10. Svaapnavrundavanakhyana

Composer : Shri Vadirajaru

| ಅಥ ದಶಮಾಧ್ಯಾಯ: |

ವಿಪ್ರ ಪ್ರಕರಣಮ್ | ಶ್ಲೋಕಾ: [೧-೧೧]

ಹರಿಃ ಓಂ |

ಗಣೈಃ ಸ ನಾರಾಯಣ ಭೂತನಾಥಃ
ಸಮನ್ವಿತಃ ಕರ್ಣ ವಿಕರ್ಣ ಸಂಜ್ಞೈಃ |
ಮಹಾಮಣೀನಾಂ ಬಹುಲೈಃ ಸುಕೀರ್ಣಂ ಮೌಲಿಂ
ದದೌ ಮೆ ಶಿರಸಿ ಸ್ಥಿರೋಽಭೂತ್ |೧|

ಕುಬೇರ ಕೋಶಾದಾನೀತಂ ಶೋಕಾಪನುದಕಾಮದಮ್ |
ದತ್ತವಾನ್ ವಿತ್ತ ಹೀನಂ ಮೆ ಭೂತನಾಥಃ ಪ್ರತಾಪವಾನ್ |೨|

ಕುಬೇರೋದತ್ತವಾನ್ ನಾರಾಯಣ ಭೂತಸ್ಯ ಹಸ್ತಕೇ |
ಸೋಽಪಿ ಮೇ ಶಿರಸಿ ಪ್ರೋತಂ ಚಕಾರ ಶ್ರುಣು ಪೋತಕ |೩|

ವಿಪ್ರಾಪಹಾರ್ಯಂ ತೇ ಪುತ್ರ ಚರಣಾದ್ ರೌಪ್ಯ ಭೂಷಣಂ |
ನಾರಾಯಣೇನಾಪಹೃತಂ ಭೂತೇನಾಕಾರ್ಯ ಕಾರಿಣಾ |೪|

ಅತಶ್ಚ ತ್ರಿಗುಣಂ ದತ್ತಮೇಕೈಕ ಚರಣಸ್ಯ ಮೇ |
ದುರ್ವರ್ಣಂ ಕಾರಯ ಕ್ಷಿಪ್ರಂ ತೇನ ತೇ ಪುತ್ರ ಭೂಷಣಮ್
ತಸ್ಮಾನ್ನ ಚಿಂತಾ ಕಾರ್ಯಾ ಮತ್ಪುತ್ರಚಿಂತಾಮಣಿಂ ಭಜ |೫|

ಕಾಂತಾರೇ ಚ ಯಥೈಕಾಂತೇ ಸ್ವಕಾಂತಂ ಭಜತೇ ಸತೀ |
ಶೈಲರಾಜ ಸುತಾ ಪೈಲಮುನಿಮಾಹ ಚ ಸಾದರಂ |
ಕೈಲಾಸಶಿಖರೇ ರಮ್ಯೇ ತೈಲದೀಪಾವಲಿಂ ಕುರು |೬|

ಇತ್ಯುಕ್ತ: ಸೋಪಿ ಪ್ರತ್ಯುಕ್ತಿಮವದದ್ ದ್ವಿಜಪುಙ್ಗವ |
ಕರೋಮಿ ವೃಂದಾವನಾಗ್ರೇ ಕಂದಾಶನ ವರಸ್ಯ ಮೇ |೭|

ಅವ್ಯಗ್ರಶ್ಚಾಗ್ರತಃ ಶೀಘ್ರಂ ಪೈಲಃ ಕೈಲಾಸಪರ್ವತಾತ್ |
ತೈಲಂ ಗೋಘೃತಮಾದಾಯ ಶೈಲಂ ವೃಂದಾವನಂ ಮಮ |೮|

ಚಕಾರ ದೀಪಾವಲಿಭಿಃ ಪಾಪಾವಲಿ ವಿನಾಶನಂ |
ವವರ್ಷ ಪುಷ್ಟಾವಳೀಶ್ಚ ಮಧುಪಾವಲಿ ಸಂಯುತಾಃ |೯|

ಏವಂ ಸರ್ವೇಽಪಿ ಋಷಯೋ ವರ್ಷೇ ವರ್ಷೇ ಸಮಾವೃತಾಃ |
ಚಕ್ರು: ಸರ್ಷಪ ಮಾತ್ರಾಣಿ ದುಷ್ಕೃತಾನಿ ಪ್ರಹರ್ಷಿತಾಃ |೧೦|

ಕಾಯಃ ಸನ್ನಿಹಿತಾ ಪಾಯಃ ಪ್ರಾಯಃ ಶ್ರೇಯಸ್ಕರಸ್ತಥಾ |
ವಾಯು ಪ್ರವೇಶನೋಪಾಯಂ ತವಾಯುರ್ವೃದ್ಧಯೇ ವಯಂ |೧೧|

೨. ಲಕ್ಷ್ಮೀಪತಿ ಪ್ರಕರಣಮ್ [೧೨-೧೫]

ಕುರ್ಮಃ ಕೂರ್ಮಾವತಾರೇಣ ಪೂರ್ಣಾಶಾಃ ಪೂರಿತಾಶಿಷಃ
ಸುಪರ್ವಾಣ: ಸುಪರ್ಣೇನ ಕಾದ್ರವೇಯಾ ನ ಚೋದ್ಧೃತಾಃ |೧೨|

ತಥಾ ತಥಾ ಸುತಶ್ಚಾಯಂ ಕೃತಾತ್ ಕ್ರಚ್ಛ್ರಾತ್ ಸಮುದ್ಧೃತಃ |
ತಸ್ಮಾದ್ ವೃಥಾ ಕೃತಿಶ್ಚೇಯಂ ಮತ್ಕೃತಾ ಮಾಽಸ್ತು ತೇ ಸುತ |೧೩|

ಶ್ರೀಮದ್ವೃಂದಾವನಂ ಭೂಮೌ ಸೋಮವದ್ ರಂಜಯನ್ ದಿಶಃ |
ಕೋ ಮಹಾನ್ನ ಸ್ತುತಿಂ ಕುರ್ಯಾನ್ನೋ ಮನಃ ಪ್ರಿಯಕಾರಕಃ |
ಕೋ ಮಹಾನ್ ದರ್ಶನಂ ನೈವ ಕುರ್ಯಾನ್ಮೂಢಂ ವಿನಾ ಮಮ |೧೪|

ಹೇ ನಂದನ ತವ ವ್ಯಾಖ್ಯಾನಾದಃ ಕಂದಾಶನಸ್ಯ ಮೇ |
ಶತಾನಂದಸ್ಯ ಲೋಕೇಽಪಿ ಸದಾನಂದ ವಿವರ್ಧಕಃ |೧೫|

೩. ವಿಪ್ರ ಪ್ರಕರಣಮ್ | ಶ್ಲೋಕಾ: [೧೬-೪೨]

ಅಹಮಾನಂದ ಮುನಿನಾ ಸದಾನಂದ ಪ್ರಸಂಗಿನಾ |
ಸಹ ನಾನಾವಿಧ ಶ್ರೀನಾಥಸ್ಯ ಗಾಥಾಃ ಸ್ಮರಾಮ್ಯಹೋ |೧೬|

ತದ್ದರ್ಶನೋದ್ಬುದ್ಧ ಹೃದ್ಯಸಂಸ್ಕಾರಃ ಶುದ್ಧ ಸಾತ್ವಿಕಃ |
ಬದ್ಧ ಸೌಹೃದ ತತ್ಪಾದ ಪದ್ಮೇಹಂ ಪತಿತೋಽಸ್ಮ್ಯಹೋ |೧೭|

ತೇನ ಸಾಕಂ ಬದರಿಕಾಶ್ರಮಂ ಗತ್ವಾ ಶೋಕವಿನಾಶಕಂ |
ಶುಕಸ್ಯ ಜನಕಂ ವೈ ವಾಸಿಷ್ಠ ಕೃಷ್ಣಂ ನಮಾಮ್ಯಹಂ |೧೮|

ಇತಿ ಪದ್ಯತ್ರಯಂ ತ್ರಾಯನ್ಸ್-ತ್ಯಕ್ತವಾನಸಿ ವಿಪ್ರಕ |
ಆಕರಸ್ಥಂ ಲೇಖನಂ ಚ ಕಾರಯ ಪ್ರಾಂಙ್ಮಯೇರಿತಂ |೧೯|

ಮಹೀಜಶ್ಚಾಮಹೀಜಶ್ಚ ಸಹೋಷತೂ ರಹೋ ರಹಃ |
ಹೇ ವೀರರಾಹೋ, ಹೇಽವೀರ ರಾಹಿತಾ ರಹಿತಾಶ್ಚ ಯೇ |೨೦|

ಪದ್ಯಸ್ಯಾಸ್ಯಾರ್ಥಸಾರಂ ತು ನದ್ಯಃ ಪರಮ ಪಾವನಾಃ |
ಉದ್ಯಂತಮಿವ ಚಾಽದಿತ್ಯಂ ಖಿದ್ಯಂತೇ ತಾಮಸಾಶ್ಚ ಯೇ |೨೧|

