09. Svaapnavrundavanakhyana

Composer : Shri Vadirajaru

| ಅಥ ನವಮಾಧ್ಯಾಯ: |

೧. ವಿಪ್ರ ಪ್ರಕರಣಮ್ | ಶ್ಲೋಕಾ: [೧-೫೦]

ಹನೂಮಾನ್ ಬಹುನಾಮಾಽಯಂ ನ್ಯಹನದ್ ಗಹನಾದರೀ |
ಸಹನಾಮಾ ಮಹಾರೂಪೋ ಮಹಾನಾಮ್ನೀ ಮಹೋತ್ಸವೇ |೧|

ನಮಾಮಿ ತಂ ಮಹಾತ್ಮಾನಂ ಹನುಮಂತಮಥಾಽಹವೇ |
ನ್ಯಹನದ್ ಯೋ ಮಹಾರಕ್ಷೋ ಹ್ಯಕ್ಷಂ ಚಕ್ಷಯ ವಿಕ್ರಮಃ|೨|

ರೇಮೇ ಸೇವಾಸು ನಿರತ್: ಕಾಮೇನ ರಹಿತಃ ಸದಾ |
ಯಸ್ಯ ನಾಥಃ ಪ್ರಸನ್ನಾತ್ಮಾ ದದೌ ಚಾಽತ್ಮಾನಮೇವ ಚ |೩|

ತದ್ವನ್ಮಮಾಪಿ ಕಾಮೇನ ಹೀನಸ್ಯ ಮನಸಾಽಪ್ಯಹೋ |
ನಾಥೋ ಹ್ಯಾತ್ಮಾನಮೇವಾಸೌ ಹಯಗ್ರೀವೋ ದದೌ ಮುದಾ |೪|

ಪರಿರಂಭಣ ವ್ಯಾಜೇನ ಮಂದರೇ ಗುಣವಾರಿಧಿಃ |
ಗಣಯನ್ ಸ ತು ತಂ ದಾರಮುದ್ದಿಶ್ಯ ಮಮ ಸದ್ಗುಣಾನ್ |೫|

ಅಹಂ ರಾಜಾಧಿರಾಜಶ್ಚಾಪ್ಯೇತದುತ್ತರ ಜನ್ಮನಿ |
ಭವಾಮಿ ಸ ಭವಾನೀವ ಮಾಂ ತು ಯಾಸ್ಯತಿ ಯಾ ಪುರಾ |೬|

ಮಂದರೇ ಸುಂದರಂ ಮಾಂ ತು ದೃಷ್ಟ್ವಾ ಕಂದರ್ಪ ಮೋಹಿತಾ |
ಇಂದಿರಾಪತಿಮಾರಾಧ್ಯ ವರದಂ ಚಾಽಪ ತದ್ವರಂ |೭|

ಸಾ ಗಮಿಷ್ಯತಿ ಮಾಂ ತಸ್ಮಿನ್ ಜನ್ಮನಿ ಪ್ರಿಯವಾದಿನೀ |
ಸಾಧಿನೀ ಸ್ವಮನೋರಥ್ಯಂ ಸಾರಸೌಂದರ್ಯಸಾರತಃ |೮|

ಕನಕಾಂಬರಸಂವೀತಾ ಮಣಿಕಾಶಿತ ಭೂಷಣಾ |
ಗಣಿಕಾ ಜಾತಿಕಾಂ ತ್ಯಕ್ತ್ವಾ ಝಣಿಕಾರವ ನೂಪುರಾ |೯|

ದಾರಾಃ ಪುಂಸೀತಿವಶ್ಚಾರ ಇತಿ ನೋ ಶಾಬ್ದಿ ಕೈರ್ವೃತಃ |
ಉದಾರ ಕಾಮ ಹೀನಸ್ಯ ಸದಾರಃ ಪುರುಷೋ ಯಥಾ |೧೦|

ಇತ್ಯಭಿಪ್ರಾಯ ತೋಽಪ್ಯೇಕವಚನೇಽಪಿ ಪ್ರಯೋಜಿತಃ |
ದಾರಶಬ್ದಃ ಪರೈರುಕ್ತ ದೋಷೋಽಪಿ ಮಮ ನಾಸ್ತ್ಯತಃ |೧೧|

ಏಧಮಾನದ್ವಿಡಪ್ಯೇತತ್ ಕೃತವಾನ್ ದೇವರಾಡಸೌ |
ಮಾಂ ಪ್ರೌಢಭಕ್ತಿ ಸಂಪೂರ್ಣಮಾರೋಪ್ಯ ಗರುಡೋಪರಿ |೧೨|

ಜಗಾಮ ನಿಮಿಷಾರ್ಧೇನ ಮೇರುಮೂರ್ಧ್ನಿ ಸ್ವಮಂದಿರಂ |
ತಸ್ಮಾನ್ಮಂದರಗಂ ಪ್ರಾಪ ಸುಂದರಂ ಸ್ವಸ್ಯ ವಿಗ್ರಹಂ |೧೩|

ತಸ್ಮಾದಪಿ ಯಯೌ ಶ್ವೇತದ್ವೀಪಂ ಮಾಮಧಿರೋಪ್ಯ ಚ |
ಪೀತಾಂಬರಧರಃ: ಸ್ರಗ್ವೀ ಶ್ರೀಪತಿಃ ಶ್ರೇಯಸಾಂ ಪತಿಃ |೧೪|

