Jane nambide ispeta rani

Composer : Shri Shyamasundara dasaru

ಜಾಣೆ ನಂಬಿದೆ ಇಸ್ಪೇಟರಾಣೀ ನೀನೊಲಿದೆನ್ನ
ಪಾಣಿಯೊಳಗೆ ಬಂದು ಕಾಣಿಸಮ್ಮ [ಪ]

ವಾಣಿ ಶ್ರೀಲಕುಮೀಶ ರುದ್ರಾಯಣಿಯರಿಗಿಂತ
ಕ್ಷೋಣಿಯೊಳಗೆ ಬಹುಮಾನಿತೆ | ನೀನಮ್ಮ [ಅ.ಪ]

ಜನಕನು ಗಳಿಸಿದ ಧನವೆಲ್ಲಾ ಕಳಕೊಂಡೆ
ದನಕರ ಹೊಲಮನೆಯನು ಮಾರಿದೆ
ಜನರೊಳಗಪಹಾಸ್ಯಗೊಳಗಾದೆ ಕೇಳಮ್ಮ
ವನಿತೆ ಮಕ್ಕಳ ಕೈಲಿ ಕೊನೆಗೆ ಪರಟೆ ಕೊಟ್ಟೆ (೧)

ಉಣಲು ಅನ್ನವು ಕಾಣೆ | ಉಡಲು ವಸ್ತ್ರವು ಕಾಣೆ
ಕಡುಕಷ್ಟ ಕಡಲೋಳು ಮುಳುಗಿದೆ ನೋಡಮ್ಮ
ಪೊಡವಿಯೋಳ್ ನಿನ್ಹೊರತು ಕಡೆ ಹಾಯಿಸುವಂಥ
ಒಡೆಯರ ಕಾಣೆ ಕೈಪಿಡಿದು ರಕ್ಷಿಸೊ ನೀನಮ್ಮ ನೀನಮ್ಮ (೨)

ಎಷ್ಟೆಂತ ಹೇಳಲಿ ಮಡದಿಯ ಗೋಳಾಟ
ತಾಳಿ ಹೊರೆತು ಎಲ್ಲಾ ಹಾಳಾಯಿತು |
ಸಾಲ ಬಹಳಾಯಿತು ಜೋಳಿಗೆ ಬಂದಿತು
ಕೂಳಿಗೆ ಮನೆ ಮನೆ ಚಾಲುವರಿದೆನಮ್ಮಾ (೩)

ಚಾರರುಭಯರಲ್ಲಿ ಸೇರಿ ಬಂದಾಕ್ಷಣ
ಹಾರಿ ಹೋಗುವದಮ್ಮಾ ಪಕ್ಕಾರಂಗು
ಧಾರುಣೀಶರ ಮಧ್ಯ ತೋರೀದ ಸಮಯದಿ
ಆ ರಾಣಿ ವರ್ಗವ ಥರ ಥರ ನಡುಗಿಸುವಿ (೪)

ಅಕ್ಕರದಲಿ ಎರಡೆಕ್ಕದೊಳು ಬಂದು
ಪಕ್ಕನೆ ನೀ ಎನ್ನ ಕೈಯೊಳು ಬಾರೆ
ಮುಕ್ಕಣ ಸಖ ತನ್ನ ಬೊಕ್ಕಸದೊಳಗಿನ
ರೊಕ್ಕ ಹಾಕಲು ಅವನ ಲೆಕ್ಕಸೆ ನಮ್ಮ (೫)

ಕಾಮಿತ ದಾಯಿನಿ ಕಾಮಿನಿ ಶಿರೋಮಣಿ
ಶಾಮಸುಂದರ ಸಾರ್ವಭೌಮನ ರಾಣಿ
ಶ್ರೀಮಂತ ಜೋಕರನ ಪ್ರೇಮದ ಭಗಿನಿಯೆ
ನಾ ಮೊರೆ ಹೊಕ್ಕೆನು ನೀ ದಯಮಾಡು ತಾಯೆ (೬)

---

jANe naMbide ispETarANI nInolidenna
pANiyoLage baMdu kANisamma [pa]

vANi SrIlakumISa rudrAyaNiyarigiMta
kShONiyoLage bahumAnite | nInamma [a.pa]

janakanu gaLisida dhanavellA kaLakoMDe
danakara holamaneyanu mAride
janaroLagapahAsyagoLagAde kELamma
vanite makkaLa kaili konege paraTe koTTe (1)

uNalu annavu kANe | uDalu vastravu kANe
kaDukaShTa kaDalOLu muLugide nODamma
poDaviyOL ninhoratu kaDe hAyisuvaMtha
oDeyara kANe kaipiDidu rakShiso nInamma nInamma (2)

eShTeMta hELali maDadiya gOLATa
tALi horetu ellA hALAyitu |
sAla bahaLAyitu jOLige baMditu
kULige mane mane cAluvaridenammA (3)

cAraruBayaralli sEri baMdAkShaNa
hAri hOguvadammA pakkAraMgu
dhAruNISara madhya tOrIda samayadi
A rANi vargava thara thara naDugisuvi (4)

akkaradali eraDekkadoLu baMdu
pakkane nI enna kaiyoLu bAre
mukkaNa saKa tanna bokkasadoLagina
rokka hAkalu avana lekkase namma (5)

kAmita dAyini kAmini SirOmaNi
SAmasuMdara sArvaBaumana rANi
SrImaMta jOkarana prEmada Baginiye
nA more hokkenu nI dayamADu tAye (6)