Composer: Shri Rayaru
ಪ್ರಾತಃ ಸಂಕಲ್ಪಗದ್ಯಂ
ಓಂ ಲೌಕಿಕವೈದಿಕಭೇದಭಿನ್ನವರ್ಣಾತ್ಮಕ-ಧ್ವನ್ಯಾತ್ಮಕ-ಅಶೇಷಶಬ್ದಾರ್ಥ
ಋಗಾದಿಸರ್ವವೇದಾರ್ಥ-
ವಿಷ್ಣುಮಂತ್ರಾರ್ಥ-ಪುರುಷಸೂಕ್ತಾರ್ಥ-ಗಾಯತ್ರ್ಯರ್ಥ-ಶ್ರೀಮನ್ನಾರಾಯಣಾಷ್ಟಾಕ್ಷರಮಂತ್ರಾರ್ಥ-ವಾಸುದೇವದ್ವಾದಶಾಕ್ಷರಮಂತ್ರಾಂತರ್ಗತಾಂತ್ಯ-ಚತುರಕ್ಷರಾರ್ಥ-ವ್ಯಾಹೃತ್ಯರ್ಥ-ಮಾತೃಕಾಮಂತ್ರಾರ್ಥ -ಪ್ರಣವೋಪಾಸಕಾನಾಂ, ಪಾಪಾವಿದ್ಧ-ದೈತ್ಯಪೂಗಾವಿದ್ಧ ಶ್ರೀವಿಷ್ಣುಭಕ್ತ್ಯಾದ್ಯನಂತಗುಣಪರಿಪೂರ್ಣ ರಮಾವ್ಯತಿರಿಕ್ತ-ಪೂರ್ವಪ್ರಸಿದ್ಧ ವ್ಯತಿರಿಕ್ತ-ಅನಂತವೇದಪ್ರತಿಪಾದ್ಯಮುಖ್ಯತಮಾ-ಅನಂತಜೀವನಿಯಾಮಕಾ ಅನಂತರೂಪಭಗವತ್ಕಾರ್ಯಸಾಧಕ-ಪರಮದಯಾಲು-ಕ್ಷಮಾಸಮುದ್ರ-ಭಕ್ತವತ್ಸಲ-ಭಕ್ತಾಪರಾಧಸಹಿಷ್ಣು-ಶ್ರೀಮುಖ್ಯಪ್ರಾಣಾವತಾರಭೂತಾನಾಂ,
ಅಜ್ಞ-ಜ್ಞಾನಾರ್ಥಿ-ಜ್ಞಾನಯೋಗ್ಯ ಭಗವತ್ಕೃಪಾಪಾತ್ರಭೂತ-ಸಲ್ಲೋಕಕೃಪಾಲು ಬ್ರಹ್ಮರುದ್ರಾದ್ಯರ್ಥಿತ-ಭಗವದಾಜ್ಞಾಂ ಶಿರಸಿ ಪರಮಾದರೇಣ ಅನರ್ಘ್ಯಶಿರೋರತ್ನವನ್ನಿಧಾಯ ತಥಾಽಶೇಷ ದೇವತಾಪ್ರಾರ್ಥನಾನಾಂ ಹಾರವದ್ಧೃಧಿ ನಿಧಾಯ, ಸರ್ವಸ್ವಕೀಯಸಜ್ಜನಾನುಗ್ರಹೇಚ್ಛಯಾ ಕರ್ಮಭುವ್ಯವತೀರ್ಣಾನಾಂ, ತಥಾಽವತೀರ್ಯ ಸಕಲಸಚ್ಛಾಸ್ತ್ರಕರ್ತೄಣಾಂ, ಸಕಲದುರ್ಮತಭಂಜಕಾನಾಂ, ಅನಾದಿತಃ ಸತ್ಸಂಪ್ರದಾಯಪರಂಪರಾಪ್ರಾಪ್ತ-
ಶ್ರೀಮದ್ವೈಷ್ಣವಸಿದ್ಧಾಂತಪ್ರತಿಷ್ಠಾಪಕಾನಾಂ,
