02. Svaapnavrundavanakhyana

Composer : Shri Vadirajaru

| ಅಥ ದ್ವಿತೀಯಾಧ್ಯಾಯಃ |

ವಿಪ್ರಪ್ರಕರಣಮ್ | ಶ್ಲೋಕಾ: [೧-೬೮]

ಹರಿಃ ಓಂ |

ಇಂದ್ರೋಽಪಿ ಸಾಂದ್ರ ಸಂತೋಷಾತ್ ಉಪೇಂದ್ರೇಣ ಸಹಾಗತಃ |
ವೃಂದಾವನಗತಂ ದೇವಂ ಚಂದ್ರವದ್ ರಂಜನಂ ದಿಶಃ |೧|

ನತ್ವಾ ತಸ್ಮೈ ಸ್ತುತಿಂ ಕೃತ್ವಾ ದತ್ವಾ ತಸ್ಮೈ ಕರಂ ತ್ವರನ್ |
ಶ್ರುತ್ವಾ ತಸ್ಯ ಕಥಾಮುಕ್ತ್ವಾ ವೃತ್ರಾಸುರ ವಧಂ ತಥಾ |೨|

ವಿನಿರ್ಗತಃ ಪುನಃ ಸ್ವರ್ಗಂ ಗುರ್ವಗ್ನಿ ಸಹಿತಃ ಸ್ವರಾಟ್ |
ಗಂಧೇನ ಚರ್ಚಿತಶ್ಚೋಗ್ರಂ ದುರ್ಗಂಧಂ ತೇನ ವಾರಯನ್ |೩|

ಇತ್ಥಂ ಚಾಗ್ನಿಸ್ತಿಗ್ಮ ತೇಜಾಃ ಮಗ್ನಶ್ಚಾನಂದ ವಾರಿಧೌ |
ಭಗ್ನೇ ಚ ಯಜ್ಞಕೃತ್ಯೇ ಚ ನಿರ್ಮಾಲ್ಯಂ ಜಗ್ಮಿವಾನ್ ಹರೇಃ |೪|

ಯಮಶ್ಚ ಯಮುನಾಭ್ರಾತಾ ಕಮನೀಯಂ ಹರಿಂ ಪ್ರತಿ |
ರಮಾಪತಿಂ ಮಮ ಸ್ವಾಮಿನಂ ನನಾಮಾಽಗತಃ ಸ್ವಯಂ |೫|

ನಿವೇದ್ಯ ಸ್ವಾಧಿಕಾರಂ ತು ದುರ್ಜನಾನಾಂ ಚ ಬಾಧಕಂ |
ಸಾಧಕಂ ಸಿದ್ಧ ಧರ್ಮಾಣಾಂ ಸಂಪದಾಂ ತಂ ಪ್ರಣಮ್ಯ ಚ |೬|

ಜಗಾಮ ನಿಮಿಷೇಣಾಯಂ ಸ್ವಾಲಯಂ ಕಾಲಯನ್ನರೀನ್ |
ಪಾಲಯನ್ ಶೀಲ ವೃತ್ತಾನಾಂ ತ್ಯಾಜಯನ್ ದುರ್ಜನಾನ್ ಸುಖಾತ್ |೭|

ವರುಣೋ ವಾಯುನಾ ಸಾರ್ಧಂ ಲೋಕಾಧಿಪತಿನಾ ಗುಣಿನ್ |
ಶರಣಂ ಪ್ರಾಪ ಮದ್ವೃಂದಾವನೇ ಶ್ರೀರಮಣಂ ಶ್ರುಣು |೮|

ಸ್ವಾಧಿಕಾರಂ ನಿವೇದ್ಯಾಸ್ಮೈ ಗಂಗಾದಾರ ಉದಾರಧೀಃ |
ಸದಾರಃ ಪ್ರಯಯೌ ಧೀರಃ ಸುಧಾ ಸ್ರಾವ್ಯಾತಪತ್ರಗಃ |೯|

