Madhwavijaya – Sarga 1

Composer : Shri Narayana Panditacharya

ಪ್ರಥಮಃ ಸರ್ಗಃ

ಕಾಂತಾಯ ಕಲ್ಯಾಣ-ಗುಣೈಕ-ಧಾಮ್ನೇ
ನವ-ದ್ಯುನಾಥ-ಪ್ರತಿಮ-ಪ್ರಭಾಯ |
ನಾರಾಯಣಾಯಾಖಿಲ-ಕಾರಣಾಯ
ಶ್ರೀ-ಪ್ರಾಣ-ನಾಥಾಯ ನಮಸ್ಕರೋಮಿ |೧|

ಅನಾಕುಲಂ ಗೋಕುಲಮುಲ್ಲಲಾಸ
ಯತ್-ಪಾಲಿತಂ ನಿತ್ಯಮನಾವಿಲಾತ್ಮ |
ತಸ್ಮೈನಮೋ ನೀರದ-ನೀಲ-ಭಾಸೇ
ಕೃಷ್ಣಾಯ ಕೃಷ್ಣಾ-ರಮಣ-ಪ್ರಿಯಾಯ | ೨ |

ಅಪಿ ತ್ರಿಲೋಕ್ಯಾ ಬಹಿರುಲ್ಲಸಂತೀ
ತಮೋ ಹರಂತಿ ಮುಹುರಾಂತರಂ ಚ |
ದಿಶ್ಯಾದ್ ದೃಶಂ ನೋ ವಿಶದಾಂ ಜಯಂತೀ
ಮಧ್ವಸ್ಯ ಕೀರ್ತಿರ್ದಿನ-ನಾಥ-ದೀಪ್ತಿಮ್ | ೩ |

ತಮೋ-ನುದಾಽಽನಂದಮವಾಪ ಲೋಕ:
ತತ್ವ-ಪ್ರದೀಪಾಕೃತಿ-ಗೋ-ಗಣೇನ |
ಯದಾಸ್ಯ-ಶೀತಾಂಶು-ಭುವಾ ಗುರೂಂಸ್ತಾನ್
ತ್ರಿವಿಕ್ರಮಾರ್ಯಾನ್ ಪ್ರಣಮಾಮಿ ವರ್ಯಾನ್ |೪|

ಮುಕುಂದ-ಭಕ್ತ್ಯೈ ಗುರು-ಭಕ್ತಿ-ಜಾಯೈ
ಸತಾಂ ಪ್ರಸತ್ಯೈ ಚ ನಿರಂತರಾಯೈ |
ಗರೀಯಸೀಂ ವಿಶ್ವ-ಗುರೋರ್ವಿಶುದ್ಧಾಂ
ವಕ್ಷ್ಯಾಮಿ ವಾಯೋರವತಾರ-ಲೀಲಾಮ್ |೫|

ತಾಂ ಮಂತ್ರ-ವರ್ಣೈರನು-ವರ್ಣನೀಯಾಂ
ಶರ್ವೇಂದ್ರ-ಪೂರ್ವೈರಪಿ ವಕ್ತು-ಕಾಮೇ |
ಸಙ್ಕ್ಷಿಪ್ನು-ವಾಕ್ಯೈ ಮಯಿ ಮಂದ-ಬುದ್ಧೌ
ಸಂತೋ ಗುಣಾಢ್ಯಾಃ ಕರುಣಾಂ ಕ್ರಿಯಾಸುಃ |೬|

ಉಚ್ಚಾವಚಾ ಯೇನ ಸಮಸ್ತ-ಚೇಷ್ಟಾಃ
ಕಿಂ ತತ್ರ ಚಿತ್ರಂ ಚರಿತಂ ನಿವೇದ್ಯಮ್ |
ಕಿಂತೂತ್ತಮ-ಶ್ಲೋಕ-ಶಿಖಾ-ಮಣೀನಾಂ
ಮನೋ-ವಿಶುದ್ಧೈ ಚರಿತಾನು-ವಾದಃ |೭|

ಮಾಲಾ-ಕೃತಸ್ತಚ್ಚರಿತಾಖ್ಯ-ರತ್ನೈ:
ಅಸೂಕ್ಷ್ಮ-ದೃಷ್ಟೇಃ ಸ-ಕುತೂಹಲಸ್ಯ |
ಪೂರ್ವಾಪರೀಕಾರಮಥಾಪರಂ ವಾ
ಕ್ಷಾಮ್ಯಂತು ಮೇ ಹಂತ ಮುಹುರ್ಮಹಾಂತಃ |೮|

ಶ್ರೀ-ವಲ್ಲಭಾಜ್ಞಾಂ ಸ-ಸುರೇಂದ್ರ-ಯಾಜ್ಞಾಂ
ಸಮ್ಬಾವ್ಯ ಸಮ್ಬಾವ್ಯ-ತಮಾಂ ತ್ರಿಲೋಕ್ಯಾಮ್ |
ಪ್ರಾಣೇಶ್ವರಃ ಪ್ರಾಣಿ-ಗಣ-ಪ್ರಣೇತಾ
ಗುರುಃ ಸತಾಂ ಕೇಸರಿಣೋ ಗೃಹೇಽಭೂತ್ |೯ |

ಯೇ-ಯೇ ಗುಣಾ ನಾಮ ಜಗತ್-ಪ್ರಸಿದ್ಧಾಃ
ಯಂ ತೇಷು-ತೇಷು ಸ್ಮ ನಿದರ್ಶಯಂತಿ |
ಸಾಕ್ಷಾತ್ಮಹಾ-ಭಾಗವತ-ಪ್ರಬರ್ಹಂ
ಶ್ರೀಮಂತಮೇನಂ ಹನುಮಂತಮಾಹುಃ |೧೦|

