14. Svaapnavrundavanakhyana

Composer : Shri Vadirajaru

| ಅಥ: ಚತುರ್ದಶಾಧ್ಯಾಯ: |

೧. ಸೀತಾಪತಿ ಪ್ರಕರಣಮ್ | ಶ್ಲೋಕಾ: [೬-೯]

ಹರಿಃ ಓಂ |

ಸೀತಾಪತೇ ಶುಭಕೃತೇ ವಿತತಾಂ ಚ ಕೀರ್ತಿಂ
ತ್ವಂ ಚಾತ್ರ ಮಿತ್ರ ಕೃತವಾನಸಿ ಪಾತ್ರಪಾಲ |
ಸುತ್ರಾಮಪುತ್ರಕೃತ ದುಷ್ಕೃತಹಂತೃನಾಮ
ತ್ವಂ ಸಾರ್ಥಕಂ ಕುರು ಋಷೇಽಸ್ಯ ನಿಷಿದ್ಧಕೃತ್ಯೇ |೧|

ಮಯಾ ನಿಷಿದ್ಧಂ ವೃದ್ಧೋಯಂ ಕ್ಷುದ್ದ್ರಃ ಸಂಸ್ಕೃತಿ ಪದ್ಧತೌ |
ಸದ್ಬುದ್ಧಿರಪಿ ಸಙ್ಕ್ಷುಬ್ಧಃ ಕ್ಷುಧಯಾ ತದ್ ವ್ಯಧಾದ್ ಬುಧಃ |೨|

ಮತ್ಕರ್ಣ ಸನ್ಮಣಿಂ ಸ್ವರ್ಣಯುಕ್ತಂ ತ್ಯಾಜಿತವಾನಸಿ |
ವಣಿಜಃ ಪಾಣಿಗಂ ಪ್ರಾಣಿನ್ ಸುತ್ರಾಣಂ ಕುರು ಬ್ರಾಹ್ಮಣಮ್ |೩|

ಮಣಿನಾ ವಿಲಸತ್ಕರ್ಣೇ ಮದ್ವಾಣೀಂ ದಕ್ಷಿಣೇಽನಿಶಂ |
ಭಣಾಮಿ ಶ್ರುಣು ಪುಣ್ಯಾತ್ಮನ್ ಗುಣ ಮಾಣಿಕ್ಯ ವಾದಿನಾಂ |೪|

ಅತೋಽಪಿ ಪುಣ್ಯವಾನ್ ಕರ್ಣೇ ಮಣಿಂ ಧಾರಿತವಾನಸಿ|
ಬ್ರಾಹ್ಮಣೇನ ಗುಣಿನ್ ಧೀಮನ್ ಸುಕ್ಷೀಣೋಽಯಂ ನ ಸಂಶಯಃ |೫|

ಇತಃ ಪರಮಹಂ ವಕ್ಷ್ಯೇ ಸುಕ್ಷೀಣೇ ಬ್ರಾಹ್ಮಣೋತ್ತಮೇ |
ಲಕ್ಷಣಂ ಮಮ ಸರ್ವಂ ತು ಶಿಕ್ಷನ್ ಸರ್ವಾನ್ ವಿಚಕ್ಷಣ |೬|

೨. ಶೇಷ ಪ್ರಕರಣಮ್ | ಶ್ಲೋಕಾ: [೭-೯]

ಹೇ ಶೇಷ ದೋಷರಹಿತ ಮಚ್ಛಿಷ್ಯವೃಷ ಪೋತಕ |
ಪೋಷ್ಯ ದಾರಿದ್ರ್ಯ ತದ್ದೋಷಂ ತ್ವಂ ಶೇಷಂ ಶೋಷಯಾಽಶು ಚ |೭|

ನರಸ್ತ್ರೋತ್ರಜದೋಷಂ ತಂ ನರಸಿಂಹಸ್ತುತೇರ್ನ ಹಿ |
ನರೋತ್ತಮ ಶ್ರುಣು ತ್ವಂ ಹಿ ನರಜನ್ಮಾನಿ ನೈವ ಮೇ |೮|

ತಸ್ಮಾನ್ಮದ್ಭಕ್ತಮುಖ್ಯಸ್ಯ ವಿಪ್ರಸ್ಯ ಕುರು ಸತ್ಕೃತಿಂ |
ಮತ್ಕೃತಿಂ ಸರ್ವದಾ ವಕ್ತುಂ ತತ್ಕೃತಂ ತು ಮಮೈವ ಹಿ |೯|

೩. ವಿಟ್ಠಲ ಪ್ರಕರಣಮ್ | ಶ್ಲೋಕಾ: [೧೦-೧೧]

ವಿಟ್ಠಲ ಭ್ರಷ್ಟಸನ್ಮಾರ್ಗ ದುಷ್ಟಬುದ್ಧಿಂ ಚ ಮಾಽಟ ಭೋ |
ಕಾಷ್ಟಾಯಾಂ ತಿಷ್ಠ ಪಾಪಿಷ್ಠ ಶಿಷ್ಟದ್ರೋಹಮಿಮಂ ತ್ಯಜ |೧೦|

ತಿಷ್ಟಲಕ್ಷಣದುಷ್ಟಸ್ತ್ವಂ ಪೂರ್ವಕಷ್ಟಂ ತು ಸಂಸ್ಮರ |
ಕಪಟಂ ಹೃದಿ ತಿಷ್ಠಂತಂ ತ್ಯಜ ವಿಟ್ಠಲ ಸಂಸ್ಫುಟಂ |೧೧|