ಕುಬೇರೋ ನರವಾಹಂ ಚ ನಿರ್ರುತಿಂ ತ್ವರಯಾ ರಯನ್ |
ಗರ್ಹಯನ್ ಪುರತಃ ಶೀಘ್ರಂಆಸಸಾದ ರಮಾಪತಿಂ |೧೦|

ಸ್ವಾಧಿಕಾರಂ ನಿವೇದ್ಯಾಸ್ಮೈ ಪ್ರಸಾದಂ ಶಿರಸಾ ಧರನ್ |
ಸದಾರಃ ಪ್ರಯಯೌ ಶೀಘ್ರಮುದಾರಃ ಸ್ವಪುರಂ ನರೈಃ |೧೧|

ರುದ್ರೋಽಪಿ ವೀರಭದ್ರೇಣ ಶೂದ್ರ ಮೋಹನ ರೂಪಿಣಾ |
ಕಾದ್ರವೇಯಾದಿಭಿಃ ಸಾರ್ಧಂ ದ್ರುತಮಾಯಾದ್ ರಮಾಪತಿಂ |೧೨|

ಮದ್ವೃಂದಾವನ ಮಧ್ಯಸ್ಥಂ ಸದ್ವೃಂದೈರನ್ವಿತೋನಮತ್ |
ತದ್ವೃಂದಾವನಗಂ ಗೋಪಂ ಮದ್ವೃಂದಾವನ ಮಧ್ಯಗಂ |೧೩|

ದೃಷ್ಟ್ವಾ ಚ ವಿಸ್ಮಿತೋ ಭೂತ್ವಾ ಸ್ವನಾಥಂ ರಾಮಮೇವ ಚ |
ಅತ್ಯಂತಂ ಸ ತು ಸಂತೋಷಭರಿತೋ ಭರತೋ ಯಥಾ |೧೪|

ಬಭೂವ ಸ ತು ರುದ್ರೋಽಪಿ ಸ ರುದ್ರತ್ವಂ ಜಹಾವಿಹ |
ರೂಪಾಂತರೇಣ ಕೈಲಾಸಂ ಯಯೌ ರೂಪಾಂತರೇಣ ಚ |೧೫|

ಅತ್ರಾಪ್ಯಂತರ್ಗತಂ ರಾಮಂ ಭಜತೇ ನಿಜ ಸೇವಯಾ |೧೬|

ಏವಂ ಸರ್ವೇಪಿ ದೇವಾಶ್ಚ ಸ್ವ ಸ್ವ ಯೋಗ್ಯ ಹರಿಂ ಪ್ರಭುಂ |
ಭಜಂತೇ ನಿಜ ಸೇವಾಭಿಃ ಭಕ್ತಿ ಮಂತೋಽತ್ರ ನಾನ್ಯಥಾ |೧೭|

ಇತ್ಥಮಷ್ಟದಿಶಾಂ ಪಾಲೈಃ ಕೃತ ವೈಭವ ಮಂಜಸಾ |
ಮಂಜು ಮದ್ವೃಂದಾವನಸ್ಯ ಶ್ರುತ್ವಾಽಽನಂದಂ ಸ ಯಾತಿ ಚ |
ತಸ್ಮಾದ್ ವೃಂದಾವನಮಿದಂ ಸರ್ವಾಭೀಷ್ಟಪ್ರದಂ ಸದಾ |೧೮|

ಭೇರೀ ಶಂಖ ಮೃದಙ್ಗೈಶ್ಚ ಪಣಹಾನಕ ಗೋಮುಖೈಃ |
ಕಹಾಳ ತಾಳ ಸಂಮಿಶ್ರೈಃ ದುಂದುಭೇಃ ಸಿಂಧುನಿ:ಸ್ವನೈಃ |೧೯|

ತೌರ್ಯತ್ರಿಕೈಃ ನೃತ್ತ ಗೀತೈಃ ವಾದಿತ್ರೈರ್ಭೃತ್ಯ ಸಂಸ್ತವೈಃ |
ಭಾತಿ ತ್ರಿವಿಕ್ರಮೋಽಯಂ ಮೇ ಮನೋರಥ ಮಹೋತ್ಸವೇ |೨೦|

