05. Svaapnavrundavanakhyana

Composer : Shri Vadirajaru

| ಅಥ ಪಂಚಮಾಧ್ಯಾಯಃ |

೧. ವಿಪ್ರಪ್ರಕರಣಮ್ | ಶ್ಲೋಕಾ: [೧-೨]

ಹರಿಃ ಓಂ |

ಅಸ್ಯಾಂ ಮಮ ಕೃತೌ ಯಸ್ಯ ವಿಶ್ವಾಸೋನಾಸ್ತಿ ದುರ್ಮತೇಃ |
ತಸ್ಮಿನ್ನಾಶಾಸ್ಯತಾ ನ ಸ್ಯಾದ್ ವ್ಯಾಸಸ್ಯೈವಾಽಜ್ಞಯಾ ಹರೇಃ |೧|

ಸರ್ವೈರ್ಗಿರೀಂದ್ರ ಸದನೈರ್ಮದನೋಽಪಿ-ದಾರೈಃ
ದೂರೀ ಕೃತಶ್ಚ, ಬದರೀಪುರವಾಸಿಭಿಸ್ತೈಃ |
ಯಸ್ಯಾಶ್ರಯಾತ್ ಸಕಲ ದೈವತ ದೈವತೇಶಂ
ವ್ಯಾಸಂ ಸುಶಾಂತಮನಿಶಂ ಮನಸಾ ಸ್ಮರಾಮಿ |೨|

೨. ಲಕ್ಷ್ಮೀಪತಿ ಪ್ರಕರಣಮ್ | ಶ್ಲೋಕಾ: [೩-೧೫]

ಲಕ್ಷ್ಮೀಪತೇ ಸೂಕ್ಷ್ಮಮತೇ ಮತ್ಕಥಾಮೃತವಾರಿಣಾ |
ಸತಾಮಾಧ್ಯಾತ್ಮಿಕಾದ್ಯಗ್ನಿಂ ಶಮಯ ತ್ವಂ ಸುಖೀಭವ |೩|

ತ್ರಿವಾಚಾಽಪಿ ಮಯಾ ಚೋಕ್ತಂ ತವ ಬುದ್ಧಿರ್ಯಥಾ ತಥಾ |
ಕುರು ವಿಪ್ರಸ್ಯ ವಚನಂ ನ ಮೃಷೇತಿ ವಿಚಿಂತಯ |೪|

ಮನ್ಮಹಾ ಮಹಿಮಾಂ ವಕ್ತುಂ ಮಾನವಾನಾಂ ನ ಶಕ್ಯತೆ |
ಮಾಪತೇರ್ಭಕ್ತ ಮಾಹಾತ್ಮ್ಯಂ ಕಾಮತೇಃ ಶಕ್ಯತೇ ನು ಕಿಂ |೫|

ಯಾದೃಗ್ ವೈಭವ ಭೋಗಸ್ಯ ಸ್ಥಾನಂ ಭುವಿ ದಿವಿ ಸ್ಥಿತಂ |
ತಾದೃಗ್ ವೈಭವ ರೂಪೇಣ ತತ್ತಲ್ಲೋಕೇ ವಸಾಮ್ಯಹಂ |೬|

ಬಹುರೂಪಾಣಿ ಧೃತ್ವಾಽಹಂ ಸಹಭೋಗಂ ತು ದೈವತೈಃ |
ಇಹ ಭುಕ್ತ್ವಾ ದಿವಿಸ್ಥೋಽಪಿ ಸಹಮುಚ್ಯೇ ವಿರಿಂಚಿನಾ |೭|

ಇತಿ ಮದ್ವೈಭವಾಹರ್ತುರ್ಭುವಿ ಪ್ರಾಪ್ಯಚ ಮದ್ಗತಿಂ |
ಯಾಂ ಗತಿಂ ಪ್ರಾಪ್ಯಮೋದಂತೆ ತಾಮಪ್ಯಸ್ಯ ದದಾಮ್ಯಹಂ |೮|

ಇತಿ ಮದ್ವೈಭವಗತಿಂ ಶ್ರುತ್ವಾ ಮದ್ಭಕ್ತಿ ಸಂಯುತಾಃ |
ಮತ್ಪಾದಾಬ್ಜಗತಿಂ ಯಾಂತಿ ಮದ್ದಯಾ ವಿಷಯಾಶ್ಚ ತೇ |೯|

ಏವಂ ಶ್ರುತ್ವಾ ವಿಪ್ರವರ್ಯಾತ್ ಸುಗೂಡಮಾಶ್ಚರ್ಯಭೂತಂ
ಮಮ ವೈಭವಂ ತು |
ಪುತ್ರ ಚೈತತ್ಸು ಪ್ರಸಿದ್ಧಿಂ ಕುರು ತ್ವಂ ಮಿತ್ರೋ
ಯಥೈವಾಂಧಕಾರಸ್ಥಮರ್ಥಂ |೧೦|

ಉಕ್ತಾನಿ ಸರ್ವ ಕರ್ಮಾಣಿ ಮಮ ವೈಭವ ಪರ್ವಣಿ |
ಸರ್ವೇ ವದಂತು ಭದ್ರಾಣಿ ಸದಾ ಪರ್ವಣಿ ಪರ್ವಣಿ |೧೧|

ತೇಷಾಮಿಷ್ಟಾನಿ ಪುಷ್ಟಾನಿ ಭವಿಷ್ಯಂತಿ ನ ಸಂಶಯಃ |
ತೇಷಾಂ ಕಷ್ಟಾನಿ ನಷ್ಟಾನಿ ಭವಿಷ್ಯಂತಿ ನ ಸಂಶಯಃ |೧೨|

ಸತ್ಯಂ ಸತ್ಯಂ ಪುನಃ ಸತ್ಯಂ ಚೋಧೃತ್ಯ ಭುಜಮುಚ್ಯತೆ |
ವಿಪ್ರೇಣೋಕ್ತಂ ಚ ಯತ್ ಸರ್ವಂ ತತ್ ಸರ್ವಂ ಚ ಮಯೋದಿತಂ |೧೩|

ಹಯಗ್ರೀವಂ ಮಹೋಗ್ರಾವಂ ಸಂಸಾರ ಗ್ರಾಹನಿಗ್ರಹಂ |
ಮಣಿಭಾಸ್ವಚ್ಛುಭಗ್ರೀವಂ ಶ್ರುಣು ವಂದೇ ಕೃತಾಂಜಲಿಃ |೧೪|

ಇತಃ ಪರಂ ನ ವಕ್ಷ್ಯೇಽಹಂ ಪರಸ್ಯಾಽಕ್ಷೇಪ ಕಾರಣಂ |
ಕುತಃ ಶರಃ ಪ್ರಯೋಕ್ತವ್ಯೋಽಸುರಾಸ್ಯಾಯೋಗ್ಯ ಬುದ್ಧಿನಃ |೧೫|

೩. ವೃಂದಾವನಾಚಾರ್ಯ ಪ್ರಕರಣಮ್ | ಶ್ಲೋಕಾ: [೧೬-೨೭]

ತಸ್ಮಾದ್ ವೃಂದಾವನಾಖ್ಯಾನಂ ಮಂದಾನಾಂ ಶಂಕಿತುಂ ಮುನೇ |
ಕಂದಾಶನೇಂದ್ರ ರಚಿತಂ ತಂ ದೋಷಂ ನ ದದಾತಿ ಚ |೧೬|

ಮನ್ಮನಃ ಸನ್ನಿಕರ್ಷೇಣ ತ್ವನ್ಮನಃ ಸ್ಮೃತಿಕಾರಣಂ |
ದಿನೇ ದಿನೇಽಭಿಜಾನೀಹಿ ಕಾನೀಹ ಸುಕೃತಾನಿ ತೇ |೧೭|

ಮನ್ನೇತ್ರ ಸನ್ನಿಕರ್ಷೇಣ ನಯನಂ ತೇ ಸುದರ್ಶನಂ |
ದಿನೇ ದಿನೇಽಭಿಜಾನೀಹಿ ಕಾನೀಹ ಸುಕೃತಾನಿ ತೇ |೧೮|

ಮತ್ಕರ್ಣ ಸನ್ನಿಕರ್ಷೇಣ ತ್ವತ್ಕರ್ಣಃ ಶೃಣುತೇಽನಿಶಂ |
ದಿನೇ ದಿನೇಽಭಿ ಜಾನೀಹಿ ಕಾನೀಹ ಸುಕೃತಾನಿ ತೇ |೧೯|

ಮಜ್ಜಿಹ್ವಾಯುಕ್ತ ತ್ವಜ್ಜಿಹ್ವಾಽಪ್ಯಂಹೋ ಮುಗ್ವಚನಂ ಭವೇತ್ |
ದಿನೇ ದಿನೇಽಭಿ ಜಾನೀಹಿ ಕಾನೀಹ ಸುಕೃತಾನಿ ತೇ |೨೦|

ಮದ್ ಘ್ರಾಣ ಸನ್ನಿಕರ್ಷೇಣ ತ್ವದ್ ಘ್ರಾಣಂ ಜಿಘ್ರತೇಽನಿಶಂ |
ದಿನೇ ದಿನೇಽಭಿ ಜಾನೀಹಿ ಕಾನೀಹ ಸುಕೃತಾನಿ ತೇ |೨೧|

ಮದ್ಧಸ್ತ ಸನ್ನಿಕರ್ಷೇಣ ತ್ವದ್ಧಸ್ತಃ ಕುರುತೇ ಕೃತಿಂ |
ದಿನೇ ದಿನೇಽಭಿ ಜಾನೀಹಿ ಕಾನೀಹ ಸುಕೃತಾನಿ ತೇ |೨೨|

ಮತ್ಪಾದ ಸನ್ನಿಕರ್ಷೇಣ ತ್ವತ್ಪಾದಃ ಚಲತೇ ಪದಂ |
ದಿನೇ ದಿನೇಽಭಿ ಜಾನೀಹಿ ಕಾನೀಹ ಸುಕೃತಾನಿ ತೇ |೨೩|

ಸರ್ವಾಣಿ ಕರಣಾನೀತಿ ಯುಕ್ತ ಮತ್ಕರಣಾನಿ ತೇ|
ಕರ್ಮಾಣಿ ಪುಣ್ಯ ರೂಪಾಣಿ ಕುರ್ವಂತಿ ಮಮ ಸನ್ನಿಧೇಃ |೨೪|

