07. Svaapnavrundavanakhyana

Composer : Shri Vadirajaru

| ಅಥ ಸಪ್ತಮಾಧ್ಯಾಯ: |

೧. ವೇದನಿಧಿ ಪ್ರಕರಣಮ್ | ಶ್ಲೋಕಾ: [೧-೪೫]

ಹರಿಃ ಓಂ |

ಏವಂ ವೈ ದೇವತಾ ಲೋಕೆ ಪಾಕಶಾಸನ ಪೂರ್ವಕಾನ್
ದೃಷ್ಟ್ವಾ ಚಾಽಕಾಶಗಾಮೀ ತು ಸತ್ಯಲೋಕಮಿತೋಽಗಮಂ |೧|

ತತ್ರೈವ ನಿವಸಾಮ್ಯದ್ಧಾ ಶುದ್ಧಾಂತಃ ಕರಣಃ ಸದಾ |
ಬಧ್ವಾ ಹಯಗ್ರೀವಪಾದಂ ಶ್ರದ್ಧಾಯುಕ್ತಶ್ಚ ಸುಸ್ಥಿರಃ |೨|

ತತ್ರಾಪಿ ಮಾಂ ಹಯಗ್ರೀವಃ ಶ್ರುತ್ಯರ್ಥಂ ಸರ್ವಮೇವ ಚ |
ಗ್ರಾಹಯಾಮಾಸ ಸರ್ವಜ್ಞೋ ವರ್ಗೇ ವರ್ಗಾರ್ಥ ತತ್ವವಿತ್ |೩|

“ಸರ್ಗೇ ಸರ್ಗೇ ತಥಾಽಹಂ ವೈ ಸ್ವರ್ಗಂ ಯಾಸ್ಯಾಮಿ ಮಾರ್ಗಯನ್ |
ಘರ್ಷರೌ ತೌ ಚ ದೈತ್ಯಾಗ್ರ್ಯೌ ಮಧುಕೈಟಭ ಸಂಜ್ಞಿತೌ |೪|

ತೌ ಹಿತ್ವಾ ಸಲಿಲೇ ಕಾಲೇ ಲೋಕಂ ನಿರ್ಮಿತವಾನಹಂ |
ಪಾಲಯಾಮಿ ಕುಲಾಲೋಽಪಿ ಕಲಶಂ ಪಾಲಯನ್ ಯಥಾ | ೫|

ಏವಂ ಸೃಷ್ಟ್ಯಾದ್ಯಷ್ಟಕಂ ಚ ಸ್ಪಷ್ಟಂ ಕಷ್ಟಂ ವಿನಾಽಪ್ಯಹಂ |
ಶ್ರೇಷ್ಠ ಸುಷ್ಠು ಕರೋಮೀಷ್ಟಾಂ ಭಕ್ತಾನಾಂ ಪ್ರೇಷ್ಠ ಸದ್ಗತಿಂ ” |೬|

ಇತಿ ಮಾಮುಕ್ತವಾನ್ ಭಕ್ತಂ ತ್ಯಕ್ತ್ವಾ ಸರ್ವಂ ತು ಪಾತಕಮ್ |
ಪ್ರಾಪ್ತಂ ಪದಾಂತಿಕಂ ಸ್ವಸ್ಯ ಶಕ್ತ್ಯಾ ಯುಕ್ತಂ ಶ್ರುತಿಗ್ರಹೇ |೭|

ಸಹಸ್ರ ಪದ್ಯ ತತ್ಪದ್ಮಂ ತತ್ಪದಾಖ್ಯ ದಳಾನ್ವಿತಮ್ |
ತದ್ಭಾವ ಸೌರಭ ಭುವಂ ಜಿಘ್ರನ್ ಬಿಭ್ರತು ಮೂರ್ಧನಿ |೮|

ವಿಪ್ರಾಸ್ಯ ಸರಸೋದ್ಭೂತಂ ತರಸಾ ಸರ್ವ ಭೂಸುರಾಃ |
ಶಿರಸಾ ಸ್ವರಸೋಪೇತಾಃ ಶ್ರಿಯೈ ತಾಮರಸಂ ಪರಂ |೯|

ಧಾರಯಂತು ಬುಧಾಗಾರೇ ಧಾರಯಂತು ಸದಾರಕಾಃ |
ಆದರೈಃ ಪಾದರಜಸಾ ಧೂತ ಪಾಪಾಶ್ಚ ಯೇಽಮರಾಃ |೧೦|

ಇತ್ಥಂ ಮಮೋಕ್ತಿರೇವೇಯಂ ಕಥಂ ಕೃತ್ರಿಮವಾರ್ತಯಾ |
ವ್ಯರ್ಥತಾಂ ಯಾತಿ ತತ್ವಜ್ಞಪಾರ್ಥಿವೇಷ್ವಪಿ ಸಾರ್ಥಿಕಾ |೧೧|

ಅತಿಗೋಪ್ಯಾನಿ ಪದ್ಯಾನಿ ಮಯೋಕ್ತಾನ್ಯಪಿ ಕಾನಿಚಿತ್ |
ಜನಸ್ಯಾಯೋಗ್ಯತಾಂ ದೃಷ್ಟ್ವಾ ಹೃತವಾನ್ ವಿಪ್ರವಾಕ್ಯತಃ |೧೨|

ಅಹಂ ತ್ವವಿಶ್ವಾಸಮೇವ ಭಾವಿನಂ ಭಾವನಾತ್ಮಕಂ |
ಭಾವಯನ್ ಭಾನುಮದ್ ಧೀಮನ್ನಬುಧಾನಾಂ ಹರಾಮಿ ಚ |೧೩|

ಏವಂ ನಿತ್ಯಂ ಪ್ರನೃತ್ಯನ್ ವೈ ಸತ್ಯಂ ಕರ್ತುಂ ಮಯೋದಿತಂ |
ತತ್ತನ್ಮುಖೇ ಪ್ರಯತ್ನಾನಿ ವಕ್ತುಂ ತಥ್ಯಂ ಕರೋಮಿ ಚ |೧೪|

ಅಹಂ ಧವಳಗಂಗಾಯಾಂ ದೇವೈ: ಸಹ ಮುನೀಶ್ವರೈಃ |
ಅರುಣೋದಯ ವೇಲಾಯಾಂ ಸ್ನಾತ್ವಾ ಗಚ್ಛಾಮಿ ನಿತ್ಯಶಃ |೧೫|

ನರಾಣಾಂ ದರ್ಶನಂ ಚಾಪಿ ಸ್ಪರ್ಶನಂ ಚ ವಿಮರ್ಶನಂ |
ಸುರಾಣಾಂ ನೈವ ಧರ್ಮಶ್ಚ ಸಂಭಾಷಣಮಪಿ ಪ್ರಿಯ |೧೬|