ಪುರೋಡಾಶಾತನೈಃ ಸಮ್ಯಗೀಡಿತಃ ಕ್ರೀಡಯಾ ಹರಿಃ |
ರಥಸ್ಥ ಗರುಡಾರೂಢೋ ದೇವರಾಟ್ ಭಾತಿ ನಿಶ್ಚಯಾತ್ |೨೧|

ಚತುರ್ವೀಥೀಷು ಭೃತ್ಯೇನ ಕಾರಿತಃ ಸುವಿಶೇಷತಃ |
ರಥೇ ಗಚ್ಚನ್ ಮಮ ಮನೋರಥೈಃ ಕೃತ ಮಹೋತ್ಸವೇ |೨೨|

ಮಹಾ ಪ್ರದೀಪಾವಲಿಭಿಃ ಕೋಲಾಹಲ ಮಹಾಸ್ವನೈಃ |
ಕೃತೈಃ ಕರತಲೈಃ ಶಬ್ದೈಃ ಭಾತಿ ಭಕ್ತ-ಸುಪಾಲಕಃ |೨೩|

ದೇವ ದುಂದುಭಯೋ ನೇದುಃ ಜಗುರ್ಗಂದರ್ವ ಕಿನ್ನರಾಃ |
ನನೃತುಶ್ಚಾಪ್ಸರ: ಶ್ರೇಷ್ಠಾಃ ರಥಸ್ಥೇ ಚ ತ್ರಿವಿಕ್ರಮೇ |೨೪|

ದಿವಾ ದಿನಕರಾಯುತ ಪ್ರಭಃ ಪ್ರಿಯಾನ್ವಿತಃ ಪ್ರಭುಃ |
ರಥೋಪರಿ ಪ್ರಯಾತೀಹ ಪ್ರಕೀರ್ಣ ವಿಧಿಷು ಪ್ರಿಯಃ |೨೫|

ವಿಮಾನಂ ಸಂಸ್ಪೃಶಂತೀಹ ಸುಮಾನವ ಮಮಾಪ್ಯಹೋ |
ವಿಸರ್ಜಿತಾ ಇಮೇ ಬಾಣಾ ನಾರಾಯಣ ರಥೋತ್ಸವೇ |೨೬|

ಬ್ರಹ್ಮ ರುದ್ರೇಂದ್ರ ಪೂರ್ವೈಶ್ಚ ಗೀರ್ವಾಣೇಂದ್ರೈರಪೀದೃಶಃ |
ಮಹೋತ್ಸವೋ ನ ಸಂದೃಷ್ಟಃ ಕರ್ಮಂದೀಂದ್ರ ಕೃತೋತ್ಸವೇ |೨೭|

ಸಂತೋ ವಸಂತವಾರೀಣಿ ನಾರಾಯಣ ರಥೋತ್ಸವೇ |
ಸುವರ್ಣ ಕುಂಭೈರಾನೀಯ ಚಾಂಭೋಧಿಶಯನಂ ಹರಿಂ |೨೮|

ಸ್ನಾಪಯಾಮಾಸು ರಾಶ್ವೇನಂ ಪ್ರಾಶ್ನಿಕೈರಪಿ ಕಾರ್ತ್ಸ್ನೈತಃ |
ಸ್ನಾನೇನ ಶುದ್ದ ವೃದ್ಧಾಸ್ತೇ ತತ್ರ ಸಂಪ್ರಶ್ನ ಕೋವಿದಾಃ |೨೯|

ಸಂತೋ ವಸಂತಂ ಅಭ್ಯುದವಸ್ಯಂತೀತಿ ಶ್ರುತಿಪ್ರಿಯಾಃ |
ಸಂತತಂ ಚಕ್ರಿರೇ ಸರ್ವೇ ವಸಂತೇನಾಂತಿಮೋತ್ಸವಂ |೩೦|

