11. Svaapnavrundavanakhyana

Composer : Shri Vadirajaru

| ಅಥ ಏಕಾದಶಾಧ್ಯಾಯ |

೧. ಲಕ್ಷ್ಮೀಪತಿ ಪ್ರಕರಣಮ್ | ಶ್ಲೋಕಾ: [೧-೯]

ಅಲೌಕಿಕಾಯಾಂ ಮಮ ಸತ್ಕೃತೌ ಚ
ನ ದೋಷ ಬುದ್ಧಿಃ ಕುಶಲೈಶ್ಚ ಕಾರ್ಯಾ |
ಅರ್ಥೇ ಚ ದೃಷ್ಟಿಃ ಕ್ರಿಯತಾಂ ನ ಶಬ್ದೇ
ಯತಶ್ಚೈಷಾ ಸ್ವಾಪ್ನಕೃತಿರ್ಹಿ ವಾಸನೀ |೧|

ವಾಸನಾತ್ಮಕ ಶಬ್ದಾನಾಮರ್ಥ ದರ್ಶನಮೇವ ಚ |
ಸತ್ಯಂ ನ ಶಬ್ದ ಸತ್ಯತ್ವಂ ಏವಂ ಹಿ ಸ್ವಾಪ್ನ ನಿರ್ಣಯಃ |೨|

ಲೌಕಿಕಸ್ಯ ತು ವಾಕ್ಯಸ್ಯ ಬುದ್ಧಿಪೂರ್ವಂ ಕೃತಸ್ಯ ಚ |
ಶಬ್ದಾರ್ಥೋಭಯ ಸತ್ಯತ್ವಂ ಗ್ರಾಹ್ಯಮೇವ ನ ಸಂಶಯಃ |೩|

ಪೂರ್ವಾನುಭವ ಸಂಸ್ಕಾರಾತ್ ತಾದೃಶಾರ್ಥಾಂಸ್ತು ಪಶ್ಯತಿ |
ಶೃಣೋತಿ ಚ ತಥಾ ಶಬ್ದಾನ್ ಪೂರ್ವ ಸಂಸ್ಕಾರ ಕಾರಣಾತ್ |೪|

ಅಯಂ ತು ಬ್ರಾಹ್ಮಣಃ ಪೂರ್ವಂ ಮಮ ಶಿಷ್ಯಃ ಸುಬುದ್ಧಿಮಾನ್ |
ತತ್ಸಂಸ್ಕಾರ ವಶಾದೇವ ಸ್ವಪ್ನೇ ವಕ್ಷ್ಯಾಮ್ಯಹಂ ದ್ವಿಜಂ |೫|

ಅಹಂ ಜಾನಾಮಿ ತತ್ಸರ್ವಂ ಪೂರ್ವ ಸಂಸ್ಕಾರ ಕಾರಣಂ |
ಜಾತಿಸ್ಮರಣ ಶಿಲೋಽಹಂ ಹಯಗ್ರೀವಸ್ಯ ಚಾಽಜ್ಞಯಾ |೬|

ದುರ್ವಾದಿಗರ್ವಹರ ಪುತ್ರ ಸುಖೀ ಭವಸ್ವ |
ಗುರ್ವಾದಿರಾಜ ಕೃಪಾಯಾ ಸುಮತಿಂ ಭಜಸ್ಯ |
ಶರ್ವಾದಿ ದೇವ ವರ ವಂದ್ಯ ಹರಿಂ ಭಜಸ್ವ
ಚೋರ್ವ್ಯಾಂ ಸುಕೀರ್ತಿಮಥ ಮೇಽತ್ರ ಚ ಖ್ಯಾಪಯಸ್ವ |೭|

ಇಮಾಂ ಕೃತಿಂ ಯಾಂ ಲಿಖತಿ ಸ್ಮ ಲೇಖಿಕಾ ವಾಚಾಽಪಿ ಪುಣ್ಯಂ ಲಭತೇ ನ ಸಂಶಯಃ |
ವೃಂದಾವನಾಲಂಕರಣೇನ ಧಾತುಭಿಃ
ಸಂಮಾರ್ಜನಾಭಿರ್ಬಹುಪುಣ್ಯ ಭಾಜಿನೀ |೮|

ಆರಾರ್ತಿಕಾಭಿರ್ಬಹು ಚಿತ್ರಿಕಾಭಿಃ ಸನ್ನಾಮ ಸಂಕೀರ್ತನ ಸಂಸ್ತವೈಶ್ಚ |
ಉಪಾಧಿ ರಾಹಿತ್ಯವತಾಂ ಸು ಸೇವಾಂ ಕರೋತಿ ಸಾ ಚಾಪಿ ಮಮ ಪ್ರಿಯೋಽಭೂತ್ |೯|

೨. ಪುಷ್ಯ-ನಕ್ಷತ್ರ-ಸಂಜಾತ-ಪ್ರಾಪ್ತಯಯತಿಭಾವ-ವಿಪ್ರಪರಮಗುರು-ಪ್ರಕರಣಮ್ | ಶ್ಲೋಕಾ: [೧೦-೧೧]

ಮದ್ಭಾಗವತ ಮುಖ್ಯಾಂಸ್ತು ತ್ರೀನ್ ದಾಸಾಂಸ್ಚ ಸಹೋದರಾನ್ |
ಮಾ ತ್ಯಜ ತ್ವಂ ಹಿ ಮತ್ಪುತ್ರ ತೇ ವೈ ಮಮ ಪ್ರಿಯಾಃ ಸದಾ |೧೦|
ನಾಗಶಯನ ಹನೂಮಂತೌ ತೌ ಸದಾ ವೈ ಮಮ ಪ್ರಿಯೌ |
ಅಹಂ ಜಾನಾಮಿ ತದ್ಭಕ್ತಿಂ ನಾಗಶಯನಃ ಸುಬುದ್ಧಿಮಾನ್ |೧೧|

