Neenupeksheya made

Composer : Shri Kanakadasaru

ನೀನುಪೇಕ್ಷೆಯ ಮಾಡೆ ಬೇರೆ ಗತಿ
ಯಾರೆನಗೆ, ನಿಗಮಗೋಚರ ಮುಕುಂದ |
ಗಾನರಸಲೋಲ ಆಗಮಶೀಲ
ಭಕ್ತ ಪರಿಪಾಲ ಸನ್ನುತ ಗೋಪಾಲ ಬಾಲ ||ಪ||

ಜಪತಪಾನುಷ್ಠಾನ ಜಪಿತನೆಂದೆನಿಸುವೆನೆ
ಜಾಣತನವೆನ್ನೊಳಿಲ್ಲ,
ಗುಪಿತದಿಂ ದಾನ ಧರ್ಮವನು ನಾ ಮಾಡುವೆನೆ
ಅಪರಿಮಿತ ಧನವು ಇಲ್ಲ , ಹರಿಯೇ ||೧||

ಆನೆನೆಗಳಿಗೆ ಸಿಲುಕಿ ಅರೆಬಾಯಿ ಬಿಡುತಿರಲು
ಮೌನದಿಂ ಬಂದು ಕಾಯ್ದೆ,
ಹೇ ನಾರಗಾ ಎಂದ ಅಜಮಿಳಗೆ ಮುಕ್ತಿಯನು
ನೀನೊಲಿದು ಕೃಪೆ ಮಾಡಿದೆ, ಹರಿಯೇ ||೨||

ಹಾನಿಯಿಲ್ಲದ ಪದವಿ ನೀನಿತ್ತು ಧೃವಗೆ
ಕಡು ದೀನತ್ವವನು ಬಿಡಿಸಿದೆ,
ದಾನವಂತಕ ಸಕಲ ದಿವಿಜ ಮುನಿವಂದ್ಯ
ಅಭಿಮಾನಿ ಎನ್ನನು ಸಲಹದೆ , ಬರಿದೆ ||೩||

ಈಷಣತ್ರಯದ ಬಯಲಾಸೆಯಲಿ ಭ್ರಮೆಗೊಂಡು
ಬೇಸರದಿ ಮನದಿ ನೊಂದು,
ಹೇಸಿಕೆಯ ಸಂಸಾರ ಮಾಯಕ್ಕೆ ಸಿಲುಕಿ ನಾ
ಘಾಸಿ ಪಡಲಾರೆನಿಂದು, ಎಂದು ||೪||

ವಾಸುದೇವನೆ ನಿನ್ನ ಪೊಂದಿ ಬದುಕುವೆನೆಂದು
ಆಸೆ ಪಡುತಿಹೆನು ಇಂದು
ದಾಸನೆಂದೆನಿಸಿ ಡಂಗುರ ಹೊಯ್ಸಿ
ಬಡದಾದಿಕೇಶವನೆ ಕರುಣಿಸಯ್ಯ , ಬಂದು ||೩||

---

nInupEkSheya mADe bEre gati
yArenage, nigamagOcara mukuMda |
gAnarasalOla AgamaSIla
Bakta paripAla sannuta gOpAla bAla ||pa||

japatapAnuShThAna japitaneMdenisuvene
jANatanavennoLilla,
gupitadiM dAna dharmavanu nA mADuvene
aparimita dhanavu illa , hariyE ||1||

AnenegaLige siluki arebAyi biDutiralu
maunadiM baMdu kAyde,
hE nAragA eMda ajamiLage muktiyanu
nInolidu kRupe mADide, hariyE ||2||

hAniyillada padavi neenittu dhRuvage
kaDu dInatvavanu biDiside,
dAnavaMtaka sakala divija munivaMdya
abhimAni ennanu salahade , baride ||3||

IShaNatrayada bayalAseyali bhramegoMDu
bEsaradi manadi noMdu,
hEsikeya saMsAra mAyakke siluki nA
GAsi paDalAreniMdu, eMdu ||4||

vAsudEvane ninna poMdi badukuveneMdu
Ase paDutihenu iMdu
dAsaneMdenisi DaMgura hoysi
baDadAdikESavane karuNisayya , baMdu ||3||