನುಸಂಧಾನಮೇವ ಮೇವಾಸ್ತು ತೇ ಬುಧ |
ಕದಾ ಯಾಸ್ಯತಿ ಮೇ ಪುತ್ರ: ಚೇತಿ ಚಿಂತಾಂ ತ್ಯಜ ದ್ವಿಜ |೩೦|

ಸಂಸಾರಾಬ್ಧೇಶ್ಚ ಯನ್ನೇತೃ ಹೋತೃವತ್ ಕರ್ಮವಾರಿಧೇಃ |
ಕ್ಷೇತ್ರವತ್ ಪುತ್ರಪೌತ್ರಾಣಾಂ ನೇತ್ರಂ ಸಜ್ಜ್ಞಾನಮುಚ್ಯತೇ |೩೧|

ತನ್ನಷ್ಟಮಾಸೀದ್ ಭ್ರಷ್ಟೇ ಚ ಶಿಷ್ಟವಲ್ಲೋಕವಂಚಕೇ |
ತರ್ಹಿ ಭಟ್ಟಸ್ಯ ದೃಷ್ಟಾಂತೇ ದಾರ್ಷ್ಟಾಂತಿಕ ವಿರುದ್ಧತಾ |೩೨|

ಇತಿ ಚೇನ್ನ ಚ ತತ್ರಾಪಿ ದೃಷ್ಟಿ ಶಬ್ದೇನ ಸೌಷ್ಠವಾತ್ |
ವಿಟ್ಠಲಜ್ಞಾನಮೇವಾಗ್ರ್ಯ ಸ್ಪಷ್ಟಂ ಗ್ರಾಹ್ಯಂ ನ ಸಂಶಯಃ |೩೩|

ಉಭಯಾಭಿಪ್ರಾಯತಶ್ಚ ನೇತ್ರಶಬ್ದಾರ್ಥ ಉಚ್ಯತೇ |
ಉಭಯಾರ್ಥೇಽಪಿ ವಾಽಪ್ಯೇಕವಿಷಯೇ ವಾ ತಥೈವ ಚ |೩೪|

ಪ್ರಾಮಾಣ್ಯಂ ಮಮ ವಾಕ್ಯಸ್ಯ ಗ್ರಾಹ್ಯಂ ಲೋಕೇ ವಿಚಕ್ಷಣೈಃ |
ನಿರ್ಗುಣೈಃ ಪುರುಷೈಃ ಪರುಷವಾಕ್ಯೈರ್ನ ಶ್ರುಣು ದೂಷಣಂ |೩೫|

ಅತ ಏವ ಪದಂ ನೇತ್ರಂ ಗೃಹೀತಂ ನಯನಾದಿಕಂ |
ನ ಗೃಹೀತಂ ಪದಂ ವಿದ್ವನ್ನುಭಯಾರ್ಥಸ್ಯ ಸಂಗ್ರಹೇ |೩೬|

ತಸ್ಮಾನ್ನ ಕಾರ್ಯಾ ಶಂಕಾ ಚ ವಂಚಕಾನಾಂ ದುರಾತ್ಮನಾಂ |
ಶುನಕಾತ್ಮಮತಸ್ಥಾನಾಮತರ್ಕ್ಯಾಣಾಂ ದುರುಕ್ತಿಭಿಃ |೩೭|

೫. ವಿಪ್ರ ಶಿಶ್ಯ ತಮ್ಮಣ್ಣ ಪ್ರಕರಣಮ್ | ಶ್ಲೋಕಾ: [೩೮-೪೨]

ಹೇ ತಮ್ಮಣ್ಣ ಶ್ರುಣುಷ್ವಾದ್ಯ ಭಣಸ್ವ ತ್ವಂ ಗುಣಾಧಮ |
ಮದ್ವಾಣೀಂ ಶ್ಲೋಕಸುಶ್ರೇಣೀಂ ಬ್ರಾಹ್ಮಣೇನ ಚ ವರ್ಣಿತಾಂ |೩೮|

ನೋ ಚೇತ್ ತ್ವಾಂ ಪ್ರತಿ ಯಾಸ್ಯಂತಿ ಶೀಘ್ರಂ ತು ಯಮಕಿಙ್ಕರಾಃ |
ಮದ್ದ್ರೋಹಕರಮಾರಾದ್ ವೈ ಶರಣಂ ವ್ರಜ ಮಾಂ ತತಃ |೩೯|