೪. ಲಕ್ಷ್ಮೀಪತಿ ಪ್ರಕರಣಮ್ | ಶ್ಲೋಕಾ: [೧೨-೫೬]

ಏವಮೇವಹ್ಯ ವಿಶ್ವಾಸಂ ಕುರ್ವಂತೀತಿ ಮಯೇರಿತಂ |
ಪೂರ್ವಮೇವ ಪರಂ ವಿಪ್ರ ಕುರುವೃತ್ತಿಂ ಚ ಮಾಧವೀಂ |೧೨|

ಲಕ್ಷ್ಮೀಪತೇ ಕೃತಿಂ ಸಾಂತಾಂ ಸುತಂ ಸೀತಾಪತಿಂ ವದ |
ಚರಮಾಂ ವಾ ಕೃತಿಂ ಸಮ್ಯಕ್ ಪರಮಾಂ ತು ತಯೋರ್ವದ |
ಕುರು ಮಾಪತಿಭಕ್ತಿಂ ಚ ಸಾರಮನ್ನಂ ಚ ದಾಸ್ಯತಿ |೧೩|

ಏವಂ ಶೇಷಸ್ಯ ತೋಷಾರ್ಥಂ ವ್ಯಾಸಸ್ಯಾಪಿ ಶುಭಾಪ್ತಯೇ |
ಶ್ರೀಶಭಕ್ತಸ್ಯ ಮದ್ಭಕ್ತಿಯುಕ್ತಸ್ಯಾಪಿ ಸದಾ ವದ |೧೪|

ಏವಂ ಬುದ್ಧಿಸ್ತವಾಪೀಹ ಶುದ್ಧ ಕ್ರುದ್ಧಸ್ತು ಮಾ ಭವ |
ಶ್ರದ್ಧಾಂ ಕುರು ಬುಧೋಕ್ತೌ ತು ವೃದ್ಧೇ ಸಖ್ಯಂ ಸದಾ ಕುರು |೧೫|

ಶತಂ ಶತಂ ಚ ಪದ್ಯಾನಾಂ ಪ್ರತ್ಯಧ್ಯಾಯ ಗತಂ ಕುರು |
ಇತಿ ಪೂರ್ವಂ ಮಯಾ ಪ್ರೋಕ್ತಂ ತತ್ ಸತ್ಯಂ ಸಮಭೂದಹೋ |೧೬|

ಮಮ ಸಂಕಲ್ಪಸಿದ್ಧತ್ವೇ ಹ್ಯವಿಶ್ವಾಸಸ್ತವಾಪಿ ಚ |
ಕಾರಣಂ ಸಮಭೂತ್ ಕಾಣ ಸುಕ್ಷೀಣಂ ಪಶ್ಯ ಬ್ರಾಹ್ಮಣಂ |೧೭|

ಪುತ್ರ ಕೃತಿಮಭಕ್ತೋಽಯಂ ವಿಪ್ರೋ ನೈವ ತವಾಪಿ ಚ |
ಐಹಿಕಾಭಾವಮಾತ್ರೇಽಪಿ ಹ್ಯಮುತ್ರಾರ್ಥೋ ಭವಿಷ್ಯತಿ |೧೮|

ತಸ್ಮಾದ್ ವಿಮಾನಮಾರುಹ್ಯ ಬ್ರಾಹ್ಮಣೋಽಯಂ ಗುಣಾರ್ಣವ |
ಮತ್ಸಮೀಪಮಥಾಽಗಂತಾ ಪಶ್ಯ ಕಾಲಾಂತರೇ ಸುತ |೧೯|

ಆಯುಃ ಶೇಷೇ ತಥಾ ನೀತೇ ಪ್ರೀತೇ ಮಯಿ ಸುತಾಂಜಸಾ |
ಹರೌ ಪ್ರೀತೇ ತಥಾ ಪ್ರೀತೇ ತ್ವಯಿ ಕಾ ಸುಕೃತಿಃ ಕೃತಾ |೨೦|

ಸ್ತ್ರೀಸಙ್ಗಿನಃ ಕಥಂ ಚಾಸ್ಯ ಸ್ವಪ್ನೇ ವಕ್ತಿ ಗುರುಃ ಸ್ವಯಂ |
ಇತಿ ಶಙ್ಕಾಽಪಿ ತೇ ಮಾಽಸ್ತು ನಿಸ್ಸಙ್ಗೋಽಹಂ ನ ಸಂಶಯಃ |೨೧|

ಆರ್ಭಕೇ ಗರ್ಭ ಸಂಸ್ಥೇಽಪಿ ಸ್ವರ್ಭಾನುಗ್ರಸ್ತ ಭಾನುವತ್ |
ತವಾರ್ಭಕಃ ಪುಮಾನೇವ ಭೂಸುರೇಶ ಭವಿಷ್ಯತಿ |೨೨|

ವಿಪ್ರ ತ್ವಂ ತವ ಪುತ್ರಂ ತು ಮಮ ನಾಮ್ನಾ ಸಮಾಹ್ವಯ |
ಇತಿ ಪೂರ್ವಂ ಮಯಾ ಪ್ರೋಕ್ತಂ ಅನುಸಂಧತ್ಸ್ವ ಬುದ್ಧಿಮನ್ |೨೩|

