03. Svaapnavrundavanakhyana

Composer : Shri Vadirajaru

| ಅಥ ತೃತೀಯಾಧ್ಯಾಯಃ |

| ಶ್ರೀ ಲಕ್ಷ್ಮೀಹಯಶೀರ್ಷಾಯ ನಮಃ |
ದಿವ್ಯ ಮಂತ್ರ ಪ್ರತಿಪಾದ್ಯ ಮೂರ್ತಯೇನಮಃ |

೧. ವಿಪ್ರ ಪ್ರಕರಣಮ್ ಶ್ಲೋಕಾ: [೧-೪೬]

|ಓಂ| ದಾಸ್ಯತ್ಯಯಂ ಮನುಂ ದಿವ್ಯಂ ವಾದಿರಾಜ ಇತೀರಿತಂ |
ದಾಸ್ಯತ್ಯಯಂ ಮನುಂ ದಿವ್ಯಂ ವಾದಿರಾಜ ಯತೀರಿತಂ |೧|

ಓಂ ಶ್ರೀಕಾರ ದ್ವಯೇನಾಪಿ ಪೂರ್ವಾಪರ ಸಮನ್ವಿತಂ
ನಮಶ್ಯಬ್ದಚತುರ್ಥ್ಯಂತ ಗುರು ಶಬ್ಧೈಶ್ಚ ಮಿಶ್ರಿತಂ |
ಗೃಹಾಣ ತ್ವಂ ಚ ವಿಪ್ರೇಂದ್ರ ಸರ್ವಾಂ ಸಿದ್ಧಿಮವಾಪ್ಸ್ಯಸಿ |೨|

ಯನ್ಮಂತ್ರ ಭೀರವಃ ಸರ್ವೇಗ್ರಹಾ ಯಾಂತಿ ದಿಶೋ ದಶ |
ಸೋಽಹಂ ಮಹಾನು ಭಾವೋಽತ್ರ ನ ಗ್ರಹೋಽಥ ಬಲಿಗ್ರಹಃ |೩|

ಯದ್ಗುಣೋಚ್ಚಾರಣಾದೇವ ಪಾಪ ಸಂಘಾತಪಂಜರಂ |
ಜಹಾತಿ ಮರ್ತ್ಯಃ ಸತತಂ ಸ ಪಾಪೀ ತು ಕಥಂ ಭವೇತ್ |೪|

ಯತ್ಪಾದಸ್ಮರಣಾನ್ನಿತ್ಯಂ ನರಾಃ ಸುಕೃತಿನಃ ಸದಾ |
ಸೋಽಹಂ ಪುಣ್ಯತಮಃ ಶುದ್ಧಃ ಸತತಂ ನಾತ್ರ ಸಂಶಯಃ |೫|

ಯೋ ಮಾಂ ಗ್ರಹಂ ವಿಜಾನಾತಿ ತಸ್ಯ ಪುಣ್ಯಂ ಹರಾಮ್ಯಹಂ |
ಸ ಯಾತಿ ನಿರಯಂ ಘೋರಂ ಯಾವದ್ಬ್ರಹ್ಮಾ ಚತುರ್ಮುಖಃ |೬|

ಯೋಮಾಂ ದೇವಂ ವಿಜಾನಾತಿ ಋಜುಸ್ಥಂ ಪುಣ್ಯಕೃನ್ನರಃ |
ಸ ಯಾತಿ ನಿಲಯಂ ಪುಣ್ಯಂ ಯದ್ಗತ್ವಾ ನ ನಿವರ್ತತೇ |೭|

ಆತ್ಮ ಸ್ತೋತ್ರಂ ನ ಕರ್ತವ್ಯಮಹಂಕಾರೇಣ ಧೀಮತಾ |
ಅಜ್ಞಾನಾಂ ಬೋಧನಾರ್ಥಾಯ ಕರ್ತವ್ಯಂ ನಾತ್ರ ಸಂಶಯಃ |೮|

ಹರಿದ್ರೋಹ ಗುರುದ್ರೋಹ ಸುರದ್ರೋಹ ಹರೇಪರೇ |
ಗಿರಿ ಗಹ್ವರ ಕಾಸಾರೇ ತಪಃ ಕುರ್ಯಾಂ ಹರೇರಿತಿ |೯|

ಗಿರಿಜಾಪತಿಮಾರಾಧ್ಯ ವಿರಜಾರ್ಕಾಯುತ ದ್ಯುತಿಂ |
ಸುರಜಾತಚರಂ ದೇವಮರಿಜಾತ ಹರಂ ಪರಂ |೧೦|

ಗುರುಜಾತಮತಿಂ ಲಪ್ಸ್ಯೇ ನರಜಾತಿಂ ಸಮುತ್ಸೃಜೇ |
ಹರಿಜಾತ ಗುಣಾನ್ ಧ್ಯಾಯೇ ಕರಜಾತಾ ಭಯಂ ಲಭೇ |೧೧|

ತೇನ ಚ ಬ್ರಹ್ಮಣಾ ಸಾಕಂ ಹರಿಮಾರಾಧ್ಯ ಭೂರಿಶಃ |
ತಾಭ್ಯಾಂ ಮಹಾನುಭಾವಾಭ್ಯಾಂ ಮುಚ್ಯೇಹಂ ಕರ್ಮಬಂಧನಾತ್ |೧೨|

ಏತಾಂ ಕೃತ್ವಾ ಶಿಲಾಯಾಂ ಮಮ ಕೃತಿಮಥ ಚ ಸ್ಥಾಪಯೇತ್ತಾಂ ಚ ದೃಷ್ಟ್ವಾ |
ಸಂತ: ಸಂತೋಷಭಾಜಃ ಸುಮತಿ ದಮಶಮೈರ್ಯುಕ್ತಂ ಆತ್ಮಾನಮೀಶಂ |
ಜ್ಞಾತ್ವಾ ದೇವೇಷು ಮುಖ್ಯಂ ಶುಭಗುಣಸುಮುಖಂ ನಿತ್ಯನಿರ್ಧೂತ ಹೇಯಂ |
ಮಾಮೇವಂ ಸದ್ಗುಣಾಢ್ಯಂ ಶುಭವಿತತಗತಿಂ ಯಾಂತು ಸಂತಃ ಸದಾ ತೇ |೧೩|