ಕರ್ಮಾಣಿ ಕುರ್ವನ್ ಪರಮಾದ್ಭುತಾನಿ
ಸಭಾಸು ದೈವೀಷು ಸಭಾಜಿತಾನಿ |
ಸುಗ್ರೀವ-ಮಿತ್ರಂ ಸ ಜಗತ್-ಪವಿತ್ರಂ
ರಮಾ-ಪತಿಂ ರಾಮ-ತನುಂ ದದರ್ಶ | ೧೧ |

ಪದಾರವಿಂದ-ಪ್ರಣತೋ ಹರೀಂದ್ರಃ
ತದಾ ಮಹಾಭಕ್ತಿ-ಭರಾಭಿನುನ್ನ: |
ಅಗ್ರಾಹಿ ಪದ್ಮೋದರ-ಸುಂದರಾಭ್ಯಾಂ
ದೋರ್ಭ್ಯಾಂ ಪುರಾಣೇನ ಸ ಪೂರುಷೇಣ |೧೨|

ಅದಾರ್ಯ-ಸಾಲಾವಲಿ-ದಾರಣೇನ
ವ್ಯಾಪಾದಿತೇಂದ್ರ-ಪ್ರಭವೇನ ತೇನ |
ಪ್ರಾದ್ಯೋತನಿ-ಪ್ರೀತಿ-ಕೃತಾ ನಿಕಾಮಂ
ಮಧುದ್ವಿಷಾ ಸನ್ನಿದಿಶೇ ಸ ವೀರಃ | ೧೩|

ಕರ್ಣಾಂತಮಾನೀಯ ಗುಣ-ಗ್ರಹೀತ್ರಾ
ರಾಮೇಣ ಮುಕ್ತ ರಣ-ಕೋವಿದೇನ |
ಸ್ಫುರನ್ನಸೌ ವೈರಿ-ಭಯಙ್ಕರೋಽಭೂತ್
ಸತ್-ಪಕ್ಷಪಾತೀ ಪ್ರದರೋ ಯರ್ಥಾಽಗ್ರ್ಯಃ | ೧೪|

ಗೋಭಿಃ ಸಮಾನಂದಿತ-ರೂಪಸೀತಃ
ಸ್ವ-ವಹ್ನಿ-ನಿರ್ದಗ್ಧ-ಪಲಾಶಿ-ರಾಶಿಃ |
ಅಹೋ ಹನೂಮನ್ನವ-ವಾರಿದೋಽಸೌ
ತೀರ್ಣಾಮ್ಬುಧಿರ್ವಿಷ್ಣು-ಪದೇ ನನಾಮ | ೧೫|

ಅಪಕ್ಷ-ಪಾತೀ ಪುರುಷಸ್ತ್ರಿಲೋಕ್ಯಾಂ
ಅಭೋಗ-ಭೋಕ್ತಾ ಪತಗಾಧಿ-ರಾಜಮ್ |
ವಿಶ್ವಮ್ಭರಮ್ ಬಿಭ್ರದಸೌ ಜಿಗಾಯ
ತ್ವರಾ-ಪರಾಕ್ರಾಂತಿಷ್ಟು ಚಿತ್ರಮೇತತ್ |೧೬|

ನಿಬದ್ಧ್ಯ ಸೇತುಂ ರಘು-ವಂಶ-ಕೇತು-
ಭ್ರೂ-ಭಙ್ಗ-ಸಮ್ಭ್ರಾಂತ-ಪಯೋಧಿ-ಮಧ್ಯೆ |
ಮುಷ್ಟಿ-ಪ್ರಹಾರಂ ದಶ-ಕಾಯ ಸೀತಾ
ಸಂತರ್ಜನಾಗ್ರ್ಯೋತ್ತರಮೇಷಕೋಽದಾತ್ |೧೭|

ಜಾಜ್ವಲ್ಯಮಾನೋಜ್ವಲ-ರಾಘವಾಗ್ನೌ
ಚಕ್ರೇ ಸ ಸುಗ್ರೀವ-ಸು-ಯಾಯಜೂಕೇ |
ಆಧ್ವರ್ಯವಂ ಯುದ್ಧ-ಮಖೇ ಪ್ರತಿಪ್ರ-
ಸ್ಥಾತ್ರಾ ಸುಮಿತ್ರಾ-ತನಯೇನ ಸಾಕಮ್ |೧೮|

ರಾಮಾರ್ಚನೇ ಯೋ ನಯತಃ ಪ್ರಸೂನಂ
ದ್ವಾಭ್ಯಾಂ ಕರಾಭ್ಯಾಮಭವತ್ ಪ್ರಯತ್ನಃ |
ಏಕೇನ ದೋಷ್ಣಾ ನಯತೋ ಗಿರೀಂದ್ರಂ
ಸಂಜೀವನಾದ್ಯಾಶ್ರಯಮಸ್ಯ ನಾಭೂತ್ | ೧೯|

ಸ ದಾರಿತಾರಿಂ ಪರಮಂ ಪುಮಾಂಸಂ
ಸಮನ್ವಯಾಸೀನ್ನರ-ದೇವ-ಪುತ್ರ್ಯಾ |
ವಹಿ-ಪ್ರವೇಶಾಧಿಗತಾತ್ಮ-ಶುದ್ಧ್ಯಾ
ವಿರಾಜಿತಂ ಕಾಞ್ಚನ-ಮಾಲಯೇವ |೨೦|

