12. Svaapnavrundavanakhyana

Composer : Shri Vadirajaru

| ಅಥ ದ್ವಾದಶಾಧ್ಯಾಯ: |

೧. ವಿಪ್ರ ಪ್ರಕರಣಮ್ | ಶ್ಲೋಕಾ: [೧-೨]
ಹರಿಃ ಓಂ |

ಮತ್ಪ್ರಸಾದಾಚ್ಚ ಭೂಪೇನ ಶಿಬಿಕಾರೋಹಣಂ ಕೃತಂ|
ತವ ವಿಪ್ರ ನ ಸಂದೇಹಶ್ಚೇತ್ ಸರ್ವಂ ಹಿ ನಿದರ್ಶನಂ |೧|

ಮತ್ಪ್ರಸಾದಾಚ್ಚ ಶೇಷೇಣ ಕೃತೋ ಯತ್ನಸ್ತವಾಽಪ್ತಯೇ |
ವೃತ್ತೇರ್ನ ಚಾನ್ಯಥಾ ವಿಪ್ರ ಚಿಂತಯ ತ್ವಂ ಸುಖೀ ಭವ |೨|

೨. ಬಹು ಭಕ್ತ ಪ್ರಕರಣಮ್ | ಶ್ಲೋಕಾ: [೩-೫]

ಮದ್ದತ್ತಾಚಾರ್ಯನಾಮ್ನಾ ತು ಯಃ ಕಶ್ಚಿದ್ ವಾ ನರಾಧಮಃ |
ಬ್ರಾಹ್ಮಣಂ ನ ಭಣತ್ಯಂತಃ ಕುಣಪೇನ ಕಿಮಂತರಂ |೩|

ವೃಂದಾವನಪದೋಪೇತ ತನ್ನಾಮ್ನೈವಾಽಹ್ವಯತ್ವಿಮಂ |
ಯೇ ಚೇಮಂ ನ ಭಣಂತ್ಯಂತ್ಯಾಸ್ತೇ ಚ ಮದ್ದ್ರೋಹಿಣ: ಸದಾ |೪|

ಲಕ್ಷ್ಮೀಪತಿಃ ಸೂಕ್ಷ್ಮಮತಿಃ ಶ್ಲಕ್ಷ್ಣವಾಙ್ ಮತ್ಕಟಾಕ್ಷತಃ |
ಭೋಕ್ಷ್ಯತೀಕ್ಷಾಫಲಂ ಸೂಕ್ಷ್ಮಂ ಮತ್ಕೃತಿಂ ವಕ್ಷ್ಯತು ತ್ವಿಮಾಂ |೫|

೩. ಲಕ್ಷ್ಮೀಪತಿ ಪ್ರಕರಣಮ್ | ಶ್ಲೋಕಾ: [೬-೯]

ಲಕ್ಷ್ಮೀಪತೇ ಸೂಕ್ಷ್ಮಮತೇ ಮತ್ಕಥಾಮೃತವಾರಿಣಾ |
ಸತಾಮಾಧ್ಯಾತ್ಮಿಕಾದ್ಯಗ್ನಿಂ ಶಮಯ ತ್ವಂ ಸುಖೀ ಭವ |೬|

ಅಹೋ ಮಮಾತ್ಮಜಾ ಯುಕ್ತಿಮಲ್ಲಿಕಾಖ್ಯಾ ಮಮಾತ್ಮಜಂ |
ವವ್ರೇ ತೀವ್ರೇಣ ಬೋಧೇನಾಪ್ಯಗ್ರಜಂ ವ್ಯಗ್ರಭಾಮಿನೀ |೭|

ಅಗ್ರಜಾದ್ರಮಣೀ ಭೂತ್ವಾ ಜಾತಾ ಸಾ ಭಾವಗರ್ಭಿಣೀ |
ಸುಷಾವ ಪುತ್ರಂ ಭಾವಾಖ್ಯಂ ವಿದುಷಾಂ ತು ಮತಂ ತಥಾ |೮|

ಅಥಾಪಿ ದೋಷ ಶೂನ್ಯಾಽಭೂನಿ:ಸಙ್ಗಸ್ಯಾಽತ್ಮಜಾ ಯತಃ |
ಯಾಂ ತು ಶ್ರುತ್ವಾ ತು ಸತ್ಸಂಙ್ಗೀ ನಿಸ್ಸಂಙ್ಗೋ ಜಾಯತೇ ಪುಮಾನ್ |
ತಸ್ಮಾನ್ನಿ:ಸಙ್ಗತಾವಾಪ್ತೌ ತತ್ಸಂಗಾತ್ ಶ್ರುಣುಯಾದಿಮಾಂ |೯|

೪. ವಿಪ್ರ ಪ್ರಕರಣಮ್ | ಶ್ಲೋಕಾ: [೧೦]

ಕೋ ವಾ ತ್ವಯಿ ದಯಾಶೀಲೋ ವರ್ತತೇ ಮತ್ಸುತೋಪಮಃ |
ಋಣಮೋಚಯಿತಾರಂ ತೇ ಮತ್ಪುತ್ರಂ ಶರಣಂ ವ್ರಜ |೧೦|

೫. ಸೀತಾಪತಿ ಶ್ರೋತೃಕ ಪ್ರಕರಣಮ್ | ಶ್ಲೋಕಾ: [೧೧-೧೬]

ಯಶ್ಚಾಽಕ್ಷೇಪಂ ಕರೋತ್ಯತ್ರ ಮತ್ಕೃತೌ ದೋಷಶಂಕಯಾ |
ತತ್ಪ್ರಾಣಸ್ಯೈವ ಚಾಕ್ಷೇಪಂ ಮುಖ್ಯಪ್ರಾಣಃ ಕರೋತ್ಯಹೋ |೧೧|

ಸತ್ಯಂ ಸತ್ಯಂ ಪುನ: ಸತ್ಯಂ ತ್ರಿವಾಚಾಽಪಿ ಮಯೋಚ್ಯತೇ |
ವಿಪ್ರಾಂತರ್ಯಾಮಿಣಾ ಚೇಯಂ ಸತ್ಕೃತಿಶ್ಚ ಮಯಾ ಕೃತಾ |೧೨|