ಶ್ವೇತದ್ವೀಪಾದಪಿ ಪ್ರಾಪ ಪ್ಲಕ್ಷದ್ವೀಪಂ ಸುಪಾವನಂ |
ಅಪಾಂಪತೇಶ್ಚೋಪಕಂಠೇ ವಿಪತೇಶ್ಚಾವರೋಪ್ಯ ಮಾಂ |೧೫|

ಗರುತ್ಮಾನಂ ಸಮಾಹೂಯ ಮಾನಯನ್ನಿದಮಬ್ರವೀತ್ |
ಮಘೋನಾಽಮೃತಮಾನೀಯ ಮಾಮ ಕಸ್ಯ ಮುನೇರ್ದಿಶ |೧೬|

ಇತ್ಯುಕ್ತಃ ಸತು ನತ್ವಾ ಚ ವೈನತೇಯೋ ವಿಹಾಯಸಾ |
ಗತ್ವಾ ಸ್ವರ್ಗಪತೇ ಸ್ತಚ್ಚ ಹ್ಯಮೃತಂ ಪ್ರಾಪ ಸತ್ವರಃ |೧೭|

ಆದಾಯ ಗರುಡಃ ಪ್ರೌಢಃ ಚೋಡ್ಡೀಯೋಡ್ಡೀಯ ಪಕ್ಷಿರಾಟ್ |
ಆಢಕೇನ ಮಿತಂ ಷೋಢಾ ಪ್ರರೂಢಂ ಪೌರುಟಸ್ಥಿತಂ |೧೮|

ಪಾಯಯಾಮಾಸ ಮಾಂ ಪಾಪರಹಿತಂ ಪಿಹಿತಂ ಕರೇ |
ಸ್ಥಾಪಯಾಮಾಸ ಪಾದಾಗ್ರೇ ಶ್ರೀಪತೇಃ ಶೇಷಿತಂ ಚ ಯತ್ |೧೯|

ದಿವ್ಯಂ ತದಪಿ ಗೋವಿಂದೋ ಗೋದೋಹನ ಕರೇಣ ಚ |
ಮಾಂ ಗೋಸವೇ ಗೋಸವೇ ಚ ಪಾಯಯಾಮಾಸ ನೇತರಂ |೨೦|

ಮಮಾಮೃತ ಪ್ರಾಶನಂ ಚ ಯೇ ಶೃಣ್ವಂತಿ ನರಾ ಭುವಿ |
ಅಮೃತಪ್ರಾಶನಂ ಕೃತ್ವಾ ತ್ವಮೃತತ್ವಂ ಭಜಂತಿ ತೇ |೨೧|

ಪ್ಲಕ್ಷದ್ವೀಪಾದಪಿ ಪ್ರಾಪ ಪ್ಲವಮಾನ ಇತಸ್ತತಃ |
ಉಪಪ್ಲಾವ್ಯಂ ತದಾ ವಿಷ್ಣುರುಪಪ್ಲವ ವಿವರ್ಜಿತಃ |೨೨|

ತದನಂತರಮನ್ವಿಚ್ಛನ್ನನಂತಾಸನಮೇವ ಚ |
ಅನಂತಶಯನಂ ದ್ರಷ್ಟುಂ ಅನಂತೋ ಯೋ ಗುಣೈರಪಿ |೨೩|

ಅನಂತಪದಮಾಸಾದ್ಯ ಚಾನಂತೋಪರಿ ಸಂಸ್ಥಿತಃ |
ಅನಂತಶಯನಂ ಪ್ರಾಪ ಹ್ಯನಂತಾಸನಗಂ ಹರಿಂ |೨೪|

ತೇನೈಕೀಭೂಯ ಕಾಲೇನ ನಾನಾತ್ವಂ ಮಯಿ ನಾಸ್ತಿ ಚ |
ಇತಿ ನೋ ದರ್ಶಯಾಮಾಸ ನೇತ್ರಯೋರಪಿ ಮಾನವ |೨೫|

ಇಂದ್ರಾಣೀ ಮಾಂ ಸಮಾನೀಯ ಚೇಂದ್ರೇಣ ಸಹ ಮಂದಿರಂ |
ಉಪೇಂದ್ರೋಽಪಿ ತದಾ ಚಾಽಪ್ತಃ ಚೇಂದ್ರೇಣ ಸಹ ಚೇಕ್ಷಿತುಂ |೨೬|

ಭದ್ರಾದೇವೀ ಸಮಾಯುಕ್ತಃ ಸುಭದ್ರಾರ್ಥಂ ತದೈವ ಮಾಂ |
ಭದ್ರಾಸನೇ ಸಮಾರೋಪ್ಯ ಭದ್ರಾಮಾರಾರ್ತಿಕಾಂ ವ್ಯಧಾತ್ |೨೭|

ಅರುಂಧತೀ ಸಮಾಯುಕ್ತಾ ವೃಂದಾವನ ಕೃತಿಂ ತ್ವಿಮಾಂ |
ಸ್ವಮಂದಿರೇ ಸಮಾಧಾಯ ಚೇಂದ್ರೇಣ ಸಹ ಚಾರ್ಚಯತ್ |೨೮|

ಏವಂ ಸರ್ವಾಶ್ಚ ದೇವ್ಯಸ್ತಾಃ ಪತಿಭಿಃ ಸಹ ಮಂದಿರಂ |
ಮಾಂ ಸಮಾನೀಯ ಚಾಽನರ್ಚುಃ ವೃಂದಾವನ ಕೃತಿಂ ತ್ವಿಮಾಂ |೨೯|

