Jayatirtha stuti

Composer: Shri Satyapriya Tirtharu

ಧಾಟೀ ಶ್ರೀಜಯತೀರ್ಥ-ವರ್ಯ-ವಚಸಾಂ ಚೇಟೀಭವತ್-ಸ್ವರ್ಧುನೀ
ಪಾಟೀರಾನಿಲ-ಫುಲ್ಲ-ಮಲ್ಲಿ-ಸುಮನೋ-ವಾಟೀ-ಲಸದ್-ವಾಸನಾ |
ಪೇಟೀ ಯುಕ್ತಿ-ಮಣಿ-ಶ್ರಿಯಾಂ ಸುಮತಿಭಿಃ ಕೊಟೀರಕೈಃ ಶ್ಲಾಘಿತಾ
ಸಾ ಟೀಕಾ-ನಿಚಯಾತ್ಮಿಕಾ ಮಮ ಚಿರಾದಾಟೀಕತಾಂ ಮಾನಸೇ || ೧ ||

ಟೀಕಾಕೃಜ್ಜಯವರ್ಯ ಸಂಸದಿ ಭವತ್ಯೇಕಾಂತತೋ ರಾಜತಿ
ಪ್ರಾಕಾಮ್ಯಂ ದಧತೇ ಪಲಾಯನ-ವಿಧೌ ಸ್ತೋಕಾನ್ಯ-ಶಂಕಾ ದ್ವಿಷಃ |
ಲೋಕಾಂಧೀಕರಣ-ಕ್ಷಮಸ್ಯ ತಮಸಃ ಸಾ ಕಾಲ-ಸೀಮಾ ಯದಾ
ಪಾಕಾರಾತಿ-ದಿಶಿ ಪ್ರರೋಹತಿ ನ ಚೇದ್ ರಾಕಾ-ನಿಶಾ-ಕಾಮುಕಃ || ೨ ||

ಛಾಯಾ-ಸಂಶ್ರಯಣೇನ ಯಚ್ಚರಣಯೋರಾಯಾಮಿ-ಸಾಂಸಾರಿಕಾ
ಪಾಯಾನಲ್ಪತಮಾತಪ-ವ್ಯತಿಕರ-ವ್ಯಾಯಾಮ-ವಿಕ್ಷೋಭಿತಾಃ |
ಆಯಾಂತಿ ಪ್ರಕಟಾಂ ಮುದಂ ಬುಧ-ಜನಾ ಹೇಯಾನಿ ಧಿಕ್ಕೃತ್ಯ ನಃ
ಪಾಯಾಚ್ಛ್ರೀಜಯರಾಡ್ ದೃಶಾ ಸರಸ-ನಿರ್ಮಾಯಾನುಕಂಪಾರ್ದ್ರಯಾ || ೩ ||

ಶ್ರೀವಾಯ್ವಂಶ-ಸುವಂಶ-ಮೌಕ್ತಿಕಮಣೇಃ ಸೇವಾ-ವಿನಮ್ರ-ಕ್ಷಮಾ-
ದೇವಾಜ್ಞಾನ-ತಮೋ-ವಿಮೋಚನ-ಕಲಾ-ಜೈವಾತೃಕ-ಶ್ರೀ-ನಿಧೇಃ |
ಶೈವಾದ್ವೈತ ಮತಾಟವೀ ಕವಲನಾ ದಾವಾಗ್ನಿ ಲೀಲಾ ಜುಷಃ
ಕೋ ವಾದೀ ಪುರತೋ ಜಯೀಶ್ವರ ಭವೇತ್ ತೇ ವಾದ ಕೋಲಾಹಲೇ || ೪ ||