ಸ್ವಪ್ನೇಽಪಿ ಚಾಪ್ತವಾನ್ ಶ್ರೀಮನ್ನಾಯುಷ್ಮನ್ ನರದೇಹಿನಂ |
ಪ್ರಾಪ್ನೋತಿ ಯದಿ ವಾ ತಾಪಂ ನರಕೇ ಚಾಪ್ನುಯಾದ್ ಧ್ರುವಂ |೧೭|

ಅಥಾಪಿ ಮೇ ನ ದೋಷಃ ಸ್ಯಾನ್ನಿ: ಸಂಙ್ಗವಪುಷೋ ಋಷೇಃ
ಅಘಮರ್ಷಣತೋ ದೋಷಂ ಶೋಷಯಾಮಿ ತದಪ್ಯಹಂ |೧೮|

ತಸ್ಮಾದ್ ಧವಳ ಗಂಗಾಯಾಮಂಙ್ಗೀಕೃತ್ಯ ಮುನೀಶ್ವರಃ |
ಸಂಗೀಕೃತಾವಗಾಹ: ಸನ್ ಸ್ವಾಙ್ಗಂ ಯಾಸ್ಯಾಮಿ ನಿತ್ಯಶಃ |೧೯|

ಅಥ ತೇ ವಚ್ಮಿ ಸತ್ಯಂ ಚ ಪ್ರಶ್ನಂ ಮಾ ಕುರು ಮಾಂ ಪ್ರತಿ |
ಶಿಶ್ನೋದರ ಪರಾಣಾಂ ಚ ವಾಚಂ ನ ಶ್ರುಣು ನಂದನ |೨೦|

ಶೋಷಯೇ ಸ್ಮೃತಿಮಾತ್ರೇಣ ದೋಷಂ ಸರ್ವಂ ವಿಪಶ್ಚಿತಾಂ |೨೧|

ಹಯಾಸ್ಯ ಕೃಪಯಾ ನಿತ್ಯಂ ಮಯಾಽಸ್ಯ ಚರಣಾರ್ಚನಾತ್ |
ಪ್ರಿಯಾಽಸ್ಯೈವ ಗತಿಃ ಪ್ರಾಪ್ತಾ ಪ್ರಯಾಸ್ಯಾಮಿ ನ ಸಂಸೃತಿಂ |೨೨|

ಹೇ ಪುತ್ರ ವೃತ್ರಹಂತಾಽಯಂ ವಿಚಿತ್ರಂ ಕೃತವಾನಹೋ |
ಪಿತ್ರಾಽಽದಿಷ್ಟಶ್ಚ ಸ್ವಚ್ಛತ್ರಂ ಧೃತವಾನತ್ರ ಮೂರ್ಧನಿ |೨೩|

ಧನ್ವಂತರಿಂ ಭಜೇ ನಿತ್ಯಂ ಮನ್ವಂತರ ಪತಿಂ ಪ್ರಭುಂ |
ತನ್ವಂತರ ಗತಶ್ಚಾಹಂ ನನ್ವಂತರ ಗತೋಽಪಿ ಸನ್ |೨೪|

ಅಮೃತಾಂಶುಗತಂ ದೇವಂ ತ್ವಮೃತಾಬ್ಧಿ ಸಮುದ್ಭವಂ |
ಅಮೃತಂ ಪಾಯಯಂತಂ ಮಾಮಮೃತಾಕ್ತ ಕಮಂಡಲುಂ |೨೫|

ಸ ದೇವೋ ವರದೋ ಮಹ್ಯಂ ತದೈವ ಪ್ರಭುರವ್ಯಯಃ |
ದದೌ ಚ ದಿವ್ಯವಿಜ್ಞಾನಂ ಮುದೈವ ಮಮ ಸೇವಯಾ |೨೬|

ಶ್ರೀಪತಿಶ್ಚೋತ್ತಮೋ ನಿತ್ಯಂ ಸತ್ಯಂ ಜಗತಿ ತತ್ಕೃತಂ |
ಕತ್ಥನಂ ತಚ್ಚ ಮಿಥ್ಯೇತಿ ಜಲ್ಬಂತಿ ದಿತಿಜಾಃ ಸುತ |೨೭|

ಪೂರ್ವಂ ಸುರಾಸುರಗಣೈರರ್ಥಿತೋಽಹಂ ಕಥಾಂತರೇ |
ತಥಾಂತರೆ ಪಪುರ್ದೇವಾಸ್ತ್ವಮೃತಂ ಚೇತರೇ ಮೃತಿಂ |೨೮|

ಯುದ್ಧೇ ದೇವೈ: ಸುಸನ್ನದ್ಧಾಃವೃದ್ಧಾ ವೃದ್ಧವಿರೋಧಿನಃ |
ಮುಗ್ಧಾ: ಸದ್ಭಾವತೋ ದುಗ್ಧಪಯೋಬ್ಧೌ ಮಧ್ಯಗಾಶ್ಚತೇ |೨೯|

ತದ್ದ್ವೇಷಾದ್ ದ್ವೇಷರೂಪಾಸ್ತೇ ಮೃಷೇತಿ ಮಮ ಭಾಷಿತಂ |
ಭಾಷಂತೇ ಶೇಷ ಶಾಯಿಂಚ ದೋಷೀತಿ ಸುಷಿರೋಕ್ತಿಭಿಃ |೩೦|

ಇತಿ ಮಾಮುಕ್ತವಾನ್ ಸಕ್ತಂ ಸ್ವಪಾದೇ ಚಾಪದಾಽಽತ್ಯಜತ್ |
ಕಾಪಟ್ಯಾಂತಕ ದೈತ್ಯಾನಾಮಂತಕಂ ಚಾಪಿ ತಂ ಭಜ |೩೧|

ಅನಂತ ತಂ ನತೋಸ್ಮೀಶಂ ದೇಶತಃ ಕಾಲತಶ್ಚ ಯಂ |
ಗುಣತಶ್ಚ ವದಂತೋ ಯೇ ಸಂತಃ ಕಾಂತಂ ಶ್ರೀ ಯಃ ಸುತ |೩೨|

ವೈದ್ಯೋ ಧನ್ವಂತರಿಶ್ಚಾಯಂ ಚೈದ್ಯ ಶಾಪಾಖ್ಯ ರೋಗಹಾ |
ಚೋದ್ಯಂ ಚ ಕೃತವಾನ್ ಮಹ್ಯಂ ಚಾದ್ಯಂತೌ ಹೃತವಾನ್ಮಮ |೩೩|

ಭೈಷಜ್ಯಂ ಕೃತವಾನ್ಮಹ್ಯಂ ವೈಷಮ್ಯರಹಿತಃ ಪ್ರಭುಃ |
ಭೈಷ್ಮೀಪತಿ ಪ್ರಸಾದಾಖ್ಯಂ ಪ್ರೇಷ್ಯಸ್ಯ ಸ ಮಹಾಭಿಷಕ್ |೩೪|

ಏವಂ ಜ್ಞಾನಾಮೃತಂ ಶ್ರೀಮನ್ನಾನೃತಂ ಚೋಚ್ಯತೇ ಮಯಾ |
ಕೋ ಮೃತಿಂ ನಾನು ಯಾತೀಹ ಮಾಮೃತೇ ತಂ ವದಸ್ವ ಮೇ |೩೫|