ತಸ್ಮಾತ್ಸ್ವಮಂದಿರೇ ಸರ್ವೇ ವೃಂದಾವನ ಕೃತೇಃ ಪರಂ |
ಪ್ರಕುರ್ವಂತ್ವರ್ಚನಂ ಸಮ್ಯಗಾರಾರ್ತ್ಯಾ ಚ ಸಮನ್ವಿತಂ |೩೦|

ಮದ್ವೃಂದಾವನಮೇವಾತ್ರ ಸದ್ವೃಂದಾವನಮೇವ ಹಿ |
ತದ್ವೃಂದಾವನಗಃ ಶ್ರೀಶಃ ಸದ್ವೃಂದಾವನಗಃ ಸದಾ |೩೧|

ಯೇನ ವೃಂದಾವನಾಖ್ಯಾತಿರ್ಜಾತಾ ಚಾತ್ರ ದಿನೇ ದಿನೇ |
ತಸ್ಮೈ ನಂದನ ಧಾನ್ಯಂ ವಾ ಧನಂ ವಾ ಕಿಂ ನ ದೀಯತೇ |೩೨|

ಮದ್ದೋರ್ದಂಡೇನ ಚೋರ್ಧ್ವಾಂಡಂ ದಕ್ಷಿಣೇನ ಗುಣಿನ್ ಸ್ಪೃಶೇ |
ಸವ್ಯೇನಾಧಃ ಸ್ಥಮಪ್ಯಸ್ಮಿನ್ ಲೋಕೇ ಪಾವಕವಜ್ಜ್ವಲನ್ |೩೩|

ತ್ರಸರೇಣು ರಜಸ್ಥಾಣುಃ ಪರಮಾಣುರಹಂ ಭಜೇ |
ಪಾರಿಮಾಂಡಿಲ್ಯವತ್ ಸೌಕ್ಷ್ಮ್ಯಂ ಶಾಂಡಿಲ್ಯೋ ವೇತ್ತಿ ಶೌಂಡಿಲಃ |೩೪|

ಮೇರು ವದ್ಗುರುಭಾರೋಹಂ ತೂಲವಲ್ಲಘುತಾಂ ವ್ರಜೇ |
ವ್ಯಾಪಕಶ್ಚಾಕಾಶವಚ್ಛಭಾಗಶೋ ಯೋಗತೋಽಭವಂ |೩೫|

ಮದ್ಯೋಗಬಲತೋ ನಾನಾ ದೇಹಗೋ ಭೋಗವಾನಹಂ |
ಸೌಭರಿರ್ಯದ್ವದಭ್ರಾಭೋ ಮದ್ವತ್ ಕೋ ಭ್ರಾಜತೇಽಧುನಾ |೩೬|

ಅಣಿಮಾದ್ಯಷ್ಟಾಙ್ಗ ಯೋಗಂ ಮಣಿಮಾನ್ ದುಷ್ಟರಾಕ್ಷಸಃ |
ಫಣಿನಾ ಮಾನಿತಂ ದಷ್ಟನ್ ತತ್ಪದಾಂಙ್ಗುಷ್ಠತೋ ಹತಃ |೩೭|

ತದ್ವತ್ಸಾಷ್ಟಾಙ್ಗ ಯೋಗೇನ ಮಯಾ ವಾದೇನ ಚಾಽಹತಃ |
ಮಾಯಾವಾದಿ ಮತಾಚಾರ್ಯಃ ಪೂರ್ವಂ ಕ್ರೋಧವಶಾಧಿಪಃ |೩೮|

ತಸ್ಮಾದಾಚಾರ್ಯವರ್ಯೇಷು ಮತಾಚಾರ್ಯಾಃ ಸುರೋತ್ತಮಾಃ |
ಆಚಾರ್ಯೇಷ್ವಾಪಿ ತೇಷ್ವತ್ರ ಮಧ್ವಾಚಾರ್ಯಃ ಪರೋ ಮತಃ |೩೯|

ವೇದೇಷು ಸರ್ವೇಷು ಹರಿಃ ಸುರೋತ್ತಮಃ
ಪೂರ್ವೇಷ್ವಥಾಚಾರ್ಯಮತೇಷು ತನ್ಮತಂ |
ಗುರುಷ್ವಪೀಹ ಪ್ರವರೇಷು ಗೌರವಾತ್
ಪೂರ್ಣಪ್ರಜ್ಞಃ ಸರ್ವಶಾಸ್ತ್ರೇಷು ತದ್ವಾಕ್ |೪೦|

ಮಮಾಸ್ಥಿ ಜಾತಾನ್ಯಪಿ ತಸ್ಥಿವಾಂಸಿ ಚಕ್ರಾಂಕಿತಾನ್ಯೇವ ಕ್ರಮಂತಿ ವಿಷ್ಣುಂ |
ತತ್ಪಾದಜಾಂಭಸ್ಸು ಸುಪಾವಿತಾನಿ ಯದ್ವೇಹ ಮಾಂ
ತತ್ ಪದ ಕಂ ನಯಂತಿ |೪೧|