ಅತ ಏವ ಭಗವತ್ಪರಮಾನುಗ್ರಹಪಾತ್ರಭೂತಾನಾಂ, ಸರ್ವದಾ ಭಗವದಾಜ್ಞಯಾ ಭಗವತ್ಸನ್ನಿಧೌ ಪೂಜ್ಯಾನಾಂ, ತಥಾ ಭಗವತಾ ದತ್ತವರಾಣಾಂ, ದ್ವಾತ್ರಿಂಶಲ್ಲಕ್ಷಣೋಪೇತಾನಾಂ, ತಥಾ ಸಮಗ್ರಗುರುಲಕ್ಷಣೋಪೇತಾನಾಂ, ಅಸಂಶಯಾನಾಂ, ಪ್ರಸಾದಮಾತ್ರೇಣ ಸ್ವಭಕ್ತಾಶೇಷಸಂಶಯಚ್ಛೇತೄಣಾಂ,
ಪ್ರಣವಾದ್ಯಶೇಷ ವೈಷ್ಣವಮಂತ್ರೋದ್ಧಾರಕಾಣಾಂ, ಸರ್ವದಾ ಸರ್ವವೈಷ್ಣವಮಂತ್ರಜಾಪಕಾನಾಂ, ಸಂಸಿದ್ಧಸಪ್ತಕೋಟಿಮಹಾಮಂತ್ರಾಣಾಂ, ಭಗವತಿ ಭಕ್ತ್ಯತಿಶಯೇನ ಭಗವದುಪಾಸನಾರ್ಥಂ ಸ್ವೇಚ್ಛಯಾಗೃಹೀತರೂಪಾಣಾಂ, ತತ್ರ ತತ್ರ ಪೃಥಕ್ ಪೃಥಕ್ ಭಗವತೋಽನಂತರೂಪೇಷು ಪೃಥಕ್ ಪೃಥಕ್ವೇದೋಕ್ತ-ತದನುಕ್ತ-ಭಾರತೋಕ್ತ ತದನುಕ್ತ-ಸಂಪ್ರದಾಯಾಗತ ಸ್ವೇತರ-ಸ್ವಾಭಿನ್ನತಯಾಽಪ್ಯಶೇಷಶಕ್ತಿವಿಶೇಷಾಭ್ಯಾಂ, ಪೃಥಕ್ವ್ಯವಹಾರ ವಿಷಯ-ಸರ್ವಸಾಮರ್ಥ್ಯೋಪೇತ-ನಿರವಧಿಕಾನಂತ-ಅನವದ್ಯ-ಕಲ್ಯಾಣಗುಣಪರಿಪೂರ್ಣ-ಅನಂತಗುಣೋಪಸಂಹರ್ತೄಣಾಂ
ತಥಾ ವೇದೋಕ್ತ-ಸರ್ವಕ್ರಿಯೋಪಸಂಹರ್ತೄಣಾಂ, ಏವಂ ಅನಂತರೂಪಾ-ಅವಯವಗುಣ ಕ್ರಿಯಾಜಾತ್ಯವಸ್ಥಾವಿಶಿಷ್ಟ-ಭಗವದುಪಾಸಕಾನಾಂ, ಪರಮದಯಾಲೂನಾಂ, ಕ್ಷಮಾಸಮುದ್ರಾಣಾಂ, ಭಕ್ತವತ್ಸಲಾನಾಂ, ಭಕ್ತಾಪರಾಧಸಹಿಷ್ಣೂನಾಂ, ಸ್ವಭಕ್ತಾನ್ ದುರ್ಮಾರ್ಗಾತ್-ಉದ್ಧೃತ್ಯ ಸನ್ಮಾರ್ಗಸ್ಥಾಪಕಾನಾಂ, ಸ್ವಭಕ್ತಂ ಮಾಮುದ್ದಿಶ್ಯ ಭಗವತಃ ಪುರಃ ಪರಮದಯಾಲೋ ಕ್ಷಮಾಸಮುದ್ರ ಭಕ್ತವತ್ಸಲ ಭಕ್ತಾಪರಾಧಸಹಿಷ್ಣೋ ತ್ವದಧೀನಂ ದೀನಂ ದೂನಂ ಅನಾಥಂ ಶರಣಾಗತಮನೇನಮುದ್ಧರೇತಿ ವಿಜ್ಞಾಪನಕರ್ತೄಣಾಂ,