ಪಂಚಾಶತ್ ಯೋಜನಾನಾಂ ತು ವಿಸ್ತೀರ್ಣಂ ಕಾರ್ತಭಾಸ್ವರಂ |
ಹಂಸವಾಹನ ಸಂಯುಕ್ತಂ ಜಾಂಬೂನದಮಯಂ ಶುಭಂ |೧೪|

ಹೇಮರಾಶಿ ಪ್ರತೀಕಾಶಂ ಹೇಮಾದ್ರಿ ಶಿಖರೋಪಮಂ |
ನಾನಾ ಮಣಿಮಯಂ ದಿವ್ಯಂ ನಾನಾ ಮಾಲ್ಯೋಪ ಶೋಭಿತಂ |೧೫|

ನಾನೋಪಹಾರ ಬಲಿಭಿಃ ಜಯಶಬ್ದ ಪುರಸ್ಕೃತೈಃ |
ನಾನಾ ಮುನಿಗಣೈರ್ದಿವ್ಯೈಃ ನಾನಾ ದೇವಗಣೈಸ್ತಥಾ |೧೬|

ಗಂಧರ್ವೈರಪ್ಸರೋಭಿಶ್ಚ ಸೇವ್ಯಮಾನಂ ಸಮಂತತಃ |
ಗೀತವಾದಿತ್ರ ನೃತ್ತ್ಯಶ್ಚ ಛತ್ರ ಚಾಮರ ಪೂಜಿತಂ |೧೭|

ವಿತಾನೈರರ್ಕವರ್ಣೈಶ್ಚ ಸೇವ್ಯಮಾನಂ ಸಮಂತತಃ |
ಭಕ್ತಾಭಯಕರಂ ದಿವ್ಯಂ ಭುಕ್ತಿ ಮುಕ್ತಿ ಪ್ರದಾಯಕಂ |೧೮|

ಅಮೃತಾನಾಂ ಸುಪಾನೈಶ್ಚ ಸೋಮಪಾನೈಸ್ತಥೈವ ಚ |
ಸುರಭಿ ಕ್ಷೀರಪಾನೈಶ್ಚ ಸೇವಿತಂ ನಿತ್ಯ ಮೇವ ಚ |೧೯|

ವಿಮಾನಂ ದಿವ್ಯಮಾನಂ ಚ ದೀಪ್ಯಮಾನಂ ಸದಾಯನಂ |
ವೃಂದಾವನೋಪರಿಗತಂ ಪೂಜಯಂತು ಸದಾ ಮಮ |೨೦|

ಅಹಂ ಸದಾ ದೇವಸಭಾ ಸಭಾಜಿತಃ ಸುಭಾಸ್ವರೈರ್ದಿವ್ಯ ವಿಭೂಷಣೈರ್ಯುತಃ |
ಅಹಂ ಸಮಾನೈ: ಸುರ ಮಾನಿ ಮಾನಿತಃ
ಸಮಾನಯುಕ್ತೈ: ಸುಮನೋಭಿ ರಂಜಸಾ |೨೧|

ಗುರುಮಖಿಲ ಗುಣಜ್ಞಂ ಸದ್ಗುಣೈಕಾಧಿವಾಸಂ
ಶಮ ದಮ ಪರಿನಿಷ್ಠಂ ಸತ್ವನಿಷ್ಠಂ ವರಿಷ್ಠಂ |
ಸಕಲ ಸುಜನ ಶಿಷ್ಟಂ ನಿತ್ಯ ನಿರ್ಧೂತ ಕಷ್ಟಂ
ಹಯಮುಖ ಪದನಿಷ್ಠಂ ಮಾಂ ಭಜಂತು ಪ್ರಪನ್ನಾಃ |೨೨|

ಮಚ್ಛಿಷ್ಯ ಮಧ್ಯೇ ಮದ್ಭಕ್ತಿಯುಕ್ತೋ ಯಶ್ಚ ಮದಾಗ್ರಹೀ |
ಮತ್ಸಂಪ್ರದಾಯ ಸಂಯುಕ್ತೋ ಮನ್ಮಂತ್ರ ಜಪಶೀಲವಾನ್ |೨೩|

ಮತ್ಕೃತಿಂ ನ ಶ್ರುಣೋತ್ಯರ್ಥಂ ನ ಜಾನಾತಿ ನ ತುಷ್ಯತಿ |
ನ ಪೂಜಯತಿ ಮತ್ಪೀಠಂ ನ ಕರೋತಿ ಸದಾಽಶುಚಿಃ |೨೪|

ಸ ಚ ವಿಪ್ರ ಬಹಿರ್ಭೂತೋ ಮದ್ರೋಹ ಫಲಭಾಕ್ ಸ್ವಯಂ
ಪಿತೃಭಿ: ಸಹ ಮಜ್ಜೇತ ನರಕೇ ನ ಚ ಮಾಮಕಃ |೨೫|

ತತಃ ಪರಂ ಕಿಯಜ್ಜನ್ಮ ಜಾತಃ ಪ್ರೇಕ್ಷ್ಯತಿ ಮತ್ಕೃತಿಂ |
ಅವಶಿಷ್ಟಂ ತು ವಕ್ತವ್ಯಂ ಮುಕ್ತಿಂ ಯಸ್ಯಾಮಿ ಸದ್ಗತಿಂ |೨೬|