ಏತತ್ಪದ್ಯದ್ವಯಸ್ಯಾಪಿ ಶಕ್ಯಾರ್ಥಃ ಕೇನ ಹೀಯತೇ |
ಸೋಽಪಿ ಮತ್ಸದೃಶೋ ಬುದ್ಧ್ಯಾ ಪ್ರಾಯಃ ಶ್ರೇಯಸ್ಕರೋ ಮಮ |೨೨|

ದ್ವಾರೈಶ್ಚತುರ್ಭಿಃ ಪರಿತೋ ವಿಭಾತಿ ವೃಂದಾವನಂ ಮಂದರ ಸನ್ನಿಭಂ ಮೇ |
ವೃಕೋದರಾಚಾರ್ಯ ಹನೂಮತಾಂ ಚ ಮಮಾಪಿ ಸನ್ಮೂರ್ತಿಭಿರನ್ವಿತೈಶ್ಚ |೨೩|

ಕೀಟಂ ವಾಸಿಷ್ಠ ಕೃಷ್ಣೋಯಂ ಯಥಾ ಪುಷ್ಣಾತಿ ಪೂರುಷಂ |
ಪಟುಂ ಸ್ವಾಪ್ನಾನ್ ಸ್ಫುಟಂ ವಕ್ತುಂ ಶ್ಲೋಕಾನ್ ಪುಷ್ಣಾಮ್ಯಹಂ ತಥಾ |೨೪|

ವೃಂದಾವನೇ ಚ ದೇವಾನಾಂ ವೃಂದಾ: ಸಂತೀಹ ನಂದನ |
ಮುಕುಂದ ಪಾದಪದ್ಮಂ ತೇ ವಿಂದಂತ್ಯನಿಶಮಂಜಸಾ |೨೫|

ಬ್ರಹ್ಮಾ ಬ್ರಹ್ಮಭವಃ ಶಕ್ರೋ ವಕ್ರತುಂಡಃ ಸುರೇಶ್ವರಃ |
ಗರುಡಃ ಶೇಷ ಭಾಷ್ಯಜ್ಞಃ ಸಶೇಷಃ ಸೋಮ ಭಾಸ್ಕರೌ |೨೬|

ಮಿತ್ರಾವರುಣ ಕಾರುಣ್ಯ ವಿಷಯಾಶ್ಚ ವಿಶೇಷತಃ |
ಸುತ್ರಾಮ ಶರಣಂ ಪ್ರಾಪ್ತಾಃ ಪೂಷಾ ಪಿಷ್ಟಾದನಸ್ತಥಾ |೨೭|

ಏತೇ ಚಾನ್ಯೇ ಚ ಬಹವೋ ಬಹುಮಾನ ಪುರ: ಸರಾಃ |
ಕುಹಯೋಗೇ ಚ ಸುಹುತಮ್ ಅಗ್ನಿಂ ಕೃತ್ವಾ ಧನಂ ದದುಃ |೨೮|

ಬ್ರಾಹ್ಮಣೇಭ್ಯಶ್ಚ ಸೌಪರ್ಣ ಶ್ರುತಿಜ್ಞೇಭ್ಯಶ್ಚ ಪರ್ವಣಿ |
ಬ್ರಹ್ಮಣಾ ಸಹ ಪುಣ್ಯಾಹೇ ಸಸ್ನುರ್ಧವಲ ವಾರಿಣಿ |೨೯|

ಕರಂ ಸ್ವೈರಂ ವಿರಿಂಚಾದಿ ಋಭವೋ ರತ್ನ ಸಂಚಯಾನ್ |
ವೃಂದಾವನೇ ಚ ವವೃಷು: ಹರ್ಷ ಪೂರ್ಣಾಃ ಸಹಸ್ರಶಃ |೩೦|

ವಿಷ್ಣೋರ್ನಿಮಾಲ್ಯಮಾಲಾಶ್ಚ ಬಾಲ ಸೂರ್ಯಾಮಲಪ್ರಭಾಃ |
ಬಾಲವ್ಯಜನ ಸಂವಾಲಾಃ ಕಾಲೇ ದಧ್ರುರ್ಗಲೇ ಕುಹೋಃ |೩೧|

ಸಿನೀವಾಲ್ಯಾದಿ ಯೋಗೇಽಪಿ ನಿಮೀಲ್ಯಾಕ್ಷೀಣಿ ಕಾಣವತ್ |
ಸನ್ನಿಲೀನಾಃ ಪಲಾಯಂತೇ ಶರಣಂ ಕರುಣಾರ್ಣವಂ |೩೨|

ಮಗ್ನಾಸ್ತೇ ಮತ್ಸರಃ ಶ್ರೇಷ್ಠೇ ಭಗ್ನ ಪಾಪಾ ಬಭೂವಿರೇ |
ಅಗ್ನಿಂ ಹುತ್ವಾ ಚ ವಿಧಿವಜ್ಜಾಮದಗ್ನಿಂ ವ ವಂದಿರೇ |೩೩|

ವೃಂದಾವನಗತಂ ದೇವಾಸ್ತ್ವಿಂದಿರಾಪತಿಮವ್ಯಯಂ |
ಮಂದಾಕಿನ್ಯಾ ಜನಿಂ ವಿಷ್ಣುಂ ಪುನರೇವ ವವಂದಿರೇ |೩೪|

ತಮನುಜ್ಞಾಪ್ಯ ದೇವೇಶಾಃ ಸ್ವರ್ಗಂ ಯಾಂತಿ ಸುಮಾನಿತಾಃ |
ಪುನರಾಯಾಂತಿ ಯೋಗೇಷು ಪುಣ್ಯೇಷು ಶೃಣು ನಂದನ |೩೫|

ಏವಂ ಧವಲಗಂಙ್ಗಾ ಮೇ ವಿಧುವದ್ ಧವಲಾ ಭುವಿ |
ಪ್ರವಾಲಮಣಿ ಸೋಪಾನ ತ್ರಿವಲೀಶಯುತಾ ಬಭೌ |೩೬|

ದೇವೈರ್ನಿರಂತರಾಕ್ರಾಂತಾ ಮನ್ವಂತರ ಶತಾಂತರಾ |
ತ್ವಂತರಾತಿರಿಕ್ತಾ ಚ ಧನ್ವಂತರಿ ಕೃತಾಂತರಾ |೩೭|

ಸ್ನಾನಾರ್ಥಂ ಗಚ್ಛತಾಂ ಸ್ನಾಯು ಬಂಧನಾದಿ ವಿನಾಶನಂ |
ಶಿಶ್ನಾತ್ ಕೃತೈನಸಾಂ ನಾಶಂ ಕರೋತಿ ಪ್ರಶ್ನ ಮಾತ್ರತಃ |೩೮|

ಏವಂ ವಿಧಾಸ್ಮತ್ಕೃತ ವೈಭವಾನ್ವಿತಾ ಭೂದೇವ ದೇವೈರ್ನರದೇವ ಪೂಜಿತಾ |
ಕೃತಾಂತ ಮಾರ್ಗಂ ತ್ವವಗಾಹನೋತ್ಸುಕಾನ್
ಸಂತಾರಯತ್ಯೇವ ಹರೇ: ಸುತಾನ್ವಿತಾ |೩೯|

ಏತಚ್ಚಿತ್ರಂ ಕಲಿ ಮಲೈಃ ಕಲುಷೀಕೃತ ಮಾನಸಾಃ |
ನ ಜಾನಂತಿ ನರಾ: ಸರ್ವೇ ಕಲೌ ಭೂತಲವಾಸಿನಃ |೪೦|

ಏವಂ ಮದ್ವೃಂದಾವನಸ್ಯ ಸದ್ವೃಂದಾ ಏವ ಭೂತಳೇ |
ಜಾನಂತ್ಯನಂತ ಮಾಹಾತ್ಮ್ಯಂ ನೇತರೇ ಪಾಪ ಪೂರುಷಾಃ |೪೧|

ಅಹಂ ನಮಾಮೀಹ ಮಹಾನುಭಾವಂ ಹಯಾಸ್ಯರೂಪಂ ಹಯಮಾಪ್ತಹಾರಂ |
ಮಯಾ ಸಹೈವಾಽಶು ಚ ಹಂಸವಾಹಂ ಯೋ
ಹಂಸ ರೂಪಿ ನ್ಯರುಣತ್ ಪಯೋಬ್ಧೌ |೪೨|

೪. ಲಕ್ಷ್ಮೀಪತಿ ಪ್ರಕರಣ | ಶ್ಲೋಕಾ: [೪೩-೬೦]