ಅಯಂತು ಬ್ರಾಹ್ಮಣಃ ಶ್ರೀಮಾನಾಪಣೇ ಚಾತಿಪಾಪಿನಾ |
ಆತಪೇ ಸ್ಥಾಪಿತಃ ಕಾಮಂ ದೇವರೇಣ ವಣಿಕ್ ಭೃತೌ |೧೩|

ದ್ವಿಜಾಂತರ್ಯಾಮಿಣಂ ಮಾಮಪ್ಯಾತಪಸ್ಥಂ ಚಕಾರ ಸಃ |೧೪|

ಪುತ್ರ ತ್ವಂ ಶ್ರೀಘ್ರತಸ್ತಸ್ಮಾತ್ ಋಣಾನ್ಮೋಚಯ ಮಾರಣಾತ್ |
ಪುತ್ರ ಮದ್ವಚನಂ ಸತ್ಯಮೇಕಂ ಕುರು ಚ ಕೀರ್ತಯೇ |೧೫|

ಅಹಂ ದಾಸ್ಯಾಮಿ ಮದ್ದಾಸ್ಯಂ ಶಶ್ವದ್ ಋಣವಿಮೋಚನೇ |
ವಿಪ್ರಾಯ ಪ್ರಾಪ್ತಕಾಮಾಯ ನಿರ್ವಿಘ್ನಂ ಕುರು ತತ್ರ ಚ |೧೬|

೬. ವಿಪ್ರ ಪ್ರಕರಣಮ್ | ಶ್ಲೋಕಾ: [೧೭-೨೧]

ಮತ್ಕಾರ್ಯಮಪಿ ಭೂದೇವ ಕಿಂಚಿದಪ್ಯತಿ ಲಂಘಿತುಂ |
ನ ಶಕ್ಯಂ ನ ಕೃತಂ ತಚ್ಚ ತವ ಕಾರ್ಯೇ ತು ಕಿಂ ಪುನಃ |೧೭|

ಇತಃ ಪರಂ ತು ಮತ್ಕಾರ್ಯಂ ತವ ವಾ ವಿಪ್ರವರ್ಯ ಯತ್ |
ನ ವಕ್ಷ್ಯೇ ಕುರ್ವಿತಿ ವ್ಯರ್ಥಂ ದೈನ್ಯಂ ಮಮ ನ ರೋಚತೇ |೧೮|

ತವ ಕಾರ್ಯಂತು ವಿಪ್ರೇಶ ಪ್ರಾಗೇವೋಕ್ತಂ ಮಯಾಽನಘ |
ಭೋಜ್ಯವಿತ್ತಂ ಪ್ರದತ್ವಾ ತು ಋಣನ್ಮುಕ್ತಃ ಶನೈಃ ಶನೈಃ |
ಇತಿ ಪೂರ್ವಂ ಮಯಾಪ್ರೋಕ್ತಂ ಅನುಸಂಧತ್ಸ್ವ ಬುದ್ದಿಮನ್ |೧೯|

ಸತ್ಪಾತ್ರೇ ದಾನಶೀಲಸ್ಯ ಮತ್ಪಾತ್ರೇ ಚಾನ್ನದೋ ದ್ವಿಜ |
ಮತ್ಕರೇ ಚೋದಕಂ ದತ್ವಾ ಸತ್ಕರಂ ಪ್ರಾಪ್ನುಯಾದಿಹ |೨೦|

ಋಣಮೋಚಯಿತಾ ತೇ ಚ ಮರಣಂ ನೈತಿ ಶೀಘ್ರತಃ |
ಶರಣಂ ವ್ರಜ ಮತ್ಪುತ್ರಂ ಕರುಣಾಕರಮಂಜಸಾ |೨೧|

೭. ಸೀತಾಪತಿ ಪ್ರಕರಣಮ್ | ಶ್ಲೋಕಾ: [೨೨-೨೭]

ವಿಪ್ರಸ್ಯ ಪುತ್ರಲಾಭೋಽಯಂ ಭವತೀತಿ ಮಯೋದಿತಂ |
ತತ್ ಸತ್ಯಂ ಸಮಭೂತ್ ಪುತ್ರ ಕುತ್ರ ತೇ ಸಂಶಯೋ ವದ |೨೨|

ಏವಂ ಮಯೋದಿತಂ ಸರ್ವಮೈಹಿಕಾಮುಷ್ಮಿಕಂ ಚ ಯತ್ |
ತತ್ ಸತ್ಯಂ ನಾತ್ರ ಸಂದೇಹೋ ವಿಶ್ವಾಸಂ ಕುರು ಸರ್ವದಾ |೨೩|

ಸುಜನಾಂಭೋಜ ತೇಜಸ್ವಿನ್ ಕುಜನಾಂಬುಜರಾಜ ತೇ |
ಸ್ವಜನೇ ಚಾಸ್ತು ಸೌಜನ್ಯಂ ದ್ವಿಜರಾಜೇ ಚ ಸರ್ವದಾ |೨೪|

ಏವಂ ಮದೀರಿತಾಂ ಕೀರ್ತಿಮಾರ್ತಿನಾಶಕರೀಂ ಪರಾಂ |
ಆದಾಯ ತೇ ಚಾಽನಂದಾಯ ಚಾಽನಂದೀ ಭವ ನಂದನ |೨೫|

ಹರೌ ಕುರು ಗುರೌ ಭಕ್ತಿಭಾರಂ ಧೀರ ಪರಾತ್ಪರೇ |
ಘೋರಸಂಸಾರಪಾರಂ ತ್ವಂ ತಿತೀರ್ಷುಶ್ಚೇತ್ ಕೃಪಾಕರೇ |೨೬|

ಕುಜನಂ ತ್ಯಜ ದುರ್ಬುದ್ಧಿಂ ಭುಜಗಂ ತು ಜನೋ ಯಥಾ |೨೭|

೮. ವಿಪ್ರ ಪ್ರಕರಣಮ್ | ಶ್ಲೋಕಾ: [೨೮-೩೦]