ರದನೈರ್ಲೋಹಿತಶ್ಮಶ್ರುಕರಾಳವದನೈರಪಿ |
ದಮನೈರ್ಭೀಷಯಂತಸ್ತ್ವಾಂ ದಮನೈರ್ಭ್ರಷ್ಟಮಾನಸಂ |೪೦|

ತದಾ ಮೋಚಕ ಏವಾಹಂ ಸೂಚಕೈರತಿದೋಷಿಣಂ |
ಕೀಚಕಾದತಿದುರ್ಬುದ್ಧಿಂ ಶೋಚಕಂ ಮಾಮಕಂ ದ್ವಿಜಂ |೪೧|

ತಸ್ಮಾತ್ ಮದುಕ್ತಮರ್ಯಾದಾಂ ಮಾ ತ್ಯಜ ತ್ವಂ ದ್ವಿಜಾಧಮ
ವೃಂದಾವನಗತಂ ನಿತ್ಯಂ ಭಜ ಮಾಂ ಭುಜಗೇಶ್ವರಂ |೪೨|

೬. ಭೂಪ ಪ್ರಕರಣಮ್ | ಶ್ಲೋಕಾ: [೪೩-೫೦]

ಹೇ ಭೂಪ ಭಕ್ತ ಶುಭದೇಽತ್ರ ಭವೇ ಭವೇ ಚ ಭಕ್ತಿಂ ಕುರು ತ್ವಮಪಿ ತೇ ಚ ಸುಸೌಭಗಾಯ |
ವೃಂದಾವನೇ ಕದನಕೋವಿದ ಚೇತಿ ಪೂರ್ವಂ ಕೇದಾರಕಾಖ್ಯಮಪಿ ಘೋಷಮಿಹ ತ್ಯಜಸ್ವ |೪೩|

ಏವಂ ಚೇತ್ತವ ಚಾಽಯುಷ್ಯವೃದ್ಧಿರ್ಹಿ ಭವಿತಾ ಸದಾ |
ಸಮೃದ್ಧಿಃ ಧನಧಾನ್ಯಂ ಚ ಗಜವಾಜಿನೃಣಾಮಿಹ |೪೪|

ತವಾಗ್ರಜೇನ ದತ್ತಂ ವೈ ಧಾರಾಪೂರ್ವಂ ದ್ವಿಜಸ್ಯ ಚ |
ದ್ವಿಜೇನ ಮಮ ದತ್ತಂ ಚ ಸಮ್ಮತ್ಯಾ ತೇಽಗ್ರಜನ್ಮನಃ |೪೫|

’ಸ್ವದತ್ತಾದ್ ದ್ವಿಗುಣಂ ಪುಣ್ಯಂ ಪರದತ್ತಾನುಪಾಲನೇ |
ಪರದತ್ತಾಪಹಾರೇಣ ಸ್ವದತ್ತಂ ನಿಷ್ಫಲಂ ಭವೇತ್ |೪೬|

ಸ್ವದತ್ತಾಂ ಪರದತ್ತಾಂ ವಾ ಯೋ ಹರೇತ ವಸುಂಧರಾಂ |
ಷಷ್ಟಿ ವರ್ಷಸಹಸ್ರಾಣಿ ವಿಷ್ಠಾಯಾಂ ಜಾಯತೇ ಕ್ರಿಮಿಃ |೪೭|

ಇತಿ ಪೂರ್ವಪ್ರಮಾಣಾಭ್ಯಾಂ ಮದ್ವಾಕ್ಯಸ್ಯ ಚ ಗೌರವಾತ್ |
ತ್ಯಜ ರಾಜನ್ ಸುಭೀರು: ಸನ್ ನ ಭಾರಂ ತವ ಚಾವನಂ |೪೮|

ಭಜ ರಾಜ್ಯಂ ಧರಾಭಾರಂ ಹನ ತ್ವಂ ಕನಕಂ ನಯ |
ಕೋದಾಂ ಕೋಲಾಹಲೇನೈವ ಕುರು ಸಮೃದ್ಧಿಮನ್ |೪೯|

ವೈರಿಭಿಃ ಪೌರವೃದ್ಧಾಂಸ್ತ್ವಂ ಪೂಜಯಾಽದತ್ಸ್ವ ತೈರ್ಜಯಂ |೫೦|

೭. ಭೂಪ ಪ್ರಕರಣಾಂತರ್ಗತ ವಿಪ್ರ ಪ್ರಕರಣಮ್ | ಶ್ಲೋಕಾ: [೫೧]

ಭಜ ತ್ವಂ ದ್ವಿಜ ಸಾರ್ಧಂ ಚ ಶ್ಲೋಕದ್ವಯಮನುತ್ತಮಂ |
ತ್ಯಕ್ತವಾನಸಿ ತ್ವಚ್ಛೋಕಛೇದಕೋಽಹಂ ನ ಸಂಶಯಃ |
ತಸ್ಮಾದಾಲಸ್ಯ ಹೇತೋಸ್ತು ಬಹು ಹಾತುಂ ತ್ವಮಿಚ್ಛಸಿ |೫೧|

೮. ಪುನರ್ಭೂಪ ಪ್ರಕರಣಮ್ | ಶ್ಲೋಕಾ: [೫೨]