ಶಾಲ್ಮಿಲೀ ದ್ವೀಪಮಾಶ್ರಿತ್ಯ ಸುಮಾಲೀತಿ ಬಲಾಧಿಕಃ |
ನಿರ್ಮಲಾಖ್ಯಾತ ಲಾವಣ್ಯಂ ಬಾಲಾತಪ ಸಮಪ್ರಭಂ |೪೩|

ಪಪ್ರಚ್ಛ ಸ ತು ಮಾಂ ದೃಷ್ಟ್ವಾ ವಿಚ್ಛಿನ್ನ ತ್ರಿಪುರಃಪುರಾ |
ರುದ್ರೋವಾಽಭದ್ರಹೀನೋಸಿ ಸುಪರ್ಣೋ ವಾಽರ್ಣವಾಂತರಃ |೪೪|

ಶೇಷೋವಾದೋಷಹೀನೋಽಸಿ ವಾಯುರ್ವಾಽಪಾಯ ದೂರಗಃ |
ಇಂದ್ರೋವಾಸಾಂದ್ರ ಸಂತೋಷೀ ಚಂದ್ರೋ ವಾಽಮಂದತೋಷಕಃ |೪೫|

ಕಾಮೋ ವಾ ತ್ವಂ ಚ ರಾಮಾಣಾಂ ಮೋಹನಂ ರೂಪಮಾಶ್ರಿತಃ |
ಸೂರ್ಯೋ ವಾ ಶೌರ್ಯ ಸಂಪನ್ನಃ ಋಷಿರ್ವಾಽಪರುಷವಾಚಕಃ |೪೬|

ಧನದೋ ಧನಿನಾಂ ಶ್ರೇಷ್ಠೋ ಮಹಾಧನ ವಿಭೂಷಣಃ |
ವರುಣಃ ಕರುಣಾಸಕ್ತಃ ತ್ವಂ ಕವಿಃ ಕೋವಿದೇಶ್ವರಃ |೪೭|

ಅಥವಾ ವಾದಿರಾಜಾಖ್ಯೋ ವಾಗೀಶ ಕರಜಾತಕಃ |
ವಾದೀಭ ಮೃಗರಾಜತ್ವಾದ್ ವಾದಿರಾಜಾಭಿಧಾ ತವ |೪೮|

ಹಯಗ್ರೀವಾರಾಧಕತ್ವಾತ್ ಪ್ರಾಗ್ರ್ಯಾನ್ ಲೋಕಾಂಸ್ತಥಾ ಗತಃ |
ವ್ಯಾಘ್ರಚರ್ಮಾಽಪಿ ಸನ್ಮಾನಂ ಚಾಗ್ರಪೂಜಾಂ ಚಕಾರ ತೇ |೪೯|

ಇಮಾಂ ಕಥಾಂ ಕಾವ್ಯಕರ್ತಾ ಕಾವ್ಯೋಽಪಿ ವ್ಯಜಹಾರ ಚ |
ಶ್ರಾವ್ಯಂ ಪಾಪವಿನಾಶಾಯ ನ ವ್ಯಾಜ್ಯಾನ್ನ ಚ ಹಾಸ್ಯತಃ |೫೦|

ಇತಿ ತೇನೋದಿತಂ ಶ್ರುತ್ವಾ ಕೃತ್ವಾ ತಸ್ಯಾಪ್ಯನುಗ್ರಹಂ |
ಸ್ಮೃತ್ವಾ ಹರೇಶ್ಚ ಮಾಹಾತ್ಮ್ಯಂ ಪೃಕ್ತ್ವಾಽಽನಂದ ಜಲೈರ್ಭುವಂ |೫೧|

ತತಶ್ಚ ಪಾವನಾನ್ ವಾನಪ್ರಸ್ಥಾನ್ ವಾನರ ಯೂಥಪಾನ್ |
ವನರಾಜಿಷು ಪಶ್ಯಾಮಿ ವನಜಾನ್ ಮನುಜಾಧಿಪ |೫೨|

ತನ್ಮತಂ ಶ್ರುಣು ಕಲ್ಯಾಣ ಪುಣ್ಯಾತ್ಪುಣ್ಯ ತಮಂ ಮಹತ್ |
ನಾರಾಯಣೋ ಗುಣನಿಧಿರ್ವಾಣೀಪತಿಮಭಾಷತ |೫೩|

ಶ್ರೀಮನ್ಮಧ್ವ ಮತಂ ದಿವ್ಯಂ ಮದ್ಭಕ್ತೇನೋದ್ಧೃತಂ ಸುತ |
ಮತ್ಸರ್ವೋತ್ತಮತಾಮುಕ್ತ್ವಾ ಯುಕ್ತಿಮಾಲಾಭಿರಂಜಸಾ |೫೪|

ವ್ಯಾಸಾತ್ಮನಾ ಮಯಾ ಪೂರ್ವಂ ಯದುಕ್ತಂ ಸರ್ವಮೇವ ತತ್ |
ಜಗತ್ಸತ್ಯತ್ವಾದಿಕಂ ಚ ತಾತ್ಪರ್ಯ ವಿಷಯಂ ಋತೇ |೫೫|

ತತ್ಸಮರ್ಥಿತಮೇವಾಽದೌ ಸಮರ್ಥೇನ ಮಹಾತ್ಮನಾ |
ಪ್ರಾಪ್ಯ ತತ್ರ ಕೃತಾರ್ಥತ್ವಂ ವ್ಯರ್ಥೀಕೃತ್ಯ ಸದುರ್ಮತಂ |೫೬|

ಮತ್ಸಮೀಪಮಿಹಾಽಗಂತಾ ವೃಂತಾದ್ಯಸ್ಥೀನಿ ತಸ್ಯ ಚ |
ಚಕ್ರಶಂಖಾದ್ಯಾಯುಧೈಶ್ಚಾಥಾಂಕಿತಾನಿ ಮಹಾತ್ಮನಃ|೫೭|

ತಸ್ಮಾತ್ತನ್ಮತಮೇವಾಗ್ರ್ಯಂ ಗ್ರಾಹ್ಯಂ ಸರ್ವಬುಧೈರಪಿ |
ಪ್ರಾಗ್ರ್ಯಂ ಲೋಕಮವಾಪ್ನೋತಿ ತನ್ಮತೇ ಚಾಽಗ್ರಹಾನ್ವಿತಃ |೫೮|

ಇತಿ ಬ್ರಹ್ಮಾಣಮುದ್ದಿಶ್ಯ ಗುಣವಾರಿಧಿರಬ್ರವೀತ್ |
ಶೃಣು ಸತ್ಯಂ ಮಯಾ ಪ್ರೋಕ್ತಂ ಭಣ ಸರ್ವ ಬುಧಾನ್ಪ್ರತಿ |೫೯|

ಕೃತ್ವಾ ವೃಂದಾವನಂ ತತ್ರ ಫಲಂ ಭಾವಯ ಮಾಂ ವಿಭುಂ |
ಅಹಂ ವೃಂದಾವನೇ ಸ್ಥಿತ್ವಾ ಸರ್ವಾಭೀಷ್ಟಂ ದದಾಮಿ ತೇ |೬೦|

೫. ವಿಪ್ರ ಪ್ರಕರಣ | ಶ್ಲೋಕಾ: [೬೧-೯೭]

ಇದಂ ಮಮಾಽತ್ಮಜೇ ಸರ್ವಂ ವೇದವೇದ್ಯೇ ತಪೋನಿಧೌ |
ವಕ್ತವ್ಯ ಪುರತಃ ಸ್ಥಿತ್ವಾ ನಿಃಶ್ಶಂಕ: ಸನ್ ಸದಾ ದ್ವಿಜ |೬೧|

ವಿಪ್ರ ತ್ವಂ ತವ ಪುತ್ರಂ ತು ಮಮ ನಾಮ್ನಾ ಸಮಾಹ್ವಯ |
ಸುಪ್ರೀತ ತ್ವಂ ತು ವಿಜ್ಞಾಯ ಮಯಿ ಸರ್ವಂ ಸಮರ್ಪಯ |೬೨|

ಕಾಮಧೇನುರ್ಯಥಾ ಪೂವಂ ಸರ್ವಾಭೀಷ್ಟ ಫಲಪ್ರದಾ
ತಥಾಕಲೌ ವಾದಿರಾಜ ಶ್ರೀಪಾದೋಽಭೀಷ್ಟದಃ ಸತಾಂ |೬೩|

ಅದೃಶ್ಯ ಏವ ಸರ್ವೇಷಾಂ ಸರ್ವಾಭೀಷ್ಟ ಫಲಪ್ರದಃ |೬೪|

ಇದಂ ತು ವೇದವೇದ್ಯಾಖ್ಯ ಶ್ರೀಪಾದಸ್ಯ ಸುತಸ್ಯ ಮೇ |
ವಕ್ತವ್ಯಂ ತತ್ರ ಗತ್ವಾ ತು ನಾತ್ರ ಕಾರ್ಯಾ ವಿಚಾರಣಾ |೬೫|

