Bhakta vatsalya suladi – Sheshadasaru

Raga:Todi

ಶ್ರೀ ಮೊದಲಕಲ್ಲು ಶೇಷದಾಸಾರ್ಯ ವಿರಚಿತ
(ಗುರುವಿಜಯವಿಠ್ಠಲ ಅಂಕಿತ)
ಭಕ್ತವಾತ್ಸಲ್ಯ ಸುಳಾದಿ
( ಒಡಿಯರಿಲ್ಲದ ಫಲಮರವನ್ನು ದಾರಿಕಾರರು
ಬಡಿದು ತಿಂಬುವಂತೆ ಎನಗೆ ಕಾಮ
ಕ್ರೋಧಾದಿಗಳು ಮುಸುಕಿವೆ. ಭಕ್ತರ ಅಪರಾಧ
ಎಣಿಸದೆ ಕೈಪಿಡಿದು ರಕ್ಷಿಸು ಇತ್ಯಾದಿ
ಐತಿಹಾಸಿಕ ವಿಷಯಗಳು )
ರಾಗ: ತೋಡಿ

ಧ್ರುವತಾಳ
ಒಡಿಯರಿಲ್ಲದ ವೃಕ್ಷ ಕಂಡ ಕಂಡವರೆಲ್ಲ
ಬಡಿದು ತಿಂಬುವ ನ್ಯಾಯವಾಯಿತೆನಗೆ
ಅಡಿ ತೊಲಗದೆ ಕಾಮ ಕ್ರೋಧಾದಿ ಗರ್ವಂಗಳು
ಸುಡುತಲಿವೆ ವ್ಯವಧಾನವಿಲ್ಲದೆ
ಕಡು ದುಃಖವನ್ನು ಆರಿಗೆ ಪೇಳಲಿನ್ನು
ಒಡಿಯನಾವನು ಪರಿಹರಿಸುವದಕ್ಕೆ
ಪೊಡವಿಯೊಳಗೆನ್ನ ದೂರು ಕೇಳುವದಕ್ಕೆ
ಹುಡಿಕಿ ನೋಡಿದರನು ಒಬ್ಬರಿಲ್ಲ
ಜಡಜ ಸಂಭವ ಮುಖ್ಯ ಸುರರಾದಿ ಜೀವಿಗಳ
ಬಿಡದೆ ಸಾಕುವರಯ್ಯಾ ನಿಧಿಯು ಆವಾ
ಜಡಜ ಜಾಂಡವನ್ನು ನೇಮಿಸಿ ಸ್ಥಿತಿ ಮಾಡಿ
ಕಡೆಯನೈದಿಪದಕ್ಕೆ ಮುಖ್ಯ ಕರ್ತುನಾವ
ಕಡಲಶಯನನೆ ನಿನ್ನಿಂದ ವ್ಯತಿರಿಕ್ತವಾದ
ಒಡೆಯರಿಲ್ಲವು ಆವ ಪರಿಯಲಿ ನೋಡೆ
ಸಡಲ ಬಿಡುವದು ಸಮ್ಮತವೇನು ನಿನಗೆ
ಭಿಡಿಯ ಲೇಶವನ್ನು ಇಲ್ಲವೇನೋ
ಜಡಮತಿಯವನೆಂದು ಜರಿದು ನೋಡಲು ಆವ
ಮಡವು ದಾಟಿಪದಕ್ಕೆ ಆವ ಪೇಳೋ
ಒಡಿಯ ಎನಗೆ ನೀನೆ ಜನುಮ ಜನುಮದಲ್ಲಿ
ತೊಡರುಗಳೆಷ್ಟು ಒದಗೆ ಇದು ತಪ್ಪದೋ
ನುಡಿವರು ಇನ್ನೊಂದು ಪರಿಯಲ್ಲಿ ಸಜ್ಜನರೆಲ್ಲ
ಒಡಿಯ ಎನಗೆ ನಿನಗೆ ಅಗಲದೆಂದೂ
ಆಡುವ ವಚನಕ್ಕೆ ವ್ಯಾಹತಿ ತಾರದಲೆ
ಪಿಡಿಯೊ ಕರವ ಅವ್ಯವಧಾನದಿ
ಉಡುರಾಜ ನಾಮ ಗುರುವಿಜಯವಿಟ್ಠಲ ಭವ –
ಮಡುವಿನೊಳಗೆ ಬಿದ್ದು ಮೊರಿಯನಿಡುವೆ || ೧ ||

