13. Svaapnavrundavanakhyana

Composer : Shri Vadirajaru

| ಅಥ ತ್ರಯೋದಶಾಧ್ಯಾಯಃ |

೧. ವಿಪ್ರ ಪ್ರಕರಣಮ್ | ಶ್ಲೋಕಾ: [೧-೩೨]

ಹರಿಃ ಓಂ |

ವಾದಿರಾಜಾಖ್ಯಭಟ್ಟಂ ತು ಸ್ಪಷ್ಟಂ ವದ ಸುತುಷ್ಟಿದ |
ಪುಷ್ಟಗಾತ್ರಂ ಚ ಮದ್ದತ್ತಾತ್ ಸುಷ್ಟು ಪಾಟವಸಂಯುತಂ |೧|

ಕಾಷ್ಟಭಾರಸ್ಯ ಚೋದ್ಧಾರೇ ಕಷ್ಟಾತ್ಕಷ್ಟಕೃತಿಂ ಶಠಂ |
ಪಟ್ಟವರ್ಧನ ಶುಂಠಾಗ್ರ್ಯಂ ಮತ್ಕೃತಿಂಚ ಪಠೇತಿ ತಂ |೨|

ಏತತ್ ಪದ್ಯದ್ವಯಂ ವಿದ್ವನ್ ವದಸ್ವಾದ್ಯ ಸದಾ ಬುಧಂ |
ವೇದವೇದ್ಯ ಸದಾರಾದ್ಯ ಶುದ್ಧ ಮತ್ಪಟ್ಟವರ್ಧನ |೩|

ಅಹಂ ಪಾಲಿತವಾನೇತದ್ದಿನಪರ್ಯಂತಮೇವ ಚ |
ಇದಾನೀಂ ತು ಹರಿಷ್ಯಾಮಿ ತದ್ಧನಂ ಮಾನವರ್ಧನಂ |೪|

ಪುತ್ರ ಪುತ್ರ ತವಾಽರ್ಯಾಣಾಂ ಬುದ್ಧಿರೇವಂ ವಿವರ್ಧತೇ |
ತತ್ರ ತತ್ರ ಚ ಮತ್ಕಾರ್ಯಂ ಶುದ್ಧ ಬುದ್ಧಿಗತಂ ಕುರು |೫|

ವೃದ್ಧಂ ಬುದ್ಧಿಮತಾಂ ಶ್ರೇಷ್ಠಂ ಬದ್ಧಭಕ್ತಿಂ ಚ ಮತ್ಪದೇ |
ಶುದ್ಧಂ ಕ್ರುದ್ಧಂ ತು ದಾರಿದ್ರ್ಯಾತ್ ದಾರಾದಿಷು ಚ ಮಾ ತ್ಯಜ |೬|

ಏವಂ ನೀತಿಂ ಮಯಾಂ ನೀತಾಂ ಸಿತಾಂ ಮಾ ತಾತ ತಾಂ ತ್ಯಜ |
ತ್ರಾತಾಽಹಂ ತ್ವಾಂ ಸದಾ ಕಾಂತ ಮಾಂ ತಾತಂ ಶರಣಂ ವ್ರಜ |೭|

ಮನುಷ್ಯಾಧಮ ತೇ ಶಂಕಾಂ ಸುನಿ:ಶೇಷಾಂ ತ್ಯಜಸ್ವ ಚ |
ಭವಿಷ್ಯಸ್ಯನ್ಯಥಾ ಪ್ರೇತಸ್ತ್ವಂ ನಶಿಷ್ಯಸಿ ಸರ್ವಥಾ |೮|

ಕುಮತಿಂ ತ್ಯಜ ಜೀವ ತ್ವಂ ಸುಮತಿಂ ಭಜ ಸರ್ವಥಾ |
ಸತ್ಕುರು ದ್ವಿಜವಾಕ್ಯಂ ತು ತತ್ ಕುರುಷ್ವ ಮಯೋದಿತಂ |೯|

ಅನ್ಯಥಾ ನರಕಂ ಯಾಸಿ ಸುರಕಂಪಿತದೇಹವಾನ್ |
ಕ್ರಕಚೈರ್ದಾರ್ಯತೇ ತ್ವಂ ಹಿ ಸುಕೃತೈರ್ಹೀನತಾಂ ವ್ರಜೇಃ |೧೦|

ಜೀವ ಜೀವ ಕುತೋ ಯಾಸಿ ನರಕಂ ನರಕಂಪನಂ |
ಜೀವ ಜೀವ ಹರೇರ್ಭಕ್ತ್ಯಾ ಇಹೈವ ಶರದಾಂ ಶತಂ |೧೧|

ಜೀವ ಜೀವ ಗುರೌ ಭಕ್ತ್ಯಾ ಮಯಿ ಕಾರುಣ್ಯ ವಿಗ್ರಹೇ |
ಜೀವ ಜೀವ ಸ್ವಪುಣ್ಯೇನ ಕರ್ಮಣಾ ಶರದಾಂ ಶತಂ |೧೨|

ಮನುಷ್ಯಾಧಮ ತೇ ವಾಚಾ ತ್ವಾಚಾರ್ಯೋಽಯಂ ನ ಭೀತಿಯುಕ್ |
ಸ್ವಚಾರಿತ್ರ್ಯಂ ಚ ಮೇ ಸರ್ವಂ ವಿಚಾರ್ಯೈವಂ ವದಿಷ್ಯತಿ |೧೩|