ವಿಪ್ರ ತತ್ಕೃತ್ರಿಮಶ್ಲೋಕೈಃ ಪುತ್ರಬುದ್ಧಿ ಪ್ರತಾರಕೈಃ |
ಶಸ್ತ್ರಕ್ಷತ ಕ್ಷಾತ್ರವತ್ ತೇ ಕಾಽತ್ರ ಹಾನಿಃ ಪರತ್ರ ವಾ |೨೪|

ತೂಷ್ಣೀಂ ತಿಷ್ಠ ಸುಶರ್ಮಿಷ್ಠ ಕಾಷ್ಠಮೌನಂ ದೃಢಂ ಕುರು |
ಶಿಷ್ಟ ಕಷ್ಟಮತಿರ್ಮಾ ತೇ ಸುಷ್ಠು ತ್ವಂ ಪಠ ಮತ್ಕೃತಿಂ |೨೫|

ಗುಣಾರ್ಣವಂ ತು ಮದ್ವಾಣೀಂ ಭಣ ಮನ್ನಂದನಂ ಗುಣಿನ್ |
ಶ್ರುಣು ತಸ್ಯ ಸುಧಾವಾಣೀಂ ಪ್ರಾಣಿನಾಂ ಪಾಪನಾಶಿನೀಂ |
ಶ್ರೇಣೀಂ ಪ್ರಾಪ್ನೋಷಿ ತದ್ವಾಣ್ಯಾಃ ಶ್ರವಣಾಚ್ಛ್ರೇಯಸಾಂ ಸದಾ |೨೬|

ಮನ್ನಂದನ ಪದಂ ಧನ್ಯಂ ಧ್ಯಾತ್ವಾ ತ್ವಂ ತು ದಿನೇ ದಿನೇ |
ಕದನಂ ಮದನಾವಾಸಂ ತದನಙ್ಗೀಕುರು ಪ್ರಿಯ |೨೭|

ಮನ್ನಂದನ ಗೃಹದ್ವಾರಿ ಶುನವತ್ ಸಂಸ್ಥಿತೋ ಭವ |
ಶ್ರುಣು ತದ್ಗುಣಸಂಭೂತಿಂ ಭಣ ವೃಂದಾವನೇ ಕೃತಿಂ |೨೮|

ಇದಂ ಮೇ ಬುದ್ಧಿಚಾತುರ್ಯಂ ಕ್ರುದ್ಧಸ್ತ್ವಾಚಾರ್ಯ ಮಾ ಭವ |
ವೃದ್ಧಃ ಶ್ರುತ್ವಾ ಸದಾ ಕಾರ್ಯಂ ಶ್ರದ್ಧಾವಾನ್ ಶ್ರುಣು ಕಾರ್ಯತಃ |೨೯|

ಅಹಂ ಗಚ್ಛಾಮಿ ಮಚ್ಛಾಪಃ ಸ್ವಚ್ಛಾನಾಂ ನ ಭವಿಷ್ಯತಿ |
ಕೃಚ್ಛ್ರಾತ್ ಕೃಚ್ಛ್ರತರಂ ಯಾಂತು ಮಚ್ಛಾಪಾತ್ ಕುತ್ಸಿತಾ ನರಾಃ |೩೦|

ಅಯಂ ತು ಕುಜನಃ ಕೃಷ್ಣೋಽಪ್ಯಪ್ಪಣ್ಣಃ ಫಣಿ ಬುದ್ಧಿಮಾನ್ |
ಇತಿ ಪೂರ್ವಂ ಮಯಾ ಪ್ರೋಕ್ತಂ ಅನುಸಂಧತ್ಸ್ವ ಬುದ್ಧಿಮನ್ |೩೧|

ಗಾಳೀದಾನೇನ ಚೈನಂ ತು ತೋಳಯಾಮಿ ಪುನಃ ಪುನಃ
ತಾಲಕಾಂಡೇನ ತಂ ವಿಪ್ರಂ ಕಾಲಯಾಮಿ ಪುನಃ ಪುನಃ |೩೨|

ಏತತ್ಕೃತೌ ಸುಧಾರ್ಢ್ಯಾರ್ಥಂ ಮೂಢವಿಪ್ರಮುಖೇನ ತು |
ಕಾಠಿಣ್ಯಂ ವಚ್ಮಿ ಪಾಠೇನ ಸೌಷ್ಟವೇನೈವ ಚಾತ್ರ ತು |೩೩|

ಸ್ತ್ರೀ ಮುಖೇನಾಪಿ ಕಾಽತ್ರಾಪಿ ಶಂಕಾ ಮಾಽಸ್ತು ಸುಪುತ್ರಕ |೩೪|

ಶ್ಲೋಕಾನ್ ವಕ್ತುಂ ಪ್ರವಿಷ್ಟೋಽಹಂ ಕಾಕಬುದ್ಧೌ ದ್ವಿಜೋತ್ತಮೇ |
ತೋಕೇ ಲೋಕಾಪವಾದೇನ ಶೋಕೋ ನಾಸ್ತಿ ಮಮೇಹ ಚ |೩೫|

ಪ್ರಶ್ನಂ ನ ಕುರುತೇ ತತ್ವೇ ನ ಸ್ನಾತಿ ಮಮ ತೀರ್ಥಕೇ |
ಅಶ್ನಾತಿ ಮೃಷ್ಟಮನ್ನಂ ಮೇ ಶಿಶ್ನೋದರಪರಾಯಣಃ |೩೬|