ಹಯಗ್ರೀವಪ್ರಸಾದೇನ ಶುಭಮೇವ ಗ್ರಹಿಷ್ಯಸಿ |
ಭವಗ್ರಾಹಾದ್ಭಯಂ ನಾಸ್ತಿ ಶುಭಗ್ರಹ ನಿರೀಕ್ಷಯಾ |೩೬|

ಮತ್ಪ್ರಸಾದೇನ ಪುತ್ರೇಶ ಸುಪ್ರಸಂಙ್ಗೀ ಭವಿಷ್ಯಸಿ |
ಕುಪ್ರಸಂಙ್ಗಂ ನಿರಾಕೃತ್ಯ ಸುಪ್ರಭಾತೇ ಪ್ರಿಯೋಭವ |೩೭|

ನಿತ್ಯಂ ವಚ್ಮಿ ಶುಚಿಂ ಪ್ರಾಂಚಂ ಕಚಂ ಗೃಹ್ಯ ವಚೋ ಮಮ |
ವಿಚಕ್ಷಣಂ ವಿಚಾರ್ಯಾಹಮಾಚಾರ್ಯಂ ಪ್ರಾಕ್ ಚತುರ್ವಿಧಂ |೩೮|

ತತ್ವಂ ತತ್ವ ವಿದಾಂ ಶ್ರೇಷ್ಠ ಮತ್ವಾ ತನ್ಮತಮವ್ಯಯಂ |
ಕೃತ್ವಾ ಕೃತ್ವಾಹ ಮತ್ಯಂತಂ ಸುಖೀ ಭವ ಶಮಿನ್ ಸದಾ |೩೯|

ವಸಾಮಿ ನಿತ್ಯಂ ಶ್ರೀಶಸ್ಯ ಸಭಾಯಾಂ ಸಾರವತ್ತಯಾ|
ವ್ಯಾಸಾತ್ ಪಾರಾಶರಾತ್ ಸಾರತತ್ವಾನಿ ಸ್ಮಾರಿತೊಽಭವಂ |೪೦|

ಬದರೀಪುರವಾಸೇ ತು ಮದಿರಾ ಪಾನತಃ ಸುತ |
ಕದರೀಕೃತ ಚಾರಿತ್ರಾನ್ ವಿದದಾರ ಹರಿಃ ಸ್ವಯಂ |೪೧|

ನರನಾರಾಯಣಾತ್ ಪುಣ್ಯಂ ಶೃಣೋಮಿ ಮುನಿ ಮಂಡಲೇ |
ಸ್ಮರಣಾತ್ಸರ್ವ ಪಾಪಘ್ನಾತ್ ಕರಣಂ ಮುಕ್ತಿ ಪದ್ಧತೇಃ |೪೨|

ವ್ಯಾಸೋಽಪಿ ದಾಸಾಯ ವಿಶಾಲ ಬುದ್ಧೇಃ ಶಶಾಸ ಮಹ್ಯಂ ಜಗದೀಶ ದಾಸ್ಯಂ |
ಸದಾ ಹಯಾಸ್ಯಂ ಸಮುಪಾಸ್ಯ ಶ್ರೀಶಂ ಸೇಶಂ ಸಶೇಷಂ ಜಗದಾಸ ದಾಸಮ್ |೪೩|

ವಿರಿಂಚಿಪೂರ್ವಂ ಕವಿರಂಜಿತಂ ಹರಿಂ ಸ್ವರಂಜಿತಂ ಮೌನಿಜನೈರಥಾಂ ಚಿತಂ |
ಸ್ಮರಂ ಜಯ ತ್ವಂ ಸ್ಮರ ಮಾರ ಖಂಜನಿಂ ಯದ್ರಂಜಿತಂ ತ್ವದ್ ಹೃದಯಂ ನಿರಂಜನಂ |೪೪|

ಇತಿ ಮಾಮುಕ್ತವಾನ್ ವ್ಯಾಸೋ ದಾಸಂ ಭಾಸುರ ವಿಗ್ರಹಃ |
ಮಂದಹಾಸಾನ್ವಿತೋ ನಿತ್ಯಂ ಇಂದಿರೇಶೋಽಪಿ ಮಾಂ ತದಾ |೪೫|

೨. ವಿಪ್ರ ಪ್ರಕರಣಮ್ | ಶ್ಲೋಕಾ: [೪೬-೮೨]

ಸುಷಿರೋಕ್ತಿಭಿರಿತ್ಯುಕ್ತೇ ಕಷಣೋಕ್ತಿತ: ಇತ್ಯಹೋ |
ಭಾಷಸೇ ಭೇಷಜಂ ಕಿಂ ತೇ ಜಿಹ್ವಾಯಾಃ ಅಪಿ ತದ್ವದ |೪೬|

ವಾತಪಿತ್ತಾದಿ ದೋಷಾಣಾಂ ಮೇಳನೇ ಸತಿ ಕಾಲತಃ |
ಬಾಲಕಾನ್ ಸತಿ ಪುತ್ರಾದೀನ್ ಪ್ರತಿ ಕಾಲಯತೇ ಯಥಾ |
ತಥಾ ವದಸ್ಯನ್ಯಥಾ ತ್ವಂ ಕಥಾಂ ವಕ್ಷ್ಯೇ ಹರೇರಥೋ |೪೭|

ತತ್ಕಥಾ ಮತ್ಕಥಾ ಯುಕ್ತಾ ಸರ್ವಥಾ ಮಾ ವ್ಯಥಾ ಭವೇತ್ |
ಸೈವ ತೇ ಭೇಷಜಂ ಭಾಷಾ ಪ್ರೇರಯಿಷ್ಯತಿ ನಾನ್ಯಥಾ |೪೮|

ನಿರ್ದೋಷಾಣಾಂ ಮೃಷಾ ವಾಣೀ ನ ಭವಿಷ್ಯತಿ ಸರ್ವಥಾ |
ತಸ್ಮಾತ್ ವಕ್ಷ್ಯೇ ಕಥಾಂ ತಥ್ಯಾಂ ಪ್ರತಿಥಾನ್ವಯ ಸಂಭವ |೪೯|

ತಿಥೌ ತಿಥೌ ಮಾಕೃಥಾಸ್ತ್ವಂ ವ್ಯಥಾಂ ತಾತ ವೃಥಾ ವೃಥಾ |
ತಥಾ ತಥಾ ಭವತ್ಯೇವ ಹರಿಃ ಕರ್ತಾ ಯಥಾ ಯಥಾ |೫೦|

ಹರೇರಾಜ್ಞಾಂ ಪುರಸ್ಕೃತ್ಯ ಸ ವಿಧಿರ್ವರ್ತತೇ ವಿಧೌ |
ಹರಶ್ಚ ಹರತೇ ಸರ್ವಂ ಸ್ವಯಂ ಚಾಸ್ಯ ಸ್ಥಿತೌ ತಥಾ |೫೧|

