ಹೇ ಶ್ರೀ ಸ್ತ್ವಂ ರಮಣಾನ್ವಿತಾಽಽಶು ಸತತಂ ಮದ್ಗೇಹವಾಸಾ ಭವೇ-
ಸ್ಸದ್ಧೇಮಾಂಬರ ಮೇಖಲೋರು ವಿಲಸತ್ಪಾದಾಬ್ಜ ಯುಗ್ಮಾಂಕಿತಾ |
ಶಿಂಜನ್ನೂಪುರ ರಂಜಿತಾಂಗುಲಿ ಲಸತ್ಸೌವರ್ಣ ಭೂಷಾವಲೀ
ಭಾರಾನ್ಮತ್ತಗಜೇಂದ್ರಮಂದಗಮನಾ ಚಾಽಽಯಾಹಿ ಮೇ ಮಂದಿರಂ [೧]
ರಾಜದ್ರತ್ನ ಕಲಾಪ ಶೋಭಿಕಬರೀ ಚಂದ್ರಾರ್ಕ ಮುಕ್ತಾವಲೀ
ಸತ್ತಾಪ್ತಾಮಲ ಹೇಮ ವಜ್ರ ಮುಕುಟ ಪ್ರತ್ಯಗ್ರ ಭೃಂಗಾಲಕಾ |
ಸತ್ಫಾಲೋಪರಿ ಕುಂಕುಮಾಕ್ತ ಸುಮಹತ್ಕಸ್ತೂರಿ ರೇಖಾಯುತಾ
ಸತ್ಕರ್ಣಾಭರಣಾಯತಾಂಬಕ ರಮಾ ಸದ್ಭ್ರೂ ವಿಲಾಸಾನ್ವಿತಾ [೨]
ಪೂರ್ಣೆಂದ್ವಾಸ್ಯ ಕಪೋಲ ದರ್ಪಣಯುತಾ ನಾಸೋರು ಬಾಸಾನ್ವಿತಾ
ಸದ್ವಕ್ತ್ರೋಪರಿ ವಿಸ್ತೃತೋಷ್ಠ ಪುಟಗ ಸ್ಮೇರಾರುಣದ್ದಾಡಿಮೀ-
ದಂತೋರುದ್ಯುತಿ ಭಾಸಮಾನ ಚುಬುಕಾ ಸಂವೃತ್ತಪೂಗೀಲಸ
ತ್ಕಂಬುಗ್ರೀವ ಸುರತ್ನ ಹೇಮ ನಿಚಯಾ ಮಾಲಾವಲೀ ಶೋಭಿತಾ [೩]
ಮಾದ್ಯತ್ಕುಂಭಿ ಸುಕುಂಭ ಪೀನವಿಮಲೋತ್ತುಂಗಸ್ತನಾಲಂಕೃತಾ
ಸತ್ಕಾಂಚೀವರ ಕಂಚುಕಾಂಚಿತತನು ಚ್ಛಾಯಾಸುಜಾಂಬೂನದಾ |
ಬಾಹುದ್ವಂದ್ವ ಸುರತ್ನ ಹೇಮ ಕಟಕ ವ್ರತ್ಯಗ್ರ ಭೂಷಾನ್ವಿತಾ
ಸ್ವಾಂಗುಲ್ಯುಪ್ತ ಸುಮುದ್ರಿಕಾಽಭಯಕರಾ ಪ್ರಾಽಽಯಾಹಿ ಮೇ ಮಂದಿರಂ [೪]
ರಂಭಾಪರ್ಣ ತನೂದರೋಪರಿ ಲಸನ್ನೀಲಾಭ ರೋಮಾವಲೀ
ಗಂಗಾವರ್ತ ಸುನಾಭಿ ಭಾಸಿತ ಕಟೀ ಸದ್ರತ್ನ ಸನ್ಮೇಖಲಾ |
ಸುಶ್ರೋಣೀ ತಟ ಯುಗ್ಮ ಲಾಂಛನವತೀ ಮೋಚಾಸಮೋರು ಪ್ರಭಾ-
ಪೂರ್ಣೇಂದೂಪಮ ಜಾನುಮಂಡಲವತೀ ಪ್ರಾಽಽಯಾಹಿ ಮೇ ಮಂದಿರಂ [೫]
