08. Svaapnavrundavanakhyana

Composer : Shri Vadirajaru

| ಅಥ ಅಷ್ಟಮಾಧ್ಯಾಯ : |

೧. ವಿಪ್ರ ಪ್ರಕರಣ | ಶ್ಲೋಕಾ: [೧-೩೪]

ಹರಿ: ಓಂ |

ತುಙ್ಗಭದ್ರಾ ನದೀ ತೀರೇ ಗಂಙ್ಗಾ ಸಂಙ್ಗಾತ್ಸಪುಣ್ಯದೇ |
ಮಙ್ಗಲಾರ್ಥಂ ಪಿತೄಣಾಂ ಚ ಸ್ವಾಂ ಗಾಂ ದ್ವಾದಶ ನಿಷ್ಕದಾಂ |೧|

ದತ್ತವಾನ್ ವಿತ್ತ ಪೂರ್ವಂ ಮೇ ಮತ್ತೋಽಪಿ ಸ್ವಹಿತೊಽಪಿ ಚ |
ತೃಪ್ತ್ಯರ್ಥಂ ತಾತ ಪೂರ್ವೇಷಾಂ ಪಿತೄಣಾಂ ನಾತ್ರ ಸಂಶಯಃ |೨|

ಭದ್ರಾನದ್ಯಾಶ್ಚ ತೀರೇಽಪಿ ಪಿತೄಣಾಂ ಶ್ರಾದ್ಧ ತದ್ದಿನೇ |
ಸುಭದ್ರಾವಾಪ್ತಿ ಸಿದ್ಧ್ಯರ್ಥಂ ದಾತಾ ಪೂರ್ವಂ ದದಾವಥ |೩|

ಇತಿ ಮಂತ್ರತ್ರಯಂ ವಿಪ್ರ ಕುತೋ ನ ಲಿಖಿತಂ ತ್ವಯಾ |
ತವ ಹಸ್ತಸ್ಯಪಾತೋಽಯಂ ದತ್ತಾಪಹರತೋ ಭವೇತ್ |೪|

ದತ್ತವಾನಹಮೇವೇಷ್ಟಂ ತತ್ ಪಿತೄಣಾಂ ತ್ರಿವಿಷ್ಟಪೇ |
ಕಷ್ಟಂ ನಾಽಯಾತ್ಯವಿಸ್ಪಷ್ಟಂ ಷಷ್ಠಿವರ್ಷ ಸಹಸ್ರಕಂ |೫|

ಹೋಮೇ ವಾ ಜುಹ್ವ ಮದ್ವಾಕ್ಯಮಿತ್ಯುಕ್ತೇ ತವ ಜಿಹ್ವಯಾ |
ದಹೇತಿ ಚೋಚ್ಯತೇ ಹಾ ಹಾ ಕಿಂ ತೇ ಜಿಹ್ವಾ ದಹೇತ್ಯಹೋ |೬|

ಅಶ್ಲೀಲ ಭಾಷಾ ಮಾ ತೇ ಯಮವಾಲಂ ವಿಷಯೇಽಮಲ |
ಶೀಲಾಢ್ಯಂ ತು ಕುಲಾಡ್ಯಂ ಪ್ರತ್ಯಶ್ಲೀಲೋಕ್ತಿಃ ನ ಚೋದಿತಾ |೭|

ಸಾವಧಾನಮನಾಃ ಶ್ರೀಮನ್ ಶ್ರವಣೇ ಭವ ಸದ್ಗುಣೇ |
ಭವನೇ ಭವಮೇ ನಿತ್ಯಂ ತವ ನೈವಾಸ್ತ್ಯ ಸನ್ಮತಿಃ |೮|

ಹಿಮವತ್ಪರ್ವತಂ ಗತ್ವಾ ಸುಮಹತ್ಪರ್ವಣಿ ಸ್ಫುಟಂ |
ಅಗಮಂ ಪರ್ವತಸ್ಯೋರ್ಧ್ವಮನಮತ್ ಪರ್ವತೋಽಪಿ ಮಾಂ |೯|

ತದ್ಧ್ಹಸ್ತೋಪರಿ ಮದ್ಧ್ಹಸ್ತಮಧಿರೋಪ್ಯಾಽದರೇಣ ಚ |
ಋದ್ಧಿ ಮದ್ಧ್ಹಿಮ ವದ್ಗೇಹಮಾರುಹಂ ಬೃಹದುನ್ನತಂ |೧೦|

ತೇನ ಸಂಪೂಜಿತಶ್ಚಾಹಂ ಮೇನಕಾ ಸಂಯುತೇನ ಚ |
ಮಾನಿತೋ ಬಹುಮಾನೈಶ್ಚ ಕಾಮೇನ ರಹಿತೋಽಪ್ಯಹಂ |೧೧|

ರತ್ನಕೋಟಿಭಿರಾಟೋಪ ಯುಕ್ತೈಶ್ಚ ತಟಿದಂಬರೇ |
ಯಥಾ ಸ್ಫುಟಂ ಮೇಘ ಸಂಘ ಘಟಿತಾ ಧೂರ್ಜಟೇರ್ಮತೈಃ |೧೨|

ಅಭಿಷೇಕಂ ಸುಷೇಣಾಗ್ರ್ಯ ಕೃತವಾನ್ ದೋಷವರ್ಜಿತೇ |
ಅಪಿ ಮೇಷಗತೇ ಪೂಷ್ಣಿ ಶೇಷಶಾಯಿ ಪ್ರಿಯೈ: ಸಹ |೧೩|

