Gopakumarashtaka – Haadu 13

From Shri Bannanje Govindacharya’s 14 haadugaLu book

ಗೋಪಕುಮಾರಾಷ್ಟಕ

ಗೋಪಿಕಾಸ್ತನಮಂಡಲಾರ್ಪಿತಕುಂಕುಮಾರುಣವಕ್ಷಸಂ

ಗೋಪಗೀತಿವಿಶಾರದಂ ಸ್ಮಿತಶೋಭಿಸನ್ಮುಖಪಂಕಜಂ |

ಗೋಪಗೋಗಣವಲ್ಲಭಂ ಧೃತನೃತ್ತಕಂ ಕಮಲೇಕ್ಷಣಂ

ಗೋಪವೇಷವಿಡಂಬನಂ ಪ್ರಣಮಾಮಿ ಗೋಪಕುಮಾರಕಮ್ ||೧||

ವಿದ್ರುಮಪ್ರತಿಮಾಮಲಾಧರಪಲ್ಲವಾರ್ಪಿತವೇಣುನಾ

ವಿದ್ರುಮಾಭಿರುತೈಃ ಸದಾ ಪರಿಗೀಯಮಾನನಿಜಾಕೃತಿಮ್|

ವಿದ್ರುಮಕ್ಷಿತಿಭಾನುಮಂಡಲಚಂಡಪಾವಕಮಚ್ಯುತಂ

ಗೋಪವೇಷವಿಡಂಬನಂ ಪ್ರಣಮಾಮಿ ಗೋಪಕುಮಾರಕಮ್ ||೨||

ರುಗ್ಮಿಣೀವದನಾಂಬುಜಾಸವಪಾನಮತ್ತಮಧುವ್ರತಂ

ತಿಗ್ಮದೀಧಿತಿಮಂಡಲೋಪಮಕುಂಡಲದ್ವಯಮಂಡಿತಮ್ |

ರುಗ್ಮಮಾಲಿನಮುಲ್ಲಸತ್ ಕನಕಾಂಗದಾದಿವಿರಾಜಿತಂ

ಗೋಪವೇಷವಿಡಂಬನಂ ಪ್ರಣಮಾಮಿ ಗೋಪಕುಮಾರಕಮ್ ||೩||

ವೇದವಾದರತೈಃ ಸದಾ ಪರಿಗೀಯಮಾನನಿಜಾಕೃತಿಂ

ಸಾದಿತಾಖಿಲದೈತ್ಯದಾನವಯೂಥಮಂಡಜವಾಹನಮ್ |

ಯಾದವೇಂದ್ರಕುಲೇ~ವತೀರ್ಣಮನಂತಮವ್ಯಯಮಚ್ಯುತಂ

ಗೋಪವೇಷವಿಡಂಬನಂ ಪ್ರಣಮಾಮಿ ಗೋಪಕುಮಾರಕಮ್  ||೪||

ದೇವಕೀಜಠರೋದಯಾದ್ಯುದಿತೋಡುರಾಜಮನಾಮಯಂ

ದೇವಸಿದ್ಧಮುನೀಂದ್ರಸದ್ಧೃದಯಾಬ್ಜಬೋಧಿದಿವಾಕರಮ್ | 

ಪಾವನೀಯತಮಾಕೃತಿಂ ಕೃತಿನಾಂ ಗತಿಂ ಗತಿಮೀಯುಷಾಂ

ಗೋಪವೇಷವಿಡಂಬನಂ ಪ್ರಣಮಾಮಿ ಗೋಪಕುಮಾರಕಮ್  ||೫||

ಕುಂಜರೇಂದ್ರನಿಪಾತನೋತ್ಥಿತಚಂದನಾರ್ದ್ರಭುಜದ್ವಯಂ 

ಮಂಜುಶಿಂಜಿತನೂಪುರಧ್ವನಿನಾದಿತಾಖಿಲದಿಙ್ಮುಖಮ್ |

ಅಂಜನಾಭಮಜಾದಿಭಿರ್ಮನಸಾ ವಿಚಿಂತ್ಯಪದದ್ವಯಂ

ಗೋಪವೇಷವಿಡಂಬನಂ ಪ್ರಣಮಾಮಿ ಗೋಪಕುಮಾರಕಮ್  ||೬||

ನೀಲನೀರದನಿರ್ಮಲಾಕೃತಿಮರ್ಜುನಪ್ರಿಯಸಾರಥಿಂ

ಮಾಲತೀಕುಸುಮಾಕರಾರ್ಪಿತನೀಲಕುಂತಳಮುನ್ನಸಮ್ |

ಕಾಲಿಯಾಖ್ಯಫಣೀಂದ್ರಮಸ್ತಕನೃತ್ತಲೋಲಮಲೋಲುಪಂ

ಗೋಪವೇಷವಿಡಂಬನಂ ಪ್ರಣಮಾಮಿ ಗೋಪಕುಮಾರಕಮ್  ||೭||

ಸುಂದರೇ ಸುರಪೂಜಿತೇ ಸ್ವಲಿವೃಂದಗೀತಿವಿಶಾರದೇ

ಮಂದಮಾರುತವೀಜಿತೇ ನವಮಂಜರೀಭಿರಲಂಕೃತೇ |

ನಂದನಪ್ರತಿಮೇ ವನೇ ವಿಹರಂತಮುತ್ತಮಪೂರುಷಂ

ಗೋಪವೇಷವಿಡಂಬನಂ ಪ್ರಣಮಾಮಿ ಗೋಪಕುಮಾರಕಮ್  ||೮||

ಯಃ ಪಠೇದಿದಮಷ್ಟಕಂ ಪ್ರಣಿಪತ್ಯ ಗೋಪಕುಮಾರಕಂ

ದುಷ್ಟದೈತ್ಯವಿನಾಶನಾಯ ಗೃಹೀತಮಾನುಷವಿಗ್ರಹಮ್ |

ಶಕ್ರಶರ್ವಪುರೋಗಮೈರಭಿಚಿಂತ್ಯಮಾನಮಹರ್ನಿಶಂ

ತತ್ಪದಂ ಪ್ರತಿಯಾತ್ಯಸೌ ಪರಿಹೃತ್ಯ ಸಂಸೃತಿಸಾಗರಮ್ ||೯||

        ಮಧ್ವೇಶಾರ್ಪಣಮಸ್ತು ||