Nandasunu Stotra – Haadu 4

From Shri Bannanje Govindacharya’s 14 haadugaLu book

ನಂದಸೂನುಸ್ತೋತ್ರ

ಮಾಲತೀಕುಂದಮಂದಾರಮಾಲಾ-

ಮಲ್ಲಿಕೋಲ್ಲಾಸಿಧಮ್ಮಿಲ್ಲಮೌಲಿಮ್ |

ಗೋಕುಲಾನಂದಿಲೀಲಾವಿಲೋಲಂ

ನಂದಯಾಮೋ ವಯಂ ನಂದಸೂನಮ್ ||೧||

ಮಂಜುಶಿಂಜನ್ಮಣಿಶ್ರೇಣಿರಾಜ-

ನ್ನೂಪುರೋದಾರಪಾದಾರವಿಂದಮ್ |

ಉಲ್ಲಸನ್ನೃತ್ತಲೀಲಾವಿಲಾಸಂ

ನಂದಯಾಮೋ ವಯಂ ನಂದಸೂನಮ್  ||೨||

ಚಾರುಚಾಮೀಕರೋದ್ಭಾಸಿಭಾಸೋ-

ದ್ದೀಪ್ತಸೌದಾಮಿನೀದಾಮಕಾಂಚಿಮ್ |

ವಲ್ಲವೀವಲ್ಲರೀಭೃಂಗರಾಜಂ

ನಂದಯಾಮೋ ವಯಂ ನಂದಸೂನಮ್  ||೩||

ಸಂತತಾನಂತವೇದಾಂತಮೂರ್ತಿಂ

ವೈಜಯಂತೀಂ ಶ್ರಿಯಾ ವೈ ಜಯಂತೀಮ್ |

ಬಿಭ್ರತಂ ವಕ್ಷಸಾ~ದಭ್ರಮೇತಂ

ನಂದಯಾಮೋ ವಯಂ ನಂದಸೂನಮ್   ||೪||

ಚಾರುಣಾ ವೇಣುನಾ ಗೀಯಮಾನಂ

ಮಾರ್ಗಸಂಚಾರಲೋಲಾಂಗುಲೀಕಮ್ |

ಮಂಗಲಾಪಾಂಗದತ್ತಾವಲೋಕಂ

ನಂದಯಾಮೋ ವಯಂ ನಂದಸೂನಮ್     ||೫||

ಮಂದಹಾಸಶ್ರಿಯಾ ನಂದಯಂತಂ

ಸುಂದರೀಮಿಂದಿರಾಮಿಂದುಕಾಂತಿಮ್ |

ಪದ್ಮರಾಗಾನುರಾಗಾಧರೋಷ್ಠಂ 

ನಂದಯಾಮೋ ವಯಂ ನಂದಸೂನಮ್   ||೬||

ಚಾರುಹಾಸಸ್ಫುರದ್ದಂತಪಂಕ್ತಿಂ

ಸುಂದರಂ ಬರ್ಹಮಾಲಾವತಂಸಮ್ |

ಅಂಜನಾಭಂ ವಿಭುಂ ಕಂಜನಾಭಂ

ನಂದಯಾಮೋ ವಯಂ ನಂದಸೂನಮ್   ||೭||

ಉಲ್ಲಸತ್ಕುಂತಲಾಮುಕ್ತಮುಕ್ತಾ-

ರಕ್ತರತ್ನಪ್ರಭಾಶೋಭಮಾನಮ್ |

ಕುಂಕುಮಶ್ರೀಲಲಾಮಾಭಿರಾಮಂ

ನಂದಯಾಮೋ ವಯಂ ನಂದಸೂನಮ್   ||೮||

ವಾಸುದೇವಂ ಸದಾನಂದತೀರ್ಥಾ-

ನಂದಸಂದೋಹಸಂದಾನಶೀಲಮ್ |

ಸ್ವಾಮಿನಂ ಸಚ್ಚಿದಾನಂದಮೂರ್ತಿಂ

ನಂದಯಾಮೋ ವಯಂ ನಂದಸೂನಮ್   ||೯||

ಶ್ರೀಹನೂಮಂತಮೇಕಾಂತಭಾಜಂ

ರಾಘವಶ್ರೀಪದಾಂಭೋಜಭೃಂಗಮ್ |

ಮಾರುತಿಂ ಪ್ರಾಣಿನಾಂ ಪ್ರಾಣಭೂತಂ 

ನಂದಯಾಮೋ ವಯಂ ನಂದಿತೀರ್ಥಮ್ ||೧೦|| 

ಭೀಮರೂಪಂ ಪರೋಪೇಯಿವಾಂಸಂ

ಭಾರತಂ ಭಾರತಶ್ರೀಲಲಾಮಮ್ |

ಭೂಭರಧ್ವಂಸಿನಂ ಭಾರತೀಶಂ

ನಂದಯಾಮೋ ವಯಂ ನಂದಿತೀರ್ಥಮ್ ||೧೧||

ದೇವಚೂಡಾಮಣಿಂ ಪೂರ್ಣಬೋಧಂ

ಕೃಷ್ಣಪಾದಾರವಿಂದೈಕದಾಸಮ್ |

ಚಿತ್ತಚಿಂತಾಮಣಿಂ ಪುಣ್ಯಭಾಜಾಂ

ನಂದಯಾಮೋ ವಯಂ ನಂದಿತೀರ್ಥಮ್  ||೧೨||

ಮಾಯಿಗೋಮಾಯುಮಾಯಾಂಧಕಾರ-

ಧ್ವಂಸಮಾರ್ತಂಡಮೂರ್ತೀಯಮಾನಮ್ |

ಸಜ್ಜನಾನಂದಸಂದೋಹಸಿಂಹಂ

ನಂದಯಾಮೋ ವಯಂ ನಂದಿತೀರ್ಥಮ್ ||೧೩||

ಇಂದಿರಾನಂದಮಾನಂದಮೂರ್ತಿಂ

ಸುಂದರೀಮಿಂದಿರಾಮಿಂದುಕಾಂತಿಮ್ |

ನಂದಿತೀರ್ಥಂ ಚ ವಂದೇ ತದಿಷ್ಟಂ

ದಾಸಮೇಶಾಂ ಸದಾ ತತ್ತ್ವದೀಪಮ್ ||೧೪||

ಶ್ರೀ ಕೃಷ್ಣಾರ್ಪಣಮಸ್ತು ||