ಸ ಕುಙ್ಕುಮರಸೈಃ ಸ್ನಿಗ್ಧೈ ಮಹಾರಜನ ವಾರಿಭಿಃ |
ಕಸ್ತೂರೀ ಕರ್ಪುರಾದ್ಯೈಸ್ತೈಃ ಮಿಶ್ರಿತೈರ್ಹಿಮ ವಾರಿಭಿಃ |೩೧|

ದಿವ್ಯಗಂಧೋದಕೈರಙ್ಗ ದಿವ್ಯ ಮಂದಾರ ಗಂಧಿಭಿಃ |
ದಿವ್ಯ ದ್ರವ್ಯ ಸಮಾಯುಕ್ತೈಃ ದಿವ್ಯ ಕುಂಭ ಪ್ರಪೂರಿತೈಃ |೩೨|

ದಿವಿಜಾ ದಿವಿಜೇಂದ್ರಾಗ್ರೇ ದಿವಿ ರೇ ವೈ ದಿವೋತ್ಸವೇ |[ದೇವೈರಿವೋತ್ಸವೇ]
ದಿವಾಕರೇ ಸಮುದಿತೇ ದಿವಿ ದೇವೋತ್ತಮಾಜ್ಞಯಾ |೩೩|

ಧರ್ಮರಾಜ ಕೃತೇ ರಾಜಸೂಯೇ ರಾಜಪುರೋಹಿತಾಃ |
ರಾಜಾನಃ ಸದ್ವಿಜಾಶ್ವ ಅವಭೃತಂ ಸಸ್ನುರ್ಯಥಾ ತಥಾ |೩೪|

ಜಗುರ್ಗಂಧರ್ವ ಪತಯೋ ಗಾಂಧರ್ವೇ ಚ ವಿಶಾರದಾಃ |
ನನೃತುಶ್ಚಾಪ್ಸರ ಶ್ರೇಷ್ಠಾ ನೃಸಿಂಹಸ್ಯ ಮಹೋತ್ಸವೇ |೩೫|

ದೇವ ದುಂದುಭಯೋ ನೇದುಃ ವಂದಿನೋ ವಂದನೋತ್ಸುಕಾಃ |
ನಂದನಾದ್ಯ ಶ್ರುಣುಷ್ವೇಹ ಶತಾನಂದ ಮಹೋತ್ಸವೇ |೩೬|

ವಾಗೀಶ ಪೂರ್ವಕಾ: ಸರ್ವೇ ಸಸ್ನುಶ್ಚಾವಭೃತಂ ತತಃ |
ಏವಂ ದೇವಾಶ್ಚ ದೇವ್ಯಶ್ಚ ರಥೋತ್ಸವವರೇ ಹರೇಃ |೩೭|

ದಿವಾಕರೇ ಸಮುದಿತೇ ದಿವಿ ದೇವೋತ್ತಮಾಜ್ಞಯಾ |
ಧರ್ಮರಾಜ ಕೃತೇ ರಾಜಸೂಯೇ ರಾಜಪುರೋಹಿತಾಃ |
ರಾಜಾನಃ ಸದ್ವಿಜಾಶ್ಚ ಅವಭೃತಂ ಸಸ್ನುರ್ಯಥಾ ತಥಾ |
ಇಮಂ ಸಾರ್ಧಂ ಚ ಶ್ಲೋಕಂ ಚ ತ್ಯಕ್ತ ವಾನಸಿ ವಿಪ್ರಕ |
ಪಾಕಶಾಸನ ಲೋಕಂ ಚ ನಾಕಿಭಿರ್ನೀಯತೇ ಕೃತಿಃ |೩೮|

ಅತಃ ಪ್ರಮಾದೋ ಮಾ ತೇ ಮೇ ಕುಮಾರಂಸ್ಮರ ಬ್ರಾಹ್ಮಣ |
ಸುಮಾನವಂ ಪ್ರಭಾವಂತಂ ಕ್ರಮಾನ್ ಮತ್ಸಾಮ್ಯ ಸಙ್ಗಮಂ |೩೯|

