15. Svaapnavrundavanakhyana

Composer : Shri Vadirajaru

| ಅಥ ಪಂಚದಶಾಧ್ಯಾಯ: |

೧. ವಿಪ್ರ ಪ್ರಕರಣಮ್ | ಶ್ಲೋಕಾ: [೧-೧೫]

ಹರಿ: ಓಂ |

ಋಣೇಽಪ್ಯಥ ಶರಣ್ಯಂ ತಂ ಕರುಣಾಂ ತ್ವಯಿ ಕಾರಿಣಂ |
ಶರಣಂ ವ್ರಜ ಕಾರುಣ್ಯಾತ್ ತಸ್ಯ ಸಂಸರಣಂ ಜಹಿ |೧|

ಇತಿ ತೇ ಬುದ್ಧಿರದ್ಧೋಕ್ತಾ ವೃದ್ಧ ಕ್ರುದ್ಧಶ್ಚ ಮಾ ಭವ |
ಬದ್ಧಭಕ್ತಿರ್ಭವ ಶ್ರದ್ಧಾ ಸಮಿದ್ಧಶ್ಚ ಮದಙ್ಗಜೇ |೨|

ಶಿಖಾಂ ಗೃಹೀತ್ವಾ ವಕ್ಷ್ಯಾಮಿ ಸಖಾ ತ್ವಂ ಮಮ ಸರ್ವದಾ |
ಸುಖಾವಾಸಾನ್ ಪ್ರವಕ್ಷ್ಯಾಮಿ ಮಖಾವಾಸಾದಪಿ ಪ್ರಿಯ |೩|

ಮದ್ವಶೇ ಸತಿ ಮಧ್ವೇಶೇ ಮಧ್ವಾಚಾರ್ಯ ಪ್ರಿಯೇ ಮಯಿ |
ಮಧುಘಾತಕಭಕ್ತಾ ಯೇ ಭಕ್ತಿಂ ಕುರ್ವಂತಿ ನಿತ್ಯಶಃ |೪|

ಶ್ರಾವಯ ತ್ವಂ ಮಮ ಶ್ರಾವ್ಯಂ ಚರಿತಂ ಚರತೋಽಮೃತಂ |
ಪಾವಯ ತ್ವಂ ಪಾವಕಾದ್ಧಿ ವಿಶುದ್ಧರ್ಮುಗ್ಧ ಲೋಹಕೇ |೫|

ಯಥಾ ತಥಾ ವೃಥಾ ವಿಪ್ರ ಮಾ ಕೃಥಾಸ್ತ್ವಂ ವ್ಯಥಾಮಥಾ |
ಪೃಥಾಸುತಾ ಯಥಾ ಪಾರ್ಥಾಃ ಕೃತಾರ್ಥಾಃ ಸತ್ಕಥಾಂ ಸತಾಂ |೬|

ವದ ವೃಂದಾವನೇಽಮಂದಾನಂದಸಂದೋಹಮಂದಿರೇ |
ಸದಾ ಕಂದಾಶನಾಮಂದಾನಂದದಸ್ಯ ಗದಾಭೃತಃ |೭|

ಭಕ್ತಸ್ಯ ತ್ಯಕ್ತಪಾಪಸ್ಯ ಸಕ್ತಸ್ಯ ತದತಿಪ್ರಿಯೇ |
ಶಕ್ತಸ್ಯ ಭಕ್ತಿಯೋಗೇ ಚ ರಕ್ತಸ್ಯ ಮಮ ಸತ್ಕೃತಿಂ |೮|

ಏವಂ ಚೇದ್ ಭವತಿ ಪ್ರೇಷ್ಠ ಶ್ರೇಷ್ಠ ವೃತ್ತಿರಪಿ ಪ್ರಿಯ |
ಮಮೇಷ್ಟನಿಷ್ಠಾತ್ ಸತ್ಪುತ್ರಾತ್ ಸರ್ವಾಭೀಷ್ಟಂ ಭವೇತ್ ತವ |೯|

ಪುತ್ರ ಪೂತೇನ ಪಿತ್ರಾ ಚ ಪುತ್ರಾಶಾ ಪೂರಿತಾ ಮಯಾ |
ಪಿತ್ರಾ ಪೂತೇನ ಪುತ್ರೇಣ ಪಿತ್ರಾಶಾ ಮೇ ನ ಪೂರಿತಾ |೧೦|

ಉಪಕಾರಾಸ್ಯೋಪಕಾರಃ ಕ್ರಿಯತೇ ಲೋಕಸಜ್ಜನೇ |
ಉಪಕಾರಾಭವತೋಽಪಿ ಹ್ಯುಪಕುರ್ವಂತಿ ಪೂರ್ವಜಾಃ |೧೧|

ಉಪಕಾರಾನಿಮಿತ್ತೇನ ಯೇ ಕುರ್ವಂತ್ಯುಪಕಾರಿತಾಂ |
ರಾಜಸಾಸ್ತೇ ಚ ವಿಜ್ಞೇಯಾ ಹ್ಯುಪಕಾರಾರ್ಥಿನಃ ಪರೇ |೧೨|

ಉಪಕಾರಾನಿಮಿತ್ತೇನ ಹ್ಯುಪಕುರ್ವಂತಿ ಯೇ ಪರೇ |
ಸಾತ್ತಿಕಾಸ್ತೇ ಚ ವಿಜ್ಞೇಯಾ ಹ್ಯುಪಕಾರನಿರಾಶಿನಃ |೧೩|

ಉಪಕಾರೇಽಪಿ ಯೇ ನೈವ ಕುರ್ವಂತಿ ಹ್ಯುಪಕಾರಕಂ |
ತಾಮಸಾಸ್ತೇ ಚ ವಿಜ್ಞೇಯಾ ಉಪಕಾರಾಪಕಾರಿಣಃ |೧೪|

ಲೋಕನೀತಿರಯಂ ತಾತ ಶಙ್ಕಾ ತೇ ಮಾಸ್ತು ಸಾ ಸುತ |
ಸಾತ್ವಿಕಸ್ತ್ವಂ ಮತಃ ಸೌಮ್ಯ ಕಾಮ್ಯಂ ಮೇ ನಾಸ್ತಿ ಸರ್ವಥಾ |
ತವೈವ ಕರ್ತವ್ಯಮೇತನ್ಮನ್ನಿರೂಪಂ ಪರಂ ಸ್ಮರ |೧೫|