ಭುಜಾಸ್ಥಿನೀ ಶಂಖ ಚಕ್ರೇ ಸುವೃತ್ತೇ ಜಾನ್ವಸ್ಥಿನೀ ಪದ್ಮಗದೇ ಚ ಜಾತೇ |
ಉರೋಸ್ಥಿ ತನ್ಮೂರ್ತಿ ರೂಪಂ ಪ್ರಜಾತಂ ಶಿರೋಸ್ಥಿ ನಾರಾಯಣ ಮುದ್ರಿತಂ ಚ |೪೨|

ದಂತಾಸ್ಥಿತತ್ಪಾದ ಪದ್ಮಂ ಚ ಜಾತಂ ವೃಂತಾಸ್ಥಿ ತಚ್ಛಾರ್ಙ ಧನುಶ್ಚ ಜಾತಂ |
ಕರ್ಣಾಸ್ಥಿ ತದ್-ಬಾಣರೂಪಂ ಪ್ರಜಾತಂ ಪಾದಾಸ್ಥಿ ದಾಮೋದರ ಪಾದ ಪಾರ್ಶ್ವಂ|೪೩|

ಸದಾ ಚ ಮಾಂ ಪ್ರಾಪಯಾಮಾಸ ಶೀಘ್ರಂ ಕದಾಽಪಿ ಸಂಸಾರಗತಿಂ ದದಾತಿ |
ನ ಮೇ ಪದಂ ತಸ್ಯ ಮಹಾತ್ಮನಃ ಪ್ರಭೋಃ |೪೪|

ಇತ್ಥಂ ತು ಸರ್ವಾಣ್ಯಸ್ಥೀನಿ ವಿಷ್ಣೋಶ್ಚಕ್ರಾಂಕಿತಾನಿ ಚ |
ಜಾತಾನಿ ಜನನಾದ್ಯಂ ಚ ನಾಶಯಂತಿ ಮಮ ಶ್ರಮಂ |೪೫|

ಹೇ ಮುಗ್ಧವಿಪ್ರ ದಧಿ ದುಗ್ದ ಪಯೋನಿಧೌ ಚ |
ಬದ್ದ್ವಾ ಹರೇಸ್ತು ಪದಮೇವ ಸು ಭಕ್ತಿ ಪಾಶೈಃ |
ದಗ್ಧ್ವಾ ಕಲೇವರಮಿದಂ ಸಕಲಾಧಿವಾಧಿ
ಗ್ರಸ್ತಂ ಚ ಯೋಗ ಬಲತಃ ಪ್ರವಸಾಮಿ ಪಾರ್ಶ್ವೇ |೪೬|

ಯಥಾ ದುರ್ಯೋಧನ ಕೃತಂ ದಗ್ದ್ವಾ ಜತುಗೃಹಂ ಪುನಃ |
ದ್ವೈಪಾಯನಸ್ಯ ಪಾರ್ಶ್ವೇಪಿ ಹ್ಯುವಾಸ ಕುರುನಂದನಃ |೪೭|

ಉದಾರ ಗುಣಸಂಪನ್ನಃ ಸದಾರಶ್ಚ ಭವಾಂತರೇ
ವೃಂದಾವನಗುರೋರಾಜ್ಞಾ ಮಂದಾರವನಗಸ್ಯ ಮೇ |೪೮|

ದಿವ್ಯರಾಗಾನ್ವಿತಗ್ರೀವೋ ದ್ರವ್ಯರಾಗ ವಿವರ್ಜಿತಃ |
ಕರಾದಾಗತ ವಿತ್ತಾನಿ ಸದಾರೇಭ್ಯೋಽದದಾಂ ಸದಾ |
ವೈರಾಗ್ಯ ಗುಣ ಸಂಪನ್ನಃ ಸದಾ ರಾಜ್ಯ ಪರಾಙ್ಮುಖಃ |೪೯|

ಏಷ್ಯಚ್ಛ ನಿಶ್ಚಿತಂ ಸರ್ವಂ ಅತೀತತ್ವೇನ ಭಣ್ಯತೇ |
ಪ್ರೇಷ್ಯ ಸತ್ಯಂ ಮಯಾ ಪ್ರೋಕ್ತಂ ವಿಶ್ವಾಸಂ ಕುರು ಸರ್ವಥಾ |೫೦|

೨. ಲಕ್ಷ್ಮೀಪತಿ ಪ್ರಕರಣಮ್ | ಶ್ಲೋಕಾ: [೫೧-೭೪]

ಇತ್ಥಂ ಬ್ರಾಹ್ಮಣ ಮುಖ್ಯೇನ ಶ್ರುತ್ವಾ ವೈ ಗುಣ ವೈಭವಂ |
ಗಣಯತ್ಸ್ವಪಿ ದೇವೇಷು ಭಣ ಸತ್ಸು ಚ ಮಾಮಿಹ |೫೧|

ಅಹಂ ಶುಭೋದಸಾಗರೇಽನ್ವಹಂ ವಿಭೋರ್ಹಿ ವಾಸರೇ |
ಸು ಹಂಸರೂಪಿಣೋ ಹರೇರ್ಗೃಹಂ ಸರಾಮಿ ರೇಽರಮಂ |೫೨|

ಕಾರಿತುಂ ಸರ್ವ ಭೃತ್ಯೈಶ್ಚ ತಾರಿತುಂ ಭವಸಾಗರಾತ್ |
ಸ್ಮಾರಿತುಂ ಸರ್ವಶ್ರೇಯಾಂಸಿ ಪ್ರೇರಿತುಂ ಸರ್ವಶಃ ಸುರಾನ್ |೫೩|

