04. Svaapnavrundavanakhyana

Composer : Shri Vadirajaru

| ಅಥ ಚತುರ್ಥಾಧ್ಯಾಯಃ |

೧. ವಾದಿರಾಜ ಭಟ್ಟ ಪ್ರಕರಣಮ್ | ಶ್ಲೋಕಾ: [೧-೨೨]

ಹರಿಃ ಓಂ |

ವಾದಿರಾಜಾಖ್ಯ ಸನ್ಮಂತ್ರಂ ಸದಾ ಭಜ ಮದಾದ್ ವಿನಾ |
ಕದಾಽಪಿ ತವ ದಾಸತ್ವೇ ಸಂಶಯೋ ನ ವದಾಽದರಾತ್ |೧|

ನೂಪುರೇ ತೂಪರಿ ಪ್ರಾಪ್ತೇ ಶ್ರೀ ಪರೀತೇ ಚ ರೂಪಿತೇ |
ಕಾಪರಿಕ್ಷಾ ಪರೇಶೇನ ಚಾಪರೈರ್ಯಾ ನಿರೂಪಿತಾ |೨|

ಅಂಙ್ಗದೇ ಭಂಙ್ಗದೇರೀಣಾಂ ಸಂಙ್ಗದೇ ಸರ್ವದಾ ಹರೇಃ|
ಅಂಙ್ಗದೇಶೇ ವಿರಾಜೇತೇ ತುಂಙ್ಗಹೇಮ ಮಮಾಂಙ್ಗಜ |೩|

ಮಮಕೇಯೂರ ಮಪ್ಯೇತತ್ ವಾಯೂರೂಪಂ ಶಿವಾಯುತಂ |
ಮಯೂರರವತೋ ನಿತ್ಯಂ ವಾಯುತ್ವಂ ತಸ್ಯ ವಕ್ತ್ಯಹೋ |೪|

ಮುದ್ರಾಂಗುಲೀಯಕಂ ರುದ್ರಾತ್ ಕದ್ರ್ವಾಃ ಪುತ್ರೇಣ ಚಾಽದೃತಂ |
ಅದ್ರಾಕ್ಷಂ ದ್ರಾಗಭದ್ರಾಣಿ ದ್ರಾವಯೇದ್ ರಾಜ್ಯದಂ ದ್ರುತಂ |೫|

ಹಸ್ತಾಂಙ್ಗುಲೀಯಕಂ ಶಸ್ತಂ ಸಮಸ್ತೈಃ ರತ್ನ ನಿರ್ಮಿತಂ |
ಪ್ರಹಸ್ತಾದಪಿ ತಂ ರಾಮಃ ಸ್ವಹಸ್ತಾಚ್ಚ ದದೌ ಮುದಾ |೬|

ವರುಣೋ ದತ್ತ ವಾನ್ಕಾಮಂ ಮರಣಾದ್ ರಹಿತಸ್ಯ ಮೇ |
ಕರಣಂ ಸರ್ವ ರತ್ನಾನಾಂ ಕಿರಣಾದ್ ರಂಜನಂ ದಿಶಃ |೭|

ಜನೈರವೇದ್ಯ ವಿಭವಂ ಸ್ಫುಟೀ ಕರ್ತುಂ ದ್ವಿಜಸ್ಯ ಮೇ
ಕುರು ಮದ್ವಚನಾತ್ ತೋಷಂ ತತ್ತೋಷೇಹಂ ಸುತೋಷಿತಃ |೮|

ಕಟಕಂ ಹಾಟಕಮಯಂ ಮಮ ಸದ್ರತ್ನ ಕೋಟಿಕಂ |
ಕಾಠಕಂ ಪಾಠಕೈರಾಪ್ತಂ ಹಾಟಕಾದ್ರೌ ರವಿಪ್ರಭಂ |೯|

ಗಳೇ ಹಾರಾವಳಿರ್ಭಾತಿ ತಾರಾಣಾಂ ತು ಕಳೇವ ಮೇ |
ಮಿಳಿತಾ ಚೇಂದ್ರನೀಲೈಶ್ಚ ಪುಳಕಾಂಕಂ ಕರೋತ್ಯಹೋ |೧೦|

ಏವಂ ಸದಾಽಸಂಖ್ಯ ಸುಖೈಶ್ಚ ಸಂಯುತೋ
ಮಖೈರ್ದುರಾಪೈರ್ಖಗಮುಖ್ಯ ದೈವತೈಃ |
ದುಃಖೈರಸಂಭಿನ್ನತರೈಶ್ಚ ಶಶ್ವತ್ ಪ್ರಮೋದತೇ
ದೇವವರೋ ಮಯಿ ಪ್ರಭುಃ |೧೧|

ಕಾಂಚನೀಯಾಂಚನೀಯಾಂ ತು ಕಾಂಚನೀಯಾನ್ಮ ಯಾಂಚನಾತ್ |
ಮಾಂ ವಿನಾ ತಾಂ ವಿನಾ ನಾಕೀ ನಾಕಿತ್ವಂ ನೈತಿ ನಾನ್ಯಥಾ |೧೨|

