Prana Devara Upanishat Mahima Suladi – Vijayadasaru

ಶ್ರೀ ವಿಜಯದಾಸಾರ್ಯ ವಿರಚಿತ
ಶ್ರೀ ಪ್ರಾಣದೇವರ ಕೇನ ಷಟ್ಪ್ರಶ್ನೋಪನಿಷತ್
ಮಹಿಮಾ ಸ್ತೋತ್ರ ಸುಳಾದಿ
ರಾಗ: ಆನಂದಭೈರವಿ
ಧ್ರುವತಾಳ

ಪ್ರಾಣ ಅಪಾನ ವ್ಯಾನ ಸಮಾನ ಉದಾನ
ಜ್ಞಾನಮಯ ಸತ್ವಶರೀರ ಸಮೀರ
ಆನಂದಸಾಂದ್ರ ಹರಿನಂದನ ಪವಮಾನ
ಮಾನದಭಿಮಾನಿಯೆ ವಾಣಿಪ್ರಿಯ
ನೀನೆ ಸರ್ವರಲ್ಲಿ ಗೀರ್ವಾಣರಿಗೆ ಮೊದಲು
ನಾನಾ ಪ್ರಕಾರ ಜೀವಿಗಳಾಧಾರ
ಸ್ನಾನ ಜಪ ತಪ ಹೋಮ ಮೌನ ತೀರ್ಥಯಾತ್ರೆ
ನೀ ನಡೆಸಲದರಿಂದ ಸಿದ್ಧಿಪವು
ನೀನೆಲ್ಲಿ ಅಲ್ಲಿ ಶ್ರೀ ನಾರಾಯಣನು ಇಪ್ಪ
ಏನೆಂಬೆ ನಿನ್ನಯ ಕರ್ತೃತನಕೆ
ಕೋಣಿ ವಿಕೋಣಿಯಲ್ಲಿ ಸರ್ವ ವ್ಯಾಪಾರ ಪಂಚ –
ಪ್ರಾಣಜನಕ ವಾಯು ನಿನ್ನದಯ್ಯಾ
ದಾನವಾಮರರ ಮಧ್ಯ ಬಂದು ಆ ಘೋರ ವಿಷ –
ಪಾನವನ್ನು ಮಾಡಿದ ಪ್ರಭಂಜನ
ದೀನವತ್ಸಲ ನಮ್ಮ ವಿಜಯವಿಠ್ಠಲ ನಂಘ್ರಿ –
ರೇಣು ಶಿರದಲ್ಲಿ ಇಟ್ಟ ದ್ಯುರಮಣ || ೧ ||

ಮಟ್ಟತಾಳ

ಸುರರು ತಮ್ಮೊಳು ತಾವೇ ನೆರೆದು ಯೋಚಿಸಿದರು
ಮರುತನು ನಮಗೆಲ್ಲಿ ಹಿರಿಯನು ಅಹುದೆಂಬ
ಗರುವಿಕೆತನವೇನು ಸರಿ ಸರಿ ಬಂದಾಗು –
ತ್ತರವ ನಾಡುತಿರೆ , ಹರಿ ಅಂದು ಒಂದು
ಶರೀರವನ್ನು ಮಾಡಿ ಪರಿಪರಿಯ ತ –
ತ್ವರ ಒಳಗೆ ಪೋಗಿಸಿದ ಮರುತನ ಸಹವಾಗಿ
ಪುರುಷನಾಮಕ ದೇವ ವಿಜಯವಿಠ್ಠಲರೇಯ
ಸುರರಿಗೆ ಪ್ರಾಣನಿಗೆ ಪರಿಕ್ಷಿಸಿ ತೋರಿದ || ೨ ||