ಸಮಸ್ತ ಧರ್ಮ ರಕ್ಷಾರ್ಥೀ ರಾಘವೋ ರಾಜ್ಯಹಾ ಪರಃ |
ವಿಪ್ರಕ್ಷೇತ್ರಾಪಹಾರಂ ತನ್ಮಾ ಕುರು ತ್ವಂ ಕರಾನಪಿ |
ನಾಽದತ್ಸ್ವ ತವ ನಾಥಶ್ಚ ರಾಜ್ಯಂ ತೇ ರಕ್ಷಯಿಷ್ಯತಿ |೫೨|

೯. ವಿಪ್ರ ಪ್ರಕರಣಮ್ | ಶ್ಲೋಕಾ: [೫೩-೫೭] [ಅಪಮೃತ್ಯು ಪರಿಹಾರ:]

ಹೇ ಶುಂಠ ವಿಪ್ರ ತವ ಕಂಠಗತಂ ಚ ಪ್ರಾಣಂ ಶೌಂಠಾಮಿ ಕುಂಠಿತಗತೇರಹಮೇವ ಶೀಘ್ರಂ |
ಮನ್ಮಂಟಪಂ ತವ ಹೃದಂತಿಕಮಂಚಮಾತ್ರ ಮೌತ್ಕಂಠ್ಯತೋ ಯದವಿಕುಂಠಗತೇಃ ಪ್ರಿಯಂ ತತ್ |೫೩|

ತಸ್ಮಾತ್ ಪ್ರಾಣಂ ನಿ:ಸರಂತಂ ವಾರಯಾಮಿ ವರೇಣ್ಯಕಂ |
ಮರಣಂ ಪ್ರಹರಾಮ್ಯೇವ ಶರಣಂ ವ್ರಜ ಮಾಂ ಮುನಿಂ |೫೪|

ಶುಂಠತ್ಯತ್ರ ಶುಶಬ್ದೇನ ಶೋಕೋ ಗ್ರಾಹಃ ಶುಭಸ್ಯ ತೇ |
ಠೇತಿ ಚ ತಚ್ಛೂನ್ಯ ಏವಾಯಂ ಕೃಷ್ಣಭಟ್ಟಾಭಿದಃ ಪುರಾ |೫೫|

ಉಚ್ಯತೇ ಮುಚ್ಚತೇ ರೋಗ ದುಃಖೇನ ಸುಚರಿತ್ರಿಣಾ |
ಪ್ರೋಚ್ಯತೇ ಚೋತ್ತರಗ್ರಂಥಃ ಸೌಚಿತ್ಯೇನ ಮಯಾ ತತಃ |೫೬|

ಪುರೇತಿ ಗುರುಣೈವೇಹ ಮಯಾ ದತ್ತಂ ನರೈರ್ನ ತೇ |
ಆಚಾರ್ಯತ್ವಂ ಸ್ಥಿರಂ ತಸ್ಮಾತ್ ಸರ್ವೈರಪ್ಯನಿವಾರಿತಂ |೫೭|

೧೦. ಸೂರ್ಯಭಟ್ಟ ಪ್ರಕರಣಮ್ | ಶ್ಲೋಕಾ: [೫೮-೫೯]

ಹೇ ಸೂರ್ಯನಾಮಧಾರಾಧ್ಯ ಸೂರ್ಯವತ್ ಸುಪ್ರಭಾನ್ವಿತ |
ಸೂರ್ಯವನ್ಮಮ ಗೂಢಾರ್ಥಕೃತಿಂ ಸೂರಿಜನೇಷ್ವಿಹ |೫೮|

ಪ್ರಕಾಶಯ ವಿಕಾಸಂತೇ ಮತಯಸ್ತೇ ಸಕಾಶತಃ |
ವರಾಕಾ ಅಪಿ ಶೋಕಾರ್ತಾಃ ನಿ:ಓಕಾಶ್ಚ ಭವಂತು ತೇ |೫೯|

೧೧. ಲಕ್ಷ್ಮೀಪತಿ ಪ್ರಕರಣಮ್ | ಶ್ಲೋಕಾ: [೬೦]

ಲಕ್ಷ್ಮೀಪತೇ ವದಸ್ವ ತ್ವಂ ಭೂಸುರೋತ್ತಮ ಸೂರಣಂ |
ಕಾರಣಂ ಪುಣ್ಯರಾಶೀನಾಂ ವಚನಂ ಮಮ ಜಾನತಾಂ |೬೦|

೧೨. ಉಪೇಂದ್ರ ಭಟ್ಟ ಶ್ರೋತೃಕ ಪ್ರಕರಣಮ್ | ಶ್ಲೋಕಾ: [೬೧-೬೨]