ಗರ್ವಂ ಹಿತ್ವಾ ತು ಗುರ್ವರ್ಥಂ ಗೀರ್ವಾಣಾ ಸರ್ವ ಏವಚ |
ಗಂಧರ್ವಾ ಅಪಿ ಗಾಂಧರ್ವ ಶೌಂಡಾಃ ಪಂಡಿತಮಾನಿನಃ |೫೨|

ಹರಿಂ ಯಯುರ್ಮುರಾರಿಂ ತಚ್ಚರಣಂ ಪರಮಾದರಾತ್ |
ಸುರಾಸ್ತೇ ಕಿಂಕರವರಾಃ ಶರಣಂ ಪ್ರಾಪುರಂಜಸಾ |೫೩|

ಕರದಾ ವರದಾಯಾಥ ಸ್ಮರದಾಶ್ರಯ ದಾಯ ಚ |
ಪರದಾರ ಪರಾನ್ ದೇವ ವಿದಾರಯ ಕ್ರುಧಾ ರಿಪೂನ್ |೫೪|

ವಿದಾರಯಾಸಿಧಾರಯಾ ಸುಧಾರಸಮುದೀರಯ |
ಉದಾರ ಸಾದರಂ ಧರಾಂ ಪದಾರವಿಂದಜಾಂ ಭರ |೫೫|

ಇತ್ಯೂಚುಃ ಸೋಽಚಿರಂ ವಾಕ್ಯಂ ಶ್ರುತ್ಯುಕ್ತಂ ಪ್ರಾಕ್ತನಂ ಚ ತೇ |
ಯೌಕ್ತಿಕಂ ಶೌಕ್ತಿರೂಪ್ಯತ್ವಂ ಮತಂ ಚಾತಾತ್ವಿಕಂ ಜಗುಃ |೫೬|

ಇತಿ ಸಂಪ್ರಾರ್ಥಿತಸ್ತಸ್ಯ ಭಕ್ತ್ಯಾಽಕೃತ್ರಿಮಯಾ ಸುತ |
ಕೃತ್ಯಂ ತತ್ಕೃತವಾನತ್ರ ಚಿತ್ರಂ ಹರಿಕೃತಂ ಬತ |೫೭|

ಪಾರಂಪರ್ಯೇಣ ರಾಜತ್ವಂ ತದೀಯಾನಾಂ ಮದೀರಿತಂ |
ಅತಶ್ಚಿರೇತಿ ಧೈರ್ಯಾರ್ಥಂ ಪೂರ್ವಂ ಮೇ ವಾಗುದೀರಿತಾ |೫೮|

ತತ್ವಜ್ಞಾನಾಂ ಮುನೀಶಾನ ಶಾಸನಂ ನ ವಿನಾಽಪ್ಯನು |
ಶನೈರ್ಮದ್ವಚನಂ ಜಾನನ್ ಧೀಮನ್ಮದ್ವಚನಂ ಶೃಣು |೫೯|

ಅಹಂ ಪೂರ್ವೇಽಪಿ ಸರ್ವಜ್ಞೋ ಗುರ್ವಾಜ್ಞಾಂ ತ್ವಮಗರ್ವಿತಃ |
ಶಿರಸಾ ಧಾರಯ ಪ್ರಾರ್ಥ್ಯಾಮೀಶ್ವರಜ್ಞೋತಿ ಶೀಘ್ರತಃ |೬೦|

ಪರದಾರೇತಿ ಪೂರ್ವೋಕ್ತಾಃ ಗರದಾಃ ಸ್ವಪತೌ ಚ ಯಾಃ |
ವಿದದಾರ ಹರಿಃ ಸರ್ವಾಃ ಅಸಿಧಾರಾಭಿರೇವ ತಾಃ |೬೧|

ತತ್ಪರಂ ಸ ಹರಿಃ ಸ್ವೈರಂ ಗರಖಡ್-ಗಾನ್ಯಕೃಂತತ |
ವರದಃ ಪರದೇಶಸ್ಥೇ ಸ್ಮರದಾಶ್ರಯದಃ ಸ್ವಯಂ |೬೨|

ರಾಮೋ ರಾಜೀವನೇತ್ರೋಽಸೌ ರಾವಣಾ ವರಜೇ ಯಥಾ |
ಕರದಾ ವರದಾಯಾಥ ಸ್ಮರದಾಶ್ರಯದಾಯ ಚ |೬೩|

ಇತಿ ಪೂರ್ವಂ ಮಯಾ ಪ್ರೋಕ್ತಮನುಸಂಧತ್ಸ್ವ ಬುದ್ಧಿಮನ್ |
ವಾದಿರಾಜಾಗ್ರತಃ ಕ್ಷುದ್ರರಾಜಕಾರ್ಯಂ ಕುತ: ಸುತ |೬೪|

ವಾದೀಭ ಮೃಗರಾಜೋಽಹಂ ವಾದಿರಾಜೋ ಹರಿಂ ಭಜೇ |
ಇತ್ಯಪಿ ಸ್ವೋಕ್ತಮೇವಾತ್ರ ಹ್ಯನುಸಂಧೇಯಮನ್ವಹಂ |೬೫|

ಇತಿ ಸರ್ವಜ್ಞತಾಂ ಶಾಂತ ಸ್ವಾಂತಸ್ಥಂ ಕುರು ಚಾಂತಕಂ |
ಮಾಂ ತಾತಂ ಸಂತತಂ ತ್ವಂ ಚ ಚಿಂತಯಿತ್ವಾ ನಿಕೃಂತಯ |೬೬|

ತಸ್ಯಾಪಿ ಸ್ವೋಕ್ತ ದಾರ್ಢ್ಯಾರ್ಥಂ ಸ್ವಪ್ನೇ ವಕ್ತಿ ರಘೋತ್ತಮಃ |
ಕಾತ್ರ ಶಂಕಾಽಪಿ ತೇ ಮಾಽಸ್ತು ಶಾಸ್ತ್ರಜ್ಞ ಮಮ ಸತ್ಕೃತೌ |೬೭|

ಉದಾರ ಸಾದರಂ ಧರಾಂ ಪದಾರವಿಂದಜಾಂ ಭರ |
ಹೃದಾಽಽದರಾನ್ಮದೀರಿತಂ ಹೃದಿ ಸ್ಥಿತಂ ಸದಾ ಕುರು |೬೮|

ಇತ್ಯಹಂ ಪ್ರಾರ್ಥಯಾಮ್ಯದ್ಧಾ ಬುದ್ಧಿ ಸಿದ್ಧೇಶ್ವರಂ ಹರಿಂ |
ಪ್ರವೃದ್ಧಜ್ಞಾನ ಸಂಶುದ್ಧ ಸಮಿದ್ಧಾಗ್ನಿರಿವ ಜ್ವಲನ್ |೬೯|