ತಸ್ಮಾಚ್ಛ್ರುಣೋಪಿ ಚೇದ್ವೃತ್ತಂ ಶ್ರುಣುಷ್ವ ತ್ವಂ ದ್ವಿಜೋತ್ತಮ |
ನೋ ಚೇದ್ ಗಚ್ಛಸ್ವ ದೂರಂ ತು ದಾರುಣಂ ನರಕಂ ತಥಾ |೧೪|

ಸ್ವರ್ಗಂ ವೈ ಗಂತುಕಾಮಶ್ಚೇದ್ ಭರ್ಗಲೋಕಂ ಸುಖೋತ್ಕಟಂ |
ನಿರ್ಗತೋ ನ ಭವಸ್ವ ತ್ವಂ ಸರ್ಗಾನ್ಮದ್ವಚನಸ್ಯ ತು|೧೫|

ಪರಲೋಕಪ್ರವೃತ್ತೇಶ್ಚ ಪ್ರವಕ್ತೃತ್ವೇ ಪ್ರಭೋರ್ಮಮ |
ಪ್ರಭುತ್ವಂ ಚಾಸ್ಯ ಮೇ ದತ್ತಂ ವಿಪ್ರಸ್ಯಾಽಶು ಪ್ರಗೃಣ್ಹತಃ |೧೬|

ತಸ್ಮಾತ್ ದ್ವಿಜೇನ ಸುಜನೈಃ ಪ್ರಜಾನಾಂ ಹಿತಕಾಮ್ಯಯಾ |
ಸಮಾಜೇ ಸಜ್ಜನಾನಾಂ ಚ ಶ್ರೋತವ್ಯಂ ನಿಜಮೀಪ್ಸುಭಿಃ |೧೭|

ಹೇ ಜೀವ ಜೀವ ಸಕಲೇಶ್ವರಜೀವಭೇದಂ ಜಾನೀಹಿ ಜೀವಗತಮೇವ ಜನೇಷು ಧೀಮನ್ |
ಕೋ ಮಾನವಸ್ತವ ಸಮಾನಸುಮಾನವೇಷೋ ಜ್ಽಜಾನಾದಿ ಗೂಹನ ಪರೋ ನ ಮನೋನುಸಾರೀ |೧೮|

ಅಹಂ ಜ್ಞಾನಿಪ್ರಿಯೋ ನಿತ್ಯಂ ಜ್ಞಾನಿನೋ ಹಿ ಮಮ ಪ್ರಿಯಾಃ |
ನೈವಾಜ್ಞಾನೀ ಮಾನಯುಕ್ತಃ ಶ್ವಾಯೋನಿಶತಂ ವ್ರಜೇತ್ |೧೯|

ಮಮ ನಂದನವಿಜ್ಞಾನಂ ಭಾನು ತೇಜೋನಿಭಂ ಶುಭಂ|
ಶ್ರುಣು ಮೋಹನ ಮತ್ಪುಣ್ಯಂ ಕಾರಣಂ ಕುಜನಾನ್ಯಥಾ |೨೦|

ಪ್ರತ್ಯಕ್ಷಸಿದ್ಧಮೇತದ್ಧಿ ತೇಜಸಾ ಚ ಪ್ರಕಾಶ್ಯತೇ |
ಸ್ಥೂಲಂ ಪ್ರಕಾಶಕಂ ಸೂಕ್ಷ್ಮಂ ನತು ತೇಜಃ ಪ್ರಕಾಶಕಂ |೨೧|

ದೂರಸ್ಥಪುರುಷಸ್ಯಾಪಿ ಜ್ಞಾನಂ ಸೂಕ್ಷ್ಮ ಪ್ರಕಾಶಕಂ |
ಕ್ವಚಿತ್ಕಂ ತೇಜಸ: ಸಾಹ್ಯಂ ಬಾಹ್ಯ ಸಾಧನ ಮೇವ ಹಿ |೨೨|

ಆಂತರಂ ತು ತಮಃ ಕಾಂತ ಜ್ಞಾನಂ ತು ಹರತೇಽನಿಶಂ |
ಜ್ಞಾನಂ ಮಾನೇನ ಚಾಽನೀತಂ ಹೀನಂ ವಿಷಯಮಾನಿನಂ |೨೩|

ಸ್ವಾನುರೂಪಂ ಮುನಿಂ ಚಾಪಿ ಕುರುತೇ ಚ ನಿವರ್ತನಂ |
ಜ್ಞಾನಂ ತು ಮೌನಿನಾಂ ಮುಖ್ಯಂ ಕಾನನೇ ವಾಸಿನಾಮ್ ಮುನೇ |೨೪|

ಶ್ವಾನಜನ್ಮಾನಿ ದೂರಾಣಿ ಸ್ವಯಂ ನಿತ್ಯಂ ಕರೋತಿ ಚ |
ತಸ್ಮಾತ್ ಜ್ಞಾನೀ ಸದಾ ಪೂಜ್ಯಃ ಪೂಜ್ಯಾತ್ಪೂಜ್ಯತಮಃ ಸ್ಮೃತ: |೨೫|

ಅಹಂ ಜ್ಞಾನಿಪ್ರಿಯೋ ನಿತ್ಯಂ ಜ್ಞಾನಿನೋಪಿ ಮಮಪ್ರಿಯಾಃ |
ನೈವಜ್ಞಾನೀ ಮಾನಯುಕ್ತಃ ಶ್ವಾನಯೋನಿಶತಂ ವ್ರಜೇತ್ |೨೬|