೩. ವಿಪ್ರ ಪ್ರಕರಣಮ್ | ಶ್ಲೋಕಾ: [೧೨-೧೮]

ವೇದವೇದ್ಯ ಸುಬುದ್ಧಸ್ತ್ವಂ ದುರ್ಬುದ್ಧಿಂ ದುರ್ಧರೇರಿತಾಂ |
ತ್ಯಜೇಮಾಂ ಸುಜನ ಶ್ರೇಷ್ಠ ಮಜ್ಜನ ಪ್ರಾಣ ಹಾರಿಣೀಂ |೧೨|

ಮಮಾಽಶೀರ್ವಚನೇನೈವ ಚಿರಂ ಜೀವ ಸುಖೀಭವ |
ಹಯಾಸ್ಯಾರಾಧನೇನೈವ ಮಮಾಽನಂದಪ್ರದೋ ಭವ |೧೩|

ವೃಂದಾವನೇ ದಂದಶೂಕ ಧಾರಿಣಂ ದಾಸ್ಯಧಾರಿಣಂ |
ಮಂದಾರ ಮಾಲಿನಾಂ ಶಾಂತಿಶಾಲಿನಃ ಕಮಲಾತ್ಮನಃ |೧೪|

ಇತಿ ಮಾಂ ವಿದ್ಧಿಸದ್ಬುದ್ಧಿಂ ಹಯಗ್ರೀವ ಕೃಪೋದಧಿಂ |
ವೇದವೇದ್ಯ ಸದಾರಾಧ್ಯ ಶುದ್ಧ ಮತ್ಪಟ್ಟವರ್ಧನ |೧೫|

ವ್ಯಾಸೇನ, ಸೀತಾಪತಿನಾ ಶೇಷೇಣಾಪಿ ಚ ನ ಶ್ರುತಂ |
ತೈಃ ಶ್ರುತಂ ಚೇದಿದಂ ಸರ್ವಂ ತ್ರೈಲೋಕ್ಯಂ ಶ್ರುತಮೇವ ಚ |೧೬|

ಇತಿ ಪೂರ್ವಂ ಮಯಾಪ್ರೋಕ್ತಂ ಅನುಸಂಧತ್ಸ್ವ ಬುದ್ಧಿಮಾನ್ |
ತ್ರೀನುದ್ದಿಶ್ಯ ಮಯಾ ಪ್ರೋಕ್ತಂ ತ್ವಾಂ ವಿಶೇಷಾನ್ನ ಸಂಶಯಃ |೧೭|

ಅತಸ್ತ್ರಯಾಣಾಂ ಭಕ್ತಾನಾಂ ತೇಷಾಂ ಪ್ರೇಷಯ ಮತ್ಕೃತಿಂ |
ನೈವೇದ್ಯಂ ನೈವ ಗೃಹ್ಣಾಮಿ ತಾವತ್ಪರ್ಯಂತಮೇವ ತೇ |೧೮|

೪. ಶೇಷ ಪ್ರಕರಣಮ್ | ಶ್ಲೋಕಾ: [೧೯-೨೬]

ವೃಂದಾವನೇ ಮದನ ಮರ್ದನ ರುದ್ರ ಹೃದ್ಯಂ
ಸದ್ಭಿಃ ಪ್ರವಂದಿತ ಪದಂ ಮದನಾಭಿರಾಮಂ |
ವೃಂದಾರಕೇಂದ್ರಮರುದಂಶ ಸುಮರ್ದಿತಾಙ್ಗಂ |
ರಕ್ಷೋ ವಿದಾರ್ಯ ವರದಂ ಪ್ರಣಮಾಮಿ ರಾಮಂ |೧೯|

ಅರಸ ಭೂಪ ಚಿರಪಟ್ಟವರ್ಧನ ಪರಶುಚಾಪ ಧರದುಷ್ಟ ಮರ್ದನ |
ನಿರಶ ಪಾಪ ಹರಶಿಷ್ಟ ಶೋಧನ ಪರ ಸುಪಾಪಕರದುಷ್ಟ ಸೂದನ |೨೦|

ರಥೋತ್ಸವಸ್ಯ ಭಾರೋಽಯಂ ತಾವಕಃ ಪಾವಕಪ್ರಭ |
ಕಾಲೋಽಯಂ ಮಮ ಸೇವಾಯಾಃ ಬಾಲೋಽಯಂ ಮಮ ಪುತ್ರಕಃ |೨೧|

ಅಂತರಾಯಃ ಕುತೋ ಹ್ಯಸ್ಯ ಶಾಂತರಾಯಾಶ್ಚ ಶತ್ರವಃ |
ಭವಿಷ್ಯಂತಿ ನ ಸಂದೇಹೋ ಮಮ ವಿಘ್ನಕರಾಃ ಸದಾ |೨೨|

ಏತತ್ ಪದ್ಯತ್ರಯಂ ಶೇಷ ವದಸ್ವಂ ತ್ವಂ ಚ ಭೂಪತೇಃ |
ಯತಸ್ತ್ವಂ ಪಂಡಿತಃ ಶೌಂಡಸ್ತನ್ಮಂಡನಪರೋ ಭವ |
ಸರ್ವಂ ವಕ್ತವ್ಯಮುಕ್ತಂ ಚ ಕೃತಾರ್ಥೋಽಹಂ ನ ಸಂಶಯಃ |೨೩|

ಮದ್ವೇತನೇನೈವ ತು ಯಶ್ಚ ಜೀವತಿ ಮನ್ನಾಮಧಾರೀ ಮದನುಗ್ರಹೀ ಚ |
ಪಠೇತ ಸ್ವಾಪ್ನೀಂ ಮಮ ಸತ್ಕೃತಿಂ ಚ ನೋಚೇದದಂಡಸ್ಯ ಕರೋಮಿ ತೀವ್ರಂ |೨೪|