ಅತಸ್ತದೀರಿತಂ ವಾಕ್ಯಮೈಹಿಕಾಮುಷ್ಮಿಕಂ ಚ ಯತ್ |
ತತ್ ಸ್ವೀಕುರು ಗುರೂಕ್ತಂ ಚೇತ್ಯತೋ ಭವತಿ ತೇ ಶುಭಂ |೭೦|

ತಥೈವ ಶೇಷಮುದ್ದಿಶ್ಯ ಯದ್ ವಾಕ್ಯಂ ಚ ಮುದೀರಿತಂ |
ವಿಶ್ವಾಸೇ ಸತಿ ತದ್ವೈ ಸ್ಯಾನ್ನ ಸ್ಯಾದ್ ವಾ ತದಭಾವತಃ |೭೧|

ವಿಶ್ವಾಸಿನಾಮವಶ್ಯಂ ತು ತದ್ ವೈ ಸ್ಯಾತ್ ಪಶ್ಯ ಶೋಭನಂ |
ಸ್ವಸ್ಯಾವಿಶ್ವಾಸತಃ ಶಾಂತ ನ ಸ್ಯಾದ್ ವಾ ಕಸ್ಯ ದೋಷಿತಾ |೭೨|

ವಿಶ್ವಾಸಿನಾಂ ಸಮಾಜೇ ಚ ನ ಪಶ್ಯಾಮಿ ಹಿ ತಾದೃಶಂ |
ಯಾದೃಶಂ ವ್ಯಾಸ ಭಕ್ತೇಶಂ ತಥಾ ಸೀತಾಪತೇರ್ಮತಂ |೭೩|

ತಯೋರ್ವಿಶ್ವ ಸತೋರ್ವೀಶಾಧೀಶ: ಶ್ರೀಶೋಽತ್ರ ಶೋಭನಂ |
ದಾಸ್ಯತ್ಯಸಂಶಯಂ ಪಶ್ಯ ಮತ್ಪ್ರಸಾದಾತ್ ಸ ವಿಶ್ವಕೃತ್ |೭೪|

ಗುರು ಪ್ರಸಾದತಃ ಕಸ್ಯ ಫಲಂ ನಸ್ಯಾದವಶ್ಯತಃ |
ಕರಿಷ್ಯತ್ಯೇವ ತತ್ಸ್ವಾಮೀ ಮತ್ಪ್ರಸಾದಾನುಸಾರತಃ |೭೫|

ಪ್ರಸಾದಂ ಮತ್ಪ್ರಸಾದೇನ ಪ್ರಸಾದಂ ಸ ಕರಿಷ್ಯತಿ |
ಕಃ ಪ್ರಸಾದಮೃತೇ ಕ್ವಾಪಿ ಪ್ರಸೀದತಿ ನ ಸೀದತಿ |೭೬|

ತಸ್ಮಾದ್ಗುರೌ ಸದಾ ಧೀರ ರತಿಂ ಕುರು ಹರೌ ಪ್ರಿಯ |
ಗುರುದ್ವಾರಾ ಪ್ರಸನ್ನ: ಸನ್ ಭಾರತಿ ತ್ವಾಂ ರಮಾಪತಿಃ |೭೭|

ಶುದ್ಧ ಸದ್ಧರ್ಮ ಸಿದ್ಧಾನಾಂ ಪದ್ಧತಿಂ ಬುದ್ಧಿಮಾನ್ ಕುರು |
ಕ್ರುದ್ಧೋ ಮದ್ಧರ್ಮ ರುದ್ಧಾನಾಂ ಪದ್ಧತೌ ಸ್ತಬ್ಧತಾಂ ಕುರು |೭೮|

ಸಿದ್ಧಮದ್ಧರ್ಮಪದ್ಧತ್ಯಾ ಶ್ರದ್ಧಾವಾನ್ಮಧುಸೂದನಂ |
ಆರಾಧಯ ಬುಧಾರಾಧ್ಯಂ ವಿಬುಧೇಶ್ವರ ಬುದ್ಧಿಗಂ |
ಮಧುಂ ಕ್ರುದ್ಧಂ ತು ಧೀಮಾನ್ಯೋ ಗದಾಧರಾ ಹತಂ ವ್ಯಧಾತ್ |೭೯|

ಅರ್ಚಿಮಾರ್ಗೇಣ ಗತ್ವಾಹಂ ಸ್ವರ್ಚಿತ: ಸರ್ವ ದೈವತೈಃ |
ಚರ್ಚಿತಶ್ಚಂದನೈರ್ದಿವ್ಯೈರ್ನಾಽರ್ಚ್ಛನ್ಮಾಂ ಕೋಟಿ ಸದ್ಗುಣಂ |೮೦|

ಈಶ್ವರಸ್ಯ ಪ್ರಸಾದೇನ ಸೇಶ್ವರಂ ಜಗದದ್ಯ ಮೇ |
ಪ್ರಾಶ್ರಿತಂ ಚಾಸ ಶಾಸ್ತ್ರೇಶ ಮಾತ್ರಾಸಃ ಸರ್ವಥಾ ತವ |೮೧|

ತಮೀಶ್ವರಂ ಭಾಸ್ವರಸೂರ್ಯ ಶೌರ್ಯದಂ ಮಮೇಶ್ವರಂ ಸರ್ವ ಜಗಚ್ಚ ಸೇಶ್ವರಂ |
ಮುನೀಶ್ವರೈ: ಸರ್ವಸುರೇಶ್ವರೇಶ್ವರೈರ್ವಶೇಕರಂ ಸರ್ವ ಮಹೇಶ್ವರಂ ಸ್ಮರೇ |೮೨|

೩. ವೇದನಿಧಿ ಪ್ರಕರಣಮ್ | ಶ್ಲೋಕಾ: [೮೩-೯೬]

ಅನಂತಾಸನ ಪರ್ಯಂತಮನಂತ ಪದ ಸಂಚರನ್ |
ಅನಂತಶಯನಂ ದೃಷ್ಟ್ವಾಹ್ಯನಂತ ಸುಖಮನ್ವಹಂ |೮೩|

ಅನುಭೋಕ್ಷ್ಯೇ ಶನೈರ್ವಕ್ಷ್ಯೇ ಮುನೇ ಲಕ್ಷ್ಯಂಮನಃ ಕ್ಷತಿಂ |
ತನುಕ್ಷತಿಂ ನ ವಕ್ಷ್ಯೇಹಂ ವಕ್ಷ್ಯೇ ನನು ಮನಃ ಕ್ಷತಿಂ |೮೪|

ತನುಕ್ಷ್ಯತಿಂ ಕ್ಷಮೇ ನಿತ್ಯಂ ಕ್ಷಮೇ ನಾಹಂ ಮನಃಕ್ಷತಿಂ |
ದಕ್ಷಾನ್ಮನಃ ಕ್ಷತಿಂ ತ್ರ್ಯಕ್ಷಃ ಕ್ಷಮತೇ ಕಿಂ ವಿಚಕ್ಷಣ |೮೫|

