Guru Mahatme Suladi 2 – Vijayadasaru

ಶ್ರೀವಿಜಯದಾಸಾರ್ಯ ವಿರಚಿತ ಗುರುಮಹಾತ್ಮೆ ಸುಳಾದಿ
ರಾಗ : ಪೂರ್ವಿಕಲ್ಯಾಣಿ
ಧ್ರುವತಾಳ
ಗುರು ಭಕುತಿ ಪ್ರಧಾನ ಸಾಧನಾ
ಗುರು ಶುಶ್ರೂಷವೆ ಮಹಾ ಕರ್ಮನಾಶನಾ
ಗುರು ಉಪದೇಶವೆ ಜ್ಞಾನಮಾರ್ಗ
ಗುರು ಪ್ರಸಾದ ಲಿಂಗಭಂಗಕ್ಕೆ ಕಾರಣ ಭಕುತಿ
ಗುರು ಪರಮಾನುಗ್ರಹ ಮಾಡಿದಡಂ
ನಿರುತ ಪಾರವಾರ ತತ್ವ ಪ್ರಮೇಯ
ಕರತಳದೊಳಗಿದ್ದ ತೆರದಿಂ
ಅರುಹುವಾಗುವದು ಮಾನವಂಗೆ
ಸ್ವರೂಪ ಯೋಗ್ಯತಾದನಿತು ಗುರುಭಕುತಿ
ಗುರುಬಲ ವಂದೇ ಇದ್ದಡಂ
ಧರೆ ಎಲ್ಲ ಗೆಲ್ಲವಕ್ಕು ಆವಾಗಂ
ಗುರು ಕರುಣ ಪಡದಡಂ ಧನ್ಯನೊ
ಗುರುಧ್ಯಾನ ಮಾಳ್ಪದು ಜನರು
ಗುರು ಚರಣಾಬ್ಜ ಭೃಂಗನಾಗೋ
ಗುರುಗಳಿಗೆ ಸರಿಗಾಣೆನೊ
ಗುರು ವೊಲಿದಡೆ ಸರ್ವ ವಿದ್ಯಾ ಪ್ರಾಪ್ತಿ
ಗುರು ಮಂತ್ರ ಗುರೋರ್ಜಪ ಗುರುನಾಮ ಸ್ಮರಣೆ
ಹಿರಿದಾಗಿ ಕೈಕೊಂಡು ಸುಖಿಸುವದು ಜನರು
ಗುರು ಭವಾಂಬುಧಿ ದಾಟಿಪನು 
ಸಿರಿ  ವಿಜಯವಿಟ್ಠಲರೇಯನು
ಗುರುವಿಲ್ಲದವನಿಗೆ ವಲಿಯನು ॥ 1 ॥

ಮಟ್ಟತಾಳ

ದುರುಳ ಏಕಲವ್ಯನು ಏಕಾಂತದಲೊಂದು
ಗುರು ಪ್ರತಿಮೆಯನ್ನು ನಿರ್ಮಾಣವ ಮಾಡಿ
ನಿರುತ ಭಕುತಿಯಿಂದ ಶಸ್ತ್ರಾಸ್ತ್ರವಿದ್ಯ
ಹರುಷೋನ್ನತದಿಂದ ಸಂಪಾದಿಸಿಕೊಂಡಾ
ಗುರು ಭಕುತಿಯಿಂದ ಮನುಜಗಾವಲ್ಲ್ಯಾಗೆ
ಸ್ಮರಿಸಿಬೇಡಿದ ವಿದ್ಯಾ ಪಾಲಿಸುವದೊ ಸತ್ಯ
ಮರುಳು ದುರುಳನಾದರು ಕೇಳು ಮಾಡಿದ ವಿಶ್ವಾಸ
ಬರಿದೆಯಾಗದು ಕಾಣೊ ಮುಕ್ತಿವಂತರಿಗಿದೆ
ವರ ಮೂರುತಿ ನಮ್ಮ ವಿಜಯವಿಟ್ಠಲರೇಯಾ
ಗುರುದ್ವಾರದಿಂದ ಪೊಳೆವಾ ಪಾಪವ ಕಳೆವಾ ॥ 2 ॥