ಜ್ಞಾನಿನ್ ಕಟಾಕ್ಷತಶ್ಚೋಕ್ತಂ ಜಾನೀಹಿ ತ್ವಂ ಸುಪಾಪಿನಂ |
ಧೀಮನ್ನ ಕುರು ತದ್ವಾಕ್ಯಂ ಧೀಮಾನ್ ಭವ ಸದಾ ಬುಧ |೩೭|

ತಲ್ಲಕ್ಷಣಂ ನ ವಕ್ಷ್ಯಾಮಿ ತ್ವಮಾಚಕ್ಷ್ವ ವಿಚಕ್ಷಣ |
ಸಂಕ್ಷೇಪತಶ್ಚೋಕ್ತಮೇತತ್ ಕಾಲಕ್ಷೇಪಸ್ಯ ಶಂಕಯಾ |೩೮|

ತದ್ವಾಣೀಂ ನ ಶ್ರುಣು ಪ್ರಾಣಿನ್ ಪ್ರಾಣಿನಃ ಪ್ರಾಣಿನಾಂ ವರ |
ಶ್ರೇಣೀಂ ಪ್ರಾಪ್ನೋಪಿ ಪುಣ್ಯಾನಾಂ ಮದ್ವಾಕ್ಯಂ ಶ್ರುಣುಷೇತಿ ಚೇತ್ |೩೯|

ವಿಪ್ರಮುದ್ದಿಶ್ಯ ಯತ್ ಪ್ರೋಕ್ತಂ ತತ್ ಪ್ರೋಕ್ತಂ ಚ ಮಮೈವ ತು |
ತತ್ ಪ್ರೋಕ್ತಂ ಪಾಪಿನಾ ತೇನ ವಿಪ್ರಃ ಸ್ವಾರ್ಥಂ ತದುಕ್ತವಾನ್ |೪೦|

ಇತಿ ತದ್ವಚನಂ ಕಿಂಚಿನ್ನ ಶ್ರುಣು ತ್ವಂ ಚ ನಂದನ |
ಕ್ರಕಚಚ್ಛೇದನಂ ಪ್ರಾಪ್ಯ ಛಿನ್ನಭಿನ್ನೋ ಭವಿಷ್ಯತಿ |೪೧|

ಮಾ ದದಸ್ವೇತಿ ಯೋ ಬ್ರೂಯಾದ್ ಗವ್ಯಂ ಗೋಬ್ರಾಹ್ಮಣೇಷು ಚ |
ಸ ಯಾತಿ ನಿರಯಂ ಘೋರಂ ಯಾವದಾಭೂತಸಂಪ್ಲವಂ|೪೨|

ತಸ್ಮಾನ್ನ ಶ್ರುಣು ತದ್ವಾಕ್ಯಂ ಮದ್ವಾಕ್ಯಂ ಶ್ರುಣುಷೇತಿ ಚೇತ್ |೪೩|

ಏತದ್ವಾಕ್ಯಮಪಿ ಪ್ರೇಷ್ಠ ದ್ವಿಜೋಕ್ತಮಿತಿ ವಕ್ಷ್ಯತಿ |
ಸೋಽತ್ಯಂತಂ ಮಯಿ ವಿಶ್ವಾಸೀ ದೇಶೀಯೋ ಬ್ರಾಹ್ಮಣೋ ಹ್ಯಯಂ |೪೪|

ಕೋಶಾರ್ಧಮಪಿ ದಾಸ್ಯಾಮಿ ದಾಸಾಯ ಭವಸಾಗರೇ |
ಜನ್ಮಾಂತರೇ ಕರ್ಮನಾಶೇ ಧರ್ಮಾಂತೇ ಶರ್ಮ ವರ್ಮ ಚ |೪೫|

ಕುರ್ಮಃ ಕೂರ್ಮೋಽಮೃತಾಬ್ಧೌ ಚ ನರ್ಮಮಾತ್ರೇಣ ಧರ್ಮಿಣಾಂ |
ದೇವತಾನಾಂ ಮಾನವಾನಾಂ ದಾನವಾಂತಕ ಏವ ಸನ್ |
ದತ್ತವಾನ್ ಮಿತ್ರಸಂತಾಪಂ ಕೃತವಾಂಛಸ್ತ್ರಜಂ ಭಯಂ |೪೬|

ಜಾನೀಹೀತ್ಯತ್ರ ಚಾಽನೀತಂ ವರ್ಣವೈಷಮ್ಯತ: ಸುತ |
ಜಾನೀಹಿ ತಸ್ಯ ವೈಷಮ್ಯಾತ್ ಸ್ವರೂಪಂ ತ್ವಂ ಮುನೀಶ್ವರ |೪೭|

ಮದ್ದತ್ತಾಚಾರ್ಯನಾಮ್ನಾಽಪಿ ಕದಾಽಪಿ ನ ವದಸ್ಯಹೋ |
ವದಾದ್ಯ ವಿಬುಧೇಶ ತ್ವಂ ಮದಾಂಧಸ್ಯ ಸುಪಾಪಿನಃ |೪೮|

ಸಾಮ್ನಾ ವಚ್ಮಿ ಸುಸಾಮ್ನಾ ಯೋ ನ ಭಣತ್ಯಂತ್ಯ ಏವ ಸಃ |
ದಾಮ್ನಾ ಬಧ್ವಾ ನಯಿಷ್ಯಾಮಿ ಚಾಽಮ್ನಾಯಾತ್ ಸುಬಹಿಷ್ಕೃತಂ |೪೯|