ಭಾರತೀಪತಿವದ್ಭಾತಿ ಭಾರತಾರ್ಥ ಪ್ರಕಾಶನಾತ್
ಭಾರತಾರ್ಥ ಪ್ರಕಾಶತ್ವಾತ್ ತತ್ಕರ್ತೃ ಸದೃಶೋ ಹಿ ಸಃ |೬೬|

ತತ್ಕರ್ತೃ ಸದೃಶತ್ವಾತ್ ತು ತದ್ವತ್ ಪೂಜ್ಯೋ ಗುರುಃ ಸತಾಂ |
ಪೂಜ್ಯತ್ವಾನ್ನಿತ್ಯಮೇವಾತ್ರ ವೃಂದಾವನಗತಂ ಪತಿಂ |೬೭|

ಪೂಜ್ಯಯಿತ್ವಾ ಮಹಾತ್ಮಾನಂ ಮಹಾಭಾರತ ಕೀರ್ತನೈಃ |
ತತೋಽಸ್ಮತ್ತಃ ಸಂತತಿಂ ವಾ ಸರ್ವೇಷ್ಟಂ ವಾ ತದಾ(ಽಽ)ಹರೇತ್ |೬೮|

ಇದಂ ತು ಸಂತಂ ಸಂತತ್ಯಾ ತ್ವಾಮುದ್ದಿಶ್ಯ ತಥೋಕ್ತವಾನ್ |
ಪೂಜನೀಯೋ ಗುರುರ್ನಿತ್ಯಂ ಸರ್ವಾಭೀಷ್ಟಮಭೀಪ್ಸುನಾ |೬೯|

ಇಮಾಮಸ್ಮತ್ಕೃತಿಂ ವಿದ್ಯಾದ್ಯೋ ವಿದ್ಯಾತ್ ತ್ವತ್ಕೃತಿಂ ನರಃ |
ಸ ಯಾತಿ ನರಕಂ ಘೋರಂ ಮೃಷಾತ್ವಗತಿರೀದೃಶೀ |೭೦|

ಕುಷ್ಠಾಪಸ್ಮಾರಲೂತಾಂ ತಾನ್ ಬಾಲಸ್ಫೋಟಾದಿಕಾನ್ ಬಹೂನ್ |
ಮೃತ್ತಿಕಾ ನಾಶಯತ್ಯೇವ ವೃಂದಾವನಗತಾ ಮುನೇ |೭೧|

ಮಯಾ ಸಂಪೂಜ್ಯಮಾನಃ ಸನ್ ಹಯಾಸ್ಯಃ ಪುರುಷೋತ್ತಮಃ |
ಲಕ್ಷ್ಮ್ಯಾ ಸಾರ್ಧಂ ಸುರೈ: ಸರ್ವೈರತ್ರ ಸನ್ನಿಹಿತಃ ಸ್ವಯಂ |೭೨|

ಇಮಾಂ ಕೃತಿಂ ಶಿಲಾಯಾಂ ತು ಲೇಖಯಿತ್ವಾ ಮಮಾಗ್ರತಃ |
ಸ್ಥಾಪಯೇದತ್ರ ತಾಂ ದೃಷ್ಟ್ವಾ ಸಂತಃ ಸಂತೋಷಮಾಪ್ನುಯಃ |೭೩|

ಇಮಾಂ ಕೃತಿಂ ನರೋ ಯಸ್ತು ಸ್ವಾಪ್ನೀಂ ಮಂದಸ್ಯ ಬುದ್ಧಿದಾಂ |
ಪಠಿತ್ವಾ ಸರ್ವಪಾಪೇಭ್ಯೋ ಮುಚ್ಯತೇ ನಾತ್ರ ಸಂಶಯಃ |೭೪|

ಅರ್ಥಂ ಬುದ್ಧ್ವಾ ಕೃತೇರಸ್ಯಾಃ ಸರ್ವೇಷ್ಟಂ ಲಭತೇ ನರಃ |
ಯೋನುವಕ್ತಾ ಕೃತಿಮಿಮಾಂ ಮಮತೋಷಸ್ಯ ಭೂರಸೌ |೭೫|

ಖ್ಯಾತಿಂ ಕುರುಷ್ವಾಲ್ಪಮತೇ ಮಮಕೀರ್ತಿಂ ನರೇಷ್ವಪಿ |
ಮಾ ಚ್ಛಾದಯ ಶುಭಾಂ ಶಕ್ತಿಂ ಮಮಖ್ಯಾತಿಂ ಶುಭೇಷ್ವಪಿ |೭೬|

ತ್ವಾಂ ಭಕ್ತಿ ಮಂತಂ ವಿಪ್ರೇಂದ್ರ ನ ಮುಂಚಾಮಿ ಕದಾಚನ |
ಸೇವಸ್ವ ಮಮ ಪಾದಾಬ್ಜಂ ನಿತ್ಯಂ ಭಾರತ ಕೀರ್ತನೈಃ |೭೭|

ಭುಕ್ತಿಂ ಮುಕ್ತಿಂ ತತೋ ದದ್ಯಾಂ ವಚನಂ ಮಮ ವಿಶ್ವಸೀಃ |
ಆಚಾರ್ಯತ್ವಂ ವೃಣೀಷ್ವ ತ್ವಂ ಮಮ ಪುತ್ರೇಣ ಧೀಮತಾ |೭೮|

ಪಂಚ ವೃಂದಾವನೇ ಪುಣ್ಯೇ ಪಂಚ ರೂಪಾತ್ಮಕೋ ಹರಿಃ |
ಪಂಚೀಕೃತ್ಯ ಸ್ವರೂಪಾಣಿ ನಿತ್ಯಂ ಸನ್ನಿಹಿತಃ ಸ್ವಯಂ |೭೯|

ಇತಿ ಜಾನಂತಿ ಯೇ ಮರ್ತ್ಯಾಃ ಪ್ರಪಂಚೇ ಸರ್ವ ಏವ ತು |
ಪಂಚಭೂತಾನಿ ಹಿತ್ವಾತು ಪಂಚತ್ವಂ ನ ವ್ರಜಂತಿ ತೇ |೮೦|

ಪಂಚ ವೃಂದಾವನಂ ಚಾತ್ರ ಯೋ ವಾ ಕಾರಯಿತಾ ಮಮ |
ಪಂಚಾಶತ್ ಯುಗ ಪರ್ಯಂತಂ ವಿಷ್ಣೋರ್ಲೋಕೇ ಮಹೀಯತೇ |೮೧|

ಪಂಚಪುತ್ರಾ ಭವಿಷ್ಯಂತಿ ಪಂಚಾನನ ಸಮಪ್ರಭಾಃ |
ಪ್ರಂಚಾಯುಧಧರಸ್ಯಾಥ ಭಕ್ತಾ ಏವ ಭವಂತಿ ತೇ |೮೨|

ಪಂಚಭಕ್ಷ ಸಮಾಯುಕ್ತಂ ಪಂಚಾಮೃತ ಸಮನ್ವಿತಂ |
ಪಂಚ ಖರ್ಜೂರ ಸಂಯುಕ್ತಂ ನೈವೇದ್ಯಂ ವಿನಿವೇದಯೇತ್ |೮೩|

ಪಂಚಮ್ಯಾಂ ಚ ತಿಥೌ ನಿತ್ಯಂ ಪಂಚಪರ್ವಸು ಪೂಜಯೇತ್ |
ಧೂಪೈರ್ದೀಪೈಸ್ತಥಾ ಮಾಲ್ಯೈಃ ಗಂಧೈರ್-ದೂರ್ವಾಕ್ಷತಾ ದಿಭಿಃ |೮೪|

ಏವಂ ಸಂಪೂಜ್ಯ ಮಾನೋಽಹಂ ದದ್ಯಾಂ ವರಮನುತ್ತಮಂ |
ಅಹಂ ಕ್ಷುಧಾತುರೋ ಭೂತ್ವಾ ನೈವೇದ್ಯಂ ನೋಕ್ತವಾನ್ ಮುನಿಃ |೮೫|

ಏತತ್ ತೇ ಕಿಂಚಿದಾಖ್ಯಾತಂ ಭಕ್ತತ್ವಾತ್ ತ್ವದ್ವಿಭೂತಯೇ |
ಶ್ರುತ್ವಾ ತ್ವನ್ಮುಖತಃ ಸಂತಃ ಸರ್ವೇ ಯಾಂತು ಸ್ವಭೀಪ್ಸಿತಂ |೮೬|