ಏವಂ ಮದ್ಭಕ್ತಿಮಂತಶ್ಚ ಸರ್ವ ಏವ ಪಠಂತ್ವಿಮಾಂ |
ಖ್ಯಾತಾಂ ಕುರ್ವಂತು ಲೋಕೇಷು ನೋ ಚೇನ್ಮದ್ದ್ರೋಹಿಣಶ್ಚ ತೇ |೨೫|

ಪಠತಾಂ ಶ್ರುಣ್ವತಾಂ ಚಾಪಿ ಖ್ಯಾತಾಮುರ್ವ್ಯಾಂ ಪ್ರಕುರ್ವತಾಂ |
ಸರ್ವೇಷ್ಟಾನಿ ಭವಿಷ್ಯಂತಿ ಹಯಗ್ರೀವಸ್ಯ ಚಾಽಜ್ಞಯಾ |೨೬|

೫. ವಿಪ್ರ ಪ್ರಕರಣ | ಶ್ಲೋಕಾ: [೨೭-೩೧]

ಯೋ ಮನಾಂಸಿ ತನುಮರ್ಪಿತವಾನ್ ಮಮೈತತ್ ಸರ್ವಂ ಧನಂ ಕನಕ ಪೂರ್ಣಮಥಾಭಿಷೇಕಂ |
ಯಶ್ಚಾಕರೋದ್ವಿತತ ಭಕ್ತಿಯುತಾಯ ತಸ್ಮೈ ಗತ್ವಾ ವದಸ್ವ ಮಮ ಸತ್ಕೃತಿಮಾಶು ವಿಪ್ರ |೨೭|

ವ್ಯಾಸಾಯ ಭಕ್ತಿಕೋಶಾಯ, ದಾಸಾಯ ಮಮ ನಿತ್ಯಶಃ |
ವೈಷ್ಣವ ಸ್ನೇಹಪಾಶಾಯ ತೋಷಾಯ ವದ ಮತ್ಕೃತಿಂ |೨೮|

ತಸ್ಯಾನುಜಸ್ಯ ಮಯಿ ಸರ್ವ ಸಮರ್ಪಕಸ್ಯ ಭಕ್ತ್ಯಾದಿ ಮುಖ್ಯ ಗುಣ ಸಂಗ್ರಹಣಸ್ಯ ತಸ್ಯ |
ಪೂರ್ವಂ ಹಯಾಸ್ಯ ಚರಣ ಸ್ಮರಣೋತ್ಸುಕೋಽಪಿ ದುರ್ವಿಪ್ರ ನಿಗ್ರಹವತೋ ವದ ಮತ್ಕೃತಿಂ ಚ |೨೯|

ವೇನವದ್ ವೇತನಾನ್ನಂ ಚ ಯಸ್ಯ ಭುಂಕ್ತೇ ಸುದುರ್ಮತಿಃ |
ತಸ್ಯೇಷ್ಟದೇವ ಸ್ಮರಣೇ ಮಹತ್ಕೋಪಾದಭೂದಹೋ |೩೦|

ಇದಂ ಸರ್ವೇಽಪಿ ಜಾನಂತಿ ತದ್ವೇಷಾನ್ನೋಚ್ಯತೇ ಮಯಾ |
ಸೋಽಪಿ ಮತ್ಪಾದಮಾಪನ್ನಃ ಶಾಪಭೀತೋ ನ ಭಕ್ತಿಭಾಕ್ |೩೧|

೬. ಸೀತಾಪತಿ ಪ್ರಕರಣಮ್ | ಶ್ಲೋಕಾ: [೩೨-೩೯]

ಬ್ರಾಹ್ಮಣಂ ಮಾನಿನಂ ಮಾನಂ ಹಿತ್ವಾ ಮತ್ಪಾದ ಸೇವನಂ |
ಕುರ್ವಾಣಮನಿಶಂ ವಿದ್ವನ್ ಮಾ ತ್ಯಜಸ್ಯ ತ್ವಮಮಾಯಿನಂ |೩೨|

ಮದ್ವೇತನಾನ್ನಂ ಭುಂಜಾನಾ ಯೇ ವೈ ಕುಜನ ಬುದ್ಧಯಃ |
ತೇಷ್ವೇಕೋಽಪಿ ತು ಮತ್ಪದ್ಯಂ ತದರ್ಥಂ ವಾ ನ ವಕ್ತ್ಯಹೋ |೩೩|

ಮತ್ಕೃತಿಂ ವದತಾಂ ಪುತ್ರ ತದರ್ಥಂ ವದತಾಂ ತಥಾ |
ಮದ್ವೇತನಾಂ ದದಸ್ವ ತ್ವಂ ಅನ್ಯಥಾ ಮಾ ದದಸ್ವ ಭೋ |೩೪|

ಮದ್ವೇತನೇನ ಶೂನ್ಯೇಽಸ್ಮಿನ್ ವಿಪ್ರೇ ಜಾತಃ ಪರಾಗ್ರಹಃ |
ಜುನೇಷು ವಕ್ತಿ ಮತ್ಪದ್ಯಂ ತದರ್ಥಂ ಮಯಿ ಭಕ್ತಿಮಾನ್ |೩೫|

ಅಹಂ ಶಪೇ ಸುಪಾಪಿನಂ ಕು ಪಾತ್ರಸಾದಭೂದ್ಧನಂ |
ಮಯಾಽತ್ರ ಜೀವಿತಂ ಬಹು ಸುಪುತ್ರ ಮಾ ದದಸ್ವ ಹ |೩೬|

ಬ್ರಾಹ್ಮಣಂ ಗುಣಮಣಿಂ ಶ್ರುಣು ಪುತ್ರ ಚಾರು ವೀಜಿತ ಸುಚಾಮರಪಾಣಿಂ
ಪುಣ್ಯ ಪೂರ್ಣ ಗುಣ ಭೂಷಣಕೀರ್ತೇರಗ್ರಜತ್ವ ಮಮ ಮಾ ತ್ಯಜ ತೂರ್ಣಂ |೩೭|