ಶ್ಯಾಮಂ ಸ್ಮಿತಾಸ್ಯಂ ಪೃಥು-ದೀರ್ಘ-ಹಸ್ತಂ
ಸರೋಜ-ನೇತ್ರಂ ಗಜರಾಜಯಾತ್ರಮ್ |
ವಪುರ್ಜಗನ್ಮಙ್ಗಲಮೇಷ ದೃಗ್ಭ್ಯಾಂ
ಚಿರಾದಯೋಧ್ಯಾಧಿಪತೇಃ ಸಿಷೇವೇ |೨೧|

ರಾಜ್ಯಾಭಿಷೇಕೇಽವಸಿತೇಽತ್ರ ಸೀತಾ
ಪ್ರೇಷ್ಠಾಯ ನಸ್ತಾಂ ಭಜತಾಂ ದಿಶೇತಿ |
ರಾಮಸ್ಯ ವಾಣ್ಯಾ ಮಣಿ-ಮಂಜು-ಮಾಲಾ-
ವ್ಯಾಜೇನ ದೀರ್ಘಾಂ ಕರುಣಾಂ ಬಬಂಧ |೨೨|

ಹೃದೋರು-ಸೌಹಾರ್ದ-ಭೃತಾಽಧಿಮೌನಿನ್
ನ್ಯಸ್ತೇನ ಹಸ್ತೇನ ದಯಾದ್ರ್ರ-ದೃಷ್ಟ್ಯಾ |
ಸೇವಾ-ಪ್ರಸನ್ನೋಽಮೃತ-ಕಲ್ಪ-ವಾಚಾ
ದಿದೇಶ ದೇವ: ಸಹ-ಭೋಗಮಸ್ಮೈ |೨೩|

ಪ್ರೇಷ್ಟೋ ನ ರಾಮಸ್ಯ ಬಭೂವ ತಸ್ಮಾನ್
ನ ರಾಮ-ರಾಜ್ಯೇಽಸುಲಭಂ ಚ ಕಿಞ್ಚಿತ್ |
ತತ್-ಪಾದ-ಸೇವಾ-ರತಿರೇಷ ನೈಚ್ಛತ್
ತಥಾಽಪಿ ಭೋಗಾನ್ ನನು ಸಾ ವಿರಕ್ತಿಃ |೨೪|

ನಮೋ-ನಮೋ ನಾಥ ನಮೋ-ನಮಸ್ತೇ
ನಮೋ-ನಮೋ ರಾಮ ನಮೋ-ನಮಸ್ತೇ |
ಪುನಃ-ಪುನಸ್ತೇ ಚರಣಾರವಿಂದಂ
ನಮಾಮಿ ನಾಥೇತಿ ನಮನ್ ಸ ರೇಮೇ |೨೫|

ಕಿಂ ವರ್ಣಯಾಮಃ ಪರಮಂ ಪ್ರಸಾದಂ
ಸೀತಾಪತೇಸ್ತತ್ರ ಹರಿ-ಪ್ರಬರ್ಹೇ |
ಮುಞ್ಚನ್ ಮಹೀಂ ನಿತ್ಯ-ನಿಷೇವಣಾರ್ಥಂ
ಸ್ವಾತ್ಮಾನಮೇವೈಷ ದದೌ ಯದಸ್ಮೈ |೨೬|

ಸ್ವಾನಂದ-ಹೇತೌ ಭಜತಾಂ ಜನಾನಾಂ
ಮಗ್ನಃ ಸದಾ ರಾಮ-ಕಥಾ-ಸುಧಾಯಾಮ್ |
ಅಸಾವಿದಾನೀಂ ಚ ನಿಷೇವಮಾಣೋ
ರಾಮಂ ಪತಿಂ ಕಿಮ್ಪುರುಷೇ ಕಿಲಾಽಸ್ತೇ |೨೭|

ತಸ್ಯೆವ ವಾಯೋರವತಾರಮೇನಂ
ಸಂತೋ ದ್ವಿತೀಯಂ ಪ್ರವದಂತಿ ಭೀಮಮ್ |
ಸ್ಪೃಷ್ಟೈವ ಯಂ ಪ್ರೀತಿಮಾತಾಽನಿಲೇನ
ನರೇಂದ್ರ-ಕಾಂತಾ ಸುಷುವೇಽತ್ರ ಕುಂತೀ |೨೮|

ಇಂದ್ರಾಯುಧಂ ಹೀಂದ್ರ-ಕರಾಭಿನುನ್ನಂ
ಚಿಚ್ಛೇದ ಪಕ್ಷಾನ್ ಕ್ಷಿತಿಧಾರಿಣಾಂ ಪ್ರಾಕ್ |
ಬಿಭೇದ ಭೂಭೃದ್-ವಪುರಙ್ಗ-ಸಙ್ಗಾತ್
ಚಿತ್ರಂ ಸ ಪನ್ನೋ ಜನನೀ ಕರಾಗ್ರಾತ್ |೨೯ |

ಪುರೇ ಕುಮಾರಾನಲಸಾನ್ ವಿಹಾರಾನ್
ನಿರೀಕ್ಷ್ಯ ಸರ್ವಾನಪಿ ಮಂದ-ಲೀಲಃ |
ಕೈಶೋರ-ಲೀಲಾಂ ಹತ-ಸಿಂಹ-ಸಙ್ಘಾಂ
ವೃತ್ತಾಂ ವನೇ ಪ್ರಾಕ್ ಸ್ಮರತಿ ಸ್ಮ ಸೂತ್ಕಃ | ೩೦ |