ಮನ್ಮನೋ ವೇದನಾಂ ಸದ್ಯಃ ಪದೈರ್ವಕ್ಷ್ಯೇಽತ್ರ ನಂದನ |
ತ್ವದಗ್ರತೋ ಬುಧಾಗ್ರ್ಯಸ್ತ್ವಂ ಕುರು ಶೀಘ್ರಂ ತದಗ್ರತಃ |೮೬|

ಅಧ್ಯಾಯಾನ್ ಗುರುಪದ್ಯಾನಾಂ ಸ್ವಾಧ್ಯಾಯಾನ್ನ ವಿನಾಪ್ಯನು |
ಶ್ರದ್ಧಾವಾನ್ಯೈವ ಕ್ರುದ್ಧೋಽಹಂ ವೃದ್ಧಮಂಙ್ಗೀ ಕುರು ಪ್ರಿಯ |೮೭|

ಶಿಲಾಸ್ಥಾಂ ಕುರು ಶೀಲಾಢ್ಯ ಸಾಲಪ್ರಾಂಶೋಽಮಲಾಂ ಕೃತಿಂ |
ಲೋಕೇಶಃ ಪಾಲಯೇತ್ ಸದ್ಯಃ ತ್ವಾಂ ಬಾಲಂ ಕಾಲಕಾಲತಃ |೮೮|

ಏತದ್ದುಃಖೇನ ಮೇ ಸರ್ವಂ ಸುಖಂ ಮೇ ಪಾರಲೌಕಿಕಂ |
ವಿಷಮಿಶ್ರಾಮೃತಂ ಯದ್ವತ್ ತದ್ವದೇವ ಭವತ್ಯಹೋ |೮೯|

ಏತತ್ಕಾರ್ಯ ತ್ರಯಂ ಶಿಷ್ಟಮಿಷ್ಟಂ ಕುರು ಯಥೇಷ್ಟತಃ |
ಸ್ಪಷ್ಟಂ ಮೇ ಮನಸಸ್ತುಷ್ಟಿಂ ಶಿಷ್ಟ ಸಾಧಯ ಸಾಧು ಭೋ |೯೦|

ಇತಂ ಪರಂ ನ ವಕ್ಷ್ಯಾಮಿ ಕುತೋ ವಕ್ಷ್ಯೇ ನಿರಂತರಂ |
ಸುತಾಂತರಂ ನ ಪಶ್ಯಾಮಿ ಮತಂ ಮೇ ಸಾಧಕಂ ತ್ವಲಂ |೯೧|

ಹೇ ಪುತ್ರ, ಶಾಸ್ತ್ರ ವಕ್ತಾಽಹಂ ಸ್ತೋತ್ರಂ ಕುರು ಮಮಾತ್ರ ತು |
ಹೇ ಮಿತ್ರ, ಪಾತ್ರಭೂತೋಽಯಂ ಕಾಽತ್ರ ಶಂಕಾ ತು ಕೃತ್ರಿಮಾ |೯೨|

ಅನ್ಯಥಾ ಪರಸೌಖ್ಯಂ ಮೇ ದುಃಖಾಸಂಛಿನ್ನಮೇವ ಹಿ |
ಕೋನ್ಯಥಾ ವಕ್ತಿ ತತ್ವಜ್ಞ ಮನ್ಮತಜ್ಞ ವೃಥಾಽಜ್ಞತಾ |೯೩|

ಬ್ರಹ್ಮಾಂಡ ಸಮಭಾಂಡೈರ್ಮೇ ಮಾಂಡವ್ಯ ಮುನಿ ಪಾಚಿತಂ |
ಶಾಂಡಿಲ್ಯ ಶೌಂಡಿತಂ ಚಾನ್ನಂ ಕೌಂಡಿಣ್ಯ ಪರಿವೇಷಿತಂ |೯೪|
ಚತುರ್ವಿರಚಿತಂ ತಚ್ಚ ಚತುರ್ಮುಖ ಸುಚರ್ಚಿತೈಃ |
ಚತುರ್ವೇದೋದಿತಾರ್ಥೈಶ್ಚ ಚತುರಾಶ್ರಮ ವರ್ತಿತಃ |೯೫|

ಉಪೇಂದ್ರೇಣ ಸಹ ಪ್ರೇಮ್ಣಾ ಹ್ಯುಪ ತೇ ಗಾ ಇವಾಕರಂ |
ಉಪಭೋಕ್ಷ್ಯೇ ಹ್ಯುಪೇಕ್ಷಾ ತು ಹ್ಯುಪಭೋಕ್ತೃಷು ನಾಸ್ತಿ ಮೇ |೯೬|

೪. ವಿಪ್ರ ಪ್ರಕರಣ | ಶ್ಲೋಕಾ: [೯೭-೧೦೨]

ಮಮಭೋಜನ ಸಂತೋಷಂ ಸುಜನಾಂಬುಜ ಭಾಸ್ಕರಂ |
ಕುಜನಾಂಬುಜ ಸಂಕೋಚಂ ದ್ವಿಜರಾಜಂ ಮಮಾತ್ಮಜಂ |೯೭|

ವದಂತಂ ದ್ವಿಜ ತೇ ಕಲ್ಪಭುಜಂ ಮಜ್ಜನತಾಂ ಪ್ರತಿ |
ಮದಜಾಡ್ಯರುಜಾ ಹೀನಂ ದ್ವಿಜಾರಾಧ್ಯಂ ಭಜಾದ್ಯ ತಂ |೯೮|

ಮಮ ಭೋಜನ ಸಂತೋಷಂ ಯೇ ಶೃಣ್ವಂತಿ ಮುನೀಶ್ವರ |
ತೇಷಾಮನ್ನಾನಿ ಸಂಪೂರ್ಣಾನೀತಿ ಸತ್ಯಾ ಫಲಶೃತಿಃ |೯೯|

ಮಮ ಭೋಜನ ಸಂತೋಷಂ ಯೇ ಚ ಶೃಣ್ವಂತಿ ನಿತ್ಯಶಃ |
ತೇಷಾಮಪ್ಯನಿಶಂ ವಿಪ್ರ ಸಹಭೋಜನ ಮೇವ ಚ |೧೦೦|

ಇತ್ಯೇಕಂ ಶ್ಲೋಕಮೇಕೇ ಚ ನ ವದಂತಿ ಮುನೀಶ್ವರಾಃ |
ಪಾಕಶಾಸನ ಲೋಕೇ ಚ ಕೋ ನ ವಕ್ತಾ ಚ ನಾಕಿಷು |೧೦೧|

ತೇನ ತೇ ಭವಿತಾ ತೋಷೋ ದೋಷೋಽಪಿ ತದನಾದರಾತ್ |
ಮದನಾದರತೋ ಯದ್ವತ್ ದ್ವಿಜಂ ತೋಷಯ ಯಾಜಯಾ |೧೦೨|

೫. ವೇಧನಿಧಿ ಪ್ರಕರಣಮ್ | ಶ್ಲೋಕಾ: [೧೦೩-೧೧೧]

(೧೦೩ ದ್ವಿಜಂ ತೋಷಯ ಯಾಜಯ ಇತ್ಯಾರಭ್ಯ ೧೧೧)

