Jayatu Jagadadhara – Raasa kride

Composer : Shri Gopala dasaru

ಜಯತು ಜಗದಾಧಾರ ಜಯತು ದೋಷವಿದೂರ
ಜಯತು ಶ್ರೀರಂಗ ಎನ್ನಂತರಂಗ ||ಪ||

ಸುಂದರ ಮುಕುಟ ಮುತ್ತಿನ ಝೆಲ್ಲಿ ತುರುಬು ಅರ-
ವಿಂದ ಮುಖನಯನ ಕಸ್ತೂರಿತಿಲಕಾ
ಕುಂದ ಕುಟ್ಮಲದಂತೆ ಮಂದಹಾಸ ವದನ
ಚಂದದ ಕರ್ಣಕುಂಡಲ ಪ್ರಭೆಯ ||೧||

ಇಂದಿರಾಲಯ ವಕ್ಷ ತುಲಸಿ ಮಾಲಾ ಸಿರಿ
ಗಂಧ ಕೌಸ್ತುಭಾಭರಣ ಭೂಷಿತಾ
ಕಂದರವು ಕಂಬುಗ್ರೀವ ಭುಜ ಕೀರ್ತಿ ತೋ-
ಳ್ಬಂದಿ ಹಸ್ತದ ಕರಿಯ ಕಂಕಣಾ ||೨||

ಗುಂಭ ಸುಳಿ ಪೊಕ್ಕಳು ಉದರತ್ರಿವಳಿಯು ಪೀ-
ತಾಂಬರ ಕಟಿಯ ವಡ್ಯಾಣ ಚಲುವಾ
ಸ್ತಂಭ ಉರುಟು ಕದಳಿ ಊರು ಜಾನುಜಂಘೆ
ಗಂಭೀರ ಚರಣದಂದಿಗೆಯನ್ನ ||೩||

ಗೋಪಿಯರ ಪೂರ್ವದಾನೋಂಪಿ ಪುಣ್ಯದ ಫಲವೋ
ತಾ ಪ್ರೇಮದಿಂದ ಪೂರೈಪೆನೆಂದು
ಶ್ರೀಪತಿ ಅನೇಕ ರೂಪನಾಗಿ ನಿಂದು
ಗೋಪತಿ ರಾಸಕ್ರೀಡೆಗೆ ತೊಡಕಿದ್ದು ||೪||

ಮಧು ಕುಂಜವನದಲ್ಲಿ ಚದುರಿಯರ ಬೆರೆದಿನ್ನು
ಮದನನಯ್ಯನು ನಿಂದ ಮಂಡಲದಂತೆ
ಮದಿರಾಕ್ಷಿಯರ ಮನದ ಹದನವರಿತಾ ಕೊಳಲ
ವಿಧಿಸಿ ಊದಿದನಾಗ ವಿಧಿಯ ಜನಕಾ ||೫||

ಕೆಳದಿಯರ ಮುಖ ವಿಕಸಿತವುಕ್ಕಿ ಕೃಷ್ಣ ತ-
ಮ್ಮೊಳಗಾದನೆಂದು ತಿಳಿದರು ಹರುಷದಿ
ಬಳಿಯಲೊಬ್ಬಳನು ನಿಲಿಸಿ ಹೆಗಲಲಿ ಕರವ
ತಳುಕು ಹಾಕಿ ಕುಣಿಯ ಕುಳಿತ ಕೃಷ್ಣಾ ||೬||

ಲಲನೆಯರು ಕರತಳದಲ್ಲಿ ಕರವೆನೆಯಿಟ್ಟು
ನಿಲಿಸಿ ಪಾಡುತಲಿ ಸರಿಗಮದಿಂದಲಿ
ತುಳಿದಲ್ಲೆ ಕೃಷ್ಣನಾ ಸ್ಥಳದಲ್ಲೇ ಹೆಜ್ಜೆ-
ಯೊಳ್ನಿಲಿಸಿ ಕೃಷ್ಣನೊಳು ಆಡೋರು ||೭||

ಬಳಲಿಸದೆ ಬೆವರನೆಲೆಗಳ ನಳನಳಿಸುತ
ಸುಳಿಸಿ ಮಂದವಾಯು ಕೆಳದಿಯರಿಗೆ
ಮಲಕು ಬಿಡಿಸಿ ಹಾರ ತುಳುಕುವನು ಕುಚಗಳ
ಸಲಿಸುವನು ಅವರವರ ಚೆಂದುಟಿಗಳ ||೮||

ಘಿಲುಕು ಘಿಲುಕು ತಾಳಗತಿಗಳಿಂದಲಿಸುತ್ತ
ತಾಳ ಹಾಕಿ ಅಂಗನಾಮಾಂಗನೆಂದು
ನಿಲಿಸದೆ ಆಡುವಾ ಕಳೆವುಕ್ಕಿ ಅಂಬರದಿ
ನಿಲಿಸಿ ಅಜ ಭವ ಸುರರುಗಳು ನೋಳ್ಪರು ||೯||