ನಂದನೇ ಚ ವನೇ ರಮ್ಯೇ ಸ್ಯಂದನೇಽಮಂದ ನಂದನೇ |
ಇಂದ್ರಾಣ್ಯೇಂದ್ರೇಣ ಚಾನಂದೀ ಮಂದಾಕಿನ್ಯಾಂ ರಮಾಮ್ಯಹಂ |೨೭|

ತಥೈವ ನಂದನಪ್ರಖ್ಯೇ ಮಮ ವೃಂದಾವನೇಽನಿಶಂ |
ರಮಾಮಿ ರಮಯಾ ದೇವೈಃ ಹಯಗ್ರೀವೇಣ ಚಾನ್ವಿತೇ |೨೮|

ನಂದನ ಸ್ಯಂದನಾಕಾರೇ ಮಮ ವೃಂದಾವನೇಽನಿಶಂ |
ವಂದನಂ ನಂದನಾರ್ಥ ಯೇ ಕುರ್ವಂತು ಗುಣ ನಂದಿನಃ |
ತಸ್ಮಾದ್ ವೃಂದಾವನಮಿದಂ ಸರ್ವಾಭೀಷ್ಟಪ್ರದಂ ಸತಾಂ |೨೯|

ವೃಂದಾವನಾಖ್ಯಂ ಮಮ ಮಂದಿರಂ ಸದಾ
ಕಂದಾಶನಾನಂದ ಪದಂ ಸುಧೀಮತಾಂ |
ವೃಂದಾರಕಾಣಾಮಿವ ಮಂದರಾದ್ರಿಃ
ಸಂದರ್ಶನಾನಂದ ಸುಧಾಂ ಪ್ರದದ್ಯಾತ್ |೩೦|

ವೃಂದಾವನಂ ಸದವನಂ ಸದನಂ ಮಮೇದಂ
ಇಂದ್ರಾನುಜಸ್ಯ ಸದನಂ ಮದನಸ್ಯ ಚೇದಂ |
ವೃಂದಾರ ಕೇಂದ್ರ ಭವನಂ ಪರಮಸ್ಯ ಚೇದಂ
ನಂದಾದಿ ಪಾರ್ಷದಗಣಾಯನ ಮೇವ ಚೇದಂ |೩೧|

ಮೇರೌ ಮಾರಮಣಂ ದೃಷ್ಟ್ವಾ ರಮ ಮಾಣೋ ರಮಾಪತೇಃ|
ಕರಕಂಜಂ ರಮಾಯಾಶ್ಚ ಶಿರಸಾ ಮಾನಯಾಮ್ಯಹಂ |೩೨|

ಊರ್ವಶ್ಯಾದ್ಯಪ್ಸರಸ್ತ್ರೀಣಾಂ ಶರ್ವಸ್ಯಾರ್ಧಾಂಗಿ ಸನ್ನಿಧೌ |
ಗರ್ವಸ್ಯಾರ್ಥಂ ಕೃತಂ ನೃತ್ತಂ ಸಂದೃಶ್ಯಾಮ್ಯತ್ರ ಚಾದ್ಬುತಂ |೩೩|

ಕೈಲಾಸೇ ಪರ್ವತ ಶ್ರೇಷ್ಠೇ ಸವಿಲಾಸೇಕ್ಷಣಾ: ಸ್ತ್ರಿಯಃ |
ಪಲಾಶೇಕ್ಷಿತ ಚಾರ್ವಾಂಗ್ಯಃ ಕಲಾಶೇ ಪೀತ ಪೌಷ್ಪಿಕಾಃ |೩೪|

ನರ್ತನಂ ಪ್ರೇರಯಂತ್ಯೋ ವೈ ಕರ್ತನದ್ಯುತಿಸನ್ನಿಭಾಃ |
ಮದನಂ ಪ್ರೇಕ್ಷಕಶ್ಚಾತ್ರ ಪ್ರಾಪ್ನುವನ್ವೈ ಮಯಾ ವಿನಾ |೩೫|

ಹರಸ್ಯ ಕರಕಂಜಂ ಚ ಹರೇಶ್ಚಕ್ರಧರಂ ಕರಂ |
ಅಹಂಕರಾಭ್ಯಾಂ ಸಂಗೃಹ್ಯ ತಯೋರಂತರಗ: ಸದಾ |೩೬|

ತಥೈವ ಬ್ರಹ್ಮಣೋ ಲೋಕೇ ಬ್ರಹ್ಮಾನಂದಾತ್ಮಕಂ ಹರಿಂ |
ಹಂಸವಾಹನ ಸಂವೀಜಚ್ಚಾಮರಂ ಚಾರುಹಾಸಿನಂ |೩೭|

ಹಯಗ್ರೀವಂ ಸುರಾಗ್ರಣ್ಯಂ ಹಾರ ಕೇಯೂರ ಧಾರಿಣಂ |
ದೃಷ್ಟ್ವಾ ಮನ್ನಯನಾನಂದಂ ಮಗ್ನಶ್ಚಾನಂದ ವಾರಿಧೌ |೩೮|

ಏವಂ ಜನಿ ಶತಾವೃತ್ತ್ಯಾ ತದ್ಭಕ್ತ್ಯಾ ತತ್ಪ್ರಸಾದತಃ |
ಲಕ್ಷ್ಮೀಕಟಾಕ್ಷತಶ್ಚಾಹಂ ಮುಚ್ಯೇ ತತ್ಕುಕ್ಷಿಗಃ ಕ್ಷಣಾತ್ |೩೯|

ಸ್ವರ್ಗೇ ಚ ಸ್ವರ್ಧುನೀಂ ಯಾಯಾಂ ಸ್ವರ್ಗಿಣಾಂ ಸ್ವಾಗತೇನ ಚ |
ಸ್ವಾರಾಜ್ಯಪತಿನಾ ಸಮ್ಯಕ್ ಸ್ವರ್ಚಿತಶ್ಚ ಸ್ವರಾಡಹಂ |೪೦|

