06. Svaapnavrundavanakhyana

Composer : Shri Vadirajaru

| ಅಥ ಷಷ್ಠಾಧ್ಯಾಯಃ |

೧. ಶೇಷ ಪ್ರಕರಣಮ್ | ಶ್ಲೋಕಾ: [೧-೪೯]

ಹರಿಃ ಓಂ |

ತಥೈವ ನಂದನೇ ಪುಣ್ಯೇ ವನೇ ನಂದನ ಮಾನಿತಃ |
ಇಂದ್ರಾಣ್ಯೇಂದ್ರೇಣ ಚಾಽನಂದೀ ಮಂದಾಕಿನ್ಯಾಂ ರಮಾಮ್ಯಹಂ |೧|

ತಥಾಽಪರೇಣ ರೂಪೇಣ ಮೇರೌ ನಾರಾಯಣಾರ್ಚಕಃ |
ಸುರಾಣಾಂ ಶರಣೇ ರಮ್ಯೇ ಕರಣೈರ್ಮರಣಾರ್ತಿಭಿಃ |೨|

ಮುಕ್ತೋಯುಕ್ತೊ ಹರೇರ್ಭಕ್ತ್ಯಾ[ಽ] ಶಕ್ತ್ಯಾ ಸೂಕ್ತ್ಯಾ ಚ ಶಕ್ತಿಮಾನ್ |
ಪೃಕ್ತಸ್ತುಷಾರೈರ್ನೇತ್ರೋತ್ಥೈಃ ಪ್ರಾಕ್ ತೃಷ್ಣಾಂ ತ್ಯಕ್ತ ವಾನಹಂ |೩|

ತತ್ರ ಚೈವಂ ಚಿರಂ ರಮ್ಯೇ ರಮಾ ರಮಣ ಸಾರಣೇ |
ಕಾರಣಂ ಚ ವಿನಾಽರೀಣಾಂ ಶರಣಂ ಯಾಮಿಚಾರಣೈಃ |೪|

ಏವಂ ಮೇರೌ ಸದಾರಮೇ ಚಾಽರಾಧನ ಪರಾಯಣಃ
ನಾರಾಯಣಸ್ಯ ಚರಣೇ ಮರಣಾರ್ತಿಂ ಜಹಾಮಿ ಚ |೫|

ತಥೈಕೇನೈವ ಕಾಲೇನ ಕೈಲಾಸೇ ನಿರ್ಮಲಾಚಲೇ |
ಸಾಲವೃಕ್ಷ ಶತಾಲೋಲೇ ಕೋಲಾದಿ ಮೃಗ ಚಂಚಲೇ |೬|

ಪಾಲಿತೇ ಬಾಲ ರೂಪೇಣ ಕಾಲನಂ ಕುರ್ವತಾಂ ಸತಾಂ |
ಲೋಕೇಶ ಪಾಲಕೇನಾಪಿ ಲಾಲಿತೋಽಹಂ ನ ಸಂಶಯಃ |೭|

ಹೇ ನಂದನ ಪುನಃ ಶ್ರೀಮಾನ್ ಮಮಾಽನಂದಪ್ರದೋ ಭವ |
ಮದ್ದಾಸ ಸಂಗೀತ ಸಂಸ್ಥಸತ್ಪದ್ಯಾನಿ ಸದಾ ಶೃಣು |೮|

ಸಂಗೀತಸ್ಯಾಽನುಕೂಲ್ಯೇನ ತ್ವಂಙ್ಗೀ ಕುರು ಪದಾಂತರಂ |
ಪ್ರಸಂಙ್ಗೀ ಕುರು ತಸ್ಯಾರ್ಥಂ ಸಾಂಙ್ಗೀ ಕುರು ಚ ಮತ್ಕೃತಿಂ |೯|

ವಿಪ್ರಸ್ಯ ದೋಷೇಣ ಕಾನಿಚಿತ್ ಪದ್ಯಾನಿ ಮನಾಂಸಿ ನಃ |
ಶಬ್ದಮಾನ ವಿರೋಧೀನಿ ಕೃಣ್ವಂತಿ ಶೃಣು ನಂದನ |
ಅಥಾಪಿ ವಿಪ್ರವರ್ಯಸ್ಯ ದೋಷೋನಾಸ್ತಿ ಶೃಣುಷ್ವ ತತ್ |೧೦|

ಜಾಗ್ರತ್ಕೃತಿಗ್ರಹೇ ವಾಽಪಿ ತ್ವಗ್ರಹೋ ಜಾಯತೇ ಸುತ |
ಸ್ವಾಪ್ನ ಗ್ರಹಣ ಶಕ್ತೌ ಚ ಪಶ್ಯ ವಿಪ್ರ ಚಮತ್ಕೃತಿಂ |೧೧|

ತದಪಿ ಬ್ರಾಹ್ಮಣಸ್ಯಾಸ್ಯ ಮದನುಗ್ರಹತೋಽಭವತ್ |
ಸದನುಗ್ರಹ ಮಾಹಾತ್ಮ್ಯಂ ತ್ವದ್ ಹೃದಿಸ್ಥಂ ಸದಾ ಕುರು |೧೨|

ಅಥ ಚಾನುಸರಾಂಯತ್ರ ಪ್ರಕೃತಂ ಪುತ್ರ ತಚ್ಛೃಣು |
ಕೃಚ್ಛ್ರಾನ್ನಾಸ್ತಿ ಮಮೈವೇಹ ತಥಾ ಚಾಪಿ ನ ಸಂಶಯಃ |೧೩|