ತ್ರಿವಿಡಿತಾಳ

ಗುರುಗಳು ವರ ಶಾಪ ಕೊಟ್ಟರಾದಡೆ ಅವನು
ಸುರ ನರೋರುಗ ಲೋಕ ತಿರುಗಿದರೆ ತೊಲಗುವದೆ
ಸರಸರನೆ ಒಂದೆ ಜನುಮದಲ್ಲಿ ತಿಳಿವದಲ್ಲಾ
ಎರಡೊಂದು ಜನುಮಾಂತರದಲ್ಲಿ ಅನುಭವಾ
ಗುರು ಕರುಣವ ಮಾಡಿದಂತೆ ನಾನಾ ಭೋಗಾ
ಶರೀರವೆ ತೆತ್ತು ಉಣಬೇಕು ದ್ವಿವಿಧಾ
ಗುರುಪ್ರಸಾದದಿಂದ ಮರುತ ಮತವೆ ಪೊಂದಿ
ಚರಿಸುತಿಪ್ಪ ನರನ ನೋಡಿ ಜನರು
ಧರಿಸಲಾರದೆ ಮನುಜ ನುಡಿದರೇನಾಹದೊ
ಕರಣ ಶುದ್ಧವಿಲ್ಲದೆ ಕೆಟ್ಟು ಪೋಪಾ
ಗುರು ಕರುಣ ಬಂದು ಪಾವನ ಮಾಡಿದ ಮೇಲೆ
ದುರಿತದ ಭಯ ದೂಷಣೆ ಭಯವಿಲ್ಲಾ
ಅರರೆ ಅವರ ಆಂತಃಕರಣ ಆವಾವಾ
ಪರಿಯಲ್ಲಿಪ್ಪದೋ ದೂಷಿಸಬಾರದು
ವರ ಸತ್ಯವತಿಸೂನು ನಾನೂರು ಕೋಟಿ ಮೇ –
ಲೆರಡೊಂದು ಹತ್ತು ಕೋಟಿ ಗ್ರಂಥವ ಮಾಡಿರೆ
ಹಿರಿಯರು ಪೇಳಿದ ಮಾತಿಗೆ ಮನತೆಗೆದು
ಸರಿಬಾರದೆಂದಾಡುವನೇ ಮೂರ್ಖ
ಉರುಗಶಯನ ನಮ್ಮ ವಿಜಯವಿಟ್ಠಲರೇಯನ
ಪುರವೆ ಬೇಕಾದರೆ ಉತ್ತಮ ಗುರುಬೇಕು ॥ 3 ॥

