Madhwantargata vedavyasa

Composer : Shri Vadirajaru

ಮಧ್ವಾಂತರ್ಗತ ವೇದವ್ಯಾಸ ಕಾಯೊ
ಶುದ್ಧ ಮೂರುತಿಯೆ ಸರ್ವೇಶ ||ಪ||
ಶ್ರದ್ಧೆಯಿಂದಲಿ ನಿನ್ನ ಭಜಿಪ ಭಕ್ತಗೆ
ಬುದ್ಧ್ಯಾದಿಗಳ ಕೊಟ್ಟು ಉದ್ಧರಿಸೋ ದೇವರ ದೇವ ||ಅ.ಪ||

ದ್ವಾಪರದಲಿ ಒಬ್ಬ ಮುನಿಪ ತನ್ನ ಕೋಪದಿಂದಲಿ ಕೊಟ್ಟ ಶಾಪ
ಶಾಪಿಸಲು ಜ್ಞಾನ ಲೋಪ ವಾಗೆ, ಅಪಾರ ತತ್ತ್ವಸ್ವರೂಪ
ಶ್ರೀಪತಿಯೇ ಕಾಯೆಂದು ಮೊರೆಯಿಡೆ ಪಾಪ ವಿರಹಿತಳಾದ ಯಮುನೆಯ
ದ್ವೀಪದಲಿ ಅಂಬಿಗರ ಪೆಣ್ಣಿನ ರೂಪಗೊಲಿದವನಲ್ಲಿ ಜನಿಸಿದೆ || ೧ ||

ವೇದವಾದಿಗಳೆಲ್ಲ ಕೆಡಲು ತತ್ತ್ವ-ವಾದಿ ಜನರು ಬಾಯ ಬಿಡಲು
ಮೇದಿನಿ ಸುರರು ಮೊರೆಯಿಡಲು , ನಾನಾ ವೇದ ವಿಭಾಗ ರಚಿಸಲು
ಮೋದದಿಂದ ತದರ್ಥಬೋಧಕ ವಾದ ಸೂತ್ರ ಪುರಾಣ ರಚಿಸಿ
ವಾದಿಗಳ ನಿರ್ವಾದ ಮಾಡಿದ ಸಾಧು ವಂದಿತ ಬಾದರಾಯಣ || ೨ ||

ಸುಮತಿಗಳಿಗೆ ನೀ ಬೋಧಿಸಿದೆ ಮಿಕ್ಕ ಕುಮತಿಗಳನು ನೀ ಛೇದಿಸಿದೆ
ಕ್ರಿಮಿಯಿಂದ ರಾಜ್ಯವಾಳಿಸಿದ ಜಗತ್ ಸ್ವಾಮಿ ನೀನೆಂದು ತೋರಿಸಿದೆ
ವಿಮಲರೂಪನೆ ಕಮಲನಾಭನೆ ರಮೆಯ ಅರಸನೆ ರಮ್ಯಚರಿತನೆ
ಮಮತೆಯಲಿ ಕೊಡು ಕಾಮಿತಾರ್ಥವ ನಮಿಸುವೆನು ಹಯವದನ ಮೂರುತಿ || ೩ ||

---

madhvAMtargata vEdavyAsa kAyo
Suddha mUrutiye sarvESa ||pa||
SraddheyiMdali ninna Bajipa Baktage
buddhyAdigaLa koTTu uddharisO dEvara dEva ||a.pa||

dvAparadali obba munipa tanna kOpadiMdali koTTa SApa
SApisalu j~jAna lOpa vAge, apAra tattvasvarUpa
SrIpatiyE kAyeMdu moreyiDe pApa virahitaLAda yamuneya
dvIpadali aMbigara peNNina rUpagolidavanalli janiside || 1 ||

vEdavAdigaLella keDalu tattva-vAdi janaru bAya biDalu
mEdini suraru moreyiDalu , nAnA vEda viBAga racisalu
mOdadiMda tadarthabOdhaka vAda sUtra purANa racisi
vAdigaLa nirvAda mADida sAdhu vaMdita bAdarAyaNa || 2 ||

sumatigaLige nI bOdhiside mikka kumatigaLanu nI CEdiside
krimiyiMda rAjyavALisida jagat svAmi nIneMdu tOriside
vimalarUpane kamalanABane rameya arasane ramyacaritane
mamateyali koDu kAmitArthava namisuvenu hayavadana mUruti || 3 ||