ದೂತೈರ್ಯಮಸ್ಯ ಸೌಮ್ಯತ್ವಂ ಕಾಮ್ಯಂ ವಾ ನಾಸ್ತಿ ತಸ್ಯ ಚ |
ಸ್ವಾಮ್ಯಮಾತ್ರೇಣ ಸಂತುಷ್ಟೋ ಭೌಮಸಂಯಮನೀ ಪುರೇ |೫೦|

ಕ್ರಕಚೈರ್ದಾರ್ಯತೇ ಪುತ್ರ ಸ್ವಕಚೇಷು ಪ್ರಗೃಹ್ಯ ಚ |
ಶ್ವಪಚೈರ್ನೀಯತೇ ಮಾರ್ಗೇ ಪ್ರಪಚ್ಯೇತ ನರಾಧಮಃ |೫೧|

ನಾಮಮಾತ್ರೇಣ ವಾ ತೋಷಂ ಪೋಷಯಸ್ವ ನ ಶೋಷಯ |
ಮೃಷಾ ನ ಹಿ ಸುಷೇಣಾಗ್ರ್ಯ ತಾವತೈವ ಪ್ರಹರ್ಷಯ |೫೨|

ಬ್ರಾಹ್ಮಣಾಽಮರಣಂ ವಕ್ಷ್ಯೇ ಕಾರಣೇನ ವಿನಾಽಪ್ಯಹಂ |
ಪುನರ್ವಾಣೀಂ ಹರಿಷ್ಯಾಮಿ ಪ್ರೇರಣಾಮಪಿ ಮೇ ಸದಾ |೫೩|

ತಸ್ಮಾತ್ ಪ್ರತಿಜ್ಞಾಹಾನ್ಯಾದಿ ದೋಷೋ ಮಮ ನ ಕಶ್ಚನ |೫೪|

ಶ್ರೀಶಪಾದಾಂಬುಜಾಸಕ್ತ ಸೇವಕೇ ಮಯಿ ಕೋಽಪ್ಯರಿಃ |
ನಾಸ್ತಿ ಚಾಽಸ್ತಿಕತಾ ಚಾಸ್ತಿ ಸಕ್ತಿರೇವ ಸದಾ ಹರೌ |
ಸ್ವಾಸ್ಥ್ಯಂ ಚ ಮನಸ: ಸಮ್ಯಕ್ ಸದಾಽಸ್ತಿ ಪ್ರಾಶ್ನಿಕೋತ್ತಮ |೫೫|

ಅಯೋಗ್ಯಶ್ರವಣಂ ನ ಸ್ಯಾದ್ ಯಥಾ ಚಾಹಂ ಕರೋಮ್ಯಲಂ |
ವಾಚನೇ ಬ್ರಾಹ್ಮಣಮತಿಂ ಸೂಚನೇಽಪಿ ಹರಾಮಿ ಚ |೫೬|

೫. ವಿಪ್ರ ಪ್ರಕರಣಮ್ | ಶ್ಲೋಕಾ: [೫೭-೬೩]

ವೀತಿ ಜ್ಞಾನಂ ಸಮುದ್ದಿಷ್ಟಂ ಠೇತಿ ತಚ್ಛೂನ್ಯ ಏವ ಚ |
ಲೇತಿ ತತ್ಪಾಲನಂ ಚಾಪಿ ಸಮುದ್ದಿಷ್ಟಂ ಮಠೇಶ್ವರ |೫೭|

ಪದಾರ್ಥಃ ಕೋಽರ್ಥ ಇತ್ಯುಕ್ತೇ ತಂ ಚ ವಚ್ಮಿ ಸುಲೋಚನ |
ವಿದಾ ಜ್ಞಾನೇನ ಠಾನ್ ಶೂನ್ಯಾನ್ ಲಾತಿ ಗೃಹ್ಣಾತಿ ವಿಟ್ಠಲಃ |೫೮|

ಇತಿ ವಿಟ್ಠಲ ಶಬ್ದಾರ್ಥಂ ಪಠಂತಿ ಭುವಿ ಪಂಡಿತಾಃ |
ಪಟ್ಟವರ್ಧನ ಕಾಷ್ಠಾಸು ಶ್ರೇಷ್ಠ ಸಮ್ಯಗ್ ವಿಚಾರಯ |೫೯|

ಏತದರ್ಥಾನುಕೂಲ್ಯೇನ ನಿಂದಾವಾಕ್ಯಾನಿ ಸುಂದರ |
ಯೋಜ್ಯಾನಿ ಪೂಜ್ಯ ಸತ್ಪುತ್ರ ರಾಗದ್ವೇಷೌ ಚ ನೈವ ಮೇ |೬೦|

ತರ್ಹಿ ಶಾಪೋಕ್ತಿರಪ್ರತ್ಯ ಕುತ್ರ ತೇ ಚ ಪ್ರಯೋಜಿತಾ |
ಕೃತ್ರಿಮ ಶ್ಲೋಕ ಕರ್ತೃಣಾಂ ಪುತ್ರ ಮೇ ಸುಪ್ರಯೋಜಿತಾ |೬೧|

ತರ್ಹಿ ತತ್ರಾಪಿ ತದ್ದ್ವೇಷೋ ಭವತೀತ್ಯಪಿ ಮಾ ವದ |
ಪುತ್ರ ತತ್ರಾಪಿ ಮೇ ಚೊಖ್ತಿರುಪಚಾರೇಣ ಯೋಜಿತಾ |೬೨|