ಅಟ್ಟತಾಳ

ನದಿಯೊಳಗೊಂದು ಅಸ್ಥಿಯ ಹಾಕಿ ತನ್ನಯ
ಬದಿಯಲ್ಲಿದ್ದವರಿಗೆ ಮುಟ್ಟಬಾರದು ಬಂ –
ತಿದಕೆ ದೋಷವೆಂದು ಪೇಳಿದರಾ ಮಾತು
ಬುಧರು ಮೆಚ್ಚುವರೇನೊ ಕೇಳಿದಾಕ್ಷಣದಲ್ಲಿ
ಮುದದಿಂದಲಿ ತಮ್ಮ ಗುರುಗಳ ಪದಧ್ಯಾನ
ಹೃದಯದಲ್ಲಿಟ್ಟು ಪೇಳಿದ ಕಾಮ್ಯಕೆ ಲೇಸಾ
ತುದಿ ಮೊದಲಾದರು ಸಂಶಯ ಬರುವದೆ
ಉದಧಿಯಂತೆ ತುಂಬಿದೆ ನೋಡು ಸತ್ಕೀರ್ತಿ
ಪದೋಪದಿಗೆ ಭಗವಂತನ ಸಂಗಡ
ವಿಧಿ ತಪ್ಪದಲೆ ಆಡಿದ ಮಹಾತ್ಮರು
ನಿದರುಶನ ಇಲ್ಲದಲೆ ಹೇಳರು ಕಾಣೊ
ಎದೆಗುದ್ದಿಕೊಂಡು ಕಸವಿಸಿ ಬಟ್ಟರೆ
ಅದರಿಂದೇನಾಹೋದೊ ಮಿಥ್ಯಾವಾದವ್ಯಾಕೆ
ಸದನದೊಳಗೆ ತಾನು ಕಾಣದಿರೆ ಕುರುಡಾ
ಪದುಮಜಾಂಡ ಓರ್ವರು ಕಾಣರೆಂಬಂತೆ
ಮದಡ ಮಾನವನ ಅಟ್ಟಹಾಸವೇನೆಂಬೆ
ನದಿಗೆ ಚಾಂಡಾಲ ಯವನ ಕೋಟಿ ಸಮುದಾಯ
ಅಧಮರು ಬಂದು ನಿಂದಿಸಿ ಬೈದು ಕಾಲಿಲಿ
ವದೆದು ಉಗಳಿದರೆ ದೋಷ ನದಿಗೆ ಉಂಟೆ
ನದಿ ಸದೃಶವಾದ ಜ್ಞಾನಿಗೆ ಅಣಕವಾ –
ಡಿದರೆ ಅವಗಿನ್ನು ಕ್ಷುಣಿತಾ ಬರಲಿಲ್ಲಾ
ಮಧುವೈರಿ  ವಿಜಯವಿಟ್ಠಲನ ಪಾದಾಂಬುಜ
ಸದಮಲವಾಗಿ ಭಜಿಸುವರು ಗುರುವೆನ್ನೀ ॥ 4 ॥

ಆದಿತಾಳ

ವ್ಯಾಸಮುನಿಯ ಭಾವಗರ್ಭ
ಶ್ರೀಮದಾಚಾರ್ಯರು ಬಲ್ಲರಯ್ಯಾ
ವ್ಯಾಸಶಿಷ್ಯರ ಭಾವಗರ್ಭ
ಜಯಮುನಿರಾಯ ಬಲ್ಲನಯ್ಯಾ
ಲೇಸು ಜಯಾರ್ಯರ ಭಾವಗರ್ಭ
ಮುನಿ ವ್ಯಾಸರಾಯ ಬಲ್ಲರಯ್ಯಾ
ವ್ಯಾಸರಾಯರ ಭಾವಗರ್ಭ
ವಿಜಯೀಂದ್ರ ವಾದಿರಾಜರು ಬಲ್ಲರಯ್ಯಾ
ಈಸುಜನ ಬಲ್ಲದ್ದು ಕಾಣೊ ಎಣಿಸು
ಪುರಂದರದಾಸರ ಇವರೊಳು
ದೇಶದೊಳಗೆ ದಾಸರ ನಿಜ ಭಾವಗರ್ಭ
ಲೇಶಬಲ್ಲರು ಅವರ ಅನುಸಾರಿಗಳು
ಶ್ರೀಶ ವಿಜಯವಿಟ್ಠಲರೇಯಾ
ಕಾಶಿಯೊಳಗಿನ ಮಹಿಮೆ ಬಲ್ಲಾ ॥ 5 ॥

ಜತೆ

ನಮ್ಮ ಗುರುಗಳ ಕವನ ಮಿಥ್ಯಾಮತವೆಂದವನು
ಬೊಮ್ಮ ರಕ್ಕಸ ಕಾಣೊ ವಿಜಯವಿಟ್ಠಲ ಬಲ್ಲಾ ॥

---

SrIvijayadAsArya viracita gurumahAtme suLAdi
rAga : pUrvikalyANi
dhruvatALa
guru Bakuti pradhAna sAdhanA
guru SuSrUShave mahA karmanASanA
guru upadESave j~jAnamArga
guru prasAda liMgaBaMgakke kAraNa Bakuti
guru paramAnugraha mADidaDaM
niruta pAravAra tatva pramEya
karataLadoLagidda teradiM
aruhuvAguvadu mAnavaMge
svarUpa yOgyatAdanitu guruBakuti
gurubala vaMdE iddaDaM
dhare ella gellavakku AvAgaM
guru karuNa paDadaDaM dhanyano
gurudhyAna mALpadu janaru
guru caraNAbja BRuMganAgO
gurugaLige sarigANeno
guru volidaDe sarva vidyA prApti
guru maMtra gurOrjapa gurunAma smaraNe
hiridAgi kaikoMDu suKisuvadu janaru
guru BavAMbudhi dATipanu
siri vijayaviTThalarEyanu
guruvilladavanige valiyanu || 1 ||