ಮಮೋಪದೇಶವಾಕ್ಯಾನಿ ಶ್ವಾಸಮಾತ್ರಾವಶೇಷಿತಾಃ |
ಶ್ರುತ್ವಾ ಕಾಸಾದಿದೋಷೈಶ್ಚ ಮುಚ್ಯಂತೇ ನಾತ್ರ ಸಂಶಯಃ |೨೭|

ಮಮೋಪದೇಶ ವಾಕ್ಯಾನಿ ಸರ್ವಾಭೀಷ್ಟಪ್ರದಾನಿ ಚ |
ಶ್ವಾನಾದಿಹೀನಜನ್ಮಾನಿ ನಿರಾಕುರ್ವಂತಿ ನಾನ್ಯಥಾ |೨೮|

ಹೇ ಪುತ್ರ ವೃತ್ತಶ್ಲೋಕಾನಾಮಂತೇ ಯೋಜ್ಯ ಫಲಶ್ರುತೀನ್ |
ಶ್ಲೋಕಾನ್ ವೈ ಶೋಕವಿಚ್ಛೇದಂ ಕುರ್ವತಃ ಸಾರ್ಥಕಾನ್ ಕುರು |೨೯|

ಬ್ರಾಹ್ಮಣಾಶನಚಿಂತಾ ಮಾ ಸಾಽಂಭೃಣೀ ತವ ದಾಸ್ಯತಿ |
ಕಾಮಣಿಂ ಮಾ ಭಜ ತ್ವಂ ಮತ್ಪುತ್ರ ಚಿಂತಾಮಣಿಂ ಭಜ |೩೦|

ಅಷ್ಟಾಧ್ಯಾಯಾನ್ ಕುರು ಸ್ಪಷ್ಟಂ ಶಿಷ್ಟ ಕಾಠಿಣ್ಯ ವರ್ಜಿತಾನ್ |
ಪುಷ್ಟಾರ್ಥಾನರ್ಥಿನೋಽಭೀಷ್ಟಂ ದದತಃ ಪಠತೋಽನಿಶಂ|೩೧|

ಯೇ ವಿಷ್ಣುಭಕ್ತಾಃ ಕೃತ ಕೌತುಕಾ: ಸದಾ ಸೀತಾಪತಿವ್ಯಾಸ ಸುತಾದಯೋ ಮಮ |
ಭಕ್ತಾಶ್ಚ ಸರ್ವೇಽಪಿ ಸುತತ್ವ ವಾದಿನಾಮಙ್ಗೀಕೃತಾ ಮತ್ಕೃತಿರಸ್ತು ಸರ್ವದಾ |೩೨|

೨. ಲಕ್ಷ್ಮೀಪತಿ ಪ್ರಕರಣಮ್ | ಶ್ಲೋಕಾ: [೩೩-೪೦]

ಇತಿ ಶ್ರೀತ್ಯಾದಿ ವಾಕ್ಯಾನಿ ಮಯಾಽನುಕ್ತಾನ್ಯಪಿ ಪ್ರಿಯ |
ಪ್ರತ್ಯಧ್ಯಾಯೇ ತ್ವಯಾ ಚಾಂತೇ ಪ್ರಯೋಕ್ತವ್ಯಾನಿ ಚಾಽಜ್ಞಯಾ |೩೩|

ಸಮಾಪ್ಯಾಽಖ್ಯಾನಮೇತದ್ ವೈ ಮದ್ವೃಂದಾವನನಾಮಕಂ |
ಸದ್ವೃಂದಾನಾಂ ಚ ಮಧ್ಯೇ ಚಾಽನಂದೀಕುರು ದ್ವಿಜೋತ್ತಮಂ |೩೪|

ಆಚಾರ್ಯಶಬ್ದಪ್ರವೃತ್ತೌ ನಿಮಿತ್ತಂ ಚಾಸ್ತಿ ಬ್ರಾಹ್ಮಣೇ |
ಮಮಾಪೂರ್ವಗುಣಾನಾಂ ತು ಪ್ರವಕ್ತೃತ್ವಂ ದಿನೇ ದಿನೇ |೩೫|

ಶ್ರೋತ್ರಿಯಃ ಶಾಸ್ತ್ರವೇತ್ತಾ ಚ ಕೃಪಾಪಾತ್ರೋ ಮಮಾತ್ರ ತು |
ಸತ್ಪಾತ್ರತ್ವೇ ಮಯಾ ಪ್ರೋಕ್ತಂ ತದಪಿ ಗ್ರಾಹ್ಯಮೇವ ಹಿ |೩೬|

ಸುಕ್ಷೀಣಂ ಬ್ರಾಹ್ಮಣಂ ವಿದ್ವನ್ ಗುಣಿನಂ ಫಣಿನಂ ಭಣ |
ನಂದನ ಶ್ರುಣು ಮೇ ವಾಣೀಂ ಗುಣಭೂಷಣಕಾರಣ |೩೭|

ಮಮಾಽಜ್ಞಾಧಾರಣೇಶಾನಂ ಮಮ ಪ್ರಾಣ ಭಣಾಧುನಾ |
ಚಿಂತಾಮಣೇ ದರಿದ್ರಾಣಾಂ ಪ್ರಾಣಿನಾಂ ಪ್ರಾಣಭೂಷಣ |೩೮|

ಶಕ್ತಃ ಕಸ್ತ್ವದ್ಗುಣಮಣೀನ್ ವರ್ಣಿತುಂ ಭಣ ಮಾಂ ವಿನಾ |
ಶಿಷ್ಯಸ್ಯ ಗುಣಸಂಭೂತಿವರ್ಣನೇ ಗುಣಭೂಷಣ |
ಗುಣಜ್ಞಃ ಪ್ರಾಣತೇ ಕಾಣೋ ಹ್ಯಕ್ಷೀಣಾಂ ಮನುತೇ ನು ಕಿಂ |೩೯|