೨. ಸೀತಾಪತಿ ಪ್ರಕರಣಮ್ | ಶ್ಲೋಕಾ: [೧೬-೫೫]

ಅಹಂ ಪ್ರೇರಯಿತಾ ಪೂರ್ವರಾಜಾನಂ ಶೇಷಮೇವ ಚ |
ಶೈವಮುದ್ರಾಙ್ಕಿತಗ್ರಾಮಮಧ್ಯಸ್ಥಂ ವಾಮನೇರಿತಂ |೧೬|

ಸುಕ್ಷೇತ್ರಮದದಾಂ ಪುತ್ರ ತತ್ರ ದೃಷ್ಟಿಂ ಕರೋತಿ ಯಃ |
ಸುತ್ರಾಮಲೋಕಸಂತ್ರಸ್ತೋ ಯಾತಿ ಸಾವಿತ್ರಮೇವ ಚ |೧೭|

ಇಹ ತಸ್ಯ ಸುಸಂತಾನಂ ನಾಶಂ ಯಾತಿ ನ ವೈ ಮೃಷಾ |
ಶನೈಮದ್ದ್ರೋಹತೋ ನಾಕಾಚ್ಚ್ಯುತಃ ಕೀನಾಶಲೋಕಿತಾಂ |೧೮|

ಯಾತಿ ತತ್ರಾನೇಕ ಯಾತನಾಯಾಂ ನಾರಕಿಭಿ: ಸಹ |
ಅನುಭುಙ್ಕ್ತೇ ಮನೋಃ ಕಲ್ಪಪರ್ಯಂತಂ ದುಃಖಮೇವ ಚ |೧೯|

ತತೋ ವಿಷ್ಠಾಕ್ರಿಮಿತ್ವಂ ಚ ಕಾಷ್ಠಾಸು ಪ್ರಾಪ್ಯತೇ ಸುತ |
ಷಷ್ಠಿವರ್ಷಸಹಸ್ರಾಣಿ ಶ್ರೇಷ್ಠ ತೇನೈವ ಪಾಪಿನಾ |೨೦|

ತಸ್ಮಾದ್ವಿಪ್ರಸ್ಯ ಯಾ ವೃತ್ತಿರ್ನ ಹರ್ತವ್ಯಾ ಹಿತೇಪ್ಸುಭಿಃ |೨೧|

ವಿಪ್ರಗ್ರಾಮೇಷು ಯೋ ಭುಂಕ್ತೇ ಕರಂ ರಾಜಾಧಮಃ ಕ್ವಚಿತ್ |
ಸ ಯಾತಿ ನಿರಯಂ ಘೋರಂ ರೌರವಂ ಸೌರಿಶೌರ್ಯತಃ |೨೨|

ಶ್ರೋತವ್ಯಂ ರಾಜಭಿರ್ನಿತ್ಯಂ ಮನ್ನಿರೂಪಂ ಪರಾತ್ಪರಂ |
ಕರಂ ಮಹ್ಯಂ ಚ ದತ್ವಾ ತು ತ್ವರಯಾಽರೌರವಾಽಪ್ತಯೇ |೨೩|

ಸೀತಾಪತೇ ಮಮ ಸುತಸ್ಯ ಕೃತಾರ್ಥತಾಂ ಚ ಶ್ರುತ್ವಾ ತು ಮತ್ಕೃತಿಶತೈಃ ವಿತತಾರ್ಥಪೂತೈಃ |
ಸಂತೋಷಸಂತತಿಮಥ ಪ್ರಥಯಾದ್ಯ ಲೋಕೇ ತ್ವತ್ತೋಷತಃ ತದಿತರೇಽಪಿ ಸುತೋಷಿತಾಃ ಸ್ಯುಃ |೨೪|

ಏವಮಿಷ್ಟತ್ರಯಂ ಶಿಷ್ಟ ಸುಷ್ಟು ಕಾರಯ ಪ್ರೇಷ್ಠ ಮೇ |
ಕಾಷ್ಟಾಸು ಮದ್ಧಯಾ ದೃಷ್ಟಿಃ ಶ್ರೇಷ್ಠತ್ವಯ್ಯೈವ ನೈಷ್ಠಿ ಕೀ |೨೫|

ಭವತೀಹ ತತೋ ಸೀತಾಪತೇ ಕಾಂತಂ ಚ ಮೇ ಸುತಂ |
ತಾತಸ್ಯ ಕುರು ಕೃತ್ಯಂ ತೇ ತ್ವಾಂ ಪಾತಿ ಚ ಸ ವಿಶ್ವಕೃತ್ |೨೬|

ಇತಿ ಸಂಭೋಧಯಾಂಬೋಧಿಶಯನಸ್ಯ ಸಭಾತಲೇ |
ಭವಿಷ್ಯತಿ ಸುತಸ್ಥಾನಮಭಯಂ ಚಾಪಿ ಮದ್ಭಟೈಃ |೨೭|

ಶತಹಾಯನಪರ್ಯಂತಂ ಕೃತಹಾನಿರ್ನ ಚೈವ ತೇ |
ವೃತಹಾರಾವಳಿಂ ಶೌರಿಂ ಮಿತಹಾರಂ ಪ್ರಪೂಜಯ |೨೮|

ಮತ್ಪಾದಸೂರ್ಯಕಿರಣೇನ ತವಾಂತರಸ್ಥಾಜ್ಞಾನಾಂಧಕಾರ
ಹರಣಂ ಕುರು ಪುತ್ರವರ್ಯ |
ಮಧ್ಯಾಹ್ನಭಾನುಕಿರಣೇನ ಹೃದಂಬುಜಂ ತೇ ಚೋತ್ಫುಲ್ಲ
ಪದ್ಮವದತಿಪ್ರವಣಂ ವರೇಣ್ಯಂ |೨೯|