maTTatALa

duruLa Ekalavyanu EkAMtadaloMdu
guru pratimeyannu nirmANava mADi
niruta BakutiyiMda SastrAstravidya
haruShOnnatadiMda saMpAdisikoMDA
guru BakutiyiMda manujagAvallyAge
smarisibEDida vidyA pAlisuvado satya
maruLu duruLanAdaru kELu mADida viSvAsa
barideyAgadu kANo muktivaMtarigide
vara mUruti namma vijayaviTThalarEyA
gurudvAradiMda poLevA pApava kaLevA || 2 ||

triviDitALa

gurugaLu vara SApa koTTarAdaDe avanu
sura narOruga lOka tirugidare tolaguvade
sarasarane oMde janumadalli tiLivadallA
eraDoMdu janumAMtaradalli anuBavA
guru karuNava mADidaMte nAnA BOgA
SarIrave tettu uNabEku dvividhA
guruprasAdadiMda maruta matave poMdi
carisutippa narana nODi janaru
dharisalArade manuja nuDidarEnAhado
karaNa Suddhavillade keTTu pOpA
guru karuNa baMdu pAvana mADida mEle
duritada Baya dUShaNe BayavillA
arare avara AMtaHkaraNa AvAvA
pariyallippadO dUShisabAradu
vara satyavatisUnu nAnUru kOTi mE –
leraDoMdu hattu kOTi graMthava mADire
hiriyaru pELida mAtige manategedu
saribAradeMdADuvanE mUrKa
urugaSayana namma vijayaviTThalarEyana
purave bEkAdare uttama gurubEku || 3 ||

aTTatALa

nadiyoLagoMdu asthiya hAki tannaya
badiyalliddavarige muTTabAradu baM –
tidake dOShaveMdu pELidarA mAtu
budharu meccuvarEno kELidAkShaNadalli
mudadiMdali tamma gurugaLa padadhyAna
hRudayadalliTTu pELida kAmyake lEsA
tudi modalAdaru saMSaya baruvade
udadhiyaMte tuMbide nODu satkIrti
padOpadige BagavaMtana saMgaDa
vidhi tappadale ADida mahAtmaru
nidaruSana illadale hELaru kANo
edeguddikoMDu kasavisi baTTare
adariMdEnAhOdo mithyAvAdavyAke
sadanadoLage tAnu kANadire kuruDA
padumajAMDa Orvaru kANareMbaMte
madaDa mAnavana aTTahAsavEneMbe
nadige cAMDAla yavana kOTi samudAya
adhamaru baMdu niMdisi baidu kAlili
vadedu ugaLidare dOSha nadige uMTe
nadi sadRuSavAda j~jAnige aNakavA –
Didare avaginnu kShuNitA baralillA
madhuvairi vijayaviTThalana pAdAMbuja
sadamalavAgi Bajisuvaru guruvennI || 4 ||

AditALa

vyAsamuniya BAvagarBa
SrImadAcAryaru ballarayyA
vyAsaSiShyara BAvagarBa
jayamunirAya ballanayyA
lEsu jayAryara BAvagarBa
muni vyAsarAya ballarayyA
vyAsarAyara BAvagarBa
vijayIMdra vAdirAjaru ballarayyA
Isujana balladdu kANo eNisu
puraMdaradAsara ivaroLu
dESadoLage dAsara nija BAvagarBa
lESaballaru avara anusArigaLu
SrISa vijayaviTThalarEyA
kASiyoLagina mahime ballA || 5 ||

jate

namma gurugaLa kavana mithyAmataveMdavanu
bomma rakkasa kANo vijayaviTThala ballA ||