ತಸ್ಮಾತ್ ತ್ವದ್ಗುಣಸಂಭೂತಿಮಹಮೇವ ಮುನೀಶ್ವರ |
ಜಾನಾಮಿ ಮಾನವಂ ಚಾನ್ಯೋ ನ ಪಶ್ಯಾಮಿ ಸುಮಾನವ |೪೦|

೩. ವಿಪ್ರ ಪ್ರಕರಣಮ್ | ಶ್ಲೋಕಾ: [೪೧-೪೮]

ಸಂಸಾರಕ್ಲೇಶತಸ್ತೋಕ ಶ್ಲೋಕಂ ತ್ವಂ ತ್ಯಕ್ತವಾನಸಿ |
ಏವಂ ತೇ ಶೋಕಹರ್ತಾ ಕೋ ಮಾಂ ವಿನಾ ಕೋವಿದೋ ವದ |೪೧|

ದಕ್ಷಿಣೇ ಕರ್ಣರಂಧ್ರೇ ಚ ತಂದ್ರೀ ನ ಸ್ಯಾತ್ ಯಥಾ ತವ |
ಮಂದ್ರಮಧ್ಯಮತಾರೈಶ್ಚ ಸಧ್ರೀಯಂತೇ ವಚಾಂಸಿ ನಃ |೪೨|

ಇತ್ಯೇಕಂ ಶ್ಲೋಕಮುಖ್ಯಂ ಮೇ ಪುನರ್ವಚ್ಮಿ ಶುಕೇ ಯಥಾ |
ಪಾಕಶಾಸನಲೋಕಂ ಚ ಪುನರ್ಯಾಮಿ ಯಥಾಗಮಂ |೪೩|

ಯತ್ಕರ್ಣೇ ಕಾಮಣಿಂ ತ್ವಂ ಹಿ ಧೃತವಾನಸಿ ಬ್ರಾಹ್ಮಣ |
ತತ್ಕರ್ಣೇ ದಕ್ಷಿಣೇ ಸ್ವಚ್ಛಂ ಮಣಿಂ ತ್ವಂ ಧೃತವಾನಸಿ |೪೪|

ಪಶ್ಯ ಸಾಮರ್ಥ್ಯಮೇತನ್ಮೇ ವಿಪರೀತಂ ತವಾಧುನಾ |
ಕರ್ಣಸ್ಯಾಽಭರಣಂ ವಿಪ್ರ ಶ್ರುಣು ಮೇ ವಚನಂ ತ್ವಹೋ |೪೫|

ಕುತೋ ದಕ್ಷಿಣಮತ್ಕರ್ಣೇ ಕಾಮಣಿಃ ಕುಣಪೋತ್ತಮ |
ವಾಮಕರ್ಣೇ ಧರಸ್ವ ತ್ವಂ ಕಾಮಣಿಂ ಬ್ರಾಹ್ಮಣೋತ್ತಮ |೪೬|

ಮಮೋಪದೇಶಕರ್ಣೇ ತು ಸನ್ಮಣಿಂ ತ್ವಂ ತು ಮಾ ತ್ಯಜ |೪೭|

ಅಹಂ ಶತಂ ಸಹಸ್ರ ವಾಽಪ್ಯಯುತಂ ನಿಯುತಂ ತಥಾ |
ಲಕ್ಷಂ ಲಕ್ಷಣಸಂಪನ್ನ ವಕ್ಷ್ಯೇ ಶಿಕ್ಷನ್ ಜನಾನ್ ಕ್ಷಣಾತ್ |೪೮|

೪. ಲಕ್ಷ್ಮೀಪತಿ ಪ್ರಕರಣಮ್ | ಶ್ಲೋಕಾ: [೪೯-೬೦]

ಬ್ರಾಹ್ಮಣೋಽಯಂ ನ ಗೃಣ್ಹಾತಿ ಶಾಸ್ತ್ರಾಣಿ ಸುಮನಾ ಅಪಿ |
ಕೃಣುತೇ ಚಾನ್ನಯತ್ನಂ ಚ ಮನುತೇ ಋಣಮೋಚನಂ |
ಶ್ರುಣುತೇ ಲೋಕವಾರ್ತಾಂ ಚ ಭಣತೇ ಸ್ವಯಮಪ್ಯಹೋ |೪೯|

ಮಯೋಕ್ತಶ್ಲೋಕಸತ್ಪಾಕೇ ಶ್ಲೋಕವಿಚ್ಛೇದಕಾರಕೇ |
ಏಕಂ ವಾಽರ್ಧಂ ಚ ಸಾರ್ಧಂ ವಾ ಶ್ಲೋಕಂ ತ್ಯಜತಿ ಕಾಕಧೀಃ |೫೦|

ಅತೋ ನ ವಕ್ಷ್ಯೇ ಶಾಸ್ತ್ರಾಣಿ ಸೂಕ್ಷ್ಮಾಣಿ ವಿವಿಧಾನಿ ಚ |
ಗಹ್ವರೇಣ ಸುರಾಣಾಂ ಚಾ ಸ್ವರಾಣಾಂ ತು ತಥೈವ ಚ |೫೧|