ನೀಹಾರ-ಚ್ಛವಿ-ಬಿಂಬ-ನಿರ್ಗತ-ಕರ-ವ್ಯೂಹಾಪ್ಲುತೇಂದೂಪಲಾ-
ನಾಹಾರ್ಯ-ಸ್ರುತ-ನೂತನಾಮೃತ-ಪರೀವಾಹಾಲಿ-ವಾಣೀ-ಮುಚಃ |
ಊಹಾಗೋಚರ-ಗರ್ವ-ಪಂಡಿತ-ಪಯೋ-ವಾಹಾನಿಲ-ಶ್ರೀ-ಜುಷೋ
ಮಾಹಾತ್ಮ್ಯಂ ಜಯತೀರ್ಥ ವರ್ಯ ಭವತೋ ವ್ಯಾಹಾರಮತ್ಯೇತಿ ನಃ || ೫ ||

ವಂದಾರು-ಕ್ಷಿತಿ-ಪಾಲ-ಮೌಲಿ-ವಿಲಸನ್ಮಂದಾರ-ಪುಷ್ಪಾವಲೀ
ಮಂದಾನ್ಯ-ಪ್ರಸರನ್ಮರಂದ-ಕಣಿಕಾ-ವೃಂದಾರ್ದ್ರ-ಪಾದಾಂಬುಜಃ |
ಕುಂದಾಭಾಮಲ-ಕೀರ್ತೀರಾರ್ತ-ಜನತಾ-ವೃಂದಾರಕಾನೋಕಹಃ
ಸ್ವಂ ದಾಸಂ ಜಯತೀರ್ಥ-ರಾಟ್ ಸ್ವ-ಕರುಣಾ ಸಂದಾನಿತಂ ಮಾಂ ಕ್ರಿಯಾತ್ || ೬ ||

ಶ್ರೀ-ದಾರಾಂಘ್ರಿ-ನತಃ ಪ್ರತೀಪ-ಸುಮನೋ-ವಾದಾಹವಾಟೋಪ-ನಿ
ರ್ಭೇದಾತಂದ್ರ-ಮತಿಃ ಸಮಸ್ತ-ವಿಭುಧಾಮೊದಾವಲೀ-ದಾಯಕಃ |
ಗೋದಾವರ್ಯುದಯತ್-ತರಂಗ-ನಿಕರ-ಹ್ರೀ-ದಾಯಿ-ಗಂಭೀರ-ಗೀಃ
ಪಾದಾಬ್ಜ-ಪ್ರಣತೇ ಜಯೀ ಕಲಯತು ಸ್ವೇ ದಾಸ-ವರ್ಗೆಽಪಿ ಮಾಮ್ || ೭ ||

ವಿದ್ಯಾ-ವಾರಿಜ-ಷಂಡ-ಚಂಡ-ಕಿರಣೋ ವಿದ್ಯಾ-ಮದ-ಕ್ಷೋದಯದ್
ವಾದ್ಯಾಲೀ-ಕದಲೀ-ಭಿದಾಮರ-ಕರೀ ಹೃದ್ಯಾತ್ಮ-ಕೀರ್ತಿ-ಕ್ರಮಃ |
ಪದ್ಯಾ ಬೋಧ-ತತೇರ್ವಿನಮ್ರ-ಸುರ-ರಾಡುದ್ಯಾನ-ಭೂಮೀ-ರುಹೋ
ದದ್ಯಾಚ್ಛ್ರಿ ಜಯತೀರ್ಥ-ರಾಡ್ ಧಿಯಮುತಾವದ್ಯಾನಿ ಭಿದ್ಯಾನ್ಮಮ || ೮ ||

ಆಭಾಸತ್ವಮಿಯಾಯ ತಾರ್ಕಿಕ-ಮತಂ ಪ್ರಾಭಾಕರ-ಪ್ರಕ್ರಿಯಾ
ಶೋಭಾಂ ನೈವ ಬಭಾರ ದೂರ-ನಿಹಿತಾ ವೈಭಾಷಿಕಾದ್ಯುಕ್ತಯಃ |
ಹ್ರೀಭಾರೆಣ ನತಾಶ್ಚ ಸಂಕರ-ಮುಖಾಃ ಕ್ಷೋಭಾಕರೋ ಭಾಸ್ಕರಃ
ಶ್ರೀ-ಭಾಶ್ಯಂ ಜಯ-ಯೋಗಿನಿ ಪ್ರವದತಿ ಸ್ವಾಭಾವಿಕೋದ್ಯನ್ಮತೌ || ೯ ||

