Ninna Magana Badhe

Composer : Shri Purandara dasaru

ರಾಗ: ಸೌರಾಷ್ಟ್ರ, ಅಟತಾಳ

ನಿನ್ನ ಮಗನ ಬಾಧೆ ಬಲು ಘನವಾಗಿದೆ
ಇನ್ನೆಷ್ಟು ತಾಳುವೆವೆ, ಗೋಪಿ
ಬಿನ್ನಣೆಯನು ಬಿಡು ಬಹು ದುಷ್ಟನು ಕೇಳೆ
ಇನ್ನೆಷ್ಟು ಸೈರಿಪೆವೆ ||ಪ||

ಹಾಲು ಮೊಸರು ಮಜ್ಜಿಗೆ ಭಾಂಡವನೆಲ್ಲ
ಕೋಲಲಿ ಬಡಿದಿಟ್ಟನೆ ಗೋಪಿ
ಪೇಳುವುದಿನ್ನೇನು ನಮ್ಮಂಥ ಬಡವರ
ಗೋಳಿನ್ನು ತಟ್ಟದೇನೆ |1|

ನೆಲುವಿಗೆ ಹಾಲು ನಿಲುಕಿ ಸೇರಿಸುವಾಗ
ಮೊಲೆಗೆ ಕೈ ಚಾಚಿದನೆ ಗೋಪಿ
ಸುಲಭನಲ್ಲ ಕಾಣೆ ನಿನ್ನ ಮಗನು ಈಗ
ಕಲಿಯುಗದವನು ಕಾಣೆ |2|

ಹೊದ್ದಿ ಮೆಲ್ಲನೆ ಸನ್ನೆ ಮಾಡಿ ಕರೆವ ಈ
ಬುದ್ಧಿಯು ಒಳ್ಳೇದೇನೆ, ಗೋಪಿ
ಮುದ್ದು ಮಾಡಿ ಸಾಕಿ ಮಗನಿಗೆ ಬಸವನ
ಮುದ್ರೆಯ ಒತ್ತಿದ್ಯೇನೆ |3|

ಸರಿಯ ಗೋಪೆರ ಮುಂದೆ ಶಿರವನು ಬಾಗುವ
ತೆರನ ಮಾಡಿದನು ಕಾಣೆ, ಗೋಪಿ
ಧರೆಯೊಳಗಿರುವಂಥ ಜಾರಜೋರರಿಗೆಲ್ಲ
ಗುರುವು ತಾನೆನಿಸಿದನೆ |4|

ಎಷ್ಟು ಹೇಳುವುದಿನ್ನು ಈ ಬಗೆಯಾದರೆ
ನಿಷ್ಠುರ ಬಹುದು ಕಾಣೆ, ಗೋಪಿ
ಸೃಷ್ಟೀಶ ಶ್ರೀರಂಗಧಾಮ ಪುರಂದರ-
ವಿಟ್ಠಲರಾಯ ಕಾಣೆ |5|

---

ninna magana bAdhe balu GanavAgide
inneShTu tALuveve, gOpi
binnaNeyanu biDu bahu duShTanu kELe
inneShTu sairipeve ||pa||

hAlu mosaru majjige BAMDavanella
kOlali baDidiTTane gOpi
pELuvudinnEnu nammaMtha baDavara
gOLinnu taTTadEne |1|

neluvige hAlu niluki sErisuvAga
molege kai cAcidane gOpi
sulaBanalla kANe ninna maganu Iga
kaliyugadavanu kANe |2|

hoddi mellane sanne mADi kareva I
buddhiyu oLLEdEne, gOpi
muddu mADi sAki maganige basavana
mudreya ottidyEne |3|

sariya gOpera muMde Siravanu bAguva
terana mADidanu kANe, gOpi
dhareyoLagiruvaMtha jArajOrarigella
guruvu tAnenisidane |4|

eShTu hELuvudinnu I bageyAdare
niShThura bahudu kANe, gOpi
sRuShTISa SrIraMgadhAma puraMdara-
viTThalarAya kANe |5|