ಗ್ರಂಥರತ್ನಸ್ಯ ಬಾಹುಲ್ಯಾತ್ ಸಾಫಲ್ಯಾದ್ ವಚನಸ್ಯ ಮೇ |
ಅಯೋಗ್ಯ ಜನಮೋಹೇನ ಸ್ವಯೋಗ್ಯಗತಿಮಿಚ್ಛತಾಂ|೫೨|

ಸುಜನಾನಾಂ ದ್ವಿಜಶ್ರೇಷ್ಠ ಕುಜನಾನ್ ಭಜತಾಂ ತಥಾ |
ನ ವಕ್ಷ್ಯೇ ಸೂಕ್ಷ್ಮವೃತ್ತಾಂತಂ ಧ್ವಾಂಕ್ಷವೃತ್ತಿಂಚ ಕಾಂಕ್ಷತಾಂ |೫೩|

ಗೇಹಂ ಗತ್ವಾ ಸ್ವದೇಹಂ ಚ ಗೂಹಯಿತ್ವಾ ಮಹದ್ಭಯಾತ್ |
ತೇಽಪಿ ಸೂನೃತೂವಾಕ್ಯಂ ಚೇದ್ ವದಂತಿ ಕುಜನಾ ಅಪಿ |೫೪|

ಹೃಷ್ಟಾಃ ಪುಷ್ಟಾಃ ಭವಂತ್ಯದ್ಧಾ ಮನಸಾ ದೇಹತಸ್ತಥಾ |
ಪರುಷಂ ಚೇದ್ ವದಂತ್ಯೇತೇ ಕಲುಷೀಕೃತಬುದ್ಧಯಃ |೫೫|

ಅಹಮೇತಾದೃಶಾನ್ ವಕ್ಷೇ ಜನಾನ್ನ ಪ್ರತಿ ಪುತ್ರಕ |
ತಸ್ಮಾದಲಂ ತಾವದೇವ ಯಾವದೀಶ್ವರಪ್ರೇರಿತಂ |೫೬|

ಕಾರಿತಂ ಚೇದನೇದಂ ತು ತಾರಿತುಂ ಭವಸಾಗರಾತ್ |
ಮಾರಿತುಂ ದೈತ್ಯಕೂಟಂ ಚ ಪಾರತಂತ್ರ್ಯಾತ್ ದ್ವಿರೂಪತಃ |೫೭|

ಇದಂ ವೃಂದಾವನಾಖ್ಯಾನಂ ಯೇ ನ ಶೃಣ್ವಂತಿ ಮಾನವಾಃ |
ದಾನವಾನಾಂ ಗತಿಂ ಪ್ರಾಪ್ಯ ಶ್ವಾನಜನ್ಮಾನಿ ಯಾಂತು ತೇ |೫೮|

ಲಕ್ಷ್ಮೀಪತೇ ಮಮ ಕೃತಿಂ ನಿತರಾಂ ಸುತಸ್ಯ ಸೀತಾಪತೇಶ್ಚ ಕೃತಕೃತ್ಯಗತೇಃ ಪ್ರಯತ್ನಾತ್ |
ನಿತ್ಯಂ ತು ತತ್ರ ಗತ ಏವ ಚ ತ್ವಂ ತು ಹಿತ್ವಾ ಕೃತ್ಯಂ ತವಾಪಿ ಪತಿತಾನಪಿ ಪಾವಯಂತೀಂ |೫೯|

ಶ್ರಾವಯಾಽಜ್ಞಾಂ ಮಯಾ ದತ್ತಾಂ ಧೃತ್ವಾ ಶಿರಸಿ ಪಾಲಯ |
ಅವಾಮಿ ತ್ವಾಂ ಸದಾ ಯತ್ನಾತ್ ತವಾಯುರ್ವೃದ್ಧಿಮೇಷ್ಯತಿ |೬೦|

೫. ಬಹುಭಕ್ತ ಪ್ರಕರಣಮ್ | ಶ್ಲೋಕಾ: [೬೧-೬೫]

ಹೇ ದಾಸಾಃ ಸಂತಿ ಲೋಕೇ ಚ ಕೇ ದಾಸಾಸ್ತು ಭವಾದೃಶಾಃ |
ಕೋ ದಾಸತ್ವಮವಾಪೇಹ ಖೇದಾತ್ ಸರ್ವೇ ಪುನರ್ಗತಾಃ |೬೧|

ಮಮ ಸಂಗೀತಲೋಲಾಶ್ಚ ಮದ್ಭಕ್ತ್ಯಾ ಚ ಸುನಿರ್ಮಲಾಃ |
ಭವತಾಂ ಕಮಲಾ ದೇವೀ ಗೇಹೇ ತಿಷ್ಠತು ಲಾಲಿತಾ |೬೨|

ಯೂಯಂ ವೃಂದಾವನಾಖ್ಯಾನೇ ಮಮಾಽಖ್ಯಾನಪರಾನ್ ಬಹೂನ್ |
ಶ್ಲೋಕಾನ್ ಸಙ್ಗೀತಸಂಸ್ಥಾನ್ ವೈ ಹ್ಯಙ್ಗೀಕುರ್ವಧ್ವಮಂಜಸಾ |೬೩|

ಇದಮೇವ ಮಹತ್ಕಾರ್ಯಂ ಭವತಾಂ ಮಮ ಪೂಜನಂ |
ಇದಮೇವ ಮಹಾಪ್ರೀತಿಸಾಧನಂ ಭವತಾಂ ಮತಂ |೬೪|

ಭವದ್ಬಿಸ್ತು ಸುಸಙ್ಗೀತಂ ಮಾಂ ಚ ಶೃಙ್ಗಾರ ರೂಪಿಣಂ |
ಶ್ರುತ್ವಾಽಙ್ಗಾ ಅಪಿ ಸರ್ವೇಽಪಿ ನಿ: ಸಂಗಾ ಯಾಂತು ಮದ್ಗತಿಂ |೬೫|