ಸ್ವರ್ಗಾದೂರ್ಧ್ವಂ ಹರೇರ್ಮಾರ್ಗಂ ಗತ್ವಾಽನರ್ಘ್ಯಂ ಸುಶೀಘ್ರತಃ |
ಬ್ರಹ್ಮಣೋ ಧಾಮ ನಿಸ್ಸೀಮಂ ಅಮಾನವ ಸಮನ್ವಿತಂ |೪೧|

ನಮಾಮಿ ಸ್ವಾಮಿನಂ ಮಾರತಾತಂ ಮಾಕಾಂತಮವ್ಯಯಂ |
ವಸಾಮಿ ಸುಚಿರಂ ತತ್ರ ವಿರಂಚೇನ ಚಿರಂ ರಮನ್ |೪೨|

ವೈಷ್ಣವಂ ಧಾಮ ನಿಸ್ಸೀಮಂ ತತೋ ಯಾಸ್ಯಾಮ್ಯಮಾಯಯಾ |
ಏತತ್ತೇ ಕಥಿತಂ ವಿಪ್ರ ಸುಪ್ರಸನ್ನೋ ಭವಾಮಿ ತೇ |೪೩|

ಪುತ್ರ ಸುತ್ರಾಮ ಲೋಕೋಽಯಂ ಸತ್ರಾದ್ಯೈಃ ಕರ್ಮಭಿರ್ಭವೇತ್ |
ವೈಷ್ಣವಂ ಧಾಮ ಚಾವ್ಯಕ್ತಂ ಯೋಗಿನಾಮಪಿ ದುರ್ಲಭಂ |೪೪|

ಸುಲಭಂ ಮಮ ತತ್ಸರ್ವಂ ಹರೇರ್ಜ್ಞಾನಾದಿ ಸಾಧನೈಃ |೪೫|

ಏವಂ ಸುಮಾನಂ ಸುಮನೋಭಿರಂಜಸಾ
ಸಂಜಾತಮಗ್ರ್ಯಂ ಸುಜನಾರ್ಯ ಸರ್ವಂ |
ಕಂಜಾಕ್ಷ ಗೃಣ್ಹಾಮಿ ಚಿರಂ ತು ಜೀವ ತ್ವಂ
ಜೀವಲೋಕೇ ಕುಜನಾರ್ತಿದಃ ಸನ್ |೪೬|

೨. ಲಕ್ಷ್ಮೀಪತಿ ಪ್ರಕರಣಮ್ ಶ್ಲೋಕಾ: [೪೭-೬೦]

ಮಮ ವೃಂದಾವನೇ ಪುಣ್ಯೇ ಸುಪರ್ವಾಣಶ್ಚ ನಿತ್ಯಶಃ |
ವಸಂತಿ ಪುಣ್ಯ ಕರ್ಮಾಣೋ ವಿಶೇಷಾತ್ ತೇ ಚ ಪರ್ವಸು |೪೭|

ತಸ್ಮಾದ್ ವೃಂದಾವನೇ ಪುಣ್ಯೇ ಪಂಚಪರ್ವಸು ಪೂಜನಂ |
ದರ್ಶನಂ ಸುಜನಾನಾಂ ತು ಸರ್ವಾಘೌಘ ವಿನಾಶನಂ |೪೮|

ಏತದ್ ರಹಸ್ಯಂ ಮಮ ಪುತ್ರ ಪಶ್ಯಂಸ್ತ್ವಂ ಸುಪ್ರಸಿದ್ಧಿಂ ಕುರು ಸತ್ಸು ನಿತ್ಯಂ |
ಶೃಣ್ವಂತು ಸರ್ವೇ ಸುಜನಾಶ್ಚ ಮತ್ಕೃತಿಂ ಸರ್ವೇಷ್ಟ ದಾತ್ರೀಂ ಶರಣಾಗತಾನಾಂ |೪೯|

ಇದಮದ್ಭುತಮಾಖ್ಯಾನಂ ಮಮ ವೃಂದಾವನಸ್ಯ ಚ |
ಶೃಣ್ವತಾಂ ಪಠತಾಂ ವಾಪಿ ಸರ್ವಾಭೀಷ್ಟಪ್ರದಂ ಸದಾ |೫೦|

ಇದಂ ತು ಸಂಶಯವತಾಂ ನತು ಶಂಸ ಕದಾಚನ |
ವಿಶ್ವಾಸಿನಾಂ ತು ಶಂಸ ತ್ವಂ ಶೇಷಶಾಯಿಸದಾತ್ಮನಾಂ |೫೧|

ಇದಂ ಸಮಾಪ್ತಂ ಮಮ ಶೋಭನಂ
ಮಹತ್ ವೃಂದಾವನಾಖ್ಯಾನಮನುತ್ತಮಂ ನೃಣಾಂ |
ಯಚ್ಛ್ರುಣ್ವತಾಂ ಭಕ್ತಿರುದಾರ ಸದ್ಗುಣೇ |
ಹರೌ ಹರೇರ್ಲೋಕಗತೇ ತಥಾ ಮಯಿ |೫೨|

ಭವತ್ಯಹೋ ಸರ್ವ ಶುಭಾಪ್ತಿ ಸನ್ಮತಿಂ |
ದದಾತ್ಯಜಸ್ರಂ ಸುತ ಸತ್ಯಮೇವ ತತ್
ಅತಃ ಸತಾಂ ತ್ವಂ ವದ ಮತ್ಕೃತಿಂ ಸದಾ
ಶುಭಾಪ್ತಯೇ ತೇ ಚ ಮಮಾತ್ರ ಕೀರ್ತಯೇ |೫೩|

ವೇದವೇದ್ಯ ನಿರವದ್ಯ ಮದ್ದಯಾವಾರಿಧೇ ಕದನ ಕೋವಿದ ವಾದಿಭಿಃ |
ತ್ರಿದಶವಂದ್ಯ ಹಯಶೀರ್ಷಸದ್ಮನಿ ಸ್ಯಂದನೇನ ವಿಹರಾಮಿ ನಂದನ |೫೪|