ತ್ರಿಕೋಟಿ ಯತಿಷು ಶ್ರೇಷ್ಠ ಮಕುಟೇನಾಂಕಿತ ಪ್ರಿಯ: |
ಸೋಹಂ ಸಮೀಡಿತಗತಿಃ ಪಾಠಕೈಃ ಶಿಷ್ಟ ನಾನ್ಯಥಾ |೪೦|

ಪಶ್ಯಾಮಿ ಚಾಽಕಾಶ ವಿಮಾನ ಕೋಶೇ
ನಾಕೀಶಮಿತ್ಥಂ ಸುತ ಸತ್ಯಮೇವ |
ಕೀನಾಶ ಲೋಕಸ್ಯ ಚ ನಾಶಕೋಹಂ
ತೋಕಸ್ಯ ಸೇವಾಂ ಕುರು ಸರ್ವದೈವ |೪೧|

ಇತಃ ಪರಂ ಕುರು ಸುತ ಮಮ ಪುಣ್ಯ ದಿನಂ ಮಹತ್ |೪೨|

ಗದಾಭೃತಃ ಸದಾ ಪಾದಂ ಹೃದಾ ಧ್ಯಾಯೇ ಮುದಾ ಭಜೇ |
ಬುಧಾದೃತಂ ಕದಾಚಿದ್ ವಾಽಪದಾಸಲ್ಯ ಮದಾ ನ ಮೇ |೪೩|

ಏವಂ ಮಹೋತ್ಸವವರಂ ಶ್ರುತ್ವಾ ಸರ್ವೇಪಿ ವರ್ಣಿತಂ |
ಕರ್ಣಾಮೃತಂ ಮಹಾಭಾಗ ಕೃತಾರ್ಥಾಸ್ತೇ ನ ಸಂಶಯಃ |೪೪|

ಶ್ರದ್ಧಾನ್ವಿತೋ ಹಯಗ್ರೀವ ಭಕ್ತಸ್ಯ ಸುಮಹಾತ್ಮನಃ |೪೫|

ಹೇ ನಂದನಽಆನಂದಪೂರ್ಣೋ ಭವಾಮಿ ತವ ದರ್ಶನೇ |
ಕಂದಾಶನ ಸಹಾಯೇನಮಂದ ವೃಂದಾವನೇಽನಿಶಂ |೪೬|

ತಸ್ಮಾತ್ ತ್ರಿಕೂಟ ಯತಿಭಿಃ ತ್ರಿವಿಕ್ರಮ ರಥೋತ್ಸವೇ |
ತ್ರಿವೇದ ವೇದ್ಯಂ ದೃಷ್ಟ್ವಾ ಚ ತ್ರಿವಾರಮಪಿ ನೈವ ಮೇ |೪೭|

ತೃಪ್ತಿರ್ನ ಜಾತಾ ಮಜ್ಜಾತ ಕುಬ್ಜಾಪತಿಪರಾಯಣ |
ಧಿಗ್ ಜಾಡ್ಯಂ ತು ಪ್ರಜಾನಾಂ ಚ ನ ಜಾತು ಮಮ ಸಾಮ್ಯಗಾಃ |೪೮|

ತ್ವಾಂ ವಿನಾ ಸಾಮ್ಯ ಸಂಯುಕ್ತಂ ಮಾಂ ವಿನಾ ಕಾಮ್ಯಮಾಗತಂ |
ಕೋ ಮಾನವೋ ನ ಜಾನಾಮಿ ವಿಮಾನೇ ಮಮ ಸಾಮ್ಯಗಃ |೪೯|

ತಸ್ಮಾನ್ಮಯಿ ತ್ವಮಪ್ಯತ್ರ ಹ್ಯಮುತ್ರಾಪಿ ತ್ರಿವಿಕ್ರಮೇ |
ಸುತ್ರಾಮ ಪೂಜತೇ ಪುತ್ರ ಭಕ್ತಿಂ ಕುರು ಗುರೂದಿತಾಂ |೫೦|