ಮದ್ರಂಜಿತೇ ಚ ಹೃದಯೇ ವರದಂ ಹರಿಂ ತಂ ಸಂಸ್ಥಾಪಯಾದ್ಯ
ಸದನಂ ಮದನಾಭಿ ರಾಮಂ |
ಮನ್ಮಂತ್ರತಂತ್ರವಿಧಿಭಿಃ ಕುರು ವಾರಿಧೌ ಯಃ ಶೇತೇ ಚ
ಶೇಷ ಶಯನೇ ಪರಮಸ್ಯ ಪೂಜಾಂ |೩೦|

ಏವಂ ತದ್ಧ್ಯಾನಮಾನೇನ ಗಾನಂ ಕುರು ಗುರೂದಿತಂ |
ಮಾಂ ಸಂಸಾರಭಯಂ ಧೀರ ವರದೋಸ್ಮಿ ತವಾದರಾತ್ |೩೧|

ಮದ್ವಾಣೀಂ ಭಣ ಕಲ್ಯಾಣ ಕರ್ಣರಂಧ್ರೇ ಶ್ರುಣು ಪ್ರಿಯ |
ಗುಣಿನಶ್ಚರಣಂ ನೈವ ನಂದನಸ್ಯಾಪಿ ನ ತ್ಯಜ |೩೨|

ರಾಮೋ ರಾಜೀವನೇತ್ರೋಽಸೌ ರಾಜ್ಞಃ ಸ್ವೈರಂ ವರಂ ದದೌ |
ತದಗ್ರಜಂ ಶರೈರ್ಹತ್ವಾ ತದ್ದಾರಾನಸಿಧಾರಯಾ |೩೩|

ವೃಂದಾವನಹರಂ ಸ್ವಸ್ಯೈವಾಗ್ರತಶ್ಚಿರಸಂಸ್ಥಿತಂ |
ರಕ್ತಚ್ಛರ್ದಿಮಪಿ ಹ್ಯತ್ರ ಕಾರಯಾಮಾಸ ವೀರ್ಯವಾನ್ |೩೪|

ತದಾರಭ್ಯಾಮರಗಣೈರ್ಮದ್ವೃಂದಾವನಮಾರ ಚ |
ತದ್ರಾಜ್ಯಂ ಚ ದದೌ ಸ್ವಸ್ಯ ನಾಮಧಾರಿಣ ಏವ ಚ |೩೫|

ತದ್ವಿರೋಧಿನಿ ಕ್ರುದ್ಧ: ಸನ್ ರುದ್ರಃ ಕಾಲಾಂತಕೋಽಪ್ಯಭೂತ್ |
ಮಮನಂದನ ವಾಕ್ಯೇಽಪಿ ಶ್ರದ್ಧಾರಾಹಿತ್ಯ ವಾನಭೂತ್ |
ತದ್ವಾಗ್ನಿರೋಧಿನಿ ಕ್ರುದ್ಧಃ ಕಥಂ ಕುರ್ಯಾದನುಗ್ರಹಂ |೩೬|

ಹಿತಾಹಿತೋಪದೇಶಸ್ಯ ಕರ್ತಾ ಚ ಗುರುರವ್ಯಯಃ |
ಗುರುದ್ವಾರಾ ಪ್ರಸನ್ನಃ ಸನ್ ಭರತೀದಂ ರಮಾಪತಿಃ |೩೭|

ಮನ್ನಿರೂಪಿತವಾಕ್ಯೇಷು ಚೈ ಕಂ ವಾ ನೈವ ಚಾಕರೋತ್ |
ರಾಜಸೇವಾಸು ನಿರತೋ ನರಕಂ ಯಾತಿ ದಾರುಣಂ |೩೮|

ಗುರುರೇವ ಹರಿ: ಸಾಕ್ಷಾತ್ ಗುರ್ವಂತರ್ಯಾಮ್ಯರಿಂ ಹರೇತ್ |
ಕರೋತಿ ಪರಮಂ ಚೈವಾನುಗ್ರಹಂ ನರಕಂ ಹರಂ |೩೯|

ಏತತ್ಪ್ರಮೇಯಂ ಸರ್ವಂ ತು ವದ ಸೀತಾಪತೇ ಮತಂ |
ಮಯಾ ತಸ್ಮೈ ಕೃತಂ ರಾಜ್ಯಂ ರಾಜ್ಞೇ ರಾಮಾನುಶಾಸನಾತ್ |೪೦|

ಮಮ ನಂದನಸನ್ಮಾನಂ ಕರೋತು ಮನಸಾಽರ್ಪಿತಂ |
ಮಮ ವೃಂದಾವನೇ ಭಕ್ತಿಂ ಶಕ್ತಿಪೂರ್ವಂ ಕರೋತ್ವಲಂ |೪೧|

ಏವಂ ಚೇದಾಯುರಾರೋಗ್ಯಂ ರಾಜ್ಯಂ ಸುಸ್ಥಿರಮೇವ ಚ |
ರಾಮಸ್ಯಾನುಗ್ರಹೇಣೈವ ರಾಜ್ಞಃ ಸರ್ವಂ ಭವಿಷ್ಯತಿ |೪೨|

ತಸ್ಮಾತ್ ತಸ್ಮೈ ವದಸ್ವಂ ತ್ವಂ ಗತ್ವಾ ಸೀತಾಪತೇ ಕೃತಿಂ |
ಸುತೇನ ಮಮ ಸನ್ಮತ್ಯಾ ಮಥಿತಂ ಕಥಿತಂ ತವ |೪೩|

ಶೇಷಮುದ್ದಿಶ್ಯ ಯತ್ಪ್ರೋಕ್ತಂ ಪಂಚಪುತ್ರಿತ್ವಮತ್ರ ತು |
ತನ್ಮಿಥ್ಯಾಭೂತಮೇವಾಸೀದಿತಿ ಶಂಕಾಽಪಿ ಮಾಽಸ್ತುತೇ |೪೪|