ಭೀಷಣಾರ್ಥಂ ಸುಷೇಣಾಗ್ರ್ಯ ಧಿಷಣಾಸ್ಯಾನ್ನತಾದೃಶ್ರೀ |
ಇತಿ ಚೋಕ್ತಿ ಪ್ರೇಷಣಾ ಮೇ ದೋಷಶೋಷಣ ಶ್ರುಣ್ವಹೋ |೬೩|

ಮದ್ಭಕ್ತಾ: ಸುಖಿನ: ಸಂತು ಶಶ್ವಜ್ಜೀವಂತು ಕಾಂತ ತೇ |
ಶಾಂತಿಂ ಯಾಂತು ಮಮೈಕಾಂತಾಃ ಸ್ವಾಂತಸ್ಥಹರಿಚಿಂತಯಾ |೬೪|

ತಸ್ಮಾದ್ ವಾ ಮೇ ತಪೋ ಹಾನಿರ್ನಾಸ್ತಿ ದೋಷೋಽಪಿ ಕಶ್ಚನ |೬೫|

ಶಾಸ್ತಿ ಮಾಂ ಶಾಶ್ವತೀಂ ಭಕ್ತಿಂ ಹಯಗ್ರೀವಃ ಕೃಪಾಂಬುಧಿಃ |
ಹಯಗ್ರೀವ ಪ್ರಸಾದೋಽಯಂ ಈದೃಶೋ ವರ್ತತೇ ಮಯಿ |
ಭವಗ್ರಾಹಾಚ್ಚ ಮಾಂ ನಿತ್ಯಂ ತ್ಯಾಜಯಾಮಾಸ ಪೂಜಯಾ |೬೬|

ಅಹಮಾರಾಧನಂ ತಸ್ಯ ಕಾರಯಾಮಿ ತ್ವಯಾಽಪಿ ಚ |
ಪ್ರೇರಯಾಮಿ ಸುಬುದ್ಧಿಂ ತೇ ತಾರಯಾಮಿ ಭವಾಬ್ದಿತಃ |೬೭|

ತಸ್ಮಾದಾರಾಧನಂ ತಸ್ಯ ನಿತ್ಯಂ ಕುರು ಮನೋರಮ |
ಪರಮಾಂ ಪ್ರಾಪ್ಸ್ಯಸೇ ಸಿದ್ಧಿಂ ಶುದ್ಧಿಂ ಚ ಹೃದಿ ನಿತ್ಯಶಃ |೬೮|

ಕಸ್ಯಾಪಿ ನಿಂದಾ ನ ಕೃತಾ ಸ್ವಸ್ಯಾಪಿ ಸುಕೃತಿಂ ಶಪೇ |
ತಸ್ಯಾಪಿ ಪ್ರಕೃತಿಶ್ಚೇಯಂ ಪಶ್ಯಾಮಿ ವಿಕೃತಾಂ ಕೃತಿನ್ |೬೯|

ಏವಂ ಸ್ವರೂಪಕಥನಂ ಕೃತಂ ಪೂರ್ವಂ ಮಯಾ ಮುನೇ |
ಸ್ಮೃತಂ ದೈವವಶೇನೇಹ ವೃತ್ತಂ ಚಾಜ್ಞಾನತಃ ಪ್ರಿಯ |೭೦|

ಯಾದೃಶಂ ಕಪಟಂ ತಸ್ಯ ದಾಸ್ಯಾಮೀತಿ ಚ ವಿಟ್ಠಲಃ |
ಹೃದಿ ತಿಷ್ಠತಿ ತೇ ನಿತ್ಯಂ ತಾದೃಶಂ ತ್ಯಜ ಸಂಸ್ಫುಟಂ |೭೧|

ಇತಿ ಸಂಪ್ರಾರ್ಥಯಾಮ್ಯತ್ರ ಕಾಽತ್ರ ಶಙ್ಕಾಽಪಿ ಮಾ ತವ |
ತ್ವದರ್ಥಮೇವ ಸತ್ಪುತ್ರ ಸೋಽಪಿ ಮಿತ್ರಂ ಭವಿಷ್ಯತಿ |೭೨|

ತಸ್ಮಾದರಾಗದ್ವೇಷೋಽಹಂ ಶೇಷಶಾಯಿಪದೇ ಶಪೇ |೭೩|

೬. ಲಕ್ಷ್ಮೀಪತಿ ಪ್ರಕರಣಮ್ | ಶ್ಲೋಕಾ: [೭೪-೭೮]

ವಿಪ್ರಸ್ಯಾಚ್ಛೋಪದೇಶೋ ಮೇ ನಾಽಯಾಸ್ಯತಿ ಕುತ: ಸುತ |
ಇತಿ ತೇ ಶೇಮುಷೀ ಮಾಽಸ್ತು ತದಾಸ್ಯಾದಹರಾಮಿ ತಂ |೭೪|

ಗೋಪ್ಯತ್ವಾತ್ ಸೋಽಪ್ಯತೀತೋಽಭೂದ್ ಭೂಪತೀನಾಂ ಸಭಾಪತೇ |
ಕ್ವಾಪ್ಯತೋ ನೈವ ಮೇ ಚೋಕ್ತಹಾನಿಃ ಪಶ್ಯ ಸುಪುತ್ರಕ |೭೫|