ಬಂಧಾನಃ ಸರಸಾರ್ಥ-ಶಬ್ದ-ವಿಲಸದ್-ಬಂಧಾಕರಾಣಾಂ ಗಿರಾಂ
ಮಿಂಧಾನೊಽರ್ಕ-ವಿಭಾ-ಪರಿಭವ-ಝರೀ-ಸಂಧಾಯಿನಾ ತೇಜಸಾ |
ರುಂಧಾನೋ ಯಶಸಾ ದಿಶಃ ಕವಿ-ಶಿರಃ-ಸಂಧಾರ್ಯಮಾಣೆನ ಮೇ
ಸಂಧಾನಂ ಸ ಜಯೀ ಪ್ರಸಿದ್ಧ-ಹರಿ-ಸಂಬಂಧಾಗಮಸ್ಯ ಕ್ರಿಯಾತ್ || ೧೦ ||

ಸಂಖ್ಯಾವದ್-ಗಣ-ಗೀಯಮಾನ-ಚರಿತಃ ಸಂಖ್ಯಾಕ್ಷಪಾದಾದಿ-ನಿಃ
ಸಂಖ್ಯಾಸತ್-ಸಮಯಿ-ಪ್ರಭೇದ-ಪಟಿಮ-ಪ್ರಖ್ಯಾತ-ವಿಖ್ಯಾತಿಗಃ |
ಮುಖ್ಯಾವಾಸ-ಗೃಹಂ ಕ್ಷಮಾ-ದಮ-ದಯಾ-ಮುಖ್ಯಾಮಲ-ಶ್ರೀ-ಧುರಾಂ
ವ್ಯಾಖ್ಯಾನೇ ಕಲಯೇದ್ ರತಿಂ ಜಯವರಾಭಿಖ್ಯಾ-ಧರೊ ಮದ್-ಗುರುಃ || ೧೧ ||

ಆಸೀನೊ ಮರುದಂಶ-ದಾಸ-ಸುಮನೋ-ನಾಸೀರ-ದೇಶೇ ಕ್ಷಣಾದ್
ದಾಸೀಭೂತ-ವಿಪಕ್ಷ-ವಾದಿ-ವಿಸರಃ ಶಾಸೀ ಸಮಸ್ತೈನಸಾಮ್ |
ವಾಸೀ ಹೃತ್ಸು ಸತಾಂ ಕಲಾ-ನಿವಹ-ವಿನ್ಯಾಸೀ ಮಮಾನಾರತಂ
ಶ್ರೀ-ಸೀತಾ-ರಮಣಾರ್ಚಕಃ ಸ ಜಯರಾಡಾಸೀದತಾಂ ಮಾನಸೇ || ೧೨ ||

ಪಕ್ಷೀಶಾಸನ-ಪಾದ-ಪೂಜನ-ರತಃ ಕಕ್ಷೀಕೃತೊದ್ಯದ್-ದಯೊ
ಲಕ್ಷೀಕೃತ್ಯ ಸಭಾ-ತಲೆ ರಟದಸತ್-ಪಕ್ಷೀಶ್ವರಾನಕ್ಷಿಪತ್ |
ಅಕ್ಷೀಣ-ಪ್ರತಿಭಾ-ಭಾರೊ ವಿಧಿ-ಸರೊಜಾಕ್ಷೀ-ವಿಹಾರಾಕರೊ
ಲಕ್ಷ್ಮೀಂ ನಃ ಕಲಯೆಜ್ಜಯೀ ಸುಚಿರಮಧ್ಯಕ್ಷೀಕೃತಾಧೋಕ್ಷಜಾಂ || ೧೩ ||