ಉಪೇಂದ್ರಭಟ್ಟ ತಾಂ ಶಿಷ್ಟ ಕಾಮಧೇನುರಿತಿ ಸ್ಫುಟಂ |
ಸರ್ವಾಭೀಷ್ಟಾನಿ ದಾತುಂ ತೇ ಪಟ್ವೀಂ ಮತ್ಕೃತಿಕಾಂ ಪಠ |೬೧|

ಉಪೇಂದ್ರನಾಮಧೇಯಾದ್ಯ ಕಾಮಧೇನುರಿವ ಪ್ರಿಯ |
ಸರ್ವಾಭೀಪ್ಸಿತ ದಾತ್ರೀಂ ಮೇ ವೃಂದಾವನಕೃತಿಂ ವದ |೬೨|

೧೩. ವಿಪ್ರ ಪ್ರಕರಣಮ್ | ಶ್ಲೋಕಾ: [೬೩-೭೬]

ಕನಕಾಕೃಷ್ಣಭಟ್ಟೋಽಪಿ ಕನಕಾರ್ಜನತತ್ಪರಃ |
ಮನಸಾ ತೃಪ್ತಿಹೀನ: ಸನ್ ಮನಾಗ್ ಗಚ್ಛತಿ ಗಚ್ಛತಿ |೬೩|

ಹಿರಣ್ಯಭಟ್ಟ ಏವಾಯಂ ಹಿರಣ್ಯಾರ್ಜನತತ್ಪರಃ |
ಹಿರಣ್ಯ ಇವ ಕಾರುಣ್ಯವಿಷಯೋಽತ್ರ ಬಭೂಽವ ಹ |೬೪|

ಸರಸಾ ಭಾರತೀ ಯಾ ವೈ ತಸ್ಯಾ ನಾಮಧರೋಽಪಿ ಸನ್ |
ವಿರಸೋಽಪಿ ಭವೇದತ್ರ ನರಸಿಂಹೋ ನರಾಧಮಃ |೬೫|

ದಾಂಬಲೌ ಪಿತ್ತಮೌಲೀ ದ್ವೌ ಹರಿನಾರಾಯಣಾವಪಿ |
ಬ್ರಾಹ್ಮಣಾಚಾರ್ಯ ನಾಮಾಪಿ ಯುಕ್ತಂ ವೃಂದಾವನೇನ ಚ |೬೬|

ನ ವದಂತೌ ಸುಧಾಂತೇಷು ಗ್ರಂಥೇಷು ಕುಶಲಾವಿವ |
ಮದವಂತೌ ಮದಾಂಧೌ ತೌ ಮತ್ಕೃತೌ ಭಕ್ತಿಬಾಹ್ಯಕೌ |೬೭|

ಇತಃ ಪರಂ ಜನಾ: ಸರ್ವೇ ಚೌದಾಸೀನ್ಯಪರಾ ಮಯಿ |
ಮತ್ಕೃತಿಂ ನ ವದಂತ್ಯತ್ರ ಪಶ್ಯಂತಃ ಪುತ್ರ ತತ್ಫಲಂ |೬೮|

ಮಹಾಪುಣ್ಯಂ ಗುಣಾಢ್ಯಸ್ಯ ಭವತೀಹ ದಿನೇ ದಿನೇ |
ಲೇಖನಾದ್ ವಾಚನಾಲ್ಲಕ್ಷ್ಮೀಪತಿಭಟ್ಟಸ್ಯ ನಂದನ |೬೯|

ಹೇ ವಿಪ್ರ ತವ ಪುತ್ರಸ್ಯ ಚರಣಾದ್ ರೌಪ್ಯಭೂಷಣಂ |
ಸ್ತ್ರೀವಶಂ ಪ್ರಾಪ ತದ್ದಸ್ತಾದಂತಕಸ್ಯ ವಶಂ ಗತಂ |೭೦|

ಇತಃ ಪರಂ ನ ವಕ್ಷ್ಯೇಽಹಂ ಲೌಕಿಕಂ ವಾಽಪ್ಯಲೌಕಿಕಂ |
ಮತ್ತೋಕಾಗಮಪರ್ಯಂತಂ ಕಾಕಬುದ್ದೀನ್ ಜನಾನ್ ಪ್ರತಿ |೭೧|

ಏಕೋ ವದತಿ ವಿಪ್ರಸ್ಯ ಕೃತಿರೇವೇತಿ ಸರ್ವಥಾ |
ವರತೋ ಗುರುಮುಖ್ಯಸ್ಯ ತಂ ವರಂ ಪ್ರಾಪ್ನುಯಾಮ್ಯಹಂ |೭೨|

ಪುನರೇಕೋ ವದತ್ಯೇವ ಲೌಕಿಕಂ ಬ್ರಾಹ್ಮಣೋದಿತಂ |
ಅಲೌಕಿಕೋಕ್ತಿಮಾತ್ರಂ ತು ಗುರುಣೈವೋದಿತಂ ಹಿ ತತ್ |೭೩|