ಮತ್ಪ್ರಸಾದಾಪನ್ನ ರತ್ನನಿಚಯಾನ್ಸು ಚರಿತ್ರಿಷು |
ಅದದಾಂ ಮದನಾವೇಶ ರಹಿತೇಷು ಮುನಿಷ್ವಹಂ |೧೪|

ಇತ್ಯಾದಿ ಕೃತ ಸತ್ಕಾರೈರತಿ ಪೂಜ್ಯೋಽಹಮೇವ ತೈಃ |
ಹಿಮವತ್ಪರ್ವತಾದ್ಯೈಶ್ಚ ಸುಮತೇ ಶ್ರುಣು ವೈಭವಂ |೧೫|

ಮಮಾಭೀಷೇಕಸ್ಯ ಮಹೋತ್ಸವಂ ತು ಯೇ ದೋಷಯುಕ್ತಾಶ್ಚ ವಿಶೇಷತೋಽಪಿ |
ಶ್ರುತ್ವಾ ಚ ತದ್ದೋಷ ಲಯಂ ಪ್ರಯಾಂತಿ
ನಿರ್ದೋಷ ಭೂತಾ ಚ ನ ಮೇ ಮೃಷಾ ವಾಕ್ |೧೬|

ಹಿಮವಚ್ಛಿಖರಾದೂರ್ಧ್ವಂ ಸ್ವರ್ಗ ಮಾರುಹಮಾರ್ಯಜ |
ಘರ್ಘರಾಧ್ವಾ ನಗಾಃ ಸರ್ವೇ ಮುನಯೋ ಮಾರ್ಗಯಂತಿ ಮಾಂ |೧೭|

ತ್ರಿವಿಷ್ಟ ಪಾದಹಂ ಯಾಸ್ಯೇ ವಿಷ್ಟರಶ್ರವ ಸಂಸುತ |
ಕಷ್ಟಂ ಚ ಮಮ ನೈವಾಸ್ತಿ ವೈಕುಂಠಪತಿ ದರ್ಶನೇ |೧೮|

ಮಂದರಂ ಕುಂಧರಂ ಗತ್ವಾ ಸುಂದರಂ ತ್ವಿಂದಿರಾಪತಿಂ |
ಗಂಧರ್ವ ಸೇವಿತಂ ಸೇಂದ್ರ ವೃಂದಾರಕ ಮನೋರಥಂ |೧೯|

ಅಮೃತಾಬ್ಧೌ ಸುಧಾಸಿದ್ಧಿ ಪರ್ಯಂತಮಕರೋದ್ಧಿ ಯಃ |
ತಂ ನತೋಽಸ್ಮ್ಯುನ್ನತೇ ದೇಶೇ ತಿಷ್ಠಂತಂ ಚಾಷ್ಟ ಸದ್ಭುಜಂ |೨೦|

ತಸ್ಮಿನ್ಮಂದರ ವೃಂದೇ ಚ ಮಾಂ ದಾರಃ ಕಶ್ಚನಾಽಗತಃ |
ಸೌಂದರ್ಯಸಾರ ಸಾಂದ್ರೈಶ್ಚ ವೇಂದಿರೇ ವೇಂದಿರಾಪತಿಂ |೨೧|

ಮಮ ಸೌಂದರ್ಯಸಾರಂ ಚ ದೃಷ್ಟ್ವಾ ಹೃಷ್ಟೋ ಬಭೂವ ಚ |
ಅನಙ್ಗವಶಮಾಸಾದ್ಯ ಸ್ವಾಂಙ್ಗಾನಿ ಮಮ ದರ್ಶಯನ್ |೨೨|

ಅನಙ್ಗಸಙ್ಗನಿಸ್ಸಙ್ಗಂ ಮಾಂ ಸನ್ದೃಶ್ಯ ಸುವಿಸ್ಮಿತಃ |
ಅಭವತ್ ಭವಾನೀವ ದೃಷ್ಟ್ವಾ ಚ ಭವಮವ್ಯಯಂ |೨೩|

ಭವೇದೇತಾದೃಶೋ ಭರ್ತಾ ಮಮ ಚಾತ್ರ ಭವೇ ಭವೇ |
ಇತಿ ಸ್ವಸ್ಯೇಷ್ಟದೇವಸ್ಯ ತುಷ್ಟಿಂ ಚಕ್ರೇ ಯಥೇಷ್ಟತಃ |೨೪|

ಕಾಷ್ಠಮೌನಂ ಸಮಾಸಾದ್ಯ ಶ್ರೇಷ್ಠ ಸೋಽತಿಷ್ಠದತ್ರ ಚ |
ಅಂಙ್ಗುಷ್ಠ ಮಾತ್ರತಃ ಪ್ರೇಷ್ಠ ಸುಷ್ಟು ನಿಶ್ಚೇಷ್ಟತಾಂ ಗತಃ |೨೫|

ಇಷ್ಟ ದೈವಂಪ್ರತಿ ಸ್ವೇಷ್ಟಂ ಯಾ ಚ ಯಂಸ್ತತ್ರ ವೈ ಸ್ಫುಟಂ |
ಇತಿ ದೃಷ್ಟ್ವಾ ಚ ತತ್ಕಷ್ಟಂ ಮಾಮುವಾಚ ಸ ವಿಟ್ಠಲಃ |೨೬|