೬. ವಿಪ್ರ ಪ್ರಕರಣಮ್ | ಶ್ಲೋಕಾ: [೬೬-೭೦]

ಹೇ ಬ್ರಾಹ್ಮಣ ತ್ವಂ ಕುರು ಚಾನ್ನಯತ್ನಂ
ಮದ್ವಾಕ್ಯ ರತ್ನಂ ಶ್ರುಣುತೇ ನ ಕೋಽಪಿ |
ಅನಾದರಾನ್ಮದ್ವಚನಂ ಸುತೋಽಪಿ
ತೈಣೋಪಮಂ ತತ್ಕೃತವಾನಹೋ ಮೇ |೬೬|

ಮತ್ಸುತಾನಾದರಂ ದೃಷ್ಟ್ವಾ ಸರ್ವೇ ಕುರ್ವಂತ್ಯನಾದರಂ |
ಅತೋನಿರಾಶಸ್ತ್ವಂ ವಿಪ್ರ ಭವರಾಶಿಂ ತರಸ್ವ ಹ |೬೭|

ಕುಟುಂಬ ಭರಣಾರ್ಥಂ ಚ ಮರಣಾರ್ತಿಸಮಂ ತ್ಯಜ|
ಕರಣಂ ಚಾತಿಯತ್ನಸ್ಯ ಶರಣಂ ವ್ರಜ ಮಾಂ ಮುನಿಂ |೬೮|

ಯಾವದೀಶ್ವರದತ್ತಂ ವೈ ತಾವತೈವ ಸುಖೀಭವ |
ಮಾಽವತಾಸ್ತ್ವಂ ಸದಾ ವಿಪ್ರ ತಾವಕಸ್ಯ ವಚಃ ಶ್ರುಣು |೬೯|

ಮದ್ವಾಕ್ಯರತ್ನಮಾಶುತ್ವಂ ಧರ ಕಾಲಾಂತರೇ ಮಮ |
ಆಲಯಂ ಯಾಸ್ಯಸೇ ವಿಪ್ರ ಪಾಲಕೋಹಂ ಸದಾ ತವ |೭೦|

೭. ವಾದಿರಾಜ ಭಟ್ಟ ಪ್ರಕರಣಮ್ | ಶ್ಲೋಕಾ: [೭೧-೭೮]

ವೃದ್ಧೇ ಬುದ್ಧಿಮತಾಂ ಬುದ್ಧೇ ಶ್ರದ್ಧಾ ಬದ್ಧೇ ದಯಾಂ ಕುರು |
ಕಾರುಣ್ಯಂ ಕುರು ಚಾರಣ್ಯಂ ನ ವಸ ತ್ವಂ ಮುನೀಶ್ವರ |೭೧|

ಬ್ರಾಹ್ಮಣೇ ಮತ್ಪದಂ ಪ್ರಾಪ್ತೇ ಶರಣಂ ಕರುಣಾರ್ಣವ |
ಸ್ವಸ್ಥಚಿತ್ತೋ ಭವತ್ವದ್ಯ ಮತ್ಕೃತಿಂ ಸತತಂ ವದೇತ್ |೭೨|

ಸತಾಂ ಚ ಶ್ರುಣ್ವತಾಂ ನಿತ್ಯಂ ಸತ್ಯಂ ಕುರು ಮಯೋದಿತಂ |
ಪುತ್ರ ಮಾ ಕುರು ಲೋಭಂ ತ್ವಂ ಸತ್ರಕಾಲೋಽಯಮಂಜಸಾ |೭೩|

ಕುತ್ರ ಲೋಭೋ ನ ನಿಂದಾರ್ಹಃ ಪಾತ್ರಪಾಲೋ ಭವಾಽಶು ಚ |
ತ್ವನ್ಮನ:ಸ್ಥಮಹಂ ವಕ್ಷ್ಯೇ ಮನ್ಮನ:ಸ್ಥಂ ತ್ವದಗ್ರತಃ |೭೪|

ಶ್ರುಣು ಬ್ರಾಹ್ಮಣ ಮುದ್ದಿಶ್ಯದಾತವ್ಯಂ ಕಿಂಚನ ತ್ವಯಾ|
ತ್ವನ್ಮನ:ಸ್ಥಮಹಂ ವಕ್ಷ್ಯೇ ಶ್ರುಣುಷ್ವೇಕಮನಾ: ಸುತ |೭೫|

ಪರೇಣ ದಾಪಯಿಷ್ಯಾಮಿ ನಾಹಂ ದಾಸ್ಯಾಮಿ ಸರ್ವಥಾ |
ಇದಂ ತ್ವದ್ದೃದಯಂ ವಿದ್ಧಿ ಮಮ ಯುದ್ಧೃದಿ ಸಂಸ್ಥಿತಂ |೭೬|

ವೃಂದಾವನಕೃತಿಂ ವಕ್ತುಂ ಮಂದಾಶನಮಿದಂ ಕುತಃ |
ತ್ವಂ ದಾನಂ ಕುರು ಕಿಂಚಿದ್ವಾ ಮಂದಾನಾಮಪಿ ತದ್ ವದ |೭೭|