ಚಾಮೀಕರಮಯೇ ಮೇರೌ ಸ್ವಾಮೀ ಕರತಳೇನ ಮೇ |
ಕಾಮೇ ರತಮುನೀನ್ ಹಿತ್ವಾ ಮಾಮೇವಾಗ್ರೇ ಪರಾಮೃಶತ್ |೧೩|

ಮೇರೌ ನಾರಾಯಣೋ ಯಸ್ಯ ಕಾರುಣ್ಯಂ ಮೇ ಪರಾಯಣಂ |
ರಮಾಯಾಃ ಮಾಂ ಕರೇ ಪ್ರಾದಾತ್ ಕುಮಾರೋಽಯಮಿತಿ ಬ್ರುವನ್ |೧೪|

ಮರ್ತ್ಯಲೋಕಂ ತು ಹಿತ್ವಾಽಹಂ ಸತ್ಯಲೋಕಮಿತೋಽಗಮಂ |
ಶ್ರುತ್ಯಭಾವಂ ಕರ್ತುಕಾಮೋ ದೈತ್ಯಃ ಕಶ್ಚಿದ್ಧತೋ ಮಯಾ |೧೫|

ನಾಕೇಽಪಿ ಸರ್ವ ಲೋಕೇಶಾಃ ಪಾಕಶಾಶನ ಪೂರ್ವಕಾಃ |
ಪಿನಾಕೀ ಚ ಮಯಾ ಸಾಕಂ ಶೋಕಹೀನಂ ಚತುರ್ಮುಖಂ |೧೬|

ಗತ್ವಾ ದತ್ವಾ ಕರಂ ತಸ್ಯ ಸ್ತುತ್ವಾ ಶೃತ್ವಾ ಸುಧಾಮಯೀಂ |
ವಾಚಂ ಶೋಚಂತಮಾತ್ಮನಾಂ ಪಾಪ್ಮಾನಂ ಚ ಜಹೂ ರಹಃ |೧೭|

ನರೈಶ್ಚ ದತ್ತಾಚಾರ್ಯತ್ವೇಽಪ್ಯನೇಕಾಪಿ ಸುಮಾನ್ಯತಾ |
ಭವತೀಹ ನ ಸಂದೇಹಃ ತಚ್ಚಿಷ್ಯೈಃ ಸರ್ವಥಾ ಸುತ |೧೮|

ಲೋಕೈಕ ಗುರುಣಾ ದತ್ತಾಚಾರ್ಯತ್ವೇ ತು ನ ಕಶ್ಚನ |
ಮಾನೋ ನ ಜಾತೋ ವಿಪ್ರಸ್ಯ ಚಾತೋ ಹಾಸ್ಯತರಂ ತು ಕಿಂ |೧೯|

ಏವಂ ಹಾಸ್ಯಾಸ್ಪದಂ ಚೈತನ್ನ ಕುರುಷ್ವ ಮಮ ಪ್ರಭೋ |
ವಿಪ್ರಾಂತರ್ಯಾಮಿಣಃ ಪೂರ್ಣ ಪುಣ್ಯಸ್ಯ ತು ಗುಣಾರ್ಣವ |೨೦|

ತ್ವಯಾ ಕೃತೇ ತು ಸನ್ಮಾನೇ ಸರ್ವೇ ಕುರ್ವಂತಿ ಮಾನವಾಃ |
ಮಾನಂ ಮೌನವತಾಂ ಶ್ರೇಷ್ಠಂ ಕುರು ಮಚ್ಛಾಸನಂ ಮುನೇ |೨೧|

ಲೋಕಾನಾಂ ಗುರುಣೋಕ್ತಂ ತು ಶ್ಲೋಕಾನಾಂ ತು ಚತುಷ್ಟಯಂ |
ಕಾಕಾನಾಮಿವ ವಾಕ್ಯಾನಿ ಶೋಕಾನಾಂ ಹರಣೇ ನ ಭೂತ್ |೨೨|

೨. ವಿಪ್ರಪ್ರಕರಣಮ್ | ಶ್ಲೋಕಾ: [೨೩-೫೪]

ಹೇ ಪುತ್ರ ದಿವ್ಯಕಟಿ ಸೂತ್ರ ಶುಭಾಕ್ಷ ಸೂತ್ರ
ಸಚ್ಛಾಸ್ತ್ರ ವೃತ್ತಿಭಿರಹೋ ಪ್ರತಿಭಾಸಿ ಮೇ ತ್ವಂ |
ಮದ್ದತ್ತ ಮಂತ್ರ ಜಪತಃ ಸುಕೃತೈಕಪಾತ್ರ
ವೃತ್ರಸ್ಯ ಶತೃಪದವೀಂ ಜೀತವಾನಿತೀವ |೨೩|