ಸರ್ವಜ್ಞಶಿರೋಮಣೀನಾಂ, ಅಶೇಷಗುರ್ವಂತರ್ಯಾಮಿಣಾಂ, ಸದಾಭಗವತ್ಪರಾಣಾಂ, ಭಗವತೋಽನ್ಯತ್ರ-ಸರ್ವವಸ್ತುಷು ಮನಃಸಂಗರಹಿತಾನಾಂ, ಸರ್ವತ್ರ ಸರ್ವದಾ ಸರ್ವಾಕಾರ-ಸರ್ವಾಧಾರ-ಸರ್ವಾಶ್ರಯ-ಸರ್ವೋತ್ಪಾದಕ-ಸರ್ವಪಾಲಕ-ಸರ್ವಸಂಹಾರಕ-ಸರ್ವನಿಯಾಮಕ-ಸರ್ವಪ್ರೇರಕ-ಸರ್ವಪ್ರವರ್ತಕ-ಸರ್ವನಿವರ್ತಕ-ಯಥಾಯೋಗ್ಯಂ ಸರ್ವಜ್ಞಾನಾಜ್ಞಾನಬಂಧಮೋಕ್ಷಪ್ರದ-ಸರ್ವಸತ್ತಾಪ್ರದ- ಸರ್ವಶಬ್ದವಾಚ್ಯ-ಸರ್ವಶಬ್ದಪ್ರವೃತ್ತಿನಿಮಿತ್ತ-ಸರ್ವಗುಣಾತಿಪರಿಪೂರ್ಣಮುಖ್ಯತಮ-ಸರ್ವದೋಷಾತಿದೂರ-ಸರ್ವಾಚಿಂತ್ಯ-ಸರ್ವೋತ್ತಮ-ಸರ್ವೇಶ್ವರ-ಸರ್ವಾತ್ಯಂತವಿಲಕ್ಷಣ-ಸ್ವಗತಭೇದವಿವರ್ಜಿತತ್ವಾದಿನಾ-ಭಗವದ್ದ್ರಷ್ಟೄಣಾಂ,
ಅಭಿಮಾನಾದಿ ಸರ್ವದೋಷದೂರಾಣಾಂ, ಅಸೂಯೇರ್ಷ್ಯಾದಿ-ಅಶೇಷ-ಮನೋದೋಷನಿವರ್ತಕಾನಾಂ, ನಿತ್ಯಾಪರೋಕ್ಷೀಕೃತ-ರಮಾಯುಕ್ತ-ಅಶೇಷಭಗವದ್ರೂಪಾಣಾಂ, ಅತ ಏವ ವಿಲೀನಾಶೇಷ-ಪ್ರಕೃತಿಬಂಧಾನಾಂ ಅತ ಏವ ದೂರೋತ್ಸಾರಿತ-ಅಶೇಷ-ಅನಿಷ್ಟಾನಾಂ, ಅಥ ಏವ ಅಶೇಷಭಕ್ತಾಶೇಷಾನಿಷ್ಟನಿವರ್ತಕಾನಾಂ, ಪ್ರಣವೋಪಾಸಕಾನಾಂ, ಅಸ್ಮದಾದಿಗುರೂಣಾಂ, ಶ್ರೀಮದಾನಂದತೀರ್ಥಶ್ರೀಮಚ್ಚರಣಾನಾಂ ಅಂತರ್ಯಾಮಿನ್
ಅನಿರುದ್ಧ-ಪ್ರದ್ಯುಮ್ನ-ಸಂಕರ್ಷಣ-ವಾಸುದೇವಾತ್ಮಕ ಶ್ರೀಮಧ್ವವಲ್ಲಭ ಶ್ರೀಲಕ್ಷ್ಮೀವೇದವ್ಯಾಸಾತ್ಮಕ-ಅಂಡಸ್ಥಿತ-ಅನಂತರೂಪಾವಯವ-ಗುಣಕ್ರಿಯಾ-ಜಾತ್ಯವಸ್ಥಾವಿಶಿಷ್ಟ-ರಮಾಯುಕ್ತ-ಕ್ಷೀರಾಬ್ಧಿ-ಶೇಷಶಾಯಿ ಶ್ರೀಪದ್ಮನಾಭಾತ್ಮಕ ಅಂಡಾದ್ಬಹಿರಭಿವ್ಯಕ್ತ-ಶುದ್ಧಸೃಷ್ಟಿತ್ವೇನಾಭಿಮತ-ಶ್ರೀಚತುರ್ಮುಖ-ಮುಖ್ಯಪ್ರಾಣೋಪಾಸ್ಯತ್ವಾದಿ-ಅನೇಕಪ್ರಯೋಜನಕ-ಅನಂತಾನಂತರೂಪ-ಮೂಲಭೂತ
