Kalinigraha Suladi – Sheshadasaru

Raga:Anandabhairavi

ಮೊದಲಕಲ್ಲು ಶ್ರೀಶೇಷದಾಸಾರ್ಯ ವಿರಚಿತ
( ಗುರುವಿಜಯವಿಟ್ಠಲ ಅಂಕಿತ )
ಕಲಿನಿಗ್ರಹ ಸುಳಾದಿ
( ಕಲಿಬಾಧಾ ನಿವೃತ್ತಿ ಮಾಡಲು ಪ್ರಾರ್ಥನಾ )
ರಾಗ: ಆನಂದಭೈರವಿ
ಧ್ರುವತಾಳ
ಎಲೆ ಎಲೆ ಪರಮ ದುಷ್ಟನಾದ ಕಲಿಯೆ ನಿನ್ನ
ತಲೆಯ ಮೇಲೆ ಕಾಲು ಕೊಟ್ಟು ನಡಿವೆ ಸತತ
ಬಲಹೀನನೆಂದು ತಿಳಿದು ನೈಜ ಸ್ವಭಾವದಿಂದ
ಕುಲಗೇಡಿ ಚೇಷ್ಟೆಗಳ ಪ್ರೇರಿಸುವಿ
ಮಲಿನ ಯುಕ್ತನೆ ನಿನ್ನ ಕರ್ತೃತ್ವ ಎನ್ನ ಮೇಲೆ
ನೆಲೆಯಾಗಿ ನಿಂದಿರದು ಎಂದೆಂದಿಗೆ
ತಿಳಿದು ನೋಡಿಕೋ ಉಭಯ ಅಂಶಾಂಶದಲ್ಲಾಗೆ
ತಲಿಯ ಬಾಗಿದವನೆ ದುರುಳ ನಿನಗೆ
ಬಲವೀರ್ಯನಾದ ಎನ್ನ ಒಡಿಯನ ಬಲದಿಂದ
ಚಲಿಸದಲೇ ನಿನ್ನ ತೃಣಕೆ ಬಗೆದು
ಕೆಲವು ಶಸ್ತ್ರಾಸ್ತ್ರದಿಂದ ಕೆಲವು ವಾಕ್ಯದಿಂದ
ತಲೆ ಎತ್ತದಂತೆ ಮಾಡಿದದನು ಮರದ್ಯಾ
ಮೊಲದಂತೆ ಜರಿದು ಈಗ ಮದೋನ್ಮತ್ತವಾದ
ಬಲದಿಂದ ನಿನ್ನ ಯುಗವೆಂದು ತಿಳಿದು
ಮಲತ ಗರ್ವದಿಂದ ಮಾಯಾ ಮಾಡುವಿ ಸುಜನ
ಕುಲದೋಷಕನೆ ಬಲು ಕುಜನ ಮಣಿಯೇ
ಬಲಿಗೆ ಬಲಿಯಾದ ಗುರುವಿಜಯವಿಠ್ಠಲರೇಯನ
ಬಲ ಎನಗಿರಲಾಗಿ ಎದುರೇ ನೀನು || ೧ ||

ಮಟ್ಟತಾಳ

ಬಲವುಳ್ಳವನೆಂದು ಬಲು ಗರ್ವದಲಿಂದ
ಬಳಲುವದು ಸಲ್ಲ ಲಜ್ಜೆಯನು ತೊರೆದು
ಬಲಯುಕ್ತ ನೀನಾಗಿ ಅಂದಿನ ಕಾಲದಲ್ಲಿ
ಮಲತ ಮಲ್ಲರ ಗಂಡ ನೆನಿಪನ ಕೈಯಿಂದ
ತಲಿಯ ತುಳಿಸಿಕೊಂಡ ಚರಣ ತಳದಿಂದ
ಹಳಿ ಹಳಿ ನಿನ್ನ ಪೌರುಷತನ ಸುಡಲಿ
ಭಳಿರೆ ಭಳಿರೆ ಗುರುವಿಜಯವಿಠ್ಠಲರೇಯನ
ಒಲಿಮೆಯುಳ್ಳವರೆಲ್ಲ ನಿನಗಂಜುವರೇ || ೨ ||