ಚಿರಂ ಜೀವ ಚಿರಂ ಜೀವ ಸುಖೀ ಭವ ಸುಖೀ ಭವ |
ಮಮಶೀರ್ವಚನೇನೈವ ಹಯಗ್ರೀವಪರೋ ಭವ |೫೫|

ನಂದನ ಸ್ಯಂದನಾಕಾರೇ ಮಮ ವೃಂದಾವನೇಽನಿಶಂ |
ವಂದನಂ ನಂದನಾರ್ಥಾ ಯೇ ಕುರ್ವಂತು ಗುಣನಂದಿನಃ |೫೬|

ಅಲೌಕಿಕೈರದೃಶ್ಯಾರ್ಥೈಃ ಲೌಕಿಕೈಃ ಶ್ಲೋಕ ಭಾವಿತೈಃ |
ಅಲೌಕಿಕಾನುವಾಕೈಶ್ಚ ಲೌಕಿಕೈರ್ವಾಕ್ಯ ವಿಸ್ತರೈಃ |೫೭|

ಲೌಕಿಕಾಲೌಕಿಕ ಜನ ಸಾಧಾರಣ್ಯೇನ ಮತ್ಕೃತಂ |
ಇದಂ ವೃಂದಾವನಾಖ್ಯಾನಂ ಶ್ರುತ್ವಾ ಸರ್ವೇಪಿ ಲೌಕಿಕಾಃ |
ಲೌಕಿಕಾಲೌಕಿಕ ಫಲಂ ಪ್ರಾಪ್ನುವಂತಿ ನ ಸಂಶಯಃ |೫೮|

ಅಪ್ರಯೋಗೇತಿ ಭಾಸಂತೇ ತೇ ಸರ್ವೇಽಪಿ ಹ್ಯಲೌಕಿಕಾಃ |
ಸುಪ್ರಯೋಗೇತಿ ಭಾಸಂತೇ ತೇ ಸರ್ವೇಽಪಿ ತು ಲೌಕಿಕಾಃ |೫೯|

ತಸ್ಮಾನ್ನ ಕಾರ್ಯ ದೋಷಸ್ಯ ಶಂಕಾ ಶೂಕಾ ಸುಬುದ್ಧಿಭಿಃ |
ವಿಶ್ವಾಸಃ ಸರ್ವದಾ ಕಾರ್ಯೋ ಮತ್ಕೃತೌ ಚ ಸುನಿಶ್ಚಯಾತ್ |೬೦|

೩. ವಿಪ್ರಪ್ರಕರಣಮ್ ಶ್ಲೋಕಾ: [೬೧-೭೮]

ಸುರರಾಜ ಪ್ರಸಾದೇನ ಅಮರರಾಜೋ ಭವ ದ್ವಿಜ |
ವಾದೀಭ ಮೃಗರಾಜೋಽಹಂ ವಾದಿರಾಜೋ ಹರಿಂ ಭಜೇ |೬೧|

ಅನೇಕ ಮೂರ್ತಿಭಿರ್ಯುಕ್ತ ಸ್ಥೌಲ್ಯ ಸೌಕ್ಷ್ಮ್ಯದಿಭಿರ್ವೃತಃ
ಅಣಿಮಾದ್ಯಷ್ಟ ಸಿದ್ಧೋಹಂ ಹಯಗ್ರೀವಸ್ಯ ಚಾಽಜ್ಞಯಾ |೬೨|

ವೃಂದಾವನೇ ಚ ಮಮ ನಂದನ ಕಾನನೇ ಚ
ಕೈಲಾಸ ಮೇರು ಶಿಖರೇಷು ತಥೈವ ನಾಕೇ
ಸತ್ಯಾಖ್ಯ ದಿವ್ಯ ಭವನೇಚ ವಿರಿಂಚರಮ್ಯೇ |
ದ್ವೀಪೇ ಚರಾಮಿ ಹರಿಣಾ ಸಹ ದಿವ್ಯಧಾಮ್ನಿ |೬೩|

ಬ್ರಹ್ಮೇಶ ಶಕ್ರ ಸುರಕಾರ್ಯ ಧುರಂಧರೈಶ್ಚ
ದೇವೈ: ಸಮಸ್ತ ಯತಿಭಿಃ ಪತಿಭಿಃ ಸುರಾಣಾಂ |
ದೃಷ್ಟ್ವಾ ರಥೋತ್ಸವವರಂ ಸುರವರ್ಯ ಕಾರ್ಯಂ
ಸ್ವರ್ಯಾಮಿ ಶಶ್ವದವನಾತ್ ಸುಚಿರಾಯ ಜೀವ |೬೪|

ಕರ್ತುಂ ಚಾಕರ್ತುಮಪ್ಯೇವಂ ಅನ್ಯಥಾ ಕರ್ತುಮೇವ ಚ |
ಸಮರ್ಥೋಽಹಂ ನ ಸಂದೇಹಶ್ಚೇಶ್ವರಸ್ಯ ಸದಾಽಽಜ್ಞಯಾ |೬೫|

ಅಹಂ ಮಹಾನುಭಾವಶ್ಚ ಸರ್ವಸಂಪದ್ವಿಧಾಯಕಃ |
ಕಾಲಶ್ಚಾಯಂ ಕಲಿರಿತಿ ಹ್ಯುದಾಸೀನ್ಯಂ ಕೃತಂ ಮಯಾ |
ಪರೀಕ್ಷಾರ್ಥಂ ತು ಭಕ್ತಾನಾಂ ಉಕ್ತಂ ನೈತದಪೇಕ್ಷಯಾ |೬೬|

