Ninna nanenendeno

Composer : Shri Kanakadasaru

ನಿನ್ನ ನಾನೇನೆಂದೆನೊ ರಂಗಯ್ಯ ರಂಗ
ನಿನ್ನ ನಾನೇಂದೆನೊ ||ಪ||

ನಿನ್ನ ನಾನೇನೆಂದೆ ನಿಗಮಗೋಚರ ಸ್ವಾಮಿ
ಪನ್ನಗಶಯನ ಪಾಲ್ಗಡಲೊಡೆಯನೆ ರಂಗ ||ಅ.ಪ||

ಧೀರ ಸೋಮಕ ವೇದಚೋರನ ಮಡುಹಿದೆ |
ವಾರಿಧಿಗಿಳಿದ ಪರ್ವತವ ಪೊತ್ತೆ |
ಧಾರಿಣಿಯನು ತಂದು ದನುಜ ದಲ್ಲಣನಾದೆ |
ನಾರಸಿಂಹ ನಿನಗೆ ನಮೊ ಎಂಬೆನಲ್ಲದೆ |
ನೀರ ಪೊಕ್ಕವನೆಂದೆನೆ
ಬೆನ್ನಿನ ಮೇಲೆ ಭಾರ ತಾಳ್ದವನೆಂದೆನೆ
ಮಣ್ಣನು ಅಗಿದು ಬೇರ ಮೆದ್ದವನೆಂದೆನೆ
ರಕ್ಕಸರೊಳು
ಹೋರಾಡಿದವನೆಂದು ಹೊಗಳಿದೆನಲ್ಲದೆ ||೧||

ಧರೆಯ ದಾನವ ಬೇಡಿ ನೆಲವ ಮೂರಡಿ ಮಾಡಿ |
ಪರಶು ಪಿಡಿದು ಕ್ಷತ್ರಿಯರ ಸವರಿ |
ಚರಣದಿ ಪಾಷಾಣ ಹೆಣ್ಣು ಮಾಡಿದ |
ಪುಣ್ಯ ಚರಿತ ಯಾದವ ಪತಿ ಶರಣೆಂದೆನಲ್ಲದೆ |
ತಿರುಕ ಹಾರುವನೆಂದೆನೆ
ಹೆತ್ತ ತಾಯಿಯ ಶಿರವ ತರಿದವನೆಂದೆನೆ
ವನವಾಸಕೆ ಭರದಿ ಚರಿಸಿದವನೆಂದೆನೆ
ಪೂತನಿಯ ಸರಕು ಮಾಡದೆ
ಕೊಂದ ಹರಿಯೆಂದೆನಲ್ಲದೆ ||೨||

ಚಿತ್ತಜಕೋಟಿ ಲಾವಣ್ಯ ಮುಪ್ಪುರದ
ಉತ್ತಮ ಸ್ತ್ರೀಯರ ವ್ರತವಳಿದು |
ಮತ್ತೆ ಕಲ್ಕಿಯಾಗಿ ಮಲೆತರ ಮಡುಹಿದ
ಹತ್ತವತಾರದ ಹರಿಯೆಂದೆನಲ್ಲದೆ |
ಬತ್ತಲೆ ನಿಂತವನೆಂದೆನೆ
ತೇಜಿಯನೇರಿ ಒತ್ತಿ ಬಾಹವನೆಂದೆನೆ
ಬಾರಿಬಾರಿಗೆ ಸತ್ತು ಹುಟ್ಟಿದವನೆಂದೆನೆ
ಆದಿಕೇಶವ ಭಕ್ತ ವತ್ಸಲನೆಂದು
ಪೊಗಳಿದೆನಲ್ಲದೆ ||೩||

---

ninna nAnEneMdeno – raMgayya raMga
ninna nAnEMdeno ||pa||

ninna nAnEneMde nigamagOcara svAmi
pannagaSayana pAlgaDaloDeyane raMga ||a.pa||

dhIra sOmaka vEdacOrana maDuhide |
vAridhigiLida parvatava potte |
dhAriNiyanu taMdu danuja dallaNanAde |
nArasiMha ninage namo eMbenallade |
nIra pokkavaneMdene –
bennina mEle BAra tALdavaneMdene –
maNNanu agidu bEra meddavaneMdene –
rakkasaroLu
hOrADidavaneMdu hogaLidenallade ||1||

dhareya dAnava bEDi nelava mUraDi mADi |
paraSu piDidu kShatriyara savari |
caraNadi pAShANa heNNu mADida |
puNya carita yAdava pati SaraNeMdenallade |
tiruka hAruvaneMdene –
hetta tAyiya Sirava taridavaneMdene –
vanavAsake Baradi carisidavaneMdene –
pUtaniya saraku mADade
koMda hariyeMdenallade ||2||

cittajakOTi lAvaNya muppurada
uttama strIyara vratavaLidu |
matte kalkiyAgi maletara maDuhida
hattavatArada hariyeMdenallade |
battale niMtavaneMdene –
tEjiyanEri otti bAhavaneMdene –
bAribArige sattu huTTidavaneMdene –
AdikESava Bakta vatsalaneMdu
pogaLidenallade ||3||