ಭುಕ್ತಂ ಚ ಜೀರ್ಣಂ ಪರಿಪಂಥಿ-ದತ್ತಂ
ವಿಷಂ ವಿಷಣ್ಣೋ ವಿಷ-ಭೃದ್-ಗಣೋಽತಃ |
ಪ್ರಮಾಣ-ಕೋಟೇಃ ಸ ಹಿ ಹೇಳರ್ಯಾಗಾತ್
ನೇದಂ ಜಗಜ್ಜೀವನ-ದೇಽತ್ರ ಚಿತ್ರಮ್ |೩೧ |

ದಗ್ಧ್ವಾಪುರಂ ಯೋಗ-ಬಲಾತ್ ಸ ನಿರ್ಯನ್
ಧರ್ಮಾನಿವ ಸ್ವಾನ್ ಸಹಜಾನ್ ದಧಾನಃ |
ಅದಾರಿ-ಭಾವೇನ ಜಗತ್ಸು ಪೂಜ್ಯೋ
ಯೋಗೀವ ನಾರಾಯಣಮಾಸಸಾದ |೩೨|

ಸಮರ್ಪ್ಯ ಕೃತ್ಯಾನಿ ಕೃತೀ ಕೃತಾನಿ
ವ್ಯಾಸಾಯ ಭೂಮ್ನೇ ಸುಕೃತಾನಿ ಯಾವತ್ |
ಕರಿಷ್ಯಮಾಣಾನಿ ಚ ತಸ್ಯ ಪೂಜಾಂ
ಸಙ್ಕಲ್ಪಯಾಮಾಸ ಸ ಶುದ್ಧ-ಬುದ್ಧಿಃ |೩೩|

ವಿಷ್ಣೋಃ ಪದ-ಶ್ರಿದ್ ಬಕ-ಸನ್ನಿರಾಸೀ
ಕ್ಷಿಪ್ತಾನ್ಯ-ಪಕ್ಷಿ-ಪ್ರಕರಃ ಸು-ಪಕ್ಷಃ |
ಸ-ಸೋದರೋಸ್ಥಾಽದಿತ ರಾಜ-ಹಂಸಃ
ಸ ರಾಜ-ಹಂಸೀಮಿವ ರಾಜ-ಕನ್ಯಾಮ್ |೩೪|

ಇಂದೀವರ-ಶ್ರೀ-ಜಯಿ-ಸುಂದರಾಭಂ
ಸ್ಮೇರಾನನೇಂದುಂ ದಯಿತಂ ಮುಕುಂದಮ್ |
ಸ್ವ-ಮಾತುಲೇಯಂ ಕಮಲಾಯತಾಕ್ಷಂ
ಸಮಭ್ಯನಂದತ್ ಸು-ಚಿರಾಯ ಭೀಮಃ |೩೫ |

ಮಹಾ-ಗದಂ ಚಣ್ಡ-ರಣಂ ಪೃಥಿವ್ಯಾಂ
ಬಾರ್ಹದ್ರಥಂ ಮಞ್ಕ್ಷು ನಿರಸ್ಯ ವೀರಃ |
ರಾಜಾನಮತ್ಯುಜ್ಜ್ವಲ-ರಾಜ-ಸೂಯಂ
ಚಕಾರ ಗೋವಿಂದ-ಸುರೇಂದ್ರಜಾಭ್ಯಾಮ್ |೩೬|

ದುಃಶಾಸನೇನಾಽಕುಲಿತಾನ್ ಪ್ರಿಯಾಯಾಃ
ಸೂಕ್ಷ್ಮಾನರಾಳಾನಸಿತಾಂಶ್ಚ ಕೇಶಾನ್ |
ಜಿಘಾಂಸಯಾ ವೈರಿ-ಜನಸ್ಯ ತೀಕ್ಷ್ಣಃ
ಸ ಕೃಷ್ಣ-ಸರ್ಪಾನಿವ ಸಞ್ಚಿಕಾಯ |೩೭|

ಜಾಜ್ವಲ್ಯಮಾನಸ್ಯ ವನೇ-ವನೇಲಂ
ದಿಧಕ್ಷತಃ ಪಾರ್ಥಿವ-ಸಾರ್ಥಮುಗ್ರಮ್ |
ಸತ್ವಾನಿ ಪುಂಸಾಂ ಭಯದಾನಿ ನಾಶಂ
ವೃಕೋದರಾಗ್ನೇರ್ಗುರು-ತೇಜಸಾಽಪುಃ |೩೮|

ಭೋಗಾಧಿಕಾಭೋಗ-ವತೋಽರುಣಾಕ್ಷಾನ್
ಇತಸ್ತತಃ ಸಂವಲತೋ ಧರೇಂದ್ರೇ |
ಬಹೂನ್ ದ್ವಿಜಿಹ್ವಾನ್ ಮಣಿಮತ್-ಪುರೋಗಾನ್
ಅಸೌ ಕಟೂನ್ ಕ್ರೋಧ-ವಶಾನ್ ಜಘಾನ ||೩೯|

ಅಥೈಷ ವೇಷಾಂತರ-ಭಸ್ಮ-ಲೀನಃ
ಕ್ರಮೇಣ ವಾಯು-ಪ್ರಭವಃ ಸು ತೇಜಾಃ |
ರುದ್ಧಾಖಿಲಾಶಂ ಮುಖರಂ ಪ್ರಚಣ್ಡಂ
ಭಸ್ಮಿ-ಚಕಾರಾಖಿಲ-ಕೀಚಕೌಘಮ್ |೪೦|