ಸನ್ಮೀನಾಭ ಸುಜಂಘಿಕಾ ಚ ವಿಲಸದ್ಗುಲ್ಫೋರು ಯುಗ್ಮಾಂಚಿತಾ
ಪಾದಾಬ್ಜ ದ್ವಯ ರಂಜಿತಾಂಗುಲಿನಖ ಪ್ರೋದ್ಭಾಸಿತಾ ಸರ್ವದಾ |
ಶ್ರೀದೇವೀದೃಶ ಮಂಜುಲಾಕೃತಿಯುತಾ ಭೂಯಾದ್ರುತಂ ನೇತ್ರಸಾತ್
ಪ್ರೇಮ್ಣಾಽಮಂದ ಕೃಪಾರಸಾರ್ದ್ರ ಸುದೃಶಾ ಸಂವೀಕ್ಷ್ಯ ಮಾಂ ಪಾಲಯ [೬]
ತ್ವತ್ಕಲ್ಯಾಣ ಮಹಾಗುಣಾನ್ಗಣಯಿತುಂ ನೇಶಾ ಯತಸ್ಸೂರಯೋ
ಬ್ರಹ್ಮಾದ್ಯಾ, ಭುವಿ ಮಾನವೋಲ್ಪ ಮತಿಮಾನ್ ಕ್ವಾಽಹಂ ರಮೇ ಭಾರ್ಗವಿ !
ತ್ವತ್ಕಾರುಣ್ಯ ಬಲಾದವಾಪ್ತನಿಖಿಲೈಃ ಸ್ವಂ ಸ್ವಂ ಪದಂ ಸ್ವರ್ಗಿಭಿಃ
ಪ್ರಾಪ್ತಂ ತ್ವಾಮಭಿಯಾಚಯಾಮಿ ಸತತಂ ಸಂಪೂರಯೇಷ್ಟಂ ಮಮ [೭]
ಶ್ರೀಲಕ್ಷ್ಮೀ ವರರೂಪ ವರ್ಣನಮಿದಂ ಸೌಭಾಗ್ಯ ಸಂಪತ್ಕರಂ
ಸತ್ಪುತ್ರಾದಿ ಸುಗೇಹ ಧಾನ್ಯಧನದಂ ಸರ್ವಾರ್ಥ ಸಾಮ್ರಾಜ್ಯದಂ |
ಭಕ್ತಿಜ್ಞಾನ ವಿರಕ್ತಿ ಶಾಂತಿ ಗುಣದಂ ಸಂತಾನಸಂವೃದ್ಧಿದಂ
ಸಚ್ಛಾಸ್ತ್ರಾರ್ಥ ವಿಚಾರಸಾರ ಮತಿದಂ ಶ್ರೀಪ್ರೀತಿ ಸಂವರ್ಧಕಂ [೮]
ಶ್ರೀಮತ್ಕೌಶಿಕ ಪುಣ್ಯನಾಮಕ ಪರೋಪಾಹ್ವಾಯುಜಾ ಸ್ವಾಮಿನಾ
ದಾರಿದ್ರ್ಯಾತಪತಾಪತಪ್ತಮನಸಾ ಲಕ್ಷ್ಮ್ಯಷ್ಟಕಂ ನಿರ್ಮಿತಂ |
ತೇನೈವಾಽಽಶ್ವಿನ ಶುಕ್ಲಕೇ ಪ್ರತಿದಿನಂ ಶುಕ್ರೋದಯೇ ಪಠ್ಯತಾಂ
ಶ್ರೀದೇವೀ ಪ್ರದದಾತ್ಯಖಂಡವಿಭವಂ, ಸತ್ಯಂ ಮಯೋಕ್ತಂತ್ವಿದಂ [೯]
| ಇತಿ ಶ್ರೀ ರಾಘವೇಂದ್ರ ಪಾದ ಕಮಲಾರಾಧಕೇನ
ಸ್ವಾಮಿನಾ ರಚಿತಂ ಲಕ್ಷ್ಮ್ಯಷ್ಟಕಂ ಸಂಪೂರ್ಣಂ |
ಶ್ರೀ ಕೃಷ್ಣಾರ್ಪಣಮಸ್ತು |