ತಸ್ಯೇಷ್ಟಂ ಕುರು ಶಿಷ್ಟ ತ್ವಂ ಮಮಾಭೀಷ್ಟಮಿದಂ ತವ |
ಮತ್ಪ್ರೇಕ್ಷಾಯಾಃ ಪರೀಕ್ಷಾರ್ಥಂ ತಂಪಕ್ಷೀಕೃತ್ಯ ಪುತ್ರಕ |೨೭|

ಮತ್ವಾ ರಮಾಪತಿಃ ಸಾಕ್ಷಾತ್ ಪರಿರೇಭೆ ಮುದಾ ತದಾ |
ತಂ ದಾರಂ ಪ್ರತ್ಯುವಾಚೇದಂ ಮಂದಾರವನ ಮಧ್ಯಗಃ |೨೮|

ಕಿಂ ದಾರಂ ಜನ್ಮ ಕಾಮಾರ್ತಂ ವೃಂದಾರಕ ಗುರುಂ ಪ್ರತಿ |
ಭವಾಂತರೇ ಭವಿಷ್ಯತೇಽಭೀಪ್ಸಿತಂ ಮಾಸ್ತುತದ್ವ್ಯಥಾ |೨೯|

ಸತ್ಯಂ ಮಯೋದಿತಂ ಕಾಂತತಾವತ್ಪತ್ಯಂ ತಪಃ ಕುರು |
ಇತ್ಯುಕ್ತೋ ಹರಿಣಾ ದಾರೋ ಗಿರಿ ಮೂರ್ಧ್ನಿ ಪರಾತ್ಪರಂ |೩೦|

ಶರಣ್ಯಂ ಶರಣಂ ಪ್ರಾಪ ಮಾಂ ಸ್ಮರನ್ ಹ್ಯದಿ ಸರ್ವದಾ |
ಮಾಮಪಿ ಪ್ರಾಪ್ತವಾನ್ ಕಾಮಾತ್ಕಮನೀಯಂ ತ್ವ ಮಾನವಂ |೩೧|

ಸಮ್ಮಾನಯ ಮನಸ್ತೇನ ಶಮಯಾನಙ್ಗ ಸಙ್ಗಮಂ |
ಭವಾತರೇಽಪಿ ಮಾಂ ಧೀರ ತೇಽಧರಾಮೃತಮನ್ವಹಂ |೩೨|

ವಿತರಾಽರ್ಯೈ ತದರ್ಥೇ ಚ ಮತ್ಕರಂ ಶಿರಸಾ ಧರನ್ |
ಅಹಂ ಯಾಸ್ಯೇ ತ್ವಯಾ ದತ್ತ ವಿಶ್ವಾಸಂ ಸತ್ಯಮೇವ ಚ |
ಕುರು ಶೀಘ್ರಂ ಸುರಶ್ರೇಷ್ಠ ಶ್ರೇಯಸೇ ಮೇ ಭವಾಯ ಚ |೩೩|

ಇತ್ಯುಕ್ತ್ವಾ ಪ್ರಯಯೌ ದಾರಃ ಕಾಮರಾಹಿತ್ಯಮಾರ್ಜ |
ಖ್ಯಾಪಯಾಮಾಸ ಲೋಕೇ ಮೇ ಸರ್ವತ್ರ ಸುಚರಿತ್ರಿಣಃ |೩೪|

ಇಮಾಂ ಕಥಾಂ ಚ ಯೇ ನಿತ್ಯಂ ಶ್ರುಣ್ವಂತಿ ಯತಯೋಽಪಿ ತು |
ಲಭತೇ ಕಾಮತಃ ಶಾಂತಿಂ ಸುತ ಸತ್ಯಂ ಮಯೋ ದಿತಂ |೩೫|

೨. ಲಕ್ಷ್ಮೀಪತಿ ಪ್ರಕರಣಮ್ | ಶ್ಲೋಕಾ: [೩೬-೬೧]

ಮಯೋಕ್ತ ಶ್ಲೋಕಪೂಗೇಷು ವಕ್ತುಂ ಯೋಗ್ಯಾನ್ ಪೃಥಕ್ಕುರು |
ಯೇ ಲೌಕಿಕಾರ್ಥಾ ಭಾಸಂತೇ ಶ್ಲೋಕಾಂಸ್ತಾನ್ ಕುಲಭೂಷಣ |೩೬|

ಚತುರಧ್ಯಾಯಗಾನ್ ಸಾಙ್ಗಂ ಗಙ್ಗಾಸ್ನಾನ ಫಲಂ ತವ |
ಮಙ್ಗಳಾಯನಮಾಶಾಸ್ಯಂ ನಿಃಸ್ಸಙ್ಗಸ್ಯ ವಚೋ ಮಮ |೩೭|

ಅಷ್ಟಾಧ್ಯಾಯೇಷು ಶಿಷ್ಠಾನಾಂ ತುಷ್ಟಿಂ ಕುರು ಯಥೇಷ್ಟತಃ |
ಪ್ರೌಢಿಂ ಪಶ್ಯಾಮಿ ತೇ ಸುಷ್ಟು ಮಮೇಷ್ಟಂ ಶಿಷ್ಟ ಸಾಧಯ |೩೮|