ತಥಾಽಶೇಷ-ಜಗತ್ಪಾಲನಪ್ರಯೋಜನಕ-ಶಾಂತಿಪತಿ-ಅನಿರುದ್ಧ-ಮೂಲಭೂತ ತಥಾಽಶೇಷ-ಜಗತ್ಸೃಷ್ಟಿಪ್ರಯೋಜನಕ-ಕೃತಿಪತಿ-ಪ್ರದ್ಯುಮ್ನ-ಮೂಲಭೂತ ತಥಾಽಶೇಷ-ಜಗತ್ಸಂಹಾರಪ್ರಯೋಜನಕ-ಜಯಾಪತಿ-ಸಂಕರ್ಷಣ-ಮೂಲಭೂತ ತಥಾ ಸ್ವಸ್ವ-ಸಮಗ್ರಯೋಗ್ಯತಾಭಿಜ್ಞ ಪರಮಾನುಗ್ರಹಶೀಲ-ಭಗವತ್ಪ್ರೇರಿತ-ಚತುರ್ಮುಖಾದಿ-ಸದ್ಗುರೂಪದಿಷ್ಟ-ಸ್ವಸ್ವಯೋಗ್ಯ-ಭಗವದ್ರೂಪ-ಗುಣೋಪಾಸನಯಾ ಸಂಜಾತ-ಸ್ವಸ್ವಯೋಗ್ಯ-ಭಗವದ್ರೂಪ-ವಿಶೇಷದರ್ಶನಭೋಗಾಭ್ಯಾಂ ವಿನಷ್ಟಾನಿಷ್ಟ-ಸಂಚಿತ-ಪ್ರಾರಬ್ಧಲಕ್ಷಣ-ಅಶೇಷಕರ್ಮಾಣಾಂ, ಸ್ವಸ್ವಯೋಗ್ಯತಾನುಸಾರೇಣ ಸಂಪೂರ್ಣಸಾಧನಾನಾಂ, ಪೂರ್ವಕಲ್ಪೇ ಬ್ರಹ್ಮಣಾ ಸಹ ವಿರಜಾನದೀಸ್ನಾನೇನ ತ್ಯಕ್ತಲಿಂಗಾನಾಂ, ತಥಾ ವಿನಷ್ಟಾವಶಿಷ್ಟೇಷ್ಟ-ಅಶೇಷ-ಪ್ರಾರಬ್ಧಕರ್ಮಾಣಾಂ ಪ್ರಲಯಕಾಲೇ ಭಗವದುದರೇ ವಸತಾಂ
ಆನಂದಮಾತ್ರವಪುಷಾಂ, ತದನುಭವರಹಿತಾನಾಂ ಸ್ವಸ್ವಯೋಗ್ಯ-ಭಗವದ್ರೂಪ-ವಿಶೇಷಧ್ಯಾನರತಾನಾಂ, ಸೃಷ್ಟಿಕಾಲೇ ಭಗವದಾಜ್ಞಯಾ ಭಗವದುದರಾದ್ಬಹಿರ್ನಿರ್ಗತಾನಾಂ ಶ್ರೀಶ್ವೇತದ್ವೀಪದರ್ಶನಂ ನಿಮಿತ್ತೀಕೃತ್ಯ ಪ್ರಧಾನಾವರಣಭೂತಸ್ವೇಚ್ಛಾಪಸರೇಣ ಸ್ವಸ್ವಯೋಗ್ಯ-ಆನಂದಾವಿರ್ಭಾವಲಕ್ಷಣ-ಮುಕ್ತಿಪ್ರದಾನಪ್ರಯೋಜನಕ-ಮಾಯಾಪತಿ ಶ್ರೀವಾಸುದೇವಾತ್ಮಕ-