ತಸ್ಮಾದ್ ವೃಂದಾವನಾಖ್ಯಾನಂ ಮುಕುಂದಾನಂದಕಾರಣಂ
ಮಂದಾನಾಂ ಬೋಧನಾರ್ಥಾಯ ಕಂದಾಶನ ಕೃತಂ ತ್ವಭೂತ್ |೨೫|

ಏವಂ ನಿಶಮ್ಯ ಮಮ ಭೃತ್ಯ ಮುಖಾಚ್ಚ ಸರ್ವಂ
ವೃಂದಾವನಸ್ಯ ವಿಭವಂ ಸುಜನಾಶ್ಚ ಸರ್ವೇ |
ಶ್ರದ್ಧಾಳವೋ ವಿತತ ಭಕ್ತಿಯುತಾ ಭಜಂತು
ಸರ್ವೇಷ್ಟದಂ ಸಕಲ ಪಾಪ ವಿನಾಶನಂ ತತ್ |೨೬|

ಮತ್ಪಾದ ಸ್ಮರಣೇನೈವ ಜನಾನಾಮಣಿಮಾ ದಿತಾ |
ಪ್ರಾಣನಾಥ ಪದಂ ಹಿತ್ವಾ ಕೋಣಪಂ ಭಜತೇ ನು ಕಿಂ |೨೭|

೪. ವ್ಯಾಸಭಕ್ತ ಪ್ರಕರಣಮ್ | ಶ್ಲೋಕಾ: ೨೮

ಶಿಲಾಸ್ಥಾಂ ಕುರು ಪುತ್ರೇಶ ಬಲಾತ್ಕಾರೇಣ ಮತ್ಕೃತಿಂ |
ಸ್ಥಲಾಂತರ ಗತಾಂ ವಿದ್ಧಿ ಸ್ವಲಾಭಾರ್ಥಂ ಚ ನಾಕಿನಾ |೨೮|

೫. ಬಹುಭಕ್ತ ಪ್ರಕರಣಮ್ | ಶ್ಲೋಕಾ: ೨೯

ದೇವೈರಪ್ಯರ್ಥಿತಾಂ ಸ್ವಾರ್ಥಮಾರ್ತಿನಾಶಾಯಪಾರ್ಥಿವೈಃ |
ಪ್ರಾರ್ಥ್ಯೇತಿ ಕಿಮು ವಕ್ತವ್ಯಂ ಸ್ವಾರ್ಥೀ ಕುರುತ ಮತ್ಕೃತಿಂ |೨೯|

೬. ವ್ಯಾಸಭಕ್ತ ಪ್ರಕರಣಮ್ | ಶ್ಲೋಕಾ: [೩೦-೩೯]

ಚರಮಾಜ್ಞಾ ಮಮೈವೇಯಂ ಪರಮಾರ್ಥೇತಿ ವಿದ್ಧಿತಾಂ |
ಕುರು ಮಾ ಚಾನ್ಯಥಾ ಬುದ್ಧಿಂ ಪರಮಾ ನೀತಿರೀರ್ಯತೆ |೩೦|

ಅಹಂ ರಮಾಮಿ ರಾಮೇಣ ರಮಾರಮಣ ರೂಪಿಣಾ |
ಅಹಂ ಪುಷ್ಣಾಮಿ ಕೃಷ್ಣೇನ ಭಾಷಿತಂ ವಿಷ್ಣು ರೂಪಿಣಾ |೩೧|

ಅಹಂ ಪೃಚ್ಛಾಮಿ ಮತ್ಸ್ಯೇನ ಸಚ್ಛಾಸ್ತ್ರಾಣಿ ಪ್ರಸಂಙ್ಗತಃ |
ಗಚ್ಚಾಮಿ ಕಚ್ಛಪೇನೈವ ಸ್ವಚ್ಛ ರೂಪೇಣ ಸ್ವೇಚ್ಛಯಾ |೩೨|

ವರಾಹೇಣ ಕರಾರೋಹೇ ನಮಿತೋಽಹಂ ಚ ರಾಹುಣಾ |
ನೃಸಿಂಹೇನ ಕೃತ ಸ್ನೇಹೇ ಸೈಂಹಿಕೇನೇಹ ಪೂಜಿತಃ |೩೩|

ವಾಮನೇನ ಚ ಸನ್ಮಾನೆ ಕಾಮೇನಾಪಿ ಸುಮಾನಿತಃ |೩೪|

ಭಾರ್ಗವೇಣೈವ ಚಾನರ್ಘ್ಯೇ ಮಾನೇ ಸತಿ ಚ ಸ್ವರ್ಗಿಣಾ |
ಗರ್ಗಾದಿ ಮುನಿಭಿ: ಸಾರ್ಧಂ ಶ್ರದ್ಧಯಾಽಽರಾಧಿತೋ ಹ್ಯಹಂ |೩೫|

ಬುದ್ಧಃ ಪ್ರಬುದ್ಧಃ ಸಿದ್ಧೇಶೋಽಬದ್ಧಬುದ್ಧಿ ಪ್ರಬೋದಕಃ |
ಬೌದ್ಧರಾದ್ಧಾಂತ ಸಿದ್ಧಾರ್ಥಂ ದೇವಾನಾಂ ಬೋಧಯತ್ಯಲಂ |೩೬|