ಸ ಕೃಷ್ಣ-ವರ್ತ್ಮಾ ವಿಜಯೇನ ಯುಕ್ತೋ
ಮುಹುರ್ಮಹಾ-ಹೇತಿ-ಧರೋಽಪ್ರಧೃಷ್ಯ:
ಭೀಷ್ಮ-ದ್ವಿಜಾದ್ಯೈರತಿ-ಭೀಷಣಾಭಂ
ವಿಪಕ್ಷ-ಕಕ್ಷಂ ಕ್ಷಪಯನ್ ವಿರೇಜೇ |೪೧ |

ತರಸ್ವಿನಃ ಪ್ರೋಚ್ಚಲಿತಾನಧೀರಾನ್
ನಿರ್ದಗ್ಧ-ಪಕ್ಷಾನತಿತೀಕ್ಷ್ಣ-ಕೋಪಾನ್ |
ಸ ಧಾರ್ತರಾಷ್ಟ್ರಾನ್ ಬಹು-ಹೇತಿ-ಲೀಲೋ
ವಿನಾಶ್ಯ ವಿಶ್ವಾನ್ ಪರಯಾ ಶ್ರಿಯಾಽಭಾತ್ |೪೨|

ಕೃಷ್ಣಾಙ್ಘ್ರಿ-ಪಙ್ಕೇರುಹ-ಭೃಙ್ಗ-ರಾಜಃ
ಕೃಷ್ಣಾ-ಮುಖಾಮ್ಭೋರುಹ-ಹಂಸ-ರಾಜ: |
ಪ್ರಜಾ-ಸರೋಜಾವಲಿ-ರಶ್ಮಿ-ರಾಜ:
ಸ-ಸೋದರೋಽರಾಜತ ವೀರ-ರಾಜಃ | ೪೩ |

ಪೌತ್ರೇ ಪವಿತ್ರಾಹ್ವಯ-ಜಾಮಿ-ಪೌತ್ರೇ
ಧರಾಂ ನಿಧಾಯಾಸುರ-ಧೀಷು ತಾಪಮ್ |
ಕೀರ್ತಿಂ ತ್ರಿಲೋಕ್ಯಾಂ ಹೃದಯಂ ಮುಕುಂದೇ
ಭೇಜೇ ಪದಂ ಸ್ವಂ ಸಹಜೈಃ ಸ ಭೀಮಃ |೪೪|

ವಿಷ್ಣೋಃ ಪದಾಂತಂ ಭಜತಾಽನಿಲೇನ
ಘೋರ-ಪ್ರಘಾತೈರಿತಿ ನಾಶಿತಾಸ್ತೇ |
ರಸೋಜ್ಝಿತಾಶ್ಚಞ್ಚಲ-ವೃತ್ತಯೋಽಲಂ
ಶೋಭಾಂ ನ ಭೇಯುಃ ಸುರ-ವೈರಿ-ಮೇಘಾಃ |೪೫|

ಏತತ್-ಪ್ರತೀಪಂ ಕಿಲ ಕರ್ತುಕಾಮಾಃ
ನಷ್ಟೌಜಸಃ ಸಙ್ಕಟಮೇವಮಾಪ್ಯ |
ಮುಕುಂದ-ವೈಗುಣ್ಯ-ಕಥಾಂ ಸ್ವ-ಯೋಗ್ಯಾಂ
ಕಾಲೇ ಕಲಾವಾಕಲಯಂತ ತೇಽಲಮ್ |೪೬|

ಯೋ ಭೂರಿ-ವೈರೋ ಮಣಿಮಾನ್ ಮೃತಃ ಪ್ರಾಗ್
ವಾಗ್ಮಿ ಬುಭೂಷುಃ ಪರಿತೋಷಿತೇಷಃ |
ಸ ಸಙ್ಕರಾಖ್ಯೋಽಙ್ಘ್ರಿ-ತಳೇಷು ಜಜ್ಞೇ
ಸ್ಪೃಧಾ ಪರೇಽಪ್ಯಾಸುರಿಹಾಸುರೇಂದ್ರಾಃ |೪೭|

ಸಾನ್ನಾಯ್ಯಮವ್ಯಕ್ತ-ಹೃದಾಖು-ಭುಗ್ ವಾ
ಶ್ವಾ ವಾ ಪುರೋಡಾಶಮಸಾರ-ಕಾಮಃ |
ಮಣಿಸ್ರಜಂ ವಾ ಪ್ಲವಗೋಽವ್ಯವಸ್ಥೋ
ಜಗ್ರಾಹ ವೇದಾದಿಕಮೇಷ ಪಾಪಃ |೪೮|

ಜನೋ ನಮೇನ್ನಾಪರಥೇತಿ ಮತ್ವಾ
ಶಠಶ್ಚತುರ್ಥಾಶ್ರಮಮೇಷ ಭೇಜೇ |
ಪದ್ಮಾಕರಂ ವಾ ಕಲುಷೀ-ಚಿಕೀರ್ಷು:
ಸು-ದುರ್ದಮೋ ದುಷ್ಟ-ಗಜೋ ವಿಶುದ್ಧಮ್ |೪೯|

ಅವೈದಿಕಂ ಮಾಧ್ಯಮಿಕಂ ನಿರಸ್ತಂ
ನಿರೀಕ್ಷ್ಯ ತತ್-ಪಕ್ಷ-ಸುಪಕ್ಷ-ಪಾತೀ |
ತಮೇವ ಪಕ್ಷಂ ಪ್ರತಿ-ಪಾದುಕೋಽಸೌ
ನ್ಯರೂರುಪನ್ಮಾರ್ಗಮಿಹಾನುರೂಪಮ್ |೫೦|

