Karuna sagara vishwa

Composer : Shri Jayesha vittala

ಕಿಚ್ಚಿನೊಳಗೆ ಬಿದ್ದ ಕೀಟಕನು ನಾನು
ಅಚ್ಯುತನೆ ಕಾಯೊ ಅನಂತನೆ ತೆಗೆಯೊ
ಗೋವಿಂದ ಹರಿ ಪೊರೆಯೊ ಪುರಂದರವಿಠಲ
ನೀ ಕರುಣವುಳ್ಳವನು ಕಾಣೊ ||

ಕರುಣಾಸಾಗರ ವಿಶ್ವ ಕಾಯೋ ಎನ್ನ ||ಪ||
ಪರಮಾತ್ಮ ನೀ ದೂರ ಮಾಡಿದರೆ ಗತಿಯೇನು |ಅ.ಪ|

ನಿನ್ನ ಲೋಕಕೆ ಎನ್ನ ವೈದಾಗ ಕರುಣಾತ್ಮ
ನಿನ್ನ ಕ್ರಿಯ ಗುಣ ರೂಪ ತೋರಿ ಎನಗೆ
ನಿನ್ನ ಪರಿವಾರ ಜನರಲ್ಲಿ ಸೇರಿಸಿ ಪರಮ
ಧನ್ಯನಾ ಮಾಡಯ್ಯ ಮದ್ಬಿಂಬ ಮಾರಮಣ ||೧||

ಸ್ಮೃತಿ ಜ್ಞಾನ ಮನ ಬುದ್ಧಿ ಮಾತ್ರ ಭೂತವು ಕರಣ
ಧಾತು ಸಪ್ತಕ ಪಂಚ ಕೋಶಗಳಲಿ
ಸತಿ ಸಹಿತ ಪ್ರಥಮಾಂಗನಲಿ ಕುಳಿತು ನೀ ಸತತ
ಪ್ರತಿ ತತ್ವ ವ್ಯಾಪಿಸಿ ಜೀವಕರ್ಮವ ಮಾಳ್ಪೆ ||೨||

ಚತುರ ದಶಲೋಕದಲಿ ಪ್ರತಿದೇಹ ರಥ ನಿನಗೆ
ಕೃತಿರಮಣ ಸರ್ವತ್ರ ನಿನ್ನ ಲೀಲಾ
ಅತಿ ಭಕ್ತಿಯಲಿ ಬ್ರಹ್ಮ ಸತಿ ರಮಣ ಸುರರೆಲ್ಲ
ಗತ ನಿದ್ರರಾಗಿನ್ನು ನೋಳ್ಪರೈ ಮಹಚಿತ್ರ ||೩||

ಕಂಡ ಕಡೆಯಲಿ ಪೂಜೆ ಭಂಡಾರ ತುಂಬಿಹುದು
ತೊಂಡ ವಿಧಿ ಶಿವ ಸುರರು ಸರ್ವತ್ರ ನಿನ್ನ
ಕಂಡು ಪೂಜಿಪರಯ್ಯಾ ಪೂರ್ಣ ವಿಭವಗಳಿಂದ
ಮಂಡೇ ಬಾಗಿದೆ ಭಕ್ತ ತಂಡದಲಿ ಇಡು ಎನ್ನ ||೪||

ಪೂಜ್ಯ ಪೂಜಕನಾಗಿ ಪರಿಪೂರ್ಣ ವೈಭವದಿ
ಪೂಜಿಸುವೆ ನಿನ್ನ ನೀ ಸರ್ವಕಾಲ
ಭೋಜ್ಯ ಭೋಕ್ತೃನಾಗಿ ಆನಂದ ಸಿರಿಗೀವೆ
ಅಜರುದ್ರ ಸುರಗಣಕೆ ಉಣಿಸಿ ||೫||

ಹದಿನೆಂಟು ನರಮುಖವು ಮಧ್ಯ ಗಜಮುಖ ದೇವ
ಪದವೆರೆಡು ಭುಜ ನಾಲ್ಕು ಪದುಮೆ ರಮಣ
ಉದಯಾರ್ಕ ಕಿರೀಟ ಕುಂಡಲಭೂಷ
ಗದೆ ಪದುಮ ಅರೆ ಶಂಖ ಮಣಿಯುಕ್ತ ಮಾಲಧರ ||೬||

ವಿಶ್ವ ತೈಜಸ ಮೂರ್ತಿ ಜಯೇಶವಿಠಲ
ವಿಶ್ವನಾಮಕ ವಿಶ್ವ ವ್ಯಾಪ್ತ ಗುಪ್ತ
ಉಚ್ಛ್ವಾಸ ಬಿಡುತಿಹೆನೊ ಉಡುಗಿ ಸಕಲ ಶಕ್ತಿ
ಉತ್ಸಾಹ ನೀಡಯ್ಯ ಸ್ವಾಂತರದಿ ಕಲೆತೆನ್ನ ||೭||

---

kiccinoLage bidda kITakanu nAnu
acyutane kAyo anaMtane tegeyo
gOviMda hari poreyo puraMdaraviThala
nI karuNavuLLavanu kANo ||

karuNAsAgara vishva kAyO enna ||pa||
paramAtma nI dUra mADidare gatiyEnu |a.pa|

ninna lOkake enna vaidAga karuNAtma
ninna kriya guNa rUpa tOri enage
ninna parivAra janaralli sErisi parama
dhanyanA mADayya madbiMba mAramaNa ||1||

smRuti j~jAna mana buddhi mAtra bhUtavu karaNa
dhAtu saptaka paMca kOshagaLali
sati sahita prathamAMganali kuLitu nI satata
prati tatva vyApisi jIvakarmava mALpe ||2||

catura dashalOkadali pratidEha ratha ninage
kRutiramaNa sarvatra ninna leelA
ati bhaktiyali brahma sati ramaNa surarella
gata nidrarAginnu nOLparai mahacitra ||3||

kaMDa kaDeyali pUje bhaMDAra tuMbihudu
toMDa vidhi shiva suraru sarvatra ninna
kaMDu pUjiparayyA pUrNa vibhavagaLiMda
maMDE bAgide bhakta taMDadali iDu enna ||4||

pUjya pUjakanAgi paripUrNa vaibhavadi
pUjisuve ninna nI sarvakAla
bhOjya bhOktRunAgi AnaMda sirigIve
ajarudra suragaNake uNisi ||5||

hadineMTu naramukhavu madhya gajamukha dEva
padavereDu bhuja nAlku padume ramaNa
udayArka kirITa kuMDalabhUSha
gade paduma are shaMkha maNiyukta mAladhara ||6||

vishva taijasa mUrti jayEshaviThala
vishvanAmaka vishva vyApta gupta
ucChvAsa biDutiheno uDugi sakala shakti
utsAha nIDayya svAMtaradi kaletenna ||7||