ಸ ದೇವೋ ವರದೋ ಮಹ್ಯಂ ಕದಾಚೇಹ ಸಮಾಗತಃ |
ಇತಿ ಮಾಮುಕ್ತವಾನ್ ಸೂಕ್ತಂ ಸ್ವಪಾದೇ ಚಾವದಾತ್ಯಜತ್ |೩೭|

ಕಲ್ಕೀ ಸಂಕಲ್ಪ ಸಂಸಿದ್ಧೋಮ್ಲೇಂಚ್ಛ ಮೂಲ ಕುಲಾಂತಕಃ |
ಅನಲ್ಪಮಪಿ ಚಾಽಲಸ್ಯಂ ಚಾಲಯಾಮಾನ ಲೀಲಯಾ |೩೮|

ಏವಂ ದಶಾವತಾರೇಷು ದುರ್ದಶಾ ರಹಿತೇಷು ಚ |
ಸದಾ ಸುಶರಣಂ ಪ್ರಾಪ್ಯ ತದ್ದಾಸತ್ವಮ ವಾಪ್ತವಾನ್ |೩೯|

೭. ವಿಪ್ರಪ್ರಕರಣಮ್ | ಶ್ಲೋಕಾ: [೪೦-೪೪]

ಪೂರ್ವಂ ಮಯೋಕ್ತ ಶ್ಲೋಕೇಷು ಸಾಂಶಯಿಕ ಮತಿಂ ತ್ಯಜ |೪೦|

ತ್ವತ್ಕರ್ಣಾಭರಣಮುದ್ದಿಶ್ಯ ಮಣಿ ವ್ಯತ್ಯಯತಃ ಕೃತಂ |
ಅಹಂ ಬ್ರಾಹ್ಮಣ ತೇ ವಾಮಕರ್ಣೇ ಸಂಸ್ಥಿತ ಸನ್ಮಣಿಂ |೪೧|

ಪಾಣಿನಾ ದಕ್ಷಿಣೇ ಕರ್ಣೇ ನ್ಯಸ್ಯ ತದ್ಗತ ಕಾಮಣಿಂ |
ವಾಮಕರ್ಣೇ ಪುನರ್ನ್ಯಸ್ಯ ಮಮ ಪುಣ್ಯ ವಚಾಂಸ್ಯಹೋ |೪೨|

ಅಥೋಪದಿಷ್ಟ ವಾನಸ್ಮಿ ಸ್ಪಷ್ಟಂ ಮದ್ವಸ್ತ ಕರ್ಮ ತೇ |
ಕರ್ಣೇ ತೇ ದಕ್ಷಿಣೇ ವಿದ್ವನ್ ಪಶ್ಯ ಹಸ್ತೇನ ಸಂಸ್ಪೃಶನ್ |೪೩|

ಇತೀದಂ ವಿದ್ಧಿ ಸದ್ಬುದ್ಧೇ ವೃದ್ಧ ಮದ್ಧಸ್ತ ಕರ್ಮ ಚ |
ಶುದ್ಧ ಭಾವೇನ ಮಾಮದ್ಧಾ ಭಜ ಕ್ರೋಧಮಿಮಂ ತ್ಯಜ |
ಅನ್ವಾರುಹಮಹೋ ಸ್ವರ್ಗಂ, ಸಹ ದೇವೈಃ ವಸಾಮ್ಯಹಂ |೪೪|

೮. ಬಹುಭಕ್ತ ಪ್ರಕರಣಮ್ | ಶ್ಲೋಕಾ: ೪೫

ಇದಮಾಶ್ಚರ್ಯವೃತ್ತಂ ಮೇ ಶೃತ್ವಾ ಸರ್ವೇಽಪಿ ಗರ್ವಿತಾಃ |೪೫|

೯. ವೃಂದಾವನಾಚಾರ್ಯ ಪ್ರಕರಣಮ್ | ಶ್ಲೋಕಾ: [೪೬-೬೨]

ಚರ್ವಿ[ರ್ಚಿ]ತಂ ಮೇ ಮಯಾ ಸರ್ವಂ ಗರ್ವಂ ತ್ಯಜತ ಶೀಘ್ರತ: |೪೬|

ಕರ್ತುಂ ಚಾಕರ್ತುಮಪ್ಯೇವಮನ್ಯಥಾ ಕರ್ತುಮೇವ ಚ
ಸಮರ್ಥೋಽಹಂ ನ ಸಂದೇಹಶ್ಚೇಶ್ವರಸ್ಯ ಸದಾಽಽಜ್ಞಯಾ |
ಇತಿ ಪೂರ್ವಂ ಮಯಾ ಪ್ರೋಕ್ತಮನುಸಂಧತ್ಸ್ವ ಬುದ್ಧಿಮನ್ |೪೭|

ಮಾರ್ತಾಂಡ ರಥಮಾರುಹ್ಯ ಸ್ವಾಂಡಾರ್ತೇನ ಸುಮಾನಿತಃ |
ಶರಕಾಂಡಜ ಮಾತೄಣಾಂ ಕರಕಾಂಡೇನ ಪೂಜಿತಃ |೪೮|

ಭಾನುಮಂಡಲಗಂ ವಿಷ್ಣುಂ ಕೋ ನು ಬ್ರಹ್ಮಾಂಡ ಸಂಸ್ಥಿತಃ |
ದೋರ್ದಂಡಾದರ್ಚಯನ್ ಸಾಕ್ಷಾತ್ ಮಾಂ ವಿನಾಽಣ್ಡಸ್ಯ ಶಕ್ತಿಮಾನ್ |೪೯|