ಅಹಮೇಕೇನ ರೂಪೇಣ ಸ್ವರ್ಗೇಽನರ್ಘ್ಯೇ ಣಘರ್ಘರಂ |
ದೀರ್ಘ ಜ್ಞಾನಂ ದಿಶಾಮ್ಯದ್ಧಾ ಗರ್ಗಾದೀನಾಂ ನ ಸಂಶಯಃ |೧೪|

ಯಮೋಽಪಿ ಕಮನೀಯಂ ಮೇ ರೂಪಂ ದೃಷ್ಟ್ವಾ ಮನೋರಮಂ |
ಕಃ ಪುಮಾನೀದೃಷೋಽಸ್ಮಾಕಂ ಲೋಕಂ ನಾಕಂ ತ್ವಮಾಗತಃ |೧೫|

ಇತ್ಯಪೃಚ್ಛತ್ ಪ್ರಚೇತಾಶ್ಚ ಸುಚೇತಾ ಅಪಿ ಕಾಶ್ಚನ |
ಸ್ತ್ರೀಯೋಪ್ಯಾತ್ರೇಯ ಮುಖ್ಯಾಶ್ಚ ಕೋತ್ರ ಸುತ್ರಾಮ ಮಾನಿತಃ |೧೬|

ತದಾಽಪಿ ಕಮನೀಯಂ ಮೇ ರೂಪಂ ದೃಷ್ಟ್ವಾ ಮನೋಭವಂ |
ಮೇನೇ ರತಿಃ ಸ್ವಭರ್ತಾರಂ ಕಾಮಾರ್ತಾ ರೂಪ ಸಂಪದಾ |೧೭|

ಏವಂ ಸ್ತ್ರಿಯಶ್ಚ ಸರ್ವಾಸ್ತಾಃ ಉರ್ವಶ್ಯಾದ್ಯಾಃ ಸು ಗರ್ವಿತಾಃ |
ಗುರ್ವಾದಿಷ್ಟಾಸ್ತು ಸ್ವಾವಿಷ್ಟಾಃ ಪ್ರಹೃಷ್ಟಾ ರೂಪ ಸಂಪದಾ |೧೮|

ವಾಸಿಷ್ಟಾನಥ ದೃಷ್ಟ್ವಾ ತಾಃ ಪೃಷ್ಟಾಃ ಕಾಮೇನ ತುಷ್ಟಿದಾಃ |೧೯|

ಅಷ್ಟಾಧ್ಯಾಯಾತ್ಮಕಂ ಚೈತತ್ ಕಷ್ಟಾನ್ ಪರಿಹರಿಷ್ಯತಿ |
ಕಾಷ್ಠಾಂತೇ ಕುರ್ವತಾಂ ಖ್ಯಾತಿಂ ಶಿಷ್ಟಾನಾಮಿಷ್ಟದಂ ಸುತ |೨೦|

ರಾಮೋಽಪಿ ತತ್ರ ಮಾಂ ದೃಷ್ಟ್ವಾ ಕಾಮೇನ ರಹಿತಂ ಮುನಿಂ |
ಸು ಮನೋಹರ ಮೇ ನಿತ್ಯಂ ಭೃತ್ಯೋ ಭವ ಸಮೀಪಗಃ |
ಇತಿ ಮಾಮುಕ್ತವಾನ್ ಸೂಕ್ತಂ ಸ್ವಪಾದೇ ಚಾಮಪದಾಽಽತ್ಯಜತ್ |೨೧|

ಏವಂ ಯಮ ಸಭಾ ಮಧ್ಯೇ ಸಮವರ್ತೀ ಸು ವಿಸ್ಮಿತಃ |
ಕುಮಾರಾಭಂ ಚ ಮಾಂ ದೃಷ್ಟ್ವಾ ಸ ಮಾರೋಽಪಿ ಸುಲಜ್ಜಿತಃ |೨೨|

ನರಕೇ ಪರಕೀಯಾಶ್ಚ ಸುರಕಾರ್ಯ ವಿವರ್ಜಿತಾಃ |
ಸ್ವಕೀಯಾ ಅಪಿ ಪಾಕೀಯಾಃ ಪ್ರಕೀರ್ಯ ಮಮ ಪೂಜನಂ |೨೩|

ಶರಣಂ ಮರಣಾತೀತಂ ಕರುಣಾಕರ ಮಂಜಸಾ |
ತರಣಿಂ ಮೋಹ ಸರಣೇಃ ಸ್ಫುರಣಂ ಕರಣಂ ಚ ಮಾಂ |೨೪|

ಆಗತಾಃ ಸ್ವಾಗತೋಕ್ತ್ಯಾ ಚ ಕಾ ಗತಿಃ ಪಾಪಿನಾಮಿಹ |
ಇತ್ಯಪೃಚ್ಛನ್ ಸ್ವಚ್ಛ ತತ್ವಂ ಕುತ್ಸಿತಂ ಕರ್ಮ ತತ್ಯಜುಃ |
ಕ್ರಕಚಚ್ಛೇದನಂ ಚಾಪಿ ಛಿತ್ವಾ ಸರ್ವೇ ದಿವಂ ಯಯುಃ |೨೫|

ಇತ್ಯೇವಂ ನರಕೋತ್ತಾರಂ ತ್ರಾತಾರಂ ಸರ್ವ ಸಜ್ಜನಾನ್ |
ಶ್ರುತ್ವಾ ಹಿತ್ವಾ ತು ಕಾಮಾರ್ತಿಂ ನರಕಂ ಯಾಂತು ಮತ್ಪದಂ |೨೬|