ಲಕ್ಷ್ಮ್ಯಾತ್ಮಕ-ಪ್ರಲಯಾಬ್ಧಿಸ್ಥ-ಶ್ರೀವಟಪತ್ರಶಾಯಿ-ಅಶೇಷಜಗದುದರ-ಅಶೇಷಮುಕ್ತ-ನಾಭಿದೇಶೋರ್ಧ್ವಭಾಗ-ಕುಕ್ಷ್ಯಾಖ್ಯದೇಶ-ತ್ರಿವಿಧಾಶೇಷಸಂಸಾರಿ-ನಾಭಿದೇಶಾಖಿಲತಮಃ ಪತಿತ-ನಾಭ್ಯಧೋಭಾಗದೇಶ-ಶ್ರೀಭೂಮ್ಯಾಲಿಂಗಿತ-ಕಾಲಾದಿಚೇಷ್ಟಕ-ಪರಮಾಣ್ವಾದಿ-ಅಶೇಷಕಾಲಾವಯವ-ಸೃಷ್ಟ್ಯಾದಿಕರ್ತೃಶೇಷನಾಮಕ-ಪರಮಪುರುಷನಾಮಕ ಶ್ರೀಚತುರ್ಮುಖ-ಮುಖ್ಯಪ್ರಾಣೋಪಾಸಿತಚರಣ-ಅನಿರುದ್ಧಾದಿಚತೂರೂಪಾತ್ಮಕ-ಗಾಯತ್ರೀನಾಮಕ-ಸವಿತೃನಾಮಕ-ರೂಪವಿಶೇಷಾತ್ಮಕ-ವ್ಯಾಪ್ತರೂಪ-ಬೃಹಚ್ಛರೀರ-
ಶೂನ್ಯಾಭಿದ-ಕಾಲಾಭಿದ-ಕೇವಲಾಭಿದ-ಬ್ರಹ್ಮಾಭಿದ-ಅನಂತಾಭಿಧ-ರೂಪವಿಶೇಷಾತ್ಮಕ-ನಿರುಪಚರಿತ-ಮೂಲರೂಪನಿರುಪಚರಿತ-ವ್ಯಾಪ್ತಪ್ರತಿಪಾದ್ಯ-ಅನಂತತೇಜಃ ಪುಂಜ ತಾದೃಶ-ರಮಾಯುಕ್ತರೂಪವಿಶೇಷಾತ್ಮಕ-ಗಾಯತ್ರೀಭೂತವಾಕ್-ಪೃಥಿವೀಶರೀರಹೃದಯಭೇದೇನ ಷಡ್ವಿಧಗಾಯತ್ರೀನಾಮಕ ಲೋಕವೇದಸಮೀರ-ರಮಾಂತರ್ಗತ-ಪ್ರಣವಾಖ್ಯ ತುರೀಯಪಾದೋಪೇತ-ಗಾಯತ್ರೀಪಾದಚತುಷ್ಟಯಪ್ರತಿಪಾದ್ಯ-ವೈಕುಂಠಸ್ಥಿತ-ಅನಂತಾಸನಸ್ಥಿತ-ಶ್ವೇತದ್ವೀಪಸ್ಥಿತ-ಸರ್ವಜೀವಸ್ಥಿತ-ರೂಪಭೇದೇನ ಚತೂರೂಪಾತ್ಮಕ ದೇಹವ್ಯಾಪ್ತ-ದೇಹಾಂತರ್ಯಾಮಿಜೀವವ್ಯಾಪ್ತಜೀವಂತರ್ಯಾಮಿರೂಪಭೇದೇನ ಚತೂರೂಪಾತ್ಮಕ
ನಿರುಪಚರಿತ-ಸರ್ವವಾಗರ್ಥಪ್ರತಿಪಾದಕ ಶ್ರೀದೇವ್ಯಾದಿ-ರಮಾರೂಪಾಷ್ಟಕ-ಅಭಿಮನ್ಯಮಾನ-ಚಕ್ರಶಂಖವರಾಭಯಯುಕ್ತಹಸ್ತಚತುಷ್ಟಯೋಪೇತ-ಪ್ರದೀಪವರ್ಣ-ಸರ್ವಾಭರಣಭೂಷಿತ-ವಿಶ್ವಾದಿಭಗವದ್ರೂಪಾಷ್ಟಕ-ಪ್ರತಿಪಾದಕ-ಅಕಾರಾದ್ಯಷ್ಟಾಕ್ಷರಾತ್ಮಕ-ಶ್ರೀಮದ್ಪ್ರಣವಾದ್ಯಷ್ಟಮಹಾಮಂತ್ರ-ಪ್ರತಿಪಾದ್ಯಷ್ಟರೂಪಾತ್ಮಕ-ಮಂತ್ರಾಧ್ಯಾಯೋಕ್ತ-ಭೂವರಾಹಾದ್ಯಶೇಷ-ವೈಶ್ರೀಲಕ್ಷ್ಮೀನೃಸಿಂಹಾತ್ಮಕ-ಪರಮದಯಾಲೋ, ಕ್ಷಮಾಸಮುದ್ರ, ಭಕ್ತವತ್ಸಲ, ಭಕ್ತಾಪರಾಧಸಹಿಷ್ಣೋ, ದೇಶಕಾಲಾಧಿಪತೇ ದೇಹೇಂದ್ರಿಯಾದಿಪತೇ ಸೂರ್ಯವಂಶಧ್ವಜ ರಘುಕುಲತಿಲಕ-ಲಕ್ಷ್ಮಣ-ಭರತ-ಶತ್ರುಘ್ನಾಗ್ರಜ ಶ್ರೀಹನುಮದುಪಾಸಿತಚರಣ ಸೀತಾಪತೇ ಶ್ರೀರಾಮಚಂದ್ರ !
ತ್ವದಾಜ್ಞಯಾ ತ್ವತ್ಪ್ರಸಾದಾತ್ ತ್ವತ್ಪ್ರೇರಣಯಾ ತ್ವತ್ಪ್ರೀತ್ಯರ್ಥಂ ತ್ವಾಮುದ್ದಿಶ್ಯ ತ್ವಾಮನುಸ್ಮರನ್ನೇವ ತ್ವದಾಜ್ಞಯಾ- ನಿಯತೇನ ಮನ್ನಿಯಾಮಕೇನ ಸತ್ತಾಪ್ರದವಾಯುನಾಮಕ ಚೇಷ್ಟಾಪ್ರದಪ್ರಾಣನಾಮಕ-ಧಾರಣಾಪ್ರದಧರ್ಮನಾಮಕ-ಮುಕ್ತಿಪ್ರದಭಕ್ತಿನಾಮಕ-ರೂಪವಿಶೇಷೈಃ ಮದ್ಧೃದಿಸ್ಥಿತೇನ ಪರಮದಯಾಲುನಾ ಕ್ಷಮಾಸಮುದ್ರೇಣ ಭಕ್ತವತ್ಸಲೇನ ಭಕ್ತಾಪರಾಧಸಹಿಷ್ಣುನಾ ಸರ್ವಸ್ವಾಮಿನಾ ಸರ್ವಪ್ರೇರಕೇಣ ಸರ್ವತಾತ್ತ್ವಿಕದೇವತಾಪ್ರೇರಕೇಣ, ಸರ್ವತಾತ್ತ್ವಿಕಾಸುರಭಂಜಕೇನ ತಥಾ ತತ್ಪ್ರೇರಣಾಪ್ರಯುಕ್ತಾಶೇಷದುರ್ಮತಭಂಜಕೇನ, ಅತ ಏವ ಪ್ರಭಂಜನಶಬ್ದವಾಚ್ಯೇನ,
ಪ್ರತಿದಿನಂ ಪ್ರತಿಕ್ಷಣಂ ಬುದ್ಧಿಶೋಧಕೇನ, ಸರ್ವಕರ್ಮಕರ್ತ್ರಾ ಸರ್ವಕರ್ಮಕಾರಯಿತ್ರಾ ಸರ್ವಕರ್ಮಸ್ವಾಮಿನಾ ಸರ್ವಕರ್ಮಸಮರ್ಪಕೇಣ ಸರ್ವಕರ್ಮಫಲಭೋಕ್ತ್ರಾ ಸರ್ವಕರ್ಮಫಲಭೋಜಯಿತ್ರಾ ಸರ್ವಕರ್ಮಪ್ರೇರಕೇಣ ಸರ್ವಕರ್ಮೋದ್ಬೋಧಕೇನ ಸರ್ವಕರ್ಮಶುದ್ಧಿಪ್ರದೇನ ಸರ್ವಕರ್ಮಸಿದ್ಧಿಪ್ರದೇನ ಸರ್ವಕರ್ಮನಿಷ್ಠೇನ ಸರ್ವಕರ್ಮಸಾಕ್ಷಿಣಾ ಸರ್ವಕರ್ಮನಿಷ್ಠಭಗವದ್ರೂಪೋಪಾಸಕೇನ