ಮಟ್ಟತಾಳ

ಅರಸನಿಗೆ ಸಖನಾಗಿ ಅನ್ನ ಕಾಣದಲೆ
ತಿರಿಕಿಯ ಮನೆ ಮನೆ ತಿರುಗಿದೆ ಬಲು
ಅರಸಿಗೆ ಮಾನ್ಯತ್ವ ಬರುವದೆ ಜನರಿಂದ
ವರ ಪ್ರಖ್ಯಾತದಲಿ ದೃಷ್ಟಿಯ ಅವಗಿತ್ತು
ಎರಡರ ಮಧ್ಯದಲಿ ವ್ಯವಹರಿಸುವ ನೊಂದು
ಪರಮ ಪ್ರೀಯನೆಂಬ ವಚನವನ್ನುಡಿಸಲ್ಲ
ತಿರುಗುವದೆ ಬಿಡಸಿ ಪ್ರೀತಿಯಿಂದಲಿ ಕರೆದು
ಪರಿಪರಿ ಸಂಪದ ಪಾಲಿಪ ತಡೆಯದಲೆ
ನರಸಖ ಸಿರಿ ಗುರುವಿಜಯವಿಟ್ಠಲರೇಯ
ಎರಡರೊಳಗೊಂದು ನಿರ್ಧಾರವ ಮಾಡೊ || ೨ ||

ತ್ರಿವಿಡಿತಾಳ

ಪರಿ ಪರಿ ದೇಹದಿಂದ ಆಯಾಸ ಬಡಬಹುದು
ಧರಣಿಪತಿಯ ಬಾಧೆ ಸ್ವೀಕರಿಸಬಹುದು
ನರರಿಂದ ಬಲು ಪರಿ ನಿಂದ್ಯ ವೈದಲಿಬಹುದು
ದಾರಿದ್ರ ದೋಷಾನುಭವಿಸಬಹುದು
ಪರಿಯು ಇನಿತಾದವೆಲ್ಲ ಬಾರಲೇಕೆ ನಿನ್ನ
ಸಿರಿಚರಣ ಹೃದಯದಲ್ಲಿ ಕಾಣದಿಪ್ಪ
ಪರಮ ದುಃಖವನ್ನು ದುಸ್ಸಹವಾಗಿದೆ
ಪರಿಮಿತವೇ ಇಲ್ಲ ನೀನೆ ಬಲ್ಲಿ
ಕರಣ ಪ್ರೇರಕನಿಗೆ ಪ್ರತ್ಯೇಕ ಪೇಳುವದೇಕೆ
ಕರುಣಾಸಾಗರನೇ ಕಮಲನಯನ
ಮರಳೆ ಛಿದ್ರಗಳೆಷ್ಟು ಇರಲಿ ಮತ್ತಿರಲಿ
ತರುಳನ ಅಪರಾಧ ಕ್ಷಮಿಸಬೇಕು
ಕರಿರಾಜವರದ ಗುರುವಿಜಯವಿಟ್ಠಲರೇಯ
ಮೊರೆ ಹೊಕ್ಕೆನೊ ಪೊರಿಯಬೇಕೋ ಕರುಣಿ || ೩ ||

ಅಟ್ಟತಾಳ

ಅಪರಾಧ ಮಾಡಿದ ಭಕ್ತರಿಗೀಪರಿ
ಉಪಶಮನವಿಲ್ಲದಿರಲು ಜಗದೊಳು
ಕೃಪಣ ವತ್ಸಲನೆಂಬೊ ಬಿರಿದಿನ್ನು ಪ್ರಖ್ಯಾತ
ವಿಪಗಮನ ನಿನಗೆ ಬರುವದೆ ಎಲೋ ದೇವ
ಸಪರಿಮಿತವಾದ ಸುಖದ ಲೋಕಂಗಳು
ಉಪಗಮ್ಯವಾಗವು ಎಂದಿಗಾದರು ನೋಡಾ
ಅಪರಿಮಿತವಾದ ಆನಂದಪ್ರದವಾದ
ಸುಪವಿತ್ರ ಲೋಕವು ದೂರತಿ ದೂರೆವೆ ಸರಿ
ಶಫರಾದಿ ರೂಪನೆ ಗುರುವಿಜಯವಿಟ್ಠಲರೇಯ
ಕೃಪಣ ಬುದ್ಧಿಯ ಬಿಡು ಕರುಣದಿಂದಲಿ ನೋಡೊ || ೪ ||