ಮಮ ಸ್ವಪ್ನೇ ತವ ಸ್ವಪ್ನೇ ಚಾಸ್ಯ ಸ್ವಪ್ನೇ ವದತ್ವಯಂ |
ತರ್ಹಿ ವಿಪ್ರಸ್ಯ ತತ್ಸ್ವಪ್ನಂ ಸತ್ಯಂ ಲೋಕೇ ಭವಿಷ್ಯತಿ |೨೭|

ಇತ್ಯವಿಶ್ವಾಸತಃ ಪುತ್ರ ಯೇ ವದಂತಿ ಕುಬುದ್ಧಯಃ |
ತೇಷಾಂ ಶಾಪಾನ್ ಪ್ರದಾಸ್ಯಾಮಿ ದಾಸಾನಾಮಪಿ ಶಾಶ್ವತಾನ್ |೨೮|

ಕುತೋ ವಕ್ಷ್ಯೇ ಭವತ್ಸ್ವಪ್ನೆ ಮೃತಿಂ ಮಾ ಯಾ ಸ್ವಪಾತಕಿನ್ |೨೯|

ಸುತಂ ಮೆಽಕುಮತಿಂ ಪ್ರೇತ ವೃಥಾ ಪ್ರೇರಿತವಾನಸಿ |
ಶ್ರದ್ಧಾಽಹೀನಂ ಕುಬುದ್ಧೇ ತ್ವಂ ವೃದ್ಧಂ ತ್ಯಾಜಿತವಾನಸಿ |೩೦|

ಸರ್ವಜ್ಞೋಽಹಂ ನ ಸಂದೇಹಃ ಕುಮತಿಜ್ಞೋ ದುರಾತ್ಮನಾಂ |
ಸುಮತಿಜ್ಞಃ ಸತಾಂಚಾಪಿ ತತ್ವಜ್ಞೋಽಹಂ ವಿಶೇಷತಃ |೩೧|

ಸರ್ವತ್ರ ತವ ವಿಶ್ವಾಸೋ ಹೃವಿಶ್ವಾಸಃ ಕುತೋಽತ್ರ ತು |
ಅವಿಶ್ವಾಸೋಽತ್ರ ತೇ ಸಮ್ಯಕ್ ಯದಿ ವಾ ತರ್ಹಿ ಸರ್ವತಃ |೩೨|

ಅವಿಶ್ವಾಸೋ ಭವತ್ಯೇವ ತವ ಸತ್ಯಂ ಮಯೋದಿತಂ |
ವಿಶ್ವಾಸಸ್ತತ್ರ ಚೇತ್ ಪುತ್ರ ಹ್ಯವಿಶ್ವಾಸಃ ಕುತೋತ್ರ ತು |೩೩|

ಸರ್ವೇ ಮಯೋಕ್ತಾಃ ಶ್ಲೋಕಾಸ್ತೇ ಶೋಕ ಮೂಲಸ್ಯ ನಾಶಕಾಃ |
ಕಾಕವಾಕ್ಯಾನೀವ ಪುತ್ರ ಮಾ ಕುರು ತ್ವಂ ಪರೇರಿತಃ |೩೪|

ವಿಪ್ರೋಽಯಂ ಮಮ ಸದ್ಬುದ್ಧ್ಯಾ ಶುದ್ಧಾಂತಃಕರಣೋಽಭವತ್ |
ಶ್ರದ್ಧಾ ಯುಕ್ತೋ ಮಯೋಕ್ತೇ ತು ವೃತ್ತಿಂ ಯಾಂಚಾಂ ಕರಿಷ್ಯತಿ |೩೫|

ಯಾವದೀಶ್ವರದತ್ತಂ ವೈ ತಾವತೈವ ಸುಖೀ ಭವೇತ್ |೩೬|

ಮತ್ಪ್ರೇರಣಾಬಲಂ ಪಶ್ಯ ಬ್ರಾಹ್ಮಣೇ ಪುಣ್ಯಕೀರ್ತನ |
ಕಾರಣಂ ಚ ಋಣಾನ್ಮುಕ್ತೌ ಮತ್ಕಾರುಣ್ಯಂ ವಿನಾ ನ ಹಿ |೩೭|

ಏವಂ ಕೃತೇಹ್ಯವಿಶ್ವಾಸೇ ಹ್ಯಲಮೇತಾವತಾ ಸುತ |
ಕೃತೇನ ಮಮ ಸತ್ಪುತ್ರ ಸ್ವಸ್ತಿ ತೇಽಸ್ತು ಕುತೋಽಶುಭಂ |೩೮|

ವಿಪ್ರ ಪ್ರಣಾವಧಿರ್ಯಾವದಿತ್ಯುಕ್ತಂ ಪುಣ್ಯರೂಪಿಣಾ |
ಕಣ್ವಾದಿ ಮುನಿ ಮಧ್ಯೇ ತು ಶೃಣ್ವದ್ಯ ಮಮ ಮಾನಸಂ |೩೯|

ಸ್ವರ್ಗಾಗಮನ ಪರ್ಯಂತಮುತ್ಸರ್ಗೋಽಯಂ ನ ಸಂಶಯಃ |
ನಿರ್ಗತೋದ್ಯ ಭವಾಮ್ಯದ್ಧಾ ವಾಕ್ಸರ್ಗಾದಪವಾದತಃ |೪೦|

ಯಥಾ ಗಚ್ಛನ್ ಗಜಃ ಶೀಘ್ರಂ ಗೋಕ್ಷುರಾದ್ಯಪವಾದತಃ |
ನ ಗಚ್ಛತಿ ಪುನಃ ಶೀಘ್ರಂ ದುರ್ವಾದಿ ಗಜಸಿಂಹ ಭೋ |೪೧|