ಬ್ರಾಹ್ಮಣಂ ಗುಣವಂತಂ ಚ ಋಣವಂತಂ ಗುಣಾರ್ಣವಂ |
ಜಾನೀಹಿ ಗುಣಿನಃ ಫಣಿನೋ ವದಸ್ವಾಸ್ಯ ಚ ತದೃಣಂ |೩೮|

ಋಣಾನ್ಮುಕ್ತಿಶ್ಚ ವಿಪ್ರಸ್ಯ ಸಾಕ್ಷಾನ್ಮುಕ್ತಿರ್ನ ಸಂಶಯಃ |
ಭೋಜ್ಯ ವಿತ್ತೇ ಪ್ರದತ್ತೇ ಹಿ ಭುಕ್ತೇರ್ನಾಸ್ತಿ ತತೋಽಧಿಕಂ |೩೯|

೭. ಪುಷ್ಯ-ನಕ್ಷತ್ರ-ಸಂಜಾತ-ವಿಪ್ರಗುರು-ಪ್ರಕರಣಮ್ |
ಶ್ಲೋಕಾರ್ಧಮ್ |

ಮದ್ವಾಚಂ ನಂದನ ತ್ವಂ ಹಿ ಸರ್ವಥಾ ಮಾ ವೃಥಾ ಕುರು |೪೦|

೮. ವಿಪ್ರಪರಮಗುರು-ಪ್ರಕರಣಮ್ | ಶ್ಲೋಕಾ: [೪೧-೪೪]

ಮನ್ಮಠಸ್ಯಾಧಿಪತ್ಯೇ ತು ವಿಟ್ಠಲಂ ಪಟ್ಟವರ್ಧನ |
ಸ್ಫುಟಂ ಕಾರ್ಯಪಟುಂ ಮತ್ವಾ ಪಟ್ಟಪಚ್ಛೋಡಿಕಾಂ ದಿಶ |೪೧|

ಪೂರ್ವಂ ಪ್ರಾಮಾದಿಕೀ ಬುದ್ಧಿಃ ಸ್ಯಾತ್ ತಸ್ಯ ನ ತು ಸಾಹಜಃ |
ನಿರ್ವೇದನಾಮಿದಾನೀಂ ತು ಸಂಪ್ರಾಪ್ತಶ್ಚ ನ ಸಂಶಯಃ |೪೨|

ರಥೋತ್ಸವಸ್ಯ ಭಾರಂ ತಂ ಧರ್ತಾ ಸ ಏವ ತು |
ತದನ್ಯಃ ಕೋ ಭವೇತ್ಪುತ್ರ ಸಮರ್ಥಃ ಕಾರ್ಯಸಾಧನೇ |೪೩|

ನಾಗಶಯನಸ್ಯ ಮನಸಃ ಸಂಕಲ್ಪಂ ಸಂಪ್ರಪೂರಯ |
ಅಹಂ ಜಾನಾಮಿ ತದ್ಭಕ್ತಿಂ ನಾಗಶಯನಃ ಸುಬುದ್ಧಿಮಾನ್ |೪೪|

೯. ದೃಷ್ಟಪುರುಷ ಪ್ರಕರಣಮ್ | ಶ್ಲೋಕಾ: [೪೫-೪೮]

ಮದ್ವಾಕ್ಯಂ ಮಾನಸಂ ಸಿದ್ಧಂ ಸರ್ವಂ ಸಂಗ್ರಾಹ್ಯ ಮೇ ವಹಿ |
ಚೋದ್ಯಾನರ್ಹೇ ತು ಮದ್ವಾಕ್ಯೇ ಚೋದ್ಯಂ ಕುರ್ವನ್ ಪತತ್ಯಧಃ |೪೫|

ಭಾವನಾತ್ಮಕ ಶಬ್ದೇಷು ಜ್ಞಾತವ್ಯೋ ಭಾವ ಏವ ಚ |
ಅಹಮಾವಿಷ್ಟವಾನ್ ವಿಪ್ರೇ ಕದಾಚಿನ್ನ ಕದಾಚನ |೪೬|

ಮತ್ಕೃತೌ ದೋಷ ಶಂಕಾ ಚೇದ್ ದೋಷೇ ಪರಿಹೃತೇ ಸತಿ |
ಭವತಾಂ ಮಾತೃದೋಷೋಽಪಿ ಸ್ಯಾತ್ ವ್ಯಭೀಚಾರ ಶಂಕಯಾ |೪೭|

ಪಾತಿವ್ರತ್ಯಾತ್ ನ ದೋಷಶ್ಚೇದಶರೀರತ್ವತಸ್ತಥಾ |
ಪ್ರಕೃತೇಽಪಿ ನ ದೋಷಃ ಸ್ಯಾತ್ ಪ್ರತಿ ಬಂದೀ ದುರುತ್ತರಾ |೪೮|

೧೦. ಲಕ್ಷ್ಮೀಪತಿ ಪ್ರಕರಣಮ್ | ಶ್ಲೋಕಾ: [೪೯-೫೮]

ಜನಾಃ ಸುಪಾಪಿನಃ ಸರ್ವೇ ಕಲಿನಾಽಽವಿಷ್ಟ ಚೇತನಾಃ |
ಕತ್ಥನಂ ವಾವದೂಕಾಸ್ತೇ ಕುರ್ವಂತಿ ಮಮ ಸನ್ನಿಧೌ |
ಕದನೇ ಚೋದ್ಯತಾಃ ಸರ್ವೇ ವದನೇ ಭಸ್ಮವಾಸಿನಃ |೪೯|