ಆದಿತಾಳ

ಭಕತರ ಅಪರಾಧ ಎಣಿಸುವ ನೀನಲ್ಲ
ಭಕತರ ಅಭಿಮಾನ ಸತತ ವೊಹಿಸಿ ಮೆರೆವ
ಭಕತವತ್ಸಲ ನೀನು ಭಕತರ ಭಾಗ್ಯನಿಧೆ
ಭಕತರ ಸುಖ ನೀನೆ ಭಜಕರ ಸುಖ ಗುರು
ಭಕತರಾಶ್ರಯ ನೀನೆ ನಿನಗಿಂದ ಅನ್ಯರಿಲ್ಲ
ಭಕತರ ಬಿಡೆನೆಂಬೊ ಶಪಥವೆ ನಿನ್ನದಯ್ಯಾ
ಭಕತರಿಗಾಗಿ ಸೃಷ್ಟಿ ನಿರ್ಮಿಸಿದ ನಂತರ
ಭಕತರ ವಾಸಕ್ಕೆ ಲೋಕಂಗಳು ರಚಿಸಿದಿ
ಭಕತರ ಸುಖಕಿನ್ನು ಸಕಲವು ನಿರ್ಮಿಸಿದಿ
ಭಕತರ ನಿಮಿತ್ಯ ಬಲು ವಿಧವಾಗಿದ್ದ
ಸಕಲವತಾರಗಳು ಧರಿಸಿದಿ ಪ್ರೀತಿಯಿಂದ
ಭಕತರ ಸಲಹಲು ಜಾರ ಚೋರನೆನಿಸಿದಿ
ಭಕತರ ಪ್ರಿಯನೆನಿಸಿ ಸಾರಥಿ ಮೊದಲಾದ
ಕುಕರ್ಮವಂಗೀಕಾರ ಮಾಡಿದಿ ಎಲೋ ದೇವ
ಭಕುತರ ವಶ್ಯ ನೀನು ಮಾಡುವ ವ್ಯಾಪಾರ
ಭಕುತರಿಗಲ್ಲದಲೆ ನಿನಗುಂಟೆ ಪ್ರಯೋಜನ ಈ
ಯುಕುತಿ ಎನ್ನದಲ್ಲ ಶ್ರುತಿ ಸ್ಮೃತಿ ವರಲುತಿವೆ
ವುಕುತಿಯ ಮನವಪ್ಪ ನೀನೇವೆ ಪ್ರೇರಿಸಿದಿ
ಈ ಕಲಿಕೃತ ಮಮಕಾರ ಜನಿತವಾದ ಭವಬಂಧ
ಮುಕುತನ ಮಾಡುವದು ಕ್ಷಣವನು ತಡಿಯದಲೆ
ಲಕುಮಿಯ ಆಣೆ ನಿನಗೆ ಸಕಲ ಸುರರ ಆಣೆ
ಭಕುತರ ಆಣೆ ಮತ್ತೆ ಎನ್ನಾಣೆ ಹೇ ಕರುಣಿ
ಈ ಕುಂಭಿಣಿಗೆ ಮುಖ್ಯ ಒಡೆಯ ನೀನಾದರು
ಭಕತರ ವಾಕ್ಯವನ್ನು ಪಾಲಿಸಿ ಸಲಹಬೇಕು
ಭಕತರಿಚ್ಛೆಯಗಾರ ಗುರುವಿಜಯವಿಟ್ಠಲರೇಯ
ಭಕತರ ಮನೋಭೀಷ್ಟಗರೆವನು ನೀನೆ ದೇವ || ೫ ||

ಜತೆ

ಭಕತರ ಅಪರಾಧ ಸಾಸಿರವಿರಲಿನ್ನು
ಶಕತ ರಕ್ಷಿಸೊ ಗುರುವಿಜಯವಿಟ್ಠಲರೇಯಾ ||

---

SrI modalakallu SEShadAsArya viracita
(guruvijayaviThThala aMkita)
BaktavAtsalya suLAdi
( oDiyarillada Palamaravannu dArikAraru
baDidu tiMbuvaMte enage kAma
krOdhAdigaLu musukive. Baktara aparAdha
eNisade kaipiDidu rakShisu ityAdi
aitihAsika viShayagaLu )
rAga: tODi