ತ್ರಿವಿಡಿತಾಳ

ಬಲಹೀನ ಮನುಜನೆ ನಿನ್ನ ಕುಹಕ ನಡತಿ ದು –
ರ್ಬಲರಾದವರ ಮೇಲೆ ನಡೆಯುವದಲ್ಲದೆ
ಬಲವುಳ್ಳ ಜನರಲ್ಲಿ ನಡೆವೊದಲ್ಲ ಕೇಳೊ
ತಿಳಿದು ನೋಡಿಕೋ ಎನ್ನ ಬಲದ ಮಹಿಮೆ
ಜಲಜ ಜಾಂಡವನ್ನು ಕಲ್ಪಿಸಿ ಸ್ಥಿ-
ತಿ ಲಯ ನಿಯಮನ ಜ್ಞಾನಾಜ್ಞಾನಾ
ಬಲವದ್ರೂಪವಾದ ಬಂಧಮೋಕ್ಷದಿ ಅಷ್ಟ ಪ್ರ –
ಬಲ ಕರ್ತೃತ್ವದಿಂದ ದಿವಿಜ ದನುಜಾ –
ವಳಿಗೆ ಶಿಕ್ಷಿಸುವ ತಾ ದುಷ್ಟ ಮರ್ದಕನೆನಿಪ
ಜಲಧರಾವರ್ಣ ಕೃಷ್ಣರಾಯ ಎನ್ನ
ಕುಲದೈವನೆನಿಪ ಮತ್ತು ಸಖನೆಂದೆನಿಸಿಕೊಂಬ ನಿನ್ನ
ತಲಿಯ ನೊರಸಿದ ಧೀರ ಭ್ರಾತೃನೆನಿಪ
ಕುಲಗೇಡಿ ನಿನ್ನಂಥ ಕುಹಕರ ಶಿಕ್ಷಿಸುವ
ಬಲಿಯಾದ ದೇವ ಪೂರ್ವೋಕ್ತದಂತೆ
ಬಲವು ಇನಿತು ಇರಲು ನಿನಗಂಜುವದೆಂತೊ
ಸುಳಿಯದಿರು ಇತ್ತ ಸೌಖ್ಯವಿಲ್ಲಾ
ಅಲವಬೋಧರ ಪ್ರಿಯ ಗುರುವಿಜಯವಿಠ್ಠಲರೇಯ
ತಲಿಯ ಮೇಲಿಪ್ಪ ಛತ್ರದಂತೆ ಕಾಯ್ವಾ || ೩ ||

ಅಟ್ಟತಾಳ

ಬಲವೈರಿ ಎನ್ನಯ ಜನಕನೆಲೊ ಕೇಳು ಅ –
ಖಿಳ ಸುಮನಸರು ಎನಗೆ ಸಹಾಯರೆಲೊ
ಖಳಕುಲ ಮಣಿ ನಿನ್ನ ನೈಜ ವ್ಯಾಪಾರವ
ಬಲ ನಡಿಯದಲೊ ಕಲ್ಪಾಂತ್ಯದಲ್ಲಾಗಿ
ಖಳದರ್ಪಭಂಜನ ಗುರುವಿಜಯವಿಠ್ಠಲನ್ನ
ಬಲದಿಂದ ನಿನ್ನ ತಲಿಯ ಮೆಟ್ಟುವೆನೊ || ೪ ||

ಆದಿತಾಳ

ಕಾಲನಾಮಕ ಭಗವಂತನ ಇಚ್ಛಿಯಿಂದ
ಮೂಲ ಕಾರಣವಾದ ಅನಾದಿ ಕರ್ಮದಿಂದ
ಪಾಲಕನಾದ ಹರಿ ಪರಾಙ್ಮುಖನಾಗುತಿರೆ
ಇಳೆಯೊಳು ಜನಿಸಿದಾಗ ಪೂರ್ವೋಕ್ತವಾದ ಬಲ
ತೊಲಗಿಪ್ಪ ಕಾಲದಲ್ಲಿ ಇದೆ ಇದೆ ಸಮಯವೆಂದು
ಖಳಕುಲಮಣಿ ನಿನ್ನ ಕುಹಕದ ನಡತೆಯಿಂದ
ಮೇಲಾದ ಸುಖಗಳ ಅಪಹಾರ ಮಾಳ್ಪೆನೆಂದು
ಬಲು ಮೋದದಿಂದ ನೀನು ಹಿಗ್ಗುವದು ಸಲ್ಲಾ
ಕಾಲಕ್ಲಿಪ್ತ ನಂತರ ಹರಿ ಕೃಪೆಯಿಂದ ಎನ್ನ
ಆಳಾಗಿ ನೀನೆ ಉಂಬಿ ಕಲಿಕೃತ ಕಲ್ಮಷವಾ
ಆಲೋಚನೆ ಇದಕಿಲ್ಲ ಇದು ಸತ್ಯ ಇದು ಸತ್ಯ
ಶ್ರೀಲಲನಿಯ ಪ್ರಿಯ ಗುರುವಿಜಯವಿಠ್ಠಲನ್ನ
ಆಳುಗಳಂಜುವರೆ ನಿನಗೆಂದಿಗಾದರು || ೫ ||