ತಥಾಽಹಂ ಅಪವಾದೇ ತು ನಿರ್ವೃತ್ತೋ ವಾಗ್ವಿಸರ್ಗತಃ |
ಅತ್ರಾಪವಾದಕಃ ಪುತ್ರ ಹ್ಯವಿಶ್ವಸೋಽಸ್ಮದೀಯಕಃ |೪೨|

ತಸ್ಮಾತ್ ಪ್ರತಿಜ್ಞಾಹಾನ್ಯಾದಿ ದೋಷೋ ಮಮ ನ ಕಶ್ಚನ |
ಕದಾಚಿದೇವ ವಕ್ಷ್ಯಾಮಿ ಕಾರ್ಯೇ ತು ಪ್ರಸ್ತುತೇ ಸತಿ |
ಇತಿ ಪೂರ್ವಂ ಮಯಾ ಪ್ರೋಕ್ತಮನುಸಂಧತ್ಸ್ವ ಬುದ್ಧಿಮನ್ |೪೩|

ಮಮೇಹ ತ್ರೀಣಿ ರೂಪಾಣಿ ಶಿಷ್ಟಾನಿ ತುಷ್ಟಾನಿ ಚ |
ಮತ್ಪುತ್ರೇಕೃತ ಪಾಂಡಿತ್ಯೇ ವಿಪ್ರೇ ವೃಂದಾವನೇ ಸದಾ |೪೪|

ಯಥಾ ವಾಯುಸ್ತವಾಽಯುಷ್ಯ ವೃದ್ಧಯೇ ವರ್ತತೇ ತ್ವಯಿ |
ತಥಾಹಂ ವರ್ತಯಾಮ್ಯತ್ರ ವಿಪ್ರೇ ಪುತ್ರ ನ ಸಂಶಯಃ |೪೫|

ಯೇ ಶುದ್ಧ ವೃದ್ಧ ವಿಪ್ರೋಽಯಂ ಅತಿ ಮುಗ್ಧಃ ಸ್ವಕಾರ್ಯತಃ |
ಕ್ರುದ್ಧಸ್ತ್ವಂ ಮಾ ಭವಸ್ವಾದ್ಯ ಶ್ರದ್ಧಾಯುಕ್ತೋ ಬುಧೇ ಮಯಿ |೪೬|

ಸತ್ಯಂ ವಚ್ಮಿ ಹಿತಂ ವಚ್ಮಿ ಸುತ ವಚ್ಮಿ ಪುನಸ್ತವ |
ವಿಪ್ರೋಯಂ ವರ್ತತೇ ವೃತ್ತಿಂ ಕುತ್ರ ಯಾಸ್ಯತಿ ಮತ್ಪ್ರಿಯಃ |೪೭|

ವಿಧವಾ ಶ್ರುತ ತೇಽದ್ಯೈವ ವಿಧಿಶ್ಚ ವಿಮುಖೋ ಭವೇತ್ |
ದ್ವಿಜಕಾರ್ಯತಮ ದ್ರೋಹಾತ್ ದ್ವಿಜಕಾರ್ಯವಿರೋಧಿನಃ |೪೮|

ಸುಖಿನಃ ಸಂತು ಮದ್ಭಕ್ತಾಃ ಶಶ್ವಜ್ಜೀವಂತು ಮತ್ಪ್ರಿಯಾಃ |
ಅತಿಸೌಭಾಗ್ಯ ವಂತಶ್ಚ ಸಂತು ಭಕ್ತಿಯುತಾ ಹರೌ |೪೯|

೨. ವಿಪ್ರ ಪ್ರಕರಣಮ್ | ಶ್ಲೋಕಾ: [೫೦-೫೮]

ಮಮ ವೃಂದಾವನೇ ಪುಣ್ಯೇ ಕಮನೀಯಂ ತು ಮಾಂ ಸ್ಮರ |
ಶ್ರಮಹಾರಿಣಮಜ್ಞಾತ್ವಾ ಸುಮನಾಸ್ತ್ವಂ ನ ಗಚ್ಛ ಹ |೫೦|

ಏವಂ ಬುದ್ಧೌ ಸದಾಶುದ್ಧ ಶ್ರದ್ಧಾಂ ಕುರು ಧಿಯಾ ತವ |
ಕ್ರೋಧಂ ತ್ಯಜ ದ್ವಿಜಾದ್ಯೈವ ಭಜ ಮಾಂ ಭುಜಗೇಶ್ವರಂ |೫೧|

ಅಹಂ ತವಾಹಿತಂ ನೈವ ವಚ್ಮಿ ಕಿಂಚನ ಕಾಚನ |
ವ್ಯಥಾ ತೇ ಮಾಽಸ್ತು ನಾಸ್ತೀತಿ ಗುರು ದೈವಂ ವದಂತಿ ತೈಃ |೫೨|

ಮತ್ಸುತಸ್ಯ ಸುವಿಶ್ವಾಸಂ ಪಶ್ಯ ತ್ವಂ ವಿಪ್ರಸತ್ತಮ |
ಸೀತಾಪತೇಶ್ಚ ಭಕ್ತಸ್ಯ ವ್ಯಾಸ ಶೇಷಸ್ಯ ಚೈವಹಿ |೫೩|

ಚತುರ್ಣಾಮಪಿ ವಿಶ್ವಾಸೇ ಸ್ವರ್ಣಲಾಭಂ ಯಥಾ ತಥಾ |
ಕರ್ಣಶ್ರಾವ್ಯಂ ಭವತ್ಯೇವ ವರ್ಣಾತ್ಮಕಮಿದಂ ವಚಃ |೫೪|