ಅಯಂ ತು ತಮ್ಮಣೋ ವಕ್ತಿ ಬಾಣವತ್ ಪ್ರಾಣಘಾತಕಃ |
ಬ್ರಾಹ್ಮಣೋಽಯಂ ಸ್ವಕಾರ್ಪಣ್ಯಂ ಕುತೋ ವಕ್ತೀತಿ ನಿರ್ಗುಣಃ |೭೪|

ಸರ್ವೇ ವದಂತಿ ದಾತಾರಂ ಸ್ವಕಾರ್ಪಣ್ಯಂ ಕದಾಚನ |
ನಾದಾತಾರಂ ಕುತಃ ಶ್ರೇಯೋ ಹಾನಿಂ ತು ಕುರುಷೇ ವೃಥಾ |೭೫|

ತಸ್ಮಾನ್ನ ನಿಂದ್ಯಂ ತ್ವಾಷ್ರೇಯಂ ಪುರುಷೈಃ ಪುರುಷೋಕ್ತಿಭಿಃ |
ಅಸೂಯಾಕಾರಿಭಿಃ ಶ್ರೇಯೋಹಾರಿಭಿಃ ಶಾಪಭೀರುಭಿಃ |೭೬|

೧೪. ಶ್ರೀಪತಿ ಪ್ರಕರಣಮ್ | ಶ್ಲೋಕಾ: [೭೭-೯೬]

ಹೇ ಶ್ರೀಪತೇ ತ್ವಂ ಚ ಶ್ರಮಾನ್ವಿತೋಽಸಿ ಶ್ರೀದೇವೀ ತೇ ಸುಪ್ರಸನ್ನಾಽಸ್ತು ಶಶ್ವತ್ |
ಸುತೋ ನು (ನ) ಆಯಾಸ್ಯತು ತೇನ ಸೂಕ್ಷ್ಮಂ ವಾಸೋಽವಶ್ಯಂ ದಾಪಯಿಷ್ಯೇ ಸುಶಿಷ್ಯ |೭೭|

ಅಯಂ ವೃದ್ಧಸ್ತಬ್ಧ ಏವ ಅತಿವ್ಯಾಧಿಸ್ತಬ್ದಶ್ಚಾಸೀತ್ ಮುಗ್ಧ ಭಾವೋಽಪಿ ತೇನ |
ಹೇ ಬುದ್ಧಿಮನ್ ಮತ್ಕೃತೇಃ ಸುಪ್ರಸಿದ್ಧಿ-ಸ್ತ್ವಯಾ ಜಾತಾ ವಿಬುಧೇಷು ಪ್ರಧಾನಾ |೭೮|

ಮತ್ಸಖ್ಯಾದ್ ವಿಪ್ರದೇಹೇ ತು ಮುಖ್ಯಪ್ರಾಣಃ ಸ್ಥಿತೋಽಭವತ್ |
ಸಖಾ ಸಾರ್ಧಂ ಮಯಾಽಪ್ಯತ್ರ ಸುಖಾವಹ ಗತಿಪ್ರದಃ |೭೯|

ತಸ್ಮಾತ್ ಪ್ರಾಣಾವಧಿರ್ವಿಪ್ರೇ ತ್ವೇಕಶ್ಚಾಸೀತ್ ಸುಪುತ್ರಕ |
ದ್ವಿತೀಯಾವಧಿಪರ್ಯಂತಮಹಂ ವಕ್ಷ್ಯೇಽಥವಾ ನ ವಾ |೮೦|

ಯದಿ ವಾ ನೈವ ವಕ್ಷ್ಯಾಮಿ ತ್ವಲಂಬುದ್ದ್ಯಾ ಕಲೌ ಯುಗೇ
ತರ್ಹಿ ಪ್ರತಿಜ್ಞಾಹಾನ್ಯಾದಿ ದೋಷೋ ಮಮ ನ ವಿದ್ಯತೇ |೮೧|

ಪ್ರಥಮಾವಧಿಮಾದಾಯ ಪ್ರತಿಜ್ಞಾರ್ಥೋಪಪತ್ತಿತಃ |
ತಸ್ಮಾತ್ ಪ್ರತಿಜ್ಞಾ ಹಾನಿರ್ವಾಽಪ್ಯನ್ಯಂ ವಾ ಮಮ ದೂಷಣಂ |೮೨|

ನಾಸ್ತಿ ನಾಸ್ತಿ ನ ಸಂದೇಹೋ ಮಧುಸೂದನ ಶಾಸನಾತ್ |
ತಸ್ಮಾತ್ ನಿರ್ದೋಷ ಏವಾಹಂ ಯೋ ದೂಷಯತಿ ದೋಷಯುಕ್ |೮೩|