ಯೆನಾಗಾಹಿ ಸಮಸ್ತ-ಶಾಸ್ತ್ರ-ಪೃತನಾ-ರತ್ನಾಕರೊ ಲೀಲಯಾ
ಯೆನಾಖಂಡಿ ಕುವಾದಿ-ಸರ್ವ-ಸುಭಟ-ಸ್ತೋಮೊ ವಚಃ-ಸಾಯಕೈಃ |
ಯೆನಾಸ್ಥಾಪಿ ಚ ಮಧ್ವ-ಶಾಸ್ತ್ರ-ವಿಜಯ-ಸ್ತಂಭೊ ಧರಾ-ಮಂಡಲೇ
ತಂ ಸೇವೇ ಜಯತೀರ್ಥ-ವೀರಮನಿಶಂ ಮಧ್ವಾಖ್ಯ-ರಾಜಾದೃತಮ್ ||೧೪ ||

ಯದೀಯ-ವಾಕ್-ತರಂಗಾಣಾಂ ವಿಪ್ಲುಷೋ ವಿದುಷಾಂ ಗಿರಃ |
ಜಯತಿ ಶ್ರೀಧರಾವಾಸೋ ಜಯತೀರ್ಥ-ಸುಧಾಕರಃ || ೧೫ ||

ಸತ್ಯಪ್ರಿಯ-ಯತಿ-ಪ್ರೋಕ್ತಂ ಶ್ರೀ-ಜಯಾರ್ಯ-ಸ್ತವಂ ಶುಭಂ |
ಪಠನ್ ಸಭಾಸು ವಿಜಯೀ ಲೋಕೇಷೂತ್ತಮತಾಂ ವ್ರಜೇತ್ || ೧೬ ||

|| ಇತಿ ಶ್ರೀ ಸತ್ಯಪ್ರಿಯತೀರ್ಥವಿರಚಿತ ಶ್ರೀಜಯತೀರ್ಥಸ್ತುತಿ: ಸಮಾಪ್ತಾ ||
|| ಶ್ರೀ ಕೃಷ್ಣಾರ್ಪಣಮಸ್ತು ||

---

dhATI shrIjayatIrtha-varya-vachasAM chETIbhavat-svardhunI
pATIrAnila-phulla-malli-sumanO-vATI-lasad-vAsanA |
pETI yukti-maNi-shriyAM sumatibhiH koTIrakaiH shlAghitA
sA TIkA-nichayAtmikA mama chirAdATIkatAM mAnasE || 1 ||

TIkAkRujjayavarya saMsadi bhavatyEkAMtatO rAjati
prAkAmyaM dadhatE palAyana-vidhau stOkAnya-shaMkA dviShaH |
lOkAMdhIkaraNa-kShamasya tamasaH sA kAla-sImA yadA
pAkArAti-dishi prarOhati na chEd rAkA-nishA-kAmukaH || 2 ||

ChAyA-saMshrayaNEna yachcharaNayOrAyAmi-sAMsArikA
pAyAnalpatamAtapa-vyatikara-vyAyAma-vikShObhitAH |
AyAMti prakaTAM mudaM budha-janA hEyAni dhikkRutya naH
pAyAchChrIjayarAD dRushA sarasa-nirmAyAnukaMpArdrayA || 3 ||

shrIvAyvaMsha-suvaMsha-mauktikamaNEH sEvA-vinamra-kShamA-
dEvAj~jAna-tamO-vimOchana-kalA-jaivAtRuka-shrI-nidhEH |
shaivAdvaita matATavI kavalanA dAvAgni lIlA juShaH
kO vAdI puratO jayIshvara bhavEt tE vAda kOlAhalE || 4 ||

nIhAra-chChavi-biMba-nirgata-kara-vyUhAplutEMdUpalA-
nAhArya-sruta-nUtanAmRuta-parIvAhAli-vANI-muchaH |
UhAgOchara-garva-paMDita-payO-vAhAnila-shrI-juShO
mAhAtmyaM jayatIrtha varya bhavatO vyAhAramatyEti naH || 5 ||