ಮಾಯಾ ಯದುಚ್ಯತೇ ತದ್ ವೈ ಹಿತ್ವಾ ಚಾನ್ಯತ್ ತ್ವ ಯೋಚ್ಯತೇ |
ಕರಣಾಪಾಟವಂ ವಿಪ್ರ ಮರಣಾರ್ತಿಸಮಂ ತವ |೨೮|

ಗುಣಾಧಮಾನಿತಿ ಪ್ರೋಕ್ತೇ ಬಲಾಧಿಕಾನಿತಿ ತ್ವಯಾ |
ಪ್ರೋಚ್ಯತೇ ವಿಪ್ರವರ್ಯೇಹ ತವ ಮೌಢ್ಯಮಹೋ ಬತ |೨೯|

ಸ್ವಪ್ನ ಸತ್ಯತ್ವವಾದೇನ ಚೇತುಮಿಚ್ಛಂತಿ ವಾದಿನಂ |
ಯೇ ತತ್ವವಾದಿನಃ ಸರ್ವೇ ತ್ವಂಗೀಕುರ್ವಂತು ಮತ್ಕೃತಿಂ |೩೦|

೯. ಶೇಷ ಪ್ರಕರಣಮ್ | ಶ್ಲೋಕಾ: [೩೧-೪೨]

ಹೇ ಪುತ್ರ ವಿಪ್ರವರ್ಯೋಯಂ ಕುತ್ರ ಯಾಸ್ಯತಿ ಮತ್ಪ್ರಿಯಃ |
ಸತ್ರಾರ್ಥಂ ತವ ಸತ್ಪಾತ್ರಂ ಸಕಲತ್ರಃ ಸಪುತ್ರಕಃ |೩೧|

ಶ್ರೋತ್ರಿಯಃ ಶಾಸ್ತ್ರವೇತ್ತಾ ಚ ಕೃಪಾಪಾತ್ರೋ ಮಮಾತ್ರ ತು |
ಗಾತ್ರೇ ಕೃಶತರಃ ಪುತ್ರ ಕುತ್ರ ಯಾತ್ರಾಂ ಕರಿಷ್ಯತಿ |೩೨|

ಭೋಜ್ಯವಿತ್ತಂ ಋಣಾನ್ಮುಕ್ತ್ಯೈ ದತ್ತವಾನ್ ಮಮ ವಾಕ್ಯತಃ |
ಭೋಜನಾರ್ಥಂ ತು ಕಿಂಚಿದ್ ವಾ ನಾಸ್ತಿ ಚಾಸ್ಮೈ ದಯಾಂ ಕುರು |೩೩|

ಮಚ್ಛಿಷ್ಯೈರ್ದಾಪಯ ತ್ವಂ ವಾ ಪುತ್ರ ಕಿಂಚಿದ್ ದದಸ್ವ ಹ |
ಮದ್ವಾಚಂ ನಂದನ ತ್ವಂ ಹಿ ಸರ್ವಥಾ ಮಾ ವೃಥಾ ಕುರು |೩೪|

ಕಿಮತ್ರ ಬಹುನೋಕ್ತೇನ ಮಮೈಕೋಕ್ತಿಃ ಶತೋಕ್ತಿಕಾ |
ತಸ್ಮಾದ್ ದಾಪಯ ಮಚ್ಛಿಷ್ಯೈರ್ಮದಾಜ್ಞೇತಿ ನಿವೇದ್ಯ ತಾನ್ |೩೫|

ಇದಂ ತು ಸರ್ವಂ ವೃತ್ತಾಂತಂ ವದ ಸೀತಾಪತೇಃ ಸುತಃ |
ಶ್ರುತ್ವಾ ಸಂತೋಷವಂತಶ್ಚ ತಂ ವಿನಾ ವದ ತಾನ್ ಮುನೇ |೩೬|

ಮಾತ್ರಾ ವಿಹೀನಃ ಪಿತ್ರಾ ಚ ಭ್ರಾತಾ ಮಿತ್ರಾತ್ ತಥೈವ ಚ |
ಮಾಮತ್ರಾಽಶ್ರಿತವಾನ್ ವಿಪ್ರಃ ಸತ್ಪಾತ್ರಂ ಕಿಮತಃ ಪರಂ |೩೭|

ಸ್ವಾಮಿತ್ವೇನ ಸಖಿತ್ವೇನ ಬಂಧುತ್ವೇನ ಸುಹೃತ್ವತಃ |
ಮಾಮತ್ರಾಽಶ್ರಿತವಾನ್ ವಿಪ್ರಃ ಸತ್ಪಾತ್ರಂ ಕಿಮತಃ ಪರಂ |೩೮|

ಕಿಮತ್ರ ಬಹುನೋಕ್ತೇನ ವಿಪ್ರೇ ಮತ್ಪ್ರೀತಿರಂಜಸಾ |
ಜಾಯತೇ ತ್ರಾಯತೇ ಕಾಮಂ ಕಿಯಜ್ಜನ್ಮ ಋಣಂ ಮುನೇ |೩೯|

ವೃದ್ಧಃ ಶುದ್ಧಃ ಸದಾ ಭಕ್ತಿಬದ್ಧಃ ಸದ್ದರ್ಮಪದ್ಧತಿಃ |
ಶ್ರದ್ಧಾ ಸಮುದ್ಧತೋ ವಿದ್ಯನ್ ಧತ್ತೇ ಮದ್ಬುದ್ಧಿಬಂಧಿತಃ |೪೦|

ಶರಣಾಗತವಿಪ್ರಂ ತಂ ಕರುಣಾ ಕರಮಂಜಸಾ |
ಮರಣಾರ್ತಿಂ ಹರಿಷ್ಯಾಮಿ ಪರಿಣಾಮಂ ಗತೇಽಪ್ಯಹೋ |೪೧|

ತಸ್ಮಾತ್ಪುತ್ರ ಗತಿಃ ಕಾ ವಾ ಮಯಾ ತ್ಯಕ್ತೇ ದ್ವಿಜೋತ್ತಮೇ
ತ್ವಮಪ್ಯಮುಂ ಮಮಾಽವಾಸಂ ಮಾನಯಸ್ವ ಸುವಾಸಸಾ |೪೨|

