Krishnamurti kanna

Composer : Shri Purandara dasaru

ಕೃಷ್ಣಮೂರ್ತಿ ಕಣ್ಣ ಮುಂದೆ ನಿಂತಿದಂತಿದೆ ||ಪ||

ಕಷ್ಟಗಳೆಲ್ಲಾ ಪರಿಹರಿಸಿ ಮನ-
ದಿಷ್ಟಾರ್ಥಗಳನೆಲ್ಲಾ ಕೊಟ್ಟು ರಕ್ಷಿಸುವಂಥ || ಅ||

ಮಸ್ತಕದಲಿ ಮಾಣಿಕದ ಕಿರೀಟ
ಕಸ್ತೂರಿ ತಿಲಕದಿಂದೆಸೆವ ಲಲಾಟ
ಶಿಸ್ತಿಲಿ ಕೊಳಲನೂದುವ ಓರೆ ನೋಟ
ಕೌಸ್ತುಭ ಎಡಬಲದಲಿ ಓಲಾಟ || ೧||

ಮಘಮಘಿಸುವ ಸೊಬಗಿನ ಸುಳಿಗುರುಳು
ಚಿಗುರು ತುಳಸಿ ವನಮಾಲೆಯ ಕೊರಳು
ಬಗೆ ಬಗೆ ಹೊನ್ನುಂಗುರವಿಟ್ಟ ಬೆರಳು
ಸೊಬಗಿನ ನಾಭಿಯ ತಾವರೆ ಯರಳು ||೨||

ಉಡುದಾರ ವಡ್ಡ್ಯಾಣ ನಿಖಿಲಾಭರಣ
ಉಡುಗೆ ಪೀತಾಂಬರ ರವಿಶತ ಕಿರಣ
ಕಡಗ ನೂಪುರ ಗೆಜ್ಜೆಗಳನಿಟ್ಟ ಚರಣ
ಒಡೆಯ ಶ್ರೀಪುರಂದರ ವಿಠಲನ ಕರುಣ || ೩||

---

kRuShNamUrti kaNNa muMde niMtidaMtide ||pa||

kaShTagaLellA pariharisi mana-
diShTArthagaLanellA koTTu rakShisuvaMtha || a||

mastakadali mANikada kirITa
kastUri tilakadiMdeseva lalATa
Sistili koLalanUduva Ore nOTa
kaustuBa eDabaladali OlATa || 1||

maGamaGisuva sobagina suLiguruLu
ciguru tuLasi vanamAleya koraLu
bage bage honnuMguraviTTa beraLu
sobagina nABiya tAvare yaraLu ||2||

uDudAra vaDDyANa niKilABaraNa
uDuge pItAMbara raviSata kiraNa
kaDaga nUpura gejjegaLaniTTa caraNa
oDeya SrIpuraMdara viThalana karuNa || 3||