ಬ್ರಾಹ್ಮಣಸ್ಯ ಕುತೋ ಮಾನಸ್ತದಂತರ್ಯಾಮಿಣೋ ಮಮ |
ಶ್ರುಣು ಲಜ್ಜಾವಿಹೀನಸ್ತ್ವಂ ಕೃಣು ಮಾನಂ ದ್ವಿಜೋತ್ತಮೇ |೮೪|

ಇದಂ ತತ್ಪುರತಃ ಶ್ಲೋಕಂ ಲೋಕಸ್ಯ ಚ ಸಮಕ್ಷತಃ |
ಭೇಕವದ್ ವದ ತಚ್ಛೋಕಕಾರಣಂ ಶತವಾರತಃ |೮೫|

ಶ್ರವಣಾನಂತರಂ ಚಿತ್ರಂ ಸುವರ್ಣಂ ನಿಕಷಾಶ್ಮವತ್ |
ನಿರ್ಣೀಯತೇ ಸುಯೋಗ್ಯತ್ವಂ ಚರಣೀಯಂ ರಜೋ ಭಜ |೮೬|

’ಮದ್ಭೂಮಿಂ ಯೋ ವಹೇದ್ ವಿದ್ವನಪಿ ಶೀಘ್ರಂ ತು ನಶ್ಯತಿ’ |
ಇತ್ಯುವಾಚ ಯಮಃ ಶ್ರೀಮಾನ್ ಪ್ರತಿ ಮಾರ್ತಾಂಡಿರಾತ್ಮನಃ |೮೭|

ತಸ್ಮಾಲ್ಲಕ್ಷ್ಮೀಪತೇ ಭೂಮಿಂ ಯಾಮ್ಯಾಂ ಮಾಽಽದತ್ಸ್ವ ಸಾಧಿತಾಂ |
ಕದಾಽಪಿ ಕೋವಿದಸ್ತ್ವಂ ಹಿ ಮಾ ತ್ಯ ಜಸ್ವ ಬುಧೋದಿತಾಂ |೮೮|

ಮಮ ಪುತ್ರೋಽಪಿ ಮದ್ವಾಕ್ಯವಿಶ್ವಾಸೇನ ಮಹಾಮತಿಃ |
ಮಯಾ ದತ್ತೇನ ಸನ್ನಾಮ್ನಾ ಸಮಾಹ್ವಯತಿ ಬ್ರಾಹ್ಮಣಂ |೮೯|

ಅಯಂ ತು ದಾಂಬಲಃ ಪಿತ್ತಮೌಲಿರಾಸ್ಯಾತ್ ಪ್ರಧೂಲಿಕಃ |
ಚಂದ್ರಮೌಲಿಗಳೇ ಯದ್ವದ್ದೃದಿ ಹಾಲಾಹಲಾನ್ವಿತಃ |೯೦|

ನಾರಾಯಣಾಹ್ವಯೋಽಪೀಹ ತಜ್ಜಿಹ್ವಾ ನಾಽಹ್ವಯತ್ಯಹೋ |
ಮದುಕ್ತಾಹ್ವಯಮಪ್ಯಸ್ಮಿನ್ ದಹ್ಯೇತಾಸಹ್ಯವಾದಿನೀ |೯೧|

ಭರಣ್ಯಾಮಾಗತೋಽಸಿ ತ್ವಂ ಧರಣ್ಯಾಂ ಸಾತಿನಿಂದಿತಃ |
ಸ್ಮರಣೀಯಶ್ಚ ಮತ್ಪಾದೋ ಮರಣಾರ್ತಿಹರಸ್ತವ |೯೨|

ಚಿಂತಾಮಣ್ಯಾಹ್ವಯಾಚಾರ್ಯಃ ಚಿಂತಾಮಣಿಸಮಪ್ರಭಃ |
ಚಿಂತಾಮಾತ್ರೇಣ ತತ್ವಾರ್ಥ ವೇತ್ತಾರಶ್ಛಂದಸಾಮಪಿ |೯೩|

ಶ್ರಾಂತಾಶ್ಚಾಪ್ಯರಯಸ್ತೇ ವೈ ಭಯಾತ್ ಕಾಂತಾರಮಾಶ್ರಿತಾಃ |
ಅದ್ಯಾಪಿ ಮರಣೇ ಚಕ್ರುರಾಪಣಂ ಪಾಪಕರ್ಮಣಾಂ |
ಸರ್ವೋಪಕರಣಂ ತಚ್ಚಾಪ್ಯಾಚರಚ್ಚ ಋಣಂ ವಿನಾ |೯೪|

ಏತಾದೃಶವಿನೋದೇನ ವ್ಯಾಖ್ಯಾನಾದೇನ ಚಾನ್ವಿತಾಃ |
ತಾದೃಶಾನಾಂ ನಂದನೋ ನೋ ವೃಂದಾವನಕೃತಿಂ ವದೇತ್ |೯೫|