ಅಗ್ರ್ಯಾಸನೇ ಸುನಿಹಿತಂ ಮಮ ಪಾದಪೀಠಂ
ಸಮ್ಯಕ್ ಪ್ರ ಪೂಜ್ಯ ವಿಧಿವತ್ ಪರಮಪ್ರಕಾಶಂ |
ತಸ್ಯಾಗ್ರತಃ ಪರಮದರ್ಶನ ಗುಹ್ಯಸಾರಂ
ವ್ಯಾಖ್ಯೇಯಮೇಯಮನಿಶಂ ಪ್ರದಿಶಾಮಿ ತೇಽದ್ಯ |೨೪|

ಆಯುರ್ವಚಃ ಶ್ರಿಯಂ ಕ್ಷೇಮಂ, ವಿದ್ಯಾಂ ಚ ತವ ಸರ್ವಥಾ
ದಶಗ್ರೀವ ಶಿರೋಹರ್ತಾ ಮಣಿಗ್ರೀವಾಭಯಪ್ರದಃ
ಹಯಗ್ರೀವೋ ಮಮ ಗ್ರೀವಾಭರಣಾನಿ ದದೌ ಮುದಾ |೨೫|

ಸೋದಾಪುರೇಽಪಿ ಹಿ ಸದಾ ಮುದಾ ಮಮ ಗದಾಧರಃ |
ಪಾದಾಂಗುಲೀಯಕಂ ಪ್ರಾದಾದ್ವಾದಾನ್ನಿರ್ಜಿತ ವಾದಿನಃ |೨೬|

ಏವಮಾಭರಣಾನಾಂ ತು ಕಾರಣಾನಿ ಶರೀರಿಣಾಂ |
ಶೃತ್ವಾ ಮಚ್ಛರಣಾನಾಂ ತು ಶ್ರೋತ್ರೂಣಾಂ ಸುಖದಾನಿ ಚ |೨೭|

ಏವಮಾಭರಣಾನ್ಯಾಶಾಃ ಕಿರಣಾದ್ ರಂಜನಾನಿ ಮೇ |
ಶ್ರವಣಾತ್ಸರ್ವ ಪುಣ್ಯಾನಿ ಪ್ರಾಪಯಂತಿ ಮನೀಷಿಣಾಂ |೨೮|

ಇಂದ್ರೋ ಮಮೇಂದ್ರ ನೀರಾಢ್ಯಂ ಸಾಂದ್ರ ನೀಲಾಂಬುದ ಪ್ರಭಂ |
ಉಪೇಂದ್ರೇರಿತ ಹಸ್ತೀಂದ್ರಂ ಚತುರ್ವಂತಂ ದದೌ ಮುದಾ |೨೯|

ತಥೈವ ಶುಭ್ರಾಭ್ರ ಪ್ರಭಾಯುಕ್ತಮೇಕಂ ಪ್ರಬರ್ಹಕಂ |
ಪ್ರದದೌ ಮತ್ಪ್ರಿಯಂ ವಿಪ್ರ ಪ್ರಯುತೌಜಸಮಪ್ಯಹೋ |೩೦|

ಉಭೌ ತೌ ದಂತಿನೌ ಪುತ್ರ ಗಚ್ಛಂತೌ ವೈ ಮಮಾಗ್ರತಃ |
ವಾಯುವೇಗ ಮನೋವೇಗವಂತೌ ಕಾಂತೌ ಮಹೋನ್ನತೌ |೩೧|

ಅಹಂ ತು ಧೃತ್ವಾ ದ್ವೇ ರೂಪೇ ತಾವಾರುಹ ಮಹೋ ಮುನೇ |
ಚರಾಮಿ ಸರ್ವ ಲೋಕೇಶಾನ್ ಕರೋಮಿ ಮಮ ಪೂಜಕಾನ್ |೩೨|

ತಲ್ಲೋಕ ಪತಿಭಿ: ಸಾಕಂ ಸಲ್ಲಾಪೈಃ ಸಹಿತೋಽಗಮಮ್ |
ತೇಷಾಂ ಸಂದರ್ಶಯಾಮ್ಯದ್ಯ ಮದ್ವೃಂದಾವನ ವೈಭವಂ |೩೩|

ವಾಜಿನಂ ಭ್ರಾಜಮಾನಂ ವೈ ದೇವರಾಜಶ್ಚ ಮೇ ದ್ವಿಜ |
ಸಮಾಜೇ ನಿರ್ಜರಾಣಾಂ ತು ಸೌಜನ್ಯಾದ್ ವೈ ದದೌ ಮುದಾ |೩೪|

ತಮಶ್ವಂ ನಿ:ಸ್ವಮಪ್ಯಶ್ವಂ ಶಶ್ವದ್ವಾಯು ಮನೋಜವಂ |
ಸುಸ್ವರಂ ಭಾಸ್ವರಂ ಪಾರ್ಶ್ವೇ ಕಾರ್ತಸ್ವರ ವಿಭೂಷಿತಂ |೩೫|