ತ್ರಿವಿಡಿತಾಳ

ಚರಣದಿಂದಲಿ ಇಂದ್ರಸೂನು ಪೋಗಲು ಹೆಳವ
ಕರಗಳಿಂದಲಿ ದಕ್ಷ ಪೋಗಲು ಕರಹೀನ
ಮರಳೆ ನಯನದಿಂದ ಭಾನು ಪೋಗಲು ಕುರುಡ
ತರಣಿ ಮಕ್ಕಳು ಪೋಗೆ ಪರಿಮಳವಾಗದು
ವರುಣ ಪೋಗಲು ರುಚಿಯೆ ತೋರದು ಕಾಣೋ
ಮರುತಸಖನು ಪೋಗೆ ಮೂಕನಾಹ
ತೆರಳಿ ದಿಗ್ದೇವತೆಗಳು ಪೋಗೆ ಕಿವುಡನು
ತರಣಿ ಸ್ವಾಯಂಭು ಪೋಗಲು ಅಲ್ಲಿಯೋನಿಲ್ಲ
ಮರುತನು ಪೋಗಲು ಮೈಸ್ಮರಣೆಯು ಇಲ್ಲ
ಗರುಡ ಶೇಷ ರುದ್ರ ಪೋಗಲು ಹಾನಿಲ್ಲ
ಇರದೆ ಗಣೇಶಾದಿ ಪೋಗೆ ಅನಿಸಲಿಲ್ಲ ಪೆಣನೆಂದು
ವರಮುಖ್ಯಪ್ರಾಣ ಸ್ಥಾನದಿಂದಲಿ ವೇಗ
ತೆರಳಿ ಪೋಗಲು ದೇಹ ಪೆಣನೆಂದೆನಿಸಿತು
ಪರಿಕ್ಷಿಸಿ ತಿಳಿದು ನಾಚಿಕೆ ಉಳ್ಳವರಾಗಿ
ಮರಳೆ ಪ್ರವೇಶಿಸೆ ಆ ದೇಹ ಏಳದಿರೆ ಅಂದು
ಹರಿಗೆ ಕೇವಲ ಮುಖ್ಯದಾಸ ಮುಖ್ಯಪ್ರಾಣ
ತಿರುಗಿ ಬಂದು ಪೋಗಲು ಚೇತನಾಗೆ
ಸುರರು ತಮ್ಮೊಳು ತಾವು ನೋಡಿ ಕೊಳ್ಳುತಲೆ
ಮರುತದೇವನೆ ನಮಗೆ ಹಿರಿಯನೆಂದು
ಕರವ ಮುಗಿದು ನಿಂದು ಜಯವೆಂದು ಕೊಂಡಾಡಿ
ಗುರುವೆ ನೀನೆಂದು ಪವನನ ಕೊಂಡಾಡೆ
ಮಿರಗುವಾಂಬರಧರ ವಿಜಯವಿಠ್ಠಲನ
ಶರಣರೊಳಗೆ ಮುಖ್ಯ ಶರಣ ಈತನು ಕಾಣೊ || ೩ ||

ಅಟ್ಟತಾಳ

ತಂದೆ ಈತನು ಕಾಣೋ , ತಾಯಿ ಈತನು ಕಾಣೋ
ಬಂಧು ಬಳಗ ಸರ್ವಾರ್ಥವು ಈತನು
ಹಿಂದೆ ಮುಂದೆ ನಮಗಾಧಾರ ಈತನು
ಎಂದೆಂದಿಗೆ ಸಂಬಂಧಿಗ ನೀತನು
ಚಂದದ ರಸಾಯನ ಭೋಕ್ತನು ಈತನು
ಇಂದ್ರಿಯಂಗಳಿಗೆ ಪ್ರತಿದಿನ ನಿಯಾಮಕ
ನಂದಮಾರುತಿ ನಮ್ಮ ವಿಜಯವಿಠ್ಠಲನಂಘ್ರಿ
ನಿಂದಿರಾರ್ಚಿಪ ಗರಳಭಂಜನ ದೇವಾ || ೪ ||

ಆದಿತಾಳ

ತರಣಿ ಅಯನುತ್ತರ ಗೌರಪಕ್ಷ ಹಗಲು
ನರ ಭೂತವಾಯು ವ್ಯೋಮಾದಿಯಲ್ಲಿ ನೀನೆ
ಇರಳು ವಲ್ಲಭೆ ದಕ್ಷಿಣಾಯನ ಕೃಷ್ಣ ಪಕ್ಷ
ಇರಲು ಸ್ತ್ರೀ ತೇಜಾದಿಯಲ್ಲಿ ನಿನ್ನ ರಮಣಿ
ಪರಿಪೂರ್ಣವಾಗಿ ನೀವಿಬ್ಬರು ಸರ್ವದ
ಹರಿ ಅಜ್ಞೆಯಿಂದ ವ್ಯಾಪಾರ ಮಾಳ್ಪುದು
ಕರಣ ಶುಧ್ಧಿಯಲ್ಲಿ ಈ ಪರಿ ತಿಳಿದವರಿಗೆ
ದುರಿತಗಳೋಡಿಸಿ ವರ ಪದವಿಯನೀವೆ
ಸರಿಗಾಣೆ ನಿನ್ನ ಅದ್ಭುತ ಲೀಲೆಗೆ ನಾನು
ಎರಗಿ ನಮೊ ನಮೊ ಎಂಬೆ ಮರುತ ಪ್ರಧಾನನೆ
ಸಿರಿಯರಸ ವಿಜಯವಿಠ್ಠಲನ್ನ ನೆಚ್ಚಿದ
ಪರಮಭಕ್ತನು ನೀ ಎನಗೆ ಭರದ ಭಕ್ತಿಯ ಕೊಡು || ೫ ||