ಸೂರ್ಯಸ್ಯ ರಥಮಾಶ್ರಿತ್ಯ ವೀರ್ಯಸ್ಯ ಪರಮಾತ್ಮನಃ |
ಅರ್ಯಸ್ಯಾಪಿ ಮಮಾಸ್ಯಾಂತಂ ಕಾರ್ಯಸ್ಯಾಂತಂ ಗತಂ ಮಯಾ |೫೦|

ಏವಂ ಸುಷ್ಠು ರಥೇ ತಿಷ್ಠನ್ ಪೃಷ್ಠತಃ ಪರಮಾತ್ಮನಃ |
ಕಾಷ್ಠಾಂತಂ ಯಾಮಿ ಕಾಮೇನ ಸ್ಪಷ್ಟಂ ಪಶ್ಯಂಶ್ಚ ಸಜ್ಜನಾನ್ |೫೧|

ಶಿಂಶುಮಾರಂ ಸಮಾಸಾದ್ಯ ಕಂಸ ಮಾರೇಣ ಚಾದ್ಯತಃ |
ಸಂಸರಾಮಿ ಪುನರ್ನಾಹಂ ಕಂ ಸರಾಮೀತಿ ಯಾಚಯೇ |೫೨|

ಸ ದೇವೋ ವರದೋ ಮಹ್ಯಂ ಕರದಾಯ ಮಹಾಪ್ರಭುಃ |
ಸ್ಮರದಾಶ್ರಿತ ದುಷ್ಕರ್ಮ ವಿದದಾರ ಹರಿಃ ಸ್ವಯಂ |೫೩|

ತತ್ಪುಚ್ಛಾಂತಂ ನ ಪಶ್ಯಾಮಿ ಸ್ವರ್ಗ ಮೂರ್ತೇರ್ಮಹಾತ್ಮನಃ |
ಪೃಚ್ಛಾಮಿ ಸ್ವಚ್ಛ ತತ್ವಾನಿ ತತ್ಪುಚ್ಛಗತ ತೇಜಸಾಂ |೫೪|

ಸ ಚೋಪದಿಷ್ಟವಾನ್ ಸ್ಪಷ್ಟಂ ಜ್ಯೋತಿರ್ಮಂಡಲ ಮಂಡನಂ |
ಧ್ರುವಾದಿ ಸರ್ವ ಲೋಕಾನಾಂ ಪಾಲಕತ್ವಂ ಸ್ವ ವೈಭವಂ |೫೫|

ಏವಂ ಕ್ರಮೇಣ ಸರ್ವಾಣಿ ಜ್ಯೋತೀಂಷಿ ಗತವಾನಹಂ |
ತೇಜಸಾ ಸರ್ವ ಚಕ್ಷೂಂಷಿ ವಿಮುಷ್ಣನ್ ವಿಷ್ಣ್ವನುಜ್ಞಯಾ |೫೬|

ತಿಷ್ಠನ್ ಸೂರ್ಯಾಭಿಮುಖ್ಯೇನ ಕಷ್ಟಂ ಕುರ್ವನ್ನಧಃ ಸದಾ |
ಸ್ಪಷ್ಟಂ ತಪ್ಯೇ ಮಹಾತ್ಮಾನಂ ದೃಷ್ಟ್ಯಾ ಚೇಕ್ಷಂಸ್ತಮೀಶ್ವರಂ |೫೭|

ರಥೇ ತಿಷ್ಠನ್ ಪೃಥುಗ್ರೀವಂ ವೃಥಾಗ್ರಹ ಸು ನಿಗ್ರಹಂ |
ಧ್ಯಾಯೇ ಮಾಯಾಂ ವಿನಾಕಾಯಂ ಪಾತಯಿತ್ವಾ ಚ ದಂಡವತ್ |೫೮|

ಶ್ರೇಯೋ ಯಾಸ್ಯೆ ತ್ ತ್ವಯಾವಾರ್ಯಂ ಮಯೋಕ್ತಂ ಸತ್ಯತಃ ಕುರು |೫೯|

ಇತಿ ಸಂಪ್ರಾರ್ಥಯನ್ ನಿತ್ಯಂ ಶ್ರುತ್ಯಂತೇಷು ವಿಚಾರಯನ್ |
ಕೃತ್ಯಂ ಸರ್ವಂ ತು ಹಿತ್ವಾಽಹಂ ಸ್ತುತೇಃ ಕೃತ್ಯಂ ಕರೋಮಿ ತೇ |೬೦|

ಪ್ರಭುಸ್ತದಾ ಪ್ರಸನ್ನಾತ್ಮಾ ಪ್ರವಣಂ ಮಾಂ ಪ್ರಕೃಷ್ಟಧೀಃ |
ಪ್ರಾವೋಚತ್ ಸುಪ್ರಸನ್ನೋಸ್ಮಿ ಪ್ರಕೃತ್ಯಾ ಮೋಚಯೇ ಪ್ರಿಯ |೬೧|