ಇತಃ ಪರಂ ಪಾರಿಬರ್ಹಂ ದಾತುಮರ್ಹಸಿ ಮೇಽರ್ಹತಃ |
ಗರ್ಹಿತಂ ನಾರ್ಹಯಾಮ್ಯದ್ಧಾ ಬರ್ಹಿಷದ್ಧರ್ಷಣಂ ಕುರು |೫೧|

ಇತಃ ಪರಂ ಪಾರಿಬರ್ಹಂ ಗರ್ಹಿತಂ ದಾತು ಮರ್ಹಸಿ
ನ ಮೇಽರ್ಹಂತೋ ಬರ್ಹಿಷದಾಂ ಹರ್ಷಂ ಕುರು ಗುರೂಕ್ತಿತ: |೫೨|

ಸುಖೀಭವ ಸಖಾಯಂ ಮಾಂ ಮಖಾಗ್ರೇಣಾಪಿ ಪೂಜಯ |
ಶಿಖಾರಹಿತ ತೇ ದುಃಖಾವಾಪ್ತಿರ್ನ ಚ ನಖಾದಪಿ |೫೩|

ನರಕೇ ನರಕಾಂತಂ ಚ ಸ್ಮರ ತ್ವಂ ನರಕೇಸರಿಂ |
ಗುರೋರ್ಮಮಾಪಿ ಕಾರುಣ್ಯಂ ಗ್ರಹಾಣೇಹ ಸುಪುತ್ರಕ |೫೪|

ಹೇ ನಂದನ ಭೋಜನಂ ಮೇ ಜಾತಂ ಕರ್ಮಂದಿಭಿಃ ಶನೈಃ |
ವೃಂದಾವನ ಪತೇಃ ಸಮ್ಯಙ್ ಮೃಷ್ಟಾನ್ನಂ ಮಮ ತದ್ದಿನೇ |೫೫|

ಅತಸ್ತ್ರಿಕೋಟಿಯತಿಭಿಃ ಪ್ರೀತೋಸ್ಮಿ ತವ ಪುತ್ರಕ |
ತ್ರಿವಿಕ್ರಮೋಽಪಿ ಸುಪ್ರೀತಶ್ಚಾಽಸೀತ್ ತ್ವದ್ಭಕ್ತಿ ಸತ್ಕೃತಃ |೫೬|

ಹೇ ವಿಪ್ರ ಮಮ ಪುತ್ರಸ್ಯ ಪ್ರಸಿದ್ಧಿಃ ಸುಪ್ರತಿಷ್ಠಿತಾ |
ಪ್ರಜಾಸು ಪ್ರಾಪ್ತ ಕಾಮೋಽಹಮಭವಂ ನಾತ್ರ ಸಂಶಯಃ |೫೭|

ಬ್ರಹ್ಮೇಶ ಶಕ್ರ ಮರುದಂಶ ಭವೈ: ಸುರೇಂದ್ರೈಃ |
ದೇವೈ: ಸಮಸ್ತ ಯತಿಭಿಃ ಪತಿಭಿ: ಸುರಾಣಾಂ |
ದೃಷ್ಟ್ವಾರಥೋತ್ಸವವರಂ ಸುರವರ್ಯ ಕಾರ್ಯಂ |
ಸ್ವರ್ಯಾಮಿ ಶಶ್ವದವನಾತ್ ಸುಚಿರಾಯ ಜೀವ |೫೮|

ಮಮ ವೃಂದಾವನಂ ಧೀಮನ್ ಕಂದಾಶನ ಮದಾಂಜನಂ |
ಸದಾನಂದಂ ದದಾಮೀತಿ ವದನ್ ಕರ್ಮಂದಿ ನಾಮಭೂತ್ |೫೯|

ಅತಃ ಕರ್ಮಂದಿಭಿರ್ವಂದ್ಯಂ ವಂಧ್ಯಾನಂದನದಂ ಬುಧ |
ಗಂಧದ್ವಾರಾಽಽನಂದದಂ ಚ ಮುಕುಂದಸ್ಯಾಪಿ ನಂದನ |೬೦|