ಇದಂ ಮಮಾಽತ್ಮಜೇ ಸರ್ವಂ ವೇದವೇದ್ಯೇ ತಪೋನಿಧೌ |
ವದಸ್ವ ಮದ್ದಯಾ ಸಿಂಧೌ ಹಯಗ್ರೀವ ತಪೋನಿಧೌ |೮೭|

ನೈವೇದ್ಯಾರ್ಥಂ ಮಯಾ ಪ್ರೋಕ್ತಂ ವಿಶೇಷ ತಿಥಿ ಪರ್ವಸು |
ಆಚ್ಛಾದಿತಂ ಚ ತತ್ಪದ್ಯಂ ತ್ವಯಾಽದುರ್ಮತಿ ಸತ್ತಮ |೮೮|

ಸ ಚ ದಾಸ್ಯತಿ ನೈವೇದ್ಯಂ ಯೋ ವೃಂದಾವನಕೃತ್ ಸ್ವಯಂ |
ವೃಂದಾವನಗತಾ ದೇವಾಸ್ತಸ್ಯ ತುಷ್ಟಾ ಭವಂತ್ಯಹೋ |೮೯|

ಅಹಂ ಕ್ಷುಧಾತುರೋ ಭೂತ್ವಾ ನೈವೇದ್ಯಂ ನೋಕ್ತವಾನ್ ಮುನಿಃ |
ಪೀತ್ವಾ ಚಾಮೃತಮೇವಾತ್ರ ದೇವೈಃ ಸಹ ಚರಾಮ್ಯಹಂ |೯೦|

ದೀಪಾರ್ಥಂ ನೋಕ್ತವಾನ್ ದೀಪಂ ತೇಜೋಮಯ ಸುವಿಗ್ರಹಃ |
ಗಂಧಾರ್ಥಂ ನೋಕ್ತವಾನ್ ಗಂಧಂ ದಿವ್ಯ ಗಂಧ ಸುವಿಗ್ರಹಃ |೯೧|

ಮಾಲ್ಯಾರ್ಥಂ ನೋಕ್ತವಾನ್ ಮಾಲ್ಯಂ ದಿವ್ಯ ಮಂದಾರ ಮಾಲ್ಯವಾನ್ |
ಚಾಮರಾರ್ಥಂ ಮಯಾ ನೋಕ್ತಂ ದಿವ್ಯ ಚಾಮರ ವೀಜಿತಃ |೯೨|

ವ್ಯಜನಾರ್ಥಂ ಮಯಾ ನೋಕ್ತಂ ದಿವ್ಯ ವ್ಯಜನವೀಜಿತಃ |
ಛತ್ರಾರ್ಥಂ ತು ಮಯಾ ನೋಕ್ತಂ ದಿವ್ಯಚ್ಛತ್ರ ವಿಭೂಷಿತಃ |೯೩|

ಭೂಷಣಾರ್ಥಂ ಮಯಾ ನೋಕ್ತಂ ದಿವ್ಯ ಭೂಷಣ ಭೂಷಿತಃ |
ವಾಹನಾರ್ಥಂ ಮಯಾ ನೋಕ್ತಮಹಂ ದಿವ್ಯ ವಿಮಾನಗಃ |೯೪|

ಭೋಗಾರ್ಥಂ ತು ಮಯಾನೋಕ್ತಂ ದಿವ್ಯಭೋಗ ಸು ಭೋಗವಾನ್ |
ಭವತಾಮೇವ ಕರ್ತವ್ಯಂ ಮಮ ಪಾದಾಬ್ಜ ಪೂಜನಂ |೯೫|

ಏವಂ ನಿಶಮ್ಯ ಮಮ ವೈಭವಮತ್ರ ನಿತ್ಯಂ |
ವೃಂದಾವನೇ ಸಕಲ ದೈವತ ಸನ್ನಿಧಾನೇ |
ನಾನಾಘರಾಶಿ ಶಮನೇಽತಿ ಸು ಪಾಪಿನಾಂ ಚ
ಮೂರ್ತಿಂ ಭಜಂತು ಮಮ ನಿತ್ಯಮಥೇಷ್ಟ ಭಾಜಃ |೯೬|

ವೃಂದಾವನಂ ಸಕಲ ದಿಗ್ಗತ ಸಜ್ಜನಾನಾಂ ವೃಂದಾವನಂ ಪರಮಪಾವನ ಮತ್ರ ನಿತ್ಯಂ |
ಮಂದಾಕಿನೀ ಜನಕ ದೇವ ಸದಾಯನಂ ತತ್ ಕಂದಾಶ
ನಾಯನಮಿದಂ ಪ್ರಣಮೇತ ಭಕ್ತ್ಯಾ |೯೭|

೬. ಲಕ್ಷ್ಮೀಪತಿ ಪ್ರಕರಣಮ್ | ಶ್ಲೋಕಾ: [೯೮-೧೦೩]

ಮದ್ದತ್ತಪುತ್ರಂ ಮತ್ಪುತ್ರಂ ಮಜ್ಜೀವಿತ ಕಲತ್ರಿಣಂ |
ಮತ್ಪ್ರಸಾದಾಪ್ತ ವೃತ್ತಿಂ ತಂ ಮಾ ತ್ಯಜ ತ್ವಂ ಸ ಮಾಮಕಃ |೯೮|

ಅಯಂ ತು ಬ್ರಾಹ್ಮಣಃ ಶುದ್ಧಃ ಸತ್ಯವಾದೀ ಜಿತೇಂದ್ರಿಯಃ |
ಅಸ್ಯ ಸ್ವಪ್ನೇ ಮಯಾಚೋಕ್ತಂ ವಿಶ್ವಾಸಾನ್ನಾತ್ರ ಸಂಶಯಃ |೯೯|

ವೇದವೇದ್ಯ ವದಸ್ವ ತ್ವಂ ಆಗತೇಷು ಜನೇಷ್ವಿಹ |
ಬ್ರಾಹ್ಮಣಸ್ವಾಪ್ನ ಪದ್ಯಾರ್ಥಂ ಪ್ರಸಿದ್ಧ್ಯರ್ಥಂ ಮಮಾತ್ರಜ |೧೦೦|

ಶಿಲಾಸ್ಥಾಂ ಕುರು ವಿಪ್ರಸ್ಯ ವಚನಾನ್ನಾತ್ರ ಸಂಶಯಃ |
ಆಚಾರ್ಯತ್ವಂ ಮಯಾ ದತ್ತಂ ತ್ವಯಾ ಚಾಪಿ ಪ್ರದೀಯತಾಂ |೧೦೧|

ಸಂಭಾವನಾರ್ಥಂ ವಿಪ್ರಸ್ಯ ಶೃಣುಶ್ವ ವಚನಂ ಮಮ |
ಬ್ರಾಹ್ಮಣಶ್ಚಾಲ್ಪ ಸಂತೋಷೀ ಮಮ ಸಂತೋಷ ಭೂರಯಂ |೧೦೨|

ಏವಂ ವೃಂದಾವನಾಖ್ಯಾನಂ ಶ್ರುತ್ವಾ ಸುಜನ ವೃತ್ತಯಃ |
ಯಾತ್ರಾಂ ಕುರ್ವಂತು ಮದ್ಭಕ್ತ್ಯಾ ಯಚ್ಛಂತು ಸದುಪಾಯನಂ
ಯಾಚಯಂತು ವರಂ ತಸ್ಮಾತ್ ತದ್ವರಂ ಪ್ರಾಪ್ನುವಂತು ತೇ |೧೦೩|

೭. ವಿಪ್ರ ಪ್ರಕರಣಮ್ | ಶ್ಲೋಕಾ: [೧೦೪-೧೯]

ನೈವೇದ್ಯಂ ಮೃಷ್ಟಮನ್ನಂ ಮೇ ಯಾವನ್ನ ಕ್ರಿಯತೇ ದ್ವಿಜ|
ತಾವತ್ ಕುರುಷ್ವ ತ್ವಂ ನಕ್ತ ವ್ರತಂ ನಿರಶನಂ ಮಮ |೧೦೪|

ಭುಂಕ್ಷ್ವ ವಿಪ್ರ ಪ್ರಸನ್ನೋಽಸ್ಮಿ ವ್ರತಾದನಶನಾತ್ ತವ |
ವ್ರತೇನಾನೇನ ನಿಷ್ಪಾಪಸ್ತ್ವಮಭೂರ್ನಾತ್ರ ಸಂಶಯಃ |೧೦೫|

ಮಮ ಮಂತ್ರಾಧಿಕಾರೋಽಭೂತ್ ತವ ಪಾಪಕ್ಷಯೇ ಸತಿ |
ಇತಃ ಪರಂ ಗ್ರುಹಾಣ ತ್ವಂ ಮನುಂ ದಿವ್ಯಮನುತ್ತಮಂ |೧೦೬|

ದಾಸ್ಯಾಮಿ ಮಮ ಪಾದಾಬ್ಜಗತಿಂ ತವ ನ ಸಂಶಯಃ |
ಮಾತ್ಯಜ ತ್ವಂ ಹಿ ವಿಪ್ರೇಂದ್ರ ನಿತ್ಯಂ ಭಾರತಕೀರ್ತನಂ |೧೦೭|