ಇತಿ ಮಾಮುಕ್ತ ವಾನ್ ಸಕ್ತಂ ಸ್ವಪಾದೇ ಚಾಽಪದಾಽಽತ್ಯಜತ್ |
ಪಸ್ಪರ್ಶ ಗಾತ್ರಂ ನೇತ್ರಾಂತೈಃ ದೃಷ್ಟವಾನ್ ಸ್ತೋತ್ರಮಾತ್ರತಃ |೬೨|

೧೦. ಶೇಷ ಪ್ರಕರಣಮ್ | ಶ್ಲೋಕಾ: [೬೩-೯೭]

ಕಾಽತ್ರ ಕೀರ್ತಿಃ ಕೃಪಾಪಾತ್ರತಯಾ ಹೀನಸ್ಯ ಪುತ್ರಕ |೬೩|

ತ್ವಮಪ್ಯೇವಂ ಪ್ರಸನ್ನಾಸ್ಯಂ ಪ್ರಸನ್ನೀಕುರು ತಂ ಹರಿಂ |
ಗುರುಂ ಮಾಂ ಮಾಽವಮಂಸ್ಥಾಃ ತ್ವಂ ಕುರು ಕಾರ್ಯಂ ಮಯೇರಿತಂ |೬೪|

ಆಲಸ್ಯಂ ನ ಕುರು ತ್ವಂ ಹಿ ಪಾಲಯಿಷ್ಯೇಽಹಮಂಜಸಾ |
ಕಾಲಕ್ಷೇಪೋ ನ ಕರ್ತವ್ಯಃ ಸ್ವಾಲಯಂ ತೇ ಭವಿಷ್ಯತಿ |೬೫|

ಕ್ಲೀಬೋಕ್ತ್ಯಾ ಸ್ವಾಲಯಂ ಚೇತಿ ತವಾಽಲಸ್ಯಾದ್ ಭವಿಷ್ಯತಿ |
ಪಾಲಯಾಮಿ ಬಲಾದೇವ ಕಾಲಯಾಮ್ಯಪ ಮೃತ್ಯುತಾಂ |೬೬|

ತಸ್ಮಾನ್ಮಾಭೀಃ ಕುಮಾರಾಭ ಹ್ಯಶುಭಾಚ್ಛ ಶುಭಾತ್ಮಕ |
ಸಭಾಸು ಭಾಸುರಂ ವಾಕ್ಯಂ ಭಾವ ಗರ್ಭಂ ತು ಬೋಧಯ |೬೭|

ಬುದ್ಧಿಮಾನ್ ಭವ ಸಿದ್ಧೇಶ ಶ್ರದ್ಧಾಂ ಕುರು ಬುಧೇ ಮಯಿ |
ವಿಪ್ರಸ್ಯ ತನುರೇವೇಯಂ ಮತ್ತನುರ್ನಾತ್ರ ಸಂಶಯಃ |೬೮|

ಅತ ಏವ ಸ್ವತೋ ವಿಪ್ರಃ ಸ್ವಕೃತ್ಯಾ ವ್ಯಕ್ತಿ ಮತ್ಕೃತಿಂ
ಸುಕೃತಿಂ ಚಾಸ್ಯ ವಿಪ್ರಸ್ಯ ಸ್ವಕೃತ್ಯಾ ಸಾಧಯಾಮ್ಯಹಂ |೬೯|

ತಸ್ಮಾದ್ವಿಪ್ರಾಯ ದಾತವ್ಯಂ ಕ್ಷುದಿತಾಯಾನ್ನಮುತ್ತಮಂ |
ಸಕುಟುಂಬಾಯ ದಾರಿದ್ರ್ಯಾತ್ ಕ್ರುದ್ಧಾಯ ಶುದ್ಧಾಯ ಚ |೭೦|

ಅನ್ನ ಕಾಮಾಯ ಚರತೇ ಕೃಶಾಯೇತಿ ಶ್ರುತೌ ಸುತ |
ಪಶ್ಯಾನ್ನ ದಾನ ಮಾಹಾತ್ಮ್ಯಂ ಮಾನ ಸಿದ್ಧಮನಂತಕಂ |೭೧|

ಶ್ರುತ್ಯರ್ಥಂ ಜಾನತಃ ಪುತ್ರ ಕುತೋ ವಕ್ಷ್ಯೇ ನಿರಂತರಂ |
ಮಾನತಃ ಪ್ರಾಪ್ತ ಧರ್ಮಂ ತಂ ಮಾ ತ್ಯಜ ತ್ವಂ ಸುತೋತ್ತಮ |೭೨|

ಅಹಂ ನಮಾಮಿ ಕಾಮೇನ ಮಾನವಾಯಾನ್ನದಾಯ ಚ |
ದಾನವಾ ಅಪಿ ಯಾಸ್ಯಂತೆ ಚಾನ್ನದಾನಾತ್ ಸುಸದ್ಗತಿಂ |೭೩|

ಅನ್ನಸ್ಯ ನಾಮ್ನಾ ಚಾನಂತೋಽಪ್ಯತಿ ಯತ್ನಂ ಕರೋತಿ ಚ |
ಜೀವಾನಾಂ ಜನನೇ ಕೋ ನು ಮಾನ ಸಿದ್ಧಂ ಪರಿತ್ಯಜೇತ್ |೭೪|