ಯತಯಃ ಕೃತಿನೋ ವೃತ್ತ ಪ್ರವೃತಾಃ ಶಾಸ್ತ್ರವಿತ್ತಮಾಃ |
ಅಮತ್ತಾ ಅಪತಂತೀಹ ಸತೀ ಚ ಸ್ವಪತಿಂ ಯಥಾ |೬೧|

ತಸ್ಮಾದ್ಯತಿ ಕುಲೈಃ ಸೇವ್ಯಂ ಮತಂ ಲೈಂಗಿಕ ಮಾರ್ಗಿಭಿಃ |
ಕೃತಾಲೌಕಿಕ ಕೃತ್ಯೈಶ್ಚ ವೃಥಾ ಲೌಕಿಕ ವಾರ್ತಿಕಾ |೬೨|

ಕುತಃ ಸತ್ಯಂ ತಪಸ್ತಪ್ತಂ ಜಪ್ತಂ ದತ್ತಂ ಮತಂ ತಥಾ |
ವೃಥಾಯತ ಕೃತಾಚಾರಾಃ ಯೇ ನ ಸೇವಂತಿ ಸಾತ್ವತಂ |೬೩|

ತಸ್ಮಾದ್ ವೃಂದಾವನಸ್ಥಂ ಚ ಸಾತ್ವತಾಂ ಪತಿಮವ್ಯಯಂ |
ಗೋಪತಿಂ ಗೋಕುಲಪತಿಂ ಗೋಪೀನಾಂ ಪತಿಮಾ ಪತೇತ್ |೬೪|

ಓಂ ಏತತ್ಸರ್ವಂ ಸ್ವಾಪ್ನಪದ್ಯೇನ ಗರ್ವಂ ಹಿತ್ವಾ ಸರ್ವೇ ವಿಪ್ರವರ್ಯಾಸ್ಯಜೇನ |
ಶೃತ್ವಾ ಚೋರ್ವ್ಯಾಂ ಶರ್ವ ಗುರ್ವಾದಿ ದೇವಾನ್
ದೃಷ್ಟ್ವೋರ್ವಶಿಂ ಯಾಂತು ಮಾಂ ಮಾನವೇಂದ್ರಾಃ |೬೫|

ಇದಂ ವೃಂದಾವನಾಖ್ಯಾನಂ ಯೇ ಪಠಂತಿ ಮನೀಷಿಣಃ |
ಮುಕುಂದಾವನಮೇವಾಸ್ತು ತೇಷಾಂ ಕಂದಾಶನಾಜ್ಞಯಾ |೬೬|

ಇದಮರ್ಪಿತಮೇವಾಸ್ತು ಹಯಶೀರ್ಷಸ್ಯ ಪಾರ್ಷದಾತ್ |
ಸಮಂ ಸಹಸ್ರಶೀರ್ಷಸ್ಯ ಸೂಕ್ತಸ್ಯ ಪುರುಷಾತ್ ಕೃತಮ್ |೬೭|

ಯಚ್ಛ್ರುಣ್ವತಾಂ ಭಕ್ತಿರುದಾರಸದ್ಗುಣೇ ಹರೌ ಹರೇರ್ಲೋಕಗತೇ ತಥಾ ಮಯಿ |
ಭವತ್ಯಹೋ ಸರ್ವಶುಭಾಪ್ತಿಸನ್ಮತೀ ದದಾತ್ಯಜಸ್ರಂ ಸುತ ಸತ್ಯಮೇವ ತತ್ ಓಂ |೬೮|

| ಇತಿ ಶ್ರೀ ಸ್ವಾಪ್ನವೃಂದಾವನಾಖ್ಯಾನೇ ಅಲೌಕಿಕ ವಿಭಾಗೇ
ಭಜನಪರ್ವಣಿ ದ್ವಿತೀಯಾಧ್ಯಾಯ: ಸಮಾಪ್ತ: |

| ಶ್ರೀ ಅಶ್ವಿನೀಹಯಗ್ರೀವಾತ್ಮಕ ಕೃಷ್ಣಾರ್ಪಣಮಸ್ತು |

03. Svaapnavrundavanakhyana