ಅಹಂ ಮಮೇತ್ಯಹಂಕಾರರಹಿತೋ ವೈ ಹರೇರಿಹ |
ಕರೋಮ್ಯಹರಹಃ ಕರ್ಮ ಹಂಸೋ ಹಂಸರಹಸ್ಯ ಕೃತ್ |೫೪|

ಹಂಸೋಽಪಿ ಹಂಸವಾಹಸ್ಯ ಸುಯಶಂ ಜ್ಞಾನಮುತ್ತಮಂ |
ಸಂಸಾರೋತ್ತಾರಣಾಂಶಂ ಚ ಮಮಾಪಿ ಪ್ರಾಕ್ಛಶಂಸ ಹ |೫೫|

ಕಂಸಾರಿಃ ಶ್ವೇತವಾಹಸ್ಯ ಸಂಸಾರಂ ನಾಶಯೇದ್ ಯಥಾ |
ಕಾಂಸ್ಯಂ ಕಾಂಸ್ಯಸ್ಯ ಕರ್ತೇವ ಸಂಶೋಧಯತಿ ಚೋದ್ಧವಂ |೫೬|

ಸ ದೇವೋ ವರದೋ ಮಹ್ಯಂ ಕದಾ ಚೇಹ ಸಮಾಗತಃ |
ಇತಿ ಮಾಮುಕ್ತವಾನ್ ಸೂಕ್ತಂ ಸ್ವಪಾದೇ ಚಾಽಪದಾಽಽತ್ಯಜತ್ |೫೭|

ಅಹಮಾನಂದಮುನಿನಾ ಸದಾನಂದ ಪ್ರಸಙ್ಗಿನಾ |
ಸಹ ನಾನಾವಿಧಾ: ಶ್ರೀನಾಥಸ್ಯ ಗಾಥಾಃ ಸ್ಮರಾಮ್ಯಹೋ |೫೮|

ತದ್ಧರ್ಶನೋದ್ ಬುದ್ಧ ಹೃದ್ಯ ಸಂಸ್ಕಾರಃ ಶುದ್ಧ ಸಾತ್ವಿಕಃ |
ಬದ್ಧ ಸೌಹೃದ ತತ್ಪಾದ ಪದ್ಮೇಽಹಂ ಪತಿತೋಸ್ಮ್ಯಹೋ |೫೯|

ತೇನ ಸಾಕಂ ಬದರಿಕಾಶ್ರಮಂ ಶೋಕ ವಿನಾಶನಂ |
ತತ್ರಾಪಿ ದೃಷ್ಟ್ವಾ ಶ್ರೀವಾಸಂ ಸರ್ವ ಸಿದ್ಧ ಸುಸೇವಿತಂ
ಶುಕಸ್ಯ ಜನಕಂ ವೈ ವಾಸಿಷ್ಠ ಕೃಷ್ಣಂ ನತೋಽಸ್ಮ್ಯಹಂ |೬೦|

ಅಹಂ ಘನೋದಕಂ ಚಾಪಿ ಹ್ಯತಿಲಂಘ್ಯ ಮಹಾಘನಂ |
ಧನೂರತ್ನಂ ಚ ಪಶ್ಯಾಮಿ ಪುರಾ ಮಧು ವಿಭೇದನಂ |೬೧|

ಬಾಣಂ ಚ ಶಾಣಸಂಯೋಗಾನ್ನಿಶಿತಂ ದ್ಯುಮಣಿ ಪ್ರಭಂ |
ಪಶ್ಯಾಮಿ ಗುಣಸಂಬದ್ಧಂ ಶಾರ್ಙ್ಗಿಣಃ ಕರ ಭೂಷಣಂ |೬೨|

ಪ್ರಾಸಂ ಚ ಭಾಸಮಾನಂ ತಂ ನ್ಯಾಸ ಕರ್ಮಣಿ ಕೋವಿದಃ |
ಪಶ್ಯಾಮಿ ಶ್ರೀಪತೇರ್ದಾಸ್ಯಾತ್ ಸೋಽಹಂ ಭಾವ ವಿವರ್ಜಿತಃ |೬೩|

ಅಹಂ ಬ್ರಹ್ಮಾಸ್ಮ್ಯಹಂ ಬ್ರಹ್ಮಾಸ್ಮೀತಿ ಯೋ ವಕ್ತಿ ಹಿಂಸಕಃ |
ಸ್ವಹಿಂಸಾಂ ಬ್ರಾಹ್ಮಣ ಬ್ರಹ್ಮಣ್ಯಾರೋಪಯತಿ ನಾನ್ಯಥಾ |೬೪|

ಬ್ರಹ್ಮಹಿಂಸಾತ್ಮಕಸ್ಯಾಸ್ಯ ಮಹಾ ಬ್ರಹ್ಮಹತಿಃ ಸುತ |
ಭವತ್ಯೇವಾಂಧ ತಾಮಿಸ್ರೇ ಪತತ್ಯೇವ ನ ಸಂಶಯಃ |೬೫|

ಸಾಮಾನ್ಯ ಬ್ರಹ್ಮಹತ್ಯಸ್ಯ ಪ್ರಾಯಶ್ಚಿತ್ತಂ ಶ್ರುತೌ ಸ್ಮೃತೌ |
ನ ವಿದ್ಯತೇ ದ್ವಿಜಶ್ರೇಷ್ಠ ಮಹಾ ಬ್ರಹ್ಮಹತೇಃ ಕಿಮು |೬೬|