ಅಹಮಾರುಹಮಾಹಾರ್ಯ ನೀಹಾರಮಿವ ಲಾಘವಾತ್ |
ಮನೋಜವೇನ ಶರ್ವಾದೀನ್ ಸರ್ವಾನ್ ವೈ ದೇವತಾ ಗಣಾನ್ |೩೬|

ಗತ್ವಾ ಶ್ರುತ್ವಾಽಽಗಮಂ ಭೂಮಿಂ ತೈಃ ಸಾಕಂ ನಾಕಿಭಿಃ ಸುತ |
ತೇಷಾಂ ಸಂದರ್ಶಯಾಮ್ಯದ್ಯ ಮದ್ವೃಂದಾವನ ವೈಭವಂ |೩೭|

ಏವಂ ವಿಮಾನಂ ಸನ್ಮಾನಂ ಕೃತ್ವಾ ಮೇ ದಾನವಾಂತಕಃ |
ಭಾನು ತೇಜೋನಿಭಂ ಪ್ರಾದಾತ್ ಕೀನಾಶೇನ ಸುಮಾನಿತಂ |೩೮|

ಕಿಮ್ವಂತಕಾಸೀತಿ ವಾಕ್ಯಾತ್ ನಹ್ಯಂತಕ ಭಯಂ ಚ ಮೇ |
ಇತಿ ಬುಧ್ಯಾ ಮಯಾ ಚೋಕ್ತಂ ಕೀನಾಶೇನ ಸಮಾನಿತಂ |೩೯|

ಅಹಂ ದೇದೀಪ್ಯಮಾನೇ ಚ ವಿಮಾನೆ ಮಾನವೋತ್ತಮ |
ಮಾನಿತಃ ಸುಮನೋಭಿಶ್ಚ ಕನಕಾಂಬರ ಭೂಷಣೈಃ |೪೦|

ತದ್ಗತಾನಾಂ ತು ದೇವಾನಾಂ ಮದ್ಗತೈಕ ಮನೋಯುಜಾಂ |
ತೇಷಾಂ ಸಂದರ್ಶಯಾಮ್ಯದ್ಯ ಮದ್ವೃಂದಾವನ ವೈಭವಂ |೪೧|

ನಾನಾ ವಾಹನ ಸಂಸ್ಥೋಹಂ ನಾನಾ ಮಾನೈಃ ಸುಮಾನಿತಃ |
ನಾನಾಮಣಿ ಗಣೈರ್ನಿತ್ಯಂ ನಾನಾ ಮುನಿಗಣೈಸ್ತಥಾ |೪೨|

ಗಂಧರ್ವೈರಪ್ಸರೋಭಿಶ್ಚ ಕಿನ್ನರೋರಗ ರಾಕ್ಷಸೈಃ |
ಸಿದ್ಧೈಃ ಸಾದ್ಧ್ಯೈರ್ಮರುದ್ಬಿಶ್ಚ ಬದ್ಧಸ್ನೇಹೈಃ ಸುಬುದ್ಧಿಭಿಃ |೪೩|

ಕಿಮತ್ರ ಬಹುನೋಕ್ತೇನ ಮದ್ವೈಭವ ಸಮೋ ನ ಹಿ |೪೪|

ಏವಂ ಮಹಾ ವೈಭವಮೇವ ಭೋಕ್ಷ್ಯೆ ಸಬಾಸುಭಾಸ್ವತ್ ಪ್ರತಿಮಂ ಋಭೂಣಾಂ |
ಮಹಾನುಭಾವಸ್ಯ ಮಧುದ್ವಿಷಃ ಸದಾ ಭಕ್ತಸ್ಯ ಕಿಂ ಚಿತ್ರಮಮುತ್ರ ವೈಭವೆ |೪೫|

ಏತತ್ ತೇ ಲೇಶತಶ್ಚೋಕ್ತಂ ಮಮ ವೈಭವ ರಾಶಿತಃ |
ಸಾಕಲ್ಯಾದ್ ವಕ್ತುಮೇವಂ ತೇ ನಾಲಂ ವರ್ಷಶತೈರಪಿ |೪೬|

ಯ ಏತದ್ ವೈ ಶೃಣೋತ್ಯದ್ಧಾ ಶ್ರದ್ಧಾಯುಕ್ತೋ ಬುಧಾಗ್ರತಃ |
ಮದ್ಧಾಮ ಪದ್ಧತಿಂ ಯಾತಿ ಬದ್ಧಬಾವೋ ಮಧುದ್ವಿಷಿ |೪೭|

ಬ್ರಹ್ಮಣೋ ದಕ್ಷಿಣಾಂಸಂ ತು ವಾಯೋರ್ವಾಮಾಂಸಮೇವ ಚ |
ಗೃಹ್ಯ ಸವ್ಯೇತರಾಭ್ಯಾಂ ಮೇ ಪಾಣಿಭ್ಯಾಂ ಸಂಸ್ಥಿತೋಽಭವಂ |೪೮|