ಇತಿ ಚ ದ್ವಾದಶಾಧ್ಯಾಯಾನ್ ಕುರು ಶೀಘ್ರಂ ಬುಧಾಗ್ರತಃ |೩೯|

ಅಹಮಾಕಾಶಗೋ ನಿತ್ಯಂ ನಾಕಿಭಿಃ ಸಹ ಲೋಕದೃಕ್ |
ಪಾಕಶಾಸನ ಮುಖ್ಯಾನಾಂ ಶೋಕ ಮೇ ಶೃಣು ವೈಭವಂ |೪೦|

ಮದ್ವಿಮಾನಮಥಾಽಕಾಶೇ ನಿಮಿಷಾರ್ಧೇನ ಚ ದ್ರುತಂ |
ವಿರಿಂಚಿ ಲೋಕಪರ್ಯಂತಂ ಧಾವತೀತ್ಯಧಿರೋಪ್ಯ ಮಾಂ |೪೧|

ಚಕ್ರವತ್ ಭ್ರಮತೇ ತತ್ರ ಶಕ್ರಲೋಕೇ ಚ ಪುತ್ರಕ |
ವಕ್ರಬುದ್ಧಿ ಹೃದಃ ಶಲ್ಯಮಿವ ಚಂಕ್ರಮತೇಽನಿಶಂ |೪೨|

ದಿಕ್ಷು ಸರ್ವಾಸು ವೃಕ್ಷೇಷು ನಂದನ ಸ್ಥೇಷು ನಂದನ |
ಸ್ಯಂದನೇನ ಚರಾಮ್ಯಙ್ಗ ಗಂಗಾತೀರೇ ತರಂಗಿಣಿ |೪೩|

ಏವಂ ಮಹಾನುಭಾವೋಽಹಂ ಭಾನುಮಂಡಲಗಂ ಹರಿಂ |
ತದ್ರಥಸ್ಯೋಪರಿ ಪ್ರಾಪ್ಯ ಪ್ರಾರ್ಥಯಾಮಿ ತಮೀಶ್ವರಂ |೪೪|

ಕಮನೀಯಂ ಕಾಮಹೀನೋಪ್ಯಽನಿಶಂ ಭಾನುಮನ್ವಹಂ |
ಮಾನಿತಸ್ತೇನ ದೇವೇನ ಮಾನಿನ್ಛ್ರುಣು ಹರಿಪ್ರಿಯಂ |೪೫|

ನಾನಾವಿಧೈರನೇಕೈಶ್ಚ ವಾಹನೈರ್ವಾಹಕೈರ್ಯುತೈಃ |
ಚರಾಮಿ ಮಾರತಾತಂ ಚ ಸ್ಮರಾಮಿ ಹೃದಿ ಸರ್ವದಾ |೪೬|

ಮರ್ತ್ಯಲೋಕಂ ತು ಹಿತ್ವಾಹಂ ಸತ್ಯಲೋಕಮಿತೋಽಗಮಂ |
ಶ್ರುತ್ಯ ಭಾವಂ ಕರ್ತುಕಾಮೋ ದೈತ್ಯಃ ಕಶ್ಚಿದ್ಧತೋ ಮಯಾ
ಇತಿ ಪೂರ್ವಂ ಮಯಾ ಪ್ರೋಕ್ತಮನುಸಂಧತ್ಸ್ವ ಬುದ್ಧಿಮನ್ |೪೭|

ತಸ್ಮಾತ್ ಸರ್ವೋತ್ತಮೋ ನಿತ್ಯಂ ಜಗತಃ ಪತಿರಪ್ರತಿಃ |
ಶ್ರಿಯಃ ಪತಿಃ ಸುರಪತಿಃ ಸ ವಿರಿಂಚಪತಿಃ ಸ್ವಯಂ |೪೮|

ಮಯೋಕ್ತಂ ಸರ್ವೋತ್ತಮತ್ವಂ ಶ್ರುತ್ವಾ ಸರ್ವೇ ಸುರಾರಯಃ |
ಗರ್ವಿತಾ ವೈ ಹರಿಂ ನಾಗುಃ ಶರ್ವಂ ಚಾಪಿ ಗುರುಂ ಚ ಮಾಂ |೪೯|

ಸಾಮ್ಯ ಬುದ್ಧ್ಯಾ ತಾಮಸಾಸ್ತೇ ಮೇಘಚ್ಛನ್ನಮಿವ ಗ್ರಹಂ |
ಕಾಮತಾತಂ ಕೋಮಲಾಙ್ಗಂ ಮಾನವಂ ಮೇನಿರೇ ಹರಿಂ |೫೦|

ಮಯೋಕ್ತ ಸರ್ವೋತ್ತಮತ್ವಂ ಶ್ರುತ್ವಾ ಸರ್ವೇ ಹರಿಪ್ರಿಯಾಃ |
ಗುರ್ವಂತರ್ಯಾಮಿಣಃ ಸ್ಥೈರಂ ಕರಂ ದಾಸ್ಯಂತು ಭೂರಿಶಃ |೫೧|

ಮಮಾಪಿ ಜೀವೋತ್ತಮತ್ವಂ ಶ್ರುತ್ವಾ ಸರ್ವೇ ಮಮ ಪ್ರಿಯಾಃ |
ಗರ್ವಂ ಹಿತ್ವಾ ಪ್ರದಾಸ್ಯಂತು ಗುರ್ವಂತರ್ಯಾಮಿಣಃ ಕರಂ |೫೨|

ಇತ್ಥಂ ಸರ್ವೋತ್ತಮತ್ವಂ ತು ಶ್ರುತ್ವಾ ಸರ್ವೇಽಪಿ ಸಾತ್ವಿಕಾಃ |
ಹಿತ್ವಾ ಸಂಸೃತಿ ಮಾರ್ಗಂ ತು ಯಾಂತು ವಿಷ್ಣೋಃ ಸಲೋಕತಾಂ |೫೩|

