Pranadevara Hasta Mahima Suladi – Vijayadasaru

ಶ್ರೀ ವಿಜಯದಾಸಾರ್ಯ ವಿರಚಿತ
ಶ್ರೀ ಪ್ರಾಣದೇವರ ಹಸ್ತ ಮಹಿಮಾ ಸುಳಾದಿ
ರಾಗ: ಭೌಳಿ
ಧ್ರುವತಾಳ
( ಹನುಮದವತಾರ ಮಹಿಮೆ )
ಕಡಗ ಕಂಕಣದಿಂದ ಶೋಭಿತವಾದ ಹಸ್ತಾ
ಪೊಡವಿಪತಿ ರಘುನಾಥಗೆ ಎರಗಿ ಮುಗಿದ ಹಸ್ತಾ
ಒಡನೆ ಕುರುಹುಗೊಂಡು ಸೀತೆಗಿತ್ತ ಹಸ್ತಾ
ಗಿಡಗಳ ಮುರಿದು ತರಿದಂಥದೀ ಹಸ್ತಾ
ಘುಡಿಘುಡಿಸುತ ಅಕ್ಷನ ಸದೆಬಡೆದ ಹಸ್ತಾ
ಜಡ ರಾವಣನ ಎದೆಯಲ್ಲಿ ಗುದ್ದಿದ ಹಸ್ತಾ
ತಡೆಯದೆ ಚೂಡಾಮಣಿಯ ಒಡೆಯಗಿತ್ತ ಹಸ್ತಾ
ಕಡು ಪರಾಕ್ರಮದ ಹಸ್ತಾ
ಕಡಲ ಬಂಧಿಸಲು ಗಿರಿಗಳ ತಂದ ಹಸ್ತಾ
ಬಿಡದೆ ಪೂಜಿಪರಿಗೆ ಅಭಯ ಕೊಡುವ ಹಸ್ತಾ
ಸಡಗರದ ದೈವ ಸಿರಿ ವಿಜಯವಿಠ್ಠಲ ರಾಮನ
ಅಡಿಗಳಲ್ಲಿ ಅನುಗಾಲ ಇಟ್ಟ ಹಸ್ತಾ || ೧ ||

ಮಟ್ಟತಾಳ

( ಭೀಮಾವತಾರ ಮಹಿಮೆ )

ಗದೆಯಿಂದ ಅರಿಗಳ ಸದೆ ಬಡೀದ ಹಸ್ತಾ
ಮುದದಿಂದಲಿ ಅದ್ರಿ ವೊಡದು ಬಂದ ಹಸ್ತಾ
ಕದನದೊಳಗೆ ಮಾಗಧನ ಸೀಳಿದ ಹಸ್ತಾ
ಮದನೃಪನನುಜನ ಉರವ ಬಗೆದ ಹಸ್ತಾ
ಸುದತಿಯ ತುರುಬು ತಿದ್ದಿದ ಕರುಣ ಹಸ್ತಾ
ಪದೋಪದಿಗೆ ನಮ್ಮ ವಿಜಯವಿಠ್ಠಲನ್ನ
ಸದಮಲಭಕ್ತ ಎನಗೆ ಪೊಳೆವ ಹಸ್ತಾ || ೨ ||

ತ್ರಿವಿಡಿತಾಳ

( ಅವತಾರತ್ರಯ ಮಹಿಮಾ )

ರಣದೊಳು ಲಕ್ಷ್ಮಣನ ಎತ್ತಿ ತಂದ ಹಸ್ತಾ
ಕ್ಷಣದೊಳು ದ್ರೋಣನ ರಥ ವಗೆದ ಹಸ್ತಾ
ಶಣಿಸುವರಿಗೆ ಎದೆ ಶೂಲವಾಗಿಹ ಹಸ್ತಾ
ವಿನಯದಿಂದಲಿ ಹರಿವಾಣ ವೈದ ಹಸ್ತಾ
ಮಣಿಗಣದಿಂದ ರಾಮನ ಎಣಿಸುವ ಹಸ್ತಾ
ತೃಣಮಾಡಿ ಬಕನ ಸಂಹರಿಸಿದ ಮಹಾ ಹಸ್ತಾ
ಅನಿಮಿಷರಿಗೆ ತುತ್ತು ಮಾಡಿ ನೀಡಿದ ಹಸ್ತಾ
ವನತಿಗೆ ಸೌಗಂಧಿ ಕುಸುಮ ತಂದ ಹಸ್ತಾ
ವನದೊಳು ಅಸುರೆಯ ಬಿಗಿದಪ್ಪಿದ ಹಸ್ತಾ
ಘನದಂಡ ಕಾಷ್ಟವ ಧರಿಸಿ ಮೆರೆದ ಹಸ್ತಾ
ಅನಿಮಿತ್ಯ ಬಂಧು ಶ್ರೀವಿಜಯವಿಠ್ಠಲರೇಯನ
ಮನದೊಳಗಿಟ್ಟು ಅರ್ಚನೆ ಮಾಡುವ ಹಸ್ತಾ || ೩ ||

ಅಟ್ಟತಾಳ

ವಾರಿಜಜಾಂಡವ ಸಾಕುವದೀ ಹಸ್ತಾ
ಭಾರತೀದೇವಿಯ ಮನಸಿಗೊಪ್ಪುವ ಹಸ್ತಾ
ನೂರಾರು ಖಂಡಗ ಪಾಕ ಗೈಸಿದ ಹಸ್ತಾ
ವಾರಣದಿಂದ ಪುಸ್ತಕವ ಪಿಡಿದ ಹಸ್ತಾ
ಮಾರಾರಿಗೆ ಉಪದೇಶ ಮಾಡಿದ ಹಸ್ತಾ
ವಾರಣಗಳ ಗಗನಕ್ಕೆ ಇಟ್ಟ ಹಸ್ತಾ
ಚಾರುಚರಿತ ನಮ್ಮ ವಿಜಯವಿಠ್ಠಲರೇಯನ
ಹಾರೈಸಿ ಹರುಷದಿ ಪೂಜಿಪ ಈ ಹಸ್ತಾ || ೪ ||