ವಕ್ತವ್ಯಂ ತತ್ರ ಕರ್ತವ್ಯಂ ತತ್ರ ನಾಸ್ತಿ ಬಹಿಷ್ಕೃತೇಃ |
ಸುವಿಸ್ತೃತೇಽಂಧ ತಾಮಿಸ್ರೇ ಪತಂತ್ಯೇತನ್ಮತಾಶ್ರಿತಾಃ |೬೭|

ತಸ್ಮಾತ್ಸೋಽಹಂಭಾವ ಯುಕ್ತೇ ಮಹತ್ಪಾಪಂ ಭವೇದ್ ಧ್ರುವಂ |
ಮಹಾ ಪಾಪಗತಿಂ ಯಾತಿ ಸ ಹಾಹೇತಿ ವದನ್ ಸದಾ |೬೮|

ಸೋಹಂಽಭಾವನ್ ಮೋಕ್ಷಮಾಪ್ನೋತಿ ಜೀವಸ್ತಸ್ಮಾದಂಧಂ ಯಾತಿ ತಾಮಿಸ್ರ ಮೇವ |
ದಾಸೋಽಹಂ ಮಾಮುದ್ಧರ ಸ್ವೇತಿ ಹಂತ
ಚಾಂಧಂತಮೋ ನೈವ ಯಾತೀತಿ ಕಾಮಂ |೬೯|

ಪ್ರಾರ್ಥಯ ಪ್ರಾರ್ಥ್ಯಮಾನಂ ತಂ ಸಾರ್ಥೀಕುರು ಮನೋರಥಂ |
ಕಾರ್ತಸ್ವರತರಂ ಚಾರ್ಥ್ಯಂ ಪದಮಾರೋಹ ತದ್ದರೇಃ |೭೦|

ಹೇ ಭೇದವಾದಿನ್ ತವ ಭೇದಸಿದ್ದ್ಯೈ ಸತ್ಯಂ ಹಿ ದೈತ್ಯಾದಿ ವದಸ್ವ ಮಾನಂ |
ತದೈಕ್ಯವಾದಂ ಜಹಿಯೋಽಹಮಸ್ಮಿ ಬ್ರಹ್ಮಾಹಮಸ್ಮೀತಿ ಕುವಾದಿನೋಕ್ತಂ |೭೧|

ಜಿತ್ವಾ ಚಾಭೇದ ವಾದಂ ತ್ವಂ ದತ್ವಾ ಶಿಷ್ಯೇಷು ಸನ್ಮತಿಂ |
ಶ್ರುತ್ವಾ ಚ ಗುರುಣಾ ತತ್ವಂ ಗತ್ವಾ ಚ ಹರಿಮಂದಿರಂ |೭೨|

ತತ್ರಾಪಿ ಸಚ್ಚಿದಾನಂದ ರೂಪಂ ಪಶ್ಯ ಹರೇರಪಿ |
ಸ್ಮರಾಭೇದಜಯಂ ಚಾಪಿ ಯತ್ ಫಲಂ ಹರಿದರ್ಶನಂ |೭೩|

ಅಹಂ ಘನೋದಕಂ ತೀರ್ತ್ವಾಮನೋವೇಗೇನ ಮಾನವ |
ಕರೋಮಿ ಬ್ರಾಹ್ಮಣ ಮುಖಾದಾಖ್ಯಾನಂ ಶೋಕನಾಶನಂ |೭೪|

೩. ವಿಪ್ರ ಪ್ರಕರಣಮ್ | ಶ್ಲೋಕಾ: [೭೫-೧೦೩]

ಅಹಮಾಕಾಶ ಮಾರ್ಗೇಣ ನಾಕೀಶಮಗಮಂ ಹರಿಂ |
ಲೋಕೇಶಂ ಪಶ್ಯ ದಾಸ ತ್ವಂ ತೋಕಾವಶ್ಯಂ ಹೃದಿ ಸ್ಥಿತಂ |೭೫|

ನೀವಾರ ಶೂಕವತ್ತನ್ವೀ ಪೀತಾ ಭಾಸ್ವತ್ಯಣೂಪಮಾ |
ತಸ್ಯಾಃ ಶಿಖಾಯಾ ಮಧ್ಯೇ ಚ ಯ ಆತ್ಮಾ ಸಂವ್ಯವಸ್ಥಿತಃ |೭೬|

ತಂ ಪಶ್ಯ ಹೃದಯಾಕಾಶೇ ಮಹಾಕಾಶೇ ಯಥಾ ರವಿಂ |
ಕೋಟಿ ಸೂರ್ಯಪ್ರತೀಕಾಶಂ ಚಂದ್ರ ಕೋಟಿ ವಿಕಾಸಿತಂ |೭೭|

ತ್ವತ್ಸಕಾಶಾದ್ ಭಿನ್ನಮೇವ ತತ್ಸಕಾಶಾದಿದಂ ಜಗತ್ |
ಕಾಸಾರೇ ಚಯಥಾ ಭಾತಮಾಕಾಶಂ ಚೋಪರಿಸ್ಥಿತಂ |೭೮|

ತಥಾ ತ್ವದ್ ಹೃದಯಾಕಾಶೇ ಭಾತಂ ಸೂರ್ಯಾಂತರೇ ಸ್ಥಿತಂ |
ಕಿರೀಟ ಹಾರ ಕೇಯೂರ ಸ್ಫುರನ್ಮಕರ ಕುಂಡಲೈಃ |೭೯|