ಇದಂ ಹೃದಿಸ್ಥ ಸದ್ಬುದ್ಧೇ ಕುರು ಚಾದ್ಧಾ ಬುಧೇರಿತಂ |
ಕ್ರೋಧಂ ಮಾ ಕುರು ವೃದ್ಧೇ ತ್ವಂ ತವಾಽಯುರ್ವೃದ್ಧಿಮೇಷ್ಯತಿ |೭೮|

೮. ವಿಪ್ರ ಪ್ರಕರಣಮ್ | ಶ್ಲೋಕಾ: [೭೯]

ವಿಪ್ರ ತೇ ಮತ್ಸುತೇನೈವ ದಾಪಯಿಷ್ಯೇಽನ್ಯಮುತ್ತಮಂ |
ತದಂತಃ ಪ್ರೇರಯಿತ್ವಾಽಹಂ ಮದಂತರ್ಯಾಮಿತಾಂ ಸ್ಮರ |೭೯|

೯. ವಾದಿರಾಜ ಭಟ್ಟ ಪ್ರಕರಣಮ್ | ಶ್ಲೋಕಾ: [೮೦-೮೭]

ಮನ್ನಾಮಧಾರ ಕೃಶದಾರಧರಽಸುತಾಗ್ರ್ಯ ಹೇ ಧೀರ ಪೂರ್ವಗಿರಿಮೌರಸಪುತ್ರಕೇಽಪಿ |
ಮಾತಾ ಪಿತಾ ನ ವದತಸ್ತ್ವಪರೇ ಕುತೋ ನು ತತ್ ಕ್ಷಾಮ್ಯತಾಂ ಶುಭಮತಿಂ ಭಜ ಮತ್ಕೃತಿಂ ಚ |೮೦|

ಕೃತೇ ಚಾನಾದರೇ ಲೋಕೇ ಮತ್ಕೃತೌ ಚ ತ್ವಯಾಽಪ್ಯಹೋ |
ಅನಾದರಂ ತು ಸರ್ವೇಽಪಿ ಕುರ್ವಂತ್ಯೇವ ನ ಸಂಶಯಃ |೮೧|

ಅತೋ ಮಯಾ ಯದುಕ್ತಂ ತು ಪರೋಕ್ತಮಿವ ನೋ ಭವೇತ್ |
ಭವ ಮನ್ನಾಮಧಾರಾಗ್ರ್ಯ ತಾವಕೋಽಹಂ ನ ಸಂಶಯಃ |೮೨|

ತಸ್ಮಾತ್ ಕೃತಿಂ ಮಮ ತ್ವತ್ರ ಪುತ್ರವತ್ ಪಠ ಪಾಠಕ |
ಕಾಠಕಸ್ಯ ಯಥಾ ಪಾಠಂ ಕುರ್ವಂತಿ ಋಷಯಃ ಸದಾ |೮೩|

ಬ್ರಾಹ್ಮಣಸ್ಯಾನ್ನಕಾಮಸ್ಯ ಕೋ ನ ದಾಸ್ಯತಿ ಮಾನಿನಃ |
ಅದ್ಯಾಶನೇನ ಶೂನ್ಯಸ್ಯ ತಸ್ಯ ಪುಣ್ಯಮನಂತಕಂ |೮೪|

ವಿಪ್ರಾನ್ನ ಸಿದ್ಧಿಪರ್ಯಂತಂ ಕುರ್ಯಾಂ ನಿರಶನ ವ್ರತಂ |
ನೈವೇದ್ಯಂ ನೈವ ಗೃಹ್ಣಾಮಿ ತಾವತ್ಪರ್ಯಂತಮೇವ ಚ |೮೫|

ಅಹಂ ಮದ್ಭಕ್ತವಶ್ಯಶ್ಚ ಅಭಕ್ತಸ್ಯಾಶುಭಪ್ರದಃ |
ಭಕ್ತವತ್ಸಲದೇವಸ್ಯ ಸ್ವಭಾವೋ ಭಕ್ತವಶ್ಯತಾ |೮೬|

ಅಹಂ ವಿಪ್ರ ಮುಖೇನೈವ ಭೋಕ್ಷ್ಯೇ ಚಾನ್ನಂ ತನೌ ಯಥಾ |೮೭|

೧೦. ಸೀತಾಪತಿ ಪ್ರಕರಣಮ್ | ಶ್ಲೋಕಾ: [೮೮-೯೩]

ಮಮೋಪದೇಶ ಕರ್ಣಸ್ಯ ಸನ್ಮಣಿಃ ಕ್ವ ಗತ: ಸುತ |
ಜಾನೀಹಿ ಚಾಽಪಣಸ್ಥಸ್ಯ ವಣಿಜಃ ಪ್ರಾಪ ವೈ ವಶಂ |೮೮|

ಅನ್ನಾರ್ಥಂ ಬ್ರಾಹ್ಮಣಶ್ಚಾಸೌ ಕರ್ಣಾಭರಣಂ ವಿಸೃಜ್ಯ ಚ |
ಆಪಣೇ ವಣಿಜೋ ಹಸ್ತೇ ಮಣಿಂ ದತ್ವಾ ಗುಣಾರ್ಣವ |೮೯|

ಅನೀತವಾನ್ ಸ್ವಕಂ ಗೇಹಂ ತಂಡುಲಾನ್ ಕುಂಡಲೇಽತ್ಯಜತ್ |
ಏತಾದೃಶೋಽಯಂ ಸುಕ್ಷೀಣೋ ಮಣಿನಾಽನ್ನಂ ಪ್ರದತ್ತವಾನ್ |೯೦|