ಅನ್ನಾದ್ಭೂತಾನಿ ಜಾಯಂತೆ ಜಾತಾಶ್ಚಾನ್ನೇನ ವರ್ಧಂತೇ |
ಅದ್ಯತೇಽತ್ತಿಚ ಭೂತಾನಿ ತಸ್ಮಾದನ್ನಂ ತದುಚ್ಯತೇ |೭೫|

ಏವಮನ್ನಂ ನಿಮಿತ್ತಂ ಚ ಕೃತ್ವಾ ತತ್ತತ್ ಕರೋತಿ ಚ |
ಅನ್ನತೋಪಿ ತಥಾನ್ನೇನ ಮಾಹಾತ್ಮ್ಯಂ ಸ್ವಸ್ಯ ಯಾತಿ ಚ |೭೬|

ಅತೋಽನ್ನಸ್ಯಾವಿನಾಭಾವಾತ್ ಜೀವಾನಾಂ ಜೀವಮಾನತಾ |
ಅನ್ನನಿ ಚೈವ ಜೀವಾನಾಂ ಕಾನನೇ ವಾಸಿನಾಮಪಿ |೭೭|

ಜೀವಮಾನ ಪ್ರದಾನ್ಯೇವ ಕಿಮು ಗ್ರಾಮ ನಿವಾಸಿನಾಂ |
ಅತೋಽನ್ನ ಸದೃಶೋ ಮಾನೋ ಜೀವಾನಾಂ ನೈವ ವಿದ್ಯತೇ |೭೮|

ಮಯೋಕ್ತ ಮನ್ನ ತತ್ವಂ ಚ ಶೃಣುತೆ ಯೋಽನಿಶಂ ಸುತ |
ಅನ್ನಂ ಚ ಲಭತೇ ಪೂರ್ಣಮನಂತಂ ಚಾಪಿ ಪಶ್ಯತಿ |೭೯|

ಇದಂ ಕಥಂ ಸಂಘಟತೇಽನುಪಪತ್ತಿರಥಾತ್ರ ತು |
ಇತಿ ಮಾ ವಿತ್ತ ಜೀವ ತ್ವಂ ಕತ್ಥನಂ ವಾಽಪಿ ಮಾನವ |೮೦|

ಯದ್ಯೇವಂ ವದಸೇ ವಿದ್ವನ್ ಮದ್ವಂದನ ವಿಧಿಂ ಕುರು |
ಕ್ರುದ್ಧಶ್ಚೇಚ್ಛಿಂಧಿ ಕ್ರೋಧಂ ತಂ ಭಿಂಧಿ ದುರ್ಬುದ್ಧಿ ಪದ್ಧತಿಂ |೮೧|

ನೋ ಚೇದ್ ಗಚ್ಛಾಸ್ವ ದೂರಂ ತು ದಾರಂ ಪ್ರತಿ ಸದಾ ಕುರು |
ದ್ವಾರಂ ರಾಜ್ಞಾಂ ಪುನರ್ಗಚ್ಛ ಧೀರ ವಾದಮಪಾ[ಥೋ] ಕುರು |೮೨|

ಅಥಾಪಿ ತೇ ಪ್ರವಕ್ಷ್ಯಾಮಿ ಕಥಾಕ್ರಮ ವಿಧಿಂ ಬುಧ |
ಸುಕ್ಷೀಣಸ್ತ್ವಂ ವೃಥಾಽಽಕ್ಷೇಪೋ ಭಿಕ್ಷಾ ಮಾತ್ರಂ ದದಸ್ವ ಮೇ |೮೩|

ವಿಪ್ರಾಂತರ್ಯಾಮಿಣಃ ಪೂರ್ಣ ಪುಣ್ಯಸ್ಯ ತು ಗುಣಾರ್ಣವ |
ಅಹಂ ವಿಪ್ರ ಮುಖೇನೈವ ಚಾನ್ನಂ ಭೋಕ್ಷ್ಯಾಮಿ ನಾನ್ಯಥಾ |೮೪|

ಅನೇಕ ವೈಭವಂ ಚಾನ್ನಂ ಮನ್ನಂದನ ಮುಖೇನ ತು |
ವಿನಾ ನಾನ್ಯತ್ರ ಭೋಕ್ಷ್ಯಾಮಿ ಚಾನ್ನ ಮಾತ್ರಂ ತು ತನ್ಮುಖೇ |೮೫|

ತಸ್ಮಾದ್ ವಿಪ್ರಾಯ ದಾತವ್ಯಂ ತ್ರಾತವ್ಯಶ್ಚ ಸದಾ ದ್ವಿಜಃ |
ಸಾಚಿವ್ಯಂ ಕುರು ವಾಣ್ಯಾ ಚ ವಕ್ತಾ ಸ್ಯಾ: ಸರ್ವ ಏವ ಚ |೮೬|

ಅನೇಕ ಮೂರ್ತಿ ಸಂಯುಕ್ತಃ ಕೀರ್ತಿ ಸಂತತಿ ಸಂಯುತಃ |
ಪ್ರಾರ್ಥಯಾಮಿ ಹಯಗ್ರೀವಂ ಸ್ವಾರ್ಥಂ ಯಾಸ್ಯಾಮಿ ಕಾಮಿತಂ |೮೭|