ಲಕ್ಷ್ಮೀನಾರಾಯಣಹ್ವೋಯಮಂಹೋಮುಗ್ವಚನಂ ಮಮ |
ಸಂಹವದ್ ವದತೇ ಹ್ಯತ್ರ ವಿನಾ ತೇನ ಚ ಕೋ ಮಹಾನ್ |೯೬|

೧೫. ಭಕ್ತ ಕೃಷ್ಣಭಟ್ಟ ಪ್ರಕರಣಮ್ | ಶ್ಲೋಕಾ: [೯೭]

ಹೇ ಕೃಷ್ಣ ತಾತ ಪುಷ್ಣಾಮಿ ಭಕ್ತೋವಿಷ್ಣೋರ್ಮಮ ಪ್ರಿಯಃ |
ನಿಷ್ಣಾತಾ ಯಸ್ಯ ತೃಷ್ಣಾಽಪಿ ಸಂಸೃತೇರ್ನಾಸ್ತಿ ಚೋಷ್ಣತಾ |೯೭|

೧೬. ಸೀತಾಪತಿ ಪ್ರಕರಣಮ್ | ಶ್ಲೋಕಾ: [೯೮-೯೯]

ತಸ್ಯ ಸೀತಾಪತೇ ತ್ವಂ ಹಿ ಜಾಡ್ಯತಾ ಕಾಮತಿರ್ನ ತೇ |
ಭಕ್ತಿರ್ಮೇಮತ್ಕೃತೌ ಚಾಽಸ್ತಿ ಗೋಪತಿಸ್ತ್ವತ್ಸುತೋ ಯತಃ |೯೮|

ತಸ್ಮಾತ್ ತ್ವಂ ಜೀವಲೋಕೇಽಸ್ಮಿನ್ ಸಂಜೀವ ಶರದಾಂ ಶತಂ |
ಮಂಜೀರಧ್ವನಿ ಸಂಯುಕ್ತಃ ಸಂಜಾಘಟಿ ಸುತಸ್ತವ |೯೯|

೧೫. ವಿಟ್ಠಲ ಪ್ರಕರಣಮ್ | ಶ್ಲೋಕಾ: [೧೦೦-೧೦೨]

ಹೇ ವಿಟ್ಠಲ ಶ್ರೇಷ್ಠ ಭೃತ್ಯಃ ಪಟ್ಟಭದ್ರಸ್ಯ ಮೇ ಸ್ಫುಟಂ |
ಸ್ವೇಷ್ಟಂ ಸುಷ್ಠು ಕರೋಷಿ ತ್ವಂ ಬ್ರಾಹ್ಮಣೇಷ್ಟಂ ನ ಚೇಷ್ಟಸೇ |೧೦೦|

ಬ್ರಾಹ್ಮಣೋಽಯಂ ಪ್ರೇತ್ಯ ಜಾತಸ್ತ್ವಪಮೃತ್ಯುಂ ಹರಾಮ್ಯಹಂ |
ತಸ್ಯಾಭೀಪ್ಸಿತಕೃತ್ಯಂ ತ್ವಂ ಕುರು ತಚ್ಚ ಭವೇನ್ಮಮ |೧೦೧|

ಏವಂ ಚೇದಾಯುರಾರೋಗ್ಯಂ ಸ್ಯಾತ್ ಕಾಯೇ ತವ ಸರ್ವದಾ |
ಆಯೇ ನಿರ್ವಿಘ್ನತಾ ಸ್ಯಾತ್ ತೇ ಮಾಯೇವ ಸ್ತ್ರೀ ಭವಿಷ್ಯತಿ |೧೦೨|

೧೬. ವಿಪ್ರ ಪ್ರಕರಣಮ್ | ಶ್ಲೋಕಾ: [೧೦೩-೧೧೬]

ಇತ್ಯೇಕಂ ಶ್ಲೋಕಮುಖ್ಯಂ ಮೇ ತ್ಯಕ್ತವಾನಸಿ ವಿಪ್ರಕ |
ಆಕರಸ್ಥಂ ಲೇಖನಂ ಚ ಕಾರಯ ಪ್ರಾಙ್-ಮಯೇರಿತಂ |೧೦೩|