ಪುತ್ರಮಿತ್ರ ಕಲತ್ರಾಣಾಂ ಸ್ವಯಂ ತು ಬುಭುಜೇ ತದಾ |
ಮತ್ಕರ್ಣಮಣಿಮಾತ್ರಂ ವಾ ತ್ಯಾಜಯಾಽಶು ಪಣಾರ್ಧತಃ |೯೧|

ಸ್ವರ್ಣೇನ ಸಹಿತಂ ಕರ್ಣೇ ದಕ್ಷಿಣೇ ಧಾರಣಂ ತ್ವಯಂ |
ಕರೋತು ಪುರತೋ ವಿಪ್ರೋ ಮಮ ಕಾರಣ್ಯರೂಪಿಣಃ |೯೨|

ಏವಂ ಚ ಪಕ್ಷಪಾತೇನ ಪಕ್ಷೀಕುರ್ಯಾಮಹಂ ದ್ವಿಜಂ |
ಸುಕ್ಷೀಣಂ ಶ್ಲಕ್ಷ್ಣಯಾ ವಾಚೌ ಮತ್ಕೃತೌ ಪಕ್ಷಪಾತಿನಂ |೯೩|

೧೧. ವಿಪ್ರ ಪ್ರಕರಣಮ್ | ಶ್ಲೋಕಾ: [೯೪-೧೦೧]

ಸ್ವರ್ಣೇನ ಶೂನ್ಯೇ ಮಣಿನಾ ಚ ದಕ್ಷಿಣೇ ಕರ್ಣೇ ನ ವಕ್ಷ್ಯೇ ತವ ವಿಪ್ರವರ್ಯ |
ಮತ್ಪ್ರೇರಿತಾ ದತ್ತವತೀ ಚ ತೇ ಸತೀ ನಿಷ್ಕಾರ್ಧಮಾತ್ರಂ
ಮಮ ವೃಂದಾವನಾಗ್ರೇ |೯೪|

ತತ್ಕರ್ಣಂ ಸ್ವರ್ಣ ಸಙ್ಕೀರ್ಣಂ ಕರ್ಣಾಭರಣಂ ಚ ಬ್ರಾಹ್ಮಣ |
ಅಪಣೇ ವಣಿಜಃ ಪಾಣೌ ಕುತಸ್ತ್ವಂ ದತ್ತವಾನಸಿ |೯೫|

ತದಾಗಮನಪರ್ಯಂತಂ ನ ವಕ್ಷ್ಯೇ ದಕ್ಷಿಣೇ ತವ |
ಕರ್ಣೇ ಬ್ರಾಹ್ಮಣ ಮೇ ವಾಣೀಂ ಪುಣ್ಯ ಹೀನೋಽಸಿ ತತ್ಕ್ಷಣೇ |೯೬|

ಅತಃ ಶೀಘ್ರಂ ತದಾದಾಯ ಪುನರ್ಧರ ಧರಾಸುರ |
ಗುರೋರಾಜ್ಞಾಂ ನ ವೈರಾಗ್ಯಾನ್ನಿರಾಕುರು ನರಾಧಮ |೯೭|

ಓಂ ಏತತ್ಸರ್ವಂ ಸ್ವಾಪ್ನಪದ್ಯೇನ ಗರ್ವಂ ಹಿತ್ವಾ ಸರ್ವೇ ವಿಪ್ರವರ್ಯಾಸ್ಯಜೇನ |
ಶೃತ್ವಾ ಚೋರ್ವ್ಯಾಂ ಶರ್ವ ಗುರ್ವಾದಿ ದೇವಾನ್
ದೃಷ್ಟ್ವೋರ್ವಶಿಂ ಯಾಂತು ಮಾಂ ಮಾನವೇಂದ್ರಾಃ |೯೮|

ಇದಂ ವೃಂದಾವನಾಖ್ಯಾನಂ ಯೇ ಪಠಂತಿ ಮನೀಷಿಣಃ |
ಮುಕುಂದಾವನಮೇವಾಸ್ತು ತೇಷಾಂ ಕಂದಾಶನಾಜ್ಞಯಾ |೯೯|

ಇದಮರ್ಪಿತಮೇವಾಸ್ತು ಹಯಶೀರ್ಷಸ್ಯ ಪಾರ್ಷದಾತ್ |
ಸಮಂ ಸಹಸ್ರಶೀರ್ಷಸ್ಯ ಸೂಕ್ತಸ್ಯ ಪುರುಷಾತ್ ಕೃತಮ್ |೧೦೦|

ಯಚ್ಛ್ರುಣ್ವತಾಂ ಭಕ್ತಿರುದಾರಸದ್ಗುಣೇ ಹರೌ ಹರೇರ್ಲೋಕಗತೇ ತಥಾ ಮಯಿ |
ಭವತ್ಯಹೋ ಸರ್ವಶುಭಾಪ್ತಿಸನ್ಮತೀರ್ ದದಾತ್ಯಜಸ್ರಂ ಸುತ
ಸತ್ಯಮೇವ ತತ್ ಓಂ |೧೦೧|

| ಇತಿ ಶ್ರೀಸ್ವಾಪ್ನವೃಂದಾವನಾಖ್ಯಾನೇ ಅಲೌಕಿಕ ವಿಭಾಗೇ
ನಿದರ್ಶನಪರ್ವಣಿ ತ್ರಯೋದಶಾಧ್ಯಾಯ: ಸಮಾಪ್ತ: |

|| ಶ್ರೀ ಅಶ್ವಿನೀಹಯಗ್ರೀವಾತ್ಮಕ ಕೃಷ್ಣಾರ್ಪಣಮಸ್ತು ||

14. Svaapnavrundavanakhyana