Ramesha geeti – Haadu 2

ರಮೇಶಗೀತಿ

ಜಲಚರತಯಾ ದದೌ ವೇದಮಾದೌ 

ತರುಣತರಣಿಚ್ಛವಿರ್ಯೋ ವಿಧಾತ್ರೇ |

ಶರಣದಮದೋಷಮಾನಂದಪೂರ್ಣಂ

ಶರಣಮನಿಶಂ ರಮೇಶಂ ಪ್ರಪದ್ಯೇ ||೧||

ಅಧೃತ ಸುಮನೋಮನೋವಲ್ಲಭೋ ಯಃ

ಕಮಠವಪುಷಾ ಮಹಾಮಂದರಾದ್ರಿಮ್ |

ಶರಣದಮದೋಷಮಾನಂದಪೂರ್ಣಂ

ಶರಣಮನಿಶಂ ರಮೇಶಂ ಪ್ರಪದ್ಯೇ ||೨||

ಜಿತದಿತಿಸುತೋ ವರಾಹೋ ವರೇಣ್ಯೋ

ಧರಣಿಮುದಧಾದಧೀರಾಂ ಪುರಾ ಯಃ |

ಶರಣದಮದೋಷಮಾನಂದಪೂರ್ಣಂ

ಶರಣಮನಿಶಂ ರಮೇಶಂ ಪ್ರಪದ್ಯೇ ||೩||

ದಿತಿಜಗಜರಾಜವಿಧ್ವಂಸಸಿಂಹಂ

ಪ್ರಖರನಖರಾಖ್ಯವಜ್ರಂ ನೃಸಿಂಹಮ್ |

ಶರಣದಮದೋಷಮಾನಂದಪೂರ್ಣಂ

ಶರಣಮನಿಶಂ ರಮೇಶಂ ಪ್ರಪದ್ಯೇ ||೪|| 

ಅನುಜಮಮರಾಧಿರಾಜಸ್ಯ ಬಾಲಂ

ಸಿತಬಲಿಬಲಂ ತ್ರಿವಿಕ್ರಾಂತಿಮಂತಮ್ |

ಶರಣದಮದೋಷಮಾನಂದಪೂರ್ಣಂ

ಶರಣಮನಿಶಂ ರಮೇಶಂ ಪ್ರಪದ್ಯೇ ||೫||

ಅವನಿಪವನಾನಲಂ ಜಾಮದಗ್ನ್ಯಂ

ಗಿರಿಶವರದಾಯಿನಂ ರಾಮದೇವಮ್ |

ಶರಣದಮದೋಷಮಾನಂದಪೂರ್ಣಂ

ಶರಣಮನಿಶಂ ರಮೇಶಂ ಪ್ರಪದ್ಯೇ ||೬||

ದಶಮುಖಮುಖದ್ವಿಜಾಹಾರಿಮೃತ್ಯುಂ

ದಶರಥಸುತಂ ಪತಿಂ ಭೂಮಿಜಾಯಾಃ |

ಶರಣದಮದೋಷಮಾನಂದಪೂರ್ಣಂ

ಶರಣಮನಿಶಂ ರಮೇಶಂ ಪ್ರಪದ್ಯೇ ||೭||

ಮಥಿತಪೃಥಿವೀಭರಂ ವಾಸುದೇವಂ

ಮಧುರಮಧಿಕಂ ಪ್ರಿಯಂ ಪಾಂಡವಾನಾಮ್ |

ಶರಣದಮದೋಷಮಾನಂದಪೂರ್ಣಂ

ಶರಣಮನಿಶಂ ರಮೇಶಂ ಪ್ರಪದ್ಯೇ ||೮||

ಅಸುರಮನಸಾಂ ಮಹಾಮೋಹಹೇತುಂ

ವಿಶದಮನಸಾಂ ಹಿತಂ ಬುದ್ಧರೂಪಮ್ |

ಶರಣದಮದೋಷಮಾನಂದಪೂರ್ಣಂ

ಶರಣಮನಿಶಂ ರಮೇಶಂ ಪ್ರಪದ್ಯೇ ||೯||

ಕಲಿಕಲಿಲಕಾಲವೈಕಲ್ಯಮೂಲಂ

ಕಲಿತಖಲಸಂಕಟಂ ಕಲ್ಕಿದೇವಮ್ |

ಶರಣದಮದೋಷಮಾನಂದಪೂರ್ಣಂ

ಶರಣಮನಿಶಂ ರಮೇಶಂ ಪ್ರಪದ್ಯೇ ||೧೦||

ಅಗಣಿತಗುಣಂ ಗುಣಾಪೇತಮೇಕಂ

ವಿಧಿಮುಖವಿಚಿಂತಿತಂ ಬ್ರಹ್ಮಸಂಜ್ಞಮ್ |

ಶರಣದಮದೋಷಮಾನಂದಪೂರ್ಣಂ

ಶರಣಮನಿಶಂ ರಮೇಶಂ ಪ್ರಪದ್ಯೇ ||೧೧||

ದಶಶತತನುಂ ತಥಾ~ಪ್ಯೇಕರೂಪಂ

ದಶಶತತನುಂ ತಥಾ~ನಂತರೂಪಮ್ |

ಶರದಣಮದೋಷಮಾನಂದಪೂರ್ಣಂ

ಶರಣಮನಿಶಂ ರಮೇಶಂ ಪ್ರಪದ್ಯೇ ||೧೨||

ಲಿಕುಚಕವಿನಂದನಃ ಸನ್ನುಪಾಂತ್ಯೋ

ವ್ಯದಧದಿತಿ ವೈ ರಮೇಶಸ್ಯ ಗೀತಿಮ್ |

ಶರಣದಮದೋಷಮಾನಂದಪೂರ್ಣಂ 

ಶರಣಮನಿಶಂ ರಮೇಶಂ ಪ್ರಪದ್ಯೇ  ||೧೩||

ಶ್ರೀ ಕೃಷ್ಣಾರ್ಪಣಮಸ್ತು ||