ಏವಂ ಮಯಾ ಜಗತ್ ಸರ್ವಂ ವೈಷ್ಣವಂ ಚಾಽಸ ಸಾತ್ವಿಕಂ |
ಅಸುರಂ ಶಾರ್ವಮೇವಾಽಸ ಮಯೋಕ್ತೇಽಪಿ ಸ್ವಯೋಗ್ಯತಃ |೫೪|

ಮದ್ಭಕ್ತಾಃ ಸುಖಿನಃ ಸಂತು ಶಶ್ವಜ್ಜೀವಂತು ಮತ್ ಪ್ರಿಯಾಃ |
ಮಮಾಭಕ್ತಾಃ ಪ್ರಯಾಸ್ಯಂತು ತಮೋಽಂಧಂ ತಾಮಸಾಶ್ಚ ತೇ |೫೫|

ಅಹಂ ನಕ್ಷತ್ರ ಮಧ್ಯಸ್ಥಃ ಸುಕ್ಷೇತ್ರಾಣಿ ಪ್ರಕಾಶಯನ್ |
ತತ್ ಕ್ಷೇತ್ರವಾಸಿನಃ ಸರ್ವೇ ಭಿಕ್ಷಾಮಾತ್ರಂ ದದುಶ್ಚ ಮೇ |೫೬|

ಇತಿ ತೇಷಾಂ ವದನ್ನಿತ್ಯಂ ತನ್ಮಧ್ಯಸ್ಥೋ ಭವಾಮಿ ಚ |
ಮತ್ತೇಜಸಾ ತಿರಸ್ಕಾರಃ ಸರ್ವೇಷಾಂ ತೇಜಸಾಮಭೂತ್ |೫೭|

ಯಥಾ ಸೂರ್ಯಪ್ರಕಾಶೇನ ತೇಜಸಾಂ ಚ ತಿರಸ್ಕೃತಿಃ
ತಥಾ ಮತ್ತೇಜಸಾ ಸರ್ವತೇಜಸಾಂ ಚ ತಿರಸ್ಕೃತಿಃ |೫೮|

ಸ್ಯಾತ್ ಪಶ್ಯತಾಂ ಚ ನೇತ್ರಾಣಿ ಮುಷ್ಣನ್ ವಿಷ್ಣ್ವಾಜ್ಞಯಾ ಸದಾ |
ಅಹಂ ನಿಷಣ್ಣಸ್ತನ್ಮಧ್ಯೇ ವಿಷಣ್ಣಾಃ ಸರ್ವ ಏವ ತೇ |೫೯|

ಇತ್ಥಂ ತೈಜಸ ದೇಹಾನಾಂ ಸಂದೋಹಂ ಸಂದದಾತಿ ಮೇ |
ಬುಧಾಗ್ರ್ಯಸ್ಯ ಸ್ವಪಾದಾಬ್ಜ ಸೇವಯಾ ವೈ ಗಧಾಧರಃ |೬೦|

ಶಾರದಾ ನೀರದ ಶ್ಯಾಮಾ ನಾರದಾಽರಾಧಿತಾಽಽದರಾತ್ |
ವೇದೋದರೀ ಶ್ರೀಧರಾಜ್ಞಾಧಾರಿಣೀ ಮೇ ಸುವಾಗ್ಧರಾ |೬೧|

೩. ವಿಪ್ರಶ್ರೋತೃಕ ಪ್ರಕರಣ | ಶ್ಲೋಕಾ: [೬೨-೧೦೬]

ರಥಸ್ಯೋಪರಿ ತಿಷ್ಠಂತಮರುಣೋ ನ್ಯರುಣದ್ಧಿ ಮಾಂ |
ವರುಣಂ ಪ್ರತಿ ಗಚ್ಛಂತಂ ಚರಣೇನ ವಿನಾ ಕೃತಃ |೬೨|

ಮಾತ್ರಾ ಭ್ರಾತ್ರಾ ವಿಹೀನೋಽಹಂ ತ್ರಾತಾ ತ್ವಂ ಮಮ ಸರ್ವದಾ |
ಯಾತ್ರಾಂ ನ ಕುರು ಚಾತ್ರಾಪಿ ತಿಷ್ಠ ರೂಪಾಂತರೇಣ ಚ |೬೩|

ಗರುಡಾಗ್ರಜ ಇತ್ಥಂ ಮಾಮವದಜ್ಜರಠದ್ಯ ಚ |
ಇತಿ ತೇನೋಕ್ತ ಏವಾಹಂ ಕಾಂತ ರೂಪಾಂತರೇಣ ಚ |೬೪|

ವಸಾಮಿ ವಸುಭಿಃ ಸಾಕಂ ಕಶ್ಯಪಾತ್ಮಜ ಪೂಜಿತಃ |
ಕರಟಾಭಃ ಸ್ವಬುಧ್ಯಾ ತ್ವಂ ಮದ್ಬುಧ್ಯಾ ಶ್ರೇಷ್ಠ ಏವ ಚ |೬೫|

ವರುಣೋಪಿ ತದಾಽಽಹ್ವಾತುಮಾಗತೋ ಮಾಂ ಪ್ರತಿ ಪ್ರಿಯ |
ಕಾಂತ ರೂಪಾಂತರೇಣಾಪಿ ತದ್ಗೇಹಂ ಗತವಾನಹಂ |೬೬|