ಅಸತ್-ಪದೇಽಸನ್ ಸದಸದ್-ವಿವಿಕ್ತಂ
ಮಾಯಾಖ್ಯಯಾ ಸಂವೃತಿಮಭ್ಯಧತ್ತ |
ಬ್ರಹ್ಮಾಪ್ಯಖಣ್ಡಂ ಬತ ಶೂನ್ಯ-ಸಿದ್ಧ್ಯೈ
ಪ್ರ-ಚ್ಛನ್ನ-ಬೌದ್ಧೋಽಯಮತಃ ಪ್ರ-ಸಿದ್ಧಃ |೫೧ |

ಯದ್ ಬ್ರಹ್ಮ-ಸೂತ್ರೋತ್ಕರ-ಭಾಸ್ಕರಂ ಚ
ಪ್ರಕಾಶಯಂತಂ ಸಕಲಂ ಸ್ವ-ಗೋಭಿಃ |
ಅಚೂಚುರದ್ ವೇದ-ಸಮೂಹ-ವಾಹಂ
ತತೋ ಮಹಾ-ತಸ್ಕರಮೇನಮಾಹುಃ |೫೨|

ಸ್ವ-ಸೂತ್ರ-ಜಾತಸ್ಯ ವಿರುದ್ಧ-ಭಾಷೀ
ತದ್-ಭಾಷ್ಯ-ಕಾರೋಽಹಮಿತಿ ಬ್ರುವನ್ ಯಃ |
ತಂ ತತ್-ಕ್ಷಣಾದ್ ಯೋ ನ ದಿಧಕ್ಷತಿ ಸ್ಮ
ಸ ವ್ಯಾಸ-ರೂಪೋ ಭಗವಾನ್ ಕ್ಷಮಾಬ್ಧಿ: |೫೩|

ನಿಗಮ-ಸನ್ಮಣಿ-ದೀಪ-ಗಣೋಽಭವತ್
ತದುರು-ವಾಗ್-ಗಣ-ಪಙ್ಕ-ನಿಗೂಢ-ಭಾಃ |
ಅವಿದುಷಾಮಿತಿ ಸಙ್ಕರತಾ-ಕರಃ
ಸ ಕಿಲ ಸಙ್ಕರ ಇತ್ಯಭಿ-ಶುಶ್ರುವೇ |೫೪|

ವಿಶ್ವಂ ಮಿಥ್ಯಾ ವಿಭುರಗುಣವಾನಾತ್ಮನಾಂ ನಾಸ್ತಿ ಭೇದೋ
ದೈತ್ಯಾ ಇತ್ಥಂ ವ್ಯದಧತ ಗಿರಾಂ ದಿಕ್ಷು ಭೂಯಃ ಪ್ರಸಿದ್ಧಿಮ್ |
ಆನಂದಾದ್ಯೈರ್ಗುರು-ಗುಣ-ಗಣೈ: ಪೂರಿತೋ ವಾಸುದೇವೋ
ಮಂದಂ-ಮಂದಂ ಮನಸಿ ಚ ಸತಾಂ ಹಂತ ನೂನಂ ತಿರೋಽಭೂತ್ |೫೫ |

| ಇತಿ ಶ್ರೀಮತ್ಕವಿ-ಕುಲ-ತಿಲಕ-ತ್ರಿವಿಕ್ರಮ-ಪಣ್ಡಿತಾಚಾರ್ಯ
ಸುತ ಶ್ರೀ ನಾರಾಯಣ-ಪಣ್ಡಿತಾಚಾರ್ಯ-ವಿರಚಿತೇ ಶ್ರೀ-ಮಧ್ವ
ವಿಜಯೇ ಮಹಾ-ಕಾವ್ಯೇ ಆನಂದಾಙ್ಕಿತೇ ಪ್ರಥಮಃ ಸರ್ಗ: |

---

prathamaH sargaH

kAMtAya kalyANa-guNaika-dhAmnE
nava-dyunAtha-pratima-praBAya |
nArAyaNAyAKila-kAraNAya
SrI-prANa-nAthAya namaskarOmi |1|

anAkulaM gOkulamullalAsa
yat-pAlitaM nityamanAvilAtma |
tasmainamO nIrada-nIla-BAsE
kRuShNAya kRuShNA-ramaNa-priyAya | 2 |

api trilOkyA bahirullasaMtI
tamO haraMti muhurAMtaraM ca |
diSyAd dRuSaM nO viSadAM jayaMtI
madhvasya kIrtirdina-nAtha-dIptim | 3 |

tamO-nudA&&naMdamavApa lOka:
tatva-pradIpAkRuti-gO-gaNEna |
yadAsya-SItAMSu-BuvA gurUMstAn
trivikramAryAn praNamAmi varyAn |4|

mukuMda-Baktyai guru-Bakti-jAyai
satAM prasatyai ca niraMtarAyai |
garIyasIM viSva-gurOrviSuddhAM
vakShyAmi vAyOravatAra-lIlAm |5|

tAM maMtra-varNairanu-varNanIyAM
SarvEMdra-pUrvairapi vaktu-kAmE |
sa~gkShipnu-vAkyai mayi maMda-buddhau
saMtO guNADhyAH karuNAM kriyAsuH |6|

uccAvacA yEna samasta-cEShTAH
kiM tatra citraM caritaM nivEdyam |
kiMtUttama-SlOka-SiKA-maNInAM
manO-viSuddhai caritAnu-vAdaH |7|

mAlA-kRutastaccaritAKya-ratnai:
asUkShma-dRuShTEH sa-kutUhalasya |
pUrvAparIkAramathAparaM vA
kShAmyaMtu mE haMta muhurmahAMtaH |8|