ಸಹಸ್ರಂ ವಚ್ಮ್ಯಹಂ ಶ್ಲೋಕಶತಂ ವಾಽಪ್ಯಯುತಂ ಪ್ರಿಯ |
ನಿಯುತಂ ಪ್ರಯುತಂ ವಾಪಿ ಚಾಽಹರಾಮಿ ತದಾಸ್ಯತಃ |೭೬|

ಏವಂ ನಿತ್ಯಂ ಚ ವಕ್ಷ್ಯಾಮಿ ಪಕ್ಷೀಕೃತಮುಖೇನ ಚ |
ಕಕ್ಷೀಕೃತ ಪ್ರಮೇಯಂ ಚ ಶಕ್ಷ್ಯಾಮ್ಯಾಹರ್ತುಮೇವ ತತ್ |೭೭|

ಉಕ್ತಂ ಶ್ಲೋಕೇಷು ಶಕ್ತಶ್ಚ ಗಹೀತುಂ ಸರ್ವಮೇವ ಚ |
ಅಥಾಪ್ಯಯೋಗ್ಯಜೀವಾನಾಂ ಯೋಗ್ಯಂ ನೇತ್ಯಾಹರಾಮಿ ತತ್ |೭೮|

೭. ಲಕ್ಷ್ಮೀಪತಿ ಪ್ರಕರಣಾಂತರ್ಗತ ವಿಟ್ಠಲ ಪ್ರಕರಣಮ್ | ಶ್ಲೋಕಾ: [೭೯-೮೩]

ಸುತ ಸುಲೋಚನ ಲೋಕಪೂಜಿತ ಯತಿಕುಲೋಚಿತ ಲೋಪ್ತೃಪಾಲಕ |
ವೃತಬಲೋಚಿತಕೃತ್ಯಲೋಲ ತೇ ಶತಧೃತೇರಪಿ ಲೋಕಮಲೋಕ್ಯ ತೇ |೭೯|

ಹೇ ಪುತ್ರ ಪುತ್ರ ವಿಪ್ರಸ್ಯ ಕಾರ್ಯಂ ವಿಸ್ಮೃತವಾನಸಿ |
ಹಾ ತತ್ರ ತತ್ರ ಕರ್ತವ್ಯಂ ಯತ್ರ ತೇ ವಾಕ್ಯ ಗೌರವಂ |೮೦|

ತೂಷ್ಣೀಂ ಸ್ಥಿತೇ ಮಯಿ ಸುತ ಸರ್ವಥಾ ವಿಸ್ಮೃತಿರ್ಭವೇತ್ |
ಅತಸ್ತವಾಹಂ ಸ್ಮೃತ್ಯರ್ಥಂ ವಕ್ಷ್ಯಾಮ್ಯದ್ಯ ಪುನಃ ಪುನಃ |೮೧|

ಮಮಾಶ್ರಿತಶ್ಚ ವಿಪ್ರೋಽಯಂ ಕಾಮಾನ್ವಿತಮತಿರ್ಭವೇತ್ |
ಸೋಮಾಶ್ರಯಾದ್ ಯಥಾ ರುದ್ರೋಽಪ್ಯುಮಾಕಾಂತೋ ಗತವ್ಯಥಃ |೮೨|

ತಥಾಽಯಂ ಬ್ರಾಹ್ಮಣಃ ಶ್ರೀಮಾನ್ಸ್ತ್ವಯಾ ಮುಕ್ತ ಋಣವ್ಯಥಃ |
ಭವೇದಾಮರಣಾಂತಂ ಚ ಮಾಂ ತಾತಂ ಶರಣಂ ಗತಃ |೮೩|

೮. ಪುನ: ಲಕ್ಷ್ಮೀಪತಿ ಪ್ರಕರಣಮ್ | ಶ್ಲೋಕಾ: [೮೪-೯೭]

ಉಕ್ತಂ ಮೇ ವಿತಥಂ ಜಾತಂ ಶುಕ್ತಿರೂಪ್ಯಂ ಯಥಾ ಸುತ |
ಅತ್ಯಂತಾಸತ್ವತಃ ಕಾಂತ ಭ್ರಾಂತೇರ್ವಿಷಯಮೇವ ಸತ್ |೮೪|

ತದ್ವದರ್ಥಕ್ರಿಯಾಕಾರೀ ನ ಭವೇದೇವ ಮೇ ಮತಿಃ |
ಇತ್ಯನಾದರತಃ ಪುತ್ರ ಕೃತ್ರಿಮೇತಿ ಚ ಮತ್ಕೃತಿಃ |೮೫|

ವಿಪ್ರೇಣೈವ ಕೃತಾ ಚಾತ್ರ ನಾತ್ರ ಹಾನಿಃ ಪರತ್ರ ಚ |
ಅಕೃತೇಽಪಿ ತದುಕ್ತಾರ್ಥೇ ಸ್ವಾರ್ಥಂ ವಕ್ತಿ ದ್ವಿಜೋ ವೃಥಾ |೮೬|

ಕಾಽಽರ್ತಿರ್ಮಮ ಕೃತೇ ಚಾರ್ಥೇಽಪ್ಯಕೃತಾರ್ಥೇಽಪಿ ವಾ ಸುತ |
ಇತಿ ತೇ ಶೇಮುಷೀ ನ ಸ್ಯಾತ್ ಪಶ್ಯಾದ್ಯ ಸುವಿಶಾರದ |
ಕಸ್ಯ ವಾ ಕೃತಿರೇವೇಯಂ ಸ್ವಸ್ಯ ವಾಽದ್ಯ ದ್ವಿಜಸ್ಯ ವಾ |೮೭|