ಮತ್ಪ್ರೇರಿತಾಃ ಸುವಿಶ್ವಾಸಂ ಕುರ್ವಂತ್ಯೇತೇ ನ ಸಂಶಯಃ |
ಪಶ್ಯಂತಿ ವಿಶ್ವಾಸ ಫಲಮೈಹಿಕಾಮುಷ್ಮಿಕಂ ಚ ಯತ್ |೫೫|

ವರ್ಣಾತ್ಮಕಮಿತಿ ಪ್ರೋಕ್ತಂ ಕರ್ಣೇನ ಶೃಣು ನಂದನ |
ಸ್ವರ್ಣವರ್ಣ ಶಿಲಾಯಾಂ ಮೇ ಚೀರ್ಣೇನ ಲಿಖಿತಂ ಕುರು |೫೬|

ವರ್ಣಾನಾಂ ಬ್ರಾಹ್ಮಣಾದ್ಯಾನಾಂ ಕರ್ಣಶ್ರಾವ್ಯಂ ತಥಾ ಕುರು |
ಸ್ವರ್ಣಲಾಭಾಯ ತೇ ಪುತ್ರ ಶರ್ಮಣೇ ಚ ಸದಾ ತವ |೫೭|

ಸತ್ಯಂ ಸತ್ಯಂ ಪುನಃ ಸತ್ಯ ಮುದ್ದೃತ್ಯ ಭುಜಮುಚ್ಯತೇ |೫೮|

೩. ವೇದನಿಧಿ ಪ್ರಕರಣಮ್ | ಶ್ಲೋಕಾ: [೫೯-೬೫]

ಶಸ್ತಂ ಶಸ್ತಂ ಕುರು ಕ್ಷಿಪ್ರಂ ವಿಪ್ರಸ್ಯ ನ ಮೃಷಾವಚಃ |೫೯|

ಶೀಘ್ರೇಣಾಹಂ ತು ಗಚ್ಛಾಮಿ ವ್ಯಾಘ್ರಾದಿ ಭಯ ಕಂಪಿತಾ |
ಪ್ರಾಗ್ರ್ಯಾಽಥ ಗೌರ್ಯಥಾಽರಣ್ಯೇ ಸ್ವಾಗ್ರ್ಯಾಂ ಮೂರ್ತಿಂ ಭಜಾಮಿ ತಾಂ |೬೦|

ಅವಿಶ್ವಾಸೇನ ಸರ್ವೇಷಾಮುರ್ವ್ಯಾಮತ್ಯಂತ ಪಾಪಿನಾಂ |
ತೇಷಾಮಾಕರ್ಷಣಂ ಕಾಲೇ ಯಮದೂತೈಶ್ಚ ಕಾರಯನ್ |೬೧|

ತಸ್ಮಾನ್ನರವರಶ್ರೇಷ್ಠ ಪ್ರೇಷ್ಠ ಮೇ ಸರ್ವದಾ ಮಠೇ |
ಬುದ್ಧಿಸೌಷ್ಟವ ಸಂಯುಕ್ತಾನ್ ಶ್ರೇಷ್ಠಾನಂಙ್ಗೀ ಕುರು ಸ್ಫುಟಂ |೬೨|

ಇಯಂ ತವ ಶುಭಾಬುದ್ಧಿಃ ಕಿಯಂತಃ ಕುಜನಾ ಭುವಿ |
ನಯಂತೋ ನರಕಾವಾಸಂ ಸ್ವಯಂ ತೇಽಪಿ ಪತಂತ್ಯಹೋ |೬೩|

ಕವಿತಾ ಬ್ರಾಹ್ಮಣೇ ನಾಸ್ತಿ ಸವಿತಾ ವೇತ್ತಿ ಸರ್ವಥಾ |
ಭವಿತಾಽಥಾಪಿ ಲೋಕೋಽಯಮಯುತಂ ಶರದಾಂ ಶತಂ |೬೪|

ಮಯಾಂಗೀಕೃತ ವಿಪ್ರೋಯಂ ಪ್ರೇತ್ಯ ಪುತ್ರ ಸುಖೀ ಭವೇತ್ |
ಕಾಽತ್ರ ಹಾನಿಃ ಕೃತಾ ಚಾಸ್ಯ ಪರೈರ್ಹಾಸ್ಯೇ ಕೃತೇಽಪ್ಯುತ |೬೫|

೪. ವಿಪ್ರ ಪ್ರಕರಣಮ್ | ಶ್ಲೋಕಾ: ೬೬

ಬ್ರಾಹ್ಮಣಾಧಮ ಮದ್ವಾಣೀಂ ನಿರ್ಗುಣಾನ್ ಪ್ರತಿ ಮಾ ಭಣ |
ಗುಣಿನಾಂ ಭಣ ಸದ್ವಾಣೀಂ ನೋ ಚೇತ್ ಪ್ರಾಣಾನ್ ವೃಣೋಮಿ ತೇ |
ಕಾಣ ಕಾಣ ಗುಣೈರ್ಹಿನೋಪ್ಯಣ್ವೇ ಕುರು ಕುಮಾನವಂ |೬೬|

೫. ವೇದನಿಧಿ ಪ್ರಕರಣಮ್ | ಶ್ಲೋಕಾ: [೬೭-೧೦೫]