ಮೂರ್ತ್ಯೈಕಯಾ ಪ್ರಾರ್ಥಿತಯಾ ಪರೈಶ್ಚ ಸ್ವಾರ್ಥೇಷು ಸಕ್ತೈಃ ಕೃತಕೃತ್ಯ ಬುದ್ಧಯಾ |
ಅರ್ತಿಂ ಚ ಹೃತ್ವಾ ಪರಮಾರ್ಥರೂಪಂ ಕಾರ್ತಸ್ವರಾಭಂ ಹಯಕಂಧರಸ್ಯ |೮೮|

ನಮಾಮಿ ಕಾಮೇನ ವಿನಾ ವದಾಮಿ ನಾಮಾನಿ ತಸ್ಯೈವ ಸುಮಾನ ವಾಗ್ರ್ಯ |
ಧ್ಯಾಯಾಮಿ ಮಾಯಾಮಪಿ ಕಾಮಿತಪ್ರದಾಂ ತ್ವಯಾ ಮತಂ ಸೂಕ್ಷ್ಮತರಂ ಹೃದಿ ಸ್ಥಿತಂ |೮೯|

ಶತಂ ಶತಂ ಚ ಪದ್ಯಾನಾಂ ಪ್ರತ್ಯಧ್ಯಾಯ ಗತಂ ಕುರು |
ಶುಭ ಶ್ರುತ ಕಥಸ್ತ್ವಂ ಚ ಭವ ನಿಸ್ಸಂಶಯೋ ಭವ | ೯೦|

ಅಹಮೇಕೇನ ರೂಪೇಣ ಶೋಕಂ ಪರಿಹರನ್ಸದಾ |
ಶ್ಲೋಕಾನ್ ವಕ್ತುಂ ಪ್ರವಿಷ್ಟೋಽಹಂ ಕಾಕ ಬುದ್ಧೌ ದ್ವಿಜೋತ್ತಮೇ |೯೧|

ತಥೈಕೇನೈವ ರೂಪೇಣ ಮತ್ತೋಕೇ ಚ ಪ್ರವಿಶ್ಯತು |
ಲೋಕಸ್ಯ ದರ್ಶನಾತ್ ಸದ್ಯಃ ಶೋಕಂ ಪರಿಹರಾಮ್ಯಹಂ |೯೨|

ದೇವವೃಂದ ಸಮಾಯುಕ್ತೋ ಮದ್ವೃಂದಾವನ ಸಂಸ್ಥಿತಃ |
ಸದ್ವೃಂದಾನಾಂ ಪ್ರಯಚ್ಛಾಮಿ ಚೇಷ್ಟವೃಂದಾನಿ ಸರ್ವದಾ |೯೩|

ಓಂ ಏತತ್ಸರ್ವಂ ಸ್ವಾಪ್ನಪದ್ಯೇನ ಗರ್ವಂ ಹಿತ್ವಾ ಸರ್ವೇ ವಿಪ್ರವರ್ಯಾಸ್ಯಜೇನ |
ಶೃತ್ವಾ ಚೋರ್ವ್ಯಾಂ ಶರ್ವ ಗುರ್ವಾದಿ ದೇವಾನ್
ದೃಷ್ಟ್ವೋರ್ವಶಿಂ ಯಾಂತು ಮಾಂ ಮಾನವೇಂದ್ರಾಃ |೯೪|

ಇದಂ ವೃಂದಾವನಾಖ್ಯಾನಂ ಯೇ ಪಠಂತಿ ಮನೀಷಿಣಃ |
ಮುಕುಂದಾವನಮೇವಾಸ್ತು ತೇಷಾಂ ಕಂದಾಶನಾಜ್ಞಯಾ |೯೫|

ಇದಮರ್ಪಿತಮೇವಾಸ್ತು ಹಯಶೀರ್ಷಸ್ಯ ಪಾರ್ಷದಾತ್ |
ಸಮಂ ಸಹಸ್ರಶೀರ್ಷಸ್ಯ ಸೂಕ್ತಸ್ಯ ಪುರುಷಾತ್ ಕೃತಮ್ |೯೬|

ಯಚ್ಛ್ರುಣ್ವತಾಂ ಭಕ್ತಿರುದಾರಸದ್ಗುಣೇ ಹರೌ ಹರೇರ್ಲೋಕಗತೇ ತಥಾ ಮಯಿ |
ಭವತ್ಯಹೋ ಸರ್ವಶುಭಾಪ್ತಿಸನ್ಮತೀರ್ ದದಾತ್ಯಜಸ್ರಂ ಸುತ ಸತ್ಯಮೇವ ತತ್ ಓಂ |೯೭|

| ಇತಿ ಶ್ರೀಸ್ವಾಪ್ನವೃಂದಾವನಾಖ್ಯಾನೇ ಅಲೌಕಿಕ ವಿಭಾಗೇ
ವೈಭವಪರ್ವಣಿ ಪಂಚಮಾಧ್ಯಾಯ: ಸಮಾಪ್ತ: |

| ಶ್ರೀ ಅಶ್ವಿನೀಹಯಗ್ರೀವಾತ್ಮಕ ಕೃಷ್ಣಾರ್ಪಣಮಸ್ತು |

06. Svaapnavrundavanakhyana