ಅಹಂ ಮನ್ಯೇ ಧನಂ ಧಾನ್ಯಂ ತನುಂ ಚಾಪಿ ತೃಣೋಪಮಂ |
ಕನಕಂ ಶನಕೈರ್ಹಿತ್ವಾ ಮ್ರಿಯತೇ ಶುನಕೋ ಯಥಾ |೬೭|

ಜೀವಶ್ಚಾಯಂ ತು ಕಂಜಾಕ್ಷಂ ಮಂಜೀರಮಣಿ ಮೌಳಿನಂ |
ಸಂಜಾನಾತಿ ನ ಸಂಜೀವನ್ ಪುಂಜೀಕೃತ ಸುಪಾಪಧೀಃ |೬೮|

ವೈರಾಗ್ಯಾಭರಣಶ್ಚಾಹಂ ಕರಿ ಸಂತ್ರಾಣಕಾರಿಣಂ |
ವರುಣಾದ್ ಗೋಪತಿತ್ರಾಣಂ ಮರಣಾರ್ತ್ಯಾಗ ತೋರಣಂ |೬೯|

ಯಮದಂಡೋಪಮಶ್ಚಾಯಂ ಮಮ ದಂಡೋಪಿ ಪಂಡಿತ |
ಬ್ರಹ್ಮಾಂಡಾರಂಭ ಶೌಂಡೋಽಯಂ ಮದ್ದೋರ್ದಂಡೈಕಮಂಡನಂ |೭೦|

ಮಮ ಕೌಪೀನಮಪ್ಯೇತತ್ ಪಾಪಿನಂ ಪಾವಯತ್ಯಹೋ |
ಗೋಪೀನಾಂ ಪತಿನಾ ದತ್ತಂ ಪೀತಾಖ್ಯಂ ಪಾಣಿನಿರ್ಮಿತಂ |೭೧|

ಮಾಣಿಕ್ಯಾನಾಂ ತು ಶ್ರೇಣೀಭೀಃ ಶೋಣಾಚ್ಛೋಣಿತ ಶೋಭಿನಾಂ |
ಖಚಿತಂ ಚಾರ್ಚಿತಂ ಹಂಸೈಃ ಯಾಚಿತಂ ಯಾಚಕೈ: ಸದಾ |೭೨|

ಯತೀನಾಂ ಪತಿನಾ ದತ್ತಂ ಕೃಷ್ಣೇನಾದ್ಭುತಕರ್ಮಣಾ
ನಾರದಸ್ಯಾಪ್ಯದತ್ವಾ ತು ಮಯ್ಯೇವಾನುಗ್ರಹಾರ್ಥಿನಾ |೭೩|

ಸೂತ್ರಂ ಕಟಿತಟೇ ಭಾತಿ ಗಾತ್ರಮಧ್ಯೇ ಮಮ ದ್ವಿಜ |
ಕಾಽತ್ರ ಕೀರ್ತಿರ್ಯತೀನಾಂ ತು ಶಾಸ್ತ್ರಸಿದ್ಧ ವಿಧಿಂ ವಿನಾ |೭೪|

ವಾಮನಾದಾಪ್ತವಾನ್ ಕಾಮಂ ಕಮನೀಯಂ ಕಮಂಡಲುಂ |
ಶಮನಂ ಕ್ಷುತ್ಪಿಪಾಸೇ ಚಾಪ್ಯಮೃತೋಪಮ ವಾರಿಣಾ |೭೫|

ಕಂಬಲಂ ರತ್ನಜಂಬಾಲಂ ಚಾಂಬರಂ ಶಾಂಬರಂ ತಥಾ |
ಶಂಭುನಾ ಸಂಭ್ರಮಾದಾಪ್ತಂ ಕುಂಭರಾಕ್ಷಸ ಭಂಙ್ಗಿನಾ |೭೬|

ಪಾದಪೀಠೇ ಹಟಾತ್ ಪ್ರಾಪ್ತೇ ದಿವ್ಯರತ್ನ ಸುಘಟ್ಟಿತೇ |
ತ್ವಷ್ಟ್ರಾ ಚ ವಿಟ್ಠಲಾದೇಶಾತ್ ಕಾಠಿಣ್ಯರಹಿತೇ ಶುಭೇ |೭೭|

ಏವಂ ಸರ್ವಾಣಿ ವಸ್ತೂನಿ ವಸ್ತ್ರಾದ್ಯಾಭರಣಾನಿ ಚ |
ದೇವೈರಪ್ಯಾಪ್ತವಾನ್ ಕಾಮಂ ಔದಾಸೀನ್ಯ ವಿವರ್ಜಿತೈಃ |೭೮|

೪. ಕಶ್ಚಿದ್ವಿಪ್ರೇಶ ಪ್ರಕರಣಮ್ | ಶ್ಲೋಕಾ: [೭೯-೮೨]

ಮತ್ಕೃತೌ ಯಸ್ಯ ವಿಶ್ವಾಸೋ ನಾಸ್ತಿ ತಸ್ಯ ಯಶಃ ಶ್ರಿಯಃ |
ಆಯುಷ್ಯಂ ಸ್ರವತೇ ಭಿನ್ನಘಟಾಂತ:ಸ್ಥೋದಕಂ ಯಥಾ |೭೯|

ಇಮಂ ಶ್ಲೋಕಂ ತು ವಿಪ್ರೇಶ ಸರ್ವದಾ ಸಜ್ಜನೇಷ್ವಿಹ |
ವದಸ್ವ ತ್ವಂ ಮದೀಯೇಷು ಮದ್ದಯಾ ವಿಷಯೇಷು ಚ |೮೦|

ವಿಪ್ರಪ್ರಾಣಾವಧಿರ್ಯಾವತ್ ಸತ್ಪ್ರಮಾಣಾವಿರೋಧತಃ |
ತದ್ವಾಣ್ಯಾ ಚ ಪ್ರವಕ್ಷ್ಯೇಽಹಂ ಮದ್ವಾಣ್ಯಾಽಽವಿಷ್ಟಯಾಽನಯಾ |೮೧|