ಪಂಚವೃಂದಾವನಾನ್ಯೇವ ತತ್ಪುತ್ರಾ ಇತಿ ಕಂದಿನಾ |
ಮಯಾ ನಂದನ ಸಂಪ್ರೋಕ್ತಂ ಶ್ರುಣು ಸುಂದರ ಸದ್ಗತಿಂ |೪೫|

ಪುತ್ರಿಣೋ ಯಾಂ ಗತಿಂ ಯಾಂತಿ ತಾಂ ಗತಿಂ ಯಾತಿ ನಿಶ್ಚಿತಾಂ |೪೬|

ಅತ ಏವ ಹಿ ಪಂಚಾಶದ್ಯುಗಪರ್ಯಂತಮೇವ ಚ |
ಮಹೀಯತೇ ಸ ವಿಷ್ಣೋರ್ಹಿ ಲೋಕೇಽಪೀತಿ ಮಯೋದಿತಂ |೪೭|

ಪೂರ್ವಜನ್ಮನಿ ರಾಜಾಽಯಂ ದ್ವಿಜಚಕ್ಷುಃ ಪ್ರಜೇರಿತಃ |
ಉಜ್ಜಹಾರಾಽತ್ಮಜೇ ನಾಽಸ ತಜ್ಜನ್ಯದೋಷೇಣ ಚಾಂಧಕಃ |೪೮|

ತಸ್ಮಾತ್ ಶೂಕಾಽಪಿ ಶಂಕಯಾ ಮಾಽಸ್ತು ತೇ ವೈ ಸುಪುತ್ರಕ |
ಕಾಕವಾಕ್ಯಸ್ಯ ಸಾದೃಶ್ಯಂ ತೋಕಮಾಕುರು ಮತ್ಕೃತೌ |೪೯|

ಪೂರ್ವಂ ತು ಸಾರ್ವಭೌಮೋಽಯಂ ಕೂರ್ಮಕೋ ನರ್ಮದಾ ತಟೇ |
ಶರ್ಮಣೇ ನರ್ಮಕೃತ್ಸೈರಂ ತದೂರ್ಮಿಗತನೌರ್ಗತಃ |೫೦|

ಸ್ತ್ರೀಗಣೈ: ಸಹಿತ: ಸ್ತ್ರೈಣೋ ಬ್ರಾಹ್ಮಣೈಃ ಶಾಪಮಾಪ ಚ |
ಅಣಿಮಾಂಡವ್ಯ ಕಣ್ವಾದ್ಯೈಃ ಅಣಿಮಾದ್ಯಷ್ಟಸಿದ್ಧಿಭಿಃ |೫೧|

“ರಾಜಸೇವಾಸು ನಿರತೋ ರಾಮಸ್ಯಾನುಚರಾಗ್ರಜೇ |
ಮೃತೇ ಸತಿ ಗರೇರ್ಯೋಗೇ ತಸ್ಯಾವರಜರಾಜ್ಯಹಾ |
ತದ್ದ್ರೋಹತೋ ಹ್ಯಭದ್ರಂ ಚ ಯಾಸ್ಯತೀ” ತಿ ಚ ತೇ ಶಪುಃ |೫೨|

ಇತಿ ಶಪ್ತಸ್ತತ್ರ ಚೈಕಂ ವಿಪ್ರಂ ಯತ್ಪ್ರೇರಿತಾ ದ್ವಿಜಾಃ |
ದದು: ಸ್ವಪುರತ: ಶಾಪಂ ತಂ ಪ್ರಜಾಭಿ: ಸಮೀರಿತಃ |೫೩|

ಕಾರಗೃಹೇ ರಹಸ್ಯೇ ತು ಹ್ಯಸಹ್ಯಂ ತಂ ಪ್ರಹಸ್ಯ ಚ |
ಪ್ರಹಸ್ಯ ಸ್ವಹಿತೇನೈವ ಸಹಿತೋ ವಸುಹೋತ್ರಕಂ |೫೪|

ನೇತ್ರಸ್ಯೋತ್ಪಾಟನಂ ಚಕ್ರೇ ಪುತ್ರಮಂತ್ರಿನಿವಾರಿತಃ |
ವಿಪ್ರದ್ರೋಹ ಫಲಂ ಚೈತನ್ನೇತ್ರಯೋರ್ನಾಶನಂ ಮುನೇ |೫೫|

೩. ವಿಪ್ರ ಪ್ರಕರಣಮ್ | ಶ್ಲೋಕಾ: [೫೬-೫೮]

ಇತಿ ಪೂರ್ವಕೃತಂ ಕರ್ಮ ಶರ್ಮನಾಶಾಯ ಚೇಹ ತತ್ |
ಅಹಂ ಧರ್ಮಗತಿಂ ದಾಸ್ಯೇ ತಸ್ಯ ಮರ್ಮಾಣಿ ನೋ ವದೇ |೫೬|

ಇತ್ಯೇಕಂ ಶ್ಲೋಕಮಾಕಾಶೇ ಗತೇ ಮಯಿ ಗತಂ ದ್ವಿಜ
ಆದತ್ಸ್ವಂ ತಂ ವದಸ್ವೇಹ ಮಮ ಪುತ್ರಸ್ಯ ಚಾಗ್ರತಃ |೫೭|

ಸ್ವಪುರೋಹಿತಮಾರಾಧ್ಯ ಚಾಗ್ರಜನ್ಮಾಽಭವತ್ ತತಃ |೫೮|

೪. ಶೇಷ ಪ್ರಕರಣಮ್ | ಶ್ಲೋಕಾ: [೫೯-೬೧]

ವೃದ್ಧಂ ನ ತ್ಯಜ ಮದ್ವಾಚಂ ಶ್ರದ್ಧಾವಾನ್ ವದತೀಹ ಚ |
ಮಮ ಪುತ್ರಃ ಕೃತಾರ್ಥ: ಸನ್ನಾಯಾತು ಭರತಾಗ್ರಜಃ |೫೯|