ಮಯಿ ಜೀವತಿ ಸರ್ವೇಽಪಿ ಮತ್ಪ್ರಿಯಾ ಇವ ಮತ್ಕೃತಿಂ |
ಪಠಂತ್ಯರ್ಥಂ ವದಂತ್ಯೇತೇ ಮತ್ಪ್ರತಾರಣ ಬುದ್ಧಯಃ |೫೦|

ಇದಾನೀಂ ಸ್ವಾಪ್ನಪದ್ಯಂ ಮೇ ತೇಷ್ವೇಕೋಪಿ ನ ವಕ್ತ್ಯಹೋ |
ಅಹಂ ನೈವೇತಿ ದುರ್ಬುದ್ಧ್ಯಾ ಜಾನೇ ಸರ್ವಮನೋಗತಂ |೫೧|

ಯೋ ನ ವಕ್ತಿ ಚ ಮತ್ಪದ್ಯಂ ತದರ್ಥಂ ವಾ ಮದಾಶ್ರಯೀ |
ತಸ್ಯಾಶುಭಂ ಭವತ್ಯೇವ ಪಶ್ಯ ಮೇ ತಪಸಃ ಫಲಂ |೫೨|

ಇಮಾಂ ಕೃತಿಂ ಮಮ ಸ್ವಾಪ್ನೀಂಆದರಾದ್ ಯಸ್ತು ವಕ್ಷ್ಯತಿ |
ತಸ್ಯ ಶ್ರೀಶಃ ಪ್ರಸನ್ನಃ ಸಚ್ಛುಭಂ ದಾಸ್ಯತ್ಯಸಂಶಯಃ |೫೩|

ಸತ್ಯಂ ಸತ್ಯಂ ಪುನಃ ಸತ್ಯಂ ತ್ರಿವಾಚಾಽಪಿ ಮಯೋಚ್ಯತೇ |
ಪಠತಾಂ ಶೃಣ್ವತಾಂ ಚಾಪಿ ಸರ್ವಸಂಪದ್ ಭವಿಷ್ಯತಿ |೫೪|

ಪುತ್ರ ತೇ ಸುಪ್ರಸನ್ನೋಽಸ್ಮಿ ಮತ್ಪ್ರಸಾದಾಪ್ತ ಸುಪ್ರಭ |
ಮಿತ್ರ ತೇ ಸುಪ್ರತಾಪೋಽಯಂ ಕೃತ್ರಿಮೋ ನ ಪ್ರದೃಶ್ಯತೇ |೫೫|

ಹಯಾಸ್ಯಂ ಬ್ರಹ್ಮಣೋಪಾಸ್ಯಂ ಮಯೋಪಾಸ್ಯಂ ಚ ಭೂರಿಶಃ |
ಪ್ರಸನ್ನಾಸ್ಯಂ ಸದಾ ವಶ್ಯಮುಪಾಸ್ಯ ತ್ವಂ ಸುಖೀ ಭವ |೫೬|

ಏವಂ ಶ್ರುತ್ವಾ ವಿಪ್ರವರ್ಯಾತ್ಸು ಗೂಢಮಾಶ್ಚರ್ಯಭೂತಂ ಮಮ ವೈಭವಂ ತು |
ಪುತ್ರ ಚೈತತ್ ಸುಪ್ರಸಿದ್ಧಂ ಕುರು ತ್ವಂ ಮಿತ್ರೋ ಯಥೈವಾಂಧಕಾರಸ್ಥಮರ್ಥಂ |೫೭|

ಪುತ್ರ ತ್ವಂ ವಿಪ್ರವರ್ಯಸ್ಯ ಸುಪ್ರಸನ್ನೋ ಭವ ಪ್ರಭೋ |
ಪ್ರಭುತ್ವಾತ್ ತ್ವತ್ಪ್ರಸಾದೋಽಯಂ ವಿಪ್ರೇ ಸ್ಯಾದೈಹಿಕಪ್ರದಃ |೫೮|

೧೧. ಸೀತಾಪತಿ ಪ್ರಕರಣಮ್ | ಶ್ಲೋಕಾ: [೫೯-೬೨]
ಅಜ್ಞಾನಹಾರಿಣಮಿತ್ಯಾರಮ್ಭ್ಯ |

ಗುರುತ್ವಾತ್ ಕುರು ಕಾರುಣ್ಯಂ ವಿಪ್ರಸ್ಯಾಜ್ಞಾನ ಹಾರಿಣಂ
ಮತ್ಪುತ್ರೇಣಾಽದರಾರ್ಥೋಕ್ತಂ ಮತ್ಕೃತೇರರ್ಥಮಂಜಸಾ |
ಶೃಣು ಸೀತಾಪತೇ ಭಕ್ತ್ಯಾ ಸತ್ಪತೇ ತೇ ಶುಭಾಪ್ತಯೇ |೫೯|

ತ್ವಾಮಾಗತಮಹಂ ಜಾನೇ ಚಿರಾದಾಗತವಾನಸಿ |
ಕರಾಯಾಽಗತವಾನಸ್ಮಿ ಸುರಲೋಕಾತ್ ಸುಪರ್ವಸು |೬೦|

ಚಿರಂ ಜೀವ ಚಿರಂ ಜೀವ ಸುಖೀ ಭವ ಸುಖೀ ಭವ |
ಮಮಾಽಶೀರ್ವಚನೇ ನೈವ ಹಯಗ್ರೀವಪರೋ ಭವ |೬೧|

ಸುತ ಸುತತ್ವಮತ ಸನ್ಮತೇ ಕುತಃ ಕುಮತಿರತ್ರ ತವ ಮತ್ಪ್ರಸಾದತಃ |
ವಿತತ ಭಕ್ತಿಯುತ ಮತ್ಪದೇ ಸದಾ ಕೃತ ಸಮಸ್ತ ಶುಭ ಸತ್ಕೃತೇ ಹರೇಃ |೬೨|