ಬ್ರಹ್ಮಣೋ ದಕ್ಷಿಣೇ ಕರ್ಣೇ ವಾಯೋಃ ಕರ್ಣೇ ತು ವಾಮಕೇ |
ಸಂವಿದಂ ತು ಕರೋಮ್ಯದ್ಯ ವಿಷ್ಣೋಸ್ತತ್ವಸ್ಯ ನಿರ್ಣಯೇ |೪೯|

ರಮಾಪತೇಃ ಕರಂ ಗೃಹ್ಯ ಸಂಚರಾಮಿ ರಮಾಮಿ ಚ|
ಶ್ವೇತದ್ವೀಪೇ ಬುಧಾಲಾಪೇ ಸದಾ ಪಾಪಹರೇ ಪರೇ |೫೦|

ಶ್ವೇತದ್ವೀಪೇಽರ್ಣವಾನೂಪೇ ಸಮೀಪೇ ಶ್ರೀಪತೇರಭೂತ್
ಸುಧಾರೂಪೇ ಕರಾರೋಪೇ ಶರೀರೇ ಪುಲಕಾಂಚನಂ |೫೧|

ಅತೋ ಮಯಾ ಚ ಪೂರ್ವೇದ್ಯುರ್ನೋಕ್ತಂ ಸ್ವಪ್ನೇ ತವ ದ್ವಿಜ |
ಮತ್ಪುತ್ರಚರಣಾಂಭೋಜಂ ಭಜ ಮುಕ್ತಿರ್ಭವಿಷ್ಯತಿ |೫೨|

ಮದ್ವೃಂದಾವನ ಮಧ್ಯಸ್ಥಂ ತದ್ವೃಂದಾವನಚಾರಿಣಃ |
ಯದ್ ಗೋಪಾಲೇತಿ ನಾಮಾಸ್ಯ ತದ್ಗೋಪಾಲಾಃ ಸಮಾಯಯುಃ |೫೩|

ಮದ್ವೃಂದಾವನ ಮಧ್ಯಸ್ಥಂ ಸದ್ವೃಂದಾವನ ಚಾರಿಣಃ |
ಯದ್ವೃಂದಾವನತಾ ಹ್ಯಸ್ಯ ತದ್ವೃಂದಾಶ್ಚ ಸಮಾಯಯುಃ |೫೪|

೩. ವ್ಯಾಸಭಕ್ತ ಶ್ರೋತೃಕ ಪ್ರಕರಣಮ್ | ಶ್ಲೋಕಾ: [೫೫-೮೫]

ಇದಂ ವೃಂದಾವನಾಖ್ಯಾನಂ ಸದಾನಂದಾದಿ ಸಾಧನಂ |
ದ್ವಿಧಾ ವ್ಯಾಖ್ಯಾನವತ್ ಕೃತ್ವಾ ಮಮಾನಂದ ಪ್ರದೋಭವ |೫೫|

ಮನ್ನಂದನ ಮಮಾನಂದಪ್ರದ ಸದ್ವಂದನಾದಿನಾ |
ವಿಲಸದ್ವದನಾಂಭೋಜ ದ್ವಿಜಾನಂದಪ್ರದೋ ಭವ |
ಅಹಂ ತು ಗತ್ವಾ ಚಾಯಾಸ್ಯೇ ಚಿರಂ ಜೀವ ಸುಖೀ ಭವ |೫೬|

ಅಹಂ ಗತ್ವಾ ಬದರ್ಯಾಂ ತು ಕದರ್ಯಾಣಾಂ ಭಯಂಕರಃ |
ಸೋದರ್ಯಾದಾದೃತೋ ನಿತ್ಯಂ ಗಿರಿದರ್ಯಾಂ ವಸಾಮ್ಯಹಂ |೫೭|

ತತ್ರಾಪಿ ದೃಷ್ಟ್ವಾ ಶ್ರೀವಾಸಂ ವ್ಯಾಸಂ ಭಾಸಂತಮಾವಸಂ |
ಪೃಚ್ಛಾಮಿ ತಚ್ಛಾಸನಾನಿ ಸ್ವಚ್ಛಾನ್ ಯಾದೃಚ್ಛಕಾನಿ ಚ |೫೮|

ತತ್ರಾನಂದಾದಿ ಮಾತ್ರೇಣ ಮಾ ತ್ರಾಸಃ ಸಂಸೃತೇಸ್ತ್ವಯಾ |
ಕರ್ತವ್ಯಃ ಸತತಂ ವಿಷ್ಣುಃ ಸ್ಮರ್ತವ್ಯಃ ಸೃತಿನಾಶನಃ |
ಇತಿ ಸಂಭೋದಿತೋ ನಿತ್ಯಂ ಸಂಸಾರಾಂಭೋಧಿ ಭೀತಿತಃ |೫೯|

ಪಾದಮೂಲಮುಪಾಸೇಹಂ ಪಾಪಹಾರಿ ಕೃಪಾಯುಜಃ|
ಇತಿ ಜಾನಂತಿ ಮಾಂ ನಿತ್ಯಂ ಯೇ ನರಾಃ ಪಾಪಶೀಲಿನಃ |
ತೇಷಾಂ ಪಾಪಾನಿ ಹರ್ತಾಽಹಂ ಹಯಗ್ರೀವಸ್ಯ ಚಾಽಜ್ಞಯಾ |೬೦|