ಮತ್ಕಾರ್ಯಂ ವಿಪ್ರ ಕಾರ್ಯಂ ವಾ ನ ಜಾನಾಸೀತಿ ಬುದ್ಧಿಮಾನ್ |
ಕ್ರೋಧೋಽಪಿ ಮಮ ನಾಸ್ತ್ಯೇವ ತ್ವಂ ಚಿರಂ ಜೀವ ಪುತ್ರಕ |೮೨|

೫. ವ್ಯಾಸಭಕ್ತ ಪ್ರಕರಣಮ್ | ಶ್ಲೋಕಾ: [೮೩-೧೦೭]

ವಿಪ್ರಾರ್ಥಮೇವ ಸಚ್ಛಾಸ್ತ್ರಂ ವಕ್ಷ್ಯೇಹಂ ಶ್ರುಣು ಪೋತಕ |
ಶ್ರುತ್ವಾ ಸರ್ವಂಚ ಸದ್ಧರ್ಮಂ ಹೃದಿಸ್ಥಂ ಕುರು ಸರ್ವದಾ |೮೩|

ಅಯಂತು ಬ್ರಾಹ್ಮಣಃ ಶ್ರೀಮಾನ್ ಮಾಮೇವ ಶರಣಂ ಗತಃ |
ವೃಂದಾವನ ಕೃತೇಃ ಪೂರ್ವಂ ಸ್ವಸ್ಯಾಭೀಷ್ಟಂ ನಿವೇದ್ಯ ಮೇ |೮೪|

ಶರಣಾಗತನಿರ್ಹರಣಂ ಮರಣಂ ಚ ವಿದುರ್ಬುಧಾಃ |
ಕರುಣಾಕರ ತತ್ತ್ರಾಣಂ ಕರಣಂ ಸರ್ವ ಕರ್ಮಣಾಂ |೮೫|

ಅಹಂ ವಿತ್ತಾನಿ ದಾಸ್ಯಾಮಿ ಚೇತಿ ಬುದ್ಧಿಃ ಪ್ರಜಾಯತೆ |
ಕಾಲಶ್ಚಾಯಂ ಕಲಿರಿತಿ ಹ್ಯೌದಾಸೀನ್ಯಂ ಕೃತಂ ಮಯಾ |೮೬|

ಸುರಾಣಾಂ ತು ಮನುಷ್ಯಾಣಾಂ ದರ್ಶನಂ ಸ್ಪರ್ಶನಂ ತಥಾ |
ಸಂಭಾಷಣಂ ಚ ಸದ್ಬುದ್ಧೇ ನೈವ ಧರ್ಮೋತ್ರ ಜಾತುಚಿತ್ |೮೭|

ಅದ್ಯಾಪಿ ವಿಪ್ರವರ್ಯೇಸ್ಮಿನ್ ವಕ್ಷ್ಯೇಮಮ ಕಲೇವರಂ |
ಪೂರ್ವಾನುಭವ ಸಂಸ್ಕಾರ ಕಾರಣಾದ್ವಿದ್ಧಿ ಬುದ್ಧಿಮನ್ |೮೮|

ತದೇವ ಮತ್ಕಳೇವರಂ ದ್ವಿಜಸ್ಯ ಯತ್ಕಳೇಬರಂ |
ತದೇವ ಮತ್ಕಳೇರಿತಂ ದ್ವಿಜಸ್ಯ ಯತ್ಕಲೇರಿತಂ |
ತದೇವ ಕಲ್ಪನೇರಿತಂ ದ್ವಿಜಸ್ಯ ಕಲ್ಪನೇರಿತಂ |೮೯|

ಸುಖಸ್ಯ ಭೋಕ್ತಾ ತದ್ದೇಹೇ ನಾಸುಖಸ್ಯ ಕದಾಚನ
ಸುಖಸ್ಯ ಕರ್ತಾ ತದ್ದೇಹೇ ನಾಸುಖಸ್ಯ ಕದಾಚನ |೯೦|

ತಸ್ಮಾಚ್ಚ ಸುಖಭೋಕ್ತೃತ್ವಂ ಸರ್ವದಾ ಮೇ ನ ಚಾನ್ಯಥಾ |೯೧|

ಮಾರ್ತಾಂಡ ಮಂಡಲಾಭೇ ದ್ವೇ ಕುಂಡಲೇ ಪುಂಡರೀಕಿಣಾ |
ಪ್ರಾಪ್ತೇಭಶುಂಡಾದಂಡೇನ ಪಂಡಿತೇನ ವಿಡಂಬಿನಾ |೯೨|

ಶತಪತ್ರೋಪಮಂ ಛತ್ರಂ ರತ್ನದಂಡ ವಿಚಿತ್ರತಂ |
ವೃತ್ರಸ್ಯ ಶತ್ರುಣಾ ಗೋತ್ರ ಭೇತ್ತ್ರಾ ಚಾಽಪ್ತಂ ಶಶಿಪ್ರಭಂ |೯೩|

ಚಾಮರೇ ಚಾಮರೇಶೇನ ರತ್ನದಂಡೇ ಶಶಿಪ್ರಭೇ |
ಸಾಮರೆ ಸಾಮರೇ ಲೋಕೆ ಪ್ರೇಷಿತೆ ಮಮ ಪಾರ್ಶ್ವಯೋಃ |೯೪|

ಮಯಾ ಪೀಠಂ ಹಠಾದಾಪ್ತಂ ತಟಿನ್ನಿಭ ಸುಪೌರುಟಂ |
ತ್ವಷ್ಟ್ರಾ ಸುಘಟ್ಟಿತಂ ರತ್ನ ಕೋಟಿಭಿಃ ಕಠಿನೇ ತರಂ |೯೫|