ಯಮೋಪಿ ಮಾಂ ಸಮಾಹ್ವಾತುಂ ಸ್ವಯಮೇವಾಽಗತೋ ಮಹಾನ್ |
ರಾಮಸ್ವಾಮೀಕ್ಷತೇ ಕಾಮಮಾಗಮಿಷ್ಯತಿ ಮತ್ ಪ್ರಿಯಃ |೬೭|

ಇತ್ಯವೋಚತ್ ವಚಃ ಪ್ರಾಂಚನ್ ಕಾಂಚನೇಚ್ಛಾಽರುಚಿಂ ಚ ಮಾಂ |
ಹರಿ ಲಾಂಛನ ಸಂಛನ್ನಂ ಶಂಖ ಚಕ್ರಾಂಕಿತಂ ಭುಜೇ |
ಕಾಂತರೂಪಾಂತರೇಣಾಪಿ ತದ್ಗೇಹಂ ಗತವಾಹನಂ |೬೮|

ಶಾಂತಂ ಕಾಂತಂ ಪರಾಕ್ರಾಂತಂ ರಾಮಂ ತಂ ಸನ್ನತೋಽಸ್ಮ್ಯಹಂ |೬೯|

ಇಂದ್ರೋಪಿ ಸಾಂದ್ರ ಸಂತೋಷಾದುಪೇಂದ್ರಸ್ಯಾಽಜ್ಞಯಾ ಪ್ರಭುಃ |
ಕೇಂದ್ರಸ್ಥಾನಗತೇ ಚಂದ್ರೇ ಮುನೀಂದ್ರಂ ಮಾಂ ಸಮಾಹ್ವಯತ್ |
ಕಾಂತ ರೂಪಾಂತರೇಣಾಪಿ ತದ್ಗೇಹಂ ಗತವಾನಹಂ |೭೦|

ತಮುಪೇಂದ್ರಂ ಚಿದಾನಂದ ಸಾಂದ್ರಸುಂದರ ರೂಪಿಣಂ |
ಕಂದಾಶನೇಂದ್ರ ವಂದ್ಯೋಽಹಮಿಂದಿರಾಪತಿಮವ್ಯಯಂ |೭೧|

ನತೋಸ್ಮಿ ತಸ್ಯ ಸನ್ದೃಷ್ಟಿಂ ಸಙ್ಗತೋಽಸ್ಮಿ ಸಮಾಗಮಂ |
ಪ್ರಾಪ್ತೋಽಸ್ಮಿ ಸ್ವಾಮಿನಃ ಶ್ರೀನಿವಾಸಸ್ಯ ಮನಸಾಽಪ್ಯಹೋ |೭೨|

ಪಾಪಾಂಧಕಾರ ಸಂರುದ್ಧಃ ಕುರ್ವನ್ ಯೋ ದೀಪಮಾಲಿಕಾಂ |
ಕೋಪಾಂಧಕಾರಿತ ಮುಖಂ ಭಾಸ್ಕರಿಂ ಚ ನ ಪಶ್ಯತಿ |೭೩|

ತದೈವ ಮಾಂ ಸಮಾಹ್ವಾತುಂ ಧನದೋಽಪಿ ಸಮಾಗತಃ |
ಸದೈವ ಮೇ ಗೃಹಾವಾಸಂ ವಿಬುಧೇಂದ್ರ ಕುರು ಪ್ರಿಯ |೭೪|

ಇತಿ ಮಾಮುಕ್ತವಾನ್ ಭಕ್ತ್ಯಾ ಶಕ್ತ್ಯಾ ಹಸ್ತಂ ಪ್ರಗೃಹ್ಯ ಮೇ |
ಸ್ವಗೃಹಂ ಪ್ರಾಪಯಾಮಾಸ ಪ್ರೀತ್ಯಾ ವಿಪ್ರನ ಸಂಶಯಃ |
ಕಾಂತರೂಪಾತರೇಣಾಪಿ ತದ್ಗೇಹಂ ಗತವಾನಹಂ |೭೫|

ತದೈವ ಶೂಲೀ ಶಿರಸಿ ತ್ರಿಶೂಲೀ ಹಸ್ತೇ ಗಲೇ ಸಕ್ತ ನೃರುಂಡಮಾಲೀ |
ದಲೀಕೃತಾಂಧಶ್ಚ ಶಿಲೀ ಮುಖೇಷು ಹಾಲಾಹಲೀ ಗಲಮಧ್ಯೇ ಮಹಾತ್ಮಾ |೭೬|

ಸ್ಮಶಾನವಾಸೀ ಧೃತ ಭಸ್ಮ ರಾಶಿರ್ಭಸ್ಮೀಕೃತ ತ್ರಿಪುರಃ ಪೌರುಷೇಣ |
ಭಸ್ಮಾಸುರಾಜ್ಞಾತಭಯೀ ಪಿನಾಕೀ ನಾಕೀಶ್ವರಂ ಮಾಂ ಸಮುಪಾಜಗಾಮ |೭೭|

ಗಂಗಾಧರೋ ಮಙ್ಗಲನಾಮ ಮೂರ್ಧ್ನಿ
ಧ್ಯಾನಾಂತರಂಙ್ಗೀ ಸರ್ವಲಿಂಙ್ಗಾಂತರಸ್ಥ:
(ಸ್ವಾರ್ಧಾಂಗ್ಯಾ ಚ ಸಾರ್ಧಂ) |
ಉತ್ತುಙ್ಗ ಕೈಲಾಸ ಕೃತಾಙ್ಗವಾಸೋ ನಿಃಸ್ಸಂಗಿನಂ
ಮಾಂ ತ್ವಾಗತಃ ಸ್ವಾಗತೋಕ್ತ್ಯಾ |೭೮|

