Panchabheda Taratamya Suladi – Mohana dasaru

” ಹರಿಯೇ ಸರ್ವೋತ್ತಮ ಸಿರಿಯು ಆತನ ರಾಣಿ ” , ಸುಳಾದಿ ,
ಶ್ರೀ ಮೋಹನದಾಸರ ರಚನೆ , ರಾಗ: ಹಂಸಧ್ವನಿ

ಧ್ರುವತಾಳ

ಹರಿಯೇ ಸರ್ವೋತ್ತಮ ಸಿರಿಯು ಆತನ ರಾಣಿ
ಸರಸಿಜೋದ್ಭವ ಮರುತ ಪುತ್ರರಯ್ಯಾ
ಸರಸ್ವತಿ ಭಾರತಿ ಗರುಡ ಶೇಷ ರುದ್ರ
ಹರಿಯ ರಾಣಿಯರು ನಾಲ್ಕೆರಡು ಮಂದಿ ಸೌ –
ಪರಣಿ ವಾರುಣಿ ಗಿರಿಜಾ ಸುರಪತಿಕಾಮಾದ್ಯರ
ತರತಮ್ಯ ಜ್ಞಾನದಿಂದ ತಿಳಿಯಬೇಕು
ಸುರನದಿಪಿತ ನಮ್ಮ ಮೋಹನ್ನವಿಟ್ಠಲ
ಶರಣು ನೆನಿಸಿದವಗೆ ಇನ್ನು ಸರಿಯು ಕಾಣೆ || ೧ ||

ಮಟ್ಟತಾಳ

ಜೀವ ಜೀವಕೆ ಭೇದ ಜಡಜಡಕೆ ಭೇದ
ಜೀವ ಜಡಕೆ ಭೇದ ಹರಿಗೆ ಜಡಕೆ ಭೇದ
ಜೀವ ಈಶಗೆ ಭೇದ ದೇವ ನಾರಾಯಣನ
ಭಾವಕ್ರಿಯಗಳಿಗೆ ಅಭೇದವನ್ನು ತಿಳಿದು
ಶ್ರೀವಲ್ಲಭ ನಮ್ಮ ಮೋಹನ್ನವಿಟ್ಠಲನ್ನ
ಪಾವನ ಚರಣನಾಮ ತೀವ್ರದಲಿ ಭಜಿಸು || ೨ ||

ತ್ರಿಪುಟತಾಳ

ಹರಿಯು ತನಗೆ ಬೇಕಾದವನ ಮನಸು
ಎರಗೀಸಲೀಸನು ಅನ್ಯ ಸತಿಯರಲ್ಲಿ
ಎರಗಿಸಿದರೆ ಬೇಗ ತಿರಿಗಿಸುವನಯ್ಯಾ
ತಿರುಗಿಸದಿದ್ದರೆ ಬೆರೆಯಲೀಸಾ
ಬೆರೆದರೆ ಬೆರೆಯಲಿ ರತಿಯ ಪುಟ್ಟಲೀಸಾ
ರತಿ ಪುಟ್ಟಿದರೆ ಏನು ಕಾಕು ಮಾಡಲಿಸನಯ್ಯಾ
ಕರುಣಾಸಾಗರ ನಮ್ಮ ಮೋಹನ್ನವಿಟ್ಠಲನ
ಪಾವನ ಚರಣವನು ತೀವ್ರದಲಿ ಭಜಿಸೊ || ೩ ||

ಅಟ್ಟತಾಳ

ಮರುತ ಮತವ ಪೊಂದಿ ಹರಿಯೆ ಪರನೆಂದು
ಗುರು ಹಿರಿಯರ ಚರಣಕ್ಕೆರಗು ಆವಾಗಲೂ
ಹರಿಕಥಾಮೃತವ ಕರ್ಣದಿಂದಲಿ ಕೇಳು
ಹರಿ ನಿರ್ಮಾಲ್ಯವ ಶಿರದಲ್ಲಿ ಧರಿಸುತಿರು
ಹರಿ ನೈವೇದ್ಯವ ಹರುಷದಲ್ಲಿ ಭುಂಜಿಸು
ಹರಿದಾಸರ ಕೂಡ ತಿರುಗು ಊಳಿಗನಂತೆ
ಹರಿ ಅವತಾರ ಸಿರಿ ಮೋಹನ್ನವಿಟ್ಠಲ
ಹರಿಯೆ ತ್ರಿಭುವನ ಧೊರೆಯೆಂದು ತಿಳಿಯೊ || ೪ ||