ಆದಿತಾಳ

ವಿಷ ಉದ್ಭವಿಸಲು ವರಸಿ ಕಳೆದ ಹಸ್ತಾ
ಶಿಶುವಾಗಿ ಹುರಳಿ ಗುಗ್ಗರಿ ಸವಿದ ಹಸ್ತಾ
ಬಿಸಿಜಸಖಗೆ ತುಡಿಕಿ ಕ್ರಮಗೆಡಸಿದ ಹಸ್ತಾ
ನಿಷಕತಿಂತ್ರಣಿ ಬೀಜ ಸಾಲತಿದ್ದಿದ ಹಸ್ತಾ
ದಶ ಚತುರ್ಲೋಕವ ಒಳಗಡಗಿಸುವ ಹಸ್ತಾ
ಹಸಿದು ತುತಿಸಲು ಅಮೃತವಗರೆದ ಹಸ್ತಾ
ದಶಶಿರನ ಮುಡಿಯ ಸೆರಗು ಎಳೆದ ಹಸ್ತಾ
ಅಸುರ ಮೈರಾವಣನ ಕೊಂದು ಬಿಸುಟ ಹಸ್ತಾ
ವಸುಧೆಯ ಸುರರಿಗೆ ಮುದ್ರೆ ವತ್ತಿದ ಹಸ್ತಾ
ಶಶಿವರ್ಣದಂತೆ ನಖದಿಂದೊಪ್ಪುವ ಹಸ್ತಾ
ವಸುಧೀಶ ವಿಜಯವಿಠ್ಠಲ ರಾಮ ಕೃಷ್ಣ ವ್ಯಾಸರ
ಬಿಸಜಪಾದ ಬಿಡದೆ ಭಜಿಪ ಮಂಗಳ ಹಸ್ತಾ || ೫ ||

ಜತೆ
ಮೂರವತಾರದಲ್ಲಿ ಕಾರ್ಯ ಮಾಡಿದ ಹಸ್ತಾ
ಧೀರ ಶ್ರೀವಿಜಯವಿಠ್ಠಲ ಗೆರಗಿದ ಹಸ್ತಾ ||

---

SrI vijayadAsArya viracita
SrI prANadEvara hasta mahimA suLAdi
rAga: BauLi
dhruvatALa
( hanumadavatAra mahime )
kaDaga kaMkaNadiMda SOBitavAda hastA
poDavipati raGunAthage eragi mugida hastA
oDane kuruhugoMDu sItegitta hastA
giDagaLa muridu taridaMthadI hastA
GuDiGuDisuta akShana sadebaDeda hastA
jaDa rAvaNana edeyalli guddida hastA
taDeyade cUDAmaNiya oDeyagitta hastA
kaDu parAkramada hastA
kaDala baMdhisalu girigaLa taMda hastA
biDade pUjiparige aBaya koDuva hastA
saDagarada daiva siri vijayaviThThala rAmana
aDigaLalli anugAla iTTa hastA || 1 ||

maTTatALa

( BImAvatAra mahime )

gadeyiMda arigaLa sade baDIda hastA
mudadiMdali adri voDadu baMda hastA
kadanadoLage mAgadhana sILida hastA
madanRupananujana urava bageda hastA
sudatiya turubu tiddida karuNa hastA
padOpadige namma vijayaviThThalanna
sadamalaBakta enage poLeva hastA || 2 ||

triviDitALa

( avatAratraya mahimA )

raNadoLu lakShmaNana etti taMda hastA
kShaNadoLu drONana ratha vageda hastA
SaNisuvarige ede SUlavAgiha hastA
vinayadiMdali harivANa vaida hastA
maNigaNadiMda rAmana eNisuva hastA
tRuNamADi bakana saMharisida mahA hastA
animiSharige tuttu mADi nIDida hastA
vanatige saugaMdhi kusuma taMda hastA
vanadoLu asureya bigidappida hastA
GanadaMDa kAShTava dharisi mereda hastA
animitya baMdhu SrIvijayaviThThalarEyana
manadoLagiTTu arcane mADuva hastA || 3 ||

aTTatALa

vArijajAMDava sAkuvadI hastA
BAratIdEviya manasigoppuva hastA
nUrAru KaMDaga pAka gaisida hastA
vAraNadiMda pustakava piDida hastA
mArArige upadESa mADida hastA
vAraNagaLa gaganakke iTTa hastA
cArucarita namma vijayaviThThalarEyana
hAraisi haruShadi pUjipa I hastA || 4 ||

AditALa

viSha udBavisalu varasi kaLeda hastA
SiSuvAgi huraLi guggari savida hastA
bisijasaKage tuDiki kramageDasida hastA
niShakatiMtraNi bIja sAlatiddida hastA
daSa caturlOkava oLagaDagisuva hastA
hasidu tutisalu amRutavagareda hastA
daSaSirana muDiya seragu eLeda hastA
asura mairAvaNana koMdu bisuTa hastA
vasudheya surarige mudre vattida hastA
SaSivarNadaMte naKadiMdoppuva hastA
vasudhISa vijayaviThThala rAma kRuShNa vyAsara
bisajapAda biDade Bajipa maMgaLa hastA || 5 ||

jate
mUravatAradalli kArya mADida hastA
dhIra SrIvijayaviThThala geragida hastA ||