ಅತ ಏವ ಅಶೇಷಜೀವನಿಃಸಂಖ್ಯಾನಾದಿಕಾಲೀನ-ಧರ್ಮಾಧರ್ಮ-ದ್ರಷ್ಟುಸ್ವೇಚ್ಛಯೋದ್ಬೋಧಕೇನ ತದ್ವಾಚಕ-ಕಪಿಲೋಪಾಸಕೇನ, ರಮಾವ್ಯತಿರಿಕ್ತ-ಪೂರ್ವಪ್ರಸಿದ್ಧವ್ಯತಿರಿಕ್ತ-ಅನಂತವೇದಪ್ರತಿಪಾದ್ಯಮುಖ್ಯತಮೇನ, ಅನಂತಗುಣಪರಿಪೂರ್ಣೇನ ಸರ್ವದೋಷದೂರೇಣ ತ್ವಚ್ಚಿತ್ತಾಭಿಜ್ಞೇನ ತ್ವಚ್ಚಿತ್ತಾನುಸಾರಿಚಿತ್ತೇನ ತ್ವತ್ಪರಮಾನುಗ್ರಹಪಾತ್ರಭೂತೇನ ಮದ್ಯೋಗ್ಯತಾಭಿಜ್ಞೇನ ಶ್ರೀಭಾರತೀರಮಣೇನ ರುದ್ರಾದ್ಯಶೇಷದೇವತೋಪಾಸಿತ-ಚರಣೇನ ಮಮ ಸರ್ವಾಸ್ವವಸ್ಥಾಸು ಚಿತ್ರಧಾ ವಿಚಿತ್ರಧಾ ತ್ವದುಪಾಸಕೇನ, ಶ್ರೀಮುಖ್ಯಪ್ರಾಣೇನ ಪ್ರೇರಿತಃ ಸನ್
ತ್ವತ್ಸಂಸ್ಮೃತಿಪೂರ್ವಕಂ ಶಯನಾತ್ ಸಮುತ್ಥಾಯಾದ್ಯತನಂ ಸ್ವವರ್ಣಾಶ್ರಮೋಚಿತಂ ದೇಶ-ಕಾಲ-ಅವಸ್ಥೋಚಿತಂ ನಿತ್ಯ-ನೈಮಿತ್ತಿಕ-ಕಾಮ್ಯಭೇದೇನ ತ್ರಿವಿಧಂ ತ್ವತ್ಪೂಜಾತ್ಮಕಂ ಕರ್ಮ ಯಥಾಶಕ್ತಿ ಯಥಾಜ್ಞಪ್ತಿ ಯಥಾವೈಭವಂ ಕರಿಷ್ಯೇ ||
ಮದಾಜ್ಞಾಕಾರಿಭಿಃ ವಿದ್ಯಾಸಂಬಂಧಿಭಿಃ ದೇಹಸಂಬಂಧಿಭಿಶ್ಚ ತ್ವದೀಯೈಃ ಅಶೇಷಜನೈಃ ತ್ವತ್ಸರ್ವಕರ್ಮಕರ್ತೃತ್ವ-ಕಾರಯಿತೃತ್ವಾದಿ-ಅನುಸಂಧಾನಪೂರ್ವಕಂ ಕಾರಯಿಷ್ಯೇ ಚ |
ಇತಿ ಶ್ರೀರಾಘವೇಂದ್ರಾಖ್ಯಯತಿನಾ ಕೃತಮಂಜಸಾ
ಪ್ರಾತಃ ಸಂಕಲ್ಪಗದ್ಯಂ ಸ್ಯಾತ್ ಪ್ರೀತ್ಯೈ ಮಾಧವ ಮಧ್ವಯೋಃ |
| ಇತಿ ಶ್ರೀರಾಘವೇಂದ್ರತೀರ್ಥಪ್ರಣೀತ ಪ್ರಾತಃ ಸಂಕಲ್ಪಗದ್ಯಂ |
Leave a Reply