ಚಾಮರಂ ವೀಜಯ ತ್ವಂ ಹಿ ಮಮ ವೃಂದಾವನೇ ಸದಾ |
ಆದಿಪರ್ವಂ ವದಸ್ವ ತ್ವಂ ಅನುಕ್ರಮಣಿಕಾಂ ವಿನಾ |೧೦೮|

ವೇದವೇದ್ಯಸ್ಯ ಪಾದಾಬ್ಜಾನ್ನಿಸೃತಂ ತೀರ್ಥಮುತ್ತಮಂ |
ಮಮ ಪಾದೋದಕಂ ವಿದ್ಧಿ ಯತಸ್ತದ್ದೇಹಗೋಹ್ಯಹಂ |೧೦೯|

೮. ವೇದವೇದ್ಯ ಪ್ರಕರಣಮ್ | ಶ್ಲೋಕಾ: [೧೧೦-೧೧೭]

ವೇದವೇದ್ಯ ಜಯಸ್ವ ತ್ವಂ ದುರ್ಮತಂ ದುರ್ಮತೀರಿತಂ |
ಮಧ್ವರಾದ್ಧಾಂತೋಕ್ತಂ ಪದೈಃ ಮತ್ಕೃತಾಭಿಶ್ಚ ಸೂಕ್ತಿಭಿಃ |೧೧೦|

ವೇದವೇದ್ಯ ಮಮ ವೇದ ಕೋವಿದಃ ಕೋವಿದತ್ವ ಮಿಹ ಕೋ ನರೋ ಭುವಿ |
ತ್ವನ್ಮುಖೇನ ತು ಜಯಾಮಿ ಮಾಯಿನಂ ಪ್ರೀಣಯಾಮಿ ಕಮಲಾಪತಿಂ ಹರಿಂ |೧೧೧|

ವೇದವೇದ್ಯ ತವ ವೇದ ಕೋವಿದಃ ಕೋವಿದತ್ವಮೀಹ ಕೋ ನರೋ ಭುವಿ |
ಜಯ ಮದಾಂಧ ಪರವಾದಿದಂತಿನಂ ಸಿಂಹವಿಕ್ರಮ ಮದೀರಿತ ಯುಕ್ತಿಭಿಃ |೧೧೨|

ಕುರು ಸು ಮಧ್ವಸಮಯಸ್ಯ ನಿರ್ಣಯಂ ಮತ್ಪ್ರಸಾದ ವಿಭವಾಪ್ತ ಸುಮತ್ಯಾ |
ತೋಷಯಸ್ವ ಸುಜನಾಂಶ್ಚ ಮಾಯಿನಃ ಖೇದಯಸ್ವ ಪರಮಾತ್ಮ ಭಾವಿನಃ |೧೧೩|

ಶೇಷಾದ್ರಿಪಂಡಿತಸ್ಯಾಪಿ ವಕ್ತವ್ಯಃ ಸ್ವಾಪ್ನವೈಭವಃ |
ವ್ಯಾಸರಾಜಾಖ್ಯ ಭಕ್ತಸ್ಯ ತಥಾ ತದನುಜಸ್ಯ ಚ |೧೧೪|

ತೈಃ ಶ್ರುತಂ ಚೇದಿದಂ ಸರ್ವಂ ತ್ರೈಲೋಕ್ಯಂ ಶ್ರುತ ಮೇವ ಹಿ |
ವೇದವೇದ್ಯ ಪ್ರೇಷಯ ತ್ವಂ ತಯೋರ್ದೂರಗಯೋರಪಿ |೧೧೫|

ಶ್ರುತ್ವಾ ವೃಂದಾವನಸ್ಯಾಸ್ಯ ಕುರ್ವಂತು ಮಮ ದರ್ಶನಂ |
ತೇಷಾಂ ತ್ರಯಾಣಾಂ ದಾಸ್ಯಾಮಿ ಭುಕ್ತಿಂ ಮುಕ್ತಿಂ ಹರೇಃ ಸದಾ |೧೧೬|

ಪಾಲಯ ಬ್ರಾಹ್ಮಣಂ ತ್ವೇನಂ ಮದ್ಬುದ್ಧಿಂ ಮತ್ಪರಾಯಣಂ |
ಸ್ವಪ್ನೇ ಚ ಮಮ ವಾಗ್ಭೂತಿ ವಿಲಾಸಸ್ಯಾಽಶ್ರಯಂ ಪರಂ |೧೧೭|

೯. ದೂಷಕ ಪುರುಷ ಪ್ರಕರಣಮ್ | ಶ್ಲೋಕಾ: [೧೧೮-೧೨೭]

ಏತದನ್ಯತ್ರ ನೈವಾಹಂ ವದೇ ಶ್ಲೋಕೇನ ಕುತ್ರಚಿತ್ |೧೧೮|

ಸರ್ವೇ ಕವಿತ್ವಂ ಜಾನಂತಿ ನ ಜಾನಾತಿ ಹ್ಯಯಂ ದ್ವಿಜಃ |
ಅಸ್ಯ ಸ್ವಪ್ನೇ ಮಯಾ ಚೋಕ್ತಂ ಪ್ರತ್ಯಯಾರ್ಥಂ ನ ಸಂಶಯಃ |೧೧೯|

ಸ್ವಾಪ್ನ ದೈವಿಕ ಪದ್ಯೇಷು ಲೋಕಭಿನ್ನೇಷು ದೋಷಧೀಃ |
ನ ಕರ್ತವ್ಯಾ ಯತೋ ದೇವಾ ಅಶರೀರಾ ಭವಂತಿ ಹಿ |೧೨೦|

ಶರೀರಿಣಾಮಯಂ ದೋಷಸ್ಛಂದೋ ಭಙ್ಗಾದಿರೇವ ಹಿ |
ಅಶರೀರಸ್ಯ ವಾಕ್ಯೇಷು ನ ದೋಷಾಯೇತಿ ಸಮ್ಮತಂ |೧೨೧|

ಅಹಂ ಜಾನಾಮಿ ತತ್ಸರ್ವಂ ಯದುಕ್ತಂ ದುರ್ಜನೈರಿಹ |
ಇದಮೇವೋತ್ತರಂ ತೇಷಾಂ ಯದುಕ್ತಂ ತು ಮಯಾ ಪುರಾ |೧೨೨|

ಅಙ್ಗೀಕೃತ್ಯ ಮಯಾ ಪ್ರೋಕ್ತಃ ಪರಿಹಾರಃ ಸುದುರ್ಮತೇಃ |
ಕುತ್ರ ಚ್ಛಂದೋಭಙ್ಗ ದೋಷೋ ವರ್ತತೇ ದುಷ್ಟ ತದ್ ವದ |೧೨೩|

ವಾಗ್ವೈಖರ್ಯೇಣ ಶೂನಸ್ಯ ಬ್ರಾಹ್ಮಣಸ್ಯ ಮುಖೇನ ತು |
ವೃಂದಾವನಸ್ಯ ವಿಭವ ಮುಕ್ತಂ ವೈ ಲೇಶತೋ ಮಯಾ |೧೨೪|

ಅಸಂಭಾವಿತಮೇತಚ್ಚ ನಿತ್ಯಂ ಸ್ವಪ್ನೇರಿತಂ ಮಯಾ |
ಇತಿಹಾಸ್ಯಂ ಪ್ರಕುರ್ವಂತಿ ಯೇ ಜನಾ ಮಮ ದೋಷಿಣಃ |೧೨೫|

ಯದ್ ವಕ್ತಿ ಬ್ರಾಹ್ಮಣಃ ಶ್ಲೋಕೈಃ ತತ್ಸರ್ವಂ ಸತ್ಯಮೇವ ಚ |
ತತ್ಕರ್ತವ್ಯಮವಶ್ಯಂ ತು ಮಮ ಶಾಸನ ಮೇವ ಚ |೧೨೬|

ಮಮ ರೋಷಾತ್ ಸರ್ವಪುಣ್ಯಾಶ್ಚ್ಯವಂತೇ ನಾತ್ರ ಸಂಶಯಃ |
ಪಿತೃಭಿಃ ಸಹ ಮಜ್ಜಂತೇ ನರಕೇ ಪುಣ್ಯ ಸಂಕ್ಷಯೇ |೧೨೭|

೧೦. ವಿಪ್ರ ಪ್ರಕರಣಮ್ | ಶ್ಲೋಕಾ: ೧೨೮

ತಸ್ಮಾತ್ ಘೋರೇ ಕಲೌ ಕಾಲೇ ಹ್ಯಲಮೇತಾವತಾ ದ್ವಿಜ |೧೨೮|

೧೧. ಲಕ್ಷ್ಮೀಪತಿ ಪ್ರಕರಣಮ್ | ಶ್ಲೋಕಾ: [೧೨೯-೧೩೦]