ಏವಂ ಸದಾ ದಿವ್ಯ ಮಹಾ ವಿಭೂತಿಭಿಃ |
ಸಂಸೇವ್ಯ ಮಾನಃ ತ್ರಿದಶೈಃ ಮಮಾನುಗೈಃ |
ವಿರಿಂಚ ಲೋಕೇ ಸುಚಿರಂ ರಮನ್ ಮುದಾ
ರಮಾಮಿ ಲೋಕೇಽಪಿ ರಮಾಪತೇಃ ಪ್ರಿಯೇ |೯೬|

ನಂದನಂ ತೇ ಶತಾನಂದ ಮುಕುಂದಾವಸಿತಂ ವದನ್ |
ನಂದಗೋಪಸುತಾಮಂದಾನಂದಾತ್ಮನ್ ಪಾಹಿ ನಂದನಂ |೯೭|

ಧ್ರುವಂ ವಾತೇನ ಸಂತ್ಯಕ್ತಂ ಪೀತಂ ತಚ್ಚ ಘಟಾಮೃತಂ |
ನಾರದಾಚ್ಛಾರದಾಮೂರ್ತಿಂ ಪಾಹಿ ತಂ ಮತ್ಸುತಂ ತಥಾ |೯೮|

ಮುಕುಂದ ಕುಂದ ಕುಡ್ಮಲ ದಂತಪಂಗ್ತಿ ವಿರಾಜಿತ |
ನಂದಗೋಪ ಸುತಾಮಂದಾ ನಂದಾತ್ಮನ್ ಪಾಹಿನಂದನಂ |೯೯|

ಯತ್ಪ್ರೇರಣಾಂ ವಿನಾ ಸೋಽಯಂ ಬ್ರಾಹ್ಮಣಃ ಪುಣ್ಯಕೀರ್ತನ |
ಏಕಂ ವಾ ವಕ್ಷ್ಯತಿ ಶ್ಲೋಕಂ ತರ್ಹೀದಂ ತತ್ಕೃಥಂ ಭವೇತ್ |೧೦೦|

ಪರೀಕ್ಷಾಂ ಕುರು ತಚ್ಛಕ್ತಿಂ ವಾಗ್ಭೂತಿ ವಿಷಯಾಂ ಸುತ |
ಸ್ನಾಪ್ನ ಶ್ಲೋಕಂ ವಿನಾ ಚೈಕಂ ಶ್ಲೋಕಂ ವಕ್ಷ್ಯತಿ ವಾ ನ ವಾ |೧೦೧|

ಮುಕುಟಂ ರತ್ನ ಸತ್ಕೂಟಂ ಹಾಟಕಾದ್ರಿರಿತಿ ಸ್ಫುಟಂ |
ಭಾತಿ ಪೌರುಟ ಭೂಯಿಷ್ಟಂ ಕೋಟಿಸೂರ್ಯ ಸುಪಾಟವಂ |೧೦೨|

ಸುವರ್ಣ ಪೂರ್ಣೇ ಮಮ ಕರ್ಣಭೂಷಣೆ
ಗಣೈರ್ಮಣೀನಾಂ ತು ಝಣಝಣದ್ ಧ್ವನಿಃ |
ಗಲಸ್ಥ ಹಾರಾವಲಿಭಿಃ ಸುಮೇಲನೇ
ತ್ವಾಸೀತ್ ತಥಾ ಚಾಲಕಸಂಸ್ಥ ಮೌಳಿನಾ |೧೦೩|

ಓಂ ಏತತ್ಸರ್ವಂ ಸ್ವಾಪ್ನಪದ್ಯೇನ ಗರ್ವಂ ಹಿತ್ವಾ ಸರ್ವೇ ವಿಪ್ರವರ್ಯಾಸ್ಯಜೇನ |
ಶೃತ್ವಾ ಚೋರ್ವ್ಯಾಂ ಶರ್ವ ಗುರ್ವಾದಿ ದೇವಾನ್
ದೃಷ್ಟ್ವೋರ್ವಶಿಂ ಯಾಂತು ಮಾಂ ಮಾನವೇಂದ್ರಾಃ |೧೦೪|

ಇದಂ ವೃಂದಾವನಾಖ್ಯಾನಂ ಯೇ ಪಠಂತಿ ಮನೀಷಿಣಃ |
ಮುಕುಂದಾವನಮೇವಾಸ್ತು ತೇಷಾಂ ಕಂದಾಶನಾಜ್ಞಯಾ |೧೦೫|

ಇದಮರ್ಪಿತಮೇವಾಸ್ತು ಹಯಶೀರ್ಷಸ್ಯ ಪಾರ್ಷದಾತ್ |
ಸಮಂ ಸಹಸ್ರಶೀರ್ಷಸ್ಯ ಸೂಕ್ತಸ್ಯ ಪುರುಷಾತ್ ಕೃತಮ್ |೧೦೬|

ಯಚ್ಛ್ರುಣ್ವತಾಂ ಭಕ್ತಿರುದಾರಸದ್ಗುಣೇ ಹರೌ ಹರೇರ್ಲೋಕಗತೇ ತಥಾ ಮಯಿ |
ಭವತ್ಯಹೋ ಸರ್ವಶುಭಾಪ್ತಿಸನ್ಮತೀರ್ ದದಾತ್ಯಜಸ್ರಂ ಸುತ ಸತ್ಯಮೇವ ತತ್ ಓಂ |೧೦೭|

| ಇತಿ ಶ್ರೀಸ್ವಾಪ್ನವೃಂದಾವನಾಖ್ಯಾನೇ ಅಲೌಕಿಕ ವಿಭಾಗೇ
ಭಜನಪರ್ವಣಿ ತ್ರಿತೀಯಾಧ್ಯಾಯ: ಸಮಾಪ್ತ: |

| ಶ್ರೀ ಅಶ್ವಿನೀಹಯಗ್ರೀವಾತ್ಮಕ ಕೃಷ್ಣಾರ್ಪಣಮಸ್ತು |

04. Svaapnavrundavanakhyana