ಜತೆ

ಮೂರವತಾರದ ಗುರುವೆ ಸುರತರುವೆ
ವಾರವಾರಕ್ಕೆ ವಿಜಯವಿಠ್ಠಲನ್ನ ಪ್ರತಿಬಿಂಬ ||

---

SrI vijayadAsArya viracita
SrI prANadEvara kEna ShaTpraSnOpaniShat
mahimA stOtra suLAdi
rAga: AnaMdaBairavi
dhruvatALa

prANa apAna vyAna samAna udAna
j~jAnamaya satvaSarIra samIra
AnaMdasAMdra harinaMdana pavamAna
mAnadaBimAniye vANipriya
nIne sarvaralli gIrvANarige modalu
nAnA prakAra jIvigaLAdhAra
snAna japa tapa hOma mauna tIrthayAtre
nI naDesaladariMda siddhipavu
nInelli alli SrI nArAyaNanu ippa
EneMbe ninnaya kartRutanake
kONi vikONiyalli sarva vyApAra paMca –
prANajanaka vAyu ninnadayyA
dAnavAmarara madhya baMdu A GOra viSha –
pAnavannu mADida praBaMjana
dInavatsala namma vijayaviThThala naMGri –
rENu Siradalli iTTa dyuramaNa || 1 ||

maTTatALa

suraru tammoLu tAvE neredu yOcisidaru
marutanu namagelli hiriyanu ahudeMba
garuviketanavEnu sari sari baMdAgu –
ttarava nADutire , hari aMdu oMdu
SarIravannu mADi paripariya ta –
tvara oLage pOgisida marutana sahavAgi
puruShanAmaka dEva vijayaviThThalarEya
surarige prANanige parikShisi tOrida || 2 ||

triviDitALa

caraNadiMdali iMdrasUnu pOgalu heLava
karagaLiMdali dakSha pOgalu karahIna
maraLe nayanadiMda BAnu pOgalu kuruDa
taraNi makkaLu pOge parimaLavAgadu
varuNa pOgalu ruciye tOradu kANO
marutasaKanu pOge mUkanAha
teraLi digdEvategaLu pOge kivuDanu
taraNi svAyaMBu pOgalu alliyOnilla
marutanu pOgalu maismaraNeyu illa
garuDa SESha rudra pOgalu hAnilla
irade gaNESAdi pOge anisalilla peNaneMdu
varamuKyaprANa sthAnadiMdali vEga
teraLi pOgalu dEha peNaneMdenisitu
parikShisi tiLidu nAcike uLLavarAgi
maraLe pravESise A dEha ELadire aMdu
harige kEvala muKyadAsa muKyaprANa
tirugi baMdu pOgalu cEtanAge
suraru tammoLu tAvu nODi koLLutale
marutadEvane namage hiriyaneMdu
karava mugidu niMdu jayaveMdu koMDADi
guruve nIneMdu pavanana koMDADe
miraguvAMbaradhara vijayaviThThalana
SaraNaroLage muKya SaraNa Itanu kANo || 3 ||

aTTatALa

taMde Itanu kANO , tAyi Itanu kANO
baMdhu baLaga sarvArthavu Itanu
hiMde muMde namagAdhAra Itanu
eMdeMdige saMbaMdhiga nItanu
caMdada rasAyana BOktanu Itanu
iMdriyaMgaLige pratidina niyAmaka
naMdamAruti namma vijayaviThThalanaMGri
niMdirArcipa garaLaBaMjana dEvA || 4 ||

AditALa

taraNi ayanuttara gaurapakSha hagalu
nara BUtavAyu vyOmAdiyalli nIne
iraLu vallaBe dakShiNAyana kRuShNa pakSha
iralu strI tEjAdiyalli ninna ramaNi
paripUrNavAgi nIvibbaru sarvada
hari aj~jeyiMda vyApAra mALpudu
karaNa Sudhdhiyalli I pari tiLidavarige
duritagaLODisi vara padaviyanIve
sarigANe ninna adButa lIlege nAnu
eragi namo namo eMbe maruta pradhAnane
siriyarasa vijayaviThThalanna neccida
paramaBaktanu nI enage Barada Baktiya koDu || 5 ||

jate

mUravatArada guruve surataruve
vAravArakke vijayaviThThalanna pratibiMba ||