ಮತ್ಸನ್ನಿಧಾನೇ ಸತಿ ನಂದನಾಗ್ರ್ಯ ವೃಂದಾವನೇ ಸುಂದರ ಮಂದರಾಭೇ |
ಕಂದಾಶನೇಂದ್ರೈ: ಸಹ ಚೇಂದ್ರಿಯೇಶೋ ವೀಂದ್ರಾದಿ ದೇವೈರಪಿ ಸನ್ನಿಧತ್ತೇ |೬೭|

ಮಯಿ ಗಚ್ಛತಿ ಸತ್ಪುತ್ರ ದೇವೈಃ ಸಹ ಮುನೀಶ್ವರೈಃ |
ಪರಿಗಚ್ಛತಿ ಸ್ವಚ್ಛಂದೋಽಪ್ಯನೇಕಾತ್ಮ ಸುಮೂರ್ತಿಭಿಃ |೬೮|

ಅನ್ವಯವ್ಯತಿರೇಕಾನುವಿಧಾಯಿತ್ವೇನ ತಸ್ಯ ಮೇ |
ಕಸ್ಯ ಚೇದೃಶ ಮಾಹಾತ್ಮ್ಯಂ ಪಶ್ಯ ಲೋಕೇ ಸುಚಕ್ಷುಷಾ |೬೯|

ತಸ್ಮಾದ್ ವಿಶ್ವಾಸತಃ ಪುತ್ರ ಯಾಸ್ಯಂತಂ ಸ್ಥಾಪಯಾಽಶು ತಂ |
ಸೇಶ್ವರಂ ಭಾಸ್ವರಂ ಮೂರ್ತಿಂ ಕಾರ್ತಸ್ವರ ಸಮಾಕೃತಿಂ |೭೦|

ಅವಿಶ್ವಾಸೇ ಪ್ರಯಾಸ್ಯಾಮಿ ಸುವಿಶ್ವಾಸೇ ವಸಾಮ್ಯಹಂ |
ತವ ಶ್ವಾಸ ಪ್ರಣೇತಾಹಂ ಭವಿಷ್ಯಾಮಿ ನ ಸಂಶಯಃ |೭೧|

ತಸ್ಮಾದಾಯುಷ್ಯ ವೃದ್ಧಯೈ ತೇ ಶುದ್ಧ ವಿಶ್ವಾಸ ಸಂಸ್ಥಿತಿಮ್ |
ಕುರು ಶ್ರದ್ಧಾಯುತೋ ನಿತ್ಯಂ ಕೋಽದ್ಧಾ ವಕ್ತಾ ಚ ಮಾಂ ವಿನಾ |
ಸಹೋದರಂ ಚ ಹಿತ್ವಾಽಪಿ ಕವಿಃ ಸ್ಯಾಂ ತ್ವನ್ಮುಖೇ ಸದಾ |೭೨|

ಏತಚ್ಛ್ರುತ್ವಾ ರಹಸ್ಯಂ ಮೇ ಪರಸ್ಯ ಸು ಯಶಸ್ವಿನಃ |
ವಿಪ್ರಸ್ಯ ಶಶ್ವದುಕ್ತ್ಯಾ ಚ ವಿಶ್ವಾಸಂ ಕುರು ಮತ್ಕೃತೌ |೭೩|

ದುರ್ವೀಕರೋ ಗರ್ವಿತೋಽಪಿ ಗರವೀರ್ಯೇಣ ಗಾರುಡೈಃ |
ಗಾಂ ಗತೋಽಪಿ ನ ಗಂತಾ ಚ ಸ್ವರ್ಗತಿಂ ಸೌಗತೋ ಯಥಾ |೭೪|

ತಥೈವ ತವ ವಿಶ್ವಾಸಃ ವಿಶ್ವಸ್ತಃ ಪ್ರಸ್ತುತಾಂ ಗತಿಂ |
ಹಿತ್ವಾ ಶಸ್ತಾಂ ಪ್ರಾಪ್ಯ ಪೂಜಾಂ ತ್ವತ್ಕೃತಾಂ ಸಂಸ್ಥಿತೋಭವಂ |೭೫|

ತವಾಽದರಾಖ್ಯ ರೋಧೇನ ಪ್ರತಿರುದ್ಧೋ ಭವಾಮಿ ಚ |
ತ್ವದಾರಾಧಿತ ಪಾದಾಬ್ಜಃ ಸುಧಾಸಾಗರ ಗೋ ಯಥಾ |೭೬|

ಅಭವಂ ಶುಭಮೇವ ತ್ವಮಭಯಂ ಚಾಪಿ ಮದ್ಭವ |
ಲಭ ಮೆ ಭವ ಸಂಪ್ರೀತಿಭಾಜೋ ಭವ್ಯಭವೇಷು ಚ |೭೭|

ಇತಃ ಪರಂ ಪರೈರುಕ್ತಾಂ ರಿಕ್ತಾಂ ವಿಶ್ವಾಸತಃ ಕೃತೌ |
ನ್ಯತ್ಕೃತಾಂ ತರ್ಕಿತಾಂ ಸದ್ಭಿಃ ಸ್ವೀಕೃತಾಂ ನ ಕುರು ಪ್ರಿಯ |೭೮|

ಕಾಕೋದರೋ ಯಥಾ ಲೋಕೇ ತೋಕೋದರ ಪ್ರಪೂರಣಂ |
ಭೇಕೋದರ ಗತಾಂ ತ್ರೈರ್ವಲ್ಮೀಕೋದರ ಗತೋಽಪಿಸನ್ |೭೯|

ಕುರುತೇ ನಿರತಸ್ತಚ್ಚ ಸ್ಮರತೇ ಹರತೇ ನರೈಃ |
ಹರನ್ ತು ತ್ವರತೇ ರಂತುಂ ಪುರತೇ ಕ್ರಿಯತೇ ಚ ಸಃ |೮೦|