೧೦. ವಿಪ್ರ ಪ್ರಕರಣಮ್ | ಶ್ಲೋಕಾ: [೪೩-೫೧]

ಶಶ್ವದ್ ವಿಸ್ಮೃತಿಶೀಲಸ್ಯ ಕಸ್ಮೃತೌ ವಿಸ್ಮೃತಿರ್ಭವೇತ್ |
ಆಮೃತಿಂ ತವ ವಿಪ್ರೇಂದ್ರ ಕಾಮತಿಂ ತ್ಯಜ ಮಾಂ ಭಜ |೪೩|

ವಿಪ್ರ ನಂದನ ಮನ್ಯಂ ವಾ ಧನಿನಂ ಮನಸಾಪಿ ವಾ |
ಕಾರ್ಪಣ್ಯಂ ನ ವದಸ್ವ ತ್ವಂ ಶರಣಂ ವ್ರಜ ಮಾಂ ಮುನಿಂ |೪೪|

ಕಾರ್ಪಣ್ಯಂ ತವ ವಿಪ್ರೇಶ ಮಮ ಸಂತೋಷಕಾರಣಂ |
ತ್ವದಂತರ್ಯಾಮಿಣೋ ವಿದ್ವನ್ನ ಭವೇತ್ ಪುಣ್ಯಮೂರ್ತಿನಃ|೪೫|

ಯಾವದೀಶ್ವರದತ್ತಂ ವಾ ವಿತ್ತಂ ಗೃಹ್ಣೀಷ್ವ ಪೋಷಣಂ |
ಕುರು ಪುತ್ರಕಲತ್ರಾದಿ ಮಿತ್ರಾಣಾಂ ಸತ್ರ ಕರ್ಮಣಿ |೪೬|

ಅಂತೇ ಸುತ್ರಾಮಲೋಕೋಯಂ ಕಾಂತಸ್ತವ ಭವಿಷ್ಯತಿ |
ಶಾಂತಿಸ್ತವ ಭವೇದ್ ವಿದ್ವನ್ ಮಾಂ ತಾತಂ ಶರಣಂ ವ್ರಜ |೪೭|

ಮನ್ನಂದನಪದಂ ಧನ್ಯಂ ಧನಧಾನ್ಯಾಧಿಕಂ ದಿನೇ |
ದಿನೇ ಮಮೇತಿ ಜಾನೀಹಿ ಕಾ ನೀತಿರ್ನೋಚ್ಯತೇ ಮಯಾ |೪೮|

ಮಾತೃತ್ವೇನ ಪಿತೃತ್ವೇನ ಭ್ರಾತೃತ್ವೇನ ಚ ಮಿತ್ರತಃ |
ತ್ರಾತುರ್ಮೇ ಪುತ್ರತಾಂ ಪ್ರಾಪ್ತಃ ಸತ್ಪಾತ್ರಂ ಕಿಮತಃ ಪರಂ |೪೯|

ತಸ್ಮಾಚ್ಛರಣ್ಯ ಶರಣಮರಣಂ ಶರಣಾರ್ಥಿನಾಂ |
ಭರಣಂ ಮಮ ಮಂತ್ರೇಣ ಗುಣಿನಂ ವ್ರಜ ಬ್ರಾಹ್ಮಣ |೫೦|

ಏವಂ ಮದ್ಬುದ್ಧಿ ಬದ್ಧಸ್ತ್ವಂ ಶುದ್ಧ ಸದ್ಧರ್ಮಪದ್ಧತಿಂ |
ಮುಗ್ಧ ಬುದ್ಧಿಂ ವಿನಾ ಶ್ರದ್ಧಾಸಮಿದ್ಧೋ ಬುದ್ಧಿಗಾಂ ಕುರು |೫೧|

೧೧. ಸೀತಾಪತಿ ಪ್ರಕರಣಮ್ | ಶ್ಲೋಕಾ: [೫೨-೫೩]

ಮಾ ತ್ಯಜ ತ್ವಂ ಮಮಾಽವಾಸಂ ಕಮವಶ್ಯಂ ತು ಯಾಸ್ಯತಿ |
ಹಿತ್ವೈನಂ ತತ್ತ್ವವೇತ್ತಾರಂ ಮತ್ತೋನ್ಮತ್ತಂ ತ್ವಿತಃ ಪರಂ |೫೨|

ಮಮ ಮೂರ್ತಿಧರಂ ಕೀರ್ತಿಂ ಖ್ಯಾಪಯಂತಂ ಸತಾಮಿಹ |
ಆರ್ತಿನಾಶಕರೀಂ ಸಾರ್ಥೀಕುರು ದೇಹಂ ತು ಮಾ ತ್ಯಜ |೫೩|

೧೨. ಲಕ್ಷ್ಮೀಪತಿ ಪ್ರಕರಣಮ್ | ಶ್ಲೋಕಾ: [೫೪-೬೨]

ಶಬ್ದಜಾಲಾನಿ ಮದ್ಬುದ್ಧಿ ಲೋಲಾನೀತಿ ಭಯಾಚ್ಚ ಮಾಂ |
ನಮಂತಿ ತಾವಕಾನೀತಿ ಸಂಸ್ತಬ್ಧಾ ಮುಗ್ಧಕಾನಿ ಚ |೫೪|

ಪ್ರಕೃತಿಪ್ರತ್ಯಯೌ ಮಹ್ಯಂ ಸ್ವ ಕೃತೌ ಸತ್ಯಮೂರ್ತಿನೌ |
ಸಾಚಿವ್ಯಂ ಕುರುತಃ ಸಮ್ಯಗ್ ವ್ಯವಹರ್ತುಂ ಪರಾನ್ ಪ್ರತಿ |೫೫|
ತಸ್ಮಾಚ್ಛಬ್ದಸ್ಯ ದೋಷೋಽಯಂ ನಾಸ್ತಿ ನಃ ಶಾಬ್ದಿಕೋತ್ತಮ |
ಸಾಽಸ್ತಿ ನಿರ್ದೋಷತಾ ಕಾಽತ್ರ ದೋಷಿತಾ ಮುನಿ ಭೂಷಣ |೫೬|
(“ಮಮಭೂಷಣ”)