ಆಹ್ವಯಾಮಾಸ ಮಾಂ ಪ್ರೀತ್ಯಾ ಮಾಪತೇಃ ಪ್ರಿಯಮುತ್ತಮಂ |
ಕಾಂತರೂಪಾಂತರೇಣಾಪಿ ತದ್ಗೇಹಂ ಗತವಾನಹಂ |೭೯|

ಏವಂ ಸರ್ವೇಽಪಿ ದೇವಾಶ್ಚ ಕಾಲೇನೈಕೇನ ಮಾಂ ತದಾ |
ಆಹ್ವಯಾಮಾಸುರಾಯಾಂತಮಗಂ ಬಹುರೂಪಕೈಃ |೮೦|

ಭಸ್ಮರಾಶಿರಿತಿ ಪ್ರೋಕ್ತೇ ಧೃತೇತ್ಯುಪಪದೇನ ಚ |
ಸಾಕಂ ಶೋಕವಿಹೀನೇನ ಕೃತ ಭಸ್ಮೇತಿ ಚೋಚ್ಯತೇ |೮೧|

ತಾಲಪತ್ರೇ ತಥಾ ವಿಪ್ರ ಲೇಖನಂ ನೈವ ಕಾರಯ |
ಲೋಕವಾರ್ತಾಂ ತ್ಯಜತ್ವಂ ತೂಲೂಖಲೇ ಬದ್ಧಗೋಪಕಂ |೮೨|

ಸ್ಮರ ಕ್ಷಿಪ್ರಪ್ರಸಾದಂ ತು ಸ ಕರಿಷ್ಯತಿ ದಾರಕಃ |
ದ್ವಾರಕಾಪತಿರೇವಾಯಂ ಮದ್ವೃಂದಾವನಮಾರ ಚ |೮೩|

ನೀಲಾತ್ಮಕಸ್ತದೈವಾಗ್ನಿಃ ಕಾಲಾಗ್ನಿರಿವ ಲೋಕಹಾ
ಮಮಾಽಲಯಂ ಸಮಾಗಚ್ಛ ಮಾಂ ಪಾಲಯ ಸುಶೀಲ ಭೋ |೮೪|

ಇತ್ಯುವಾಚ ಸ ತೇಜಸ್ವೀ ತೇಜೋ ರೂಪಂ ಚ ಮಾಂ ಪ್ರತಿ |
ಕಾಂತ ರೂಪಾಂತರೇಣಾಪಿ ತದ್ಗೇಹಂ ಗತವಾನಹಂ |೮೫|

ತದೈವ ನಿರ್-ಋತಿ: ಪ್ರಾಪ್ತೋ ವರರುಚಿರುವಾಚ ಸರ್ವದಾ |
ವಾಯು ಪ್ರಭೃತಿಭಿಃ ಸಾರ್ಧಂ ಸ್ವೈರಂ ವಿಹರ ಮದ್ ಗೃಹೇ |೮೬|

ಇತ್ಯುಕ್ತವಂತಸ್ತೇ ಸರ್ವೇಽಪ್ಯಾಹ್ವಯಾಮಾಸುರಂಜಸಾ |
ತತ್ತದ್ ರೂಪಾಂತರೈರೇವ ತತ್ತದ್ ಗೇಹಮಗಾಂ ತದಾ |೮೭|

ವ್ಯಂಜನಸ್ಯಾಧಿಕತ್ವೇನ ನ ಛಂದಸ್ಯತಿ ದೂಷಣಂ |
ಸ್ವಚ್ಛಂದವೃತ್ತೇರ್ಮಮ ಚ ಕಶ್ಛಂದೋ ಭಙ್ಗ ಏವ ಚ |೮೮|

ಇತ್ಥಮೇವಾಷ್ಟ ದಿಕ್ಪಾಲೈಃ ಸ್ಪಷ್ಟಂ ಸಂಪ್ರಾರ್ಥಿತೋಸ್ಮ್ಯಹಂ |
ಹೃಷ್ಟರೂಪಾಂತರೈರೇವ ಶಿಷ್ಟ ಯಾಮಿ ದಿಶೋ ದಶ |೮೯|

ಮೂಲರೂಪೇಣ ಬಾಲಾರ್ಕ ಸದೃಶಂ ಕಮಲೇಶ್ವರಂ |
ನೀಲಮೇಘ ಪ್ರತೀಕಾಶಂ ಲೋಕ ದೃಷ್ಟ್ಯಾ ಮಹಾಬಲಂ |೯೦|

ಸಮಯೇನದೃಢಂ ಬದ್ಧ್ವಾ ಕಮನೀಯಂ ತ್ವಮಾನವಂ |
ಶಮನಂ ತನ್ಮನಃ ಕಾಮಂ ವಾಮನಂ ತನ್ನಮಾಮ್ಯಹಂ |೯೧|

ಚಂದ್ರಮಂಡಲಗಂ ವಿಷ್ಣುಮಿಂದ್ರಾಣ್ಯಾಖಂಡಲಾರ್ಚಿತಂ |
ಸಾಂದ್ರಂ ಕಮಂಡಲುಧರಂ ಚೋಪೇಂದ್ರಂ ಚಾಂಡಲಗ್ನಕಂ |೯೨|