ದುಂದುಭಿವಾದ್ಯ ತನ್ನಿಂದ ತಾ ಬಾರಿಪವು
ಗಂಧರ್ವರು ಗಾಯನಗಳ ಮಾಡೆ
ಮಂದಾರ ಮಲ್ಲಿಗೆಯ ತಂದು ಪುಷ್ಪವು ಸುರರು
ಚಂದದಿಂದಲಿ ವೃಷ್ಟಿಯ ಕೆರೆದರು ||೧೦||

ಒಂದು ಒಂದಶದಿಂದಲಿ ಅಜಭವರೆಲ್ಲಾ
ತಂದು ಇಟ್ಟರು ಉಡುಗೊರೆಗಳನೆಲ್ಲಾ
ಇಂದುಮುಖಿಯರ ಮನದಾನಂದ ಪೂರ್ತಿಸಿದನು
ಚಂದ ಚಂದದಲಿನ್ನು ಇಂದಿರೇಶಾ ||೧೧||

ಶರಣು ಕರುಣಾನಿಧಿಯೇ ಶರಣು ಗುಣವಾರಿಧಿಯೇ
ಶರಣು ಶರಣರ ಹೊರವಾ ಸುರರ ಮಣಿಯೇ
ಶರಣು ನಾ ನಿನ್ನವರ ಚರಣ ಸೇವಕ ನಾನು
ಶರಣು ಗೋವಳಾ ಗೋಪಿಯರ ಪಾಲಕಾ ||೧೨||

ರಾಸಕ್ರೀಡೆಯಲಿ ಸೋಲಿಸಿ ಗೋಪಿಯರ ಅಭಿ-
ಲಾಷೆ ಪೂರ್ತಿಸಿದಾ ಭಾಸುರ ಮೂರುತಿ
ಪೋಷಿಸುಯೆನ್ನ ಗೋಪಾಲವಿಠ್ಠಲ ವಿಜಯ
ದಾಸರ ಆಸರದಿ ಇಟ್ಟುಯೆನ್ನಾ ||೧೩||

---

jayatu jagadAdhAra jayatu dOShavidUra
jayatu SrIraMga ennaMtaraMga ||pa||

suMdara mukuTa muttina Jelli turubu ara-
viMda muKanayana kastUritilakA
kuMda kuTmaladaMte maMdahAsa vadana
caMdada karNakuMDala praBeya ||1||

iMdirAlaya vakSha tulasi mAlA siri
gaMdha kaustuBABaraNa BUShitA
kaMdaravu kaMbugrIva Buja kIrti tO-
LbaMdi hastada kariya kaMkaNA ||2||

guMBa suLi pokkaLu udaratrivaLiyu pI-
tAMbara kaTiya vaDyANa caluvA
staMBa uruTu kadaLi Uru jAnujaMGe
gaMBIra caraNadaMdigeyanna ||3||

gOpiyara pUrvadAnOMpi puNyada PalavO
tA prEmadiMda pUraipeneMdu
SrIpati anEka rUpanAgi niMdu
gOpati rAsakrIDege toDakiddu ||4||

madhu kuMjavanadalli caduriyara beredinnu
madananayyanu niMda maMDaladaMte
madirAkShiyara manada hadanavaritA koLala
vidhisi UdidanAga vidhiya janakA ||5||

keLadiyara muKa vikasitavukki kRuShNa ta-
mmoLagAdaneMdu tiLidaru haruShadi
baLiyalobbaLanu nilisi hegalali karava
taLuku hAki kuNiya kuLita kRuShNA ||6||

lalaneyaru karataLadalli karaveneyiTTu
nilisi pADutali sarigamadiMdali
tuLidalle kRuShNanA sthaLadallE hejje-
yoLnilisi kRuShNanoLu ADOru ||7||

baLalisade bevaranelegaLa naLanaLisuta
suLisi maMdavAyu keLadiyarige
malaku biDisi hAra tuLukuvanu kucagaLa
salisuvanu avaravara ceMduTigaLa ||8||

Giluku Giluku tALagatigaLiMdalisutta
tALa hAki aMganAmAMganeMdu
nilisade ADuvA kaLevukki aMbaradi
nilisi aja Bava surarugaLu nOLparu ||9||

duMduBivAdya tanniMda tA bAripavu
gaMdharvaru gAyanagaLa mADe
maMdAra malligeya taMdu puShpavu suraru
caMdadiMdali vRuShTiya keredaru ||10||

oMdu oMdaSadiMdali ajaBavarellA
taMdu iTTaru uDugoregaLanellA
iMdumuKiyara manadAnaMda pUrtisidanu
caMda caMdadalinnu iMdirESA ||11||

SaraNu karuNAnidhiyE SaraNu guNavAridhiyE
SaraNu SaraNara horavA surara maNiyE
SaraNu nA ninnavara caraNa sEvaka nAnu
SaraNu gOvaLA gOpiyara pAlakA ||12||

rAsakrIDeyali sOlisi gOpiyara aBi-
lAShe pUrtisidA BAsura mUruti
pOShisuyenna gOpAlaviThThala vijaya
dAsara Asaradi iTTuyennA ||13||