SrI-vallaBAj~jAM sa-surEMdra-yAj~jAM
sambAvya sambAvya-tamAM trilOkyAm |
prANESvaraH prANi-gaNa-praNEtA
guruH satAM kEsariNO gRuhE&BUt |9 |

yE-yE guNA nAma jagat-prasiddhAH
yaM tEShu-tEShu sma nidarSayaMti |
sAkShAtmahA-BAgavata-prabarhaM
SrImaMtamEnaM hanumaMtamAhuH |10|

karmANi kurvan paramAdButAni
saBAsu daivIShu saBAjitAni |
sugrIva-mitraM sa jagat-pavitraM
ramA-patiM rAma-tanuM dadarSa | 11 |

padAraviMda-praNatO harIMdraH
tadA mahABakti-BarABinunna: |
agrAhi padmOdara-suMdarAByAM
dOrByAM purANEna sa pUruShENa |12|

adArya-sAlAvali-dAraNEna
vyApAditEMdra-praBavEna tEna |
prAdyOtani-prIti-kRutA nikAmaM
madhudviShA sannidiSE sa vIraH | 13|

karNAMtamAnIya guNa-grahItrA
rAmENa mukta raNa-kOvidEna |
sphurannasau vairi-Baya~gkarO&BUt
sat-pakShapAtI pradarO yarthA&gryaH | 14|

gOBiH samAnaMdita-rUpasItaH
sva-vahni-nirdagdha-palASi-rASiH |
ahO hanUmannava-vAridO&sau
tIrNAmbudhirviShNu-padE nanAma | 15|

apakSha-pAtI puruShastrilOkyAM
aBOga-BOktA patagAdhi-rAjam |
viSvambharam biBradasau jigAya
tvarA-parAkrAMtiShTu citramEtat |16|

nibaddhya sEtuM raGu-vaMSa-kEtu-
BrU-Ba~gga-sambhrAMta-payOdhi-madhye |
muShTi-prahAraM daSa-kAya sItA
saMtarjanAgryOttaramEShakO&dAt |17|

jAjvalyamAnOjvala-rAGavAgnau
cakrE sa sugrIva-su-yAyajUkE |
AdhvaryavaM yuddha-maKE pratipra-
sthAtrA sumitrA-tanayEna sAkam |18|

rAmArcanE yO nayataH prasUnaM
dvAByAM karAByAmaBavat prayatnaH |
EkEna dOShNA nayatO girIMdraM
saMjeevanAdyASrayamasya nABUt | 19|

sa dAritAriM paramaM pumAMsaM
samanvayAsInnara-dEva-putryA |
vahi-pravESAdhigatAtma-SuddhyA
virAjitaM kA~jcana-mAlayEva |20|

SyAmaM smitAsyaM pRuthu-dIrGa-hastaM
sarOja-nEtraM gajarAjayAtram |
vapurjaganma~ggalamESha dRugbhyAM
cirAdayOdhyAdhipatEH siShEvE |21|

rAjyABiShEkE&vasitE&tra sItA
prEShThAya nastAM BajatAM diSEti |
rAmasya vANyA maNi-maMju-mAlA-
vyAjEna dIrGAM karuNAM babaMdha |22|

hRudOru-sauhArda-bhRutA&dhimaunin
nyastEna hastEna dayAdrra-dRuShTyA |
sEvA-prasannO&mRuta-kalpa-vAcA
didESa dEva: saha-BOgamasmai |23|

prEShTO na rAmasya baBUva tasmAn
na rAma-rAjyE&sulaBaM ca ki~jcit |
tat-pAda-sEvA-ratirESha naicCat
tathA&pi BOgAn nanu sA viraktiH |24|

namO-namO nAtha namO-namastE
namO-namO rAma namO-namastE |
punaH-punastE caraNAraviMdaM
namAmi nAthEti naman sa rEmE |25|

kiM varNayAmaH paramaM prasAdaM
sItApatEstatra hari-prabarhE |
mu~jcan mahIM nitya-niShEvaNArthaM
svAtmAnamEvaiSha dadau yadasmai |26|

svAnaMda-hEtau BajatAM janAnAM
magnaH sadA rAma-kathA-sudhAyAm |
asAvidAnIM ca niShEvamANO
rAmaM patiM kimpuruShE kilA&stE |27|

tasyeva vAyOravatAramEnaM
saMtO dvitIyaM pravadaMti BImam |
spRuShTaiva yaM prItimAtA&nilEna
narEMdra-kAMtA suShuvE&tra kuMtI |28|

iMdrAyudhaM hIMdra-karABinunnaM
cicCEda pakShAn kShitidhAriNAM prAk |
biBEda BUBRud-vapura~gga-sa~ggAt
citraM sa pannO jananI karAgrAt |29 |

purE kumArAnalasAn vihArAn
nirIkShya sarvAnapi maMda-lIlaH |
kaiSOra-lIlAM hata-siMha-sa~gghAM
vRuttAM vanE prAk smarati sma sUtkaH | 30 |