ವೇದವೇದ್ಯ ಮಮ ಸತ್ಸು ಸತ್ಕೃತೇ
ಪಾದಪದ್ಮಯುಗಲೇ ಸದಾ ಕುರು |
ತೇ ಮತಿಂ ಮಮಕೃತಿಂ ತಥಾಽಶ್ಮನಿ
ತ್ವಂ ಕುರುಷ್ವ ತವ ಭೂತಿದಾಂ ಸದಾ |೧೨೯|

ತ್ರಿವಾಚಾಽಪಿ ಮಯಾ ಪ್ರೋಕ್ತಂ ತವ ಬುದ್ಧಿರ್ಯಥಾ ತಥಾ |
ಕುರು ವಿಪ್ರಸ್ಯ ವಚನಂ ನ ಮೃಷೇತಿ ವಿಚಿಂತಯ |೧೩೦|

೧೨. ವಿಪ್ರ ಪ್ರಕರಣಮ್ | ಶ್ಲೋಕಾ: [೧೩೧-೧೩೫]

ಸಕೃದೇವೋಪದೇಶೇನ ಸಕೃದ್ ಗ್ರಹಣ ಶಕ್ತಿನಂ |
ಕರೋಮಿ ತ್ವಾಂ ಚ ವಿಪ್ರೇಂದ್ರ ಮಮ ಪಾದಾಬ್ಜ ಸೇವಕಂ |೧೩೧|

ಬ್ರಾಹ್ಮಣ ಬ್ರಹ್ಮ ತೇಜಸ್ವಿನ್ ಮತ್ಸೇವಾಂ ಮಾ ತ್ಯಜಸ್ವ ಹ |
ಮತ್ಪ್ರಸಾದಾಪ್ತ ಮತ್ಯಾ ಚ ನಿತ್ಯಂ ಕೀರ್ತಯ ಭಾರತಂ |೧೩೨|

ಮತ್ಸೇವ ಯಾ ಸು ಸಂಪೂರ್ಣಂ ದಾಪಯಿಷ್ಯೇಽತ್ರ ಭೋಜನಂ |
ಮತ್ಸೇವಯಾ ಶುಭಗತಿಂ ದಾಪಯಿಷ್ಯೇಽತ್ರ ಜಿಷ್ಣುನಾ |೧೩೩|

ಇತಃ ಪರಂ ತವ ಸ್ವಪ್ನೇ ನ ಚ ವಕ್ಷ್ಯೇ ನಿರಂತರಂ |
ಕದಾಚಿದೇವ ವಕ್ಷ್ಯಾಮಿ ಕಾರ್ಯೇತು ಪ್ರಸ್ತುತೇ ಸತಿ |೧೩೪|

ಸುಖೀ ಭವ ತ್ವಂ ವಿಪ್ರೇಂದ್ರ ಮಮಾಽಶೀರ್ವಚ ನೇನ ಚ |
ತ್ವಯಾ ಚಿಂತಾ ನ ಕರ್ತವ್ಯಾ ಶಿಶೋಃ ಕ್ಷೀರಂ ಭವಿಷ್ಯತಿ |೧೩೫|

೧೩. ಶೇಷ ಪ್ರಕರಣ | ಶ್ಲೋಕಾ: [೧೩೬-೧೩೯]

ಶೇಷ ಘೋಷಯ ಪೋಷಯ ತ್ವಂ ದೋಷ ಶೂನ್ಯಾಂ ತು ಮೇ ಕೃತಿಂ |
ಶೇಷಶಾಯಿ ಹಯಗ್ರೀವಂ ತೋಷ ಯ ತ್ವಂ ಚ ಭೂಷಯ |೧೩೬|

ರಥೋತ್ಸವಂ ನೇತ್ರ ಮನೋ ರಥೋತ್ಸವಂ
ತಥೋತ್ಸವಂ ಭೋಕ್ತೃಜನಸ್ಯ ಭೋಜನೈಃ |
ಕುರು ತ್ವಮಥೋತ್ಸವಮರ್ಥಿನಾಂ ತು ನೇತ್ರೋತ್ಸವಂ
ಪ್ರೇಕ್ಷಯ ಸಜ್ಜನಾನಾಂ |೧೩೭|

ಏವಂ ಪಂಚೋತ್ಸವಂ ಕೃತ್ವಾ ಪಂಚರೂಪಧರಂ ಹರಿಂ |
ಸಂಪೂಜ್ಯ ಪಂಚಬಾಣಂ ತಂ ಪಂಚತ್ವಂ ಚೈವ ತ್ವಂ ಜಹಿ |೧೩೮|

ಇಮಾಂ ಮಮ ಕೃತಿಂ ಮಿತ್ರ ಪ್ರೇಷಯಸ್ವ ತ್ವಮಾತ್ಮಜ |
ಅನ್ಯಥಾ ತ್ವಂ ಚ ಮದ್ದ್ರೋಹೀ ಕುರ್ವಿದಂ ತು ತವಾಽಜ್ಞಯಾ |೧೩೯|

೧೪. ವಿಪ್ರ ಪ್ರಕರಣಮ್ | ಶ್ಲೋಕಾ: [೧೪೦-೧೪೭]

ಬ್ರಾಹ್ಮಣ ತ್ವಂ ತತ್ರ ಗತ್ವಾ ವದಸ್ವ ಸ್ವಾಪ್ನವೈಭವಂ |
ಇದಂ ತು ಮದ್ವೈಭವಂ ತು ಮದ್ಭಕ್ತೇನ ತು ಕೀರ್ತಿತಂ |
ಶೃಣೋತಿ ಮದ್ಭಕ್ತಿರತೋ ಮದ್ಭೂತಿಂ ಲಭತೇ ನರಃ |೧೪೦|

ಶೇಷಾಯ ವದ ಮತ್ಪುತ್ರ ದೋಷಾಯನತರಂ ಮಮ |
ತೋಷಾಯ ತವ ವಿಪ್ರಸ್ಯ ಪ್ರೇಷಯ ಸ್ವಾಪ್ನ ವೈಭವಂ |೧೪೧|

ಸ ಶೇಷಃ ಶೇಷವದ್ ದಕ್ಷಃ ಶ್ರುತ್ವಾ ಕಾರ್ಯಂ ಕರಿಷ್ಯತಿ |
ಅಶೇಷಂ ಮಮ ಶೇಷಸ್ಯ ಹಯಗ್ರೀವಸ್ಯ ತೋಷಕಃ |೧೪೨|

ಭವಿಷ್ಯತ್ಯನಿಶಂ ತಸ್ಯ ಯೋಗಕ್ಷೇಮಂ ಕರೋಮ್ಯಹಂ |
ಪುತ್ರಲಾಭಶ್ಚ ಭವಿತಾ ಮತ್ಪ್ರಸಾದಾನ್ನ ಸಂಶಯಃ |೧೪೩|

ಶ್ರೀಶಸ್ಯ ಭಕ್ತಿಕೋಶಸ್ಯ ಸೇಶ್ವರಸ್ಯ ದಾಸಸ್ಯ ಮೇ |
ತೋಷಸ್ಯ ಕೋಶ ಭೂತಸ್ಯ ಶೇಷಸ್ಯ ವದ ಮತ್ಕೃತಿಂ |೧೪೪|

ಬ್ರಾಹ್ಮಣ ತ್ವಂ ತತ್ರಗತ್ವಾ ವದ ಸ್ವಾಪ್ನೀಂ ತು ಮತ್ಕೃತಿಂ |
ಮದ್ಭಕ್ತಿ ಯುಕ್ತಮನಸೋ ಮಮ ಸಂಸ್ಥಾನದಸ್ಯ ಚ |೧೪೫|

ಅದ್ಯೈವ ಗಚ್ಛ ವಿಪ್ರೇಂದ್ರ ಹೃದಿಸ್ಥೋಽಹಂ ಭವಾಮಿ ತೇ |
ಅದ್ಯ ಪ್ರಭೃತಿ ತೇ ಶಾಂತಿಂ ದಾಸ್ಯಾಮಿ ಚ ನ ಸಂಶಯಃ |೧೪೬|

ಮಯೋಕ್ತಮಂಭಸಿ ಕ್ಷಿಪ್ತ ಕಾಂಚನೇಷುರ್ಯಥಾ ತಥಾ |
ಅಭೂತ್ ಸ್ವಾಪ್ನ ಪ್ರಮೇಯಂ ತು ಕುರು ತ್ವಂ ಸಾರ್ಥಮೇವ ತತ್ |೧೪೭|

೧೫. ಶೇಷ ಪ್ರಕರಣಮ್ | ಶ್ಲೋಕಾ: [೧೪೮-೧೫೧]

ಶೇಷಾಶೇಷಂ ಚ ಮತ್ಕಾರ್ಯಂ ಶೇಷಾಶೇಷ ಪ್ರದಂ ತವ |
ಅಕರ್ತುಃ ಕರ್ತುರಪ್ಯೇತತ್ ಕುರುಷ್ವ ತ್ವಂ ಸುಖೀಭವ |೧೪೮|