ವಿರಾಜಂತಂ ಹರಿಂ ಪಶ್ಯ ನೇತ್ರಯೋರತಿ ಸುಂದರಂ |
ಶಂಖ ಚಕ್ರ ಗದಾಪಾಣಿಂ ನಾರಾಯಣಮರಿಂದಮಂ |೮೦|

ಸರೋಜಾಸನ ಮಧ್ಯಸ್ಥಂ ಅರುಣೇನಾಽದರಾರ್ಚಿತಂ |
ಸ ಯಶ್ಚಾಯಂ ಪುರುಷೇ ಯೋ ರವಿಮಂಡಲ ಮಧ್ಯಗಂ |೮೧|

ತಮೇಕಂ ಪಶ್ಯ ದೇವೇಶಂ ದಾಸಸಂಸ್ಥಿ ಹೃದಿ ಸಂಸ್ಥಿತಂ |೮೨|

ಏವಂ ಮದುಪದೇಶೇನ ಕೋ ದೇಶೋ ಜ್ಞಾನಗೋಚರಃ |
ವೇದೇಶಂ ತು ನ ಜಾನಾತಿ ವದಸ್ವಾದ್ಯ ನಂದನ |೮೩|

ಬ್ರಹ್ಮನ್ ಕಂದಾಶನೇಂದ್ರೋಽಹಂ ಚಂದ್ರಾಂತರ್ಯಾಮಿಣಂ ಹರಿಂ |
ಸಂದೃಶ್ಯಾಮ್ಯತ್ರ ಸಾಂದ್ರೇಣಽನಂದೇನೈವಾಽಶು ನಂದಿತಃ |೮೪|

ತಂ ದೃಷ್ಟ್ವಾಽನಂತಮವ್ಯಕ್ತಂ ಶೀತಾಂಶುಕರಮಚ್ಯುತಂ |
ಅಮೃತಾಕ್ತಕರಾನ್ ಲೋಕೇ ವಿಕಿರಂತಂ ಮುರಾಂತಕಂ |೮೫|

ಭಜಾಮಿ ಕಾಮಜಾಮಾರ್ತಿಂ ತ್ಯಜಾಮಿ ಕರಜಾತ ಮೇ |
ಸೃಜಾಮಿ ವಾಚೋ ಜಾಲಾನಿ ತಜ್ಜಾತ ಗುಣಜಾನಿ ಚ |೮೬|

ಅಹಂ ಸಪ್ತ ಸಮುದ್ರೇಷು ಸಪ್ತದ್ವೀಪೇಷು ಸಂಚರನ್ |
ಸಪ್ತಸ್ವಪಿ ಪರ್ವತೇಷು ಸಪ್ತ ಸಪ್ತಿರಥೇಽಪಿ ಚ |೮೭|

ಸಪ್ತ ಲೋಕೇಷು ನಿತ್ಯಂ ಚ ಸಪ್ತರ್ಷಿ ತುಷಿತಾರ್ಪಿತೈಃ |
ಸಪ್ತಮೀ ಮಿಶ್ರಿತಾಶ್ವಿನ್ಯಾಂ ಸಪ್ತಕಾಂಚನ ಭೂಷಣೈಃ |
ಅಲಂಕೃತಃ: ಕಳಂಕೇನ ಹೀನೈಃ ಸಮ್ರಾಡಿವ ಪ್ರಿಯ |೮೮|

ವೇಂಕಟಾದ್ರೌ ಶಂಖ ಭೇರೀನಾದಂ ಶ್ರುತ್ವಾಽಗಮಂ ಹರಿಂ |
ಜನಾರ್ದನಂ ಜನಾನಾಂ ತು ಜನನಾರ್ದನ ಕಾರಿಣಂ |೮೯|

ಜನಿತ್ರಂ ಬ್ರಹ್ಮಣಃ ಕಂಜನೇತ್ರಂ ಜನ ಮನೋತ್ಸವಂ |
ದೃಷ್ಟ್ವಾ ಹೃಷ್ಟೋ ಭವಮ್ಯಷ್ಟ ತಿಥಿಷು ಶ್ರೇಷ್ಠ ಭಾಜನೈಃ |೯೦|

ಪೌರುಟೈರ್ದತ್ತ ಮೃಷ್ಟಾನ್ನಂ ಶಿಷ್ಟೈಃ ಸಹ ಮಠಾಧಿಪೈಃ |
ಅಶ್ನಾಮಿ ಕೃತ್ವಾ ಸ್ನಾನಾನಿ ಸುಸ್ವನೋರ್ಜಿತ ಸಂಸ್ತವೈಃ |
ಶ್ರುತ್ವಾ ಪ್ರಶ್ನಾನಿ ತೇಷಾಂ ಚ ಕಾರ್ತ್ಸ್ನ್ಯಾದ್ವೈ ವಚ್ಮಿ ತದ್ಗುಣಾನ್ |೯೧|

ಅಹಂ ತೈಃ ಸಹಿತೋಽಪ್ಯತ್ರ ಚಾಽಗತೋ ಯತಿಭಿಃ ಕೃತಿನ್ |
ದ್ರಷ್ಟುಂ ತ್ರಿವಿಕ್ರಮಸ್ಯಾಪಿ ರಥೋತ್ಸವಮಥೋ ಹರೇಃ |೯೨|