ಶಿಷ್ಯೇಷು ಸಂಸ್ಥಿತಾ ಶೇಷಗುಣಾನ್ಯೇವ ಮನೀಷಿಣಃ |
ಪೋಷಯಂತಿ ತಥಾ ದೋಷರೂಪಿಣಂ ದೂಷಯಂತಿ ಚ |೧೦೪|

ತಸ್ಮಾದ್ ಗುಣಿಷು ವಕ್ತೃತ್ವಂ ಗುಣಾನಾಂ ದೋಷರೂಪಿಣಾಂ |೧೦೫|

ಅಹಂ ಪರಮಹಂಸೋಽಪಿ ಜನಾನಾಂ ರಾಜಹಂಸವತ್ |
ಅಂಹೋವೇತ್ತಾ ದುರ್ಜನಾನಾಂ ಸಜ್ಜನಾನಾಂ ನಿರಂಹತಾಂ |೧೦೬|

ಕ್ಷೀರೇಚ ಸಾರಮೇವಾಹಂ ನೀರೇ ಚಾಸಾರಮೇವ ಚ |
ರಾಜಹಂಸೋ ಯಥಾ ವೇತ್ತಿ ತಥಾ ಪಾರಮಹಂಸ್ಯಗಃ |೧೦೭|

ಭೋ ಸಾರಾಸಾರಯೋರ್ಮಾನಿನ್ ವೇತೃತ್ವಂ ನ ತು ದೂಷಣಂ |
ಪ್ರತ್ಯುತಾಸ್ಯ ಗುಣಶ್ರೇಷ್ಠ ತದ್ವನ್ಮಮ ನ ದೂಷಣಂ |೧೦೮|

ಮಮ ಸತ್ಸು ಚ ಸಂತೋಷೋ ಜಾಯತೇ ನ ತ್ವಸತ್ಸು ಚ
ಹಂಸಸ್ಯ ಮಾನಸೇ ಯದ್ವನ್ನ ವಾಯಸಸರಸ್ಯಹೋ |೧೦೯|

ಸಂತ: ಸತ್ಸು ಪ್ರಮೋದಂತೇ ನ ತ್ವಸತ್ಸು ಕದಾಚನ |
ಅಸತ್ಸುಚ ತ್ವಸಂತಶ್ಚ ಪ್ರಮೋದಂತೇ ನ ಸತ್ಸು ಚ |೧೧೦|

ತಸ್ಮಾದ್ ರಾಗೋ ಭಾಗ್ಯಯುಕ್ತೇ ದರಿದ್ರೇ ದ್ವೇಷ ಏವ ಚ |
ವಿದ್ರಾವಿತೌ ಮಯಾ ಮೂರ್ಧ್ನಿ ದಧಾತೇಮತ್ಪದೇ ಸದಾ |೧೧೧|

ತಸ್ಮಾದರಾಗದ್ವೇಷೋಽಹಂ ವಿಷ್ಣೋಃ ಪಾದಪರಾಗಭಾಕ್ |೧೧೨|

ಓಂ ಏತತ್ಸರ್ವಂ ಸ್ವಾಪ್ನಪದ್ಯೇನ ಗರ್ವಂ ಹಿತ್ವಾ ಸರ್ವೇ ವಿಪ್ರವರ್ಯಾಸ್ಯಜೇನ |
ಶೃತ್ವಾ ಚೋರ್ವ್ಯಾಂ ಶರ್ವ ಗುರ್ವಾದಿ ದೇವಾನ್
ದೃಷ್ಟ್ವೋರ್ವಶಿಂ ಯಾಂತು ಮಾಂ ಮಾನವೇಂದ್ರಾಃ |೧೧೩|

ಇದಂ ವೃಂದಾವನಾಖ್ಯಾನಂ ಯೇ ಪಠಂತಿ ಮನೀಷಿಣಃ |
ಮುಕುಂದಾವನಮೇವಾಸ್ತು ತೇಷಾಂ ಕಂದಾಶನಾಜ್ಞಯಾ |೧೧೪|

ಇದಮರ್ಪಿತಮೇವಾಸ್ತು ಹಯಶೀರ್ಷಸ್ಯ ಪಾರ್ಷದಾತ್ |
ಸಮಂ ಸಹಸ್ರಶೀರ್ಷಸ್ಯ ಸೂಕ್ತಸ್ಯ ಪುರುಷಾತ್ ಕೃತಮ್ |೧೧೫|

ಯಚ್ಛ್ರುಣ್ವತಾಂ ಭಕ್ತಿರುದಾರಸದ್ಗುಣೇ ಹರೌ ಹರೇರ್ಲೋಕಗತೇ ತಥಾ ಮಯಿ |
ಭವತ್ಯಹೋ ಸರ್ವಶುಭಾಪ್ತಿಸನ್ಮತೀರ್ ದದಾತ್ಯಜಸ್ರಂ ಸುತ
ಸತ್ಯಮೇವ ತತ್ ಓಂ |೧೧೬|

| ಇತಿ ಶ್ರೀಸ್ವಾಪ್ನವೃಂದಾವನಾಖ್ಯಾನೇ ಅಲೌಕಿಕ ವಿಭಾಗೇ
ನಿದರ್ಶನಪರ್ವಣಿ ಸಪ್ತದಶಾಧ್ಯಾಯ: ಸಮಾಪ್ತ: |

|| ಶ್ರೀ ಅಶ್ವಿನೀಹಯಗ್ರೀವಾತ್ಮಕ ಕೃಷ್ಣಾರ್ಪಣಮಸ್ತು ||

18. Svaapnavrundavanakhyana