Onde Namavu Salade

Composer : Shri Purandara dasaru

ಒಂದೇ ನಾಮವು ಸಾಲದೆ ಶ್ರೀ ಹರಿಯೆಂಬ
ಒಂದೇ ನಾಮವು ಸಾಲದೆ [ಪ]
ಒಂದೇ ನಾಮವು ಭವಬಂಧನ ಬಿಡಿಸುವುದೆಂದು
ವೇದಂಗಳು ಆನಂದದಿ ಸ್ತುತಿಸುವ [ಅ.ಪ]

ಉಭಯ ರಾಯರು ಸೇರಿ ಮುದದಿ ಲೆತ್ತವನಾಡಿ
ಸಭೆಯೊಳು ಧರ್ಮಜ ಸತಿಯ ಸೋಲೆ
ನಭಕೆ ಕೈಯೆತ್ತಿ ದ್ರೌಪದಿ ಕೃಷ್ಣಾ ಎನಲು
ಇಭರಾಜ ಗಮನಗಕ್ಷಯ ವಸ್ತ್ರವನಿತ್ತ [೧]

ಹಿಂದೊಬ್ಬ ಋಷಿ ಪುತ್ರನಂದು ದಾಸಿಯ ಕೂಡೆ
ಸಂದೇಹವಿಲ್ಲದೆ ಹಲವು ಕಾಲ
ದಂದುಗದೊಳು ಸಿಲುಕಿ ನಿಂದಂತ್ಯ ಕಾಲದಿ
ಕಂದ ನಾರಗನೆಂದು ಕರೆಯಲಭಯವಿತ್ತ [೨]

ಕಾಶಿಯ ಪುರದೊಳಗೆ ಈಶ ಭಕುತಿಯಿಂದ
ಸಾಸಿರ ನಾಮದ ರಾಮನೆಂಬ
ಶ್ರೀಶನ ನಾಮವ ಉಪದೇಶ ಸತಿಗಿತ್ತ
ವಾಸುದೇವ ಶ್ರೀ ಪುರಂದರ ವಿಠಲನ್ನ [೩]

---

oMdE nAmavu sAlade shrI hariyeMba
oMdE nAmavu sAlade [pa]
oMdE nAmavu bhavabaMdhana biDisuvudeMdu
vEdaMgaLu AnaMdadi stutisuva [a.pa]

ubhaya rAyaru sEri mudadi lettavanADi
sabheyoLu dharmaja satiya sOle
nabhake kaiyetti draupadi kRuShNA enalu
ibharAja gamanagakShaya vastravanitta [1]

hiMdobba RuShi putranaMdu dAsiya kUDe
saMdEhavillade halavu kAla
daMdugadoLu siluki niMdaMtya kAladi
kaMda nAraganeMdu kareyalabhayavitta [2]

kAshiya puradoLage Isha bhakutiyiMda
sAsira nAmada rAmaneMba
shrIshana nAmava upadEsha satigitta
vAsudEva shrI puraMdara viThalanna [3]