ತದ್ವತ್ ಖಲೋಽಪಿ ಮಲಭಾಂಡ ಮಜಾಂಡಕೋಶೇ
ಸ್ವಸ್ಯೋದರಂ ತು ತರತೇ ಪರಪೀಡನಾಚ್ಚ |
ನಿತ್ಯಂ ಕಲತ್ರರತಿಮಾನ್ ಭವತೀಹ ಪುತ್ರ
ಪ್ರಾಣಾನ್ ಪರಸ್ಯ ಹರತೇ ನರಕೇ ಚರಿಷ್ಯನ್ |೮೧|

ಅಪ್ರಾಕೃತಂ ಪ್ರವಕ್ಷ್ಯಾಮಿ ವಿಪ್ರಾಂತರ ಮುಖೇನ ಚ |
ಸುಪ್ರಾಕೃತಮನೇನೈವ ಸಂಪ್ರಾರ್ಥಯ ಸುತಾಶು ಮಾಂ |೮೨|

ಶಿಷ್ಟಾನಿ ತುಷ್ಟಾನಿ ಚೇತಿ ವರ್ಣ ನ್ಯೂನತ್ವತಃ ಸುತ |
ಸನ್ನಿಧಾನಸ್ಯ ನ್ಯೂನತ್ವಂ ಕ್ರಮಾಜ್ಜಾನೀಹಿ ಮಾನವ |೮೩|

ವೃಂದಾವನೇ ಯಾದೃಶಂ ತು ತಾದೃಶಂ ನಾಸ್ತಿ ನಂದನೇ |
ನಂದನೇ ಯಾದೃಶಂ ಧೀಮನ್ ತಾದೃಶಂ ನಾಸ್ತಿ ಬ್ರಾಹ್ಮಣೇ |೮೪|

ಅಧಿಷ್ಠಾನಸ್ಯ ಮಾಹಾತ್ಮ್ಯಂ ದಾತುಂ ವೃಂದಾವನೇ ಸದಾ |
ವೃಂದಾರಕೇಂದ್ರ ಸಂದಿಷ್ಟೋ ಮಂದಸ್ಮಿತ ವಸಾಮ್ಯಹಂ |೮೫|

ತ್ವಯಿ ಸಚ್ಛಾಸ್ತ್ರವಕ್ತಾ ಚ ವ್ಯಕ್ತಂ ವ್ಯಕ್ತಿ ಮತಾಂ ವರ |
ತ್ಯಕ್ತ್ವಾ ಸರ್ವಾಣಿ ಕೃತ್ಯಾನಿ ಭೃತ್ಯಾನ್ನಗ್ರಹ ಕಾತರಃ |೮೬|

ವಾಸಾಮಿ ಮನಸಾ ಶ್ರೀಮನ್ ದಾಸೋ ವ್ಯಾಸಸ್ಯ ಶಾಸನಾತ್ |
ಶ್ವಾಸರೂಪೇಣ ಚಾಽವಾಸಃ ಶ್ರೀಶಸ್ಯಾಪಿ ಭವಾಽಶು ಚ |೮೭|

ಶಾಸ್ತ್ರಾರ್ಥಜ್ಞ ಕೃತಾರ್ಥಂ ಮಾ ತ್ರಾತಾ ತ್ವಂ ಸರ್ವದಾಽತ್ರ ತು |೮೮|

ಕುಬೇರೋಽಪ್ಯಥ ಮಾಂ ದೃಷ್ಟ್ವಾ ಸಭೇರೀರವ ಆದರಾತ್ |
ಗಂಭೀರ ಸ್ತೋತ್ರ ಸನ್ನಾದ ಸಭೀರು: ಸನ್ನುಪಾಗತಃ |೮೯|

ಗೃಣ್ಹನ್ ಪಾಣಿಂ ಗುಣಿನ್ ಧೀಮನ್ ಮಣಿಕೀರ್ಣಾನಿ ಮಾನವ |
ದದೌ ಚಾಽಭರಣಾನ್ಯಾಶು ಚರಣೇ ಮಣಿರಾಶಿಕಂ |೯೦|

ಸ್ವಗೃಹಂ ವೇಶಯಾಮಾಸ ಸಗೃಣ್ಹನ್ನೇವ ಮೇ ಕರಂ |
ಪ್ರಗೃಹೀತ ಮತಿಪ್ರೇಮ್ಣಾ ಜಗೃಹೇ ಮಮ ಪಾದುಕೆ |೯೧|

ಕುಬೇರಸ್ತ್ವಥ ಮಾಂ ದೃಷ್ಟ್ವಾ ಸುವೀರ್ಽಓಪಿ ಸುವಿಸ್ಮಿತಃ |
ತ್ರಯೀ ವಿರೋಧಿನಂ ಹತ್ವಾ ಕವೀಶ್ವರಮುಪಾಗತಂ |೯೨|

ಯಥಾ ಕರೋತಿ ವೇದಸ್ಯ ನಿರ್ಭಯಂ ಭಾರತೀಪತಿಃ |
ತಥಾ ಕರೋಷಿ ಲೋಕೇಶ ಪ್ರೀತಿಂ ಸಾಧಿತವಾನಸಿ |೯೩|

ಇತಿ ಮಾಮುಕ್ತವಾನ್ ಭಕ್ತ್ಯಾ ಮತ್ಕೃತಿ ಸ್ಮೃತಿಮಾತ್ರತಃ |
ತ್ಯಕ್ತವಾನ್ ಸರ್ವಕೃತ್ಯಾನಿ ಶ್ರುತ್ವಾ ತತ್ವಾನಿ ಮೇ ಸುತ |೯೪|