ಮಮಾಽತ್ಮಜಂ ವೇದವೇದ್ಯಂ ಮಮ ಸಂಸ್ಥಾನ ಸಂಸ್ಥಿತಂ |
ಮತ್ಕಲಾಪೂರ್ಣ ಮನಸಂ ಪಾಲಯಸ್ವ ಸುಮಾನಿನಂ |೧೪೯|

ಅಹೋ ಮಮಾಜ್ಞಾಂ ಕುರು ವೇದವೇದ್ಯ ಖ್ಯಾತಿರ್ಮಮ ಸ್ವಾಪ್ನ ಕೃತೇರ್ನ ಕಿಂಚಿತ್ |
ಜಾತಾ ತಯೋಃ ಪ್ರೇಷಯ ಭಕ್ತಿ ಯುಕ್ತಯೋಃ ಸೀತಾಪತಿ ವ್ಯಾಸ ಸ ನಾಮಧೇಯಯೋಃ |೧೫೦|

ಶ್ರುತ್ವಾ ತೌ ಮತ್ಕೃತೇಃ ಸಮ್ಯಕ್ ಖ್ಯಾತಿಂ ಚಾತ್ರ ಕರಿಷ್ಯತಃ |೧೫೧|

೧೬. ವಿಪ್ರ ಪ್ರಕರಣಮ್ | ಶ್ಲೋಕಾ: ೧೫೨

ವಿಪ್ರ ತ್ವಮೇವ ಗತ್ವಾ ಚ ಮತ್ಕೃತಿಂ ತು ತಯೋರ್ವದ |
ನಾಮೈಕದೇಶ ಗ್ರಹಣೇ ಗೃಹೀತಂ ಪೂರ್ಣಮೇವ ಚ |
ತಯೋರ್ನಾಮ ತಥಾ ಶಾಸ್ತ್ರೇ ಚೋಕ್ತಂ ವಿದ್ವದ್ಬಿರೇವ ಚ |೧೫೨|

೧೭. ಲಕ್ಷ್ಮೀಪತಿ ಪ್ರಕರಣಮ್ | ಶ್ಲೋಕಾ: [೧೫೩-೧೬೬]

ಅಸ್ಯಾತಿ ಶುದ್ಧ ಬುದ್ಧೇಶ್ಚ ಯಸ್ಯ ಸದ್ಧರ್ಮ ಪದ್ಧತಿಮ್ |
ಮದ್ಬುದ್ಧಿ ನಿಧಿರತ್ರಾಽಸೀದಹೋ ವಿಧಿ ಬಲಂ ಮಹತ್ |೧೫೩|

ಅಯಂ ಚ ಬ್ರಾಹ್ಮಣಶ್ಚಾತ್ರ ಮಾಮೇವ ಶರಣಂ ಗತಃ |
ವೃಂದಾವನಕೃತೇಃ ಪೂರ್ವಂ ಸ್ವಸ್ಯಾಭೀಷ್ಟಂ ನಿವೇದ್ಯ ಮೇ |೧೫೪|

ಕೃತ್ವಾ ವೃಂದಾವನಂ ಚೇತಿ ಪ್ರಾಕ್ ಶ್ಲೋಕ ದ್ವಿತಯೇನ ಚ |
ಅತಸ್ತ್ವಂ ಮೇ ಮಯಾ ಪ್ರೋಕ್ತಂ ತತ್ ಸತ್ಯಂ ಸಮಭೂದಹೋ |೧೫೫|

ವೇದವೇದ್ಯ ಮಮ ಶೇಷ ಸತ್ಕೃತಂ ತತ್ಸಶೇಷಗಿರಿ ಪಂಡಿತಂ ವದ |
ತ್ರಿದಶ ದೋಷರಹಿತೈಃ ಸು ಪೂಜಿತ
ಕದಶನಾರ್ಥಿಭಿರನಾದೃತರೂಪಂ |೧೫೬|

ಸುತ ಮದೂರ್ಜಿತ ಪದೇ ಚ ಸುಸ್ಥಿರಸ್ತ್ವಂ ಚ
ಸರ್ವ ಸುರಸತ್ತಮ ದೇವ ಭೂಃ |
ತದಭಯ ಪ್ರಭವಾಯ ಕೋ ಮಹಾನ್
ತ್ವಾಮೃತೇ ಪುರುಷ ಭೂಷಣ ತದ್ ವದ |೧೫೭|

ಏತಚ್ಛ್ಲೋಕದ್ವಯಸ್ಯಾರ್ಥಂ ಬ್ರಾಹ್ಮಣಸ್ಯ ಮುಖೇನ ತು |
ಜಾನೀಹಿ ತ್ವಂ ಯತಶ್ಚಾಸ್ಯ ಮಯಾರ್ಥೋಪ್ಯನುವರ್ಣಿತಃ |೧೫೮|

ತ್ರಿಂಶಚ್ಚ ಕವಿತಾ ದೋಷಾಃ ವಿದುಷಾಂ ಜ್ಞಾನಿ ಲಕ್ಷಣೇ |
ತೈರ್ವಿಹೀನಾಶ್ಚ ವಿದ್ವಾಂಸೋ ನೇತರೇತಿ ಸತಾಂ ಮತಂ |೧೫೯|

ಅಸೂಯಾ ಪರನಿಂದಾ ಚ ಪರೇಷಾ ಚ ಪ್ರತಾರಣಂ |
ನಿರ್ದೋಷಾಯಾಂ ಪರಕೃತೌ ದೋಷ ದೂಷಣಮೇವ ಚ |೧೬೦|

ಪರತ್ವ ಬುದ್ದಿಃ ಸ್ವಸ್ಮಿಂಸ್ತು ಪರೇಷಾಂ ಹಾಸ್ಯಮೇವ ಚ
ಸ್ವಸ್ಯ ಶಾಠ್ಯಂ ತತ್ವಮತಾವಹಂಕಾರಿತ್ವ ಮೇವ ಚ |೧೬೧|

ಇತ್ಯಾದ್ಯಾ ಬಹವೋ ದೋಷಾಃ ವಿದುಷಾಂ ಚ ಪ್ರಕೀರ್ತಿತಾಃ |
ತೈರ್ವಿಹೀನಾಶ್ಚ ವಿದ್ವಾಂಸೋ ಇತರೇ ನ ಕದಾಚನ |೧೬೨|

ಓಂ ಏತತ್ಸರ್ವಂ ಸ್ವಾಪ್ನಪದ್ಯೇನ ಗರ್ವಂ ಹಿತ್ವಾ ಸರ್ವೇ ವಿಪ್ರವರ್ಯಾಸ್ಯಜೇನ |
ಶೃತ್ವಾ ಚೋರ್ವ್ಯಾಂ ಶರ್ವ ಗುರ್ವಾದಿ ದೇವಾನ್
ದೃಷ್ಟ್ವೋರ್ವಶಿಂ ಯಾಂತು ಮಾಂ ಮಾನವೇಂದ್ರಾಃ |೧೬೩|

ಇದಂ ವೃಂದಾವನಾಖ್ಯಾನಂ ಯೇ ಪಠಂತಿ ಮನೀಷಿಣಃ |
ಮುಕುಂದಾವನಮೇವಾಸ್ತು ತೇಷಾಂ ಕಂದಾಶನಾಜ್ಞಯಾ |
ಇದಮರ್ಪಿತಮೇವಾಸ್ತು ಹಯಶೀರ್ಷಸ್ಯ ಪಾರ್ಷದಾತ್ |
ಸಮಂ ಸಹಸ್ರಶೀರ್ಷಸ್ಯ ಸೂಕ್ತಸ್ಯ ಪುರುಷಾತ್ ಕೃತಮ್ |೧೬೪|

ಯಚ್ಛ್ರುಣ್ವತಾಂ ಭಕ್ತಿರುದಾರಸದ್ಗುಣೇ ಹರೌ
ಹರೇರ್ಲೋಕಗತೇ ತಥಾ ಮಯಿ |
ಭವತ್ಯಹೋ ಸರ್ವಶುಭಾಪ್ತಿಸನ್ಮತೀರ್ ದದಾತ್ಯಜಸ್ರಂ ಸುತ
ಸತ್ಯಮೇವ ತತ್ ಓಂ |೧೬೫|

| ಇತಿ ಶ್ರೀಸ್ವಾಪ್ನವೃಂದಾವನಾಖ್ಯಾನೇ ಅಲೌಕಿಕ ವಿಭಾಗೇ
ವೈಭವ ಪರ್ವಣಿ ದಶಮಾಧ್ಯಾಯ: ಸಮಾಪ್ತ: |

|| ಶ್ರೀ ಅಶ್ವಿನೀಹಯಗ್ರೀವಾತ್ಮಕ ಕೃಷ್ಣಾರ್ಪಣಮಸ್ತು ||

11. Svaapnavrundavanakhyana