BuktaM ca jIrNaM paripaMthi-dattaM
viShaM viShaNNO viSha-BRud-gaNO&taH |
pramANa-kOTEH sa hi hELaryAgAt
nEdaM jagajjIvana-dE&tra citram |31 |

dagdhvApuraM yOga-balAt sa niryan
dharmAniva svAn sahajAn dadhAnaH |
adAri-BAvEna jagatsu pUjyO
yOgIva nArAyaNamAsasAda |32|

samarpya kRutyAni kRutI kRutAni
vyAsAya BUmnE sukRutAni yAvat |
kariShyamANAni ca tasya pUjAM
sa~gkalpayAmAsa sa Suddha-buddhiH |33|

viShNOH pada-Srid baka-sannirAsI
kShiptAnya-pakShi-prakaraH su-pakShaH |
sa-sOdarOsthA&dita rAja-haMsaH
sa rAja-haMsImiva rAja-kanyAm |34|

iMdIvara-SrI-jayi-suMdarABaM
smErAnanEMduM dayitaM mukuMdam |
sva-mAtulEyaM kamalAyatAkShaM
samaByanaMdat su-cirAya BImaH |35 |

mahA-gadaM caNDa-raNaM pRuthivyAM
bArhadrathaM ma~jkShu nirasya vIraH |
rAjAnamatyujjvala-rAja-sUyaM
cakAra gOviMda-surEMdrajAByAm |36|

duHSAsanEnA&kulitAn priyAyAH
sUkShmAnarALAnasitAMSca kESAn |
jiGAMsayA vairi-janasya tIkShNaH
sa kRuShNa-sarpAniva sa~jcikAya |37|

jAjvalyamAnasya vanE-vanElaM
didhakShataH pArthiva-sArthamugram |
satvAni puMsAM BayadAni nASaM
vRukOdarAgnErguru-tEjasA&puH |38|

BOgAdhikABOga-vatO&ruNAkShAn
itastataH saMvalatO dharEMdrE |
bahUn dvijihvAn maNimat-purOgAn
asau kaTUn krOdha-vaSAn jaGAna ||39|

athaiSha vEShAMtara-Basma-lInaH
kramENa vAyu-praBavaH su tEjAH |
ruddhAKilASaM muKaraM pracaNDaM
Basmi-cakArAKila-kIcakauGam |40|

sa kRuShNa-vartmA vijayEna yuktO
muhurmahA-hEti-dharO&pradhRuShya:
BIShma-dvijAdyairati-BIShaNABaM
vipakSha-kakShaM kShapayan virEjE |41 |

tarasvinaH prOccalitAnadhIrAn
nirdagdha-pakShAnatitIkShNa-kOpAn |
sa dhArtarAShTrAn bahu-hEti-lIlO
vinASya viSvAn parayA SriyA&BAt |42|

kRuShNA~gghri-pa~gkEruha-BRu~gga-rAjaH
kRuShNA-muKAmbhOruha-haMsa-rAja: |
prajA-sarOjAvali-raSmi-rAja:
sa-sOdarO&rAjata vIra-rAjaH | 43 |

pautrE pavitrAhvaya-jAmi-pautrE
dharAM nidhAyAsura-dhIShu tApam |
kIrtiM trilOkyAM hRudayaM mukuMdE
BEjE padaM svaM sahajaiH sa BImaH |44|

viShNOH padAMtaM BajatA&nilEna
GOra-praGAtairiti nASitAstE |
rasOjjhitASca~jcala-vRuttayO&laM
SOBAM na BEyuH sura-vairi-mEGAH |45|

Etat-pratIpaM kila kartukAmAH
naShTaujasaH sa~gkaTamEvamApya |
mukuMda-vaiguNya-kathAM sva-yOgyAM
kAlE kalAvAkalayaMta tE&lam |46|

yO BUri-vairO maNimAn mRutaH prAg
vAgmi buBUShuH paritOShitEShaH |
sa sa~gkarAkhyO&~gghri-taLEShu jaj~jE
spRudhA parE&pyAsurihAsurEMdrAH |47|

sAnnAyyamavyakta-hRudAKu-Bug vA
SvA vA purODASamasAra-kAmaH |
maNisrajaM vA plavagO&vyavasthO
jagrAha vEdAdikamESha pApaH |48|

janO namEnnAparathEti matvA
SaThaScaturthASramamESha BEjE |
padmAkaraM vA kaluShI-cikIrShu:
su-durdamO duShTa-gajO viSuddham |49|

avaidikaM mAdhyamikaM nirastaM
nirIkShya tat-pakSha-supakSha-pAtI |
tamEva pakShaM prati-pAdukO&sau
nyarUrupanmArgamihAnurUpam |50|

asat-padE&san sadasad-viviktaM
mAyAKyayA saMvRutimaByadhatta |
brahmApyaKaNDaM bata SUnya-siddhyai
pra-cCanna-bauddhO&yamataH pra-siddhaH |51 |

yad brahma-sUtrOtkara-BAskaraM ca
prakASayaMtaM sakalaM sva-gOBiH |
acUcurad vEda-samUha-vAhaM
tatO mahA-taskaramEnamAhuH |52|

sva-sUtra-jAtasya viruddha-BAShI
tad-BAShya-kArO&hamiti bruvan yaH |
taM tat-kShaNAd yO na didhakShati sma
sa vyAsa-rUpO BagavAn kShamAbdhi: |53|

nigama-sanmaNi-dIpa-gaNO&Bavat
taduru-vAg-gaNa-pa~gka-nigUDha-BAH |
aviduShAmiti sa~gkaratA-karaH
sa kila sa~gkara ityaBi-SuSruvE |54|

viSvaM mithyA viBuraguNavAnAtmanAM nAsti BEdO
daityA itthaM vyadadhata girAM dikShu BUyaH prasiddhim |
AnaMdAdyairguru-guNa-gaNai: pUritO vAsudEvO
maMdaM-maMdaM manasi ca satAM haMta nUnaM tirO&BUt |55 |

| iti SrImatkavi-kula-tilaka-trivikrama-paNDitAcArya
suta SrI nArAyaNa-paNDitAcArya-viracitE SrI-madhva
vijayE mahA-kAvyE AnaMdA~gkitE prathamaH sarga: |