ಕುರು ಕಾರ್ಯತ್ರಯಂ ಶಿಷ್ಟಂ ಪರಲೋಕ ಸುಖಂ ಹರಂ |
ಅನ್ಯಥೈತಚ್ಚಿಂತಯಾಮಿ ಕಾಂತ ಕಾತರತಾಭವೇತ್ |೧೦೩|

ಸ್ವಾಂತರಸ್ಥಾಂ ಕುರು ಶ್ರಾಂತಿಂ ಮಾಂ ತಾರಯ ಸು ಕಾರ್ಯತಃ |೧೦೪|

ಏತತ್ಕಾರ್ಯತ್ರಯಂ ಪುತ್ರ ಶತ್ರುಹಾಸ್ಯಾಭಿಮಂತ್ರಿತಂ |
ಚಿತ್ರಂ ಗುರೂಕ್ತಮಪ್ಯತ್ರ ಪುತ್ರೇಣ ನ ಕೃತಂ ತ್ವಿತಿ |೧೦೫|

ಯಾದೃಶೋಽಹಂ ಗುರುರ್ಧೀರಃ ತಾದೃಶಃ ಶಿಷ್ಯ ಏವಚ |
ಇತಿ ಮೇ ಹಂತ ದೈತೇಯಾ ಹಾಸ್ಯಂ ಕುರ್ವಂತಿ ನಿತ್ಯಶಃ |೧೦೬|

ತಸ್ಮಾತ್ಕುರು ಗುರೂಕ್ತಂ ತೇ ಮನಸಾ ಸ್ಮರ ಧೀರ ಭೋ |
ಕಾರ್ಯತ್ರಯಂ ತ್ರಿಕಾಲೇಽಪಿ ಕದಾ ಕುರ್ಯಾಂ ತದೀರಿತಂ |೧೦೭|

ಸತ್ಯಂ ಸತ್ಯಂ ಪುನ: ಸತ್ಯಂ ವಿಪ್ರೋಕ್ತಿರ್ನೈವ ಮೇ ಕೃತಿಃ |
ತಥ್ಯಂ ತಥ್ಯಂ ಪುನಸ್ತಥ್ಯಮೇತತ್ಕಾರ್ಯತ್ರಯಂ ಸುತ |೧೦೮|

ತತ್ಪಾದಕಮಲಂ ಫುಲ್ಲಂ ಮದ್ಗಲೇ ಬಧ್ಯತೇಽಮಲ |
ಉಪಲಸ್ಥಲಪರ್ಯಂತಂ ಮಮ ನಿರ್ಮಲ ಸತ್ಕೃತೇಃ |೧೦೯|

ಅಧ್ಯಾಯ ಕೃತಿ ಪರ್ಯಂತಂ ಸ್ವಾಧ್ಯಾಯಂ ಕುರು ಮದ್ಗತಂ |
ಬುಧ್ಯಾಽಽರೋಹಯ ಮದ್ಧಾರ್ಯ ವೃದ್ಧವಿಪ್ರಮತಿ ಪ್ರಿಯಂ |೧೧೦|

ಏತತ್ಕಾರ್ಯ ತ್ರಯಸ್ಯಾಪಿ ಸುನಿಷ್ಕೃತ್ಯರ್ಥಮೇವ ಚ |
ಪ್ರತ್ಯಹಂ ಕುರು ಪುತ್ರೇಹ ಮತ್ಪ್ರಿಯಂ ವಿಪ್ರಸಾಕ್ಷಿಕಂ |೧೧೧|

೬. ಸೀತಾಪತಿ ಪ್ರಕರಣ | ಶ್ಲೋಕಾ: [೧೧೨-೧೧೩]

ಹೇ ಸೀತಾಪತಿ ಭಕ್ತೇಶ ಹಾ ತೋಕಂ ಪ್ರತಿ ಮೇ ವದ |
ಹೋಮೇ ವಾ ಜುಹ್ವ ಮದ್ವಾಕ್ಯಂ ಹೂಹೂ ಗಂಧರ್ವ ಗಾನಗಂ |೧೧೨|

ಕಾರ್ಯತ್ರಯಂ ನಷ್ಟಮಾಸೀತ್ ಷಷ್ಠಿಕಾಲ ವ್ರತಂ ಚರೇ |
ಮಮೇಷ್ಟ ಸಿದ್ಧಿಪರ್ಯಂತಂ ಕಷ್ಟಂ ತ್ಯಾಜಯ ಭೋಜ ಹೋ [ಭೋ:] |೧೧೩|

೭. ವೇದನಿಧಿ ಪ್ರಕರಣ | ಶ್ಲೋಕಾ: [೧೧೪-೧೩೩]

ಹೇ ಪುತ್ರ ತವ ಚಾಪ್ತಿಶ್ಚೇತ್ ಶ್ರುತ್ವಾ ಸೀತಾಪತೇರ್ವಚಃ |
ಕಾರ್ಯತ್ರಯಂ ಶಾತ್ರವಾಣಾಂ ನೈವ ಹಾಸ್ಯಾಸ್ಪದಂ ಕುರು |೧೧೪|

ಪಂಚವೃಂದಾವನೇ ಪುಣ್ಯೇ ಪುರಾಣಂ ಪಂಚಲಕ್ಷಣಂ |
ಪಂಚಾಸ್ಯ ವಾಕ್ಯಸಂದಿಷ್ಟಂ ತ್ವಂ ಚ ಕಾರಯ ಭೂರಿಶಃ |೧೧೫|

ನಿರ್ವಿಘ್ನತಃ ಕುರು ತ್ವಂ ಚ ಹ್ಯವಿಘ್ನಂ ತ್ವಗ್ನಿಸನ್ನಿಭಂ |
ಸಂಸಾರಾಗ್ನಿ ಭಗ್ನಾನಾಂ ತದ್ರುಜಾಂ ರುಗ್ಣಕರ್ಮಣಾಂ |೧೧೬|

ಅಹಂ ನಿಮಿಷ ಮಾತ್ರೇಣಾಽನಿಮಿಷೈಸ್ಸಹ ನೈಮಿಷೇ |
ಮನುಷ್ಯಲೋಕಮಾಯುಷ್ಮನ್ ಮನೀಷಾಮಿ ಮುನೀಶ್ವರ |೧೧೭|

ನೈಮಿಷಾರಣ್ಯಗಸ್ಯಾಪಿ ನೋ ವಿಷಾದಸ್ತ್ವಭೂನ್ಮಮ |
ಮನೀಷಿಣಾಂ ಮತಂ ವಕ್ಷ್ಯೇ ಸರ್ವಂ ತವಶೃಣೋಷಿ ಚೇತ್ |೧೧೮|
ಮನೀಷಿಣಾಂ ಮನ:ಸ್ಥಂ ಚ ಭಣೇಽದ್ಯ ಶೃಣು ನಂದನ |
ಗುಣಿನಾಽಪಿ ಸ್ವಪುತ್ರೇಣ ಮುನೀನಾಂ ಸ್ವಾಮಿನಸ್ತವ |೧೧೯|