ಆದಿತಾಳ

ತನಗೆ ಬೇಕಾದವನು ಉನ್ನತ ಪಾಪವ ಮಾಡೆ
ದಾನವರಿಗೆ ಕೊಡಿಸಿ ಪುಣ್ಯ ಭಕ್ತರಿಗೀವ
ಘನ್ನ ಮಹಿಮ ಲಕುಮಿಯನ್ನು ಬಿಟ್ಟರೇನು ಪ್ರ –
ಪನ್ನರ ಬಿಡೆನೆಂಬ ಚಿನ್ಮಯ ಮೂರುತಿ
ಪನ್ನಗಾದ್ರಿ ನಿಲಯ ಮೋಹನ್ನವಿಟ್ಠಲನ್ನ
ಸನ್ನುತಿಸುವನಿಗೆ ಇನ್ನು ಸರಿಯು ಕಾಣೆ || ೫ ||

ಜತೆ

ತಾರತಮ್ಯ ಪಂಚಭೇದ ತಿಳಿಯದವಗೆ
ಮಾರುತಿಪ್ರೀಯ ಮೋಹನ್ನವಿಟ್ಠಲ ವೊಲಿಯಾ ||

---

” hariyE sarvOttama siriyu Atana rANi ” , suLAdi ,
SrI mOhanadAsara racane , rAga: haMsadhvani

dhruvatALa

hariyE sarvOttama siriyu Atana rANi
sarasijOdBava maruta putrarayyA
sarasvati BArati garuDa SESha rudra
hariya rANiyaru nAlkeraDu maMdi sau –
paraNi vAruNi girijA surapatikAmAdyara
taratamya j~jAnadiMda tiLiyabEku
suranadipita namma mOhannaviTThala
SaraNu nenisidavage innu sariyu kANe || 1 ||

maTTatALa

jIva jIvake BEda jaDajaDake BEda
jIva jaDake BEda harige jaDake BEda
jIva ISage BEda dEva nArAyaNana
BAvakriyagaLige aBEdavannu tiLidu
SrIvallaBa namma mOhannaviTThalanna
pAvana caraNanAma tIvradali Bajisu || 2 ||

tripuTatALa

hariyu tanage bEkAdavana manasu
eragIsalIsanu anya satiyaralli
eragisidare bEga tirigisuvanayyA
tirugisadiddare bereyalIsA
beredare bereyali ratiya puTTalIsA
rati puTTidare Enu kAku mADalisanayyA
karuNAsAgara namma mOhannaviTThalana
pAvana caraNavanu tIvradali Bajiso || 3 ||

aTTatALa

maruta matava poMdi hariye paraneMdu
guru hiriyara caraNakkeragu AvAgalU
harikathAmRutava karNadiMdali kELu
hari nirmAlyava Siradalli dharisutiru
hari naivEdyava haruShadalli BuMjisu
haridAsara kUDa tirugu ULiganaMte
hari avatAra siri mOhannaviTThala
hariye triBuvana dhoreyeMdu tiLiyo || 4 ||

AditALa

tanage bEkAdavanu unnata pApava mADe
dAnavarige koDisi puNya BaktarigIva
Ganna mahima lakumiyannu biTTarEnu pra –
pannara biDeneMba cinmaya mUruti
pannagAdri nilaya mOhannaviTThalanna
sannutisuvanige innu sariyu kANe || 5 ||

jate

tAratamya paMcaBEda tiLiyadavage
mArutiprIya mOhannaviTThala voliyA ||