ಯಥಾ ಕೃತಸಮಸ್ತಾರ್ಥಸ್ತಾವದ್ ವಕ್ತಾ ಹ ಮತ್ಕೃತಿಮ್ |
ಶ್ರುತ್ವಾ ತು ಮತ್ಕೃತಿಂ ಕೋ ವಾ ಸಂತೋಷಂ ಚ ಕರೋತಿ ವೈ |
ಸುತಂ ವಿನಾ ನ ಪಶ್ಯಾಮಿ ಮತ್ಕೃತೌ ತೋಷಿಣಂ ಗುಣಿನ್ |೬೦|

ಅಥಾಪಿ ವಕ್ಷ್ಯೇ ಸೀತಾಯಾಃ ಪತೇರ್ನಾಮ್ನಾ ವದಂತಿ ಯಂ |
ತಂ ಪ್ರತಿ ಪ್ರಕೃತಿಂ ತಸ್ಯ ಜಾನೇ ಮತ್ಕೃತಿಮಂಜಸಾ |೬೧|

೫. ಸೀತಾಪತಿ ಪ್ರಕರಣಮ್ | ಶ್ಲೋಕಾ: [೬೨-೬೩]

ಸೀತಾಪತೇ, ಮಮ ಸುತಸ್ಯ ವಶಂ ತು ಸರ್ವಂ ಮತ್ಸೌಭಗಂ ತದತಿಕೃತ್ಯ ವಿರಕ್ತತಾಂ ಚ |
ಕೃತ್ವಾ ತು ವರ್ತತ ಇಹ ಪ್ರತಿ ನಾಸ್ತಿ ತಸ್ಯ ತ್ವಂ ಪಶ್ಯ ಕುತ್ರ ಯತಿಷೂತ್ತಮತಾಽಸ್ತಿ ತಾದೃಕ್ |೬೨|

ಏವಂ ಕರ್ತವ್ಯಮತ್ಕೃತ್ಯೇಽಪ್ಯತ್ಯಂತಂ ವೈ ವಿರಕ್ತ ತಾಂ |
ಕರೋತಿ ಪ್ರಾರ್ಥಯ ತ್ವಂ ಚ ಕೃತ್ಯಂ ಕುರು ಗುರೋರಿತಿ |೬೩|

೬. ವಿಪ್ರ ಪ್ರಕರಣಮ್ | ಶ್ಲೋಕಾ: [೬೪-೬೬]

ಹೇ ಪುತ್ರ ಚಿತ್ರಂ ಮತ್ಕೃತ್ಯಮಕೃತ್ವಾ ಗಮನಂ ತವ |
ಗತೇಽಪಿ ಕಾರ್ಯಸಿದ್ಧಿರ್ವಾ ಕಥಂ ಸ್ಯಾನ್ಮದನಾದರಾತ್ |೬೪|

ಹಿತಾರ್ಥಂ ತವ ವಕ್ಷ್ಯಾಮಿ ಸುತಾದ್ಯ ಶ್ರುಣು ಮದ್ವಚಃ |
ಕೃತಾರ್ಥೋ ಭವ ತತ್ಕೃತ್ವಾ ಮತಾರ್ಥತ್ರಯಮಂಜಸಾ |೬೫|

ನೋ ಚೇದ್ ಧರ್ಮಃ ಕಥಂ ತೇ ಸ್ಯಾನ್ಮಾ ಮನಾದೃತ್ಯ ಯಾಸ್ಯಸಿ |
ತಸ್ಮಾತ್ ಕೃತ್ಯತ್ರಯಂ ಕೃತ್ವಾ ಗಚ್ಛ ಪುತ್ರ ಸುಖೀ ಭವ |೬೬|

೭. ಸೀತಾಪತಿ ಪ್ರಕರಣಮ್ | ಶ್ಲೋಕಾ: [೬೭-೬೯]

ಸೀತಾಪತೇ ಮಮ ಸುವಾಗ್ವಿಭವಸ್ಯ ಭೂಮಿಂ ಭೂದೇವಕಂ ತವ ಕರೇಽರ್ಪಿತವಾನಹಂ ಚ |
ತ್ವಂ ಪುತ್ರವಚ್ಚ ಪರಿಪಾಲಯ ವೃದ್ಧಮೇನಂ ಶಿಷ್ಯೋಽಸಿ ಚೇನ್ಮಮ ವಚಃ ಶ್ರುಣು ಪ್ರೀಣಯಾದ್ಯ |೬೭|

ಇಯಮೇಕೋಕ್ತಿರೇವಾತ್ರ ಶತೋಕ್ತಿರ್ಮಮ ಸರ್ವಥಾ |
ವೃಥಾ ಮಾ ಕುರು ತೇ ತೋಕವತ್ ತೇ ಬುದ್ಧಿಃ ಕೃಪಾನ್ವಿತಾ |೬೮|

ಅನ್ಯೇಷಾಂ ವಚನಂ ನೈವ ಶ್ರುಣು ವಿಪ್ರಾವ ಮಾನಿನಾಂ |೬೯|

೮. ವಿಪ್ರ ಪ್ರಕರಣಮ್ | ಶ್ಲೋಕಾ: [೭೦-೭೨]

ಪಾಪಿನಾಂ ಚ ಪ್ರಸಙ್ಗೋಽಯಂ ಸ್ಮೃತಃ ಪೂರ್ವ ಕೃತೋ ಮಯಾ|
ಮಯಾ ತರಙ್ಗಿಣೀತ್ಯುಕ್ತೇ ತ್ವಯಾ ಚೋಕ್ತಂ ನಿರಙ್ಗಿಣಾ |
ಸರ್ವದೇತ್ಯಂತರಙ್ಗೇಣ ತುರಙ್ಗವದನಂ ಸ್ಮರ |೭೦|

ಮದ್ದತ್ತನಿಷ್ಕಷಟ್ಕೇನ ಗರ್ವಿತೋಽದ್ಯೈವ ವಿಪ್ರಕ |
ಪುನಃ ಷಟ್ಕಂ ಚ ನಿಷ್ಕಾಣಾಂ ದಾಪಯೇ ಕೋಪಿತಾಂ ತ್ಯಜ |೭೧|