ಅಹಂ ನಿಮಿಷ ಮಾತ್ರೇಣಾನಿಮಿಷೈ: ಸಹಿತೋಽಗಮಂ |
ಪಶ್ಯತಾಮೇವ ಸರ್ವೇಷಾಂ ಪಾಶಿನೋ ಲೋಕಮಾಗತಃ |೯೫|

ಪ್ರಚೇತಾ ಅಪಿ ಮಾಂ ದೃಷ್ಟ್ವಾ ಸುಚೇತಾಶ್ಚ ವಿಪಶ್ಚಿತಂ |
ಕುಚೆತಾಶ್ಚಾಽಗತಃ ಪಶ್ಚಾತ್ ಸ್ವಚ್ಛಂ ಯಾಚಿತವಾನ್ ಮಯಾ |೯೬|

ಜ್ಞಾನಂ ಭಾನು ನಿಭಂ ಮೌನಿನ್ ಮಾನೇನ ಸಹಿತಂ ಶನೈಃ |
ಅನಂತಾನಂತ ಮಾಹಾತ್ಮ್ಯ ಸೂಚನಂ ಲೋಚನಂ ಯಥಾ |೯೭|

ಕಾಂಚನೇನಾಂಚನಂ ಕುರ್ವನ್ ಮಾಂ ಛನ್ನಂ ಪಾಪಿನಾಮಿಹ |
ಲಾಂಛನೈಃ ಪ್ರಾಂಚಿತಂ ಜಾನನ್ ವಾಂಛಿತಂ ಚಾಽಪ್ತವಾನ್ ಮಯಾ |೯೮|

ತದಾದರೇಣ ಸರ್ವೇಽಪಿ ಗರ್ವಿತಾ ಅಪಿ ಚರ್ವಿತಂ |
ದರ್ವೀಕರಪತಿಂ ಪರ್ವಣ್ಯಾಪ್ತಾಃ ಸ್ವರ್ವಾಸಿನಶ್ಚ ಯೇ |೯೯|

ಸಾಧು ಸಧ್ವಿತಿ ಸಂಭಾಷ್ಯ ಜಗೃಹುರ್ದರ್ಶನಂ ಚ ಮೇ |
ಸ್ವಾದು ಸ್ವಾದು ಪದೈರ್ದಿವ್ಯೈರ್ಮಧುರೋಕ್ತಿ ಸಮನ್ವಿತಮ್ |೧೦೦|

ಏವಂ ಜ್ಞಾನೋಪದೇಶಂ ಚ ಮಾನವಾಂತಕ ಸನ್ನಿಧೌ |
ದಾನವಾ ಅಪಿ ತಚ್ಛ್ರುತ್ವಾ ಸ್ತುವಂತೋ ಮಾಂ ದಿವಂ ಯಯುಃ |೧೦೧|

ಓಂ ಏತತ್ಸರ್ವಂ ಸ್ವಾಪ್ನಪದ್ಯೇನ ಗರ್ವಂ ಹಿತ್ವಾ ಸರ್ವೇ ವಿಪ್ರವರ್ಯಾಸ್ಯಜೇನ |
ಶೃತ್ವಾ ಚೋರ್ವ್ಯಾಂ ಶರ್ವ ಗುರ್ವಾದಿ ದೇವಾನ್
ದೃಷ್ಟ್ವೋರ್ವಶಿಂ ಯಾಂತು ಮಾಂ ಮಾನವೇಂದ್ರಾಃ |೧೦೨|

ಇದಂ ವೃಂದಾವನಾಖ್ಯಾನಂ ಯೇ ಪಠಂತಿ ಮನೀಷಿಣಃ |
ಮುಕುಂದಾವನಮೇವಾಸ್ತು ತೇಷಾಂ ಕಂದಾಶನಾಜ್ಞಯಾ |೧೦೩
|
ಇದಮರ್ಪಿತಮೇವಾಸ್ತು ಹಯಶೀರ್ಷಸ್ಯ ಪಾರ್ಷದಾತ್ |
ಸಮಂ ಸಹಸ್ರಶೀರ್ಷಸ್ಯ ಸೂಕ್ತಸ್ಯ ಪುರುಷಾತ್ ಕೃತಮ್ |೧೦೪|

ಯಚ್ಛ್ರುಣ್ವತಾಂ ಭಕ್ತಿರುದಾರಸದ್ಗುಣೇ ಹರೌ ಹರೇರ್ಲೋಕಗತೇ ತಥಾ ಮಯಿ |
ಭವತ್ಯಹೋ ಸರ್ವಶುಭಾಪ್ತಿಸನ್ಮತೀರ್ ದದಾತ್ಯಜಸ್ರಂ ಸುತ ಸತ್ಯಮೇವ ತತ್ ಓಂ |೧೦೫|

| ಇತಿ ಶ್ರೀಸ್ವಾಪ್ನವೃಂದಾವನಾಖ್ಯಾನೇ ಅಲೌಕಿಕ ವಿಭಾಗೇ
ವೈಭವಪರ್ವಣಿ ಶಷ್ಠಾಧ್ಯಾಯ: ಸಮಾಪ್ತ: |

| ಶ್ರೀ ಅಶ್ವಿನೀಹಯಗ್ರೀವಾತ್ಮಕ ಕೃಷ್ಣಾರ್ಪಣಮಸ್ತು |

07. Svaapnavrundavanakhyana