ಜತೆ
ಕಂಟಕಾರಿಯೆ ಮೆಟ್ಟಿ ನಿನ್ನ ಎದಿಯ ತುಳಿವೆ ನಿ –
ಷ್ಕಂಟಕ ಗುರುವಿಜಯವಿಠ್ಠಲನ್ನ ಕೃಪೆಯಿಂದ ||

---

modalakallu SrISEShadAsArya viracita
( guruvijayaviTThala aMkita )
kalinigraha suLAdi
( kalibAdhA nivRutti mADalu prArthanA )
rAga: AnaMdaBairavi
dhruvatALa
ele ele parama duShTanAda kaliye ninna
taleya mEle kAlu koTTu naDive satata
balahInaneMdu tiLidu naija svaBAvadiMda
kulagEDi cEShTegaLa prErisuvi
malina yuktane ninna kartRutva enna mEle
neleyAgi niMdiradu eMdeMdige
tiLidu nODikO uBaya aMSAMSadallAge
taliya bAgidavane duruLa ninage
balavIryanAda enna oDiyana baladiMda
calisadalE ninna tRuNake bagedu
kelavu SastrAstradiMda kelavu vAkyadiMda
tale ettadaMte mADidadanu maradyA
moladaMte jaridu Iga madOnmattavAda
baladiMda ninna yugaveMdu tiLidu
malata garvadiMda mAyA mADuvi sujana
kuladOShakane balu kujana maNiyE
balige baliyAda guruvijayaviThThalarEyana
bala enagiralAgi edurE nInu || 1 ||

maTTatALa

balavuLLavaneMdu balu garvadaliMda
baLaluvadu salla lajjeyanu toredu
balayukta nInAgi aMdina kAladalli
malata mallara gaMDa nenipana kaiyiMda
taliya tuLisikoMDa caraNa taLadiMda
haLi haLi ninna pauruShatana suDali
BaLire BaLire guruvijayaviThThalarEyana
olimeyuLLavarella ninagaMjuvarE || 2 ||

triviDitALa

balahIna manujane ninna kuhaka naDati du –
rbalarAdavara mEle naDeyuvadallade
balavuLLa janaralli naDevodalla kELo
tiLidu nODikO enna balada mahime
jalaja jAMDavannu kalpisi sthi-
ti laya niyamana j~jAnAj~jAnA
balavadrUpavAda baMdhamOkShadi aShTa pra –
bala kartRutvadiMda divija danujA –
vaLige SikShisuva tA duShTa mardakanenipa
jaladharAvarNa kRuShNarAya enna
kuladaivanenipa mattu saKaneMdenisikoMba ninna
taliya norasida dhIra BrAtRunenipa
kulagEDi ninnaMtha kuhakara SikShisuva
baliyAda dEva pUrvOktadaMte
balavu initu iralu ninagaMjuvadeMto
suLiyadiru itta sauKyavillA
alavabOdhara priya guruvijayaviThThalarEya
taliya mElippa CatradaMte kAyvA || 3 ||

aTTatALa

balavairi ennaya janakanelo kELu a –
KiLa sumanasaru enage sahAyarelo
KaLakula maNi ninna naija vyApArava
bala naDiyadalo kalpAMtyadallAgi
KaLadarpaBaMjana guruvijayaviThThalanna
baladiMda ninna taliya meTTuveno || 4 ||

AditALa

kAlanAmaka BagavaMtana icCiyiMda
mUla kAraNavAda anAdi karmadiMda
pAlakanAda hari parA~gmuKanAgutire
iLeyoLu janisidAga pUrvOktavAda bala
tolagippa kAladalli ide ide samayaveMdu
KaLakulamaNi ninna kuhakada naDateyiMda
mElAda suKagaLa apahAra mALpeneMdu
balu mOdadiMda nInu higguvadu sallA
kAlaklipta naMtara hari kRupeyiMda enna
ALAgi nIne uMbi kalikRuta kalmaShavA
AlOcane idakilla idu satya idu satya
SrIlalaniya priya guruvijayaviThThalanna
ALugaLaMjuvare ninageMdigAdaru || 5 ||

jate
kaMTakAriye meTTi ninna ediya tuLive ni –
ShkaMTaka guruvijayaviThThalanna kRupeyiMda ||