ಪುರುಷಾಂತರ ತತ್ವಾನಿ ತ್ಯಜ ತ್ವಂ ದ್ವಿಜಸತ್ತಮ |
ಮಜ್ಜನೇಷ್ವಗ್ರಗಂತಾರಂ ಶರಣಂ ವ್ರಜ ತಂ ಭಜ |೭೨|

೯. ಸೀತಾಪತಿ ಪ್ರಕರಣಮ್ | ಶ್ಲೋಕಾ: [೭೩-೮೦]

ಪೂರ್ವಂ ಶೇಷೋ ಮಮಾಶೇಷವಚನಂ ನೈವ ಚಾಕರೋತ್ |
ತಸ್ಯ ರಾಜಾಽಪಿ ಕಿಂಚಿದ್ ವಾ ಮದ್ದ್ರೋಹಫಲಮೀದೃಶಂ |೭೩|

ತತಃ ಸ್ವದೇಷತೋ ನಷ್ಟೌ ತಾವುಭೌ ಭೂಮಿಭಾರ ಕೌ |
ಕೋ ವಾ ಮದ್ದ್ರೋಹತಃ ಕಷ್ಟಂ ನಾನುಭೂಯಾದಿಹಾತ್ರ ಚ |೭೪|

ಪೂರ್ವಂ ಶೇಷೋ ಮಮಾಶೇಷವಚನಂ ನಾಪ್ಯಚಷ್ಟ ತಂ |
ರಾಜಾನಂ ತೇನ ದೋಷೇಣ ಕಾರಾಗೃಹನಿವೇಶನಂ |೭೫|

ನಿತ್ಯಂ ಪುರಾಣವಕ್ತಾರಂ ಬ್ರಾಹ್ಮಣಂ ಋಣಾದ್ ಗುಣಿನ್ |
ಪುಣ್ಯೇ ವೃಂದಾವನೇ ಸ್ವಸ್ಯಾಪ್ಯಗ್ರತೋ ನೈವ ಮೋಚಯೇತ್ |೭೬|

ತೇನ ದೋಷೇಣ ಮಹತಾ ವಿತ್ತಾಪಹರಣಂ ತ್ವಭೂತ್ |೭೭|

ಮಮ ನಂದನವಾಕ್ಯೇಷು ಚೈಕಂ ವಾ ನೈವ ಚಾಕರೋತ್ |
ತೇನ ದೋಷೇಣ ಮಹತಾ ಸರ್ವಾಣ್ಯೇತಾನಿ ಚಾಭವನ್ |೭೮|

ಸಹಸ್ರ ಲಕ್ಷ ಪರ್ಯಂತಂ ಪ್ರದಕ್ಷಿಣಮಥ ಕ್ಷಣಾತ್ |
ಚಕಾರಾಕ್ಷಿಸಹಸ್ರೇಣ ಲಕ್ಷಿತೋ ಯೋ ವಿಚಕ್ಷಣಃ |೭೯|

ತದನಾದೃತ್ಯ ತಾರಾಣಾಂ ಶಾರದಾನಾಕರಾಯಿತಂ |
ಹಯಗ್ರೀವಸ್ಯ ಚ ಹಾರಾಣಾಂ ಭಾರಂ ಮೇ ಗೌರವಾದ್ ದದೌ |೮೦|

೧೦. ವಿಪ್ರ ಪ್ರಕರಣಮ್ | ಶ್ಲೋಕಾ: [೮೧-೮೫]

ಮಮೋಪದೇಶಕರ್ಣಸ್ಯಾಪ್ಯಾದತ್ಸ್ವ ತ್ವಂ ಸುಕುಂಡಲಂ|
ತೇನ ತೇ ಕಾರ್ಯಸಿದ್ಧಿಂ ಚ ಕುರು ವಿಪ್ರ ಯಥೋಚಿತಂ |೮೧|

ಮತ್ಕರ್ಣಕುಂಡಲೇ ಚಾಪಿ ತವ ದಾಸ್ಯೇತಿ ಮೇ ಮತಿಃ
ಜಾಯತೇ ಜಾಯಯಾ ಯುಕ್ತೋ ಭಜ ಮಾಂ ಭುಜಗೇಶ್ವರಂ |೮೨|

ಕಿಂ ಕರೋಷಿ ದರಿದ್ರಸ್ತ್ವಂ ವಿಪ್ರ ರುದ್ರಂ ಚ ಮಾಂ ಭಜ |
ಸಾಂದ್ರ ಸೌಭಾಗ್ಯವಂತಂ ಮೇ ಪಟ್ಟಭದ್ರಂ ಚ ನ ತ್ಯಜ |೮೩|

ತುಂಡಲಾಗಮ ಪರ್ಯಂತಂ ಶೌಂಡ ಪದ್ಯಾನಿ ನೋ ವದೇ |
ಕುಂಡಲೇ ಚ ಗ್ರಹಾಣ ತ್ವಂ ಮುಂಡಿನಂ ಮಾಂ ಸುಭೋಜಯ |೮೪|

ತ್ವದಂತರ್ಯಾಮಿಣಂ ಶ್ರೀಮಾನ್ ಸರ್ವೇಷಾಂ ಪ್ರಾಣಿನಾಂ ಗುರುಂ |
ಮಮಾಭ್ಯವಹೃತೇಃ ಪುಣ್ಯಂ ಸ್ಯಾತ್ ತವೈವೇಹ ಬ್ರಾಹ್ಮಣ |೮೫|

೧೧. ಸೀತಾಪತಿ ಪ್ರಕರಣಮ್ | ಶ್ಲೋಕಾ: [೮೬-೯೭]

ಸೀತಾಪತೇ ನ ತ್ಯಜ ವಿಪ್ರಹಸ್ತಂ ತವೇಹ ಕೋ ವಾ ಗಣಯೇದ್ಗುಣೌಘಾನ್ |
ನಮ್ರಸ್ಯ ಚಾಮ್ಲಾನಮುಖಸ್ಯ ಭಕ್ತಿಯುಕ್ತ್ಯಾದಿಕಾನ್ ಸನ್ಮತಿಶಾಂತಿಕಾಂತೀಃ |೮೬|