ಭಜಾಮಿ ಭಜನೀಯಂ ತಂ ಭುಜಗೇಶ್ವರಶಾಯಿನಂ |
ಕುಜನಾಶಂಕಯಾ ಜಾತ ವೃಜನಾರ್ತಿಹರಂ ಚ ಮೇ |೯೩|

ಮಯಿ ಬ್ರಹ್ಮಾ ಚ ವಾಯುಶ್ಚ ವರ್ತತೇ ಸರ್ವದಾಪಿ ಹಿ |
ಯಾವನ್ಮಮ ವಿಮುಕ್ತಿಃ ಸ್ಯಾತ್ ತಾವತ್ಪರ್ಯಂತಮೇವ ಚ |೯೪|

ಅತೋ ಮಯಾ ಯದುಕ್ತಂ ತು ತತ್ಸರ್ವಂ ಯುಜ್ಯತೇ ಮಯಿ |
ಅಧಿಕಾರಿಷು ಸರ್ವೇಷು ಚೋತ್ತಮೋಹಂ ನ ಸಂಶಯಃ |೯೫|

ಇದಂ ಸರ್ವೇಽಪಿ ಜಾನಂತಿ ದೇವಾಶ್ಚ ಋಷಯಸ್ತಥಾ |
ಗಂಧರ್ವಾ ಅಪಿ ಸರ್ವೇಽಪಿ ದಾನವಾ ಮಾನವಾಶ್ಚ ನ |೯೬|

ಸರ್ವಲಿಂಙ್ಗಾಂತರಸ್ಥಶ್ಚ ಮಯೋಕ್ತಂ ತ್ಯಜ್ಯತೇ ತ್ವಯಾ |
ಮಯಾನುಕ್ತಮಪಿ ಸ್ವಾರ್ಧಾಂಗ್ಯಾ ಚ ಸಾರ್ಧಂ ತು ಗೃಹ್ಯತೇ |೯೭|

ಉಕ್ತ ಮೇವ ತು ವಕ್ತವ್ಯಮನುಕ್ತಂ ನ ಕದಾಚನ |
ಮತ್ಸತ್ರ ಭೋಜನಂ ಭುಕ್ತ್ವಾ ಮದುಕ್ತಂ ತ್ಯಕ್ತವಾನಸಿ |೯೮|

ಮಯಾ ದ್ವಿಮುಖತಶ್ಚೋಕ್ತಂ ಸುಮುಖ ಪ್ರಾಕ್ ದ್ವಿಧಾ ಕೃತಂ |
ಇದಾನೀಂ ಮುಖ್ಯಮೋವೋಕ್ತಮ್ ಏಕೇನೈವ ಮುಖೇನ ತು |೯೯|

ಅನೇಕ ಮುಖಸಂಪನ್ನಃ ಮುಖ ಮೇವಾನುಭೂಯತೆ |
ಮಖೈರಪಿ ದುರಾಪನ್ನಂ ಖಗ ಮುಖ್ಯೈಶ್ಚ ದೈವತೈಃ |೧೦೦|

ಓಂ ಏತತ್ಸರ್ವಂ ಸ್ವಾಪ್ನಪದ್ಯೇನ ಗರ್ವಂ ಹಿತ್ವಾ ಸರ್ವೇ ವಿಪ್ರವರ್ಯಾಸ್ಯಜೇನ |
ಶೃತ್ವಾ ಚೋರ್ವ್ಯಾಂ ಶರ್ವ ಗುರ್ವಾದಿ ದೇವಾನ್
ದೃಷ್ಟ್ವೋರ್ವಶಿಂ ಯಾಂತು ಮಾಂ ಮಾನವೇಂದ್ರಾಃ |೧೦೧|

ಇದಂ ವೃಂದಾವನಾಖ್ಯಾನಂ ಯೇ ಪಠಂತಿ ಮನೀಷಿಣಃ |
ಮುಕುಂದಾವನಮೇವಾಸ್ತು ತೇಷಾಂ ಕಂದಾಶನಾಜ್ಞಯಾ |೧೦೨|

ಇದಮರ್ಪಿತಮೇವಾಸ್ತು ಹಯಶೀರ್ಷಸ್ಯ ಪಾರ್ಷದಾತ್ |
ಸಮಂ ಸಹಸ್ರಶೀರ್ಷಸ್ಯ ಸೂಕ್ತಸ್ಯ ಪುರುಷಾತ್ ಕೃತಮ್ |೧೦೩|

ಯಚ್ಛ್ರುಣ್ವತಾಂ ಭಕ್ತಿರುದಾರಸದ್ಗುಣೇ ಹರೌ ಹರೇರ್ಲೋಕಗತೇ ತಥಾ ಮಯಿ |
ಭವತ್ಯಹೋ ಸರ್ವಶುಭಾಪ್ತಿಸನ್ಮತೀರ್ ದದಾತ್ಯಜಸ್ರಂ ಸುತ ಸತ್ಯಮೇವ ತತ್ ಓಂ |೧೦೪|

| ಇತಿ ಶ್ರೀಸ್ವಾಪ್ನವೃಂದಾವನಾಖ್ಯಾನೇ ಅಲೌಕಿಕ ವಿಭಾಗೇ
ವೈಭವಪರ್ವಣಿ ಅಷ್ಟಮಾಧ್ಯಾಯ: ಸಮಾಪ್ತ: |

| ಶ್ರೀ ಅಶ್ವಿನೀಹಯಗ್ರೀವಾತ್ಮಕ ಕೃಷ್ಣಾರ್ಪಣಮಸ್ತು |

09. Svaapnavrundavanakhyana