vaMdAru-kShiti-pAla-mauli-vilasanmaMdAra-puShpAvalI
maMdAnya-prasaranmaraMda-kaNikA-vRuMdArdra-pAdAMbujaH |
kuMdAbhAmala-kIrtIrArta-janatA-vRuMdArakAnOkahaH
svaM dAsaM jayatIrtha-rAT sva-karuNA saMdAnitaM mAM kriyAt || 6 ||

shrI-dArAMghri-nataH pratIpa-sumanO-vAdAhavATOpa-ni
rbhEdAtaMdra-matiH samasta-vibhudhAmodAvalI-dAyakaH |
gOdAvaryudayat-taraMga-nikara-hrI-dAyi-gaMbhIra-gIH
pAdAbja-praNatE jayI kalayatu svE dAsa-varge&pi mAm || 7 ||

vidyA-vArija-ShaMDa-chaMDa-kiraNO vidyA-mada-kShOdayad
vAdyAlI-kadalI-bhidAmara-karI hRudyAtma-kIrti-kramaH |
padyA bOdha-tatErvinamra-sura-rADudyAna-bhUmI-ruhO
dadyAchChri jayatIrtha-rAD dhiyamutAvadyAni bhidyAnmama || 8 ||

AbhAsatvamiyAya tArkika-mataM prAbhAkara-prakriyA
shObhAM naiva babhAra dUra-nihitA vaibhAShikAdyuktayaH |
hrIbhAreNa natAshcha saMkara-mukhAH kShObhAkarO bhAskaraH
shrI-bhAshyaM jaya-yOgini pravadati svAbhAvikOdyanmatau || 9 ||

baMdhAnaH sarasArtha-shabda-vilasad-baMdhAkarANAM girAM
miMdhAno&rka-vibhA-paribhava-jharI-saMdhAyinA tEjasA |
ruMdhAnO yashasA dishaH kavi-shiraH-saMdhAryamANena mE
saMdhAnaM sa jayI prasiddha-hari-saMbaMdhAgamasya kriyAt || 10 ||

saMkhyAvad-gaNa-gIyamAna-charitaH saMkhyAkShapAdAdi-niH
saMkhyAsat-samayi-prabhEda-paTima-prakhyAta-vikhyAtigaH |
mukhyAvAsa-gRuhaM kShamA-dama-dayA-mukhyAmala-shrI-dhurAM
vyAkhyAnE kalayEd ratiM jayavarAbhikhyA-dharo mad-guruH || 11 ||

AsIno marudaMsha-dAsa-sumanO-nAsIra-dEshE kShaNAd
dAsIbhUta-vipakSha-vAdi-visaraH shAsI samastainasAm |
vAsI hRutsu satAM kalA-nivaha-vinyAsI mamAnArataM
shrI-sItA-ramaNArchakaH sa jayarADAsIdatAM mAnasE || 12 ||

pakShIshAsana-pAda-pUjana-rataH kakShIkRutodyad-dayo
lakShIkRutya sabhA-tale raTadasat-pakShIshvarAnakShipat |
akShINa-pratibhA-bhAro vidhi-sarojAkShI-vihArAkaro
lakShmIM naH kalayejjayI
suchiramadhyakShIkRutAdhOkShajAM || 13 ||

yenAgAhi samasta-shAstra-pRutanA-ratnAkaro lIlayA
yenAkhaMDi kuvAdi-sarva-subhaTa-stOmo vachaH-sAyakaiH |
yenAsthApi cha madhva-shAstra-vijaya-staMbho dharA-maMDalE
taM sEvE jayatIrtha-vIramanishaM madhvAkhya-rAjAdRutam ||14 ||

yadIya-vAk-taraMgANAM vipluShO viduShAM giraH |
jayati shrIdharAvAsO jayatIrtha-sudhAkaraH || 15 ||

satyapriya-yati-prOktaM shrI-jayArya-stavaM shubhaM |
paThan sabhAsu vijayI lOkEShUttamatAM vrajEt || 16 ||

|| iti shrI satyapriyatIrthavirachita shrIjayatIrthastuti: samAptA ||
|| shrI kRuShNArpaNamastu ||