ಯತ್ರ ಪ್ರತೀತಾರ್ಥಬಾಧಃ ತತ್ರಾಂತರ್ಯಾಮಿ ಸಂಗ್ರಹಃ |
ಕರ್ತವ್ಯಃ ಸತತಂ ವಿಷ್ಣುಂ ಸ್ಮರ್ತವ್ಯಃ ಸೋಽಪಿ ಮತ್ಕೃತೌ |೫೭|

ಅಹಂ ದ್ವಿಜಸ್ಯ ಸತ್ತೇಜಃ ಕಾರಯಿಷ್ಯೇ ಸ್ವಶಿಷ್ಯಕೈಃ |
ಯಥಾಽಮುತ್ರಾಪಿ ಕಾಮೈಶ್ಚ ತಥಾಽತ್ರಾಪಿ ಸುಮಾನವೈಃ |೫೮|

ಯದಿ ವಾ ನೈವ ಕುರ್ವಂತಿ ತರ್ಹಿ ಸರ್ವಂ ಯಶಃ ಶ್ರಿಯಃ |
ಆಯುಷ್ಯಂ ಚ ಹರಿಷ್ಯಾಮಿ ಪಶ್ಯಂತು ತಪಸೋ ಬಲಂ |೫೯|

ಲಕ್ಷ್ಮೀಪತೇ ಚ ಗತ್ವಾ ತ್ವಂ ಸೌಕ್ಷ್ಮೀಂ ವಾರ್ತಾಂ ವದಸ್ವ ಮೇ |
ಮತ್ಪುತ್ರಂ ತತ್ರ ಚಾತ್ಯಾಪ್ತಂ ನಾಮ್ನಾ ಸೀತಾಪತಿಂ ಮತಂ |೬೦|

ನೋ ಚೇತ್ ತವಾಪಿ ದಂಡಶ್ಚ ಭವೇನ್ಮನ್ಮಂಡನಂ ವಿನಾ |
ಪುಂಡರೀಕಾಕ್ಷ ಭಂಜಿಷ್ಠಾಃ ಭಾಂಡೀರಕಗತಿರ್ಯಥಾ |೬೧|

ವಿಪ್ರಃ ಸ್ವಾರ್ಥಂ ವದತ್ಯೇವ ತೇಜಃ ಶ್ಲೋಕಂ ಸ್ವ ಕಲ್ಪಿತಂ |
ಇತಿ ಜಾನಂತಿ ಮಾಂ ಮರ್ತ್ಯಾಃ ಸ್ಮರ್ತವ್ಯಾ ನೈವ ತೇ ಮಮ |೬೨|

೧೩. ವಿಪ್ರ ಪ್ರಕರಣಮ್ | ಶ್ಲೋಕಾ: [೬೩-೬೬]

ವಿಪ್ರ ತ್ವಂ ಲಜ್ಜಯಾ ಯುಕ್ತೋ ಮಜ್ಜಾತಂ ನ ವದೇಃ ಕುತಃ |
ಕುಬ್ಜಾಪತೇಃ ಪ್ರಿಯಂ ಭಕ್ತಂ ಸದ್ ಜ್ಞಾನಂ ಮತ್ಪ್ರಿಯೇರತಂ |೬೩|

ಲಕ್ಷ್ಮೀಪತಿಶ್ಚ ಮದ್ಭಕ್ತೋ ವಕ್ಷತ್ಯೇವ ಮದಾಜ್ಞಯಾ |
ತ್ವಂ ಚ ತೂಷ್ಣೀಂ ಚ ತಿಷ್ಠಸ್ವ ಮತ್ಪಾದಸ್ಮರಣೇ ರಮನ್ |೬೪|

ತೇಜಸಾ ಮೇ ಜಿತಾ ಲೋಕಾಃ ಕೋ ಜಿತೋ ನ ಭವೇದಿಹ |
ಊರ್ಜಿತಾಭಯಸೋ ಮಹ್ಯಂ ಪೂಜಿತಾಶ್ಚ ನಮಂತ್ಯಹೋ |೬೫|

ಇತಿ ಮತ್ವಾ ತು ತಾಂ ಕೀರ್ತಿಮಾರ್ತಿನಾಶಕರೀಂ ತವ |
ಸಾರ್ಥೀ ಕುರು ಮಮಾಽಜ್ಞಾಂ ತಾಂ ಕಾಽಽರ್ತಿಸ್ತವ ಭವಿಷ್ಯತಿ |೬೬|

೧೪. ಲಕ್ಷ್ಮೀಪತಿ ಪ್ರಕರಣಮ್ | ಶ್ಲೋಕಾ: [೬೭-೭೦]

ವಿಪ್ರಶ್ಚ ಮನಸಾ ವಾಚಾ ಕರ್ಮಣಾ ವಾ ಗುಣಾರ್ಣವ |
ನ ಕಾಂಕ್ಷತಿ ಸ್ಮ ಸುಕ್ಷೀಣೋಽಪ್ಯತ್ಯಂತಾಶಾವಶೋ ನಹಿ |೬೭|

ತಸ್ಮಾತ್ ತ್ವಮೇವ ಸನ್ಮಾನಂ ಮಮೈವೇತಿ ಕುರುಷ್ವ ತಂ |
ತವೈವ ಪ್ರೀತಿರತ್ಯಂತಂ ಮಮೈವ ಚ ಭವಿಷ್ಯತಿ |೬೮|

ಮಂದಸ್ಮಿತಧರಂ ಸಾಂದ್ರಾನಂದಸಂದೋಹಮಂದಿರಂ |
ಶತಾನಂದಗುರುಂ ಸಾಂದ್ರಂ ಹಯಸತ್ಕಂಧರಂ ಸ್ಮರ |೬೯|

ಲಕ್ಷ್ಮೀಪತೇ ತವ ಸುತಂ ಮಮನಾಮಯುಕ್ತಂ
ಕೃತ್ವಾ ಕರೋಷಿ ವಿತತಾಂ ರತಿಮೇವ ಚಾತ್ರ |
ಸೀತಾಪತಿಂ ಮಯಿ ಸುಭಕ್ತಿಮತಾಂ ಪ್ರಶಸ್ತಂ,
ಮತ್ಪುತ್ರಮಪ್ಯಭಿಮತಂ ವದ ಮನ್ನಿರೂಪಂ |೭೦|