dhruvatALa
oDiyarillada vRukSha kaMDa kaMDavarella
baDidu tiMbuva nyAyavAyitenage
aDi tolagade kAma krOdhAdi garvaMgaLu
suDutalive vyavadhAnavillade
kaDu duHKavannu Arige pELalinnu
oDiyanAvanu pariharisuvadakke
poDaviyoLagenna dUru kELuvadakke
huDiki nODidaranu obbarilla
jaDaja saMBava muKya surarAdi jIvigaLa
biDade sAkuvarayyA nidhiyu AvA
jaDaja jAMDavannu nEmisi sthiti mADi
kaDeyanaidipadakke muKya kartunAva
kaDalaSayanane ninniMda vyatiriktavAda
oDeyarillavu Ava pariyali nODe
saDala biDuvadu sammatavEnu ninage
BiDiya lESavannu illavEnO
jaDamatiyavaneMdu jaridu nODalu Ava
maDavu dATipadakke Ava pELO
oDiya enage nIne januma janumadalli
toDarugaLeShTu odage idu tappadO
nuDivaru innoMdu pariyalli sajjanarella
oDiya enage ninage agaladeMdU
ADuva vacanakke vyAhati tAradale
piDiyo karava avyavadhAnadi
uDurAja nAma guruvijayaviTThala Bava –
maDuvinoLage biddu moriyaniDuve || 1 ||

maTTatALa

arasanige saKanAgi anna kANadale
tirikiya mane mane tirugide balu
arasige mAnyatva baruvade janariMda
vara praKyAtadali dRuShTiya avagittu
eraDara madhyadali vyavaharisuva noMdu
parama prIyaneMba vacanavannuDisalla
tiruguvade biDasi prItiyiMdali karedu
paripari saMpada pAlipa taDeyadale
narasaKa siri guruvijayaviTThalarEya
eraDaroLagoMdu nirdhArava mADo || 2 ||

triviDitALa

pari pari dEhadiMda AyAsa baDabahudu
dharaNipatiya bAdhe svIkarisabahudu
narariMda balu pari niMdya vaidalibahudu
dAridra dOShAnuBavisabahudu
pariyu initAdavella bAralEke ninna
siricaraNa hRudayadalli kANadippa
parama duHKavannu dussahavAgide
parimitavE illa nIne balli
karaNa prErakanige pratyEka pELuvadEke
karuNAsAgaranE kamalanayana
maraLe CidragaLeShTu irali mattirali
taruLana aparAdha kShamisabEku
karirAjavarada guruvijayaviTThalarEya
more hokkeno poriyabEkO karuNi || 3 ||

aTTatALa

aparAdha mADida BaktarigIpari
upaSamanavilladiralu jagadoLu
kRupaNa vatsalaneMbo biridinnu praKyAta
vipagamana ninage baruvade elO dEva
saparimitavAda suKada lOkaMgaLu
upagamyavAgavu eMdigAdaru nODA
aparimitavAda AnaMdapradavAda
supavitra lOkavu dUrati dUreve sari
SaParAdi rUpane guruvijayaviTThalarEya
kRupaNa buddhiya biDu karuNadiMdali nODo || 4 ||

AditALa

Bakatara aparAdha eNisuva nInalla
Bakatara aBimAna satata vohisi mereva
Bakatavatsala nInu Bakatara BAgyanidhe
Bakatara suKa nIne Bajakara suKa guru
BakatarASraya nIne ninagiMda anyarilla
Bakatara biDeneMbo Sapathave ninnadayyA
BakatarigAgi sRuShTi nirmisida naMtara
Bakatara vAsakke lOkaMgaLu racisidi
Bakatara suKakinnu sakalavu nirmisidi
Bakatara nimitya balu vidhavAgidda
sakalavatAragaLu dharisidi prItiyiMda
Bakatara salahalu jAra cOranenisidi
Bakatara priyanenisi sArathi modalAda
kukarmavaMgIkAra mADidi elO dEva
Bakutara vaSya nInu mADuva vyApAra
Bakutarigalladale ninaguMTe prayOjana I
yukuti ennadalla Sruti smRuti varalutive
vukutiya manavappa nInEve prErisidi
I kalikRuta mamakAra janitavAda BavabaMdha
mukutana mADuvadu kShaNavanu taDiyadale
lakumiya ANe ninage sakala surara ANe
Bakutara ANe matte ennANe hE karuNi
I kuMBiNige muKya oDeya nInAdaru
Bakatara vAkyavannu pAlisi salahabEku
BakataricCeyagAra guruvijayaviTThalarEya
Bakatara manOBIShTagarevanu nIne dEva || 5 ||

jate

Bakatara aparAdha sAsiraviralinnu
Sakata rakShiso guruvijayaviTThalarEyA ||