ಶಿಷ್ಯಾಣಾಮಯುತೇ ತಸ್ಮಿನ್ ಪುಷ್ಪಾಣಾಂ ಕೃತಮಾಲಿಕಾಂ |
ಪುಷ್ಯರಾಗ ಪ್ರಭಾಂ ದಿವ್ಯಾಂ ತುಷ್ಯನ್ ಮಹ್ಯಂ ದದೌ ಮುದಾ |೬೧|

“ಭಾರತಾರ್ಥಂ ಸಮಾಖ್ಯಾಯ ಮಾರುತೇರಿತ ಬುದ್ಧಿನಾ |
ಕೀರ್ತಿಮಾವೃತ್ಯ ಲೋಕೇಸ್ಮಿನ್ ಮೂರ್ತಿಂ ಪ್ರಾರ್ಥ್ಯಾಮುದಾದದೀಃ |೬೨|

ಯುಕ್ತ್ಯಾಖ್ಯಮಲ್ಲಿಕಾಭಿಶ್ಚ ಭಕ್ತ್ಯಾ ಮತ್ಪಾದಮರ್ಚಯನ್ |
ಕೃತ್ಯಾಽನಯಾ ಸುತುಷ್ಟೋಽಹಂ ಮತ್ಯಾ ಮಾಲಾಂ ದದಾಮಿ ತೇ |೬೩|

ಕ್ಷುತ್ ಕ್ಷಾಮತೃಟ್ ಪರಿಹರ್ತ್ರೀ ದಾತ್ರೀ ಮುಕ್ತೇಶ್ಚ ಪದ್ಧತಿಂ
ಕೃತ್ಯಾಮಯಾ ತು ದತ್ತೇಯಂ ತ್ರಾಯತಾಂ ತ್ವಾಂ ಸದೈವ ತು” |೬೪|

ಇತಿ ಮಾಮುಕ್ತವಾನ್ ವ್ಯಾಸೋ ದಾಸಂ ಭಾಸುರ ವಿಗ್ರಹಃ |
ಮಂದಹಾಸಾನ್ವಿತೋ ನಿತ್ಯಂ ಕಂದಾಶನರತಂ ಮುನಿಂ |೬೫|

ಸುಖೋಪವಿಷ್ಟಃ ಸಂಹೃಷ್ಟಃ ಸುದೃಷ್ಟಿರ್ವಿಷ್ಟರಶ್ರವಾಃ |
ದೃಷ್ಟವಾನ್ ತಪಸಾ ಯುಕ್ತಂ ಪುಷ್ಟಾಙ್ಗಂ ಮಾಂ ಧಿಯೋತ್ಕಟಂ |೬೬|

ಪಸ್ಪರ್ಶ ಪಾಣಿನಾ ಮೇಽಂಙ್ಗಂ ಪ್ರಾಣನಾಥ ಪ್ರಿಯೋ ಹ್ಯಸೌ |
ದ್ವೈಪಾಯನೋ ಮಹಾಯೋಗೀ ವೈಶಂಪಾಯನ ಮಾನಿತಃ |೬೭|

ಯಾದೃಕ್ ಪಾರತ್ರಿಕಂ ವಿಪ್ರಾತ್ ವೈಭವಂ ಭುವಿ ಕೀರ್ತಿತಂ |
ತಾದೃಕ್ ಸಾರ್ವತ್ರಿಕಂ ನೈವ ತಪಸಶ್ಚಾತಿ ದುಶ್ಚರಾತ್ |೬೮|

ನರನಾರಾಯಣೋ ದೇವಃ ವರನಾರೀ ಪರಾಯಣಃ |
ಹರೇ ರಾಮಾಯಣಂ ಸಾರ್ಥಂ ಸ್ವರಾಟ್ ಪಾರಾಯಣಂ ವ್ಯಧಾತ್ |೬೯|

ಕದಳೀವನಮಧ್ಯಸ್ಥಂ ದ್ವಿದಳೀಕೃತ ರಾಕ್ಷಸಂ |
ಸದಳೀಕೃತ ಪಾದಾಬ್ಜಂ ಮದಳೀಕಂ ವಿನಾ ಭಜೇ |೭೦|

ಇತೀಯಂ ಬಾದರೀವೃತ್ತಿಃ ಮಧುರಾಲಾಪ ಚಿತ್ರಿತಾ |
ಧರಿತ್ರೀ ಪಾಪಹಾನಿಂ ಚ ದಾತ್ರೀ ಸತ್ಯಂ ಮಯೋದಿತಂ |೭೧|

ಭಾರತಂ ಭಾರತೀಭರ್ತಾ ಕೀರ್ತಯನ್ ಸೇವತೇ ಹರಿಂ |
ಮಾರುತೋ ಮಾರುತಸ್ತ್ವಂ ಹಿ ನಿತ್ಯಂ ಕೀರ್ತಯ ಭಾರತಂ |೭೨|