ಕೃತ್ಯಂ ನ ಕೃತಮಪ್ಯತ್ರ ಚಿತ್ರಂ ಹರಿಕೃತಂ ಬತ |
ಇತಿ ಪೃಚ್ಛಂತಿ ಮಾಂ ನಿತ್ಯಂ ಸತ್ಯಂ ಸತ್ಯಂ ಮಯೋದಿತಂ |೧೨೦|

ಮುನಯೋ ನೈಮಿಷಾರಣ್ಯ ವಾಸಿನೋಪಿ ನಿರಾಶಿನಃ |
ಮಯಿ ಸನ್ಮಾನಿನೋ ನಿತ್ಯಂ ಮುನೇ ತಾನಪಿ ತೋಷಯ |೧೨೧|

ತ್ರಿಭಿಃ ಪುತ್ರಸ್ಯ ಪುತ್ರತ್ವಂ ವಿತ್ತ ಶ್ರುತ್ಯುಕ್ತಮೇವ ಚ |
ಕೃತ್ಯತ್ರಯಂ ತ್ವಮಪ್ಯತ್ರ ಕೃತ್ವಾ ಪುತ್ರತ್ವಮಾಪ್ನುಹಿ |೧೨೨|

ಪುದಿತ್ಯಾಹುಃ ಪೂಯಶೋಣಾದಿ ಭಾಜಂ ವ್ಯಾಜಾನ್ಮಯಾ ನೋಚ್ಯತೇ ಚಾಽತ್ಮ ಜಾದ್ಯ |
ತಸ್ಮಾತ್ ತ್ರಾತಾಪುತ್ರ ಇತ್ಯೇವ ಚಾತ್ರ ಯಃ ಕಥ್ಯತೇ ಸೋಽಪಿ ತ್ವಮೇವ ನಾನ್ಯಃ |೧೨೩|

ಇತ್ಯೇವಂ ಪುತ್ರಶಬ್ಧಾರ್ಥಂ ತ್ವಯ್ಯೇವಾಸ್ತಿ ಸು ಪುತ್ರಕ |
ತತಃ ಕೃತ್ಯತ್ರಯಂ ಮಿತ್ರ ಕುರು ಚಿತ್ರಂ ನ ಚ ತ್ವಯಿ |೧೨೪|

ತಸ್ಮಾತ್ ಕೃತ್ಯತ್ರಯಂ ಪುತ್ರ ಕುರು ಮಿತ್ರ ಮಮಾತ್ರ ತು |
ಪುತ್ರ ಶತ್ರೋಽಸುಮಿತ್ರಸ್ಯ ಮಾಽತ್ರ ತೇ ಸಂಶಯೋ ಭವೇತ್ |೧೨೫|

ಮಮ ಸಂತೋಷಣಾರ್ಥಂ ಚ ಮುನೀನಾಂ ತೋಷಣಾಯ ಚ |
ತವ ಪುಣ್ಯಾರ್ಥಮಪ್ಯತ್ರ ಕುರುಷ್ವ ನಿಪುಣಾದ್ಯ ತತ್ |೧೨೬|

ಏವಂ ಚೇದಹಮೇವಾತ್ರ ಪಿತಾ ತವ ನ ಸಂಶಯಃ |
ತ್ವಮೇವ ಮಮ ಪುತ್ರಶ್ಚ ನಾನ್ಯಃ ಕಶ್ಚನ ವಿದ್ಯತೇ |೧೨೭|

ತುಂಙ್ಗಭದ್ರಾ ನದೀತೀರೇ ಗಂಗಾಸ್ನಾನ ಪರಾಯಣಃ |
ರಙ್ಗನಾಥ ಪ್ರಿಯಾರ್ಥಂ ಚ ಸಾಂಙ್ಗಂ ಕುರ್ಯಾಂ ತಪಸ್ತ್ವಹೋ |೧೨೮|

ತುಂಙ್ಗಭದ್ರಾನದೀಂ ಗತ್ವಾ ಗಂಙ್ಗಾ ಸಂಙ್ಗಾತ್ಸು ಪುಣ್ಯದಾಂ |
ಆಂಙ್ಗನಾಽಸೇವಿತಃ ಸ್ವಾಂಙ್ಗೈಃ ಸಾಂಙ್ಗಂ ಕುರ್ಯಾಂ ತಪಸ್ತ್ವಹೋ |೧೨೯|

ಓಂ ಏತತ್ಸರ್ವಂ ಸ್ವಾಪ್ನಪದ್ಯೇನ ಗರ್ವಂ ಹಿತ್ವಾ ಸರ್ವೇ ವಿಪ್ರವರ್ಯಾಸ್ಯಜೇನ |
ಶೃತ್ವಾ ಚೋರ್ವ್ಯಾಂ ಶರ್ವ ಗುರ್ವಾದಿ ದೇವಾನ್
ದೃಷ್ಟ್ವೋರ್ವಶಿಂ ಯಾಂತು ಮಾಂ ಮಾನವೇಂದ್ರಾಃ |೧೩೦|

ಇದಂ ವೃಂದಾವನಾಖ್ಯಾನಂ ಯೇ ಪಠಂತಿ ಮನೀಷಿಣಃ |
ಮುಕುಂದಾವನಮೇವಾಸ್ತು ತೇಷಾಂ ಕಂದಾಶನಾಜ್ಞಯಾ |೧೩೧|

ಇದಮರ್ಪಿತಮೇವಾಸ್ತು ಹಯಶೀರ್ಷಸ್ಯ ಪಾರ್ಷದಾತ್ |
ಸಮಂ ಸಹಸ್ರಶೀರ್ಷಸ್ಯ ಸೂಕ್ತಸ್ಯ ಪುರುಷಾತ್ ಕೃತಮ್ |೧೩೨|

ಯಚ್ಛ್ರುಣ್ವತಾಂ ಭಕ್ತಿರುದಾರಸದ್ಗುಣೇ ಹರೌ ಹರೇರ್ಲೋಕಗತೇ ತಥಾ ಮಯಿ |
ಭವತ್ಯಹೋ ಸರ್ವಶುಭಾಪ್ತಿಸನ್ಮತೀರ್ ದದಾತ್ಯಜಸ್ರಂ ಸುತ ಸತ್ಯಮೇವ ತತ್ ಓಂ |೧೩೩|

| ಇತಿ ಶ್ರೀಸ್ವಾಪ್ನವೃಂದಾವನಾಖ್ಯಾನೇ ಅಲೌಕಿಕ ವಿಭಾಗೇ
ವೈಭವಪರ್ವಣಿ ಸಪ್ತಮಾಧ್ಯಾಯ: ಸಮಾಪ್ತ: |

| ಶ್ರೀ ಅಶ್ವಿನೀಹಯಗ್ರೀವಾತ್ಮಕ ಕೃಷ್ಣಾರ್ಪಣಮಸ್ತು |

08. Svaapnavrundavanakhyana