ಹೇ ಕೇಶವ ತ್ವಂ ತೋಕಸ್ಯ ಸ್ಮಾರಕಃ ಪ್ರೇರಕೋ ಭವ |
ಕಾರ್ಯಂ ಮೇ ಕಾರಯ ಕ್ಷಿಪ್ರಂ ವಿಪ್ರಸ್ಯಾಪಿ ಸುತೇನ ಮೇ |೮೮|

ಅನ್ಯಥಾ ಭಕ್ತವಶ್ಯತ್ವಂ ತವ ನ ಸ್ಯಾತ್ ಸ್ವದಾಸ್ಯಕಂ |
ಪಶ್ಯಾದ್ಯ ಚಕ್ಷುಷಾ ಸ್ವೇನ ಕರುಣಾರಸವರ್ಷಿಣಾ |೮೯|

ಅಚ್ಛಿನ್ನಭಕ್ತಿಸಂಛನ್ನಃ ಪೃಚ್ಛನ್ ಸಲ್ಲಾಂಛನಂ ತವ |
ಇಚ್ಛನ್ ಸಂಛಿನ್ನಬಂಧಂ ಚ ತ್ವಾಮಂಚನ್ ಕಾಂಚನಂ ತ್ಯಜನ್ |೯೦|

ಜ್ಞಾನ-ವೈರಾಗ್ಯ-ಭಕ್ತ್ಯಾಖ್ಯಸಖಿಭಿ: ಸುಖಮೇವ ಚ |
ಪ್ರಾಪ್ನುಯಾಂ ಸ್ವಾಪ್ನಪದ್ಯೈರ್ಮೇ ಚಾಪ್ನುಯಾತ್ ಶೋಭನಂ ನರಃ |೯೧|

ವಿದಿತ್ವಾ ಮದ್ಗತಿಂ ಶ್ರುತ್ವಾ ಕೃತ್ವಾ ಭಕ್ತಿಂ ಮಯಿ ಪ್ರಿಯ |
ಭುಕ್ತ್ವಾ ಭೂತಿಂ ಚ ಮಾಂ ಸ್ತುತ್ವಾ ಛಿತ್ವಾ ಸಂಸೃತಿ ಬಂಧನಂ |೯೨|

ಇತ್ಯಹಂ ದೇವದೇವೇಶಂ ವೇದೇ ವೇದೇ ಚ ಸಂಸ್ತುತಿಂ |
ಕೃತ್ವಾ ಕೃತ್ವಾ ಪ್ರಾರ್ಥಯಾಮಿ ದೃಷ್ಟ್ವಾ ದೃಷ್ಟ್ವಾ ತಮವ್ಯಯಂ |೯೩|

ಓಂ ಏತತ್ಸರ್ವಂ ಸ್ವಾಪ್ನಪದ್ಯೇನ ಗರ್ವಂ ಹಿತ್ವಾ ಸರ್ವೇ ವಿಪ್ರವರ್ಯಾಸ್ಯಜೇನ |
ಶೃತ್ವಾ ಚೋರ್ವ್ಯಾಂ ಶರ್ವ ಗುರ್ವಾದಿ ದೇವಾನ್
ದೃಷ್ಟ್ವೋರ್ವಶಿಂ ಯಾಂತು ಮಾಂ ಮಾನವೇಂದ್ರಾಃ |೯೪|

ಇದಂ ವೃಂದಾವನಾಖ್ಯಾನಂ ಯೇ ಪಠಂತಿ ಮನೀಷಿಣಃ |
ಮುಕುಂದಾವನಮೇವಾಸ್ತು ತೇಷಾಂ ಕಂದಾಶನಾಜ್ಞಯಾ |೯೫|

ಇದಮರ್ಪಿತಮೇವಾಸ್ತು ಹಯಶೀರ್ಷಸ್ಯ ಪಾರ್ಷದಾತ್ |
ಸಮಂ ಸಹಸ್ರಶೀರ್ಷಸ್ಯ ಸೂಕ್ತಸ್ಯ ಪುರುಷಾತ್ ಕೃತಮ್ |೯೬|

ಯಚ್ಛ್ರುಣ್ವತಾಂ ಭಕ್ತಿರುದಾರಸದ್ಗುಣೇ ಹರೌ ಹರೇರ್ಲೋಕಗತೇ ತಥಾ ಮಯಿ |
ಭವತ್ಯಹೋ ಸರ್ವಶುಭಾಪ್ತಿಸನ್ಮತೀರ್ ದದಾತ್ಯಜಸ್ರಂ
ಸುತಸತ್ಯಮೇವ ತತ್ ಓಂ |೯೭|

| ಇತಿ ಶ್ರೀಸ್ವಾಪ್ನವೃಂದಾವನಾಖ್ಯಾನೇ ಅಲೌಕಿಕ ವಿಭಾಗೇ
ನಿದರ್ಶನಪರ್ವಣಿ ಚತುರ್ದಶಾಧ್ಯಾಯ: ಸಮಾಪ್ತ: |

|| ಶ್ರೀ ಅಶ್ವಿನೀಹಯಗ್ರೀವಾತ್ಮಕ ಕೃಷ್ಣಾರ್ಪಣಮಸ್ತು ||

15. Svaapnavrundavanakhyana