ತ್ರಿಕೋಟಿಯತಿಭಿಃ ಸಾಕಂ ಅಟಾಮಿ ಮಮ ಸೇವಕೈಃ |
ಮಠೇಪಿ ತವ ಹೇ ತೋಕ ರಟಾಮಿ ಪರಮಾರ್ಥಿಕಂ |೯೩|

ಮೃಷ್ಟಾನ್ನಂ ದೇಹಿ ತೇಷಾಂ ಚ ಮೃಷ್ಟಕಾಂಚನ ಭೂಷಣೈಃ |
ನಷ್ಟಕಾಮಂ ಮಾಮಪಿ ತ್ವಂ ಸುಷ್ಠು ಪೂಜಯ ಪುತ್ರಕ |೯೪|

ಹೇ ಶಿಷ್ಟ ಶ್ರೇಷ್ಠ ಪೂಜಾಂ ಮೇ ಸ್ಪಷ್ಟಂ ಕುರು ಹರೇರಪಿ |
ಇಷ್ಟಂ ಯಥೇಷ್ಟತಃ ಪುತ್ರ ನಷ್ಟಂ ಚಾಪಿ ದದಾಮ್ಯಹಂ |೯೫|

ನಿಷ್ಟಪ್ತ ಕಟಕೇ ಶ್ರೇಷ್ಠ ಕಟಕಂ ಚಾಪಿ ಕುಂಡಲೇ |
ತಟತ್ಪ್ರಭೇ ಪಾದಪೀಠೇ ಶಿಷ್ಟೇ ಮಯಿ ಮಠಾಗತೇ |೯೬|

ದೇಹಿ ತೇ ಹಿತಸಿದ್ಧ್ಯರ್ಥಂ ಕೋ ಹಿ ಮೇ ತ್ವಾಂ ವಿನೇಹ ಚ |
ಹಿತವಾನ್ ದೇಹಿನಾಂ ಮಧ್ಯೇ ಜಹಿ ತೇ ಚಾಹಿತಾಮಪಿ |೯೭|

ಏವಂ ಮಮಾಽಜ್ಞಾಂ ಪ್ರಾಜ್ಞಾದ್ಯ ಕುರು ಚಾಜ್ಞಾನ ಬಂಧನಂ |
ನಿರಾಕುರು ತವ ಜ್ಞಾನಂ ಜಾಯತೇ ಜ್ಞಾನಿಷೂತ್ತಮಂ |೯೮|

ಅತಸ್ತ್ವತ್ಸದೃಶೋ ನಾಸ್ತಿ ಯತಿಷು ಪ್ರೇಷ್ಠ ಮಾದೃಶಃ |
ಕೀದೃಶೋಽಸ್ಮದ್ಗುಣೋ ಲೋಕೇ ತ್ವಾದೃಶೋಽಪಿ ನ ವಿದ್ಯತೇ |೯೯|

ಓಂ ಏತತ್ಸರ್ವಂ ಸ್ವಾಪ್ನಪದ್ಯೇನ ಗರ್ವಂ ಹಿತ್ವಾ ಸರ್ವೇ ವಿಪ್ರವರ್ಯಾಸ್ಯಜೇನ |
ಶೃತ್ವಾ ಚೋರ್ವ್ಯಾಂ ಶರ್ವ ಗುರ್ವಾದಿ ದೇವಾನ್
ದೃಷ್ಟ್ವೋರ್ವಶಿಂ ಯಾಂತು ಮಾಂ ಮಾನವೇಂದ್ರಾಃ |೧೦೦|

ಇದಂ ವೃಂದಾವನಾಖ್ಯಾನಂ ಯೇ ಪಠಂತಿ ಮನೀಷಿಣಃ |
ಮುಕುಂದಾವನಮೇವಾಸ್ತು ತೇಷಾಂ ಕಂದಾಶನಾಜ್ಞಯಾ |೧೦೧|

ಇದಮರ್ಪಿತಮೇವಾಸ್ತು ಹಯಶೀರ್ಷಸ್ಯ ಪಾರ್ಷದಾತ್ |
ಸಮಂ ಸಹಸ್ರಶೀರ್ಷಸ್ಯ ಸೂಕ್ತಸ್ಯ ಪುರುಷಾತ್ ಕೃತಮ್ |೧೦೨|

ಯಚ್ಛ್ರುಣ್ವತಾಂ ಭಕ್ತಿರುದಾರಸದ್ಗುಣೇ ಹರೌ ಹರೇರ್ಲೋಕಗತೇ ತಥಾ ಮಯಿ |
ಭವತ್ಯಹೋ ಸರ್ವಶುಭಾಪ್ತಿಸನ್ಮತೀರ್ ದದಾತ್ಯಜಸ್ರಂ ಸುತ ಸತ್ಯಮೇವ ತತ್ ಓಂ |೧೦೩|

| ಇತಿ ಶ್ರೀಸ್ವಾಪ್ನವೃಂದಾವನಾಖ್ಯಾನೇ ಅಲೌಕಿಕ ವಿಭಾಗೇ
ವೈಭವಪರ್ವಣಿ ನವಮಾಧ್ಯಾಯ: ಸಮಾಪ್ತ: |

| ಶ್ರೀ ಅಶ್ವಿನೀಹಯಗ್ರೀವಾತ್ಮಕ ಕೃಷ್ಣಾರ್ಪಣಮಸ್ತು |

10. Svaapnavrundavanakhyana