೧೫. ವಿಪ್ರ ಪ್ರಕರಣಮ್ | ಶ್ಲೋಕಾ: [೭೧-೮೦]

ತವ ನಂದನ ಕರ್ಣಸ್ಯ ಸ್ವರ್ಣಯುಕ್ತಶ್ಚ ಸನ್ಮಣಿಃ |
ಬ್ರಾಹ್ಮಣೇಕ್ಷಣಗಶ್ಚಾಽಸೀತ್ ಜನಾನಾಂ ನಯನಂ ವಿನಾ |೭೧|

ತಚ್ಚಾಪಿ ಮತ್ಪ್ರಯತ್ನೇನ ಚಾಽಸೀತ್ ಕಾಂಕ್ಷಿತಮೀಕ್ಷಯಾ |
ಭೋಕ್ಷ್ಯತೀಕ್ಷಾಫಲಂ ಸೂಕ್ಷ್ಮಂ ತತ್ ಪ್ರತ್ಯಕ್ಷಮಭೂತ್ ತವ |೭೨|

ದಕ್ಷ ಪ್ರತ್ಯಕ್ಷ ಮಿತ್ಯುಕ್ತೇ ತತ್ ಸಮಕ್ಷಮಿತಿ ತ್ವಯಾ |
ಲಕ್ಷ್ಮೀಪತಿಂ ಸಮುದ್ದಿಶ್ಯ ತತ್ಪಕ್ಷೀಕೃತಮಕ್ಷತ |೭೩|

ವಿಚಾರ್ಯೈವ ವದಸ್ವ ತ್ವಂ ತವಾಽಚಾರ್ಯತ್ವಮಂಜಸಾ |
ಮಮಾಽಚಾರ್ಯಮತಂ ಪೃಚ್ಛ ಕಿಮಾಚಾರ್ಯತ್ವ ಸತ್ಫಲಂ |೭೪|

ಅಚ್ಯುತಂ ಸ್ಮರ ವಿಪ್ರೇಶ ಕಶ್ಚ್ಯುತಿಂ ನ ತ್ಯಜೇದಿಹ |
ಸ್ವಚ್ಛಮೂರ್ತಿಸ್ಮೃತೇ ವಿದ್ವನ್ ಪೃಚ್ಛ ಮಾಮೇವ ತಂ ಪ್ರಭುಂ |೭೫|

ಇದಂ ವೃಂದಾವನಾಖ್ಯಾನಂ ಮಮ ವೃಂದಾವನೇ ಸದಾ |
ಸದ್ವೃಂದಾನಾಂ ವದಸ್ವ ತ್ವಂ ಮದ್ವೃಂದಾವನ ವೈಭವಂ |೭೬|

ಅಹಂ ಪ್ರತ್ಯಕ್ಷತಶ್ಚಾಪಿ ವಕ್ಷ್ಯೇ ಸೂಕ್ಷ್ಮಮತೇ ಸುತ |
ಕೋ ದಕ್ಷಶ್ಚಕ್ಷುಷಾ ದ್ರಷ್ಟುಂ ಮತ್ತೇಜಃ ಸಾಕ್ಷಿಗೋಚರ: |೭೭|

ವಿಪ್ರ ಪ್ರತ್ಯಕ್ಷಮೇ ವೈತತ್ಸರ್ವಂ ಪ್ರತ್ಯಕ್ಷ ಮೇವ ಚ |
ಪ್ರತ್ಯಕ್ಷಸಿದ್ಧಂ ಪ್ರತ್ಯಕ್ಷಂ ಗ್ರಾಹ್ಯಂ ತೇ ಸಾಕ್ಷಿಣಂ ವಿನಾ |೭೮|

ತತ್ಪ್ರತ್ಯಕ್ಷೇಽಪಿ ಪ್ರತ್ಯಕ್ಷಾಂತರಾಕಾಂಕ್ಷ ಭವೇದಿಹ |
ತತ್ಪ್ರತ್ಯಕ್ಷೇಪಿ ಪ್ರತ್ಯಕ್ಷಾಂತರಬುದ್ಧಿಶ್ಚ ಜಾಯತೇ |೭೯|

ಏವ ಚೇದನವಸ್ಥಾ ಸ್ಯಾತ್ ಕಾಽಪ್ಯವಸ್ಥಾ ವ್ಯವಸ್ಥಿತಾ |
ನ ಜಾಯತೇ ಪ್ರಜಾನಾಂ ತು ಜಾನೇ ಕುಬ್ಬಾಪತೇಃ ಪ್ರಿಯಂ |
ತ್ವಾಂತು ಮಾಂ ತಾತ ಬುದ್ಧ್ಯಾ ತ್ವಂ ಸತ್ರ ಕರ್ಮ ಸದಾ ಕುರು |೮೦|

೧೬. ಲಕ್ಷ್ಮೀಪತಿ ಪ್ರಕರಣಮ್ | ಶ್ಲೋಕಾ: [೮೧-೯೪]

ಅಹಂ ವಿಮಾನಮಾರುಹ್ಯ ಚಾಮಾನವ ಸಮನ್ವಿತಃ |
ಕುಮಾನವ ಗತಿಂ ಹಿತ್ವಾ ಸುಮಾನವಸಮೀಪಗಃ |೮೧|

ತತೋಽವರುಹ್ಯ ತಸ್ಮಾತ್ತು ತಮೂಹ್ಯ ಬ್ರಾಹ್ಮಣೋತ್ತಮಂ |
ತತ್ಕರ್ಣೇ ಸ್ವರ್ಣಸಂಕೀರ್ಣಾಭರಣೇ ವಚ್ಮಿ ವಿವಿಚ್ಯ ತಾಂ |೮೨|

ಶ್ಲೋಕಾನ್ವೈ ಪಂಚ ವಾ ಸಪ್ತ ನವ ವಾ ದಶ ವಾಷ್ಟವಾ |
ತ್ರೀನ್ ವೈಕಂ ಪಂಚದಶ ಚ ದ್ವಾದಶಾದಿ ಕ್ರಮಾದಿಹ |೮೩|