೧೨. ಬಹುಭಕ್ತ ಪ್ರಕರಣಮ್ | ಶ್ಲೋಕಾ: [೬೩-೬೫]

ದ್ವಿಜೇತಿ ಗರುಡಸ್ಯಾಪಿ ಸಮ್ಯಕ್ ಸಂಬೋಧನಾ ಕೃತಾ |
ಪುತ್ರೇತಿ ನರಕೋತ್ತಾರಂ ಹರಿಂ ಪ್ರತ್ಯುಕ್ತವಾನಹಂ |೬೩|

ಶೇಷೇತಿ ಭೂಧರಂ ಶೇಷಂ ವ್ಯಾಸೇತಿ ವ್ಯಾಸಮೇವ ಚ |
ಸೀತಾಪತೇತಿ ರಾಮಂ ಚ ಭೂಪೇತಿ ಭೂವರಾಹಕಂ |೬೪|

ಭೂಪೇತಿ ಭೂಮೇರುದ್ಧಾರಂ ವರಾಹಂ ಚೋಕ್ತವಾನಹಂ |
ತಸ್ಮಾತ್ ಗ್ರಾಹ್ಯೋಭಯಾರ್ಥಶ್ಚ ಮತ್ಕೃತೇರರ್ಥ ಬುಧ್ಧಿಭಿಃ |೬೫|

೧೩. ಲಕ್ಷ್ಮೀಪತಿ ಪ್ರಕರಣಮ್ | ಶ್ಲೋಕಾ: [೬೬-೭೦]

ಸುತ ಸುಸೂಕ್ಷ್ಮ ಮತಿಮನ್ ಕೃತಕೃತ್ಯಸ್ತ್ವಂ ಸಮಸ್ತ ಯತಿಷೂತ್ತಮ ಮೂರ್ತೆ |
ಮತ್ಕೃತಿಂ ವಿತತಯುಕ್ತಿ ಸತ್ಕೃತಿಂ ಸತ್ಸುವ್ಯಾಕುರುತ ತತ್ರ ಕೀರ್ತಯೇ |೬೬|

ಪುತ್ರ ಮತ್ಪುತ್ರಿಕಾಂ ಯುಕ್ತಿಮಲ್ಲಿಕಾಖ್ಯಾಂ ತವಾನುಜಾಂ |
ಕುರು ಸತ್ಪಾತ್ರದಾನಂ ತೇ ಕನ್ಯಾದಾನ ಫಲಂ ಭವೇತ್ |೬೭|

ಮದ್ಯುಕ್ತಿ ಭಾಷಣೈರ್ಭಾಸಿ ತ್ವದ್ವ್ಯಾಖ್ಯಾನ ಸುವಾಸಿನೀ |
ನಾನಾ ಪುಷ್ಪೋಲ್ಲಸತ್ಕೇಶ ಬಂಧಿನೀ ಭಾವಗಂಧಿನೀ |೬೮|

ವೇದವೇದ್ಯ ದ್ರೌಪದೀವ ಭಾತ್ಯನೇಕ ವರಾಪ್ಯಹೋ |
ತಸ್ಮಾದ್ವ್ಯಾಖ್ಯಾನ ಸನ್ಮಂತ್ರೈಃ ದಾನಂ ಕುರು ವರೇಷು ತಾಂ |
ತ್ವಮೇವ ಮತ್ಪಿತಾ ಮಾತಾ ಪಿತೃಹೀನಾಂ ತು ಮಾ ಕುರು |೬೯|

ಅಹೋಮಮಾಽತ್ಮಜಾ ಯುಕ್ತಿಮಲ್ಲಿಕೇತಿ ಮಮಾತ್ಮಜಂ |
ವವ್ರೇ ತೀವ್ರೇಣ ಭಾವೇನಾಪ್ಯಗ್ರಜಂ ವ್ಯಗ್ರಮಾನಿನೀ |೭೦|

೧೪. ವಿಪ್ರ ಪ್ರಕರಣಮ್ | ಶ್ಲೋಕಾ: [೭೧-೭೯]

ಅಪ್ಪಣ್ಣಃ ಕೃಷ್ಣಭಟ್ಟಶ್ಚ ಶಪ್ಪಣ್ಣಃ ಪರಿಕೀರ್ತಿತಃ |
ಪುಷ್ಪವಲ್ಲಘುಬುದ್ಧಿಶ್ಚ ಕಪಟೀ ಮತ್ಪದೇ ಸದಾ |೭೧|

ಮತ್ಪುತ್ರ ಸುಪ್ರಸಂಗೇ ತು ಸ್ವಪ್ರಸಙ್ಗಂ ಕರೋತಿ ಯಃ |
ತತ್ಪ್ರಸಙ್ಗಂ ತ್ವಹಂ ಸಮ್ಯಕ್ ಕುಪ್ರಸಙ್ಗಂ ಕರೋಮ್ಯಹಂ |೭೨|

ಮತ್ಪುತ್ರೇ ಕೃತ ಪಾಂಡಿತ್ಯೇ ಪಂಡಿತೈಃ ಮಂಡಿತೇ ಸತಿ |
ಷಂಡಕೈ ಕ್ರಿಯತೇ ಡಂಭಾತ್ ಸ್ವ ಪಾಂಡಿತ್ಯಂ ಹಿ ಡಂಬವತ್ |೭೩|

ಅಯಂ ತು ಕುಮನಾಃ ಕೃಷ್ಣೋ ಹ್ಯಪ್ಪಣ್ಣಃ ಫಣಿ ಬುದ್ಧಿಮಾನ್ |
ಶುನವತ್ ಕತ್ಥನಂ ಕುರ್ವನ್ ನಂದನಾಗ್ರೇ ಮನಾಕ್ ಚ ನಃ |೭೪|