ಸಮೀರಣೋ ಜಗತ್ತ್ರಾಣಃ ಕಾರಣಾತ್ ಕುರುನಂದನಃ |
ಭೂತ್ವಾ ರಣಮಣಿಂ ಕೃತ್ವಾ ಹತ್ವಾ ಸರ್ವ ಗುಣಾಧಮಾನ್
ಕೃಷ್ಣಾನಂದಸ್ಯ ಪಾತ್ರಾಣಿ ಪೂರಯಾಮಾಸ ವೀರ್ಯವಾನ್ |೭೩|

ಭೀಮೋ ಮಾಗಧ ಭೀಮಸ್ಯ ಮಾರೋ ಧೀರಪರಾಕ್ರಮಃ |
ರೋದಯಾಮಾಸ ದೇವಾರೀನ್ ಬಾದರಾಯಣ ಸಾದರಃ |೭೪|

ಬಭೂವ ಪ್ರಭಯಾ ಯುಕ್ತಃ ಸ್ವಭಯಾದಭಯಂ ನ ಭೂತ್ |
ಸಭಾಸ್ವಶುಭ ಭಾವಾನಾಂ ಭಾರತೀ ಭಾವಕ್ಷೋಭಿನಾಂ |೭೫|

ಕುತ್ಸಿತಂ ಕೀಚಕಂ ಛಿತ್ವಾ ಪಾಚಕೋ ಯಾಚಕೋ ಯಥಾ |
ಶೋಚಕಃ ಸರ್ವ ದೈತ್ಯಾನಾಂ ಮೋಚಕೋ ವ್ಯಸನಾತ್ ಸತಃ |೭೬|

ಇತಿ ಮಾಮುಕ್ತವಾನ್ ವ್ಯಾಸೋ ದಾಸಂ ಭಾಸುರ ವಿಗ್ರಹಃ |
ಮಂದಹಾಸನ್ವಿತೋ ನಿತ್ಯಂ ವೃಂದೇ ಹಾಸಂ ಸಮರ್ಪಯನ್ |೭೭|

ಇತೀಮಾಂ ಬಾದರೀ ವೃತ್ತಿಮಾದರಾದ್ ಯಸ್ತು ವಕ್ಷ್ಯತಿ |
ಬಾದರಾಯಣಸಂಪ್ರೀತಿಂ ಸಾದರಂ ಯಾತಿ ನಿಶ್ಚಯಾತ್ |೭೮|

ಪೂರ್ಣಪ್ರಜ್ಞಸ್ತು ಮಾಂ ದೃಷ್ಟ್ವಾ ಪೂರ್ಣಂ ಸಂತೋಷ ಸಂಭೃತಃ |
ಪೂರ್ಣಾನಂದಶ್ಚ ವ್ಯಾಸೋಽಪಿ ಪೂರ್ಣಾನಂದಾಸ್ತತೋಽಪರೇ |೭೯|

ಮಾನವಸ್ವಾಮಿನೋ ವಾರ್ತಾಂ ಕಾಮಿನಾಂ ಸ ನಿವೇದ್ಯ ಮೇ |
ಮಾಮೇವ ಪುನರಾಗಂತಾ ಬ್ರಾಹ್ಮಣಃ ಶೃಣು ಮಾಮಕಃ |೮೦|

ರಾಜಭೃತ್ಯೋ ಯಥಾ ವಾರ್ತಾಂ ಸರ್ವೇಷಾಂ ಸನ್ನಿವೇದ್ಯ ಚ |
ಪುನಾ ರಾಜಾನಮೇವೈತಿ ಮನಾಂಸ್ಯಸ್ಯ ಪ್ರಹರ್ಷಯನ್ |೮೧|

ಶುಭಸ್ಯವಾರ್ತಾಮಾಹರ್ತುಃ ಸರ್ವೇ ಕುರ್ವಂತಿ ಮಾನ್ಯತಾಂ
ತಥಾ ಮದ್ವೈಭವಾಹರ್ತುಃ ಸರ್ವೇಕುರ್ವಂತು ಮಾನ್ಯತಾಂ |೮೨|

ಮದ್ವಾರ್ತಂ ಮದ್ಗತಪ್ರಾಣಂ ಬ್ರಾಹ್ಮಣಂ ಪ್ರಾಪಣಂ ಗುಣಾನ್ |
ಯೇಽವಜಾನಂತಿ ನಾಕೀಂದ್ರಭೃತ್ಯಂ ಮದ್ರೋಹಿಣಶ್ಚ ತೇ |೮೩|