ತತೋಽನ್ತರ್ಧಾನ ಮಾಸಾದ್ಯ ಸೀಮಾದ್ಯಂತಂ ಗತೋಽಸ್ಮ್ಯಹಂ |
ಸ್ವರ್ಗಾದಿ ಭರ್ಗ ಲೋಕಾನಾಂ ಗರ್ಗಾದಿ ಮುನಿಭಿ: ಸಹ |೮೪|

ಪೂರ್ವಂ ಮದ್ಧೃತಸ್ರಗ್ಗಂಧ ಶುದ್ಧಗಂಧಂ ಚ ಜಿಘ್ರತಿ |
ಶ್ರದ್ಧಾಸಮಿದ್ಧ ಸದ್ಬುದ್ಧೌ ಧೈರ್ಯಾದ್ಧತ್ತೇ ಮದೀರಿತಂ |೮೫|

ಏವಂ ಸ್ವಪ್ನಕ್ರಮಂ ವಿಪ್ರೇಮಾನಿನ್ ಜಾನೀಹಿ ತ್ವಂ ಸದಾ |
ಕಾನೀಹ ಸುಕೃತಾನ್ಯಸ್ಯ ತ್ವಂ ತು ಮಾನಾದಿಕಾನ್ಕುರು |೮೬|

ಶ್ರೀಮದ್ವಾಗೀಶ ಸಂಜಾತವಾದಿರಾಜಾಖ್ಯಸನ್ಮುನೇಃ |
ಗತಿರ್ನ ಜಾತಾ ಚಾತ್ರೈವ ಭ್ರಮತೇ ಶ್ರಮತೇಽನಿಶಂ |೮೭|

ಇತಿ ಜಾನಂತಿ ಯೇ ಮರ್ತ್ಯಾಃ ಪತಿತಾ ನಾತ್ರ ಸಂಶಯಃ |
ಪತಂತಿ ಪಿತೃಭಿಃ ಸಾರ್ಧಂ ವಿತತೇ ನರಕೇ ಸುತ |೮೮|

ಸವೈ ಮಹಾನುಭವಶ್ಚ ಮೋದತೇ ವಿಷ್ಣುಮಂದಿರೇ |
ಇತಿ ಜಾನಂತಿ ಯೇ ಮರ್ತ್ಯಾ ಅಪ್ಯಮರ್ತ್ಯತ್ವಗಾಮಿನಃ |
ಮೋದಂತೇ ದಿವ್ಯ ಲೋಕೇಷು ನಾಕಾದಿಷು ನ ಸಂಶಯಃ |೮೯|

ಏವಂ ಶಶ್ವತ್ ಸುಪ್ರಸನ್ನೋಽಸ್ಮಿ ಪುತ್ರ ಸತ್ಪ್ರೇಕ್ಷಾ ತೇ ಜಾಯತೇ ಕಾಽತ್ರ ಶಂಕಾ |
ಮತ್ಪ್ರೇಕ್ಷಣಾತ್ ಪ್ರಾಣನಾಥ ಪ್ರಿಯೇಽಸ್ಮಿನ್ ಕೃಷ್ಣೇ ಭಕ್ತಿಂ ಕುರು ಮಂತ್ರೇಣ ಪುಷ್ಣನ್ |೯೦|

ಹೇ ಪುತ್ರ ತವ ಪಾಪಾನಿ ಚಾಪಾನೀವ ನಮಂತಿ ಚ |೯೧|

ದಿನೇ ದಿನೇ ಕಲಾವ್ಕೃದ್ಧಿರ್ವದನೇ ಮದನಂ ವಿನಾ |
ಜಾಯತೇ ಕಾಮತಶ್ಚಾಪಿ ಮಾಪತೇ ತ್ವಾಯತೇಕ್ಷಣ |೯೨|

ತವ ಪಾಪಾನಿ ಕರ್ಮಾಣಿ ವರ್ಮಾಣಿ ಧೃತವಾನಸಿ |
ಮತ್ಕೃಪಾಪಾತ್ರರೂಪಾಣಿ ವೈರಿಣಾಂ ಮಾರಕಾಣಿ ಚ |೯೩|

ತಸ್ಮಾತ್ ತವ ನ ಭೀತಿರ್ವಾ ಚಾಮ ವಾ ನಾಸ್ತಿ ಪಾರ್ಥಿವ |೯೪|

೧೭. ವಿಪ್ರ ಪ್ರಕರಣಮ್ | ಪಾರ್ಥಿವಾದಿತ್ಯಾರಭ್ಯ ಶ್ಲೋಕಾ: [೯೫-೧೦೯]

ಮಾನಂ ವೈ ಜಾಯತೇ ಕಾಮಂ ಮಾನಿಂಸ್ತವ ನ ಚಾನ್ಯಥಾ |
ತಸ್ಮಾನ್ಮಮ ಪದೇ ನಿತ್ಯಂ ಭಕ್ತಿಂ ಕುರು ಸುತೋತ್ತಮ |
ವಿತತಾಂ ಕೀರ್ತಿಮಾಪ್ನೋತಿ ಸತತಂ ಚ ಭವಾನಿತಿ |೯೫|

ವಾದಿರಾಜಾಗ್ರತಃ ಕ್ಷುದ್ರರಾಜಕಾರ್ಯಂ ಕುತಃ ಸುತ |
ವಾದೀಭ ಮೃಗರಾಜೋಽಹಂ ವಾದಿರಾಜೋ ಹರಿಂ ಭಜೇ |೯೬|

ರಾಜ್ಞಾಂ ಕಾರ್ಯೇಣ ಮೇ ಕೃತ್ಯಂ ಪ್ರಾಜ್ಽಜಂ ಕಿಂ ವದ ಮದ್ವಿಧೇಃ |
ಈಶ್ವರಸ್ಯೈವ ಸಂಕಲ್ಪೋ ಯಥಾಚಾಸ್ತಿ ತಥಾ ಭವೇತ್ |೯೭|

