Ramakrishnaru Manege

Composer: Shri Purandara dasaru

ರಾಮಕೃಷ್ಣರು ಮನೆಗೆ ಬಂದರು ಬಾಗಿಲು ತೆಗೆಯಿರೊ ||ಪ||

ಕಾಮಧೇನು ಬಂದಂತಾಯಿತು ವರವ ಬೇಡಿರೊ ||ಅ.ಪ||

ಚೆಂಡು ಬುಗುರಿ ಚಿಣ್ಣೀ ಕೋಲು ಗಜ್ಜುಗವಾಡುತ
ದುಂಡು ಮಲ್ಲಿಗೆ ಮುಡಿದು ಕೊಳಲನೂದಿ ಪಾಡುತ
ಹಿಂಡುಪೆಣ್ಗಳ ಮುದ್ದು ಮುಖದ ಸೊಬಗ ನೋಡುತ
ಭಂಡು ಮಾಡಿ ಬಾಲೆಯರೊಡನೆ ಸರಸವಾಡುತ ||೧||

ಮಕರ ಕುಂಡಲ ನೀಲಮುತ್ತಿನ ಬಾವುಲಿಡುತಲಿ
ಕಂಕಣ ಹಾರ ತೋಳಬಂದಿ ತೊಡಿಗೆ ತೊಡುತಲಿ
ಸುಕುಮಾರ ಸುಂದರವಾದ ಉಡುಗೆ ಉಡುತಲಿ
ಮುಖದ ಕಮಲ ಮುಗುಳು ನಗೆಯ ಸುಖವ ಕೊಡುತಲಿ ||೨||

ಪೊಕ್ಕುಳಲ್ಲಿ ಅಜನ ಪಡೆದ ದೇವದೇವನು
ಚಿಕ್ಕ ಉಂಗುಷ್ಟದಲಿ ಗಂಗೆಯ ಪಡೆದನು
ಮಕ್ಕಳ ಮಾಣಿಕ್ಯ ಗುರು ಪುರಂದರವಿಠಲನು
ಅಕ್ಕರೆಯಿಂದಲಿ ಮುಕುತಿ ಕೊಡುವ ರಂಗನಾಥನು ||೩||

---

rAmakRuShNaru manege baMdaru bAgilu tegeyiro ||pa||

kAmadhEnu baMdaMtAyitu varava bEDiro ||a.pa||

ceMDu buguri ciNNI kOlu gajjugavADuta
duMDu mallige muDidu koLalanUdi pADuta
hiMDupeNgaLa muddu muKada sobaga nODuta
BaMDu mADi bAleyaroDane sarasavADuta ||1||

makara kuMDala nIlamuttina bAvuliDutali
kaMkaNa hAra tOLabaMdi toDige toDutali
sukumAra suMdaravAda uDuge uDutali
muKada kamala muguLu nageya suKava koDutali ||2||

pokkuLalli ajana paDeda dEvadEvanu
cikka uMguShTadali gaMgeya paDedanu
makkaLa mANikya guru puraMdaraviThalanu
akkareyiMdali mukuti koDuva raMganAthanu ||3||