ಕೃತ್ಯತ್ರಯಂ ನೈವ ಚಕಾರ ಪುತ್ರ ತ್ವಂ ಪಶ್ಯ ಸೀತಾಪತಿಮಾತ್ಮಕಾದ್ಯ |
ಆದ್ಯಾಪಿ ವಿಪ್ರಸ್ಯ ತು ಕಾರ್ಯಲೇಶಂ ಚಕಾರ ತೇನೈವ ಚ ತೋಷಿತೋಽಹಂ |೮೭|

ಅತಸ್ತ್ವಂ ಕುರು ಭಕ್ತಾನಾಮಗ್ರಣೀರ್ಗೌಣತಾ ನ ತೇ |೮೮|

ಅಧ್ಯಾಯಾನ್ ಪದ್ಯಜಾತಾನಾಂ ವೃದ್ಧಕಾರ್ಯಂ ಚ ಕಿಂಚನ |
ಗ್ರಾಹ್ಯಂ ಬಾಹ್ಯಗುಣಾನಾಮಪ್ಯಭಿವ್ಯಂಜಕಪುಂಜವತ್ |೮೯|

ಕರಂಡಪಿಂಡಿತತನುಃ ಕುಂಡಲೀವ ಸ ಪಂಡಿತಃ |
ಪ್ರಚಂಡ ಬುದ್ಧಿ ಶೌಂಡೋಽಪಿ ಬ್ರಹ್ಮಾಂಡೇ ಲಂಡಸಾಮ್ಯಗಃ |೯೦|

ಮಮ ನಂದನಸದ್ಭುದ್ಧಿ ಮನಿಶಮ್ಯ ಸುನಿಶ್ಚಿತಾಂ |
ವದನೇ ಸ ತು ಭಸ್ಮಾನಿ ಮಾನಯಾಮಾಸ ವೇನವತ್ |೯೧|

ಕಿಂ ಕರೋತಿ ಸ ಪೂರ್ವೇಣ ಕರ್ಮಣಾ ಗತಿಮೀದೃಶೀಂ |
ಯಾತಃ ಪ್ರಾತ: ಸಮುತ್ಥಾಯ ಮಾಂ ಗುರುಂ ಸ್ಮರತು ಪ್ರಿಯಂ |೯೨|

ವಕ್ಷೇ ಕರ್ಮಹರಂ ಸೂಕ್ಷ್ಮಂ ಕರ್ಮಿಣಾಂ ಶರ್ಮದಂ ಸುತ |
ಕರ್ಮ ಚಾಽರಭ್ಯತೇ ಪುಂಭಿರ್ನೈಷ್ಕರ್ಮ್ಯ ಜ್ಞಾನಸಾಧನಂ |೯೩|

ದ್ರುತಂ ಚೈತದ್ಧತಃ ಶುದ್ಧಿದ್ವಾರಾ ದರ್ದುರಜನ್ಮ ಚ |
ನಿರ್ದಲಂ ಕುರುತೇ ಸಾರ್ಧಂ ಗರ್ದಭಾದ್ಯಪಜನ್ಮಭಿಃ |೯೪|

ಪೂರ್ವಜನ್ಮನಿ ಯತ್ಕರ್ಮ ತ್ವಿಹ ಜನ್ಮನಿ ಯತ್ಕೃತಂ |
ತತ್ ಸರ್ವಂ ನಾಶಯತ್ಯಾಶು ಮಾಸಿ ಮಾಸಿ ಸಖಿನ್ ಶ್ರುಣು |೯೫|

ತಸ್ಮಾತ್ ಸತ್ಕರ್ಮ ಕರ್ತವ್ಯಂ ಕರ್ಣಶ್ರಾವ್ಯಂ ಕವಿಪ್ರಿಯಂ |
ಹರಿಪ್ರಿಯಂ ಹರೇಜ್ಞಾನಸಾಧನಂ ಹರತೇ ಮಲಂ |
ನ ಕರ್ತವ್ಯಂ ಚ ದುಷ್ಕರ್ಮ ಕದಾಽಪಿ ಕುಗತಿಪ್ರದಂ |೯೬|

ಯದಿ ಕುರ್ಯಾತ್ ಸ ವಿಪ್ರೋಽಪಿ ಕುಂಭಿನೀ ತಂ ನರಂ ಹರಿಂ |
ಶಂಸತಿ ಧ್ವಂಸಿತಾತ್ಮಾನಂ ನಾಹಂ ತಂ ಸಂಭರಾಮಿ ಚ |೯೭|

೧೨. ವಿಪ್ರ ಪ್ರಕರಣಮ್ | ಶ್ಲೋಕಾ: [೯೮-೧೧೨]

ನಞ್ ದ್ವಯಂ ಕುತೋ ವಿಪ್ರ ಪ್ರಯುಕ್ತಂ ಚ ತ್ವಯಾ ತ್ವಿಹ |
ಏಕೇನ ಪೂರ್ವಪದ್ಯಾರ್ಥೇ ಸಿದ್ಧೇ ಸತ್ಯಪರಂ ಕುತಃ |೯೮|

ನಾಹಂ ತಂ ಸಂಭರಾಮೀತಿ ಮಯಾ ಪ್ರೋಕ್ತೇ ತ್ವಯಾ ದ್ವಿಜ |
ನಾಹಂ ತಂ ನ ಭರಾಮೀತಿ ಪ್ರೋಚ್ಯತೇ ಶೋಚ್ಯತಾ ನ ಮೇ |೯೯|

ತವಾಪಿ ನ ಸ್ಯಾತ್ ಸಾಽವಸ್ಥಾ ಸ್ವಸ್ಥೋ ಭವ ಸಭಾಸು ಚ |
ಮದವಸ್ಥಾಂ ವದಸ್ವ ತ್ವಂ ಮದುಕ್ತಶ್ಲೋಕ ಸಂಚಯೈಃ |೧೦೦|