ತಸ್ಮಾಲ್ಲೋಕಸ್ಯ ವಾರ್ತಾಂ ಮಾಂ ನ ಶ್ರುಣುಷ್ವಾದ್ಯ ಗಚ್ಛತು |
ರಾಜ್ಽಜಾಂ ಪಾಪಾತ್ಮನಾಂ ವಾರ್ತಾ ಸತಾಮಾರ್ತಿಪ್ರದಾ ಧ್ರುವಂ |೯೮|

ತಸ್ಮಾತ್ ತ್ವಂ ಬ್ರಾಹ್ಮಣ ಶ್ರೀಮಾನ್ ವದ ಮದ್ಗುಣವೈಭವಂ |
ವಕ್ಷ್ಯಾಮಿ ಗುಣಸಂಭೂತಿಂ ಶ್ರುಣು ತ್ವಂ ಗುಣಿನಾಂ ವರ |೯೯|

ಪುನಃ ಪುನಃ ಪ್ರವಕ್ಷೇಹಂ ತದ್ಗುಣೌಘಾನಪಿ ದ್ವಿಜ |
ಶನೈಃ ಶನೈಃ ಶ್ರುಣು ತ್ವಂ ಹಿ ಮದಂತರ್ಯಾಮಿಣೋ ಹರೇಃ |೧೦೦|

ಅಥಾಪಿ ನ ಪ್ರವಕ್ಷ್ಯಾಮಿ ಹ್ಯವಿಶ್ವಾಸಾತ್ಮನಃ ಕಲೇಃ |
ಮಿಥ್ಯಾಮತಿಸ್ವರೂಪತ್ವಾತ್ ತನೈವೇತಿ ಪ್ರವಕ್ಶ್ಯತಃ |೧೦೧|

ಕಾಪುರುಷ ಹೃನ್ಮಧ್ಯಸ್ಥಃ ಕೋಪ ಏವ ಭವಿಷ್ಯತಿ |
ಶಾಪಂ ತದಾ ಪ್ರದಾಸ್ಯಾಮಿ ಪಾಪಪೂರುಷರೂಪಿಣಃ |೧೦೨|

ಏವಂ ಸರ್ವಂ ಜಗನ್ನಷ್ಟಂ ಕಷ್ಟಾತ್ಕಷ್ಟಂ ಚ ಯಾಸ್ಯತಿ |
ಸ್ಪಷ್ಟಾತ್ಸ್ಪಷ್ಟತಮಂ ಲೋಕೇ ನಾರಕಂ ಯಾತಿ ದಾರಕ |೧೦೩|

ತಸ್ಮಾತ್ ಕಲಿಯುಗೇ ಘೋರೇ ಸೌರೇರ್ಲೋಕಂ ತು ಯಾಸ್ಯತಃ |
ಪಶ್ಯತೋ ದುಃಖರೂಪಾಣಿ ನೀರಾಣೀತಿ ಚ ತಾನ್ ಪ್ರತಿ |
ನ ವಕ್ಷ್ಯೇ ಸೂಕ್ಷ್ಮ ವೃತ್ತಾಂತಂ ಧ್ವಾಂಕ್ಷವೃತ್ತಿಂ ಚ ಕಾಙ್ಕ್ಷತಃ |೧೦೪|

ಸಾಕ್ಷಿಸಿದ್ಧಂ ತು ಪ್ರತ್ಯಕ್ಷಾಯೋಗ್ಯಂ ಕಾಙ್ಕ್ಷಿತಮೀಕ್ಷಯಾ |
ವಕ್ತವ್ಯಮೇವ ವಕ್ಷ್ಯಾಮಿ ನಾವಕ್ತವ್ಯಂ ಕದಾಚನ |೧೦೫|

ಓಂ ಏತತ್ಸರ್ವಂ ಸ್ವಾಪ್ನಪದ್ಯೇನ ಗರ್ವಂ ಹಿತ್ವಾ ಸರ್ವೇ ವಿಪ್ರವರ್ಯಾಸ್ಯಜೇನ |
ಶೃತ್ವಾ ಚೋರ್ವ್ಯಾಂ ಶರ್ವ ಗುರ್ವಾದಿ ದೇವಾನ್
ದೃಷ್ಟ್ವೋರ್ವಶಿಂ ಯಾಂತು ಮಾಂ ಮಾನವೇಂದ್ರಾಃ |೧೦೬|

ಇದಂ ವೃಂದಾವನಾಖ್ಯಾನಂ ಯೇ ಪಠಂತಿ ಮನೀಷಿಣಃ |
ಮುಕುಂದಾವನಮೇವಾಸ್ತು ತೇಷಾಂ ಕಂದಾಶನಾಜ್ಽಜಯಾ |೧೦೭|

ಇದಮರ್ಪಿತಮೇವಾಸ್ತು ಹಯಶೀರ್ಷಸ್ಯ ಪಾರ್ಷದಾತ್ |
ಸಮಂ ಸಹಸ್ರಶೀರ್ಷಸ್ಯ ಸೂಕ್ತಸ್ಯ ಪುರುಷಾತ್ ಕೃತಮ್ |೧೦೮|

ಯಚ್ಛ್ರುಣ್ವತಾಂ ಭಕ್ತಿರುದಾರಸದ್ಗುಣೇ ಹರೌ ಹರೇರ್ಲೋಕಗತೇ ತಥಾ ಮಯಿ |
ಭವತ್ಯಹೋ ಸರ್ವಶುಭಾಪ್ತಿಸನ್ಮತೀರ್ ದದಾತ್ಯಜಸ್ರಂ ಸುತ
ಸತ್ಯಮೇವ ತತ್ ಓಂ |೧೦೯|

| ಇತಿ ಶ್ರೀಸ್ವಾಪ್ನವೃಂದಾವನಾಖ್ಯಾನೇ ಅಲೌಕಿಕ ವಿಭಾಗೇ
ನಿದರ್ಶನಪರ್ವಣಿ ದ್ವಾದಶಾಧ್ಯಾಯ: ಸಮಾಪ್ತ: |

|| ಶ್ರೀ ಅಶ್ವಿನೀಹಯಗ್ರೀವಾತ್ಮಕ ಕೃಷ್ಣಾರ್ಪಣಮಸ್ತು ||

13. Svaapnavrundavanakhyana