ಮನ್ನಂದನಪದಂ ಧ್ಯಾತ್ವಾ ಶ್ರುತ್ವಾ ತಸ್ಯ ಸುಧಾಮಯೀಂ |
ಗಾಂ ತಂ ವೈ ಗೋಮುಖವ್ಯಾಘ್ರಂ ತ್ಯಜ ಶೀಘ್ರಂ ದುರಾಗ್ರಹಂ |೭೫|

ಸೋಽಪಿ ಮತ್ಪಾದ ಭಕ್ತಶ್ಚೇದ್ಧಿತ್ವಾ ಸ್ವಕೃತ ದುಷ್ಕೃತಿಂ |
ಮತ್ಕೃತಿಂ ಪುತ್ರ ಶಿಷ್ಯೇಷು ಸಮ್ಯಕ್ ವ್ಯಾಖ್ಯಾಂ ಕರೋತ್ವಹೋ |೭೬|

ತದ್ದ್ವೇಷಾತ್ ತು ನ ಭಾಷೇಽಹಂ ಶೇಷಶಾಯಿ ಪದೇ ಶಪೇ |
ರಾಗದ್ವೇಷ ವಿಹೀನೋಽಹಂ ಹಯಗ್ರೀವಸ್ಯ ಚಾಽಜ್ಞಯಾ |೭೭|

ಇತಿ ಪೂರ್ವಂ ಮಯಾ ಪ್ರೋಕ್ತಂ ಅನುಸಂಧತ್ಸ್ವ ಬುದ್ಧಿಮನ್ |೭೮|

ವ್ಯಾಖ್ಯಾನ ಗೌರವಾದೇವ ವಕ್ಷ್ಯಾಮ್ಯೇಷ ಸುಬುದ್ಧಿಮಾನ್ |
ನಂದನ ತ್ವಂ ತು ಸನ್ಮಾನಂ ಕುರು ವ್ಯಾಖ್ಯಾನ ಕಾರಿಣೇ |೭೯|

ಪತಂತಮಂಬರಾತ್ ಸಂತಃ ಕುಂಭೀಣೀಂ ಪ್ರತಿ ಶಂಭುನಾ
ಕುಂಭರಾಕ್ಷಸ ಭಂಗೇ ತು ದೃಷ್ಟ್ವಾ ಚ ಸ್ತಂಭಿತೋ ಮಯಾ |೮೦|

ಧ್ವಜಸ್ತಂಭೋ ದ್ವಿಜಶ್ರೇಷ್ಠ ಭಜ ಸ್ತಂಭೇ ಧೃತೋ ಮಯಾ |
ಸುಜನಾನ್ ಭಜಕಾನ್ ವಿಷ್ಣೂತ್ಸವಃ ಪಾತು ಮಮಾತ್ಮಜಾನ್ |೮೧|

ಕುಂಜರಾಯುತ ಸತ್ವೋಽಹಂ ಕಂಜನಾಭ ಪ್ರಿಯೇಚ್ಛಯಾ |
ಮಂಜು ಮತ್ಪಾಣಿನಾ ಧರ್ತಾ ಕಂಜಲೋಚನ ಸನ್ನಿಧೌ |೮೨|

ಅಧಸ್ತಾದುಪವಿಷ್ಟೋಽಹಮಿತಿ ಮಾ ಚಿಂತಯ ದ್ವಿಜ |
ತ್ವದಂತರ್ಯಾಮಿಣಂ ಮಾಮಪ್ಯಧಸ್ಥಂ ವಿದ್ಧಿ ಬುದ್ಧಿಮನ್ |೮೩|

ಮತ್ಕೃತೇಶ್ಚಾತ್ರ ಸನ್ಮಾನೋ ವಾಂಗ್ಮಾತ್ರೇಣ ಕೃತೋಽಭವತ್ |
ಪಚ್ಛೋಟಿಕಾಽಪಿ ನೋ ದತ್ತಾ ತವ ವಿಪ್ರ ಮಮಾಗ್ರತಃ |೮೪|

ಋಣಾನ್ನಿಷ್ಕೃತಿಮಪ್ಯಾಶು ನ ಕೃತಾ ತವ ಶೋಭನ |
ಭೋಜ್ಯವಿತ್ತಂ ಪ್ರದತ್ವಾ ತು ಋಣನ್ಮುಕ್ತಃ ಶನೈಃ ಶನೈಃ |೮೫|

ಭೋಜನಾರ್ಥಂ ಮಧುಕರ ವೃತ್ತಿಂ ಕುರು ಯಥಾ ಪುರಾ |
ಮತ್ಕೃತಿಶ್ಚಾಪ್ಯಶ್ಮಗತಾ ನ ಕೃತಾ ಪಶ್ಯ ತನ್ಮತೇ |೮೬|

ತಸ್ಮಾತ್ ತವೈಹಿಕಾಭಾವೇಽಪ್ಯಮುತ್ರಾರ್ಥೋ ಭವಿಷ್ಯತಿ |
ಮತ್ಪ್ರಸಾದಾನ್ನ ಸಂದೇಹೋ ವಿಶ್ವಾಸಂ ಕುರು ಸರ್ವಥಾ |೮೭|

ಐಹಿಕೋಽಪಿ ಯಥಾ ಕಾಲೇ ಕಿಂಚಿತ್ ಕಿಂಚಿತ್ ಭವಿಷ್ಯತಿ |
ಶ್ರೀಶ ಪ್ರಸಾದಾದಾವಾಸೋಽಪ್ಯತ್ರಾಪಿ ತು ಭವಿಷ್ಯತಿ |೮೮|

ಅಹಂ ತು ಗತ್ವಾ ಚಾಽಯಾಸ್ಯೇ ಚಿರಂ ಜೀವ ಸುಖೀ ಭವ |೮೯|

೧೫. ವೇದನಿಧಿ ಪ್ರಕರಣಮ್ | ಶ್ಲೋಕಾ: [೯೦-೯೯]