ಕಿಂತು ತ್ವತ್ ಕ್ಷೇತ್ರವಿಘ್ನಾನಿ ಯಃ ಕರೋತಿ ನರಾಧಮಃ |
ತಸ್ಯೈವ ಸಾ ಶೋಚ್ಯತಾ ಸ್ಯಾನ್ಮಯೋಪಾಸ್ಯಹಯಾಸ್ಯತಃ |೧೦೧|

ತ್ವಚ್ಚಿಂತಯಾ ಕಿಂ ಮಚ್ಚಿಂತಾಂ ಕುರು ವಿಪ್ರ ತವೋಚಿತಾಂ |
ವಾಂಛಿತಂ ಚ ಭವೇದಂಚನ್ ಮಾಂ ಕಾಂಚನರತಿಂ ತ್ಯಜ |೧೦೨|

ಮುಂಚ ಮುಂಚೇಹ ದುಶ್ಚಿತ್ತಂ ಮಚ್ಚಿತ್ತಂ ಕುರು ಸರ್ವದಾ |
ಮುಂಚ ಕಾಂಚನಚಿಂತಾಂ ತ್ವಂ ಚಿನ್ಮಾತ್ರಂ ಚಾಚ್ಯುತಂ ಭಜ |೧೦೩|

ರಾಮಚಂದ್ರ ವರಭೂಪತಿಸಾಂದ್ರಪ್ರೇಮವಂದ್ಯ ಚರಣೋ ರಘುಪೇಂದ್ರ |
ಬಹ್ಮರುದ್ರಮರುದಿಂದ್ರಸುರೇಂದ್ರಾರಾಧ್ಯ ರಾಜ್ಯವರದೋಽಸಿ ನರೇಂದ್ರ |೧೦೪|

ತ್ವದ್ದತ್ತತದ್ರಾಜ್ಯಭೂತಿಂ ಕಮಲಾಲಯ ಪಾಲಯ |
ತೇನ ಸಂಪೂಜಿತೋ ನಿತ್ಯಂ ಸ್ವಾಲಯಂ ನೈವ ಚಾಲಯ |೧೦೫|

ಇತ್ಯಹಂ ಪ್ರಾರ್ಥಯಾಮೀಹ ರಾಘವೇಂದ್ರಂ ಮುನೀಂದ್ರ ಕಂ |
ಮಮ ವೃಂದಾವನೇ ನಿತ್ಯಂ ದೇವೇಂದ್ರೈ: ಸಹ ಸಂಸ್ಥಿತಂ |೧೦೬|

ಮಾನವಾನಾಂ ಧನೇ ಹಾನಿರ್ಮಧುಸೂದನಶಾಸನಂ |
ವಿನಾ ನೈವಾಸ್ತಿ ಸಂದೇಹೋ ನೈವ ಪೃಚ್ಛ ಧನಾಗಮಂ |೧೦೭|

ಪೃಚ್ಛ ಮಾ ಸ್ವಚ್ಛತತ್ವಾನಿ ಕಚ್ಛಪಸ್ಯ ಮಹಾತ್ಮನಃ |
ಸ್ವೇಚ್ಛಯಾ ಸಚ್ಚರಿತ್ರಾಣಾಂ ಪ್ರಾಯಚ್ಛದ್ ಭಕ್ತಿಮೇವ ಯಂ |೧೦೮|

ಓಂ ಏತತ್ಸರ್ವಂ ಸ್ವಾಪ್ನಪದ್ಯೇನ ಗರ್ವಂ ಹಿತ್ವಾ ಸರ್ವೇ ವಿಪ್ರವರ್ಯಾಸ್ಯಜೇನ |
ಶೃತ್ವಾ ಚೋರ್ವ್ಯಾಂ ಶರ್ವ ಗುರ್ವಾದಿ ದೇವಾನ್
ದೃಷ್ಟ್ವೋರ್ವಶಿಂ ಯಾಂತು ಮಾಂ ಮಾನವೇಂದ್ರಾಃ |೧೦೯|

ಇದಂ ವೃಂದಾವನಾಖ್ಯಾನಂ ಯೇ ಪಠಂತಿ ಮನೀಷಿಣಃ |
ಮುಕುಂದಾವನಮೇವಾಸ್ತು ತೇಷಾಂ ಕಂದಾಶನಾಜ್ಞಯಾ |೧೧೦|

ಇದಮರ್ಪಿತಮೇವಾಸ್ತು ಹಯಶೀರ್ಷಸ್ಯ ಪಾರ್ಷದಾತ್ |
ಸಮಂ ಸಹಸ್ರಶೀರ್ಷಸ್ಯ ಸೂಕ್ತಸ್ಯ ಪುರುಷಾತ್ ಕೃತಮ್ |೧೧೧|

ಯಚ್ಛ್ರುಣ್ವತಾಂ ಭಕ್ತಿರುದಾರಸದ್ಗುಣೇ ಹರೌ ಹರೇರ್ಲೋಕಗತೇ ತಥಾ ಮಯಿ |
ಭವತ್ಯಹೋ ಸರ್ವಶುಭಾಪ್ತಿಸನ್ಮತೀರ್ ದದಾತ್ಯಜಸ್ರಂ ಸುತ
ಸತ್ಯಮೇವ ತತ್ ಓಂ |೧೧೨|

| ಇತಿ ಶ್ರೀಸ್ವಾಪ್ನವೃಂದಾವನಾಖ್ಯಾನೇ ಅಲೌಕಿಕ ವಿಭಾಗೇ
ನಿದರ್ಶನಪರ್ವಣಿ ಪಂಚದಶಾಧ್ಯಾಯ: ಸಮಾಪ್ತ: |

|| ಶ್ರೀ ಅಶ್ವಿನೀಹಯಗ್ರೀವಾತ್ಮಕ ಕೃಷ್ಣಾರ್ಪಣಮಸ್ತು ||

16. Svaapnavrundavanakhyana