ಮದ್ರೋಹಾನ್ನರಕಾನೇವ ಪರಕಾಯ ಪ್ರವೇಶಿನಃ |
ಭೂತ್ವಾ ಭವಿಷ್ಯಂತಿ ಭೂಮೌ ಭೂತ ಪ್ರೇತ ಪಿಶಾಚಕಾಃ |೮೪|

ತಸ್ಮಾತ್ ಕುರ್ವಂತು ಸನ್ಮಾನಂ ಬ್ರಾಹ್ಮಣಾಯತು ಮಾನವಾಃ |೮೫|

೪. ವಾದಿರಾಜ ಭಟ್ಟ ಪ್ರಕರಣಮ್ | ಶ್ಲೋಕಾ: [೮೬-೯೫]

ತನ್ಮಾನೋಽಪಿ ಮಮ್ಯೆವೇಹ, ತದಂತರ್ಯಾಮಿಣೋ ಮುನೇ |೮೬|

ಬ್ರಾಹ್ಮಣಸ್ಯ ಮುಖೇನೈವ ಚೇದಮುಕ್ತಮಿತಿ ಪ್ರಭೋ |
ಮಾ ಕುರು ತ್ವಮ ವಿಶ್ವಾಸಂ, ವಿಶ್ವಾಸಂ ಕುರು ಸರ್ವಥಾ |೮೭|

“ತವ ವೈಭವ ವಿಖ್ಯಾತ್ಯೈ ಭುವಿ ಕೋ ವರ್ತತೇ ಯುವನ್ |
ವದ ತಂ ವದತಾಂ ಶ್ರೇಷ್ಠ ತ್ವವ ತಂ ತ್ವವತಾಂ ವರ |೮೮|

ಶಿಬಿಕಾಮಧಿರೋಪ್ಯಾಽರ್ತಂ ಶುಭವಾರ್ತಾಂ ಚ ವಾಚಕಂ |
ಅಭಯಂ ತಸ್ಯ ದತ್ವಾ ತ್ವಮಭರಸ್ತ್ವಂ ದ್ವಿಜೋತ್ತಮ” |೮೯|

ಇತಿ ಮಾಮುಕ್ತವಾನ್ ವ್ಯಾಸೋ ದಾಸಂ ಭಾಸುರ ವಿಗ್ರಹಃ |
ಮಂದಹಾಸಾನ್ವಿತೋ ನಿತ್ಯಂ ವೃಂದೇ ಹಾಸಂ ಸಮರ್ಪಯನ್ |೯೦|

ತಸ್ಮಾತ್ ದ್ವಿಜಸ್ಯ ಸನ್ಮಾನಂ ಸುಜನೋತ್ತಮ ತಂ ಕುರು |೯೧|

ಓಂ ಏತತ್ಸರ್ವಂ ಸ್ವಾಪ್ನಪದ್ಯೇನ ಗರ್ವಂ ಹಿತ್ವಾ ಸರ್ವೇ ವಿಪ್ರವರ್ಯಾಸ್ಯಜೇನ |
ಶೃತ್ವಾ ಚೋರ್ವ್ಯಾಂ ಶರ್ವ ಗುರ್ವಾದಿ ದೇವಾನ್ ದೃಷ್ಟ್ವೋರ್ವಶಿಂ ಯಾಂತು ಮಾಂ ಮಾನವೇಂದ್ರಾಃ |೯೨|

ಇದಂ ವೃಂದಾವನಾಖ್ಯಾನಂ ಯೇ ಪಠಂತಿ ಮನೀಷಿಣಃ |
ಮುಕುಂದಾವನಮೇವಾಸ್ತು ತೇಷಾಂ ಕಂದಾಶನಾಜ್ಞಯಾ |೯೩|

ಇದಮರ್ಪಿತಮೇವಾಸ್ತು ಹಯಶೀರ್ಷಸ್ಯ ಪಾರ್ಷದಾತ್ |
ಸಮಂ ಸಹಸ್ರಶೀರ್ಷಸ್ಯ ಸೂಕ್ತಸ್ಯ ಪುರುಷಾತ್ ಕೃತಮ್ |೯೪|

ಯಚ್ಛ್ರುಣ್ವತಾಂ ಭಕ್ತಿರುದಾರಸದ್ಗುಣೇ ಹರೌ ಹರೇರ್ಲೋಕಗತೇ ತಥಾ ಮಯಿ |
ಭವತ್ಯಹೋ ಸರ್ವಶುಭಾಪ್ತಿಸನ್ಮತೀರ್ ದದಾತ್ಯಜಸ್ರಂ ಸುತ ಸತ್ಯಮೇವ ತತ್ ಓಂ |೯೫|

| ಇತಿ ಶ್ರೀಸ್ವಾಪ್ನವೃಂದಾವನಾಖ್ಯಾನೇ ಅಲೌಕಿಕ ವಿಭಾಗೇ
ಭಜನಪರ್ವಣಿ ಚತುರ್ಥಾಧ್ಯಾಯ: ಸಮಾಪ್ತ: |

| ಶ್ರೀ ಅಶ್ವಿನೀಹಯಗ್ರೀವಾತ್ಮಕ ಕೃಷ್ಣಾರ್ಪಣಮಸ್ತು |

05. Svaapnavrundavanakhyana