ದ್ವಿಜಸಮಾಜ ನತಸಜ್ಜನಪ್ರಿಯ ಕುಜನಭರ್ಜನ ಮಮಾಽತ್ಮಜ ಭೋಜ |
ದ್ವಿಜವರಸ್ಯ ಋಣಜಾಂ ಸುರುಜಂ ವೈ ಸುಜನಶ್ರೇಷ್ಠ ಹರ ಮಜ್ಜನೈರ್ದ್ವಿಜೈಃ |೯೦|

ವೇದಾಂತ ವೇದ್ಯ ಮಮ ಸಾಂದ್ರದಯಾನಿಧೇಽದ್ಯ
ತ್ವಂ ವೇದವೇದ್ಯ ಪದಪದ್ಯ ಸುಧಾರಸಾಬ್ಧೌ |
ಧೀಮಂದರೇಣ ಮಥಿತೇ ಸತಿ ಭಾವ ಚಿಂತಾರತ್ನಂ
ಗೃಹೀಷ್ವ ತವ ಭಾಗ ದಶೋತ್ತರಾಚ್ಚ |೯೧|

ವೇದಾಂತ ವೇದ್ಯ ಸುಜನಾಬ್ಧಿ ಸುಪೂಣರ್ಕಚಂದ್ರ |
ತ್ವಂ ಕುಂಡ ಮಂಡಲ ಸುದರ್ಶನತೋ ಭವಾದ್ಯ |
ತ್ವಂ ವೇದವೇದ್ಯ ಕುಮುದಸ್ಯ ಪ್ರಮೋದಕಾರೀ |
ಮತ್ಪಟ್ಟ ದಿವ್ಯ ಸುರಸೀತಟಜಸ್ಯ ಕಾಮಂ |೯೨|

ತ್ವಾಂ ವೇದವೇದ್ಯಮಪಿ ವಾಂ ಸಹಿತೌ ಚ ದೃಷ್ಟ್ವಾ |
ಸಂತೋಷ ಸಂತತಿರಭೂನ್ಮಮ ಜ್ಯೇಷ್ಠಪುತ್ರ |
ಪೂರ್ವಂ ಯಥಾ ಚ ಸುರವರ್ಯ ರಘುಪ್ರವೀರಂ |
ತಸ್ಯಾನುಜಂ ದಶರಥಸ್ಯ ಬಭೂವ ಮೋದಃ |೯೩|

ರಥೋತ್ಸವಸ್ಯ ವಿಘ್ನಾನಿ ಯಾನಿ ಕಾನಿಚಿದಪ್ಯಹೋ |
ಸ್ತಂಭಪ್ರಪಾತ ನಾದೀನಿ ತಾನಿ ವಾರಿತವಾನಹಂ |೯೪|

ಮದ್ಭಯಾತ್ ಕ್ರುದ್ಧ ವಿಘ್ನಾನಾಂ ಪುನರುದ್ಧರಣಂ ಬುಧ |
ನೈವೇತಿ ಸುಮನೋಽಜ್ಞೋಹಂ ಕ್ಲೀಬಶಬ್ದಂ ಪ್ರಯುಕ್ತವಾನ್ |೯೫|

ಓಂ ಏತತ್ಸರ್ವಂ ಸ್ವಾಪ್ನಪದ್ಯೇನ ಗರ್ವಂ ಹಿತ್ವಾ ಸರ್ವೇ ವಿಪ್ರವರ್ಯಾಸ್ಯಜೇನ |
ಶೃತ್ವಾ ಚೋರ್ವ್ಯಾಂ ಶರ್ವ ಗುರ್ವಾದಿ ದೇವಾನ್
ದೃಷ್ಟ್ವೋರ್ವಶಿಂ ಯಾಂತು ಮಾಂ ಮಾನವೇಂದ್ರಾಃ |೯೬|

ಇದಂ ವೃಂದಾವನಾಖ್ಯಾನಂ ಯೇ ಪಠಂತಿ ಮನೀಷಿಣಃ |
ಮುಕುಂದಾವನಮೇವಾಸ್ತು ತೇಷಾಂ ಕಂದಾಶನಾಜ್ಞಯಾ |೯೭|

ಇದಮರ್ಪಿತಮೇವಾಸ್ತು ಹಯಶೀರ್ಷಸ್ಯ ಪಾರ್ಷದಾತ್ |
ಸಮಂ ಸಹಸ್ರಶೀರ್ಷಸ್ಯ ಸೂಕ್ತಸ್ಯ ಪುರುಷಾತ್ ಕೃತಮ್ |೯೮|

ಯಚ್ಛ್ರುಣ್ವತಾಂ ಭಕ್ತಿರುದಾರಸದ್ಗುಣೇ ಹರೌ
ಹರೇರ್ಲೋಕಗತೇ ತಥಾ ಮಯಿ |
ಭವತ್ಯಹೋ ಸರ್ವಶುಭಾಪ್ತಿಸನ್ಮತೀರ್ ದದಾತ್ಯಜಸ್ರಂ ಸುತ
ಸತ್ಯಮೇವ ತತ್ ಓಂ |೯೯|

| ಇತಿ ಶ್ರೀಸ್ವಾಪ್ನವೃಂದಾವನಾಖ್ಯಾನೇ ಅಲೌಕಿಕ ವಿಭಾಗೇ
ವೈಭವಪರ್ವಣಿ ಏಕಾದಶಾಧ್ಯಾಯ: ಸಮಾಪ್ತ: |

|| ಶ್ರೀ ಅಶ್ವಿನೀಹಯಗ್ರೀವಾತ್ಮಕ ಕೃಷ್ಣಾರ್ಪಣಮಸ್ತು ||

12. Svaapnavrundavanakhyana